رواية ذنوب لاتغفر الفصل الثالث عشر 13 - بقلم Rozaya1122

#البارت الثاني عشر
#ذنوب لاتغفر
#للكاتبه《روزاية》
/// مساء الانوار///

اجت بوجهي نعيمه وعيونهه متروسه شر وغل...
سلمت عليه من ورا خشمهه...
.. كالت وين نيشانج؟؟؟
.. كتلهه عند ثابت!!
.. شيسوي عند الرجال ..
وجرتني من ايدي حيل ولج لاتلعبين عليه وهسه طلعي اشوفه لا ااخلي عمج يذبحج  ..
.. حمدت الله يمي مرت علي جرتني من ايدهه..
كالتلهه ام صالح شنو هاي السوالف احنه ماعدنه هيج..
والمفروض احنه نسألهه موانتي ..
موتربيتج هي؟؟ واذا سمع ثابت يصير غير حجي...
سكتت نعيمه بس عيونهه تطاير منهه الشرار...
طلعت وضليت بس اني ولقاء احس كلبي يريد ينفجر شنو المضموم وشراح يصير...
ياريتني متت وي امي وخلصت..

اتزوجت وخلصت من ضيم نعيمه وعمي..
ما اعرف الي راح اشوفه وي ثابت شنو؟؟
وراح يجي يوم يتقبلني زوجه؟؟
لو راح يبقى ذنبي مايغتفر ويشوفني مذنبه ؟؟؟

رحت سبحت وبدلت لبست كلابيه خليجيه لونهه ذهبي ولقاء سوت شعري ...
مستغربه من فاطمه ما شفتهه ولا اجت سلمت عليه...
اكيد تدري وزعلانه على زعل اخوهه...

كالت لقاء يله انزلي النسوان تنتظرج
نزلت والارتباك والحزن مسيطر عليه اريد اضحك واجامل ما اكدر ...

اول مانزلت  عمته كامت تهلهل كعدت على التخم افرك بأيدي والكل يباوعلي شلون سالفه هاي شوكت تخلص...

نعيمه ماشفتهه يمكن رجعت للبيت...
كالو راح يصبون غدا ...
كالن كومي لغرفتج ...
صاحت الحجيه تعالي يمه هنا بغرفتي ..
من كالت هيج عرفت اكو شي وراح تحجي!!

دخلت للغرفه وكعدت على جربايتهه...
اجت تمشي على العصا مالتهه وظهرهه محني..
نور محمد كله بوجهه ...
كعدت يمي ولزمت ايدي..
كالت بنيتي اني اعرف بكلشي؟؟
... بس كالت هيج بجيت ..لزمت ايدهه وكمت ابجي كتلهه خاله والله غلطت وصارت المشاكل غصب عني... فدوه ساعديني جسمي تعب من الكتل ..
وثابت مايرحم ولا عمي يرحمني..

شفت دموعهه تجمعت بعينهه كالت هسه اهدئي وخليج طبيعيه ترى شماتنه هواي..
واكو منهن انتبهن عليج ليش ضايجه؟؟
اني وياج ونحلهه بس اريدج تبنين على نفسج عروس ومحتفله وفرحانه ما اريد تفشليني..
ترى كامن يسمعني حجي عبالهم ماتريدين ثابت؟
واني ما اقبل على هيبة ابني تروح
جاب عمره كلهه تهابه وتخاف منه لا تذلي يابنتي..
كافي علي الشافه وعاشه..

بستهه من راسهه وكتلهه ميخالف...
كالت روحي صعدي لغرفتج ارتاحي ولاتنزلين الا احنه نصيحج..
اريدج معززه مكرمه حالج من حال مرت علي وعامر..
عدنه الجنه هنا شي جبير نفضلهه على بناتنه ونحفظ كرامتهه ...
واني وي الحق اذا مظلومه ما اعوفج...

صعدت لغرفتي بدلت الكلابيه ثكيله وكعدت على الجربايه ضميت رجليه وخليت راسي عليهم ...
غلطت صح والله وزني الشيطان ما اعرف ليش هيج سويت كمت ادعي الله يخلصني من هاي المشكله..

بعدني بوسط افكاري اندك الباب عدلت كعدتي دخلت فاطمه فرحت بشوفتهه حيل كمت من مكاني وتلكيتهه اريد احضنهه...
ماشفت بعيونهه اي فرحه جانت عيونهه مثل عيون اخوهه عصبيه وتريد تاكلني..
رغم هذا تلكيتهه بأبتسامه كتلهه هلو فاطمه ماشفتج وين جنتي؟؟

ماحسيت بس حراره الراشدي على خدي..
جانت ضربتهه كلش قويه ..
رفعت راسي الهه وحجيت بحده ليش ضربتيني؟؟

تقربت عليه ولزمتني من زندي كالت ولج انتي جريمه اسميتي بأسم اخوي عديمه التربيه
تمسكنتي لحدما تمكنتي بس شتوقع من وحده بكد الذبانه وتتمعشق وجرتلهه زلمه شكبرهه...
احسلج لاتشوفيني وجهج ..
مومكيفه اتزوجتي بعد عملتج ياناقصه الشرف ..
ترى اخوي ستر عليج بعد ماخلصتيهه من حضن لحضن بس شكم شهر ويطلكج ويطلع من خطيئتج..
دفعتني وراحت ماحجيت حرف واحد..
جانت هاي كلماتهه اصعب شي لو ذابحتني ولاحجت هيج كعدت بالكاع كمت اضرب بنفسي واملخ بشعري ...
انفعلت حيل ..سمعت صوت على الدرج ركضت للحمام خاف واحد يشوفني..
سمعت الباب انفتح .. غسلت وطلعت..
لكيته ثابت يطلع ملابس..
ماباوع بوجهي ابد ويمكن حته ماشافني باجيه..

راح سبح واني على كعدتي ..
كلت خلي اسأله متغدي
.. كتله ثابت تغديت
.. اندار عليه بنظره حاده لا تسأليني اتسممت لولا من اشوف وجهج تنسد نفسي..
ولاتسمعيني صوتج وتلعبين دور البريئه..

.. سكتت ودنكت كامت دموعي توكع بأيدي..
بدل وطلع ضليت اتلفت على الغرفه شلون راح اعيش هنا واني بوسط غابه واني خليت هاي الوحوش الي بداخلهم تظهر...

مرت ايام العرس بالموت الاحمر احاول امثل دور العروسه الفرحانه بس اصعد لغرفتي انفجر من البواجي...
ثابت مايباوع بوجهي ابد واني انام بالكاع وهو على السرير
وفاطمه اقسى معامله معاملتني
بس الحجيه زينه وياي لقاء ومرت عامر طبيعيات وياي..
بعد السبعه اجني غاده وغسق شوي ارتاحيت من شفتهم..
نعيمه ماشفتهه من يوم الي حاجتهه لقاء...

خطار هواي يجيهم ومايفرغ بيتهم ابد يكولن دائما احنه هيج...
تليفون ماعندي وحته تلفزيون ممنوع اباوع...
ثابت حكم عليه حكم النمرود...
استاهل الي يصير بيه وانتظر العفو من ربي ومن ثابت...

بيوم منهن اجت ابتهال اختهم تبا يمهم لان متزوجه بغير منطقه بعيده عنهم وعدهه جهال هواي...
وجهال عامر وعلي صارت ملحمه كلكامش
ناس تعض وناس تكفش...
سوينه عشا وانريد انصب ننتظر ثابت يجي تأخر ...
تقريبا ساعه بعظ الانتظار واجه..
صبينه العشا وكملنه اجيت كعدت يم الحجيه..
بس شفته اشرلي بطرف حاجبه معناتهه كومي...
مافهمت ليش؟؟
بسرعه كمت وصعدت لغرفتي حتى محد كال ليش وين رحتي؟؟

ضليت كاعده فوك اخاف انزل ..
اسمع صوت ضحكهم وسوالفهم..
شوي واجه ثابت ..
كال بعد ممنوع تكعدين ويانه اكلي بالمطبخ ولاتضلين تفترين بطولج كدامي لا اخلي بيج صواب واكتلج...

ماسالته ليش؟؟ بس كتله حاضر.. بس دموعي ولا وكفن يرزل بيه واني ابجي..
شنو من قساوه شايلهه كلبك؟

كمت ما اكعد وياهم ابد فاطمه تغسلني غسل يوميه ودكول اتخبل من شوفتج..
صرت منبوذه من الكل محد يريدني حته غاده وغسق نعيمه ماتخليهن يجن..
اشوف لقاء تروح لاهلهه شكد  اتمنى اصير مثلهه..
من يكعد عامر الا يكعد مرته يمه ويخلي اللحم كدامهه يكولهه اكلي انتي اتعبين
واني ثابت تنسد نفسه من يشوفني...
شهر بس دهر بالنسبه الي ..
صح محد يكتلني بس الذل الي شفته بس الله يعلم بي ..
وصلت بثابت يتاخر يله يرجع يكول ماريد اشوفج..

صادف يوم جمعه والحجيه كالت نظفن البيت لان جاينه رمضان وتخلصنهه نوم...
كمنه نشتغل اني ولقاء وافراح مرت عامر...
نضفنه البيت كله لحد المغرب واحنه نشتغل...

تعبت حيل احس اعضامي تكسرت كعدت استراح على الكرسي ..
اجتي فاطمه بهذاك الغلط... كالت
اي العفيفه تعبتي واحنه نخدم بيج..
حرام الاكل ابطنج ام ال.....
كومي لا اخلي ثابت يكسر عظامج واحد واحد..

اني طك كلبي كتلهه فاطمه مشكله بيني وبين ثابت شكو حاقده عليه سبحانه المايغلط معصومين انتو؟؟؟

ياريتني ماحجيت هيج..
انكلبت عليه عفريت ...
غلط وسب وجرتني من شعري... اجت لقاء فكتني منهه...
شكد حسيت بمهانه عروس وهيج انذليت كدام نسوان حمايه...
الحجيه جانت تصلي...
صعدت للغرفه ابجي كسرتي جبيره ومنو يجبرهه لا ام لا اخ لا احد اعتمد علي لارجال يريدني ربي اخذ امانتك وخلصني...

كاعده ابجي وصعدتلي الحجيه ..
كمت وكفت لزمت ايدي وكعدتني ..
مسحت دموعي
... وكالت لاتبجين ربج ماينساج
... خاله والله ماحاجيتهه ليش تكرهني؟
... يمه فطم توم هي وثابت روحهه من الدنيا اخوهه زعلانه على زعله واني واكعه بنصكم والله كلبي يأذيني عليج بس ثابت ماينرد ولا واحد يتفاهم ويا اني امه وما اتجرأ احجي ويا..
اصبري واتحملي لازم يجي يوم ويصدكج وحتلو ماصدكج ربج ماينساج...

بعدهه تحجي وياي انفتح الباب حيل...
ثابت عصبي ويصيح راد يجرني بس احتميت بالحجيه...
تتوسل بي يفتهم الصار وهو يكلهه يمه هاي ماتنطي وجه ..
كوه هدئته امه وطلع ...
ارجف من الخوف كالت تعالي يمي بالغرفه ترى مايسكت هذا اعرفه ابن بطني ...

نزلت وياهه وماطلعت من الغرفه ابد...
حته ماتعشيت ...
فرشت ونمت احس اعظامي تصل ...
وبردت حيل كمت اهذي وارجف الصخونه عمت عيوني...
لا ام يم راسي لا رجال مهتم بيه...
كوه جريت نفسي وكعدت الحجيه كوه احجي..
ضلت تسويلي كمادات وتقرالي ايات ...
شكد تمنيت ثابت يجي يسأل عليه ...
ثاني يوم مااشتغلت خطيه البنات اشتغلن واني على نومتي...

ايام عصيبه مريت بيهه شفت المر من الم وعذاب وذل ومهانه...
ثابت مايتواجد بالبيت اغلب اوقاته بالشغل بس فاطمه ومريم بنت علي متعبتني ..
مريم طالعه  على عمتهه وشاده وياي...

.. ورا العشا دزت عليه الحجيه كالت بدلي والبسي غيري ثابت وخلي ينسه ترى الرجال هاي الشغلات تغير اكبر رجال...
يمه اذا بقيتي هيج راح تزود ماتقل المشاكل وهو راح يبقى يفتر بنفس المكان والتفكير ياكل بي..

.. خاله اخاف منه ومايباوع بوجهي شلون ابدل والبس..
.. كومي ولاتحجين
كومي سبحي وبدلي وانتظري يجي 
ثابت من سترج وماخله عمج يذبحج لان يحبج جان شالج وشمرج حالج حال خطيبته السابقه..

سمعت كلامهه وكمت سبحت ولبست فدشي قصير وفتحت شعري...
ضليت كاعده انتظر يجي صارت ب12 يله اجه..
اول ما طب وشافني تغيرت ملامحه ..
تقرب عليه واني ارجع ليورا
بلحظه خله ايده بشعري وسحبني كلش تأذيت حسيته انشلع من جذوره..
.. كتله لاثابت عوفني الله عليك..
.. لازم اشتاقيتي صارلج فتره مامحصله شي؟؟
.. يضغط على شعري ويجر بي ..
بجيت بحرقه كتله والله خالتي كالتلي بدلي ..

.. سحب جكاره بيده وايده بشعري ..
خلاهه بحلكه وشعلهه اشوف الجمر مالتهه ورجليه ترجف ودموعي تجري..
كتله فدوه ثابت لاتسويلي شي والله بعد ما اسويهه خالتي كالت سوي هيج..
حسيت الالم وصل لأعماق كلبي ..طفه الجكاره بصدري شهكت حيل اتوسل بي بكل جوارحي ..
احس روحي تريد تطلع كل هذا وماعاف شعري..
مجرم بمعنى الكلمه...

ذب الجكاره وجرني لجربايه ..
كال ولج اشمئز منج تعرفين شجاي احجي..
اكتلج واخلص منج؟؟
بعتي شرفج بلحظه مافكرتي بيه ولج مافكرتي بسمعتي بشنو قصرت وياج؟
صح ما اتغزل ليل نهار بس انطيتج حب واهتمام وانتي ادورين من وراي..
جرني حيل صرت كبال وجهه اشوف عيونه دم..
وين اني وبعتي نفسج ؟؟ بيا يايوم بيا ساعه؟ مافكرتي بيه ما اجيت ابالج؟؟ ماكلتي اني على ذمه رجال ...
والله الواكفه بعيني امي جان ذبحتج بكل برود
دفعني حيل انظربت بالكنتور من الخوف ركضت للحمام...
ما اعرف وين الالم خليت ايدي على صدري تحركني حيل..
رجعت ايدي الم بشعري...
اجت خصله كامله بيدي..
بجيت بكل قوتي كمت اضرب براسي بالحايط
كلماته جانت خناجر وتذبح بيه..
لو كاتلني ولا حاجي هيج ...
ضليت بالحمام اخاف اطلع...لحدما حسيت علي نام ووطلعت بسرعه اتلفلفت بفراشي ونمت..
مانمت للصبح ابجي بفراشي والالم ياكل بكلبي وصدري يحركني...

ثاني يوم كعدت اجر بنفسي بخيبه ...
اشوف نسوان حمايه متونسات ويسولفن على الدلال العايشاته ...
واني ثابت عباله بعت شرفي ..
اااااخ ياكلبي شوكت راح تفرج عليك..

فاطمه تروح يم نعيمه وتجي شايطه عليه ...
تعبت حيل ماعاد اتحمل كلشي بيه تعب ...

مر على زواجي 3 اشهر انواع العذاب شفته
اكبر عذاب هو الذل ما اكدر اوصف حجم الالم الي عانيته...
الغصه بلعومي بس انفرد اشبع بجي ..
حتى لقاء وافراح من شافن معامله فاطمه ضلن يسألن شكو وليش ثابت هيج...
وليش ماتاكلين ويانه؟
شحجي وشأكول نفسه تلعب مني ويكول اشمئز منج؟؟
صرت ما اتحمل الحجي بس اسمع كلمه ابجي ..
اروح يم الحجيه ابجي وتواسي بيه بس ماتكدر لثابت...

خلال هاي الاشهر عرفت ثابت غريب
كلشي غريب بي..
كلامه مسموع محد يناقشه من يطب الكل يسكت حتى اخوانه يهابوو رغم اصغرهم..
شفت العجائب وما اعرف السبب شنو؟؟؟

فاطمه اذتني حيل بيوم اجت واني بالمطبخ جرتني من ايدي ..
اخذتني كبل للغرفه وسدت الباب ..
اول ماوكعتلي دك راشديات ...
اريد افتهم شكووو؟؟
كوه نطقت كتلهه ليش فاطمه بس احجي وابجي..

.. تريدين اكلج شكو يا ....
خلي بجي ثابت واكلج ليش ؟؟
شكم مره رحتي يم الولد؟ شكم مره بعتي نفسج؟؟...
انفعلت حيل كعدت بالكاع وكامت ادك على خدودهه وتصيح..
يا اخوي سوده عليك وين جانت مضمومه
الك هاي...
يا ابن امي ياثابت خلصت عمرك متعوب والله جازاك بهاي عديمه التربيه...
كعدت كبالهه وابجي كتلهه شكو فاطمه لاتحجين لثابت اذبحيني ولاتحجين بس فهميني شكو؟؟؟
لزمتني من ايدي كالت اترجاج اطلكي لاتهدين سمعته بالكاع لاتخلين اخوته يشمتون بي ولج ثابت مايستاهل الي جاي يصيرله..
ولج تقوى ابوس ايدج اطلكي منه وروحي لحال سبيلج دمرتي الله لايرضى عليج ..
وين يودي وجهه من الناس فضحتي الله يموتج ونخلص من عارج
ولج تالي عمره الشيب خالط شعره ...
وعرضه منشور وباحضان الولد ..
يا اخوي يا خيمتنه وين جانت الك ...

هي تحجي واني افترت بيه الدنيا ياربي شصاير مانمت بحضن واحد ولاتغزلت بأحد ..
فيس استخدمته شهر سوه بيه هيج..
شنو المنشور واني حتى موبايل ماعندي؟؟؟
اريد افتهم من فاطمه ما انطتني مجال ملخت نفسهه واني دخت ماكمت اشوف شي .....

#يتبع
حبايب كلبي❤
شاركوني بتوقعاتكم للاحداث الجايه