رواية تحت جناح الظالم الفصل التاسع 9 - بقلم zaho._k99

توجد مرحلة هادئة في حياتك، لا يستطيع أحد فيها معرفة الذي يجول في خاطرك، لا تطلب لا تنوي فعل شيء ولا تُلمّح لشيء، الأعزاء فقط يلمحون تعبك، يُضيئون العتمة الواضحة، يُدارون خاطرك، يُهربون الضحكة في أيامك، يسعون لتلميع ما بهت في ناظرك، ولا أجد عزاء حقيقي أكثر من هذه المحبة .

**********************************..

دائما اكو نعم بحياتنه احنه ممنتبهيلها
ومنحس بيها غير من نفقدهه
مرات نحجي حجي جبير واحنه منعرف معنا
اكثرنه مرات يعترض على عطايا رب العالمين
الله ليش مينطيني هيج شغله
الله ليش خلقني ضعيفه او ليش خلقني سمينه ليش خشمي جبير ليش عيوني صغار ليش مخلقنه اغنياء ليش وليش وهاي الليش الي متخلص
بس ابد منذكر نعم رب العالمين
يجوز رب العالمين مخلقنه اغنياء بس نطانه الصحه الي تسوى ابو الفلوس
او يجوز منطانه شي احنه نريده بس انطانه الاحسن منه والي بي خير النه

دائما چنه صغار نسأل ليش رب العالمين اخذ امنه ونطانه اب مو حنين
والي چان يصبرنه من يگولون انو المؤمن مبتلى
ودائما نسمع انو " لايكلف الله نفسآ الا وسعها"
يعني لو ميعرف بينا رب العالمين احنه گد هل اختبار مچان خلانه بي

مرت 5 سنوات على وفاة امي
5 سنوات عشناها بضيمها وقهرها ومشاكلهه وبكل تفاصيلهه عدت هاي الـ5 سنوات

نور صار عمرها 18 سنه
بشرتهه سمره وعيونها كبار صاحبة رموش كثيفه شفايفهه مليانه شعرهه اسود وسرح قصيره وناعمه
طبعا نور اكثر وحده تشبه ماما
كبرت وبدو الخطابه يجوها
بس اكيد مرت ابويه متقبل تزوجهه لان شايلتلها البيت كوله ومن غير جهالهه الي واكعين براس نور
طبعا اسماء صار عدهه ولد وبعدهه حبلت وخلفت بنيه وهذوله صارو من مسؤؤلية نور
اسماء چانت رأسا ترفض الي يتقدمون لنور بدون مترجعلها وتاخذ رأيها

بهذاك الوقت عمري جان 15 سنه
جنت طالبة ثالث متوسط
جنت متفوقه بدراستي وطبعا من غير مدرسين خصوصي ومن غير ملازم
اقره ع الكتاب وعلى شرح المدرسه
شااطره كولش وملمه بدراستي وحريصه عليها

اما لمى چانت سادس ابتدائي
لمى جانت وكحه وملسونه الي يكوللها كلمه ترده بعشره عكسي اني جنت فقيره وهادئه واقوى طموحي ادرس واطلع الاولى
ابد ممريت بفترة مراهقه مثل باقي البنات
لا حبيت ولادخلت بعلاقات ولا سويت سوالف كبار من حفافه ومكياج وهل سوالف
كولش جنت هادئه بفترة مراهقتي وجان همي دراستي

- رمضان وصايمه ومبقى ساعه ع الاذان
التوتر يقرى 1000 رغم ادري بنفسي ناجحه بس اخاف درجاتي مو عاليه
اروح منا واجي منا ومنتضره النتيجه
اسماء تخابر على جيرانه وتردله الرقم الامتحاني حتى ينطيها النتيجه وني الي يكولي هلاو ابجي

اسماء: اهاا اوكي شكرا عيني تعبتك ونهت الاتصال

مرام: من شفت هيج حجيهه بهت لوني مبقى قطرة دم بيا
- ها باجي بشرري

اسماء : شبشر طالعه ب 2

مرام : لااااااا عفيييه والله مجاوبه والقران مجاوووبه احجي وابجي ومنا صايمه حسيت روحي راح يغمه عليه
دائما جانت اسماء تكولي انتي متفلحين بدراسه وثوله ومن هل حجي
حتى جانت تتعمد متجيبلي ملازم كل ضنهه ارسب وتتشمت بيا وتگعدني من المدرسه
بس اني جانت روحي بالدراسه يعني اصلا الملزمه متزيد على مستوايه شي

احجي وابجي فرفحت روحي يعني لو كافر هم جان نقهر هلى حالي

اسماء: على كيفج ناجحه ترى

اني كلتلي هيج كمت اكمز بكل حيلي ممصدكه فرحااانه فرحاانه اكمز بفرح
بس صدوك بيومها كسرت فرحتي من كالتلي

اسماء: ديلا عيني مين نجحتي من الكليه هوا ثالث متوسط

مرام : باجي حتلو ناجحه من الاول ابتدائي هم جان شفتيني هيج فرحانه ثمرة تعبي هاي اجتي ايام ما انام واكعد للصبح اقره وتشوفيني لا ملازم ولا مدرسين خصوصي شلون متريديني افرح
لمى ونور فرحانات على فرحتي
فرحانه كملت متوسطه وراح ابدي مرحله جديده راح اصير اعداديه شعور حلو من تتعب على نفسك وتجني ثمرة هذا التعب
بالذات اني جنت احسه شي مختلف احس نجاحي بتعبي وبدون مساعدة احد...........

اسماء بهاي الفتره عرضت على نور انو تشتغل عامله بصالون
نور من ضوجتهه وحبستهه باللبيت وافقت
جان اكو صالون قريب على بيتنه محتاجين عامله فراحت نور واتفقت ويا ام الصالون وبدت تشتغل
عدى على شغل نور شهر
وام الصالون كولش حبت نور امينه وشاطره وملتزمه بوقتها گلتلهه ماعندج اخت مثلج تشتغل ويانه ؟!
نور كلتلهه اختي بس صغيره عمرها ١٥ سنه وهيه طالبه بس اذا تقبلين بس بالعطله تشتغل عادي اكول لاهلي واكوللهه واردلج خبر
كالتلهه ماكو مشكله

نور من اجتي من الشغل كالت لاسماء واكيد اسماء تكيف بمكان الراتب راح يصيرن 2 وخلصانه من اكلنه وشربنه
نور رادتني اطلع اشوف ناس احصل كم فلس لان اهلي مجانو ينطونه مصرف ولا جانو يوفرولنه احتياجاتنه
هيه من رادتني اشتغل لمصلحتي بس محسبت حساب للمسمومه الي موجوده بالبيت ولا اجه على بالهه رح تسوي بيه الي سوته

فمن اجتي كلتلي اني مقبلت

نور: لج ميمي تحصلين فلوس وتشترين الي يعجبج والله احسن من كعدتج بالبيت

مرام : لاا نور استحي والله شلون احجي ويا ناس ما اعرفهه لاا لاا استحي وبعدين الراتب مو دتاخذه باجي يافلوس بعد الي احصلهه

نور: لج لا مو الزباين ينطون بخاشيش غير الراتب اني انطيها الراتب بس اخذ البخاشيش
وبعدين والله تتعلمين تحجين وياهم وتلقائيا يروح الخجل

مرام : لا نور استحي والله

نور: جربي اذا معجبج الوضع اني اخليها تبطلج
لج مطيه فكري جمعيلج كم فلس حتى من تجي المدارس تشترين ملابس وتشترين الي يعجبج ومن غير هذا تتعلمين مصلحه بيدج والاهم من هذا كله تخلصين من خلقة السحليه الي مكابلتهه ٢٤ ساعه
ولج اني لو بيدي اخلي ام الصالون تلاثتنه تشتغلنه واخلصجن من خلقتهه بس لمى بعدهه صغيره ميمي هاي فرصه لتفوتيهه وكتلج اذا مقتنعتي اني اخليهه تبطلج هااا شكلتي

مرام: فكرت بيني وبين نفسي شفتها خوش فرصه
هم منهه اتلهى بالعطله واتعلم صنعه والم فلوس وهم اخلص من السحليه الي مكابلتهه ٢٤ ساعه وبس تتعارك ويايه
واذا مرتاحيت للشغل ابطل

- هذا هو بس نور مو تعوفيني هناك وحدي الله علي

نور: لا ولج ماعوفج وهسه تشوفين الشغل شكد ونسه هناك

ثاني يوم الصبح مبدله وواكفه انتضر نور
القلق والخوف والخجل مينوصف عندي

اني من النوع انعزاليه وقليلة الكلام وما اتأقلم بسرعه شايله هم شلون راح اواجه ناس ماعرفهم واحجي وياهم
واني اذا يجون گرايبنه اختل بالغرفه واسوي روحي نايمه حتى ما اطلع اسلم
وارجع اصبر بنفسي واكول لا هاي فرصه حتى اكدر اجمع فلوس للسنه الجديده لان سنة الخ اعداديه ولازم ملابس جديده
من بين هذا التفكير صاحت عليه نور

نور: يمعوده بالج وين مو دا احجي وياج اذا تضلين هيج ثوله ترى بنفس اليوم تبطلج

مرام: لاا لاا ما ضل
شردتي

نور: يلا امشي تبسمرتي دنروح راح نتاخر...........

هاي المره ابد مجنت ارتاحلها وخاصه من تجي تتلوك لماما قبل ابد مجنت اهضمها حتى ماما ابد مجانت تحبها وتنصحنه انو نبتعد عنها لحد مايوم تفاجئنه مسزيه لبابا هل شي
دخل بابا للبيت وكال...
بابا.....................................................

*********************************
‏لا تعِشْ على مزاج أحدٍ، ولو كلَّفكَ الأمرُ أن تكون صديقاً لجدران غرفتك!
ولا تستمر في تقديم التنازلات ، لمن لا يفهم أنك تفعل هذا، لأنكَ تريدُ الاحتفاظ به!
لا تكُن عكازاً للئيم تعرفُ أنه متى استطاع أن يمشي دونكَ سيكسرك!
ولا تكن كتفاً لأناني تعرفُ أنه يضعُ نفسه دائماً أولاً!...

**********************************
شلونك يبعد المو الي
يالتعبتني انته وهلي
لابيك كطرة مـِْن الهلا
ولا ملكة غيرك بي دوة
چا ابدلك اني مــِْن الصبح
لْـۆ ينلزم بيدي الهوة🤷‍♀️ 💨............

**********************************

حبايب گلبي الغالين مساكم الله ب الخير يكلبي النشر راح يصير بين يوم ويوم لان البنيه متلحك تكتبلي البارت ف ان شاء الله راح يكون موعد التنزيل مضبوط....
تعليق ولايك حلو مثلكم
احبكم.. 😘💜.......