تـــــــــــــل الذهــــــــــــب
رغــــــــد الموالــــــــــي
ـــــــــــــــــــــــــــــــــــــــــــــــــــــــــــــــ
سديم.....
خليت ايده على بطني كان الطفل يتحرك بركلات بسيطه بجدار بطني شعر بركلات الطفل ابتسم
ادم... شوكت يجي
سديم... مابقه شي بعد شهرين
ادم... هواي شهرين اريد اصير اب
سديم... هسه تصير اب وتكوم تضوج من هوسته
ادم... خلينه نفتح صفحه جديده واني اوعدج اتغير اصير غير اترك كل سوالفي
سديم... واني هذا الي اريده اني مااريد نترك بعضنا لخاطر طفلنه
ادم... اكيد حتغير سديم حصير ادم غير الي عرفتي
سديم... اثبتلي هالشي الكلام ماكو اسهل منه
اول شي اريدك تترك المشروب وعلاقاتك بالبنات
ادم... اي اعوف هالامور
سديم... تمام
ادم... صار الصبح سديم
سديم ... غير انت سهرتنه
ادم... يله نرجع نام شعدنه
سديم... اي اني نعسانه
رجعت مددت وهو كام طفاه للضوء وطلع
غفيت ولما غفيت شفت روحي بمكان واسع وحلو
اخضر وزهور بكل المكان باوعت لروحي لابسه فستان طويل كلش لدرجة تتطاير بالهواء من القماش بالفستان كنت حامل وامشي بالحديقه هذه
فجأه شفت وحده تشبهني او يمكن اني نفسي لكن مو حامل كانت تلبس نفس الفستان وعلى راسها تاج ابيض مرصع باالماس خضر
شايله بيدها برطمان فخاري صغير وباوعتلي وابتسمت كانت تتقدم بااتجاهي
اجت وكفت كبالي فتحت البرطمان الفخاري وانطتني ورقه حاولت اقره شنو بيها لكن الكتابه كانت مو واضحه ابد
رفعت راسي حتى اسألها لكن مالكيتها ماكو
دورت يمنه يسره ماكو
صحت بااسمها .... انتيييي منووووو.... وين رحتي
اركض والتفت ويييينج
واباوع ماكو
فزيت من نومي كان يأذن الظهر
اعوذ بالله من الشيطان الرجيم
حلم لأ هو حلو ولاهو شؤوم
كمت واحس جسمي متكسر فتت للحمام سبحت بالمي الدافي والصابون ارتاحيت واسترخيت شويه لبست بجامه وبلوزه ولفيت شعري بخاولي طلعت لكيت ادم توه فايت للبيت وبيده علاليك
ادم... صح النوم
سديم... ماادري هسه يله حسيت شنو جنت طالع
ادم.. دوام بالشركه اصلا منمت سبحت وطلعت عفتج نايمه ادري بيج تعبانه
سديم..... هسه يله حسيت
ادم.. تعالي جبتلج غده... تعالي ناكل
سديم... بس عدنه طبخ
ادم.. دشوفي هي شلون دليميه تخبللل تعالي ناكلللل
خل يااكل ابني اريده دبدوب علمود مااعضه غير من خده
سديم... اتبسمت ورحت جبت الصينيه وخليتها وخلينه بيها الغداء وكعدنه نتغده
اكلت من جوع كنت كلش جوعانه اكلت وشبعت
جريت نفس همست يمه شكد اكلت شبعت
ادم... ها شفتيها شلون دليميه عوافي حبيبي
سديم... اشكرك هسه شلون حسويلك جاي مهيل يخبل
ادم... لا اني اسوي انتي هسه طلعتي من الحمام روحي نشفي شعرج بالشسوار
.... ياااا فدوه شنو هالدلال
... شعبالج لعد اني اعرف شلون ادللجن واقشمرجن
... تخوصرت ورفعت تك حاجب ارفع رجل وانزلها بحركه سريعه انتظره يكمل
... انتبه لكلامه تبسم كال
هااا هههه تره اقصد بس انتي يعني قابل اكول ادللج
... هزيت براسي بمعنى اي ورحت حتى اسرح شعري
فكرت شلون اخلي يتغير واجذبه اكثر لازم اخلي يترك درب الحرام لازم يلتفت لبيته وعائلته لازززم
جنت اسرح بخيالي وفكره تودي بيه وفكرع تجيب واني اسرح يشعري سمعت صوته
هاااا. وين صرتي
انتبهت يااا شكدصالي خليت المشط على الميز وطلعت
اسفه تأخرت عليك حبيبي
دشوفي شلون جاي ابو الهيل يخبل ياهيله انت ياكرزايه
.... ادم استحي
... يفدوه لليستحي ويصير عبالك طماطه
... ههههه هاي شلك بيها
... انتي شايفتها من يخلوها وي الباميه شلون تنطيها طعم يخبل
صدك والله اشتهيت باميه طبخيلنه باجر
... صار من عيوني
... يفدوه لهاي العيون الحلوه
... حبيبي ادم احنه لازم نشتريله للطفل هو المفروض اهلي يجهزوه للطفل بس انت تعرف
.... حبيبي الطفل طفلنه ليش اهلج يجهزوه اني وياج نشتريله هذا اول فرحتنه
سديم... اعرف بس التقاليد انو اهل البنت لازم يشترون للطفل جهاز كامل للطفل
ادم... وليش اهل البنت شعليهم هاي غير شغله هاي
طفلنه غير اول فرحتنه احنه نفرح بي
... ان شاء الله باجر نطلع ونشتريله
... وليش باجر ماعندي شي اليوم باجر جمعه وخلصت شغلي من وكت
تحضري نروح نشتري
.... تمام حروح اتحضر ماأتأخر عليك
... كمت بسرعه لبست وتحضرت واجيت صعدت ويا بالسياره وطلعنه رحنه للسوك ونفتر من محل لمحل هذا حلو وهذاك ضيق وهذا مو حلو
شي يعجبني ومايعجب ادم وشي يعجب ادم ومايعجبني ومره يعجبنه ثنينه
اخذنه ملابس للطفل وواشتريناله سرير وبطانيات وممات كانت سعاده الي متقدر بثمن
رجعنه للبيت
ادم... نسويله غرفه اله وغرفه النه
سديم... بعده صغير شلون غرفه اله
ادم... لعد وين نخلي ملابسه وكل احتياجاته
سديم... بالغرفه الي اني انام بيها وعادي نبقه اني ويا
ادم... يعني متجين غرفتي سديم احنه مو كلنه هاهيه
سديم... لو شفتك فعلا تغيرت بس اني الي شفته لحد الان كلام وبس
انزعج بس اني تركته ينزعج لازم يتغير فعلا يله اتخذ قراري الاخير
ادم.. يله لعد نرتب ملابس الطفل
اكلج انتي شمدريج بنيه حتجي وجبتي هواي ملابس بنات
سديم... وداد كالت
ادم... هاي تصدكين بهذني الامور صدك تحجين
سديم... مو كلش اصدك بس اني هم احس
..... اني جبته لبطلي وانتي لعصفورتج نشوف منو يفوز بالاخير
بس شنو حنسميهم
سديم.. اذا ولد اسمي جود واذا بنت اسميها لارين
ادم... شنو هاي الاسماء لا غيريهن
سديم.. انت شمخلي بالك..
... مافكرت
... فكر وعود كلي
ادم... خل نشوفه بالبدايه ونكحل عيونه بي وعود نسأله هههه......
مهما عانينا من قساوة الايام لابد للفرج ان يشرق علينا ذات يوم.....
ـــــــــــــــــــــــــــــــــــــــــــــــــــــــــــــــ مريم ـــــــــــ
بهذه الاثناء رن تليفونه فتح سبيكر وجاوب
جان صوت رجال
... ضرغام وينك
... كول
... ام علي تخربطت واحنه هسه بالطوارئ
.كام على حيله شنووووو جاي جاي
بسرعه مشى ومشيت وراه صعد السياره وحركها بسرعته داايطلع تذكر بالباب نزل قفلها وصعد بسرعه
وحرك سيارته بسرعه فائقه لدرجة الطريق الي ورانه صار مترب ماينشاف شي
وجها بين شكد عليه توتر واعصابه مشدوده مركز على الطريق وبسرعه سايق
محجيت كلشي اتجنبه من هو عصبي
ونقهرت على نور بس لاصار بيها شي
مشى هواي حتى وصلنه نزل وتوجه للمستشفى
ونزلت وياه
لكينه رجال ثنين واكفين ومره وياهم هو كلمهم ضرغام
ها شنو بشرو
.. تخربطت الحمد لله اني عدكم جنت راحت للمطبخ تشرب مي ماشفتها الا وكعت وكلاص المي صار كله عليها
... دخل للغرفه الي موجوده بيها نور جانت نايمه او فاقده للوعي ماعرفت بالبدايه لحد ماكلهمهم ضرغام
.... حالتها شلونها هسه
... استقرت بس الراحه ثم الراحه
... صار دكتور بس هي هسه ليش مصحت
... نطيناها علاج هسه شويه وتصحى
عدها العافيه ان شاء الله
.. اشكرك دكتور...
بقه يمها كاعد ولازم ايدها اليسره بيده الاثنين
قبلها وشمها ورد مسح على راسها ويهمس
... نور..... حبيبي.... ام علي..... تسمعيني
رد قرب وجها منها قريب على ووجهها وحوطها بيده وصار يحاجيها
مو كلتي قويه انه وماعليه شي
كعدي عمري انتي
نواره...
هي جانت ماترد
تركتهم وطلعت بره انتضر الرجال الاثنين الي وياهم والمره بقو يباوعولي بااستغراب اول مره يشوفوني خصوصا اجيت وي الضرغام الف سؤال واستفهام بوجههم
نصف ساعه تقريبا وطلع ضرغام
سألته المره...
... ها مكال الدكتور شوكت تكعد
.. لا
هي شلون هيج وكعت يعني اكو احد غاثها
... لا ماكو كلشي باوعتلي وردت باوعتله وتكلمت بطريقه تقصد احد...
بس الضاهر اكو شي قاهرها وهي ماحجت
الي بالگلب بالگلب
اختييييي واعرفها طول عمرها تسكت
باوعلي ورد باوعلها تخوصر بيده الاثنين رفع تك حاجب
... شتقصدين سندس
... لاااااااا مااقصد شي عينيييييي هو احنه نكدر نقصد
.... جبار كلها لمرتك خل تضب لسانها
جبار... سندس وتالي ويياااااج احنه بيا حال
سندس... هو احنه شحجينه شكلنه عينييييي
عافهم وطلع بره وكف شعل سيجاره وكف يدخن مرجي راسه بالحايط صافن
شفته من بعيد بس ماكمت من مكاني هاي اختها رادت تاكلني بنظراتها
مر وقت طويل واختها راحت يم نور والرجال الاثنين واكفين يحجون سويه وضرغام مااعرف وين راح
طلعت اشوفه وين التفتت يمنه يسره لكيته كاعدعلى
المسطبه بره لازم راسه بيده الاثنين ومدنك والجكاره ماطفت بين اصابعه عرفته مقهور عليها نور ماتستاهل يصير بيها هيج
فتت بسرعه قبل لاتشوفني اختها
شويه وطلعت فرحانه صاحت لجبار واحد ثاني عرفته اخوها لنور اسمه عدي وضرغام يمكن سمعهم اجه هم وراحو كلهم يمها
فتت على كيفي جانو كلهم ملتمين
وضرغام يبوس بيدها
ضرغام... عمري انتي ليش هيج ليش شصار وياج احجيلي
نور... بتعب وصوت همس... مصار شي بس گلبي صار يخفق بسرعه
ضرغام... كتلج لاتعبين روحج انه اعرفج شتسوين بغيابي
نور... امانه ضرغام لو متت ديربالك على جهالي هم اغلى شي عندي
ضرغام... شششش لاتحجين هيج حتكومين وحتصيرين زينه هم
نور... لا ضرغام اني اعرف بروحي مامطوله
بس جهالي اني احبهم مو لان قطعه مني بس احبهم لاانهم منك لان كلما اشمهم احس اشمك
ضرغام حبيبي اذا متت لاتنساني
ضرغام... نور شنو هالحجي شبيج كافي اوديج احسن دكتور وتصيرين زينه
نور... كافي اطباء حتى كىرهتهم ماخليت دكتور ماوديتني عليه
ضرغام... خليج قويه
نور... حاولت ودااحاول بس مدااكدر احس المرض جرى بكل جسمي اني غلطت لما ضميت عنك بالبدايه لو كايلتلك جان موصلت لهذا الحال اني مجنت متوقعه راح يصير بيه هيج
ضرغام
اني احبك وحتى لو اموت راح ابقه احبك وراح اطلب من الله يدخلنه الجنه سوه وتبقه زوجي بالاخره
ضرغام... كافي گطعتيلي گلبي نور وين اوديج شلون ارجعج نواره الي مثل الطير ويحوم حواليه كليلي شلون
بفلوس الدنيا كلها اشتريج بس شلون
نور... اخذت ايده وقبلتها بدمعه بعدين انتبهت اني واكفه تفاجأت
مريم انتي هنا
مريم... اي مارحت مالكيت اهلي
نور... ليش
.. بيت خالي ماكو
حمد لله على سلامتج
... الله يسلمج
سندس... ياسوده عليه ياخيه بعدج تمشين بطولج والعيون زاغت
مباشرة التفت الها الضرغام بفزه وخزرها هي كبل سكتت ودنكت تخاف منه
نور... زاغت شنو؟
ضرغام... قصدها بجت
... نور... لان يحبوني يبجون ينقهرون عليه
سندس... اويلي شغاسل دماغج رجلج
ضرغام.. تره سويتيها بلا ملح عود سندس لخاطر نواره ساكتلج
سندس... اشاقه... تعلمت الشقه الثكيل منك
عدي... جبار اخذها لسندس وروحو للبيت
كام جبار نتر بسندس كومي للبيت
سندس... لاعينييييي اني مااعوف اختي بهل الحاله ابدددد
ضرغام... مقدر خوفج مشكوره
.. سندس... ضرغام عود اعرف شتقصد
عموما اني حروح واجيكم باجر اختي مااعوفها
وراحت هي وجبار بقه عدي كال
شوكت نطلعها ضرغام
... هسه اشوف دكتوره
شويه واجه ويا دكتوره شافتها كالت
... تلتزمون بتوصيات الدكتور لازم ترتاح اي جهد نفسي جسدي ممنوع الحاله النفسيه فوق كلشي
طلعت وره شويه اجت
اخ ضرغام الدكتور طالبك
كام طلع راح للدكتور شويه واجه كال يله نطلع
سندها لنور وهي محوطته بايدها اليمنه
وتمشت جانت لابسه عبايه
طلعنه وصعدها يمه وصعدت وراهم وشغل السياره وطلع وصار يكلمها
.... نور اذا تحبيني فعلا سمعي كلام لاتتحركين ابقي بمكانج صيري زينه وعود سوي الي تحبي
... والجهال منو عدهم يحتاجوني
... اجيبلهم مساعده بالبيت بس لتشعلين گلبي
... وجهت الكلام الي.... مريم خو ماضجتي لان ملكيتي بيت خالج
مريم... لا عادي والله شايله هم اكول خاف ميتقبلوني
نور... ليش
ضرغام مباشرة تكلم... مو هي اهلها متوفين وتستحي من بيت خالها عبالهم نهزمت مو مسويه حادث وباوعلي بالمرايه
نور... ياااا هاي فوكاها لتهتمين واذا متقبلوج بيتنا مفتوح الج
مريم... اشكرج
وصلنه البيت دخلنه لكينه الحجيه مخليه الاولاد يمها زهراء نايمه وعلي وحسين يمها
الحجيه.. ها يوم اجيتو...
ضرغام... هلو يوم جينه
الحجيه.. ضل بالي على نواره وينها
ضرغام... حوديها ترتاح بغرفتها
وصلها للغرفه مددت وغطاها وكعد يمها اني مباشرة طلعت كعدت بره يم الحجيه
الحجيه... هله بنيتي مريم ليش رجعتي
مريم... ماكو احد بالبيت
الحجيه... يله هم جتي من يمنه عينج على جهال هاي وكعت وانه مااشوف
مريم... بعيوني حجيه
الحجيه... همست... انتي حابه تبقين هنا
مريم... اتبسمت.. حجيه كل شخص يستقر بيته لكن اني ماادري بالنهايه وين حستقر اصلا متشتته خصوصا الي حروحلهم بيت خالي
الحجيه... لعد حكله لضرغام يبقيج يمنه كم يوم بين ماتخف شويه نور
مريم... بكيفج حجيه...
مريم بنيتي ودي الجهال نيميهم بغرفتهم تعبت رجلي وهم نايمين عليها واريد اكوم انام تعبت
... تعشيتي حجيه
... اي يمه تعشينه الله ينطيها لاام زينب سمعت بنواره جتي تركض ولكتها بالمستشفى سوت عشه للجهال والي وراحت
... بالعافيه
... شوفي عود نواره وضرغام يمكن ماتعشو
رايحه انام وانتي نيميهم واتعشي انتي ونواره وضرغام
... ماشي حجيه
اخذت الاولاد لغرفتهم الي جنت انام بيها
طفيت الضوء ونيمتهم
بقيت مدده يمهم وهم غفو
دك الباب ضرغام همست تفضل
فتحها وفتح الضوء
ضرغام... اسف ماعبالي حتنامين هسه
مريم... لا نيمت الاولاد
ضرغام... متعشيتي
مريم... مو جوعانه
ضرغام... حروح اجيب عشه امي ماتريد متعشيه والاولاد هم بس انه وياج ونواره لكن
... لكن شنو
. مثل الي استحى يطلب سكت ودنك راسه كال...
روحي على نواره شوفيها شنو تريد
اي
طلع هو واني طفيت الضوء ورحت عليها
كعدت يمها تكلمت بصوت ناصي
نواره محتاجه شي
لزمت ايدي وهمست... مريم لو صار عليه شي لاتعوفين اولادي وعمه اني عندي خوات بس مايشبهوني يعني هم وضرغام مو على صفه ميسكتون وحتى لو يجون ويسمعوج حجي لا تهتمين لاتخلين بالج
مريم... ماشي لخاطرج مااحجي كلشي
نور... جوعانه اني ردت شوربه ضرغام مايعرف ساعديني اكوم اسويها ماقبل اكوم اسويها
مريم... لا صدك جذب اني حكوم اسويها
نور... تعرفين
مريم... اي اعرف اطبخ
اتبسمت.. يله حتى اجرب طبخج
رحت للمطبخ اسويلها شوربة العدس بين ما راح تستوي اجه ضرغام
جايب ويا عشاء
هاج هاي العشاء
اخذته منه من دون كلام بقه واكف لدقيقه تقريبا وراها مشى راح لغرفته
سويت الشوربه وكملتها صبيتها جان جايب لفات شاورما وببسي ومواعين ماعرف شنو بيهن هيج سلطه وجزر وهالامور جان شكلها حلو خليتهن بالصينيه
وديتها الهم خليتها على طبله
... هاي لشوربه ان شاء الله تعجبج
نور.. تعبتج
... لا ماكو اي تعب
... يله كعدي ويانه اكلي
.. لا مااريد مو جوعانه
... ميخالف لازم تاكلين
ضرغام... كعدي مريم اكلي ويانه
... مااري
.. قاطعني كتلج اكعدي اكلي
كعدت ونور كعدت حتى تاكل انتابني فضول اعرف هاي شنو بالماعون الي مشكل سألت نور.
... هاي شنو بالماعون
.. مقبلات
... اي هاي المزه اعرفها بس البقيه ماعرفتها
...باوعتلي وضرغام كبل خزرني
نور.. مزه شنو
ضرغام... هاي متعرف تره سألتني بالمطبخ هاي شنو وكتلها هيج عود انتي صدكتي هيج اسمها
مريم... اي هيج اسمها لعد شنو
نور...يا تضحك عليها ضرغام
... اتبسم ودنك ياكل
نور... لا ماعليج بي تره ضرغام متعرفي من يتشاقى يحجي كلمات يمه منه ابقه صافنه شدايحجي
هذا اسمه جاجيك
مريم... باوعتلها دااكلها لا.... بس سكتت هو مباشرة خزرني
كملنه العشاء وشلت الصينيه اوديها للمطبخ
وكفت اغسل مواعين الي توسخت واسوي جاي لضرغام شويه وطلع ضرغام اجه خازرني وهمس بحديه
ولج شنو هالحجايه الحجيتيها
... اني ماادري الها غير اسم
... مريم انتبهي لكلامج بله عبرت على نور متعرف لو احد ثاني جان شكال عليج
... ماادري اعتذر
... تنهد .. يله مصار شي علمودج انه ابويه لاتفهميني غلط
... اعرف
... سويلنه جاي وجيبي للصاله انه كاعد
... ونور
... نور نامت تعبانه
... ماشي
سويت الجاي
وجبته اله وصبيت كوب الي هم
كعدت على التخم الي مقابيله صار يشرب جاي وعينه بجهازه
صمت دام لدقائق اجه بالي ليو وابو غضب تكلمت
هو ابو غضب مراح يطلع من السجن
مباشرة باوعلي بخرعه ضيق عينه همس
ليش تسألين عنو
مريم... لا تره مااقصد بس هو ساعدك
ضرغام... شوفي مريم انه حصدكج وراح اكول انتي وابو غضب مابيناتكم شي بس ثقي يامريم ثقي لو طلع غير شي وعندج شي وخصوصا وي ابو غضب مراح ارحمج مريم راح تشوفين غير ضرغام ثقي انهي حياتج بيدي ومايرفلي جفن
مريم... بعد تشك
ضرغام... الشوفه الي شفتج بيها اي رجال ثاني بمكاني كان مباوع بوجهج بس سامحتج بسبب ضروفج والعيشه العشتيها والبيئه التعبانه الي ربيتي بيها غير هالشي جان مسامحتج ولليوم وبعد اكلج
عندج شي احجي طالعه وي احد كولي ابو غضب اكو شي بينكم احجي لاعندج مصلحه يمي ولاعندي مصلحه يمج على تليفون انتي باقيه عندي يتصل ابن خالج اوديج وتخلص السالفه لااشوفج بعدها ولاتشوفيني
مريم... اختنكت وكوه كابرت على دموعي
وتعوفني اني ولد خالي مااعرفهم
ضرغام... تعرفيهم وتتعودين عليهم هم وتعيشين وتنسيني هم
مريم... مراح انساك اني عمري ماانساك
ضرغام.. تنسيني غصبا ماعليج تنسين افتهمتي الوهم الي عيشتي روحج بي تصحين منو انه عندي مره بحياتي واشر على غرفته هذيج جوه شفتيها لو اشيل غشاوة بصرج
مريم... اني مدااكلك نتزوج بس ابقه احبك
ضرغام... ابقي عايشه بالوهم مريم لانتي من عمري ولاانه من عمرج بدايات العشرينات انتي وانه منتصف الثلاثينات فرق افتهمتي
مريم.... دمعتي سالت ومسحتها من سكوت
لانت ملامحه وتكلم... مريم افهمي انتي لان شفتي بيه كل دنيتج هيج متعلقه كتلج لاتتعلقين ابتعدي
وصحت انت السبـــــب
كام عليه بسرعه خله ايده على حلكي همس ششششششش
طلعني بره وهمس شلون هيج تصيحين
... بجيت تكلمت انت السبب
انت الي خليتني اشوف بيك الدنيا كلها انت أملتني زرعت بيه امل بعد مايأست من كلشي
خليت قلبي ينبض بعدما اصلا ماجنت حاسه بي
افهم
افهمني مو بيدي مووووبيدي
ساعه اكول اعوفك واعيش
ومن تصير صدك اموووووت
مفروض هسه فرحانه حشوف اختي حشوف اهلي وناسي الي عفتهم من سنين بس مدااكدر فرحتي مداتكمل بسببك غصه
غصه هناااااااا واشرت على گلبي بحركه
كلي شلون شسوي اريد ارتاح مدااكدر مدااااكدررر
كعدت ابجي لميت راسي بحضني ابجي حسيت بي يمي بمستوايه صار همس
مريم لاتبجين كافي
دفعته بعكسي خفيف
وخر ابتعد عني
روح لمرتك روحلها
... مو هاي نفسها الي حجيتي وكلتي نفترك خطيه نور
... اي ولهسه احجي بس من توصل للصدك مااتحمل اتركك حتى لو يمك وانت وي غيري اقبل
خليني يمك اروح اكلهم لااهلي عايشه ومتزوجه نمثل ان اني متزوجتك بس وراها ترجعني يمكم بيتكم انت مو تريد تجيب مساعده خدامه تنضف البيت وتطبخ خليني اني بس اشوفك ضرغام
... باوعلي بوسعة عينه... تكلم متعجب من كلامي
ولج مريم تردين اشغلج خدامه عندي تنضفين بيتي مقابل اجوووور مريم عندييييي
... اي بس ماابتعد عنك اني اضيع والله اضيع والله حتى مراح استقر بيت خالي مااعرفهم ضرغام مااعرفهم وصرت ابجي
.... جر راسي لحضنه وهمسسس شششش سكتي
كافي تبجين
متحس انت بيه وتكذبني متصدك
... لا مصدكج كافي... يابه اوديج بس اجي اخذج كل جمعه يمنه تتونسين
.... خلص اروح ومااتشوفني اصلا اني مااريد اشوفك
... توج بجيتي
... كتلك خلص
... مريم افضل النه
.... هزيت براسي بمعنى اي وهو بعد عني
يله روحي نامي الوقت تأخر
... عفته ومشيت رحت لفراشي شمرت الغطى ونمت
...للصبح كعدت على صوت زهراء تبجي كمت عليها
... حبيبييي ليش تبجيييين يعمري انتي منو وياج
شلتها دااطلعها بره بس الجو جان بارد لبستها اكثر وخليتها بمكانها طلعت شغلت الصوبه
كل مره نور الكاها مشغلتها وكاعدين هي والحجيه هالمره ماكو توقعت كاعده من وكت بس الشمس جانت طالعه واني مااعرفلها للساعه باوعتها جانت مأشره على ارقام معرفتها
فتت للغرفه جبت زهراء وكعدتها يمي بالمطبخ سويتلها حليب جنت اشوف نور تنطيها بالكلاص مو ممه مثل الي بعمرها
كعدت تلعب واني خليت قوري الجاي على النار رحت لغرفة الحجيه لكيتها كاعده بس بمكانها وتسبح
صباح الخير
... هله مرايم صباح النور
... تعالي بالمطبخ شغلتها للصوبه وكاعدين
... نور وضرغام كعدو
... لا بعدهم
... ضرغام مايبقه لهيج وقت نايم تلكي طالع روحي كعدي نور
ماشي حجيه
دكيت الباب تكلمت نور
فوتي مريم
فتت لكيتها مدده من جلوس وضرغام طالع فعلا
.. من شوكت كعدتي
نور... قبل شويه ردت اكوم بس دايخه سمعت زهراء تبجي
مريم.. اي سويتلها حليب
نور... سنديني اروح يمكم بالمطبخ اختنكت من الغرفه
سندتها وتمشينه وصلنه للمطبخ كعدتها ورحت جبت مخده رجيت ظهرها بي وحضرت الريوك بسرعه وقبل لااكعد
... نور اكعدهم لعلي وحسين
... لا عوفيهم نايمين يتعاركون واني مو حمل عركاتهم
... ماشي
صرت اسويلها لفات جبن وانطيها وتريكنه سويه
وبعدها كمت حضرتلهم الغداء ونضفت البيت وجبت الملابس حتى اغسلها شفت قمصان ضرغام سولتلي نفسي اشم عطره قبل لااغسلها
غمضت وكفت اشتم عطره فتحت عيني وانصدم...
ربما تحصل اشياء لم ولن تكن في الحسبان كنت معكم انا رغد الموالي في امان الله ♥
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!