رواية تل الذهب الفصل الخمسون 50 - بقلم Raghad Almoualy

تـــــــــــــل الذهــــــــــــب
رغــــــــد الموالــــــــــي
ـــــــــــــــــــــــــــــــــــــــــــــــــــــــــــــــ
- كل الطرق إلى فؤادك تنتهي
لا عيب لي سوى موتى بلقياك
ابكي دما حين أكون مبتعدا
واشدوا كالمجنون حين أرى محياك
خفف علي وطئ الحب اتعبني
قلبي الى منتهى الشغاف يهواك
ـــــــــــــــــــــــــــــــــــــــــــــــــــــــــــــــ
مريم.... جنت اشم بالقميص فتحت عيني انصدم هو وراي
باوعلي بغضب

هاي شتسوين

... ا ا اا ها ماسويت شي

... نتر ورفع حاجبه اشر بصبعه بتهديد
مريم ثقي اذا بقيتي بهاي سوالفج مراح يصير خير
لو شايفتج نور شتكليلها

... اسفه
بس انت اشو هسه جيت

... جبت العلاج لنور
وعافني وطلع

تندمت لان هيج تصرفت على مايبدو رحت زايد بعواطفي فعلا لو جاي وشايفتني اني شنو موقفي

طلعت مااشوف الا سندس اجت باوعتلي من فوك لجوه رافعه حاجبها وهزت راسها بمعنى معاجبها الوضع وفاتت لغرفة نور صار بوجهها ضرغام لاهو سلم ولاهي سلمت هو طلع وهم باوعلي زفر بغضب وطلع يمكن انزعج من وجودنه ثنينه

اشتغلت وكملت وغسلت الملابس وشريتهن اجيت على نور

مريم... نور اسبحهم للاولاد؟

- اي فدوه

سندس- وليش انتي تسبحيهم اني خالتهم اني اسبحهم منكلفج عيني انتي غريبه

مريم... لا اني هم مثل خالتهم

سندس... شجاب شوده عيني

مريم... باوعت لنور ونور اشرت بعيني بمعنها مشيها لخاطري وتكلمت نور... مريم حضريلهم انتي ملابس وسند س خل تسبحهم

مريم... ماشي... رحت لغرفة الاولاد حضرت الملابس واجيت لكيتها تسبحهم للاولاد بقيت كاعده يم باب الحمام انتضرهم... سبحتهم واحد واحد وانطتهم الي لبستهم برانص ورحت بيهم لغرفتهم
البسهم وسرحت شعر زهوره وحضرت الي ملابس ورحت للحمام لكن سمعتها تحجي

سمعي لتبقين كل شويه طالبه منها حاجه وتكوميها تخليها تفتر بطولها كدام رجلج البنيه حلوه وماناقصها شي تروح تحلى بعين رجلج

نور... البنيه ماشفت منها شي مو حلو وبالعكس داتساعدني بالبيت وبالاولاد

سندس.... ولج لشوكت تبقين فاهيه اكلج البنيه طول وجمال تكليلي تساعدني لج رجلج الف وحده تلوف عليه ديربالج

نور... ماشي

كتمت هالشي بداخلي ورحت للحمام اسبح
سبحت وطلعت رحت للغرفه سرحت شعري
وطلعت يمهم كعدت
خلت ايد على ايد وحجت

سندس... مرييييم شو بالله د شوفها لدشداشتج

كمت وكفت وحجت...
سندس... مو عبالك كصيفه ومبين جسمج

- لا زينه عليه

... لا اشوفها كصيفه لو تبدليها صحيح احنه هسه بس نسوان لكن ضرغام يجي وتعرفين هو رجال غريب عليج وزحمه الدشداشه لازكه عليج مفصلتج تفصال

عفتها وكمت رحت للغرفه الثانيه باوعت بالمرايه زينه الدشداشه
هاي شبيها هاي
بدلتها ولبست غيرها ورحت يم الحجيه
كعدت يمها من دون كلام بس هي حست اني يمها

انتي مريم؟

_ اي حجيه

- راحت سندس

...لا

.. بيش الساعه

... ماعرفلها

.. يا شعجب اكو احد ميعرفلها

..اي مااعرفلها

..الجهال وين

... جوه

... روحي يمهم يمه علي وكح ويروح يأذي زهراء

.. ماشي حجيه

رحت يم الاولاد جانو كاعدين بغرفتهم يلعبون بالالعاب
جان علي شايل مسدس وموجها على حسين ولابس بيرية ضرغام وحسين رافع ايده الاثنين فوك واكف يم الحايط
وعلي يسويله بالمسدس تاه.... تاه... اودف ( اوكف)

مريم... هاي شنو شتسووون

علي.. مليم ستتي لاح السم هدا الحلامي ( مريم سكتي راح الزم هذا الحرامي)

... وانت شنو لعد

... انه بابا سوفي (ويأشر على بيريته)

.. لا ولك جيبها هسه يحجي عليك بابا

.. لا ميليدها ( لا ميريدها)

.. جانت جبيره عليه ونازله على عينه ورافعها بيده
منظرهم جان يضحك كعدت اباوعلهم شلون يلعبون
هو لزم حسين ونيمه بالكاع وخله مسدس على راسه ويسويله تاه... تاااه

مريم... هو انت كل شويه تقتله

علي... مو ميموت

حسين جان عايش دور الحرامي وعلي مخبوص بالبيريه والتاه... تاه... صرت اضحك وياهم ولعبت زهراء سويتلها بيت بالمكعبات وموهسين بالغرفه سمعت صوت ضرغام بره
بقيت بمكاني خفت من لسان سندس
شويه واجت سندس
وكفت وتخوصرت

سندس... عيني مريم وين مخليه الملح

بالكاوونتر هسه اجيبه الج

كمت دااجيبه باوعتلي
يااااا هاي شنو دشداشتج هم كصيفه

... ماعندي اكبر

... ومتعرفين تشترين قياسج

.. ضرغام اشتراهن الي

... شنو عيني شنوووو. ضرغاااااام طبعاااااا
يشتريلج هيج كصيفه دايبقه يباووووع
والتفتت باوعت للمطبخ وعلى مايبدو ضرغام كبالها وتأشر وصوتها على

طبعا شيخ طبعاااا تشتري لبنيه منعرف منين جايبها
مشيتها على اختي فاقده الذاكره
مشيتها عليها وانت الله ليعلم شنو بينكم
تشتريلها ملابس وكصيفه هممم

.. ماسمعته ردلها وهي صارت تحجي

... كول عينييييي كول متزوجهاااااا وتكذب هلى اختيييي دكللها فاقده الذاكره ياذاكره هااااي فدوه لعينك مالكو غيرك يخلوها بيتك وانتو تعصيكم شغله لو تريد تعرف اهلها بيومين تلكه اهلها

..ماجاوبها

... رددد بس شتحجي شتكووووول ولج نووور اصحي وفتحي عينج ضرغام يكذب علييييييج

طلعت نور تمشي بتعب وجاوبتها بتعب

وحتى لو متزوج اذا مريم اني قابله

سندس.. تخبلتي انتي تخبلتي رسمي

نور... مريم ماشفت منها شي مو زين والبنيه تداري بيتي واولادي ماشفت منها شي مو زين

... ولج هي الي ماشافت منج شي مو زين وساكته دوسي على اضفرها وشوفي شيطلللللع
ولج لاتغرج المضاهررررر

بهل الاثناء اجت اختها عذراء

ها شكو شنو هاي سندس صوتج لسابع جارررر

سندس... شوفي العينتيننن اختنه بالوجود وجاب العروس كعدها يمهااااااا
رجل اختج وابن خالتججج الحووووك متزووووووج

عذراء.. بصدمه... شنووو شتحجين منو هاي وشوكت نور ليش مكلتي

نور... ماكو شي من الي تحجي مريم داتحجي واجه ضرغام يمهم

عذراء اخذي اختج وروحو بلا مطرود نور كوه تحجي واختج متكول اختها مريضه

عذراء... بس فهمني ضرغام متزوج شنو( واشرت عليه) هاي البنيه منوووووو

... لامرتي ولامتزوجها ولابينه شي اصلا اختج وتعرفين تهايمها

عذراء... ولج سندس متجوزين من سوالفج كافي الله يخليج كاااافي احنه بيا حال

سندس... هاي قشمرج بكلمتين انتي الثانيه ولج متزووووج افتهميييي هاي مرته

عذراء... باوعت لضرغام... ضرغام والله اذا الي تحجي سندس صحيح ماراح نسامحك طول عمرنه فهمني سالفة البنيه هاي شنووو

ضرغام... مامجبور اوضح مرتي وتعرف بكلشي غير شخص مامن حقو يعرف

عذراء.. باوعت لسندس... كافي سندس سكتي جينه نشوف اختنه شتحتاج

ضرغام... والنعم منكم مقصرتو مامحتاجه شي اختج هاي البيت كدامكم ناقصو شي

سندس.. اييي طبعا متكفي بهااااي هي ام البيت صايره وباوعت لعذراء... ولج ملبسها دشداشه جيس كوه طابه بيها وتتمايل كدامه

عذراء.. بدهشه... شنووو

سندس... شوفي باعيها
باوعتلي كالت

عذراء... مابيها شي عاديه ملابسها شبيج سندس

ضرغام... بعد هاي تهايمج عتبة البيت متدوسيها بعد اخذ نور من ايدها وفاتو للغرفه وسد الباب

باوعتلي سندس تريد تاكلني وعذراء بين الي مصدكه وبين لا

عذراء... امشي اختي امشي بعد ماعلينه حدنه نجي نشوف اختنه ونطلع

طلعو ثنينهم... كعدت كارها كلشي مليت طكيت ردت بلحضتها اروح لبيت خالي

اجت الحجيه يمي كعدت كالت يمه مريم ماعليج منهم هم هذوله خواتها بعدج ماشفتي شي
ضرغام يتخبل منهم ومن جيتهم من زمان كلما يفوتون يسوولها مشاكل واكثر من مره ضرغام سامعهم وهم يدفعوها عليه
تره نور الا عرفت خواتها يله سحبت نفسها منهم وصارت على ماي ضرغام قبل لا هواي عانى منهم

مريم... شلون يعني

الحجيه... نور حبته كلش هواي لضرغام وضرغام جان بااول التحقاتو وعلى طول يروح ايام بالدوام بره البيت كامو يكلولها
هذا كذاب هذا متزوج عليج راجع لحبيتو ومن هالحجي طول ماهو ملتحق هم يجون يعبون براسها ويطلعون
وهاي تتخبل عليه يجي من الدوام تكعد تشك بي

تفتش ملابسو تشتمها تدور بجهازو وهو ميحجي شي يكولها حقها تحبني وتغار عليه

خواتها ماكتفو بهذا الشي لزموها لتبقين بس تشتغلين اطلعي اطلبي سوي كذا سوي سوي هيج
على كد ماحبها اله على كد ماتحول لبركان من المشاكل والغيره والشك

هواي شكت بي وجانت تسوي مشاكل ويا هواي بس هو جان يسكت ويعوف البيت ويطلع

الحجيه.. يمه نور ماعليج بخواتج لاتبقين تسمعيلهم لهذني هم ببيوتهم مرتاحات حتى يعلموج

نور... احبه خاله احبه وهو على طول بره عايفني كل وقته شغل كل وقته واجبات ساعتين ماعرف اكعد يمه

الحجيه.. شتسوي ياامي شغله هذا خلي ثقتج بروحج وماعليج بخواتج

نور... لا خاله لا هم يحجون صح هم يشوفون الي مااشوفه اني ضرغام كل وقته بره معقوله كله شغل

الحجيه.. اي ماعنده شي

نور.. لا عنده ومتأكده هم يجي ضرغام ونتفاهم على كلشي

الحجيه... تره بزع من المشاكل وداتشوفي ساكت مقدر خبالج وغيرتج تره ضرغام من تصعد براسو ميعرف احد ديربالج لايگلب عليج بوجهو الثاني

نور.. لعد اعوفه هاي وهذيج تاخذه مني

الحجيه... الرجال ماعنده شي بطلي شك بطلي تعاركي كل يوم تره ملل اذا بقيتي هيج يعوفج وهذني خواتج الا لااكول لاامج عليكم وحتى انتي

مريم... يعني جانت بينهم مشاكل

اي اول سنتين تقريبا مشاكل وبسبب خواتها جانت تسمعلهم

مريم... وبعدين شنو الصار...

الحجيه... هو مل من المشاكل سمع خواتها يدفعوها عليه وهي تحجي عليه كدامهم تخبل كام بالاجازه مينزل يبقه بالدوام ومن اخابرو يمه وين صرت يكلي عقلي بنت اختج علمود اطيق افوت للبيت تخابرو هي ميردلها وتجاهلها وبقه فتره لاياكل من طبخها لايحجي وياها حتى فراشو عزلو عنها ابتعد عنها هي بس رجلو ماباستها علمود يصالحها وتتأسف ومايفيد

اخر شي كللها

ضرغام... شوفي يابنت الناس سوالف النسوان التعبانه هاي جوزي عنها اتخبل من المره التنك والتشك ومسويه نفسها تحبني
انتي لو تحبيني جان متشكين جان متضوجيني وعلى طول تحركين بدمي
سكتت كلت صغيره ومتعلقه بيه وتخاف عليه وتغار حقها بس زوديتها حيل

نور.. انت هواي تبتعد عني

ضرغام... شغل... دوريات ومأموريات اجي تعبان كاره الدنيا بدال مااسمع كلمه حلوه منج تتلكيني هيج كل يوم

نور... اخاف عندك غيري اخاف تخوني

ضرغام... وي منو اخونج وي الامر لو وي المنتسبين ليش هي اكو مره بشغلنه كلنه زلم تروح من الصبح تصبح بوجه الارهابيين واحدهم نور محمد ماكو بوجهو وتكعد تحقق وينشف بريكك من الكذب
اذا ماياكل ضرب زين مايعترف بشي الحبال الصوتيه يوميه احسها حتطك بسبب الصياح والتحقيق واشبع مشاكل واكضيها اسبوع عشر ايام على هالحال ومن انزل تتلكين عفيه ضرغام خو مداتخوني

لا انت داتخوني... عليك الله وين جنت
انت متزوج عليه وداتبات يمها وتكلي بالفوج
انت متحبني... وكل شويه تعيدين... ضرغام تحبني؟
لا انت متحبني انت بعدك تحبها لهذيج انت تخوني ويبدي البجي مالتج

نور... اني اسفه

ضرغام... بطلي غيرتج هاي مااحب الغيره الي تزود عن حدها حلوه غيرة المره بس بحدود

نور... اسفه حبيبي لتزعل

ضرغام... ماشي اشوف تالية الاسف مالتج

مريم... وبعدين

الحجيه... اختها دلتها على درب الحجابات ومال محبه وعلساس مو حرام ومن الخريط يحللون بكيفهم ويحرمون سوتو لهذا مال محبه وخلته جوه راسو وصارت تخليلو بالعصير شغلات يشربها ضرغام وره فتره صار يتقيء ويشكي من بطنو راح يعالج مابي شي بس هو يشكي هواي
انه والله يامريم شكيت ب الاعيب سندس بنت اختي واعرفها جريت نور كتلها

الحجيه... ولج شداتنطي لضرغام

نور.. ارتبكت... هااا م مم دانطي كلشي خاله

الحجيه... لا تجذبين ضرغام مسگي والسگوه سوالفج وسوالف اختج

نور... لا ها لا ماكو شي

الحجيه... رجلج اذا صار عليه شي انتي تشيلين خطية ولدج انه كتلج بعد

ضرغام صارت تلزمو صخونه وزادت شكوتو من بطنو
بلييل تخربط ضرغام واحنه نسوان وحدنه حرنه بي وين نروح هي خافت عليه وكامت تصرخ وتلطم على وجهها
ولج خاله ضرغام حيموت وين نروح شنسويييي
ضرغام اكعد اكعد والله بعد مااسوي شي
الله لايوفقج سندس كله منج

الحجيه... ها ولج يمعزايه تكلين مامسويه شي

نور... خاله. خاله والله هي كلتلي هسه رجلج يكوم بحبج يموت عليج ماعبالي هيج يصير

الحجيه... والله اذا صار شي على وليدي يانور لااحرمج من ولدج انه الج بسيطه
خابري ولد عمو خل يجون لايروح من ايدينه
خابرتهم ودو للمستشفى وعالجو ورجع للبيت مرتاح
احسن كالولو ارتاح شويه ولاتتحرك بقه نايم على مخده هو متعلم فراشو يكل اسبوع يتغير وفراش غيرو لازم هو بيدو دايوخر وجه المخده وكعت ورقه صغيره وشافها وعرف نور مىسويتلو سحر
گلب الدنيا عليها وراحت بوكتها زعلانه شهرين يمكن
وراد يطلكها بس انه كتله... يمه ابني مريتك عقلها صغير وهاي سوالف النسوان لانها تحبك يمه ولدك خطيه شنو ذنبهم وحجيت ويا هواي حتى اتراجع عن قرارو والا قفل من يمها وبقو تقريبا شهر وره مارجعت للبيت هي بمكان وهو بمكان لحد ما نست شويه السالفه وصارولج هسه مثل السمنه على العسل

مريم... وهو وماعرف هي مشربته

الحجيه .. لا لا ماكتلو ابد غير جان طلكها هو عرف بس بالورقه وتخبل كال مرتي تمشي بهيج دروب هاي كلشي يطلع منها
بس انه كتلو هاي اختها وهاي هي لعبت بعقلها ولان تحبك يله تراجع

مريم... الحمد لله

بهل الاثناء فات ضرغام... باوع للحجيه

... حجيه تغديتي

... اي يمه اكلت صبتلي مريم

... انه طالع

... يمه تغده

... رد وهو يمشي حتى يطلع... مااريد
الحجيه كامت لغرفتها واني بقيت يم الاولاد
مالي عين اطلع بعد الي صار بقيت بغرفتي
والجهال يروحون ويجون على امهم لاهي صاحتلي ولا انه الي رحتلها
لليل اجه الضرغام قبل لايجي اخذت جاكيته من الحجيه عريضه عليه لبستها حتى مايبين جسمي مث ل مكالت اختها جنت محضره العشه بالمطبخ ونور تمشت من وحدها واجت كعدت باامطبخ صبيتلهم وكعدو يتعشون جنت شاويه تكه لنور خليتلها على وحد تاكل لان هي على ميز الطعام كاعده هلى عكس ضرغام والحجيه ولااولاد بالكاع
اثناء مدانتعشه اجه اتصال لضرغام مباشرة كف عن الاكل وصفن ونتر شلووووون شوكتتتت

الحجيه... شكو ابني احجي

مارد وعاف الاكل وكام طلع بره يخابر

والبقيه؟

اي خلهم كدام عينك كلللهممم لحد مااشوف راس السم وين مولي
وسد الموبايل وتأفف بغضب نار اشتعلت بي
متحمل يبقه طلع
ولاحجينه ولاسألنه شصاير
بقينه وحده تباوع بوجه الثانيه وساكتين
ونور احس وجهها ثكل من عندي مو هذيج نور الاول
وبوكتها عذرتها

مر وقت طويل وكلمن صار بغرفته طول الضرغام بره مااجه تأخر الوقت وكلها نامت الاولاد ونور والحجيه
ووحتى اني غفيت ونمت حسيت على صوت زهراء تبجي رحت للمطبخ حتى اسويلها حليب تفاجأت بي كاعد بالصاله على كرسي التخم ومدد رجله على كرسي الثاني وراسه مرجي ويباوع للسكف ويدخن الصاله جانت كلها ريحة جكاير ومبين سارح بتفكيره
داامشي بدون مااحجي شي تكلم وهو على نفس الوضع
سويلها حليب ونيميها وتعالي يمي
رحت سويت الها حليب وشربتها وكعدت حتى انيمها فكرت شنو يريد وليش كاعد هنا
نيمتها وبعد افكار هواي رحت اله وكفت

تفضل..

... خابرني ابن خالج وباجر تتحضرين نروح تشوفين اختج

... فرحت حيل فرحت ردتها هالمره الروحه من صدك ابتسمت وتشكرته باوعلي

.. فرحانه مريم

... اي اريد اشوف اختي اريد استقر ارتاح

... ماشي مريم باجر اوديج

توجهت حتى اروح والتفتت اله...

ليش كاعد هنا

... باوعلي وجر نفس عميق بجكارته وزفره

... بيك شي ضرغام

... لا روحي نامي

... تمام

ماغمضتلي عين بوكتها وتحضرت من الصبح حضرتلهم الريوك وتريكو وسلمت عليهم وطلعت ويا
وصلنه بيت خالي نزلنه ودكيت الباب طلع ابن خالي
شافني بقه مصدوم تلكأ كال
ه... ه.... هاي سديم

باوعت لضرغام وهو هز راسه بتفهم كال اختج يقصد تشبهج

ضرغام وين سديم

... جايه بالطريق فوتو...

... فتت وكعدت وانتظر على نار وبعد طول انتضار
ندكت الباب وفز گلبي وي دگت الباب ايدي رجلي رجفت ضرغام لزم ايدي يحاول يهدأني واني رجفه وايدي ورجلي ثلجت

فاتت وسمعت صوتها وينها وين اختي حسن تكذب عليه فاتت وشافتني نصدمت بقت واكفه لحضات هي تستوعب الي داتشوفه حقيقه لو خيال واني كذلك

عيونها صارت تصب دموع وتبجي اجت عليه بلهفه حضنتني وتبجي
واني ابجي

ولج مررريييييييم حبيبتيييييييييي اخيرااااا
ثنينه نبجي صرنه

سديم... مدااصدك انتي مريم.... معقوله
معقوله مريم انتي گبالي وبعدج عايشه

وتشبهيني مريم تشبهينيييي نفسج انتي اني

يحبيبتي شكد اشتاقيتلج واشتاقيت اكعد وياج واشتاقيت اشوفج

نهارينه من البجي وكانت دموع فرح بعد حزن دام لسنوااات.....

ولقائي بكِ فيها لهفة يعقوب وردة روح ليوسف....

كنت معكم انا رغد الموالي في امان الله ♥