رواية تحت جناح الظالم الفصل العاشر 10 - بقلم zaho._k99

هنالك فئة من الناس ستكذبك جداً، ستلومك على معرفتك بنفسك، على حفظك لمواعيد هروبك عندما تحزن وعندما تنام

ستلومك إن عرفت التعامل جيداً مع مزاجيتك وحالاتك، على صدق حدسك وعلى طريقة نظرتك وإحساسك بالأمور

على محبة الآخرين لك وصدق الأصدقاء في كسبك لكون قلبك قطعة من الجنة كما يصفون

على أحلامك وتطلعاتك الدافئة للحياة، على بساطتك وعلى جنونك، وعلى أدق التفاصيل الصغيرة التي تساهم في سعادتك
هنالك فئة من الناس ستلومك جداً وتحقد عليك وتكذبك فقط لكونك أنت بحقيقتك!
هي ستبقى تحملك عبئاً وثقلاً على قلبها بينما أنت ستعتبرها درساً في حياتك كي تحبّ نفسك أكثر ! ♥️

***********************************

لو جبت ورقه بيضه وخليت عليها بالحبر نقطه سوده وتجي تراويها للناس اول متسألهم شنو تشوفون راح يكولولك نقطه سوده افعالك الزينه وقلبك الطيب يتمثل بهاي الورقه البيضه اما مساوئك او اخطائك هيا نقطة الحبر السوده
حياتنه اشبه بهاي الورقه
رغم طيب قلبك وافعالك الزينه واسلوبك الحلو وتعاملك الراقي بس الناس مراح تركز غير على اخطائك ( الي هيه النقطه السوده الصغيره) راح يعوفون كل الورقه البيضه وينتبهون ع النقطه السوده
دائما مفروض نكون حذرين بكل تصرفاتنه كدام الناس
لان اقل خطأ محسوب علينه ….

توجهنه للصالون اني ونور يبعد كيلو متر او اكثر عن بيتنه 

نور: ميمي نروح مشي حتى شويه نغير جو  والكروه نضمهه حتى اذا يعجبنه شي نشتري !

مرام: يي عادي اصلا اني احب امشي

نور: تدرين ميمي مرات اتخيل ماما عايشه وجانت مسافره تتعالج واتخيلهه تجي للبيت وتشوف اسماء وتشوفنه وتاخذنه  يمهه
اتخيل لو هسه موجوده جان هسه اني دا اتحضر للجامعه ودا اشتري ملابس ووووو هوايه تخيلات
جان هسه اني بمكان مدا اروح للشغل جان كعدت ماما من الصبح وافرفر بيها بالسوگ علمود تجيبلي الي يعجبني
اوووووف ياا امي اووووف تعالي شوفي حال بناتج هسه

مرام: حسبي الله ونعم الوكيل كله من ورا اسماء ضلت تنگ ع المدرسه وخلت بابا يكعدج  وهسه شاده ويايه

نور: لا حبيبتي مادامج شاطره ممسموح لاحد يبطلج جنت صغيره وماعرف ادافع عن نفسي وبطلوني بس هسه الي يفكر يبطلجن اكلب الدنيا عليه
شيردون شو دا اشتغل بالبيت وداشتغل بالشارع ودا انطيهم الراتب وجهالهه كبرتهم الهه شتريد منجن وتبطلجن

مرام: الله يهديهه علينه ان شاء الله

نور: ميمي اي شي تسمعي بالشغل وتشوفي لتحجي كدامهه خليج خرسه وطرشه شتسألج جاوبيهه بأختصار ولتحجيلهه تفاصيل يومنه نضحك نتشاقى نحصل بخاشيش ننام كولشي لتحجين وهسه تشوفين ام دره ( ام الصالون)شلون حبابه

مرام: اوكي

وصلنه للصالون وفتحت الصالون نور
طلعت الصونده وغسلت الباب واني وياهه اساعدهه
فاتت جوا نضفت المحل مسحته ورتبت الكراسي ورجعت ادوات الحلاقه بمكانهه واني وياهه وياهه

نور: نزعي الحجاب المن لابسته ماكو احد

مرام: لا عادي مرتاحه بي

نور: نزعي مطيه اليوم طويل خما تضلين متقيده بي وبعدين ترى صالون نسائي ميفوتون ولد

فتت بالاوفيس نزعت الحجاب ورفعت شعري بقينه لل١١ تقريبا فاتت مره سمينه بيضه وجهه يخبل

ام دره: صباح الخير

نور : صباح الخير يوم

ام دره: هاي الحلوه مرام؟

نور: ي هاي اختي مرام الي كتلج عليها

مرام : مرحبا خاله

ام دره : مراحب امي شلونج

مرام: احجي ومدنگه راسي عبالك واكفه كبال المدرسه
— الحمدلله خاله

ام دره: لج نور هاي مبينه فقيره  شلون راح تتعامل ويا النسوان  وهنه وحدتهن لسانهه رشاشه

نور: تتعلم يوم اني من اجيت هم مثلهه

ام دره: يي كون تطلع مثلج سباعيه وشاطره وتلگف بسرعه

نور: والله يا امي مو لان اختي وامدحلج بيها بس ميمي شاطره وذكيه وتلگف بسرعه وهسه الايام تثبتلج

ام دره : ان شاء الله
— ممتريكين مو ؟ ولو قابل السحليه تكعد تسويلجن اكل ؟

نور :والله يا يوم اني ما اشتهي اكل بالبيت اصلا وفد فرحانه بالشغل حتى اخلص وما اگابلهم

مرام : رغم مرت ابويه مو زينه وابويه مو زين بس ابد ما اكول كدام احد لان ماحب نضرة الشفقه  بعيون الناس وما احب احد ينقهر علينه  فكوولش ضجت من عرفت نور كولشي حاجيه لام دره............

ام دره: دگومي اخذي مرام وروحي جيبو ريوگ حتى تندل الاسواق من ندزهه

نور: يله ميمي كومي لبسي حجابج

كمت لبست الحجاب وطلعنه للاسواق

مرام: نور ليش حاجيه للمره على حياتنه وعيشتنه ليش تخلين الناس تشفق علينه

نور: وكل ضنج الناس متعرف حتلو منحجي ترى مبينين اصلا اول مأجتي اسماء للصالون وعرفت على نفسهه من طلعت راسا كالتلي ام دره كالتلي ابد مرتاحيتلهه مبينه شريره
وتشوفني اجي ماعندي فلوس لو الف بجزداني لو ماكو وتشوفني كولشي ما اشتري  من سالتني كتلهه حتى هيه كالت ازيد راتبج ولتكولين لاهلج خلي مصرف الج
وحتى حنينه عليه تخليني انام وتجيبلي ريوك وغده وحتى العشى اتعشى يلا ارجع للبيت كولش حنينه متقبل اصيحلهه خاله تكول كوليلي يوم اني مثل امج وهسه راح تعاشريهه وتعرفيهه
بس ميمي ابد لتكولين كدام اسماء اصيحلهه يوم ولتكولين تجيبلنه اكل ولتحجين كوولشي

مرام : ميخالف
وصلنه للاسواق وجبنه ريوك ورجعنه
شغلت نور الغلايه وخلت بيها مي وحضرت الكلاصات وخلت بيهن ضروف الجاي وحضرت الاجبان  وكعدنه ناكل
اني بطبعي فاااهيه بالاكل ونوب استحي
حجت ام دره:
ماما لتستحين اكلي ماكو احد غريب هاي اختج واني مثل امج لتتحسسين وماريد هذا المستحه لان راح يجون نسوان والمره تحب وحده تجاملهه تحجي وياهه متحب الهادئه  صح راح تستصعبين الموضوع بالبدايه بس راح تتعلمين
يا امي هاي الشغله بيها مصلحه يعني شكد مراح تعبين نفسج وتشتغلين راح تتعلمين الصنعه وتستفادين منها يجوز باجر عكبه الله وفقج وتفتحين صالون وحدج
مشاكلج الي بالبيت ومعاملة مرت ابوج الج وهوسة البيت عوفيهه بالبيت وتعالي
هم منهه تغيرين جو هنا وهم تتعلميلج شغله وهم تجمعيلج جم فلس من احجي وياج لتتحسسين مني بس من دا احجي لمصلحتج حتى تعرفين شلون تتعاملين بشغلج
واني ونور وياج راح نعلمج شويه شويه

مرام: ماشي خاله

ام دره: ماحب خاله ولا احب عمه صيحيلي يوم مثل نور انتو مثل بناتي امي

مرام: استصعبت اكول الها يوم او اي مسمى من مسميات الام احسها ثكيله بلساني ممتعوده اكولها لغير امي  بس حرجتني  بطلبهه وخلتني اناديهه بهل اسم
— تمام يوم

ام دره : تمام حبيبتي هسه روحي خل نور تعلمج على تنظيف الادوات
لان انتي مبدئيا راح يكون شغلج تنظيف الصالون او ندزج اذا حتاجينه شي
— انتي تعرفين تسوين شيره؟

مرام: استحيت من سألتني
— يي اعرف

ام دره : خووش حتى من يجن نسوان يردن يسون شيره اخليج انتي تسويلهن حتى تستفادين وهااا لتستحين اذا نطنج اكراميه مو ترجعيهه هذا حق تعبج اخذيهه وكوليلها مشكوره

مرام: تمام

كولش استفاديت من نصايحهه وكولش حبيتها رغم هاي اول مره اشوفها بس احس كلامهه بلسم وروحهه مرحه ومن غير منظرها الي احسه مريح للعين  مرات نشوف ناس منعرفهم بس مجرد النظر الهم نحسهم مريحين للنظر وام دره من هذوله الناس

بدو الزباين يجون واكو بيهم الي يعرف نور ويكعدن چرخ سوالف شكد يحبن يسولفن  ونور اشوفها منطلقه وياهن وتسولف وتضحك
نور هم مجانت ضابطه الشغله بس تعرف حفافه شسوار تصبغ تسوي تسريح للشعر تسرح الشعر بالكاويه تراقب لون الشعر تسوي بدي كير ومني كير
بس الاشياء الاساسيه ام دره تسويهه العرايس المكياج الصيغ التخصيل  كولهن هيا تسويهن
اني جنت اوكف جوا ايد نور وام دره ودي هذا جيبي ذاك لمي الشعر رجعي الكتلوك وهيج اشياء..........

خلص اليوم بس تعب وكفه هوايه واكو نسوان يجيبن جهالهن وياهن واضل اركض ورا الجهال هذا وكع الجبس وذاك طش العصير وني اركض وراهم  ومن غير كولسع دازيني للاسواق
من دنطلع صاحت علينه ام دره

ام دره: مرومه ماما شلون تردين راتبج يوميه لو اسبوعيه

مرام: ضليت صافنه ماعرف كتلهه بكيف نور  ضحكت عليه ولتفتت لنور

نور: لا يوم خليها اسبوعيه مثلي احسن

ام دره : خوش شالت ٣٠٠٠ وخلتهن بيدي كالت هاي الج من غير الراتب

مروه: استحيت اخذهن
— لا يوم شكرا ماريد

ام دره: هااا شكلنه مو كلنه من احد ينطيج اكراميه لترجعيهه

مرام: اخذتهن وتشكرت منه
انطت لنور ٥٠٠٠ وسألتهه اذا دتجمع لو لا

نور: لا يوم دا ضم

ام دره : عفيه ماما يلا توكلو وراكم طريق

طلعت والابتسامه شااگه حلگي اول مره اجرب اشتغل واخذ اجور شغلي
رغم جانن قليلاات بس ممصدگه ذني ثمرة تعبي

نور: ميمي لتكولين للسحليه شي وذني الفلوس ضميهن واني هم دا اجمع

مرام: اريد اشتري حلويات لـ لمى

نور: اوكي تعالي نشتريلها وللجهال ونكوللهه  زبونه نستهن  واخذناهن

مرام: ماشي
اشترينه للجهال ولمى ورحنه للبيت
من نطيتهم الحلويات وفرحو حسيت روحي مسويه فد انجاز  شعور كولش حلو
سألتني اسماء ع الشغل وكتلهه تعب بس محجيت تفاصيل مثل موصتني نور

استمريت بالشغل بالصالون والحمدلله بديت اتعلم وام دره فرحانه بيه وكولش حبابه ومتقصر عليه وتنطيني فوگ حقي من غير الي احصله من الزباين  اشتري الاكل الي يعجبني والحلويات الي بنفسي وماخلي شي بنفسي بس كله داخل الشغل
مرتاحه الحمدلله وهم خلصانه من السحليه 
طبعا اني ونور ابد منمكيج ولا نحف بحيث ياهو الي تجي للصالون تستغرب احنه نشتغل بصالون ومنخلس مكياج ولا نحف
فمره گاعدين الظهر ماعدنه زباين

ام دره: بله مرام كومي كعدي ع الكرسي خل نور تمكيجج داريد اشوف اكدر اعتمد عليهه بالمكياج؟

مرام: يوم اخاف لان ميقبلون اهلي اخلي مكياج

ام دره: دگومي هنا تمكيجج وغسلي شو حتى ماكو احد شو گومي

مرام: ترددت بس استحيت من طلبت مني اني من النوع كوولش جبانه  ومرت ابويه مسويه بيه خوفه بحيث شغله تكول ممنوعه لو يگصون ركبتي ماسويهه  بس استحيت من ام دره  ونجبرت گمت

كاعده ع الكرسي ونور دتمكيجني وچان ينفتح باب الصالون وننصدم بـ……

***********************************
ﺗﻌﻠّﻢ ﻛﻴﻒ ﺗﺘﺠﺎﻫﻞ ﻛُﻞ ﺷﻲﺀ ,ﻭﻛﻴﻒَ ﺗَﻘِﻒُ ﻭﺣﻴﺪﺍً ﺩﻭﻥ ُمساﻋﺪﺓ ﺃﺣﺪ  ﺗﻌّﻠﻢ ﺍﻻّ ﺗﻌﻴﺶَ ﻋﻠﻰ ﺍﻷﻧﺘﻈﺎﺭ ﻭﻻ ﺗﻜُﻦ ﻫﺎﻣِﺸﺎً ﺑِﺤﻴﺎﺓِ ﺃﺣﺪ ، ﺗَﺠﺎﻫَﻞ ﻣَﺸﺎﻋﺮﻙ ﻛَﺜﻴﺮﺍً ﻭﺍﺳﺘﻮﻋﺐ ﺍﻥ ﻻ ﺃﺣَﺪ ﻳَﺪﻭﻡ ﻷﺣَﺪ.......

**********************************
شلونك يبعد المو الي
يالتعبتني انته وهلي
لابيك كطرة مـِْن الهلا
ولا ملكة غيرك بي دوة
چا ابدلك اني مــِْن الصبح
لْـۆ ينلزم بيدي الهوة🤷‍♀️ 💨.......