رواية ذنوب لاتغفر الفصل السابع 7 - بقلم Rozaya1122

#البارت السادس
#ذنوب لاتغفر
#للكاتبه《روزاية》

... ضليت اسمع وهو يحجي وعيونه ملتقيه..
كال...
ماكو انسان بدون اخطاء وبدون ذنب...
اني قبل جنت خاطب ابنيه من كرايبنه وصارت مشاكل وكل واحد راح بطريق...
بعد الصار ماحبيت ارتبط وبديت اشتغل..
لذلك اهلي ماخذين نظره عليه بأن متعصب والصار اثر عليه ومدري أيش...
بس هو طبعي هذا...
اما بالنسبه الج ...
جنت هواي اشوفج تباوعين من السطح والصراحه عبالي عقلج موتمام!!

من كال هيج فد استحيت حيل شكد فشله شجنت احس من جنت اباوع واراقب بالرجال..

كال شفتج بفاتحه ابوي وجنتي زغيرونه وما اتذكر بهذاك الوقت بس من شفتج بعزيمه علي
عجبتيني وضليت كل فتره اشوفج من تجين يمنه...واكثر من مره شفتج ترحين للمدرسه وبوفاة امج شفتج ...
ماحبيت اسوي علاقه ومدري شنو..
اني كبرت وعمري يتقدم لذلك اجيت خطبتج بسرعه ...

... اني مابيدي شي بس امري بيد عمي..
... اعرف هسه هو طلع حجه بان انتي رافضه بحجه زغيره ننتظر تكبرين ونشوف...
... ابتسمت ونزلت راسي...
حسيته يباوعلي بس مرتبكه ما اكدر ارفع راسي...
كام من يمي اتصل على موظفه اسمهه دعاء اجت سوت الاوراق ويانه...
كلش محترم ورزن كدام الناس والموظفين...
حته وياي هادئ وثكيل ...

مر شكم يوم اروح لدوام اخلص من نعيمه ...
كامت تضغط عليه هواي استلمت راتبي اخذه عمي وانطاني بس 75 كال مصرف الج ...
كتله ماتكفيني عمي..
بوقتهه كام يغلط ويصيح حته شتم ابويه...
كلش اختنكت وضليت ابجي...
ليش هيج تغير عمي ..
كل هذا لان خطبني ثابت...
شكول عليج نعيمه الله لايرضى عنج...
استحسفت القسمه الي اجتني لان زينه
رادت تشمرني بالعوز والفكر ...

هاي الايام المرت كلش ضايجه ومالي خلك اداوم...
ثابت مسافر ماموجود بالشركه... وزادت الكأبه عندي..
علي اخو يداوم بمكانه ومرح اكثر من ثابت حتى الموظفين يرتاحوله اكثر منه..

بعد نعيمه ماخلتني اروح يمهم ابد وكامت تروح غسق بحجه تقره وي بنت علي ...
غسق وغاده راسبات بالسادس يعني جماعتهن بالكليه...

فاطمه قليل تجينه بعد الخطبه وحتلو تجي نعيمه ماتخلينه وحدنه...
تضل تحوم فوكانه...

بيوم داومت وشفت سياره ثابت بالكراج واكفه عرفته اجه...
فرحت حيل على الاقل شوفته تريحني وطلعني من جو نعيمه...
صعدت لغرفتي  وبديت اشتغل اجت ابنيه كعدت بمكان ام سامي باوعت لسؤدد رفعتلي حاجبهه عود ماتعرفهه...

البنيه مكياج طوخ ولبس ضيق وحلوه حيل...
سالتهه سؤدد
...عرفينه على حضرتج...
...اني اسمي أزل تعينت جديد يمكم...
خريجه علوم حاسبات ...
...كنالهه اهلا وسهلا ...
... منو عينج هنا مو الا واسطه؟؟
... استاذ علي عنده معرفه بجدو وقبل اتعين...
... ضلينه وحده تباوع لثانيه ..
مبينه راح تتفيك براسنه هواي ..
بس والله حلوه خاف يشوفهه ثابت ويتغير عليه..
لا ثابت يريد كتكوته .. هاي دجاجه شكبرهه

اشتغل وبالي يم ثابت اريد اشوفه مشتاقتله...
رحت بحجه الحمامات ومريت على غرفته اخذت شكم ورقه بيدي اسأل عليهن...
دكيت الباب كال تفضل...

اول مادخلت كفختني ريحه الجكاير..
..كلت السلام عليكم ..
.. وعليكم السلام يا هلا...
.. الحمدلله على السلامه استاذ
.. الله يسلمج تقوى
.. تعالي لاتوكفين بالباب وهنا بالغرفه لادكولين استاذ بعد..
.. ابتسمت وكعدت على الكرسي.. كام من مكانه واجه كعد كدامي...
.. اي تقوى شلونج الدوام شلونه؟
.. زينه الحمدلله .. والدوام زين
.. سألت عليج فاطمه كالت ماتجينه بعد!!
.. اي مرت عمي ماتقبل..
.. هم يأذوج؟؟
.. لا ...
.. لاتكذبين مبينه من عيونج شصاير وياج؟؟
.. من خطبتني انت..  لحد الان
شادين وياي بس اشتغل وماراضين عني ويسمعوني حجي مو حلو وعمي ياخذ راتبي!!

من كدما جنت ضايجه ومهمومه حجيت بدون وعي... انتبهت بعدين على نفسي
.. كال شنو ليش ياخذون راتبج لعد انتي شتصرفين؟؟
.. هو انطاني 75 واخذه كله
يكول مو صار اسنين اصرف عليج اجه الوقت الي تريديهن الي...

.. رجع ليورا وعدل نفسه ..كال شنو من بشر هذا؟؟ معقوله ابو صالح يطلع هيج منه؟
وليش ماكتيلي حته مايدري براتبج شكد؟؟
.. ما ادري هو سائل ابو الحسابات يعرفه وكايله 500..

.. ماشي راح اقلل راتبج هذا الشهر من الحسابات حته تنطي وتجين تستلمين من يمي واذا حجه شي كليله هو نقص رواتب الموظفين...

.. هزيتله راسي وابتسمت...
.. عندج موبايل؟
.. لااااا
.. سحب كارتونه زغيره وبيهه جهاز وخط وانطانياهه...
ماقبلت اخذه ابد كال اريد اخابرج واتعرف عليج اكثر اخذي ولاتخلين واحد يعرف ...
...كتله اخذه بس بشرط؟؟
... شنووو؟؟
.. تقطع فلوسه من راتبي واذا ماتقطعهن ما اخذه
.. ضحك كال ميخالف اخذي ومن تفتحي خابريني ولاتخلين احد يعرف بي ...
وحاولي اطلبين من عمج يسمحلج حته ماتتعرضين لمشكله

اشكرته واخذته وطلعت واحس كلبي طاير من الفرح ..
شغله غريبه بثابت احس ماعنده لهفه قويه وحته قليل يباوعلي..

ما اعرف هو طبعه هيج لو اكو غايه عنده؟؟
الي يحب غير يتلهف ويباوع ..
ثابت كلشي قليل عنده حته يحاول يبعد نظره عني ...
احسه حته مومثل اول ماحجيت ويا بكربلاء..
ما اعرف شكو بس خايفه من الجاي!!

طلعت من الدوام ووصلت للبيت اخذت التليفون ضميته بملابسي حته ماتشوفه نعيمه ومحد يصعدلي فوك...
بس ميخالف اخاف اوكع بمشكله!!

كملت شغل وغسلت ملابس وسويت عشا 
كملت كلشي وصعدت هاي يوميه هيج حته بعد ما انزل...

باوعت لساعه ب9 سديت الباب ومددت بفراشي..
طلعت التليفون وشغلته...
ما اعرف شي بي اول مره الزم تليفون بيدي..
حته غاده وغسق عدهم موبايل عادي وما امد ايدي علي..

هو حديث كلاكسي ضليت اضغط طلعتلي قائمه اسماء مكتوب بيهه بس ثابت ضغطت على اسم
طلعلي جاري الاتصال كلبي كام يدك سريع...
سمعته دك وسديته...
عزا بعيني شحجي.. انبلع لساني
ثواني ودك هو اني شفت اسمه واني كمت من مكاني وصلت للميز ورجعت لجربايه افتر بالغرفه وهويتصل...
ضغطت على الرد خليته على اذني وسكتت..

سمعت صوته كال الوووووو
خربت.. انصهرت.. ذبت..
صوته يخبل بالتليفون .. عادهه مره ثانيه
... كلت بتعلثم .  الو
.. ماتحجين شبيج؟؟
.. ما اسمعك
.. هسه تسمعيني؟؟
.. اي اسمعك..
.. شلونج خومابعدج ضايجه؟
.. لا ماضايجه
.. لاتخلين احد يعرف بالتليفون وحاولي تخلين عمج يقبل..
.. اي راح اكوله واشوف..
.. خلي يمج اني راح اطلع عندي شغل
ومن ارجع اتصل عليج..
.. ماشي
.. مع السلامه

جانت هاي اول مكالمه الي وي ثابت احساس حلو ..
وخوف من المجهول كلبي فرحان سمعت صوته..
بس بنفس الوقت خايفه ما اعرف ليش وخاف عمي يكشفني ويموتني...
قفلت التليفون وضميته ...
من التعب نمت ..
كعدت الصبح اتذكرت ثابت كال اخابرج من ارجع..
يله شسويله هو اني الخوف ماخذني..
بدلت ورحت للدوام عمي مايوصلني بعد كمت اروح بلخط وي جيرانه رجال جبير

وصلت للشركه بوجهي للحاسبه عندي ملفات ما مشتغلتهن...
هاي ازل كلش مزعجه جنهه لقلق شطولهه وتلبس كعب عالي ..
وعلجهه مايوكع من حلكهه...
والتليفون مايسكت...
سؤدد بس تتأفأف منهه...
ثابت ماشفته ولا عندي شغل يمه...
كمل اليوم ورجعت للبيت كالعاده صعدت لغرفتي فتحت التليفون اتصلت علي...
وسولفنه شويه...

مرت اشهر اني وثابت نتخابر وقليل اشوفه بالدوام حته ما تجيني حجايه...
نعيمه على حالهه مسوده عيشتي ...
راتبي 250 عمي ياخذه مايعرف بخطه ثابت..
و250 ينطيهن الي وماقبل يستقطع فلوس التليفون وبوقتهه انحرجت ...
حجيت وي عمي اشتري تليفون لان احتاجه مرات يتاخر ابو الخط بلاول ماقبل وبعدين حجت ويا غاده يله وافق وكال منيلج فلوس؟؟
كتله اني اجمع وما اصرف من 75 الي تنطيهن الي ومستعمل جهاز صديقتي..
بعد معاناه طويله يله وافق والف تحذير حذرني..

بيوم جان الشغل هوسه وصارت عركه بين الموظفين وثابت ماموجود...
ومن اجه صار عصبي عليهم وبيومهه 2 موظفين طردهم...
شفته شكد عصبي حته ماوصلت يمه ضليت كاعده بلغرفه وعندي ملفات لازم يشوفهه..

ورا شوي اجت السكرتيره كالت استاذ ثابت يريد الملفات؟؟
.. اخذتهن ورحت استأذنت ودخلت...
... يمه وجهه مايكصه طبر وعصبي حيل...
انطيته الملفات وضل يدقق بيهن ..
واني واكفه ..
حته ماكال اكعدي هذا شبي اليوم هايجات خبالاته...
طلع اكو خطأ بسيط صاحني حته اشوفه ...
ما ادري مدنكه واباوع ويا ويأشرلي على الغلط..
ما ادري بنفسي ما منتبهه وشالي شوي مرفوع...
اتبع ويا بالغلط ...
شفته توقف..
باوعتله اجت عيني بعينه انتبهت على وضعي ...
اتراجعت ليورا بسرعه سحبني من خصري...
صرت قريبه علي ...
احس كلبي يريد يطلع من صدري ويركص كدامي..
اريد افلت من  ايده كتله لا ثابت عوفني...
.. ماحجه شي بس انفاسه عاليه..
مد ايده على شالي واصابعه لامست جسمي ونزل الشال على صدري ..
انتهيت عبالي شو شراح يسوي..
بسرعه فلتت من ايده وطلعت ركض ...
وي طلعتي شافتني ام سامي وباوعتلي صفح ...
حالتي مبينه وفاضحه نفسي رحت للحمامات واني ارجف من الصار شكد جرئ عزا بعينك ثابت... ولامتوقعته هيج ..

بس اريد اليوم يخلص صار شطوله ووضعي تخربط ...
حتى سؤدد تحجي وياي واني مو يمهه
كملت اليوم بالموت الاحمر وطلعت...

اول مارجعت استلمتني نعيمه رزايل ...
لان بناتهه مايشتغلن ...
ترزل بيه واني ولايمهه سارحه بالصار...
صعدت بدلت وانتبهت على شالي شلون نزله...

سويت نفس الموقف ودنكت على الميز اريد اشوف شنو شاف؟؟

عزا بعينج تقوى يا فضيحتي بين العربان..
صدري كله مبين اذا حسب الموقف...
حته الوحمه الي بصدري مبينه ..
اكول الرجال اتخربط وجان مثل الاسد من العصبيه ..
صار ارنب من شافه...
بيومهه مجرد ما اتذكر الموقف اضرب روحي..
والله فشله ياربي خاف عباله متقصده اسوي هيج؟؟

ثاني يوم سويت نفسي مريضه حته تسكت نعيمه وماداومت ...
والتليفون غالقته حته مايتصل مستحيه حيل منه...
قررت افتح التليفون الظهر...
اول مافتحته اجتني رساله ...
ليش ممداومه يمعوده نسيت الشفته!!

عزا بعينه يعني شاف المستخبي يبوو على حظي...
ورا شوي اتصل انطيته رفض...
ورجع دك مره ثانيه...
.. جاوبته بخجل كلت الووو..
.. هاياحلو شلونك
.. زينه
.. ضل بالي عليج وينج؟؟
.. ماداومت تعبانه شويه..
.. شبيج تعبانه؟؟
.. مابيه شي
.. تعبانه لو خجلانه؟؟
.. سكتت!!
.. ضحك بصوت عالي .. فديت اليستحي اشسويتي بحالي يولي ..
مال اجي احرك عمج ونعيمه واخذج..
.. شهكت من كلامه صاير جرئ
بسرعه سديته ...

خليت ايدي على كلبي ينبض سريع ...
هذا شنو من جرأه عنده ياربي ..
مايدري بيه اني اذوب على الكلام الحلوو..

ثاني يوم داومت مامنهه اغيب ...
حاولت ما اطلع حته مايشوفني بس مبين ثابت مايفوت فرصه اذا مايستغلهه...

رحت اجيب لابتوب من غرفه الحاسبات لان الابتوب الي عندي مابي شحن ودورت شاحنته ماكو ...
وردت اشتغل بي وبعدين اسويلهن نقل...
دائما اسوي هيج...

دخلت للقاعه واخذت اللابتوب وردت اطلع ..
اول ما التفتت شفته واكف يم الباب ومرتجي ويباوعلي...
تخربطت احوالي شلون بيه وشلون اخلص واطلع من يمه بدون خساره..

دخل وسد الباب ورا واكو دكمه سدهه بعدين عرفتهه مال كاميرا المراقبه...
بده يتقرب واني لا ارادي ارجع ليورا..
انحصرت بين الحايط وبينه ...
.. كتله ثابت خليني اطلع!!
.. اشششش وخله اصبعه على حلكي...
.. بسرعه غمضت عيوني
حيلي انهد  بعد ما اسيطر على نفسي..
ماحسيت غير شفايفه تلامس بشفتي
احس نفسي راح اوكع من طولي.. لاعندي قوه ادفعه ولا اكدر اقاوم..

كام يبوس بكل جرءه ...
بكل لهفه وحب ...
استجمعت قواي ودفعته من صدره..
ابتعد عني بس لازمني من خصري انفاسه تلهب بوجهي..
ويتنفس سريع...
واني بعالم ثاني ...
ابتعد عني بهدوء اني بسرعه طلعت وعفته حته اللابتوب عفته...
وين اروح خاف يشوفني احد...
رحت للحمامات ... غسلت وجهي باوعت لشفتي مورمه ووجهي احمر..
ضليت شوي علما هدئت وطلعت...
امشي واتعثر ...
شلون سمحتله يسوي هيج عباله سهله اني وراح يستغلني؟؟ عقلي مايستوعب الصار
الي صار اكبر غلط وحرام..

دخلت للغرفه لكيت ام سامي وازل كاعدات وسؤدد بمكانهه...
اول ماشافتني ام سامي..
.. كالت شبيج شو وضعج موتمام؟؟
.. كتلهه لامابيه شي .
.. ماشفتي المدير بطريقج؟؟
.. هي كالت هيج واني عبالك واحد وضربني على راسي..
حسيتهه تعرف بالصار ارتبكت حيل كمت اطشر بالاوراق بحجه اشتغل .. كتلهه لا ماشفته...
... شفتهه تشاور بأزل وكامن يضحكن ...

#يتبع

بعدما وقعت تقوى في شباك الحب...
هل سيكون من  نصيبها؟
ام ستواجه لعنه هذا الحب؟
توقعاتكم حبايب