#تقليدي_بالف_عشق
#الكاتبة_اطياف_ابراهيم
#البارت_١٣
.....................
حبايبي قبل كلشي تصويت لتنسو❤️❤️❤️
سيرين.. بعد ٥ ايام قررت
جانو اخواني كاعدين ديتغدون كلهم ملتمين صادف يوم خميس كنا بنص شهر ١٢ شتة امتحانته دتبدي حت وراها نعطل مال نص السنة
جانو ياكلون سمج وتمن احمر مااحب السمج ف بس اكل طرشي وتمن بقو يسألوني ع دراستي والامتحانات يعني همه هم يريدون جواب مني بس احسهم مثلي مستحين يفتحون الموضوع
بقيت اسولف وياهم عادي كملو وكمنه احنه نشيل بالاماعين وكالعاده الست مروة متحرك روحها لزمت ماعون بي شويه تمن وخلت عليه الباقي من السمجه وصاحت تعالي امولي اوكلك مااكلت شي وهو يكولها كااحب السمج واكلت تمن هذاك ماعوني خلصته خزرته كعد يمها مستسلم ومقهور كامت توكل بي علمود متكوم ويانه للمطبخ
فرات هزت ايدها وياسمين كوه لازمه اعصابها ومتغرد عليها
واحنه دنشيل عباس كلي
عباس.. بويه جيبلي ماعون الدبس وراشي من ايدج الحلوه وتعاي كعدي يمي
سيرين.. حاضر حبيبي
رحت جبته خليته كدامه وربع كرصه خبز داكوم جان يكلي كعدي وين عدي حجي وياج حبيبه
كتله.. مو دااغسل اماعين ويا البنات
عباس.. خلهن هن ينظفن هن كومه.. ابقي هنا موضوعي مهم
سيرين.. اوك دااسمعك
عباس.. هجم بيتجن اوك لو تطبن للكليه شسون بس تتموعن هههههه
سيرين.. ههههه لا ولله بس متعود الساني
عباس.. شوفي حبيبتي اني سالتلج ع ولد وطالع خوش ولد ماعده عيبه ويا الناس.. بس مرات الانسان مامعيوب ويا بشر بس معيوب ويا روحه.. مثل يطلع سكير لو ميصلي لو بخيل لو ماعده كلمه لو مرعبل.. بس هذني منكدر نحكم عليهن اله نجربه
حبيبتي انتي فكرتي زين.. اذا موافقه نخلي فتره الخطوبه اختبار الكم تتعرفون عله بعضكم تشوفين عيوبه شنو وحسناته وياج شنو اذا زيناته سبق اغلاطه كملي ويا وانتي التحاولين ويا وتعلمي الرجال شكد ما هو حوك ويصول ويجول مرجعه للمرة وللمرة التكدر تحتوي رجلها يصيرلها خادم بس لان تحترمه ولان حاولت ويا وخلته يترك عيوبه
انتي شرايج بي
سيرين.. ولله يااخويه اني فكرت وفكرت وارجع لنقطه مهمه دراسته.. اخاف مااضمن مستقبلي ويا وبعد شغله اكثر الشباب التترك دراستها تصير مو واعيه وترافق ناس نوعا ما متخلفين.. ماعدهم طموح و لا يسعون لشي بي خبر اقوه شي بحياتهم طلعة لمقهى.. يلعبون دومنه يشربون نركيله.. الانسان اذا يبقى متحور ع هالامور حيتاخر ع ناس كلها الدنيا حاليا في تطور مستمر الياخذ اعداديه يركض للكليه وابو البكالوريوس لو يدور تعيين لو دراسات عليا وهو حاليا خريج متوسطه هذه العيب الوحيد البي.. وخايفه يحرمني من الكليه لان هو مدارس
عباس.. ولله حقج وكلامج عين العقل.. وافهم من كلامج انتي موافقه بس عدج شرط هو تكملين... وبالنسبه لدراسته انتي حاولي تقنعي يرجع يقدم فتره الخطوبه الج مفتوحه حاولي بيها تكسبي وبالاسلوب خلي يرد لدراسته مخسرانه شي.. والما رضى هم مخسرانه لان حالتهم قويه وشغله زين... واهم شي موافق ع شرطج لان ماانطيج اذا ما قبلو ع شرطج
سيرين.. فدوه لعمرك اخويه ربي ميحرمني منك سندي ولله
سمير.. ولج زمو واني شنو.. بس مو صوجج صوج النساتل والموطات المتغزر اترسهن بعد ملح بعيني
سيرين.. رحت يمه حضنته وبسته من راسه شعندي غيرك ولله كلكم اخوتي سندي وحمايتي بالدنيا
باوعت لكيت ماجد يباوعلي بحنيه ويبتسم ماادري ليش وبعيونه قهر معقوله افتقدني لان راح انخطب واتزوج
مهدي كاعد هو وبيان ع صفحه ياكلون جباسة واثير ولا ويانه بموبايله
رحت كمت منهم فتت للمطبخ لكيت فرات وياسمين منظفات المطبخ وغاسلات الكاع زالغاته زلغ هو تحول ع مروه لان عندي مدرسة بس مروه مو كلش تهتم بنظافته وبوكت اللمه متغسل اماعين ع ابو هواي واماعينكم انتو نظفوهن دائما تسوي هيج بكل قباحه
كلت لياسمين اريد موبايلج
اخذته و دكيت ع قائد
جاوبني بس شكله جان نايم
سيرين.. شبيك صوتك مينسمع تجر الكلمه كوه
قائد.. امنين طلعتي هي حيوانه هستوني غفيت صارلي ١٨ ساعه منايم صرت مطي اله اذانين
سيرين.. يا شنو هالهلوسه مو طبعك هذا شبيك تعبان مسخن وتهذي
قائد.. انجبي خل ارجع انام باي
سيرين.. حتخطب ولك متباركلي
قائد.. شنووووو... هاي من شوكت
سيرين.. ااخ اذني اشبيك يمعود المن تصيح قبل شويه جنت نايم
قائد.. انجبي لج.. اني شنو اخر من يعلم.. ولج محاسبيلي حساب شكد ناقصين انتو.. منو هذا ومنين وشعده شهادة وين يستغل
سيرين.. عززا ولك جنك ست امل ست بل ست اسئلة بمساله وحده
قائد.. شلون تريدني اشعل امل واشعل الجابوهه نطقي لج
سيرين.. شبيك يمعود لتصبح دشاقه اكولك هسه شبيك بس تصيح خاف شميت عدنه ريحه السمج وهل ضجت
قائد... خرررررا عليج اااااحجي
سيرين.. عزااا هههههههه ولله اتشاقى اعصابك... وبقيت احجيله كل التفاصيل
قائد.. وشلون رضيتي وهو ممتعلم وشهاده متوسطه كل عقلج... شبيهم اخوانج متبرين منج لو مستثكلين لكمتج يلغمه وراضيه
سيرين.. لا لا مو هيج اصلا تركو القرار اليه ولله وهذا قراري.
. وها نسيت أكولك اني كلت بالخطوبه اقنعه يرجع للدراسه
قائد.. شوفي اني ابد ممقتنع بهل قسمه هذا بزر دلال وفلوس تردي يرجع للمدرسه والجد والتعب مستحيل هذا ذابله ٣ عمال بكهوته ويجيله الصافي ع جاهز
وعمره صغير بينكم بس سنتين ونص.. هذا عقله مو ناضج وواعي كفايه... وبعد القرار قرارج ومن هسه اكلج الف مبروك يا حيوانه وولي خل انام ولو طيرتيها من عيني... باي
سيرين..هههههه دير بالك على نفسك حبيبي... بيباي
اجتني وراها مروه يي ولله ويلوكلج تتشرطين ع تجار بت نجاوي
سيرين.. هي كالت هيج ع امي لو اني تخبلت والبنات عاطن بيها بس متحملت شنو هالصلافه وعدم الاحترام هجمت عليها عتيت شعرها وهي اشتغلت عياط الحكوووووني ماجد الحكلي وتكرص بخاصرتي، ثرمت خصري ثرم ايدها مسمومه بس مهتميت البنات يفكوني واني هايجه عليها كطعتها تكطع مااحس اله اندفعت قوي وانركعت بالكاونتر
ماجد.. حيووووووانه شجاج متحترمين بشر
سيرين.. تتجاوز ع امي وتكول نجاوي بمسخره وامي شهيده يم ربها ولله ميصير هيج ولله
مروة.. جذابه ولله وشافت نفسها حتخطب ابن تاجر وبقت تتجاوز ومدت ايدها عليه واني حت مسويت شي
سيرين.. ولله هي جذابه
ماجد.. انجبي كافي.. بكد القوندراااا وفارتنه فررر اشفتي نفسج ولج.. ترا اكسر راسج وحت العالم اكلهم ماعدنه مره واخليج هنا اربيج من جديد
فرات.. اعصابك خويه بس الحق ثنينهم غلطو مروه تجاوزت وسيرين ضربتها لتذب الملامه ع اختك بس مرتك هي عالت وبدت
ماجد.. خوو تموتن ع سوالف نسوان الحمى مال خباثه وحقارة صايرات كلجن حكم حزب ع مرتي خوش ولله
سيرين.. كمت ابجي انهظمت حيل من تفرقته ومن كلامهم محسسيني الخطوبه منيه عليه وكأنو اني ميحقلي انخطب والخطوبه طلعت عيني واني ولله حت الخطوبه مو كلش هامتني والولد مااعرفه بس لان قسمه زينه واقفت... عفتهم دااروح لغرفتي جان افوت من يم ماجد كفخني وكلي كافي تأدبي وثلت حدها.. اني هنا صدك انفجرت ورحت ركضت لغرفتي ابجي واشهك واحجي ليش عفتوني مدللتكم انذلت ليش رحتو وخليتوني وحيدة احجي واناشغ فاتت عليه بيان
بيان.. كافي حبيبتي ليش هالبجي ولله مااتحمل اشوف دموعج
سيرين.. مدشوفين التفرقه مدشوفين الظلم الدنعيشه
بيان.. بس ماجد واثير ماذيج لتحكمين ع الكل البقيه كلها تحبج ومحسستج بنقص واني يمج
سيرين.. باوعتلها كبرانه صايرة صف ثالث متوسط وصايرة تحجي مثل الكبار ابتسمت وحضنتها كتلها هو المفروض اني الاكون يمج واهتم بيج مو انتي
بيان.. ماكو فرق حبيبتي.. بعدين لازم هالايام متبجين عيونج تصغر ووراج مناسبة لازم تهتمين بوجهج
سيرين.. ولج صايرة تدورين اهتمام لعد والحلويات اهم اهتماماتج
بيان.. امشي لج مدشوفين نازله ست كيلوات لان كاطعه العشا صار شهر طاح حظي ولو بالنهار ازاغل جباسه وسوالف بس العشه اثر ههههههه والمشي فوك السطح جني طنطل يحوص وحده
سيرين.. صدك محلوه بالزايد حبيبتي.
بيان.. امشي انسوي ماسك تعلمته باليوتيوب مال ياسمين
سيرين.. مالي خلك ولله
بيان.. امداج دتضوجيها هايه البومه وكومي اعتني بنفسج وقهريها.. هي مروة سوت هيج لان رادتج تكتئبين ومتسوين شي واطلعين محلوه
سيرين.. يلا عناد بمروة بس من هسه مو تلعبين بوجهي ورايه امتحان
بيان.. امشي وخليها عليه... رحنه للمطبخ طلعت بيضه عزلت لصفار ع جهه وواخذت البياض بس خفقته ويا عسل وليمون وحليب صار ثخين كتلها اول شي لازم تغسلين وجهج غسلته بصابونه بعدها جبت شكر وليمون وعسل وقشرت وجهها حيل ربع ساعه بحركه دائريه وحبيبات الشكر لان خشنه قشرت كل الجلد الميت.. وراها غسلته ونشفته بكلينس وانوبه بديت اخلي طبقه من ماسك البيض وانوبه كلينسه وانوبه ماسك وانوبه كلينسه الى ان سويته طبقات بقت نص ساعه وراها غسلته وبمكعبه ثلج مسحت وجهها اجت ع مرايه شافت وجهها
سيرين... شهكتتتت واَوووو ولج صايرة تبدعين شنو هاللمعه الصارت بوجهي عزززا مو اني وجهي صار مال اطفال وانوبه خدردي صارن حمر ولج صدمتيني بقدراتح عبالي اختصاص حلويات وبس طلعتي خبيرة بشره ولله هههههههه
بيان.. هذا التقشر يوورد الخدود لان شال الجلد الميت هي كالت هيج بالفديو ههههههه
دخلو فرات وياسمين
ياسمين.. ها ولجن ثنائي العجب شكاعد تتملعبن ومتصيحلنه
فرات.. وجهج صاير يلمع سيرين شنو هذني الكاسات شسويتن غبر تصيحلنه
بيان.. الوحده بعشره اشتغلها
ياسمين.. متكعد راحه جويل دنجبي وسويلنه
بيان.. سويتلهم وع واهس سويت الوجهي وخلصنه باكيت الكلينس... طبت مروة واشوف عيونها تريد تنط من الفضول وبس تباوع علينه واحنه مندمجين ونضحك ووحده تجر بكلينسه الثانيه من وجهها عافتنه وركعت باب المطبخ وصعدت... شكتلج سيرين مو كتلج استفزتج حت تنقهرين وتهملين روحج وهسه انتي تحديتيها وقهرتيها
سيرين.. يمه حبيبتي اختي صايرة تحوك مؤمرات
فرات.. فدوه الله يديمجن حبيباتي
ياسمين.. ولله بدعتي بيان عجبتيني
سيرين.. للمغرب ملينه دزينه مهدي جابلنه نساتل وسوينه حليب حار وكعدنه ناكل بالمطبخ
جان يصيحني عباس
عباس... حبيبتي حجيت ويا العالم ووافقو ع شرطج كالو مستقبلها وهي حره تكمل تبطل.. مبينين خوش ناس شرايه مصدكو كلنالهم موافقين كالو الخميس اليجي نجيب سيد ونعقد القران
سيرين.. هو كال هيج لو احس بطني انخبطت.. خوف تملكني وتوتر مااعرف شسوي احس بشي بداخلي متخوف بس ماادري ليش يمكن لان صارت صدك... كتله عباس بس اريد منك شغله الخطوبه تكولهم بدون اغاني وهوسه واريدها سكته علمود ابويه وامي واني مااحب هالهوسه فدوة كولهم
باس راسي وكلي فدوه لخيتي العاقله يجرالج
بعد محجه وياهم ووافقو
اجتي امه خلت بيدي ٥٠٠ كالت هاي فستانج والصالون
والكيك والاكل علينه لتسوون شي
اخواني مرضو بسالفه الكيك والاكل منهم رفضو ومحجو اهل رامي
بدت التجهيزات وسمير اخذ اجازه يوم الاربعاء والخميس وراح بدل البردات والفرشات وجاب كوشات للكعده للاستقبال والبنات اشتغلن حمله تنظيف ومخبوصات وفرات هم بقت يمنه لان اول وحده تنخطب بالبيت الكل انخبص الاربعاء البنات كعدو سوولي شيره لجسمي بس مااحجيع الالم انصلخ جلدي من الوجع وكلما ابجي بيان تزق بحلكي جبس لو كيك لليل رحنه للصالون حفتلي ام الصالون وسوتلي حواجبي كملت باوعت لوجهي وانصدمت... يتبع
اكمل الباقي بالليل اذا لحكت
شكرا لكلامك الجميل ولله بسبب كلامكم كتبت اليوم رغم تعبي
احبكم
ميحتاج اوصي بعد تصويت وتاكات ❤️❤️❤️❤️
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!