رواية ذنوب لاتغفر الفصل الثالث 3 - بقلم Rozaya1122

#البارت الثاني
#ذنوب لاتغفر
#للكاتبه《روزاية》

هو يحجي واني صافنه علي ...
شلون يحجي بنبرة حزن...
عافنه وراح للمضيف...
فاطمة كامت تبجي وتدعي وتحسب على ناس ما اعرفهم...
كملنه شغل واجت نعيمه وامي ترخصن منهم ورجعنه لبيتنه هم تنظيف وتعزيل لان هم
مشتغلين بي...
من التعب بسرعه نمت..
حتى اكعد من وقت واروح وي امي..

ثاني يوم اخذتني النومه كعدت ب9 ونص نزلت اركض مقفوله البيبان واسمع صوت زلم برا...
معناتهه عافني وراحن...
اريد اطلع شلون...
كاعده وانتظر بلكي يجي واحد لحدماصارت ب11 اجه باقر كال امج تريدج...
بسرعه لبست وطلعت ويا هوسه وزلم
امشي واتعثر وصلت لبيتهم وبعد اضرب
مخبوصين وكلهه واكفه لان وقت غدا ...
ماباوعت لاحد بسرعه طبيت للمطبخ شفتهن نفسهن نسوان البارحه...
ماسلمت كعدت وسكتت..
من الهوسه محد انتبه عليه ...
اريد اروح يم امي استحي وحدي بس
وين الكاهه....
ضليت كاعده مشوار وشفت فاطمه اجت كالت
هاتقوى اجيتي تعالي ساعديني انزل الموز من فوك...

صعدت وياهه ...
واني متعجبه على الاثاث والبيت شكبره
فوك 3 غرف وكل وحده بيهه بالكونه..
طلعنه صناديك موز وكمنه نزل ...
ضل واحد فوك رحت شلته وطلعت من الغرفه...

اويلي كلبي ابو خزره كدامي...
ضل يباوعلي وكالب وجهه واني نسيت نفسي والصندوك والموز واهل الفاتحه...
اباوعله وصافنه علي وكلبي يدك طبول...
...كال شبيج يولي مضيعه شي بوجهي...
... ما انطيت اي ايعاز مستمره بنظرته وشالي مخربط..
... اجه بأتجاهي كال شبيج انتي وضعج غريب؟؟
يوميه ماده راسج من السطح ماعبالي صاحيه جنت اضنج خبله..
... انتبهت على نفسي رفعت صوتي
كتله اني مو خبله...
... امشي من كدامي ولاترفعين
صوتج ماعليه غير بس الجهال والمخابيل..
... ضليت واكفه واباوعله بتحدي
واحس ايدي تعبت من صندوق
الموز ولو هو مابي هواي...
... رفع صوته شوي ..كال امشي
من وجهي ولج ولاتحطين عينج بعيني..

خفت من عصبيته بسرعه نزلت وكلبي يدك سريع تحجي وياي فاطمه واني مو يمهه ملامحي تغيرت..
بطلت مااحبه شايف نفسه
ويكول عليه جاهله ومخبله...
عابتله شلون شكول هو انت منو تباوعلك
لوما اني...
حتى اسمك مجعمر مثلك....

ضجت واريد ارجع لبيتنه كمت افتر لكيت
امي كتلهه اريد ارجع للبيت...
كالت منين ترجعين خلي تخف الناس ...
كعدت يمهه وسكتت حتى ما اشتغلت وياهن..

شوي وكمت كلت خلي اطلع وحدي..
طلعت من الممر واريد اروح ...
ماحسيت على صوته فززني...

...ولج انتي مدكليلي منين الله جابج؟
كلساع الكاج بمكان...

... اريد اروح لبيتنه!!
... ومنين اطلعين لبيتكم فوتي بنيتي جوا ومن تخلص الهوسه طلعي..
عيب وزحمه تخلين الزلم تشوفج..

... اصريت على موقفي وكتله الا اروح...
... كال لا والله انتي بيج خيط خبال
امشي صيحي امج ولج...
بسرعه انهزمت منه وكعدت يم امي وسكتت ماكتلهه يصيحج غلست...
لوتدري بيه طالعه الا تموتني...

لحدما كملو الغدا وبسرعه رجعت وي امي
ضجت منه وشلون يصيح..
ويكول عليه مخبله..
يله حقه يكول هيج اذا اني يوميه منزله راسي من السطح..
سويتهه بدون ملح.. بعد ما اصعد ولا اباوعله
شايف نفسه عابتله...

خلصت فاتحتهم وقوت علاقتنه بيهم كامت فاطمه تجينه دائما وتسولف وي نعيمه وامي
بس مايخلني اكعد يمهن...
امي اشترتلهه نعيمه مكينه خياطه وبدت تخيط الحمدلله

بهاي الفتره ضليت اتوسل لعمي ونعيمه اريد ادرس ثالث بلاول رفضوا وبعد معاناه
يله وافق عمي وسجلني بالمدرسه...
واداوم بمدرسه اخت نعيمه لان هي المعاونه..

حيل فرحت بهاي الايام ملتهيه بدراستي
اول ما ارجع اركض افتح جنطتي وابدي اقره
البنات الي وياي حبابات وكلهن شاطرات
نسيت ابو خزره ولا اصعد لسطح بعد...

حتى تغيرت هواي جانت تصرفاتي
بخبال
صرت رزنه وعندي صديقات...
ودرجاتي زينه انجح كل شهر ...
حتى نعيمه تسأل على درجات ...
ودكول عفيه بس ترسبين نبطلج...

المدرسه موبعيده ارجع مشي وي صديقتي
هي بغير فرع ...
يوم منهن اجيت امشي وحدي لان
صديقتي راحت بغير فرع...

امشي واكو ولد يمشون وراي ويسمعوني
حجي...
الحلو وحده اليوم... والثاني يكوله
خوش صيده هاي...
اني كمت امشي سريع وكلبي يركض قبلي...
دخلت ببدايه فرعنه...
ماحسيت غير واحد جرني من جنطتي
مدري شجاني انعقد الساني بس ابجي
وادفع بي والثاني يجر بيدي مدري
شيريد مني...
هنا بسرعه كمت اصيح...
وخرو مني شتريدون؟؟؟
بس دموعي تنزل عشره عشره...

سمعت صوت رجال صاح بيهم واحد انهزم والثاني لزمه دك بوكسيات حته الدم طلع من خشمه...
باوعتله الطول موغريب عليه صح مرت
سنه او اقل ماشايفته بس حافظته
من كدما اباوعله من فوك...

تقرب عليه واني لازمه جنطتي وحجابي
مخربط..
نفس النظره مالته من خزرني بالباب...
كال شلون تمشين وحدج بهيج وقت
وظهريه..
ماحجيت بس ابجي...
... كال انتي مو بنت ابو صالح؟؟؟
... هزيتله راسي
... مره ثانيه لاتمشين وحدج ودافعي عن
نفسج شكو ساكته؟؟؟
... اني بسرعه عفته وشلتهه ركضه للبيت

عيونه حادات ونظرتهه مدري شلونهه عبالك
يريد يفترس المقابل....
كلبي يدك سريع ما اعرف من الهبطه مدري
من ابو خزره...

رجعت للبيت سولفت لامي
وكالت بعد لاتمشين وحدج ...
واذا سمع عمج يبطلج من الدوام...

مرت ايام وكمت ابد ما امشي وحدي
لو وي صديقتي لوتتلكاني امي...
ابو خزره ماشفته ابد....

بيوم رجعت من المدرسه دوامي ظهري جان..
لكيت فاطمه وامي ونعيمه كاعدات بالحديقه
يسوون طرشي احمر ويسولفن...
بدلت واجيت كعدت يمهن...
خلال الحديث...جابت سيرة ثابت...
انتابني الفضول اريد اعرف شي عنه...

نقذتني نعيمه وسألت كالتلهه هوشاب
وشخصية وفلوس شعجب مامتزوج لسه؟؟

فاطمة جرت حسره شكبرهه وكالت شحجيلكم...
احنه اصلنه من الانبار واجينه كعدنه هنا بسبب اخوتي كلهم درسوا ببغداد...
ابوي متزوج اثنين وحده ام علي الله يرحمهه الاولى عدهه علي وعامر وابتهال وانسام...
والثانيه الي هي امي خلفت بس ثابت واني!!

ابوي الله يرحمه جان يفضل ثابت على الولد
لان اتزوج امي على حب...
جان بكلشي ياخذ رأي ثابت لذلك صارت حزازيه
بين اخوتي ...
كل طلبات ثابت تتنفذ والبقيه قاسي وياهم
بسبب حبه اله زرع كره بيناتهم وكامو
يتامرون علي وهواي سببوله مشاكل..

بيوم صارت عركه بين ثابت وعلي وابوي تخربط ووكع ...
من هذا اليوم جمعهم ابوي وحاول يصفي نفوسهم وتقريبآ صارو احسن...
بس ثابت هو هذا طبعه حتى الضحكه
بفلوس عنده...

واكثر شي اثر علي من جان بالكليه حب بنت اخت مرت ابوي اسمهه دنيا وخطبهه ..
بس ابوهه ماقبل تزوج الا تكمل كليتهه
بهاي الفتره صارت مشاكل بيناتهم...
وطلعت عدهه علاقه بصديقه المقرب...

بوقتهه تخبل انطعن طعنتين من صديقه ومن خطيبته بسرعه طلكهه وكل واحد راح بطريق..
وهي تزوجت غير واحد...
وهذا حال ثابت يكره الصداقه ويكره سالفه النسوان..
وشكد حاول ابوي يخطبلهه وجان رافض نهائيا...
بس واحد يفتح موضوع الزواج تصير مشكله..
واعتكف ومايختلط ابد...

مدري شحجاني كتلهه هو شيشتغل؟؟

كالت هو خريج كليه اداره واقتصاد
وفتح شركه مال صيرفه وتحويل فلوس والحمدلله حالته الماديه زينه...
ويخاف الله حيل وماعنده اذيه على الناس ...

كالت واني تزوجت ابن عم ابوي وماصار عندي اطفال مده 3 سنوات ومن راجعت كالو السبب مني..
وراح تزوج وحده غريبه اني ماقبلت اضل يمه واني ما يصير عندي طفل...
واصلا عيالي جانو يضوجون مني لان امي غريبه وابوي حبهه وتزوجهه

اندمجن بالحجي امي ونعيمه واني الصفنات اخذتني...
شكد متعذب بحياته لذلك اشوفه قاسي وحته مايوم شفته يضحك..
الله يعينه خطيه صديقه وخطيبته شكد صعبه!!

اجه موعد امتحاناتي وامتحنت ونجحت وجنت
كلي امل ادرس سادس بس عمي عاند
وكال اذبحج وماخليج تكملين...
وصار عمرج 19 منا وهيج اي واحد يجي ازوجج مخليج شكو!!!

بطلت وكعدت بالبيت ورجعت حياتي القديمه
تنظيف وطبخ...
حياتي روتينيه وممله حيل ...
حته ثابت ما اشوفه بعد كبرت وكمت استحي اصعد لسطح...

بهاي الفتره امي صحتهه ادهورت حيل وفلوس ماعدهه تراجع ...
عمي ماكلف نفسه بالف... مرات نعيمه تاخذهه للمستوصف وكلشي ماينطوهه...
صحتهه بالنزلان وطلعت الدنيا من عيوني...
اذا صار بيهه شي وين اروح؟؟ والله نعيمه تزوجني بسرعه وتخلص مني...

بيوم جنه وحدنه اني وامي وجنت اسوي غدا وهي مدده بالغرفه ...
كلت خلي اروح اشوفهه صعدت فوك صحت
يمه يمه!!
ماجاوبتني...
كمت اهز بيهه بارده ثلج ونايمه ...
دموعي تجري وما اعرف شسوي...
رجليه ماتشيلني مدري شلون خليت الشال على راسي...
وركضت حافيه لبيت حجي عقيل كسرت الباب
يله طلعوا ...
طلع طفل كتله روح صيح فاطمه بسرعه ...
راح يصيحهه واني واكفه ابجي واتلفت على بيتنه...
كلساع اكول هسه تطلع امي ترزلني شلون
طالعه هيج...

اجت فاطمه تركض لزمتهه من ايدهه واتوسل كتلهه امي ماتتحرك وبارده...
راحت جابت عباتهه وصاحت ثابت تعال هاي ام تقوى متخربطه...
رحت لبيتنه اركض كدامهم ركضت للغرفه وفاطمه وراي ....
نحرك بيهه ماتتحرك ابد...
صاحت على ثابت طب شافهه وغطاهه ...
انهاريت ذبيت نفسي عليهه وابجي واصيح...
لاتعوفيني يا امي وين اروح...
شلون انطاج كلبج اتركيني وحيده...
اخذيني وياج والله محد يرحمني هنا...

فاطمه تجر بيه وتبجي وياي ...
كومتني كوه واني اصرخ ....
حسيت بدوار ردت اوكع حسيت على ثابت لزمني من ايدي ....
من كدما بجيت واحس نفسي اختنكت
ومن هول الموقف وكعت ما ادري بنفسي.....
انتبهت اني بحضن فاطمه وامي ماكو ....
ماكو نسوان بس نعيمه... وبيت حجي عقيل...
من شفت نعيمه كاعده وتبجي مدري شصار بيه
هديت عليهه كتلهه كله من وراج ماتت
ماخذتوهه للطبيب انتي ورجلج الله ينتقم منكم...
لوماخذتهه جان امي هسه يمي...

جرتني فاطمه واخذتني للغرفه بعدني مصدومه
شوي وكامت الناس وكرايبنه تجي كمت اسمع الصياح وصوت المله...
هسه يله صدكت كمت املخ بشعري بدون شعور...
اضرب صدري بكل قوه وما احس بالم...
الم كلبي وفراك امي اقوى...
انهاريت اكو نسوان اجن يبجن عرفتهن خالاتي الي
مايوم سألن علينه...
وهن كلهن متمكنات...
ما اهتميت الهن وحته ماخليت وحده تحضني وتواسيني...
شكد شفنه عذاب ومحد سأل علينه ...
اهل امي ابوهه وامهه ميتين
وخالي معوق يعني حتى ماعدهه اهل يوكفون بفاتحتهه...

فاطمه ماخلتني اطلع من الغرفه ابد...
اجت ام ثابت حضنتني وتصبر بيه بس اني بس جسد
احس روحي راحت وي امي حتى ماودعتهه شالوهه واني خربانه...
احس نفسي اختنكت من صوت المله تعبت حيل كمت كوه اخذ النفس
واصلا اني عندي ربو....
ما ادري بنفسي من وكعت فتحت عيني شفت المغذي بيدي واني بالمستشفى ...
عيوني مغوشه من البجي ...
شفت واحد واكف منطيني ظهره ومرتجي على الباب ويحجي وي وحده مابينه منو ...
بس من خلال الهيئه مالته عرفته هذا ثابت!!!

♡♡♡♡♡♡♡♡♡♡♡♡♡♡♡♡
#يتبع