رواية ذنوب لاتغفر الفصل السادس 6 - بقلم Rozaya1122

#البارت الخامس
#ذنوب لاتغفر
#للكاتبه《روزاية》

رفعت راسي اباوعله التقت عيونه ...
بسرعه بعدت نظري عنه وعركت من الخجل...
شكول عليج فطيمه...
امشي واتعثر...ماكو واحد كدامي ماضربته..
لو ادوس على عبايه النسوان...
اريد اطلع نفسي من هذا الموقف ما اكدر...

فاطمه كالتله ثابت تقوى تريد موطه ...
يمه اجيت احفرلي حفره واطم روحي بيهه...
ضل وجهي ينطي الوان ...
وهي يكول مو تدلل تقوى جنهه على موطه...

راح اشترالنه واني رجعت على فاطمه
كتلهه ليش هيج حرجتيني وين اريد موطه اني..
كالت يله اكلي واسكتي فوك ماراح يجيبلج...

وتريد تصيحه دكله مااريد...
وكوه سكتتهه ..هسه شيكول عليه ياربي؟؟؟

جابلنه الموطه وكعدنه اكلناهه وهو واكف يخابر..وكلساع يسرق نظره...
كملنه ومشينه ..
... كالتله فاطمه ثابت خلي نروح لمدينه الزائرين يكولون تخبل...
... موخاف نتاخر وامي تعبت وسكرهه مرتفع وديتهه لسياره...
... حباب ثابت هاي طلعه وبعد عشر سنين مااطلعونه..
... ولج عشيره انتن اذا طشيتن بالمدرينه شيلمجن ؟؟
... انطينه وقت نلتزم بي..
... يله ميخالف

باوعتلهم شكد يحبهه الله يحفظهم
يجوز لان مطلقه مايريد يكسر بخاطرهه..
وصلنه لسياره لكينه نصهه موجوده نعيمه كاعده ...
كالت وين وليتي؟؟ كتلهه وي فاطمه...

تحركت السياره ورحنه للمدينه الزائرين..
صدك حلوه جانت من العمر...

اول مره اطلع واشوف جني خبله اروح منا
وارجع منا ..
حته الشرطي ضربته بجتفه وكالي عمى ماتشوفين؟؟
كتله عمه اليعميك وشلتهه ركضه!!

كعدنه بالحديقه واكو فراشات بس كالن اكو مضيف نكعد بي ...
رحنه للمضيف وبي فراشات وحته بطانيات ..
شو عجبني اخذلي غفه ...
مددت وهن مهوسات العجايز الكبار نامن
واني الفراش عجبني وجديد وبطانيه ناعمه والسبلت مشغلي بارده ...
ما ادري بروحي غفيت...
حسيت على فاطمه تكعدني..
ولج جايبتج تنامين كومي معزايه خلي نتونس!!
كعدت شفتهن نص مدد ونص يشخر بسابع نومه
هم كالو ساعتين ونطلع وهذني نامن...
شكو احجي عليهن واني مثلهن..

كمت عدلت شالي وطلعت وي فاطمه...
افترينه شويه ..
اكو العاب مال اطفال مرجوحه وزحليكه..
بيت الطفل..
عفت فاطمه ورحت صعدت بالمرجوحه والجهال تتعارك وتريد تصعد واني اخذت مكانهم...
بعدين عجبني اجرب الزحليكه..
شو هستوني صعدت جان تفلت بيه وتوكع..
يمه حسيت ظهري انفتح..
ورجلي انزلغت...
ماحسيت غير ثابت وفاطمه يمي..
كومتني فاطمه وخربانه ضحك..
وثابت الضحكه بوجهه واني عيوني مدمعه
من الوكعه والفشله شكبرهه..
شكبراتني ووكعت وفوكاهه بالعاب الاطفال..

اكو مصطبات كعدت عليهه وفاطمه تضحك..
كال ثابت ياتقوى شلون تلعبين بملاعيبهم؟؟
خجلت ونزلت راسي وفاطمه
تكركر ضحك يمي...

راح ثابت يجيبلنه عصير ..
كتلهه شمدري ثابت احنه هنا؟؟
كالت  رايح يصلي وفات منا وشافني وضلينه نباوعلج..
من كالت هيج شكد استحيت ..
بله هذا الولد شيذكر مني كل مواقفي فاول ويا..

راح جابلنه عصير وسألته فاطمه عن اخوتهه
كالهه كل واحد وي مرته يتمشه...
كالت اروح اغسل واجي وهو واكف بعيد عني..

اني عطشانه وكلبي حار من الفشله والوكعه..
شربت العصير كله ابو الحبيبات وطبيعي حته كام يطلع صوت
دلاله على انه فرغ واني مستمره اسحب ...

... كال عوافي..
... حسيت على نفسي نزلته من حلكي بهدوء وعيوني خجلانه هذا شجابه يمي؟؟
... سكتت ماجاوبته..
اباوع لرجلي يتقرب عليه ...
بحركه سريعه وي رفعه راسي مسح حلكي بالكلينس...

هنا تمنيت المصطبه تغوص بالكاع وتبتلعني
وماتخليلي اثر...
اشفايفي رجفت من هاي الحركه ..
بروده سرت بكل اعضائي...
وهو بعده قريب عليه ..
كعد بصفي...
ويباوع على ايدي شلون متوتره وافرك بيهم..

كال... ام السان بفاتحه ابوي السانج برنو!!
شبيج هسه ساكته...
... كتله وين فاطمه؟؟
... شسوين بفاطمه باوعي بعيوني لاتخافين!!
... ماباوعتله علي...
... ماحسيت غير دارني بيده وضلت ايده على فكي..
باوعت بعيونه وضلت عيونه ادور على كل ملامح وجهي...
جسمي انشل حته اريد ابعد ايده مااكدر...
كمت امتمت ...
اا اا استاذ.. عوفني..
... تقوى اني اريد اتقدملج ؟؟
... اذا جانت بيه ذره حيل هسه انتهيت .
محتاجه غسل اذن ماسمعت زين
اكيد هاي من التعب كمت اهلوس..

... شبيج صافنه موداحجي وياج؟؟
فكري ورديلي الجواب...
... بسرعه بدون تفكير كتله لا لا ماافكر .. عليمن افكر..
بسرعه ضحك بصوت عالي ..
كال يعني موافقه...
نزلت راسب واخذت جنطتي وركضت واسمع بس ضحكته وراي...
وين وليتي يافاطمه؟؟
جسمي يرجف مدري من المواقف الصارت مدري من الاعتراف الخطير مدري من فشلتي...
كعدت على كرسي واكرص بايدي اريد
اصحه معقوله ثابت شكبر اسمه ...
يتقدملي..
وشوكت حبني؟ وشنو غايته؟ خاف شافني فطيره وراد يستغلني؟؟
لا ابن حجي عقيل وابن ناس شيوخ مامعقوله هيج اخلاقه...

احتاجيت امي بهاي اللحظه احجيلهه وتعلمني
خاف ماخذ عليه غير نظره ؟؟
وضعي مخربط ومرتبكه حيل ...
كمت للمضيف لكيتهن متحضرات جرتني نعيمه
ورزلتني وين جنتي كتلهه بالحمامات...
بس وجهي مايوحي هيج مبينه متوتره وطالعه من الرومانسيه والاجواء الساخنه...

مشيت بصف نعيمه وصعدنه بسياره اجت كعدت بصفي فاطمه ومبتسمه مبينه مخططه لكلشي..
...كالت شبيج تقاوي؟؟
... ولج اخوج شنو هذا لايستحي لايختشي؟؟
... عزا بعينج لايسمعج ...
هذا ثابت الرزن ابز العقل اجاج بدون لف ودوران مومن هاي الشباب الي ادور علاقات...
... فشلتني سكتت ..
... فكري زين وردي الجواب ولومايحتاج تفكرين وين تلكين مثل ثابت ..
... على كيفج عيني عبالك اخوج الامير وليام..
هو ثابت شطلعت سويتي ملك زمانه..
... ولج عابت لهالحك رجال علي العتب وتقلدين علي الا اروح احجيله...
... لا شبيج اتشاقه وياج..
وليام شنو ... هذا ثابت على سن ورمح
بس لاتحجيله اسحب كلامي بتريله...

... اوف من السانج اكعدي راحه لعد وصيري حبابه...

بيومهه رجعنه ب12بليل وتعبانه بسرعه نمت.. وثاني يوم عطله حته ماعندي دوام..
بس طول اليوم افكر بثابت ...
وشلون راح اواجهه ومعقوله يحبني؟؟
هواايه اسئله ادور براسي!!
وما اعرف شراح اسوي؟؟

ثاني يوم صادف يوم الاحد...وبدايه دوام ماترهم اغيب..
وعمي مايقبل اغيب يكول عيب قدرونه الناس وانتي تتعززين عليهم...

بدلت لبست تنوره سوده وستره زيتوني ...
واخذني عمي...
بوجهي للغرفه حته ما اشوف واحد...
ادعي هذا اليوم يمر على خير ..
اخاف يصير بيه موقف من مواقفي البايخه...

كوه اشتغل وبالي سارح بثابت...
ماشفته ابد انتهى الدوام وطلعت ...
مر اسبوع كامل واني لاشفته ولاشافني ...
تقريبا شوي ارتاحيت وراح عني التوتر والقلق...

بيوم داومت تلكاني بلباب هستوه جاي كلش ارتبكت..
ركضت للغرفه وكلبي يدك سريع ...
ورا شوي اجت السكرتيره كالت استاذ ثابت يريدج ويكول خلي تجيب القوائم الاخيره...

اخذت القوائم وامشي كوه ..
خاف يسألني وشحجي ..
وصلت لغرفته واني افكر استأذنت ودخلت..

شفته كاعد والاوراق كومه كدامه مبين عنده شغل...
انطيته القوائم ...
وردت اطلع ...
كال اليوم حضري روحج راح ادز اهلي..
كتله بس ...
لا بس ولاغيرهه عود حضري روحج ولاتنطين خبر لمرت عمج خاف تسببلج مشكله...
واندار يشتغل ...
طلعت واني عبالك ضاربيني براسي..
شبسرعه غير ياخذ جواب مني؟؟
شكد متعجرف وشايف نفسي!!

خلص الدوام ورجعت واني ميته من القلق والتفكير كلما يندك الباب افز من مكاني...
شوي واجت غاده صاحت امهه كالتلهه بيت ام علي جايين...
ضليت فوك مانزلت من المستحه ..
سمعت نعيمه تصيح باسمي واني الخجل موتني..
كوه نزلت جنت لابسه تراك وشايله شعري...
سلمت عليهن مرت علي وامهه وعماته اثنين..

ورحت للمطبخ وغاده وغسق يضحكن...
ورا شوي طلعوا النسوان واجت نعيمه كالت..
ولج داومتي شهر جبتي المدير؟؟
ماحجيت شي خايفه من رده فعلهه ..

سوينه عشا وتعشينه وورا العشه حجت نعيمه لعمي وفرح  وكال ونعم منهم تقوى يتيمه وتستاهل وهو خوش انسان ينحلف باخلاقه...
الفرحه انزرعت بداخلي شكد حلو الشعور ماجنت اتوقع هيج ردة فعل عمي...

صعدت بغرفتي وغاده وغسق يمي واسولفلهن علي ...
وهن متحمسات اكثر مني وكامن يخططن شيلبسن وشيسون؟؟
واني وياهن على الواهس اتخيل وعايشه اللحظه...

مرت هاي الليله بفرحه عظيمه صليت وشكرت ربي...
وقريت قران لامي وسولفت وياهه كتلهه اطمئني جنتي خايفه عليه وتخافين من عمي..
شكد جنتي ترزليني من اصعد لسطح واخيرا يا امي ابوخزره راح اعيش وياا..

جنت مقرره اطول فتره الخطوبه حته اتعرف علي اكثر لان كالو عصبي وطبعه صعب...

ثاني يوم كعدت سويتلهم ريوك وبدلت من ردت اطلع ..
كال عمي نعيمه رجعي خبر لجماعه كليلهم البنيه زغيره ومانزوجهه هسه...
هو كال هيج ما اعرف شصار بيه ..
اريد اسأله واكله ليش ؟؟
بس خفت منه...
ومن جان يحجي بعصبيه..
سألته غاده.. بابا موجنت موافق ليش غيرت رأيد وبعدين استاذ ثابت انسان راقي وين تلكه واحد مثله وتأمن على تقوى عنده...
صاح بغاده.. انتي لاتتدخلين وهذا الموضوع سدو..
وانتي يله امشي كدامي وصيري ثكيله...

مشيت ساكته بس دموعي كوه حابستهه ليش غير رأيه؟؟ اكيد من نعيمه؟؟
ياربي ليش مامكتوبلي الفرح لان شافو خوش انسان ..
استحسفوا بيه...
وصلت لدوام وروحي طالعه...
كعدت اشتغل بدون واهس سؤدد انتبهت عليه ورادت تعرف كتلهه مابيه شي...
اجت السكرتيره صاحت ام سامي كالتلهه المدير يريدج... راحت وشويه واجت...
وراهه صاح سؤدد
اجه الدور عليه سالتهن شيريد كالن يراجع شغل كل وحده هاي من زمان هو هيج دقيق بالعمل...

رحت بس كوه امشي من اليأس وغير التوتر ...
استأذنت ودخلت سلمت وكالي تفضلي هوكاعد على ميز الاجتماعات..
راجع الشغل وياي واكو اخطاء بسيطه نبهني عليهه...
انتبه عليه ضايجه
... كال ماكو داعي تضوجين اذا ماقابله عادي اتفهمج!!
... رفعت راسي وباوعت بعيونه..
اني موافقه.. ونزلت راسي..
... مومرت عمج كايله انتي ماتقبلين ودكولين بعدني زغيره ما اريد ارتبط...
... لا لا والله موافقه وعمي هم وافق وفرح بس اليوم غير رايه وذبوهه براسي...

... شلون ذبوهه براسج يعني موافقه وكالو لا هي ماتقبل؟؟ شلون يوكفون بقسمتج..
... هم محد سألني موافقه اولا بس عمي فرح ومدح بيك بس الصبح غير كلامه ..
... اسمعيني تقوى..
انتي مومناسبه وي عمري وابد ماجنت افكر اخطب فارق عمر..
بس من عزيمه اخويه علي لسه مارحتي من بالي ابد..
اني بنفسي متعجب ليش هيج حبيتي وانتي مومن نوعي المفضل...
بس كدرتي غيرتي فكري وجذبتيني الج...
حاولت اصير قريب عليج وعينتج يمي...
لاتفكرين عندي غايه ابد ...
كل مافي الامر حبيتج وخلص...

اذا انتي موافقه ومبادلتني نفس المشاعر انتظرج واشوف اسباب الرفض الصحيحه شنو؟؟
واذا ماعندج رغبه بيه كولي من هسه واحترم قرارج...
نزلت راسي كتله موافقه اني ...
رجع على الكرسي وايده على الميز...
كال يله لاتهتمين اكبري واخطبج ..
صدك  زغيرونه بعدج...

اداركت الموقف بسرعه ولحكت على نفسي بسرعه طلعت حته بدون استأذان...
بوجهي للحمامات غسلت ووجهي احمر..
هسه اذا شافتني ام سامي ادخلني بسين وجيم..
هدئت شوي ..
طلعت ورحت للغرفه .. هستوني دخلت صاحت ام سامي همزين شرفتي شو روحاتج اطول يم المدير؟؟
... عندي شغل هواي وبي اخطاء طلعت ويدقق بيهن..
... لعد شبيج متوتره؟؟
... كلشي مابيه رايده شي مني
... لا سلامتج عيوني وشفتهه تغمز لسؤدد..

كلام ثابت بأذاني طلع يحبني واني غافله..
شكول عليكم عمي ونعيمه نغصتو فرحتي...

خلص الدوام تحت بسامير ام سامي..
بس مطنشتهه..
وصلت للبيت نعيمه كالبه وجهه هي وعمي...
بدلت ونزلت اريد اتغده..
صاح بيه عمي ولج تقوى اني شغلي هالايام موتمام.. وانتي عندج راتب سألت على راتبج وكال المحاسب تستلمين 500 انوب كل شهر تجين تسلميني الراتب بيدي مو حاطتج كل هاي السنين اعلف بحلكج...

... هذا شبي جنه جلب مسعور كبر لف هالشواريب عود عمي ..
عمامه دبب تعمي عيونه
ماحجيت شي بس كتله ماشي..

بيومهه كلش ضجت ليش هيج عاملني وانقلب فجاه اكيد هاي السواسه نعيمو جنهه حيه ام راسين...

مر شكم يوم والهدوء سيد الموقف ...
حته ثابت اشوفه بس من اطلع ...
وكلش انقهر من رفض عمي وهو شلون شخصيه وابو صالح ابو شنب كاعد يتعزز علي...

يوم من عدهن كعدت متأخره وماادري شلون بدلت على السريع لبست قميص كابوي
وطلعت وعمي سيارته عاطله..
عود اجرلي سياره والسايق بس يباوعلي واني دايره وجهي...
وصلت لدوام ب9 الا ربع بعدني ماوصلت لغرفتي صاحتني السكرتيره...
كالت استاذ ثابت سأل عليج..
كلت خلي اروح احجيله سبب التأخير
خاف يجي يرزلني كدامهن ..
دكيت الباب ماكو صوت دكيته مره ثانيه هم ماكو...
بعدني واكفه بالباب اجه وراي..
كال هاتقوى ليش واكفه بالباب فوتي...
فتحلي الباب ودخلت وسد الباب وراي
ضليت واكفه ...
صاحني اكعد وكعد كدامي...
... كال هاشبيج؟؟
... موانت سائل عليه؟؟
... اي باجر عدنه تسليم سلف متقاعدين وردت تراجعين القوائم مال المتقاعدين الدفعه الاولى بس 50 نسلم والدفعه الثانيه على الشهر الجاي...
... مدنك ويحجي حته ماباوعلي وضايج...
... كومي جيبي القوائم بسرعه وسؤدد مجازه وام سامي نقلتهه لغير قطاع...
... ليش؟؟
... احسن .. ويله استعجلي محتاجهن هسه...
... هن كاملات بس اسحبهن واجي..

طلعت من عنده وهو ماباوعلي ابد..
رحت جبت القوائم ورجعتله استأذنت ودخلت
لكيته واكف ومرتجي على الميز ولازم الريمونت مال الشاشه ويكلب بالقنوات ...
اول مادخلت...
ضليت واكفه شفته يتقرب شوي شوي
صار قريب عليه واني لازمه الاوراق ومدنكه...
جر الاوراق من ايدي وخلاهن على التخم..
.. كال من طلعتي ما انتبهتي على نفسج بالمرايه؟؟
.. رفعت راسي كتله ليش شبيه؟؟
.. باوعي زين وشوفي!!
.. نزلت عيني وانصدمت..
طلعت ساده الدكم مال القميص بالعكس وحده طويله ووحده قصيره...
والدكم الي يم صدري كوه مسدوده...
واصله على حافه وتنفجر...

ما اعرف شسوي الارتباك والخجل  وفوك كل هذا الموقف والقميص الفشله...
جمعت الدموع بعيني من الفشله وشلون اروح للحمامات واكو موضفين...
كال نزلي شالج واخذي الاوراق وياج غطي نفسج بيهن عدلي وتعالي ..
ومره ثانيه انتبهي حبابه....

طلعت وامشي سريع الفشله شكبرهه كون اختفي من كدامه
شكد عيب شيكول عليه هسه
والمواقف التافهه ماتجي غير ويا...

عدلت القميص ونزلت شالي...
واخذت الاوراق ورجعت دكيت الباب...
ودخلت ..
باوعلي وكالي اكعدي...
وفدوه لكلبج انتبهي مره ثانيه ...
كادرنه مختلط وما اقبل واحد يجبب طاريج بشي...
... كعدت متأخره وانخبصت وخفت تحاسبني لان تأخرت..
... تخافين مني تقوى؟؟
... نزلت راسي ماحجيت...
... تقرب عليه اكثر.. كال خلي احجيلج هذا الكلام...
وما اريد تخافين مني  مره ثانيه ..
... ضليت اسمع وهو يحجي وعيونه ملتقيه..

#يتبع

حبايب قلبي...
زعلانه عليكم تصويتكم كلش قليل وتفاعل موزين...
اذا بقيتو هيج احتمال اوقف القصه لان ماعندي واهس اكتب ابد وتفاعلكم موشي...