رواية ذنوب لاتغفر الفصل العشرون 20 - بقلم Rozaya1122

التاسع عشر
لاتغفر
《روزاية》

كامت تحجيلي خالتي عن قصة ثابت
بس كوه تاخذ النفس وكلما
توصل لموقف بي ثابت تنزل دموعهه
كالت.....

حجي عقيل الله يرحمه من الانبار واني من بغداد هو رجال تاجر صاحب اخلاق ومن زغره حج بيت الله عمه اخو ابو شيخ العشيره وعدهم الموت ولا العيبه...
عقيل عنده 3 اخوان وهو رابعهم وعنده 4 اخوات...
شورهم كله بيد اخوهم الجبير اسمه فليح ماعنده خلفه وماخذ اخت ام علي....

الحجي يجي لبغداد دائما وجنت طالبه معهد اني ويوميه افوت من يم محلهم
وحبني واني هم حبيته...
خطبني اكثر من مره واهلي تخبلو احنه عائله بسيطه من بغداد عندي اخ واحد واخت وحده
كال ما انطيهه بعيده عليه وانوبه طلع متزوج وعنده جهال زاد رفض ابوي ..
بس اني ماعاندت اهلي وعفتهه ورا ابوي
ولاعندي علاقه بحجي عقيل بس اشوفه من اروح للدوام..

كام يجيب مشيات ويروح ويرجع وابوي الله يرحمه كال ما انطي لواحد متزوج هن بس 2...

اهل الانبار اذا رادو شي ياخذو كوه ومايتنازلون عم حقهم..
ضل سنتين الحجي ماخله مشيه مادزهه كوه صارت وقبل ابوي..

تزوجت يمهم وشفت الويل اهله مايريدوني ومرته شدت وياي وولده كبار وبناته كلهم بالمدارس واني اتسمه مرت ابوهم...
بطلني من المعهد وبعدلي سنتين وماعدهم مره تدرس هناك...
امه الله يرحمه حتى الاكل تضمه عني وماتسميني غير بت بغداد..
وام علي بنت اخوهه وهم بيهم طبع مايحبون الغريبه ولسه وبعد..

بيوم الي يروح الحجي يبدي عليه الدك والشغل وبيوم الي يجي ترجع بيه الروح واني اسكت ما احجيله اخاف من عدهن ..

صار عندي ثابت وفاطمه توم وبعد
ماصار عندي ..
هناك كاعهم زراعيه وفلح ونشتغل ليل نهار..
كبر ثابت وابو يفضله على اخوته شاطر وسبع صار عمره 9 سنوات ووين مايطلع جده لو ابو ياخذو وياهم من زغره نعتمد علي ...

جانت حماتي اسمهه فخريه حلوه وزغيرونه يطلع عمرهه 15 سنه لو اكثر.. ابوهه معتز بيهه ويريد يزوجهه لابن عمهه الضابط وينتظره يكمل الجيش ....

فخريه الله يرحمه حبت واحد من القريه وضاحك عليهه ونايم وياهه وصايره حامل..
محد يدري بالصار بس امهه ودتهه يم خالتهه مرت فليح يمهم موبعيده وماعدهه خلفه
تروح بحجة تساعد خالتهه مريضه ..
تجينه كل فتره وترجع ...
نشوفهه تعبانه وكلما نسألهه دكول مابيه شي بلفتره الاخيره ضلت اشهر ماتجينه
وكلما نسأل عليهه دكول امهه خالتهه مريضه وشويه جانت امهم صارمه وكلمتهه مسموعه.. جانت الناس كبل على الفطره ومحد يفطن مثل هسه...

فخريه بالثامن وجايبه ولد وخالتهه تسترلهه واخذن الولد ومدري المن انطنه ...
رجلهه فليح يجي بلاسبوع يوم يداوم بالولايه وبعيده علي ...
ضلت عشر ايام ودرو اهلهه من القابله الي ولدتهه...
صارت الهوسه ونذبح ونصلخ حطوهه كتلوهه موتوهه وماكالت منو الي سوه هيج بيهه...
فليح كال لازم نكتلهه ونغسل عارهه...

عقيل ماقبل وكال نزوجهه لواحد من ازلامنه وهاي روح وحرام وهي زغيره وغلطت بس هناك عدهم المره للخدمه والخلفه وتجيب العار..

بس ابوهه وفليح مايخافون الله حبسوهه بالغرفه وبس امهه تشوفهه..
بيوم خلو عقيل يروح لبغداد واخذوهه نص الليل كتلوهه...

... خالتي من وصلت لهنا كامت تبجي ..
.وتمسح دموعهه بشيلتهه..

.. كالت جنت نايمه وماحسيت غير
ثابت يهز بيه ويرجف ...
اخذته بحضني واصيح اسم الله ووليدي مثل السعفه كل جسمه يرجف ودموعه تجري ..
اريد افتهم منه الولد انعكد السانه ومايحجي..
تخبلت على ابني وكلهه تصيح شبي..
كام من ينام الا يحضن فاطمه ..
هو من زغره سوده عليه ضخم وجسمه
مومال9 سنوات بس روح الطفوله والبرائه عنده ...

ضل ثابت اسبوع ماخلينه مكان ما اخذنا وبس يبجي ويرجف ..

ثاني يوم عرفنه فليح وابو كتلو فخريه وسوولهه فاتحه ومحد يذكر الموضوع نخاف كلهه سكتت...

من عرف عقيل كلب الدنيا وصارت هوسه بس وليدي مدري شبي من يشوف جده لوعمه تزود حالته...
كام عقيل واخذني لبغداد اجرلي بيت وعاف ام علي بلانبار هي وجهالهه...

راجعنه كومه اطباء كالو هذا مصدوم
والي يكول حاله نفسيه ..
كل واحد يكول شكل ...

بمرور الايام تحسن شويه كمنه نطلعه ونزوره صار زين وكام يحجي...
من صار زين سولف لابو...

ولج يمه طلعوا من ماخذين فخريه بهذيج الليله ماخذين ثابت وياهم ...
وفليح يكرهني ومايحب اخو منطين السلاح لثابت ومعلمي يضرب ...
وليدي مسالم وشاطر بالمدرسه دمرو ودمرو نفسيته...

يكول اني نايم ومكعده جده كايله تعال ويانه للشط ...
هو دائما يطلع وي عمامه وكلما احجي يكلي عقيل خلي يصير رجال سبع..

المهم يكول رحت وياهم واخذو عمتي فخريه شادين اديهه وعيونهه وبس تون واني كلشي ما افتهم..
رحنه اني وجدي وعمي فليح وسعيد هذا الأيد لليمين لابوهم..

خلو السلاح بيدي وكالوله اكتلهه..
ماقبلت وكمت ابجي واريد اشرد
ولزمني جدي ضربني راشديات
وخله السلاح براسي كالي ..
اذا ماضربت اكتلك واكتل امك واختك..
لاتخاف انت زغير مايسجنوك ...

اني احب عمتي شلون اكتلهه كالو هاي سوت عار ولازم تنكتل واذا ماكتلناهه ترى نكتل اختك وامك...
وعمي فليح وجه السلاح عليهه وهي معصبه عيونهه وشادين اديهه ورجليهه خلاني اضغط على السلاح واجت بكلبهه ووكعت من طولهه...
رجعنه وكالو ماتحجي لأي واحد اذا حجيت نكتل امك واختك...

من حجالنه ثابت هيج تخبلنه مانعرف شنسوي وليدي خلو دم بريئه مظلومه بركبته ...
ضلينه مثل بلاع الموس لا نكدر نحجي ولا نكدر ناخذ حقنه...

ضلينه ببغداد 3 اشهر وراح تبدي المدارس...
كال عقيل لازم نرجع جهالي هناك خطيه ولازم اعدل بيناتجن ...
كوه رجعنه بيومهه حتى ثابت تخربط

من رجعنه عزلي عقيل وحدنه وماخليت ثابت يشوفهم ولا يروح يمهم...
مرت سنه تقريبا وثابت حالته حاله يوميه يفز نص الليل يصيح عوفيني...
كام يتحلم بعمته يكول تجي تخنكني ودكلي ليش كتلتني...
اكعد نص الليل اشبع بجي علي..
كامو اخوته يصيحوله المخبل من يسمعون صياحه...

ليش مابيوم راجع من المدرسه وانسام وعلي يلعبون بالباب من فايت كايليله ها المخبل تعال العب ويانه...
وهو هاد عليهم مكسرهم تكسر طلعت اريد افكهم دفعني بالكاع زلم وماكدروله...
بوقتهه كسر ايد علي وخياط براس انسام..

كل الي يحاجي يتهجم علي لازغير ولاجبير..
صار متوحش يضرب بعنف الا يخلي الواحد يغمى علي...

حته بيوم منهن طالع جده شايفه يتعارك وي الجهال وكام يصيح علي..
وماطل جده بالكاع وموكع عكاله...
صار الكل يتجنبه ايده والضربه عنيف حيل مرات اجي الكا يضرب براسه بالحايط...

الوحيد جان حضني الأمان مالته ..
من تصير حالته هيج اركض احضنه حتلو بنص الشارع يله يهدء...
حمه فطومه بروحه ابن امه الي يحاجيهه ...

بعد ماتحملت من اشوف حالته هيج وعقيل تأذى كام هد على ابو واخو وصارت طلابه شكبرهه وزعل عقيل ...

.. كتلهه خاله ليش خلو ثابت يكتلهه ماكتلوهه هم ؟؟؟
.. مو هم ناس معروفين وشيوخ شيكولون وين ودو بتهم كالو ثابت يلعب بسلاح وكتلهه
وثابت يسمو حدث ماينحكم وطمطموا الموضوع وماوصلت للشرطه عدهم معارف وفليح اصلا عضو فرقه بذاك الوكت...

ابني يوم عن يوم كام يذبل ويكتل ويجرح نفسه مرات...
عمي مات هو وفليح بيوم واحد انكلبت بيهم السياره...
ورا شكم سنه اكتشفنه سعيد هو الي ضاحك على فخريه ومحد يدري كالهم خلي ازوجهه استر عليهه وماقبلوا بس ماجانو يدرون هو المسوي هيج..

عقيل من مات ابو اجه لبغداد اشترالنه هذا البيت وكعدنه بي احنه وام علي....
وثابت ضل على حالته صار بلمتوسطه وهو الكل يخاف منه اذا لزم عامر وعلي يخلي الدم يطلع من حلوكهم...

سألتيني يايمه ليش تخافون منه هو هذا سبب خوفوهم عصبي ومايتفاهم والي يلزمه الله مايخلصه..
وهم صارت بيهم خوفه من الصغر من كدما كتلهم...

صار ثابت عمره 18 كام يحب دنيا وهيه ليل نهار يمنه وماعدهن اخو...
تعلق بيهه حيل وتحسنت حالته صح عصبي بس ما ياذي بس الي يغلط بحقه..
دنيا اصغر منه بسنتين وحلوه حبهه حيل واحنه مانكدر نكله لا لان يتخبل علينه ...

دخل ثابت كليه وهي ترسب سنه على سنه والكل يدري بعلاقتهم وقابلين...
ليش يايمه مايجي يوم مثل هذا اليوم المشؤؤؤم وانخطف ثابت...
ضلينه شهر ندور علي ماخلينه مكان مادورنا...
اهلنه بلانبار فزعوا ويانه ندور ولكيناه ...

شلكينه بي معذبي انواع التعذيب حتى بالكهرباء
رجع ثابت لحالته السابقه واكثر...

.. كتلهه خاله منو عذبه ماعرفتيهم وشعدهم وياااا؟؟؟

.. طلع سعيد ماخذ ابنه الي جابته فخريه ومن كبر الولد حاجيله عن امه ومنو الي كتلهه وهذا الولد صاير عمره 10 سنوات ويشتغل وي عصابه مشغله ابو وسعيد الي خطف ثابت ...
سعيد محشي راس ابنه ياخذ ثار امه..
انكتلت فخريه كدامه وشكد كالهم اني استرهه وماقبلوا ...

من لكوا ثابت صارت هوسه وادخلت الشرطه وانكتل سعيد ومات جان مسويله عصابع بالجزيره شكبرهه...
وهذ الولد يايمه نفسه ضامن كبر ويوميه يتعرض لثابت يريد ياخذ ثار امه ...
ابن حرام وضل عايش بالحرام...

كتلهه وشصار بثابت ورا هالتعذيب ؟؟
شصار يبنيتي ادمر حتى ابر مال اعصاب ضاربي ..
رجع وحش علينه من نشوفه كلهه تشرد لايكتلهه بس اني اتلكا ابوس بي...
الوحيده اني احضنه واخلي يهدء لو الحجي
حتى اخوته ضاجوا وكالو ابونه يفضل ثابت علينه ..

اكثر وحده تأذت دنيا شوفي موخانته وما لمتهه ابد...
شبعت كتل من عنده اقل غلطه يطلع الوحش الي بداخله...
كلنه عاذري وحتى الطبيب كال المفروض يبقه وحده لان يأذي ..
تأنيب الضمير وكتلت عمته دمرته ..
الخطفه والتعذيب دمروا نفسيته...

خطبناله دنيا كلنه بلكي يتحسن...
وصدك تحسن وصار زين ويخبلون هو وياهه...
بس يبقى عصبي واقل غلطه الكا حابسهه فوك يموتهه ...
حتى جانت تخاف منه حيل ...
انسام من زغرهه تكره ثابت لان يكتلهه كومي يا انسام غيري البنيه ودكلهه يضل يكتل بيج ومخبل وهيج وهيج...
ضلت تحجي براسهه هي وام علي الله يرحمهه وكامن يوصلن حجب لثابت عليهه وهي تخاف ويكتلهه طكت روحهه وراحت خانته ...
وهي منا تخاف وصدك يكتلهه مشت بدرب اعوج ومن عرف طلكهه...

التجئ لرب العالمين صلاه وقران دائما تلكي بمراكز الامراض وبدور الايتام ..
تحسن ثابت شوي لحدما تعرف عليج وحبج...

هاي قصه ثابت الي يوميه تسألين عليهه...
مسحت دموعي وحضنتهه كتلهه بس خلي يرجع اعوضه عن كل لحظه الم ...

ضلت تمسح على شعري وتبجي ...
مددت يمهه وغفيت....

ثاني يوم كعدت راسي يريد ينفجر من الالم اتذكرت حجي خالتي وقصه ثابت كمت ادعي يرجعلي سالم شكد تعذب بحياته بسبب عمه حقه هيج يصير...

رحت للمطبخ لكيت دنيا كاعده ومخليه ايدهه على خدهه وعيونهه كل عين شكبرهه...
صبيت جاي اريد راسي يهدء كتلهه اصبلج وياي؟؟
كالت ايي...
كعدنه على الميز واباوع لملامحه شكد حلوه
مرت سنين وتزوجت واطلكت
وبعده حبهه لثابت ...
بكد ما اضوج منهه واغار انقهرت عليهه...

كاعده وصافنه بالحجي مال خالتي ...
اتذكرته من كالي موبيدي ما اسيطر على حالي احاول اقلل من العنف...
حتى شكيت بي حاله نفسيه...
طلع متحمل كل هذا وساكت...
اكول علي شايف نفسه ومغرور ...
طلع خلف هذا الهدوء عواصف وبراكين...

حسيت بنغزات قويه ابطني خليت ايدي عليهه وكوه كمت احسهه تخيطت ..

...

حبايب خليت هذا البارت بس يوضح قصة ثابت والاسرار الخفيه ...