رواية ذنوب لاتغفر الفصل الثاني عشر 12 - بقلم Rozaya1122

#البارت الحادي عشر
#ذنوب لاتغفر
#للكاتبه《روزاية》

بعدني واكفه وما اشوف غير بركان هائج كدامي..
العيون حمر دم.. العصبيه الي عنده تشيل بلد..
ما عرفت شراح احجي وشسوي؟؟
تقرب بهدوء كاله تفضل رايد شي..
شفت بسام ارتبك ومامتوقع يشوف ثابت..
ضل يمتمت بالحجي ومايعرف شيكول...
اشرلي اطب جوا بسرعه طبيت...
ركضت على غاده اريد اكلهه ثابت برا مااعرف شحجي الساني انعكد..
اجت غاده تركض كالت ولج كتله وبسام انهزم..
وامي اجت عزا بعينج تقوى ...
بسرعه صعدت لغرفتي اريد احتمي بشي ماكو...

اجت نعيمه تركض اسمعهه تصيح باسمي واسمع ثابت يكول عوفيهه اني وياهه لاتتدخلين...
صعدتلي غاده كالت بسرعه بدلي واطلعي يريدج تروحين ويا...
كتلهه ما اروح يموتني..
كالت احسن من امي والله اتشوفج الموت ...

ما اعرف اضل لو اروح ..
اتحمل نعيمه بس ثابت مايرحمني..
مدري شلبست ما انتبهت على نفسي صعدتلي نعيمه تجر بيه من ايدي ونزلتني كوه واني حلكي مسسدود ما اعرف شحجي ....

لكيت ثابت واكف برا وايده بجيبه بس عيونه تطاير شرار..
من شاف نعيمه شلون تجر بيه كال تعالي نطلع وشوي ونرجع..
اعرفه راح يعاقبني ...  اعرف ورا هذا الهدوء عاصفه.. طلعت لشارع

جرني من ايدي وصعدني بسياره..
واجه صعد وحرك السياره بسرعه..
كتله ثابت...
كال اسكتي لاتسمعيني صوتج لا ادوس على راسج هنا...

ضليت ساكته وابجي اريد افهمه بس شيفتهم
وهو شافني واكفه وي ولد واكيد عرف..
اخذني للبيتنه الي على اساس نتزوج بي...
اخذني سحل ليجوا...
اريد ادافع عن نفسي ما اكدر يضرب بيه بكل قوته..
تذكرت فاطمه كالت مايرحم..
لحدما انغمى عليه ...
فززني المي البارد على وجهي ..
بس اريد احجي ماخلاني..
لحظات دقايق ساعات ما اعرف شكد بس هي دهر مرت ..
اشوف ثابت كاعد ومدنك راسه ..
استاهل الموت دنكت راس رجال شكبره بسبب طيشي وغبائي...
رفع راسه عليه..
كال سؤال واحد وجاوبي عليه واذا جذبتي والله اذبحج بدم بارد..
اريد احجي بس اشهك من البجي والخوف..
صاح بيه بصوت عالي ..
احجي ولج...

كتله والله ما عندي شي بديت احجيله كلشي...
اشوف ملامحه تغيرت للاسوء اجاني مثل البرق ضرب راسي بالحايط..
احس عيوني غوشت...
ما انطيت اي ردة فعل ضليت بس اون..
ماحجه شي كال كومي غسلي وخلي اوديج لبيتكم وباجر اجيبج هنا حته مايعرف عمج..
اخذني لبيتنه بس يسوق سريع ومايحجي ابد نزلني بالباب وراح...

رحت للغرفه بسرعه وبيومهه ماتحركت من الفراش الالم بكل جسمي وخاف يشوفوني ...
بس غاده وغسق يمي...
اريد الالم يسكن ماكو..
شوي واجتني نعيمه مثل الثور الهايج وبيدهه قطعه مال صونده كامت تضرب بيه بكل قساوه...
بناتهه يجرن بيهه وماكدرلهه...
منا الكتل مال ثابت ومنا نعيمه وكعت وما ادري بالدنيا بعد ...
انتبهت على البنات يكعدن بيه ويبجن...
منتهيه الالم بكل مكان احس جلدي مزلغ..

ماكدرت انام للصبح جسمي مكطع وعيوني مورمه...
الي مثلي عروس تحضر بنفسهه واني مورمه من الكتل...استاهل الي يصير بيه..

مانمت للصبح الله لايشوف هذيج الليله لعبد من عباده..

ثاني يوم اريد اكوم ما اكدر ...
نعيمه طلعت ما اعرف وين والبنات راحن لدوام عدهن امتحان مايكدرن يغيبن...

اباوع على الساعه ب10 سمعت الباب انفتح ..
اجتني نعيمه تغلط وتفشر جرتني بسرعه شمرت عليه عبايه اسلاميه لبستهه وما اعرف شكو..
تجر بيه وطلعتني شفت ثابت منتظرني..
اتوسلت بنعيمه الله عليج لاتخلي ياخذني..
دفعتني وكالت روحي انتي وخطيبج تفاهمي..

صعدت ويا ماحجيت بس ابجي
وصلنه للبيت نزلت بس كوه امشي واجر بروحي...
كعدت على الكرسي انتظر شراح يصير؟؟

اجه كعد كبالي بس ما اشوف ثابت كدامي
اشوف وحش ...
مثل المحاكمه كل سؤال يسألني انكتل علي...

كال راح ارجعج لبيتكم واتحرى عن القصه ...
بس ياتقوى اذا عرفت شي ما ارحمج والله...

رجعت ويا للبيت ...
عمي عرف بالموضوع كام الكتل يجيني من كل مكان ساعه نعيمه ساعه عمي...
غير وجع كلبي..
وغير الندم الي ماكلني...
شهر واحد دفعت هيج ثمن ...

مر اسبوع تقريبا حالتي حاله ثابت اخذ التليفون مني...
وما اعرف شصاير..
عمي يتهدد عليه اذا طلكج ثابت اذبحج...

بيوم منهن اجه ثابت كال بدلي وتعالي وياي...
عرفت اليوم راح انكتل بس دموعي تجري ولا انكسر خاطره عليه..
بدلت ورحت ويا كالعاده اول مادخلنه للبيت  ضربني راشدي وكعت بالكاع...

صرت اتوسل بي الله عليك لاتكتلني ..
ثابت والله غلطت لاتعذبني ..
قفل كل البيبان حتى الباب البرا اول مالزمني بالحزام احس روحي تطلع وي كل ضربه...
يبتعد عن وجهي خاف يبين اثر بي جسمي احسه تزلغ منه...
لحدما اوكع جوا رجلي..
يكتلني بدون مايحجي ولايغلط ولايكلي ليش؟؟

تقريبا مرتين اني ينغمى عليه ويرجع يصحيني...
من شاف حالتي هيج..
انفعل حيل احسه بركان وهاج كام يضرب بالحايط بكل قوته ...
اكو مرايه معلكه كسرهه...
كال ليش ياتقوى تخلين المزعطه تضحك عليه؟؟

ولج شلون سمحتي لنفسج هيج تسوين ..
غلطتي؟؟ ليش ماصلحتي غلطتج وحجيتيلي جان ساعدتج...
ولج حذرتج من انس لولا؟؟
مرتي عرضي باحضان الزلم ..
ياربي لوموتني ولا شايف هذا اليوم...
حسيته انتهى بعد مايكدر ...
طلع وعافني غركانه بدمي...
ابد ما الومه استاهل الي يصير بيه
اني جبتهه لنفسي .. لوحاجيتله ماصار هيج..

رجعني للبيت وحالتي حاله نعيمه من تشوفني هيج تفرح...
ضليت على هذا الحال 3 ايام يوميه انكتل لحدما اوكع وتعوفني هي وعمي....

قرب موعد عرسنه وما اعرف مصيري شنو؟؟
بليل سمعت صياح جوا وعمي يهد عليه ...
جرني من شعري على الدرج احس اعضامي تكسرت...
وجر السجينه يريد يذبحني لان ثابت كايله اريد افسخ الخطبه...
جانت هاي اللحظه بشعه حيل دنكت على رجلين عمي ابوس بيهن ...
كتله خليني خدامه ولاتذبحني..
اصوات البجي مال بناته وباقر وصالح يبجون ونعيمه ..
دكله موكدام الجهال اخذهه باجر بليل واغسل عارهه...
شفت باقر ركض من يمنا وطلع...
منتهيه اني الدفرات تجيني بكل مكان والسجينه حاده بيده ويصيح على بناته يطبن جوا...
ونعيمه دكله مانكتلهه بس اني اخليهه بيهه عائهه ماتزوج طول عمرهه ولو هي مو بنيه...

اسمع وارجف محد يساعدني لاحول ولاقوه..
كامت تحمي بالسجينه نعيمه وتجوي بيه برجلي وايدي.. واني افرفح مثل الطير المذبوح..

سمعت صوت ثابت صاح بيهه عوفيهه ..بعدين عرفت باقر راح كايله بابا راح يذبح تقوى..

رفعت راسي وباوعتله بدموع ونظرات توسل..
اريده يخلصني منهه..
عمي عصبي ويحجي.. اني لازم اكتلهه واغسل عارهه ..
خاطبهه سنه وتالي تعوفهه والناس كلهه تدري ..
والي سوته ماينغفر هاي عار وماتعيش اكتلهه واخلص منهه..

صاح علي ثابت...
كاله عوفهه بعدهه على ذمتي ...
ومالكم حق هيج تسوون بيهه اني الي مسؤؤل عنهه .. ولادكول عليهه عار غلطت واني استرهه ..
انتظر هذا الاسبوع واخذهه ...
واذا متعاجز منهه هسه اخذهه وياي ..
وديري بالكم اسمع كلمه عار مره ثانيه ...

سكت عمي ونعيمه سكتت..
راد يطلع والتفت عليه شافني نايمه بالكاع باوعلي بنظره غضب وحجه وي عمي..
كاله ديري بالكم تجيني بيهه شخط..
ممنوع تمدون ايدكم عليهه هذا الاسبوع..
عافهم وطلع...

رغم المي ورغم الي بي اني بس فرحت لان ماعافني تحت رحمه نعيمه..
اجن البنات صعدني كوه امشي احس نفسي
طلعت من معركه داميه ومنتصره ..
يبوسن بيه وفرحانات ..
حمدت الله وشكرته ماعافني جان عمي ذبحني...

بس اعرف ثابت مراح يعديهه الي واكيد راح
يتزوجني بس حته يعذبني..
لاتفرحين ياتقوى وراج حياة طويله ودرب وعر
موعبالج بسهوله تخلصين منه...

مر الاسبوع ومحد كتلني والبنات متكلفات التحضيرات حنه ماكو وعرس ماكو بس فاطمه ماقبلت كالت لازم صالون وبدله..
مااعرف تدري بالموضوع لولا ماحجت وياي شي..
بس مبينه من عيونهه تدري..

ثابت سوه عرس حسب الاصول وناسهم وكرايبهم من حقهم يفرحون..

راحت غاده اختارتلي بدله مال محجبات اردان وماطالع شي منهه لان جسمي بي اثر مال الكتل ...

لابسه البدله واباوع لايدي ترجف ورجليه وحده اطك بالثانيه كلهه كاعده تباوعلي وكرايبهم كل اثنين يحجن سوه..
احس الناس كلهه تدري بالسالفه  ...
حيل خايفه من هاي الليله شراح يسوي بيه ثابت
شكد صليت ودعيت...
اعرف المضموم جبير والله اعلم شراح اشوف بعد ..
كالو اجت الزفه سوو طريق اسمع الهوسات والهلاهل...
صرت مثل السعفه اهتز من الخوف...
ما ادري شوكت دخل وشوكت لبسوني كل الي اتذكره احتاجيت الحمام وارجف ودموعي تجري..
حته النسوان اسمعهن يكولن يا شجاهه العروس ترجف...
تقربت عليه فاطمه وشاورتني..
شجاج تقوى لاتخافين احنه كلنه وياج ..
مااسيطر على دموعي تجري وحدهه مجرد ما اتخيل غضب ثابت ما اسيطر على نفسي..

حسيت على ثابت لزم ايدي
ايده دافيه وهمسلي ..
لاتخافين هدي نفسج..
جانت هاي كلمات امان...
بس بالنبسه الي جنت اسمعه تهديد...

موبيدي مااكدر اهدئ...
صعدوني بسياره وثابت كلش عادي ...
بارع بالتمثيل كدام الناس ..بس مبين داخله اعصار ...
جانت الزفه للفندق ادعي كون تصيبني سكته قلبيه بهاي الساعه...

دخلنه للغرفه ما التفت عليه وحاجاني..
بس ارجف اريد الزم رجليه ما اكدر ...
التفت عليه كال كومي بدلي شدعواج هلكد خايفه؟؟
لوتخافين جان خفتي من ربج  مومن ثابت..
كومي ولاتجربين اعصابي ...
بسرعه كمت ما اعرف وين اروح اريد ابدل ..
شافني واكفه طلع..
ضليت بالربع ساعه اريد انزع البدله ماتنزع...
بيهه قيود من ورا ولازم ينفتحن وحده وحده...

طب للغرفه لابس تراك نيلي..
شافني بالبدله ..
..كال لازم عاجبتج البدله اليوم؟؟
.. لا بس مااكدر انزعهه وحدي
.. تقرب عليه بده يفتح بيهم وحده وحده ولازمتهه لاتوكع...
فتحهم وطلع...
بدلت لبست شي طويل ومستور ...
رحت للحمام غسلت وتوضيت..
طلعت فرشت السجاده كمت اصلي وابجي..
ياربي سامحني والله تبت ..
اعفو عني يارحيم..
ادعي وابجي .. حسيت بحركه وراي
شفته مدد على الجربايه واشرلي اطفي الضوه...

جريت مخده نمت بالكاع وبدون غطا والغرفه بارده ..
وجسمي يوجعني.. لحظات هدوء بس صوت الانفاس عالي...
نايمه بالكاع ومخليه ايدي جوا راسي ومسويه وضعيه الجنين...
بردانه حيل دموعي تجري وعبالك عدهم سباق..
المفروض هاي الليله احلى شي ..
واني هذا حالي ...
اصلا اتزوجني حتى يستر عليه من كلام الناس ونقذني من عمي لا اكثر..
اكيد راح يخليني خدامه يمه وبس للكتل ...
كمت اشهك من البجي وكام يطلع صوتي...
حسيت على حركته كام فتح الضوه ضميت راسي بس مبينه ابجي لان اشهك..

ما انكسر كلبه عليه ابد ما ادري وين راح بش سمعته طلع ...
ما ادري شلون غفيت من التعب والالم والجوع ...
فزيت علي يكعدني بطرف رجله وهو واكف ..
بسرعه كمت وكفت ..
.. كال ماجعتي روحي اكلي..
.. هزيتله راسي لا ماجعت...
.. روحي اكلي ولا تحجين حجي زايد الي اكلج تنفذي سمعتي لو اسمعج زين؟؟

.. من كال هيج متت خوف ركضت اكل بدون وعي وهو واكف على راسي ..
اكل بشراهه شلون المجاعه احس نفسي شبعت بس ما عيونه تخزر بيه ...
عزااا اكلت الاكل كله خاف هو جوعان ويطيح حضي..

عافني وراح للفراش كمت غسلت وشلت الاكل ورحت لمكاني نمت مبين غافي مخلي ايده على عيونه ونايم...

ثاني يوم الصبح كعدت لكيته يصلي ..
هم كمت صليت وبديت احضر بغراضنه..
من جاي الم بالغراض كال اسمعي ...
اخاف يسألوج على النيشان كليلهم عند ثابت ..
وديري بالج تحجين شي ..

ماعرفت قصده شنو نيشان؟؟
صح اعرف الزواج بس ما اعرف اسمه نيشان ...
عبالي النيشان ملابس العروس وذهبهه..

..كتله هو موبالكنتور غاده كالت اودي بليل؟؟
.. شفته عقج حواجبه.. ياكنتور وشلون تودي هو شنو؟؟
.. غير ملابسي والشغلات الي اشتريتهن
.. غمض عيونه وحرك راسه بملل ..
من اكول عليج ثوله احد يلومني..
بنتي نيشانج اقصد معناتهه البارحه اخذتج يعني عذريتج...
من كال هيج فد استحيت دنكت اعدل بفرشه الجربايه ...
احجي بكلبي...خلصتي عمرج تقوى الثول والغباء لازمج
لوماغبيه ما وصلتي لهذا الحال..
فززني صوته بسرعه خلي نطلع...
اخذت جنطتي وطلعت طول الطريق ساكت..
بس كال ترى اليوم مسوين غدا وناس يمنه
ما اريد تطلع طرف حجايه ويكولون مرت ثابت...

كتله قابل شراح اسوي؟؟
.. والله المفروض اني الي اسألج لان خطره انتي كلشي اتوقع منج..
.. من كال هيج شكد حسيت بالذل بسرعه وكعت دموعي...
تجرأت وكتله ثابت والله اني.....
بعد ماحاجيه قاطعني..
صاح بيه بصوت عالي وداس بريك بسرعه بحيث انظربت بالجامه.

كال لاتحلفين بالله لا ابتلي بيج..
شنو من دنائه واصلتلهه وبعدج تكذبين..
والله ورسوله لو موخوفي من عقاب رب العالمين..
الا احط راسج جوا السياره..
بكل عين صلفه وبعدج تبررين وتحلفين..

من كال هيج حتى ماكدرت ابجي كتمت الشهكه مالتي كوه اريد اسيطر على دموعي ما اكدر..
ولا اكدر احجي...

وصلنه للبيت وناس هواي يمهم وريحه الطبخ واصله لراس الفرع...
دخل السياره جوا...
تلكني النسوان هلاهل وهوسات..
وهو اصلا ما اندار يمي ملتهي يسلم على اخوته
وصوت الطلقات ولهلاهل ..
كلهه فرحانه الا اني مايدرون بالصار...
كوه حابسه دمعتي تلكتني مرت عامر اخذتني..
والجهال بين رجليه تلم جكوليت...
كعدت بلاستقبال والنسوان بس تباوعلي...
مبين شكلي تعبان وباجيه هوااي..
كومتني مرت علي اسمهه لقاء...
سلمت على الحجيه ام ثابت ..
بوستني بس احسهه تدري بكلشي...
مدري يتخيلي...
كالتلهن اخذن مرت اخوجن لغرفتهه...
صعدت للغرفه ماشفت فاطمه ولا اجت سلمت عليه...
اول مادخلت للغرفه اختنكت رغم فخامتهه وجماليتهه ...
بس احس هنا راح تبدي ايام عذابي
ثابت مراح يفوت كلشي ويصدك ويسكت..
اكيد راح اشوف العجب والويلات هناا..
بعدني كاعده ولقاء تحضر بملابسي شلبس...

انفتح الباب بدون استأذان ...

#يتبع
متابعه ممتعه❤💐