رواية تقليدي بألف عشق الفصل الخامس عشر 15 - بقلم هاجر قاسم

#تقليدي_بالف_عشق

#الكاتبة_اطياف_ابراهيم

#البارت_١٤

بارررررررت طويل لعيونكم

لتنسون التصويت هلله هلله ترا هم دااتعب وياكم😊...............

اذا حبك نهر اتمنى أغرك بيه ..والغركان نعرف يدخل الجنه
واذا لاسامح الله قسمتك بالنار .. وحك ضلع الزجية النارك اطبنه
ياشمعة خواطر تشع تالي الليل .. تتهامس همس بسكوت شفتـنه
انه ابيوم شفتك ما حسبت حساب .. الكلب محبوب رادك هذه كل ظنه
عيونك والنواظر صفنن اعله الباب ..واحنه ابلا وعي من نحب تعرفنه
العشك هوه اللفانه ودكدك البيبان .. مانعرف نحب بس لا تواخذنه
محتار وحياتك بيش اوصفك بيش .. يا يوسف زمانك ذيب ما كلنه
كبل يوسف ابحسنه ندري كص أجفوف .. بس حسنك مصيبه وكلنه ذابحنه

سيرين.. باوعت بالمرايه وانصدمت
باتره حواجبي مسويتهم شيطاني جان هسه طاش وخفيفات وشكلي عبالك هذني البنات المو راحه
حواجبي من نوع ثخان ومرفوعات وشمرتهم حلوه كتلها شنو هايه شمسويه بوجهي

ام الصالون.. حبيبي موديل طلعتي لعابه

سيرين.. وين اللعابه بالموضوع طالعه شريرة.. انداريت ع فرات بنضره خوف وقلق شسوي لحكيلي واذا اداوم المديرة مو بس ترزلني تفصلني

فرات.. لتخافين حبيبي تخليلهم قلم حاجب وتمشي الامور

سيرين.. شتمشي فرات وين اكو بالمدرسه اخط تاتو غير يلعبن طوبه.. شسوي يربي كمت ابجي شكلي خرب كلشي اعوج بهل الخطوبه لو اني فكر لو هالولد فكرني اوووف

ام الصالون.. دكافي لخاطر ربج كلبتيها مناحه اول وحده تحف بالمدرسه بعدين انتي حتنخطبين فد مرة. سويهم تاتو جلسه وحده ويصيرن مثل مال تركيات

فرات.. صدك حياتي شكلتي.. هم ترجع ع نفس الرسمه مال حواجبج القديمه وشي ارقى

سيرين.. خاف عيب بعدني صغيرة

ام الصالون.. ههو ي عيارة النسوان

فرات.. هههههه حبيبتي سويلها بس بربج بدعيانريد اتشوفينه مهارتج واقوه ماعدج اعتمادنه عليج.. ع كولتج سويها تركيه وشكد تامرين حاضرين بس ها كون حلو

ام الصالون.. يي بعيني لاسويلها تاتو اخلي المديرة تسالها وين مسويته حت تسوي مثله

سيرين.. بلشت اول شي سوت بقلم حاجب رسمه ع حاجبي وسالتني هالشكل اقتنعت بيها كامت تشتغل وجهاز التاتو ويا كل دكه ع حاجبي ياذيني جنت خايفه وام الصالون ولا يمها شعرها احمر كاريه ولابسه برموده جينز وياها كيمونه ورديه بابيض ودبل مكياج وتطك بعلجها واني مسموطه من الوجع

كملت بعد ساعتين كالت شوفي هسه اذا معجبج مستعده اشيله واسوي غيره... باوعت ع روحي عزه مو اني انداريت لفرات جان طابه بالموبايل تراسل كتلها فوفو باوعت شهكه وصلت ع محمد شكلي تغيير جذريا رسمه حواجبي كلش حلوه وتقوسها شويه عبالك هلال ع حاد ومرفوع من الاخير حسيت عيني كبررررت ورموشي برزت بالزايد

كتلها ولله بدعتي بالتاتو

ام الصالون.. ترا حت الشيطاني حلوه وموديله بس انتي محبيتي

سيرين.. باجر يمج اجي مكياجي وتسريحتي بس مثل التاتو اريد الجمال

ام الصالون.. اطلعج باربي تعالي وبعيني اداريج لان حبيتج فطيره هههههههه

سيرين.. ههههههه.. شكد تامرين

ام الصالون.. الحفافه هديه اعتبروها بس تاتو ٢٠٠ وباجر اشتغلج ب ١٥٠

سيرين.. تسلمين ع هديه بس صراحه فاجئتيني هواي بالتااتو ولتنسين باجر اني يمج يعني صرت معميلتج كل مناسبة اذا صارت يمج اسوي.. سوي ١٥٠ وباجر مكياجي وتسريحتي هم ١٥٠ بالعدله ولله بعد ورايه فستان

ام الصالون.. هاهيه مثل متحبين تدلل عروستنه

سيرين.. سلمتها فلوس التاتو تشكرتها وطلعت من دااطلع كالت اسبوعين ورجعيلي جلسه ثانيه للتاتو تثبيت

لكينه سمير دينتظرنه

بوجهنه توجهنه لشارع فلسطين ع محلات البدلات

طبينه اول محل شفت البدلات البيض حسيت خنكتني العبرة وتمنيت بهل لحظه امي تكون ويايه وتختارلي بدلتي وتشارك فرحتي محسيت غير ع دموعي نزلت ع خدي فرات لزمت ايدي بله متحجي شي شكلها عرفت سبب بكائي

فرات... يله الحلوه خل تختار فستان جوعتينه من العصر لهسه ع ركضه وحده

سيرين.. ههههه ولله اسفه حبي تحملوني ماعندي غيركم

فرات.. طبعا اتحملج اختي الصغيرة وتددلل

سيرين.. فرحت بكلامها لزمت ايدها وبقينه نفتر بالمحل معجبنه شي اكثر شي البدلات البيض حلوه بس الالوان قليله جنت رايده لون نيلي مو شعشاع بعدني لهسه البس اسود ف ردت لون مقارب للاسود وملكيت غير افكر بهل لون

طلعنه رحنه لمحل ثاني نفس الحاله بس واحد حبيته واقتنعت بي بس جان لون بصلي محبيت اللون بس فصاله نزاكه كلش

طلعنه من المحل

سمير.. خرب يومج يلنسوان ولا يعجبجن العجب عمي اني قاط عرسي من اول محل اول قاط دشنته بالتبديل رهملي اخذته

سيرين.. بعدها فتنه ثالث محل بس مااحجي الكل بي حلو المحل ع بدلات ع الناس اللي بالمحل كلهم كيوت هههه.. لكيت فستان لونه بيجي يجنن مفصل ع جسم وللركبه بف فصال السمكه واني طويله و رشيقه شغله ذهبي والردن والصدر تول وبي تول بالخصر من الجوانب وبي كرستال ناعم ينطي ع ذهبي كلش حلو وفخم

رحت لغرفه التبديل لبسته وفرات فتحتلي شعري نزل ع طول ظهري يوصل للركبه كبل صلت ع نبي
فاتت البنيه االلي بالمحل شافتني جان
تكول ما شالله احله عروسه اشوفها والقالب غالب ابتسمت ودنكت

فرات صورتني كالت ياسمين تاكل راسنه متتحمل لباجر

وهم مخبوصين سالت البنيه اذا مثله ع نيلي ثنينهم كالو لا لا هذا احله ولله كعد ع جسمج
ام المحل كالت هو اكو منه نيلي بس صراحه هذا ويا بشرتج كلش لايك وربي

سيرين.. بس اني مااريد الوان فاتحه النيلي اقرب شي للاسود بعد داخلي كله حزين ع ابويه وامي مصارلهم سنه ونص من استشهدو

ام المحل.. اووه اسفه حياتي.. بس صراحه هذا حلو عليج حنطيج النيلي بس خلي ابالج هذا هديه الج لان حلو عليج وانتي هسه وضعج ع اهلج ممخليج تلبسي بس يجي يوم وتلبسي هذا هديه

فرات.. حبيبتي شكرا ع هديه بس منكدر نقبلها هذا محلكم ورزقكم ولازم تستفادون مو تخسرون نقدر محبتج بس منكدر نخسرج

سيرين.. يي ولله مااريد اخسرج وشكرا لمحبتج بس هذا غالي ومااكدر اقبل

ام المحل.. شوفي حبيبتي لو تحجين الباجر مااسمع متدرين فرحه اليتيم يم الله شكبرها.. ادري عدج ناس هواي داير مدايرج بس ميوصلون للاب والام واتمنى اكون بحياتج دعم وذكرى حلوه حت تنحسبلي كدام ربي

سيرين.. ولله خجلتيني وربي يرزقج اضعافه هو يجنن فعلا وحلبسه اكيد بيوم مهم لان احلا هديه بحياتي ومراح البسه اله الشي مهم.. ربي يسعدج ع كد طيبه قلبج.. بوستها وتحاسبه ع فستان النيلي طلع ب ٢٠٠ ابد معاملنه كبل انطينه واني فلوسي بس ٥٠٠ لذلك عوزت ٥٠ دفعتهم فرات وكالت هاي هديه عباس الج

كلش فرحت رغم فراغ ابويه وامي معبي مكان جبير بكلبي بس الناس الطيبه ويايه تترس هالمكان حنيه وحب احس بالامان واحس اكو اليحميني ويسندني والدنيا بعدها بخير

.....

طلعنه لكينه سمير مخلي راسه ع ستيرن وشكله نايم
فتحنه بوب السياره وهو اخترع عباله حرامي ظلينه نضحك عليه
فتحلنه السياره وحرك شاف مطعم كال البيت اكيد مصموطين من الجوع

واني انسلك جدي السابع من ورا تاخيرجن راح اكل بشر من الجوع

نزل للمطعم طول بل ثلث ساعه
طلع من المطعم محمل كومه علاليك

فتح الباب وخله الجياسه ع كشن الريحه ظلت تكفخ بخشومنه احس جسمي تكهرررب من الجوع

كتله ولك سمير شجايب من مصايب ريحه الاكل تشل

سمير.. اكلات ايطاليه وفرنسيه هههههههه

سيرين.. اهووو غير يستجن

سمير.. ووجع جبت كنتاكي عائلي وبيتزات وصاج

سيرين.. يعني نقطيت خويه

سمير.. خلص راتبي تكلي انقطيت هههههههه ولج الحساب ٦٥ هاي لخاطرج عود كبرت وصارت عروسه الجنت ابدلله الحفاظات هههههههه

سيرين.. سميررررررر ولله ازعل ترا وماتعشه

سمير.. اذا نتتعشين ابقي زعلانه حصتج اليه هههه

سيرين.. مو اني عوبه وافوتها هههههه

بعدها وصلنه للبيت لكينه ياسمين صايره قراقوز من الجهال ومكفشه وشاده ربطه ومسرفنه دشداشتها

سمير.. يا ستار يا ربي حبيبتي تحولت غجريه شو من مشرشبه تشرشب

ياسمين.. ولك ٣ بندولات وهالحواوين ميكعدون تكول طوله مال حصن بس يركضون سباق الماراثون عدهم

سمير.. يمه حبيبه كلبي جبتلها كنتاكي وبيتزا وصاج تعدللها المزاج

عباس.. خاب شو انته تتغزل وتتمشعر براسنه اخذها وولي للغرفه غازله مو كدام الزعاطيط...

سمير.. هسه غير مرتي لو تغار هاي فرات وغازلها احد يكلك لا

عباس... هههههه جهالنه كبرو عيب بعد.. شجايب وياك ترا متنه جوع ومرتك تعبت بالتنظيف حلفتها متسوي عشه

سمير.. خير من الله بس كول بسم الله

سيرين.. دزينه مهدي جابلنه ببسي وكعدنه لمه كلنه حت مروه وماجد هم ع الرغم مروه كلشي مسووت بالتنظيف بس وكت الاكل اول الناس هي

اكلنه كلنه جنه بحاله هجوم هذا ع بيتزا والثاني يسوي لفه كنتاكي والثالث ع صاج صدك تونسنه وشبعنه.. كملنه كلتلهم نختم عشانه بقراءه الفاتحه ع ابونه وامنه وفعلا صار ثواب الهم وقرينه الفاتحه وراها شربنه جاي

اماعين مجانت اكو بس كلاصات ببسي وجاي خضتهن بيان

وراها سولفنه شويه وياسمين متعجبه بحواجبي وبفساتيني اما مروه مكتفيه بالنظرات المعاجبهه لعجب وياسمين حاصت اله تعزل من راتبهم اليجي وتسوي تاتو

وراها كلها تطشرت بالغرف ساعه ١٠ والكل بده يروح لغرفته يرتاحون اني وبيان ومهدي رحنه الغرفتنه اللي هي مال بابا وماما الله يرحمهم

شويه سولفو وراها راح مهدي ينام وبيان هم تعبانه نامت

الكل نام اله اني مديجيني نوم

استرجع احداث اليوم كلها... مرة ابتسم ع ناس الحلوه بحياتي مرة تنزل دمعه ع ابويه وامي... وصلت لمرحله الخطوبه وكبرت وهم ماكو يمي باجر امي مراح تكون قريبه عليه من اعقد مراح تطمني وتامني مراح تحضني وتباركلي اول الناس مراح تشوف الفرحه اللي بعيوني

باجر راح افرح بس تبقه فرحتي ناقصهه امي ناقصها ابويه فخري كدام العالم

ماجاني نوم احس خايفه اريد احد يأمني متوتره من باجر شراح اطلع شلون شكلي وشلون وشلون الف حيره ببالي

طولت بالسهر اجاني ارق مو طبيعي

بعدها محسيت بروحي شلون نمت

... حسيت ع ايد تندهني من النوم واني متكاسله اريد انام بعد اكثر مااريد

فرات.. حبيبتي هم يالله تتريكين وبوجهج للصالون خاف العالم يجون من وكت

سيرين.. ميجون عوفيني انام فدوه

فرات.. لتعبيني حبيبتي لازم ب ١١ ونص يمها وهسه بل ١٠ من ال٩ اكعد بيج وماكو

سيرين.. عزاا ساعه بل١٠ يبوووو... يلله شكد اكرهها احد ياخذ نومتي شوكت تخلص الخطوبه وارجع انام

فرات.. تخلص ونامي وزوج اليكعدج بس كومي محضرتلج صينيه ريوك ع ميز بالمطبخ

سيرين.. رحت للحمام سبحت ولبست برنصي ولفيت الخاولي رحت كعدت ع ميز اكلت نص لفه جبن وكلاص جاي وراها رحت فرجت اسناني وبدلت لبست جبه سوده وشال اسود والفستان النيلي ضميته بعلاكه خليت بجنطتي ركسونا وشيشه ريحه وعلج
رحنه لام الصالون مشت السياره قليل ووصلنا كلش قريبه

ام الصالون... شلون بيج اسود باسود شعدج ولج فاتحه

سيرين.. فدوه استعجليلي وطلعيني حلوه ومن هسسسسه مكيااااج نااااعم ونازكه وتسريحه مفتوحه اريد يبين طول شعري

اول شي بدت تسشور بشعري وراها كوته بالكاويه

بعدها بدت تمكييج بيه ساعه كامله تجيب وتخلي كلت هاهيه سوتني خارطه الوطن العربي

كالت كمل رفعت راسي وانصدمت بالرقي والجمال

جان شدو جوزي وبيجي وقريب العين لامع

خدودي شي بسيط مورد
وشفايفي لون الحمره بصلي الوان نيود

لبست الفستان وبدتت تسويلي تسريحتي

برمت اطراف شعري ومن فوك الكذله برمتها من الاطراف وخلتها صفح وسوت بف عالي بشعري ومن الجوانب مال بف برمتين محاوطاته وليوره ملزومات ببروش شعر

خلتلي ع بف بروش نازك كلش

اباوع ع نفسي انصدمت بروحي وهن بس يتغزلن بيه استحيت كلش

بهل لحظه حيل تمنيت ماما تشوفني بهل طلعه وبهل يوم بس راحت والله ينتقم من الفرقنه يا ارهابي

رجعنه للبيت ساعه ب٢

شافتني ياسمين استقبلتني بالهلاهل والجكليت والصلاوات
وشنو هالجمال وشطالعه
مروه هم سلمت عليه وكالت كلش حلوه معرفناج

كعدت بالهول

الولد جاييبن للكعدة قطع كيك وببسي

والبنات طابخات دجاج وتمن لكرايبنه عزمنه عمامي وخوالي واجوي وصارت خبصه رحت بغرفتي وحدي البنات جابولي اكل كتلهم مااريد.. وراها خليت عطر واخذت علج

البره خبصه

لشويه وصاحوني اجوي هنا متت من الخوف لبست كعب عندي ٥ سم لونه بيجي

ودخلت للصاله كعدت ع الكرويته فاتو اهل رامي امه وخواته وجنتهم واكو نسوان وبنات هوايه معرفتهم

طبن سلمن وكعدو الرياجيل اتفقو ع مهر وعباس كلي حطلب منهم ١٠ ب ٢٠ قبلها وكتله التشوفه انت

وراها صاحو خل البنيه تتحجب حيطب الشيخ

رحت لغرفه امي وابويه شكد فرحت حسيت بالامان وحسيتهم ويايه كعدت ع كرسي ورامي بصفي اجتي ياسمين خلت باديه صم شكر وصم تمن كالت هذا للمحبه والرزق

لزمتهم باديه والشيخ بده يحجي اني كمت احس بدوخه قويه اجتني كمت مااركز والشيخ يحجي فصحى وسريع كمت ماافتهم عليه.. وراها كلي كولي نعم انت وكيلي.... يتبع