رواية ذنوب لاتغفر الفصل الثاني 2 - بقلم Rozaya1122

#البارت الأول
# ذنوب لاتغفر
#الكاتبه 《روزايه》

رغم الفقر والحرمان بس احب حياتي حيل
بسيطه ... دومي متفائله ما اعرف شنو المضموم ولا افكر بمستقبلي ..
كل همي اكمل شغل واركض لسطح لو استغل الفرصه نعيمه ماكو..
وافتح راديو اسمع برنامج
صباح الخير يابغداد...
جنت دائما انتظر اغنيه حاتم العراقي تطلع

عليكم جذب الكال اني مرتاح
ياراحه لبلياكم تجيني...

اني اسمعهه واكوم ابجي اعيش الدور
والزم كلبي واحس بلالم وعبالك
خايني حبيبي ...واني افرغ من الفراغ...
امسح ادموعي واكوم اكمل شغل
واسمع بالبرنامج...
حياتي بسيطه حيل...
يتيمه الاب وعندي بس امي الي اشوفهه يوم عن يوم تتعب ...

جدي ابو ابويه متزوج اثنين..
مخلف ابوي وعمتي وصال من وحده والثانيه عدهه عمي ابو صالح وواحد شهيد بحرب ايران...
و2 عمات..

ابوي رجال فقير جان سايق تكسي
ويوم منهن رايح بكروه ومكلوبه بي
السياره ومات ...
عافني طفله عمري 6 سنوات ...
امي ماتزوجت على الرغم شكد حاولو اهلهه يغيروهه بس تمسكت بيه
ضلينه فتره عند بيت جدي اهل بابا وبعدين صار حجي من عمام امي شنو ارمله
وكاعده يمهم مع العلم ماعدهم بس عمي ابوصالح...
جدي جان معتز بينه ويحب امي
كال لعمي اعقد على سناء بس كدام الناس حتى محد يحجي ..
اتذكر بوقتهه امي رفضت ونعيمه هدت عليهه وكتلتهه...
بس جانت مجبوره توافق لان جنت كاسره ضهرهه واذا ماقبلت ياخذوني بيت جدي..

عقد عليهه عمي ابو صالح...
بس ماكو شي بيناتهم يخاف من نعيمه..
جنه كاعدين كلنه بيت جدو..
ورا فتره توفى جدو وعمي باع البيت واشترى بغير منطقه...

ماعافنه رغم حجي نعيمه وتهدد بي تاخذ الجهال  وتطلك بس كالهه ماعدهن احد وين يروحن...

انطانه غرفه بالطابق الثاني وناكل وحدنه
بس ثمن كعدتنه هو الخدمه...
اني اخدم بالبيت النهار كله
وامي عند بنت خالتهه ...
بيت جدو اهل امي كلهن بنات وولد واحد معوق ...
وحالتهم الماديه تعبانه حيل ...
لذلك امي رضت بالمقسوم لان اهلهه هم يحتاجون مساعده..
خالاتي كلهن متزوجات وحالتهم زينه بس خالو المعوق حالته موشي...
داومت بالمدرسه لحد السادس ابتدائي وبطلني عمي
بحجه نعيمه وحدهه وهي معلمه وماتلحك على
شغل البيت...
شكد توسلت بي امي بس جان رافض
لان هاي اوامر مرته....

صارت حياتي بس شغل....
اخلص اليوم طبخ وتنظيف ومراقبه بالجيران..
لحدماتجي امي...
بيومهه اجت تعبانه بوستهه وصعدت وراهه..

كالت تعال اسمعيني...
يابنيتي اني تعبت والعمر يتقدم
وموحيل قبل عندي ...
واليوم بنت خالتي كالت بعد لاتجين
راح تسافر هي وعائلتهه ...
واني حايره شنصرف شناكل..
احس كلام امي خناجر وتطعن بكلبي..
شكد يذل الفقر بس مابيدنه شي...
حاولت اطمن امي وكتلهه الله موجود ماينسانه  ....

مرت ايام امي كعدت بالبيت بعد ماتروح
ونعيمه بس تتعارك وياهه...
واحنه لاحول ولاقوه
كمت ما اصعد لسطح هواي لان
امي موجوده وماتقبل...

ضاق الحال بس امي صبوره ودائما تردد الحمدلله
نعيمه كامت تنطينه من اكلهم كالت بين ماادبرون شغل...
مرات زينه ومرات لا...

فديوم جان المغرب جنه كاعدين اندك الباب راح باقر يفتحه..
اجه شايل علاكتين..
كال هاي وحدنه النه وحده لعمه سناء

بسرعه فتحت العلاكه اشكال بيهه...
حافظات بيهه برياني ولحم وفواكه وحلاوة ولبن وبيبسي...
كالتله نعيمه هاي منين وشنو المناسبه؟؟
كال من جيرانه بيت حجي عقيل
كالو هذا ثواب لامهم ...
فدفرحت بوقتهه لان من عدهم ...
اباوع على الاكل واكول لعد شكد
عدهم فلوس مامخلين شي مامسوي...
صعدت علاكتنه للغرفه وركضت للسطح...
ضليت اباوع...
واشوف مواعين شكد بالطرمه وشباب ورياجيل هواي...

ادور علي من بينهم بس اريد المحه ماكو...
نزلت واكو فرحه بداخلي ...
موعبالك دزولنه برياني عبالك جاي يخطبوني...

بوقتهه شكد اكلت بالرغم انملت بطني وشبعت بس مدام من عدهم لازم اكله كله وما ابقي منه شوي....

عمي حالته الماديه زينه وبيته كامل واثاث اخر موديل...
بس بخيل ويانه حيل مايوم فرحني بأكله او
لبسه
حتى نعيمه مرات تذكرنه لو تشتريلي ملابس للعيد حالي حال بناتهه...
بس جانت تخاف عمي يحب امي وتنزل
عليهه ضره...
لذلك مرات تعاملنه بقساوه...

مرت ايام عاديه ...
عصريه كعدت نظفت وطلعت الملم اوراق بلحديقه اسمع صوت برا ورياجيل تتعارك اخذتني رجليه وفتحت الباب ...
اجه كبال عيني لابس دشداشه كريمي.. ومبين عصبي ويمه هواي زلم...
اني تيهت كلشي ونسيت نفسي
ضليت واكفه بلباب وصافنه علي
وفاتحه حلكي...
اجت عيني بعينه بسرعه رمقني بنظره  وخزرني...
اني سديت الباب وركض ليفوك...
ما ادري شجنت احس بهذا الوقت ...

رحت صعدت على الطابوكه واباوع من فوك واشوفهم يتناقشون بعصبيه...
واني منزله راسي من فوك واباوع...
مدري شلون شافني رفع راسه عليه ...
من بعيد ما اشوف عيونه تخزرني لولا؟؟؟
بس رفع ايده وحرك اصابعه بمعناتهه روحي...

يمه شجاني اليوم شيكول عليه
ركضت للغرفه وخدودي حمر...
هسه يكول طردتهه من الباب راحت لسطح
عباله مخبله عند بيد ابو صالح ....

ضليت كاعده افكر بنظرته شكد حاده اول مره اشوف شكله عن قرب..

ملامحه عاديه حاله حال اي شاب....
اسمر بس شكله عصبي وكالب وجهه
طويل وجسمه متناسق ...
احس كلبي يرجف يرجف بس اتخيله..
بس ماعرفت اسمه شنو؟؟
وليش يتعارك ؟؟
وبعدين هو شعلي ليش يخزرني الباب بابنه والسطح سطحنه....

انرسمت ابتسامه على وجهي ... فديته يحبني ويخاف عليه خاف واحد يشوفني...

انتبهت على نفسي اشجاي امشخط
شنو يحبني؟
وهو شكبراته يجوز متزوج ويحب مرته...

مراهقه وتفكيراتي متقلبه ساعه يحبني وساعه لا...
يوميه اخلي راسي على المخده واني اتخيل شكله وشلون خزرني...
شكد حلو اني احب اخذ واحد يخزرني واسكت ويصير حنون وياي...
ماعندي موبايل ولاتلفزيون بغرفتنه يعني مثل العميه بس عرفت الحب من ابو خزره....

مرت ايام واني مستمره بالمراقبه
ما امل ابد رغم رزايل امي...
بس رجليه ياخذني لسطح...

صادف يوم جمعه وضليت نايمه ل8 ماكو داومات وبيت عمي يضلون نايمين...
اجت امي تكعد بيه كومي تقوى ...
كومي يمه ...
كعدت وشعري مكفوش كتلهه شكو خليني نايمه ماكو داوم اليوم؟؟
ولج يمه كومي اني ونعيمه راح نروح لبيت ابو علي....
بيت حجي عقيل جدهم الشيخ اتوفى...
وانتي عينج على الجهال وعمج راح وياهم بالجنازه...

هي كالت هيج واني طفرت من مكاني كتلهه
اروح وياج...
وين موليه يامعزايه حاطه روحج نسوان كبار ولطم انتي شكو....
هي تحجي وتلبس بجواريبهه ...
واني افتر فوك منهه اريد اروح ادي الواجب وياهه واوكفلهم بمحنتهم...

راحت امي هي ونعيمه وضليت وي الجهال اسمع هوسه بالباب ...
بس خفت اصعد لسطح الجهال تفتر وراي...
ب11 رجعت امي ونعيمه
تلكيتهم اريد اعرف اخبار عنهم ....
كالت نعيمه كومي عزلي البيت وحضري
خاف يحتاجو لان فاتحتهم جبيره وناس معروفين...

كتلهه ليش هو الميت شيشتغل؟؟
... ولج شيخ عقيل معروف بالمنطقه وصاحب مال وجاه منو مايعرف ابو علي ...
... اريد اسأل بعد بس ما انطوني مجال..
هسه عرفت اسم جدهم عقيل لعد هو منو؟
هو حفيد حجي عقيل لو ابنه؟؟
لو علي لوغيره؟؟؟

رحت بدلت وحضرت نفسي كلت اله اروح
وي امي ...
بسرعه سوينه غده وتغدينه وعزلت البيت
شفتهن يردن يروحن وركضت وراهن
كتلهن اخذني وياجن...
صاحت بيه امي!!
بس نعيمه كالت خلي تروح وين تضل هسه تجي زلم وتصير هوسه...

فرحت حيل طلعنه من بيتنه صايرين
مقابيلنه.. بيت شكبره الكاشي لشارع
وحديقه عدهم برا ...
امشي واتلفت لابسه عبايه اسلاميه
وشال اسود
طبينه جوا اكو شباب واكفه بالطرمه
ونسوان تطبخ...
وصوت المله وهي تقره وبواجي النسوان
تلكتنه بنيه شابه عمرهه ب30 تقريبا رحبت بنعيمه وامي...

عمي ابو صالح حالته الماديه زينه ويشتغل بتلعقارات وصاحب علاقات وي الناس يعني ماخذين
فكره علينه متمكنين لان المنطقهه كلهه طاكه...
بس محد يعرف بقصتنه وعبالهم اخت ابوصالح..

دخلن جوا بلاستقبال واني ادفع بالنسوان وافوت شفت نسوان بعمر امي واكبر واكو اصغر..
يبجن ويصيحن يابويه... من خلال تحليلي
عرفت هذني بناته...
التفت اباوع شفت نسوان كاعدات وموحيل متأثرات... كلت هذني الجناين يجوز هذا
الشايب شاوي البصل على
اذانهن وخلصن منه...

بعدني احلل واستكشف جرتني نعيمه وطلعت بيه للمطبخ بي بنات ونسوان كبار كالت
لهاي البنيه الي تلكتنه ...
خاله فاطمه هاي تقوى بتنه اذا تحتاجون شي
تساعدكم كالت الا اروح وياكم..

ابتسمت بوجهي حوراء كالت شكرا انجازيكم
بلافراح...
ضليت كاعده على الكرسي ومذهوله بالترتيب
كاونتر فدشي شكبره على كد المطبخ
ميز طعام بلون الكاونتر .. شكد نظيفين ومرتبين
اكول هذا ابو خزره شايف نفسه..
بس شلون اريد اعرف شسمه؟

ضليت كاعده واراقب واحلل ...
اشكال البنات يخبلن اكبر مني وحجيهم كله ثقافه...
شكد تمنيت اصير مثلهم والبس مثلهم...
بس ما باليد حيله...
التهن النسوان بالطبخ وجاي ومي...
اني كمت وياهن ساعه اغسل مواعين..
لو اسوي جاي...
كل الي يسأل دكلهم حوراء هاي جيرانه...

شوي وكالو اجو من النجف تاخرو لان طريق طويل من بغداد لنجف ...
كمت اباوع من الشباك اريد اشوفه...
بس كل واحد جنه عملاق واكف كدام الشباك ماشفت شي..
اجتني وحده بعمر امي يكلولهه ام سامي...
كالت بنيتي تعالي وياي بالممر كلي البتيته مال الحشو ما الحك ....
رحت وياهه وبديت اكلي وكل وحده لازمتلهه شغله...
اكو اثنين كاعدات يمي اسمعهن يحجن ...
كالن الله يرحمه حجي عقيل مات
وماشاف عزيز كلبه  ثابت عريس..
شكد اتمنى يزوج ويريحه  .. 

ضليت افكر منو ثابت بسلا هو؟؟
اي يمكن هو صدك ثابت شكبره تريله ماتحركه...

كملت البتيته واني افكر بي ..
اجت نعيمه وامي رادن يروحن وماقبلن النسوان ...
وهن يحلفن وامي ونعيمه يحلفن ...
بعدين اكو مره جبيره كالت بيتكم بي زلم وين تكعدن وشلون اطلعن ....
احنه اهل غير توكفولنه بهيج يوم...

سكتن امي ونعيمه ورجعن واني رجعت للمطبخ..
شوي وصار المغرب...
كالن بدو يصبون ونسمع صوت الزلم برا...

ورا شوي اجه واحد جبير يطلع عمره ب40 بكد عمي كال شكد عندجن نسوان ...
راحت فاطمه واجت كالتله هلكد ...
كام ينطوهن مواعين وهن يوزعن....
اني بس اباوع....

كملو تزويع وعم الهدوء كلهه سكتت بس صوت
الخواشيك وطكه المواعين مبين الجوع عليهن....

شفت اكو مواعين بالكاع وبيهن تمن كلت
خلي اعزلهم  كمت اعزل بيهم
واخلي على السنك ...
اني كاعده ومنطيه ظهري للباب...
سمعت صوت اجاني...

.... بويه شو كومي جيبيلي خاولي من جوا..
كمت وكفت على حيلي وذايبه
بكلمه بويه...
بس شافني تغيرت ملامحه ...
كال منو انتي؟؟
... اني تقوى بنت ابو صالح...
... شوفيلي وحده من البنات صيحيهه...
رحت صحت فاطمة واني كلبي يركص ويغني ...
طلعت فاطمة شافته كالت هذا ثابت اخوي

ابتسمت بخجل وعبالك مدري شكالتلي...
طلع هذا ثابت ومامزوج!! هلا هلا
هذا الكبد مالتي ماخلي يزوج حتلو اسويله سحر

كمت اشتغل بنشاط نظفت المطبخ بلحظات
رغم هو ماباوع بوجهي ولا ابتسم...
بس سمعت صوته وشفته عن قرب هاي كافي..

كملو العشا وبدت المواعين تسوي سباق بالمطبخ حتى ماكو مجال بعد...
وغير مواعين الزلم الي بالطرمه...
اكو ناس تعشت وراحت واكو ضلو يباتون
شكد خطار يمهم الله يساعدهم...
حجي عقيل مات وهاي الناس
تاكل لحم ودجاج...

كالت فاطمه خلي نطلع نغسل مواعين برا..
هواي نسوان وبنات تقسمن ناس بالمطبخ
وناس بالممر ...
اني رحت وي فاطمه وو حده اسمهه رانيا...
بدينه نغسل والي نغسله اشيله اخلي
بالحديقه...
واكفه انتظر الي يغسلنه حتى
اشيله...
طبو مجموعه شباب وزلم كبار وجان هو وياهم
البقيه دخلو للمضيف...
وهو اجه يمنه كال فاطمه عينج على امي لايرتفع ضغطهه..
ولاتحجولهه سبب موتت ابوي خلي تخلص الفاتحه والله كريم...
           ♡♡♡♡♡♡♡♡♡♡♡♡♡♡♡
#يتبع