رواية ذنوب لاتغفر الفصل التاسع عشر 19 - بقلم Rozaya1122

#البارت الثامن عشر
#ذنوب لاتغفر
#للكاتبه《روزاية》

مع انك همي الذي حملت
وذنبي الذي ارتكبت..
لا اتوقف عن الشوق اليك...
والتحديق في خيالك...
خيالك الذي لا استطيع تركه..
اصبح جليسي وقرين وقتي..
له اشكو شوقي وحاجتي..
ومنه استمد قوتي..
اشتقت اليك والشوق يقتلني..
لكني طوال الوقت اواسي نفسي..
بوعدك الذي وعدتني...
فأقول لابأس ستعود.........

""""""""""""""""""""""""""""""""

ثاني يوم الصبح اتجمعت الناس واحس حيلي انهد...
الحجيه كلساع تتخربط فاطمه العيون مورمه...
الكل يبجي الصغير والجبير...

كاعدين نتتظر كالو اجو الولد ركضنه مفزوعين عليهم...
بدون وعي ركضت لعلي اتوسل بي وين ثابت...
اشوف دموعه كامت توكع بيده...

وعامر مخلي ايده على عيونه...
صاحت فاطمه ولكم اريد اخوي علي جيبلي ثابت ...

حضنهه علي كال ماكو مااله اي اثر ماخلينه لا مستشفيات ولا مراكز ما بلغنه ماكو عبالك فص ملح وذاب...

الحجيه من سمعت هيج وكعت وركضوا عليهه..
اني كرفصت بالزاويه مال المطبخ وخليت راسي بين رجليه احس عيوني راح ينقلعن من مكانهن...
الحجيه ساءت حالتهه ونقلوهه للمستشفى...
ابتهال وفاطمه ملخن نفسهن ..
كمت عليهن كتلهن موزين على ثابت لاتسوون هيج...
هسه يرجع هو كال ما اعوفج ويدري بيه انتظره يوميه...
اباوع لدنيا حالتهه مثلي ..
ام بسمه تبجي...
الغريب والقريب يدعي يرجع ثابت..

الا اخته انسام بعين وقحه راحت للغرفه دكول شنو هالكأبه لو ارجع لبيتي احسن...
بوقتهه ردت اكوم اطلع قهري بيهه بس اتعوذت من الشيطان...

نسوان عمامه وعماته يهدن بيه وبفاطمه ...
لليل جابو الحجيه سوده عليه حالتهه ماتسر وجهه اصفر ..
شيباتهه طالعات من الشيله ..
كمت تلكيتهه بس شافتني بجت اخذتهه لغرفتهه
وكعدنه يمهه افرك بأيدهه ..
دكلي يمه انتي يتيمه ادعيله ربج مايرد دعوتج...
اجت نعيمه وغاده بليل..
حضنتني غاده واني حالتي حاله ابجي والكل يبجي على حالتي .....
ياربي هاي الكاعده اول اعدائي لاتخليهه تشمت بيه...
لخاطر هاي الوالده الي جفت دموعهه رجعه سالم...
عمي صاير يعرف الاصول ومأجل مشيه غسق

كلساع اركض على علي هو يشوفني يحبس دمعته كوه...
هم اجه الليل وثابت ماكو ياربي اول مره انام بحضنه ليله وحده بس!!
حته مالحكت اتهنه ليش مكتوبلي الحزن وابقى طول عمري هيج؟؟؟

ماكدرنه انام للصبح الي كاعد يبجي والي كاعد يدعي ويصلي...

هاي ثاني ليله وثابت ما اعرف عنه شي ..
البيت هوسه وغير عمامهم الي باتوا يمنه...

صبح الصبح وجابت لقاء الريوك وهم ما اكلت من يوم الي ما اجه ماحطيت بحلكي غير المي...

كامن يحجن عليه اكلي موزين عليج وان شاء الله يرجع بالسلامه...
ابد ما اكلت وين الي نفس واخلي شي بحلكي..
واني ما ادري بثابت شبعان جوعان؟؟

كمت اريد اشوف خالتي ماحسيت بشي بسرعه وكعت...
ما فتحت عيوني غير بالطوارئ وشاديلي مغذي...
كاعده كبالي ابتهال كتلهه ما اجه ثابت؟؟
خلت ايدهه على راسي كالت يجي لاتخافين ..
اخوي اعرفه سبع ومايخاف من شي ...
بس ديري بالج على نفسج ترى قطعه من ثابت ابطنج...

هي كالت هيج واني دموعي كامت تسابق كتلهه حامل اني؟؟

اي حبيبتي حامل وان شاء الله يجي ثابت وتبشري ويفرح...
.. كمت ااشهك بالبجي ياربي حتى فرحتي ماتكمل كلشي ما اريد بس رجعلي ثابت...

طلعوني للبيت وابتهال خبرت البيت كله ..
وكامن يحجن اكلي ومايصير وموزين على الطفل...
خبر الحمل زاد حاله البيت سوء ...
الحجيه تخربطت وتبجي وتصيح وليدي مالحك يفرح..
ولد الحرام ماعافوا بحاله...
هذا اليوم جان عصيب انهاريت ملخت نفسي على حجي خالتي وتمدح بي وياوليدي ....
ماخلت دموع بعيونه...
حسيت على شهكه وحده تبجي بحرقه رفعت راسي شفتهه دنيا كلش متأثره ...

مر اسبوع على نفس الحال ثابت ماكو ...
الحزن مخيم على البيت اني مانشف دمعي ابد...
نعيمه تروح وتجي ودكول عمج يكول خلي تجي يمنه مايصير تبقه ورجلهه ماموجود..

بوقتهه انفعلت حيل وكدام الكل حجيت يمكن الحمل والضغط والصار خله اعصابي تنهار...

كتلهه ليش صار يعرف الاصول عمي ..
كليله على جثتي ما اطلع من غرفتي وانتي لايوميه تجين تشمتين وتروحين ...
ثابت يرجع واول ما اخلي يخليلج حد انتي وعمي...
وامشي طلعي برا ما اكدر اشوفج...
وكمت املخ بشعري...
لزمتني فاطمه ولقاء...
ونعيمه طلعت ادردم ...
محتاجه ثابت حيل اريد احضنه واشكيله اشفت بهذا الاسبوع...
روحي تفرفرح علي مثل ام وضاع منهه ابنهه ..
لويخلوني اطلع اهج بالشارع ...
اعصابي تلفت

الشركه معزله المعمل معزل شغلهم وكف..
طلع ثابت العمود الفقري لهاي العائله...

بيوم جنت كاعده اقره قران العصر واسمع صوت عركه زلم وصياح...
نزلت واشوف الكل متجمع بالصاله...
وعلي كاعد بالكاع ويضرب على راسه ويصيح..
يا اخوي ياسندي ولك ثابت انكسر ظهري وين رحت...
عمامه يهدون بي وهو منهار ..
رجال شكبره طول بعرض هيج حالته ...
اسأل شكو محد يحجي...بس صوت علي وكسرته شكبرهه....

اخذتني افراح للغرفه كالت موزين عليج اكعدي هنا...
كتلهه ولج احجيلي لا اكوم احرك نفسي..
ولج شحجيلج متشوفين الوضع شلونه اهدئي خلي افتهم واحجيلج....
مااتحملت طلعت للصاله لكيت الزلم رايحين بس النسوان تبجي...
كعدت يم خالتي كتلهه شكو احجيلي لخاطر الي ابطني احجولي...
شبي ثابت ومنو هذوله الي مايعوفو بحاله؟؟؟

كالت ابتهال لاتخافين حبيبه ثابت سبع وماينخاف علي ..
والله يرجع بس ادعيله ربج يستجابلج لان يتيمه...
... لعد شبي علي هيج حالته؟؟
.. ثابت بيومهه طالع من الدوام هو وصديقه وكايله عندي مشوار اخلصه واجي...
ومامخلي صديقه يروح ويااا...
وصديقه يكول تليفونه ماسكت كلساع يدكون علي ويتوعد الهم ويتعارك
وهسه اخوتي وولد عمي تقريباآ شكو بيهم نفسهم هاي الجماعه الي تتعرضله من الصغر لسه...

مافهمت شي بس ماكدرت اسأل التزمت الصمت وكمت ادعي يرجع سالم...
خاف اسأل وكلهه كاعده واخاف على صحه الحجيه لذلك سكتت...

خليت راسي على رجل خالتي وغمضت عيوني اتذكرت اخر ليله شلون جان يعاملني ..
حتى اكول هذا موثابت كلش متغير...
حتى حسيت علي باسني بكتفي وعبالي حلمانه ..

ماحسيت على نفسي وغفيت...
شفته لابس دشداشه بيضه وواكف يباوعلي ويضحك ..
يضحك من كل كلبه حتى اسنانه بيض مبينه...

فزيت اصيح ثابت وفاطمه لزمتني وتصيح اسم الله تقوى شحلمتي؟؟؟
كتلهه شفته واكف ويضحك وينه مايدري كلبي نار علي ...
سكتني كوه واني احس روحي تريد تطلع...
كلما التفت على خالتي انهار اكثر وجهه اصفر ومخليه راسهه على الحايط وبس السانهه يردد ثابت ثابت...

كالت لفاطمه كومي اخذي مرت اخوج لغرفتهه تنام تعبت...
ماقبلت اصعد ما اطبلهه وثابت ماموجود ..
نمت بغرفه فاطمه وغطتني واني اشهك بجي...
كعدت يم راسي هي وابتهال وتمسح على شعري..
احس ايدهه نفس دفو ايد ثابت وكلما اباوعلهه اشوف ثابت بيهه...
يمكن لان توأم...

كعدت على حيلي كتلهه فاطمه احجيلي ..
منو هاي الجماعه الي متولين ثابت من الصغر وليش؟؟
لزمت ايدي ابتهال كالت مانكدر نحجي نخاف من ثابت حتلو غايب بس يبقه ثابت بالنسبه النه ابونه وكلمته مسموعه ..
هذوله ناس مايخافون الله وجابوهه كله حرام ...
ان شاء الله يرجع وهو يحجيلج...

كتلهه احجولي اني مرته شبيكم تخافون من حقي اعرف كلشي عنه ...

كالت ميخالف نحجيلج بس من تصيرين زينه وهسه ابدال هذا الحجي كومي خلي نصلي وندعي...

باوعت لساعه ب12 وربع كمت توضيت شفت دنيا كاعده تقره قران...
اخذت سجادتي ورحت للحديقه وكلت لفاطمه اطلعي وياي اخاف...
ادري بثابت مايقبل اطلع بالحديقه بس اريد اناجي ربي اريد اباوع لسما وادعي بكلب محروك...

كمت اصلي وادعي وي كل ذكر اسمه اشهك دموعي بللت السجاده... رفعت راسي لسما...
الهي اتسمعني؟؟؟
اني يتيمه ومظلومه وماعندي احد بس انت وثابت لاتفجعني بي...
خليت ايدي على بطني وبجيت.. ربي لخاطر هاي الروح الي خلقتهه ببطني رجع ثابت سالم غانم...

ادعي واسمع صوت شهكه فاطمه بهاي الايام ماضلت عدنه دموع...
اتمنيت ميته وي امي ولاشايفه هاي الايام...

كملت ورجعت لفراشي هذاك من هذاك نايم...
وحتى النايم كلساع يفز.....

ما ادري شلون غفيت وفزيت مرعوبه...
عزا بعينج تقوى تنامين وثابت ماتدرين بي بيا مكان؟؟

طلعت لكيتهم كاعدين الكبار بس تشرب جاي والجهال تتريك...
باوعت لعلي بس شافني نزل راسه ...

شوي وانسمع الباب تكسر ...
يريدون يلحكون يطلعون ماكو...
طب علينه فراس ابن عمهم وورا ولد عمهم ما اعرفهم لان ماطالعه بس هذا اعرفه دائما يجي يمنه...

كال علي امشي خلي نروح نهد على عشيرة.....
هم يعرفون وين؟؟؟
... كاله ابو ولك بس فهمنه شبيك وشلون نروح نهد عليهم وماعدنه دليل...
... ولك يابه لسه ادور على دليل هذوله صارلهم 25 سنه يركضون ورا ثابت وشكم مره تصوب من وراهم وانت ادور دليل...
... جان يحجي بحركه كلب واني عيوني بس تباوع اتذكرت من جنت اباوعله من السطح وخزرني بوقتهه جان يتعارك وي كومه زلم....

... كعد فراس وكال اكو 2 من ازلام ضامن متصوبين بالمستشفى واني اكول اكيد ثابت الي صوبهم...
واكو موظف بالشركه كال سمعت استاذ ثابت يخابر بواحد اسمه ضامن ويحجي بعصبيه ويتعارك...

من كال هيج فراس الحجيه ضربت على صدرهه كالت موكتلكم ضامن ابن حرام ومايعوفه بحاله ...

صار مطافر الولد من كل مكان كلهم اخذو اسلاحهم وكالوا اليوم نهد على ضامن ولوكاتل لومكتول ...
عمهم ابو سامر حجي جبير خابر على الشيخ كاله دزنه ازلام منكم ولدنه راح تتكاتل ...

عدهم اصل الانبار كلهم عشاير واسلاحهم بيدهم دائما....

طلعت الزلم وصار الحال اسوء لانخسر ولدنه ...
لقاء وافراح يبجن على عامر وعلي...

كل هذا ومافهمت شنو نوع العداوه وي هذا الي اسمه ضامن...
ومحد يحجيلي والوضع مومال اسأل...
ضلينه ندعي يرجعونه بسلامه...
للعصر اجو حالتهم حاله تلكيناهم ...
ماحجوا كالوا ماكو شي ...
اجه علي دنك على راس الحجيه وباسه...
وهي دموعهه مغركه وجناتهه الي متجعده من كبر العمر ...

كالهه يمه تذكرين ابوي من يكول ثابت جبل ويبقه طول عمره محد يهزه...
هي بس تهز براسهه ودموعهه تجري..
كالهه تذكرين ابوي من فضل ثابت علينه واحنه نغار منه...
جان يكول هذا يسويله ميه رجال انتو ما ادبروهه...
ولج يمه ابنج مخلي جثثهم تارسه العامريه...

لازم ايد خالتي ويبوس بيهه...
كالتله بصوت مهدود وينه لعد مالكيته؟؟

.. لا مالكيناله اثر...
هسه اسولفلكم واشر عليه اكعد...
كعدت وكلنه نسمع لعلي..

كال رحنه هدينه على ضامن وماحجه كال لاتبلوني لا اعرفه ولاشايفه هددناه كنالهه طلعنه المكالمات وانت متصل علي ...
كال خابرته اريد اسحب قرض من شركته ماعندي شي وياا...
ماحصلنه كلشي منه رحنه لهذوله الي بالمستشفى متصوبين...
ضغطنه عليهم بالتهديد واحد ماقبل يحجي بس واحد كال احجيلكم بس طلعوني منا وخلصوني من شر ضامن خسرت عائلتي بسببه...
انطينا وعد انطلعه بس يحجي...

كال صار اسبوع ضامن يدك على ثابت بس يريد يلكا وحده ويكتله...
ووثابت كاله اني اجيك لا ادز هاي الحيوانات الي عندك وصير رجال وطلع راسك...
وضامن الكلب ناصب كمين بحزيره العامريه لثابت وحسب ماكال المتصوب..
متلكين ثابت بالطريق ويرمون علي وثابت مقاومهم وكاتل منهم 3 وهذوله متصوبين وشاردين ومايعرفون بثابت لان عايفي يقاوم ويه البقيه...

رحنه للجزيره يايمه وجثثهم لسه مشمره والدمايه تارسه الشارع وقليل سيارات تفوت ومنطقه فارغه لاسيطره لا شي...
وثابت كل اثر ماله حتى سيارته وزعنه ارقامهه على السيطرات ....

... الحجيه تبجي وتصيح رفعه راسي وليدي ..
... كالتله ابتهال علي ما تجيبون تسجيل مكالماته...
.. كال فراس حكومتنه فاشله صار اسبوع اركض بس اريد احصل موافقه من القاضي ماخليت واسطه ماجبتهه تالي حصلتهه كوه ..
اخذتهه ورحت لشركه يكلولي تنتظر 20 يوم ولد الكلاب الواحد يشبع موت وهم يماطلون...

كال سامر ابن عمهم الجبير باجر امر على المركز ونحاول يدبرونه واسطه حته يطلعوهن بس نلزم خيط ....

راسي افتر شنو من عداوه هاي الي توصل للقتل هذوله شنو عصابه وثابت منين متعلم هيج يدافع عن نفسه...

مبين من جسمه شكد معاني وشكد متدرب
اتذكرت الاثر الي بظهرهه ...
كلت الا اعرف شنو السر كافي مثل الاطرش بالزفه...

كمت اخذت الحجيه لغرفتهه كتلهه مددي ارتاحي تعبتي...
مددتهه بفراشهه وخليت مخده ورا راسهه وكعدت يمهه كتلهه ...
خاله الله عليج بداعه هذا الطفل الي ابطني احجيلي ...
شنو قصه ثابت احس نفسي بدوامه تحجون عن اشياء اول مره اسمعهه...

بلأول صفنت بوجهي وكالت من حقج تعرفين انتي مرته...
تعالي احجيلج عن رجلج البطل....

#يتبع

حبايبي❤
شكرآ على الفين متابع خلال شهر واحد واني كاتبه جديده...
حيل فرحتوني ربي يحفظكم...
اتمنى اكون على كد ثقتكم وما اخذلكم ....

وشكرآ من القلب على تفاعلكم وتعليقاتكم على القصه والحد الان بالمراكز الاولى....

اصنامي وينكم هل من متابعه.. تصويت.. تعليق..
احبكم ...
بوساتي لكم💋💋