رواية ذنوب لاتغفر الفصل العاشر 10 - بقلم Rozaya1122

#البارت التاسع
#ذنوب لاتغفر
#للكاتبه《روزاية》

جرني من ايدي واخذني للجربايه واني اسحب بنفسي..
كتله ثابت لايجي احد وهسه نعيمه تكلب الدنيا على راسي...

ولج وتالي وياج بين كلمه والثانيه وكلتي نعيمه..
اليوم اريد اشوف نعيمه شتسوي؟؟

جرني لحظنه صرت على صدره..
ما اعرف ليش خايفه؟؟
لان تأخرت وثابت يخوف كلش غامض..
حس بتوتري ابتعد عني وكعدنه على الجربايه..
.. كال شبيج تقوى؟؟
.. انت شبيك؟؟
.. اني اسألج موترجعيلي السؤال..
.. ثابت اني كلشي مامفتهمه منك مرات تصير حباب ومرات لا..
وشفت الكل يخاف منك..
وحتى احسك ماتحبني مجرد خطوبه عاديه..
.. صفن بوجهي وضل يتمعن بملامحي ..
كال تقوى اني احبج بس طبيعتي هيج..
ما ابين مشاعري ..
ما اريد يصير عندج شك بحبي ولو ذره ..
اني لوما احبج واريدج ما خطبتج واتحملت طلبات نعيمه..
بس طبيعتي هيج ماعندي اقوال كلهه افعال...
ابد ما اكدر اعبر واحجي عن الي بداخلي..
صيري وياي لاتصيرين ضدي...

.. اني وياك ثابت بس غير حالي حال المخطوبين حتى احبج مادكولهه ..
وشكد يسألني بنات عمي واسكت عبالك اشخاص عاديين اني وياك..

شفته جر حسره قويه ...
وضمني لصدره وباسني من راسي..
لحظات هدوء واحساسي حلو وكلبي يتراقص من الفرح...

سمعت تليفوني يتصل ابتعدت عنه شفت غاده تتصل جاوبتهه كالت امي خبصت الدنيا وينج..
كتلهه جايه..

سديته منهه واني خايفه حيل...
كتله ثابت الله عليك وديني والله تموتني اليوم...
كال اكو واحد يموتج واني موجود ..
امشي خلي نروح...
نزلت قبله سلمت عليهم وطلع وراي  ..
يحجي وياي واني بالي يم نعيمه شيخلصني منهه...
فتحت الباب و سلمت علي ودخلت ...
بعدني انزع بحذائي بباب المطبخ..
ماحسيت غير جره شعري كام الضرب ما اعرف منين يجي ...
ملختني نعيمه واني اصيح وبناتهه يدفعن بيهه وهي جنهه تريله ماتتحرك...
كوه خلصتني منهه غاده كمت اريد اصعد لغرفتي..
لحكتني وسحبتني اني فلتت من ايدهه انظريت بخاصرتي بحافه الدرج..
شاغت روحي كمت ابجي بقوه واصيح ..
من شافتني هيج عافتني وراحت وبناتهه يكومن بيه...
احس روحي تريد تطلع من الالم ...
عمي بيومهه ماموجود رايح لصديقه مسوي عمليه...
شفت غسق طلعت تليفوني وتخابر ...
واني كاعده بمكاني الوب من الالم اريد اكوم ما اكدر..
دقايق واندك الباب ركض باقر فتحه كال هذا ثابت...
نعيمه خاتله بالغرفه وماطلعت بس غاده سمعتهه كالتله تفضل...
اني على كعدتي يم الدرج...
طب شافني شلون حاله حالتي ...
كعد بمستواي ولزمني من اكتافي كال منو سوه هيج بيج؟؟
ما اكدر اكول نعيمه خطيه غاده تأشرلي عود ما احجي..
كتله وكعت...

كومني هو وغسق واخذني ويا كال لغسق راح اخذهه للمستشفى واذا اجه ابوج كليله اريد احجي ويا...
صعدني بالسياره واني مثل الطير المذبوح لازمه خاصرتي واون ...
حرك السياره وكلساع يكلي هاي نعيمه موو؟؟
واني اكله لا...

كتله لاتاخذني للمستشفى بس اضربني ابره الم ..
ماقبل بس اني اصريت ما اروح ..
المستشفى سين وجيم...
اخذني للمضمد وجابلي ابره الم وضربتني مره المضمد ...
حسيت الالم خف..
رجعنه واباوعله شكد عصبي وعيونه حمر..
حته خفت منه..
كتله ثابت لاتصير عصبي ولاتتهور ترى عمي يريد حجه على خطوبتنه ويخربهه...
لخاطري حباب..

ولج متشوفين حالتج شلونهه ..
منو هي نعيمه وتمد ايدهه عليج ويهد ويريد يتعارك واني اتوسله...
ماقنعته الا شفت الموت...

رغم الالم الي بجسمي بس فرحت من شفت القلق بعيونه وشلون مهتم بيه...

رجعني للبيت وتلكا عمي ..
عفتهم يحجون وطبيت بس اسمع صوت ثابت عالي..
صعدت لغرفتي ويمي غاده...
سمعت عمي يسب ويشتم بيه
اني تالي عمري ثابت يرزلني من وراج بنت سناء..
من جاب طاري امي بجيت شكد جانت ادافعلي حته ما انظرب ...
ضل ثابت كلساع يطمئن عليه لحدما غفيت ...

ثاني يوم كالعاده ولاكانما صاير شي
بدت اوامر وطلبات نعيمه ..
التهيت بالشغل وثابت حسسني بقيمتي واهتمامه كلساع يخابر ويسأل شلونج..

العصر اجت فاطمه وبنت علي مريم..
كعدت وي فاطمه  ومريم وي البنات نعيمه ماموجوده...
ضلينه نسولف اني وياهه...
بس اكو هواي شغلات ادور ابالي...
كلت لفاطمه...

اريدج تحجيلي عن ثابت ليش هلكد عصبي وتخافون منه...
وعلى الرغم هو مو الجبير؟؟
حاولت تغير الموضوع بس اني جنت مصره اعرف...

كالت تقوى احجيلج بس ديري بالج يطلع الحجي والله يلعب بيه جوله..

ثابت من زغره هيج قليل الكلام والضحك حتى مايكعد ويانه هواي...
وقله يتناقش بأمور...
شكد حاول ابوب الله يرحمه يغير من طبعه وماكدر...
حتى من خطب دنيا جانت تشكي منه دكول مايتغزل بيه ولا يكول حبيبتي وكلامه رسمي..
ومن خانته وي صديقه زاد اكثر..
قليل الثقه ودائما يشك...
وجان رافض الزواج نهائي بس من شافت غير رأيه...
مايحب واحد يحجي على الثاني وناخذ اعراض الناس لذلك نسكت..
ونظامي الى ابعد حد...
اذا اجه ومالكه قميصه بمكانه تنكلب علينه كربلا

تقوى انتي بعدج زغيره تكدرين تكسبي وتغيري..
اعرف اخوي مايعبر عن مشاعره ابد..
كلشي عنده مضموم ومحد يعرف عن حياه ثابت بكد الشعره...
بس انشوفه ظاهري..
بس السبب وليش صار هيج مانعرف...
مع العلم من جان زغير قبل مايصيؤ بالمدرسه دكول امي ضحكته ماتفارك وجهه...
بس ليش تغير وصار بهاي القساوه مانعرف...
اخذي حذر منه ترى اذا يكتل مايرحم
بس والله كلبه طيب ...
مايحب الغلط.. وخاصه تعرض للخيانه طبيعي يصير شكاك...

هي تحجي واني صافنه شلون اعيش ويا..
دب الخوف بجسمي ...
بس رغم الي حجته بس اكو سر ثاني خلا هيج قاسي..
نادرا مايضحك والا شي يستوجب الضحك...
ثابت ياترى شنو السر الي وراك وشمضوم الي وشراح اشوف وياك؟؟

راحت فاطمه قبل لاتجي نعيمه...
التهيت وي البنات بس بالي وفكري كله يم ثابت..

بهاي الايام اهل ثابت هم حاجو عمي وماقبل نتزوج كال اني كتلكم اكثر من سنه الخطوبه وانتو قبلتو بعد شكو يوميه دازيلي ناس مايعجبكم طلكواا...

صار وقتي ملل صح نتخابر اني وثابت ونادرا مايتغزل بس اعرف بي يحبني ويخاف عليه..
صار عندي فراغ وطلعه ماكو ..ولاصديقه غير بنات عمي نعيمه حابستني بالبيت لاطلعه ولامشيه...

وزني الشيطان مدري عقلي تنكه...
رجعت نزلت برنامج تواصل وكمت اتلهى بيهم بس بدون علم ثابت لان اعرف بي مايقبل وكلت هو شمدري من نلتقي اخفيهم...
على الرغم مابيناتنه كل لقاء بس نتخابر..
اذا نعيمه الله مسلطهه عليه وماتجوز مني..

كمت ادخل كروبات مشتركه بس ابد ما اعلق ولا انطي اعجاب بمنشورات الشباب بس بالبنات..
اكثر من كروب اكو..
الي مختلط والي بس بنات...
تعرفت على بنيه  دائما نعلق بنفس المنشور وصارت صديقتي...
تعرفنه اكثر.. ويوميه نحجي اسمهه أنس ..
مره من المرات جنه نحجي وكتلهه اني جنت اداوم بشركه ...
كالت اختي هم اداوم بشركه...
كتلهه منو اختج ...
كالت  اسمهه ازل...

بوقتهه تفاجأت حيل وخفت منهه خاف تطلع مثل اختهه...
بس مبينه البنيه حبابه...
ماكتلهه اني جنت وي اختج كلت حتى ماتسببلب مشاكل...
على اساس افتهم واتصرفت صح..

مرت فتره واحنه على حالنه توسعت بالكروبات وكمت اشارك وانشر وصرا ادمن بواحد من الكروبات ولحد الان الكروب معروف ومختلط...

كمت احس صار عندي برود بعلاقتنه ...
انتبه عليه ثابت وضل يوميه يسألني واحجيله تفاصيل يومي...
كام كل مايجي يلكاني متصله بنت...
يكول انتي ماعندج برامج غير الفايبر شدعوه هلكد فاتحه وشتسوين؟؟
جنت اختنك من يحاسبني واريد انفجر علي ..

يوميه اطلع حجه لو اشوف مسلسل لو مدري شنو؟؟
كلت خلي اقنعه اسوي فيس على الاقل بعلمه...
بعد معاناه طويله قنعته وسويت صفحه والرمز يعرفه هو وبين مده ومده يفتحهه ويشوفهه ...
بس صفحتي الاساسيه ضلت وكل تواصلي بيهه ...

اكثر من مره نتعارك على موضوع النت ...
ليش فاتحه؟ وشسوين بي؟ ودزيلي صوره اذا صدك تشوفين مسلسل ؟ وبين كل مده ومده لازم اصور محادثاتي وادزهن...

والشغله الاكبر الي صارت بعد ماتعاركنه من ورا هاي السالفه ويكول تعاندين..
كام مايقبل افتح نت الا بعلمه اذا لكه فاتحه نت بدون موافقته تنكلب الدنيا عليه...
كمت ادزله رساله اريد افتح نت مرات يقبل ومرات لا...
اكثر مشاكلنه صارت من ورا الانترنيت ...

كمت احس نفسي خاينه ودا اسوي شي غلط...
بس موهاي البنات كلهن عدهم برامج هو ليش حابسني...
ما اعرف بهذا الوقت شجاني وسويت هيج؟
اتمنيت ثابت كاشفني من اول يوم وكاتلني ولا مستمره!!

بيوم نتخابر اني وثابت كال راح اسافر عندي شغل مده شهر بعمان...
اكمله وارجع نحجي وي عمج بلكي يوافق كافي الشيب ترس  راسي واني كاعد انتظر...

سافر ثابت وزاد الملل والفراغ تجي يمي فاطمه بس شوي وتروح طلعه ممنوعه هاي اوامر نعيمو...
غاده وغسق اثنينهم انقبلو كليه تربيه
وحده عربي وحده اجتماعيات...
يعني النهار كله وحدي وبليل تعبانات لو يكنكن لو يقرن...
واني افتر بين حياطين البيت...

صار وقتي كله انترنيت...
ليل نهار مكنكه وخاصه بالانستا...
اكو واحد دائما من اعلق يرد عليه ...
مرات يدخلي خاص ..
هو مسافر خارج العراق..
صرنه مثل الاصدقاء ودائما يحجيلي عن حياته... بس مايعرف شي عن حياتي..

صار كل وقتي احجي ويا اسمه احمد الزيدي..
مجرد صداقه ماكو اي حجي موزين..
او سوالف حب وماحب... وصداقتي وي انس مستمره واسولفلهه على احمد...وهي تحجيلي عن حبيبهه ..

رجع ثابت من السفر بس احس كلشي متغير ...
بارده حيل وي ثابت...
ويحاسبني على اتفه الاسباب ويوميه مشكله...
اني اكول علي شكاك وهو يكول تصرفاتج غلط...
كل هذا وما بطلت من برامج التواصل ...

انس كالت وين بيتكم اريد اجي اشوفج ...
دليتهه ابتنه وصدك اجتني هي  وامهه..
هي بعمري وحلوه حيل..
عائلتهم من النوع المتحرره لذلك جانت ازل تلبس بكيفهه...
كالت ازل تزوجت بغير محافظه وقليل نشوفهه...

امهه معلمه ونعيمه تحب العوائل الطاكه ...
ماكتلهه عن طريق الفيس كتلهه اختهه وياي بالشركه...
كامت كل مده وتجيني ونكعد نسولف وتحجيلي عن خطيبهه وبعدين حجيتلهه عن ثابت ...
غاده وغسق ابتعدت عنهن كل وقتهن دوام لو قرايه ...
حته ما احجيلهن مثل قبل...

ثابت علاقتي مره ويا ...
مرات اكول لو اعوفه وارتاح شلون اكمل ويا عمر كامل....
بيوم جنت اراسل احمد كال راح اجي للعراق اذا اجيت اكدر اشوفج...
وطبعه مرح ويتشاقه وصديقتي ومدري شنو؟؟

كتله مستحيل اطلع ...وهو يقنعني واني رافضه
منين اطلع ونعيمه وثابت غير يسووني ووصل ويشمروني بالشارع...

حجيت لانس كالت اي تعالي الي ونطلع اني وياج نشتري ملابس وشوفي عادي هو صديق قابل تكعدين ويا هو بس تشوفي...

فكرت بثابت شراح اكله ...
حجيتله عن انس ومن سمع بيهه اخت ازل تخبل على الرغم البنيه بلاخير تحجبت وعقلت بس ماخذ عليهه نظره موزينه...

ضليت اقنع بي  انس مومثل اختهه وعائلتهم متحرره ومدري شنو ..
كتله راح تنخطب بس اروح اباركلهه بالموت الاحمر يله وافق وكال متروحين وحدج اخذي نعيمه وياج...

حجيت وي نعيمه وافقت تكيف على التخامه والاكل...
رحنه اني وياهه لبيت انس وفرحو بينه ...
وثابت صح وافق اروح بس ضل كالب وجهه عليه..

مرت ايام ورجع احمد للعراق ويلح عليه خلي اشوفج واني ما اكدر ...
كال حتلو بالمول بحجه تشترين ملابس...
صدك رحت وي نعيمه بعد موافقه ثابت صادف عد واريد اخذ ملابس...
رحنه للمول واني متفقه ويا ..
شفته واكف ويا ولد...
اني شايفته بالصور لذلك عرفته...
ضل يباوعلي واشوف صديقه كلساع ومدري شيحاجي...

كمنه نفتر ويفتر ورانه لحد ماكملنه وطلعنه...
رجعت للبيت خابرني ثابت حجيت ويا شويه وكتله اريد افتح نت ...
كال شسوين بي؟؟
كتله اريد اشوف تسريحات ومكياج...

قبل افتح ...
اول مافتحت لكيت رسائل من احمد ...
ماتوقعتج هيج حلوه فدوه لله سنفوره وترفه!!

جانت هاي الكلمات مفرحه الي ..
رغم ثابت حاجيهن الي كلهن ومايسميني غير كتكوتي...
بس ليش مشيت بهذا الدرب وحتى مشاعر ما عندي اتجاه احمد مجرد لهو...

بالفتره الاخيره زادت سفرات ثابت لان وسعوا الشركه...
وتعاقدو وي شركه اردنيه بين كل فتره وسافر
شهر لو اقل ويرجع مرات هو ومرات اخو علي...

احمد بهاي الفتره هواي طلب مني نلتقي بمكان عام ويحجي وياي وما اكدر اكله اني مخطوبه...
جنت كلشي احجي لانس وتشجعني ..ما اعرف ليش صار هيج خلال 3 اشهر انكلبت حياتي رأسآ على عقب..
استغليت الفرصه ثابت مسافر ونعيمه راحت لاختهه تبات يمهه..
وطلبت من عمي اروح يم انس ووصلني لبيتهم ومناك طلعنه اني وياهه 
افترينه بالمحلات واحمد وصديقه ورانه
رجعت انس لبيتهم واني واكفه على الشارع اريد اصعد سياره ارجع للبيت...
ياريت بهذا الوقت ضربتني سياره وماخلتلي اثر...
ياريت الله اخذ عمري ولا شفت هذا اليوم...

بعدني واكفه انتظر سياره...
وكفتلي سياره واجاني صوت ... اصعدي بسرعه...
فتحت عيوني على وسعهن ...
احس كل اطرافي صابهه زمهرير
ضليت اتلفت منا ومنا اريد واحد يخلصني ماكو...
الظاهر ياتقوى راح ادفعين ثمن غبائج بهاي اللحظه؟؟

#يتبع

توقعاتكم منو ابو السياره؟؟
وشراح يصير بيهه