رواية تل الذهب الفصل الخامس عشر 15 - بقلم Raghad Almoualy

ا ليس لكل منا حلم
أليس لنا الحق بالعيش
العيش بسلام بطمأنينه بحب
اود لو أن أصحو ذات يوم
ويكون كل مارأيته حلم
كل ماعشته كابوس
وكل الذي مررت به تحذير! 
تمنيت شيئا محال أن يتحقق
أن تتمنى عكس ان تترجى
فالتمني شيء والترجي شيء أخر
أحدهما محال حصوله والثاني ممكن
فلتكن انت صحوتي التي ستوقضني من سباتي
فلتكن ولأكن ولكل منا امنيات.....
ـــــــــــــــــــــــــــــــــــــــــــــــــــــــــــــــ رغد الموالي

مريم...

صحيت بغرفه بيها لوكر وسرير كانونه بإيدي ومغذي
ماكو احد بالغرفه
تقريب لربع ساعه فاتت ممرضه

- حمد لله على سلامتج

-  ( رديت بتعب) الله يسلمج

- جابت جهاز الضغط تقيس الضغط
همست  وينه

- منو

- الي جان ويايه اسمه ضرغام

- طلع وصاني عليج
هزيت براسي بمعنى اي

- ضغطج شويه هابط تحسين بوجع؟

-- خفيف

- مال العمليه لتخافين ان شاء الله لباجر تتحسنين

- الطفل طلعتو

- طبعا لو باقي جان الله اعلم شنو صار بيج على كولة اهلنه متملخه المشيمه

ماعرف ليش مقهوره مفروض افرح الي جان بيه عار بس اني نقهرت ردته للطفل
كضيت اليوم كله والليل بس الممرضه تروح وتجي ماكو احد يمي ضرغام ماعرف وين راح اختفى ولثاني يوم بالليل يله اجه
ثكلت من يمه كلش لان احتاجيت احد يمي كوه اكوم كوه اكعد ماكو احد يمي

ضرغام:- سلامات شلونج ان شاء الله زينه

- زينه

- تره جنت مجبور اروح يشكون بأمري

- لا روح اصلا مااحتاجك

- الدكتوره كتبت خروج يعني تكدرين تطلعين

- هزيت براسي اي جنت كوه اباوعله ثكلان خاطري منه
يله تكدرين تكومين

- اكدر

اكوم بس بصعوبه من شافني هيج سندني

لازم تبدلين مو زين بعدج بملابس العمليه

ماعندي

- اي صح نطوني ثوبج وكتلهم ذبو هسه اطلع اجيبلج انتضريني
طلع وتقريب لساعه اجه جايب سويتر وبنطرون

- تعبانه هي مال بنطرون

- البسج دشداشه يعني تحملي منا لما نوصل
هاي جبتلج ملابس عود لبسيها حسبت حساب تره
بديه الكانونه
نترت شلون ابدل

- اساعدج

- خاف متقبل 
صيح الممرضه

- تامرين ست

- راح صاحها وبقه هو بره ساعدتني وبدلت وبعدها صاحت عليه اجه سندني  وصار يمشي بخطوات بطيئه وي مشيتي
لحد ماوصلنه لكراج المستشفى صعدت بالسياره وصعد هو ورجعنه للمزرعه
مددت على سريري بس مضايقني بنطرون ذبيته وردت اذب السويتر صعوبه
صحت
لاتفوت اريد ابدل

مارد يمكن ماسمعني

عاونت نفسي وذبيت السويتر ولبست دشداشه شويه مريحه ومددت
هو ماعرف وين راح
شويه واجه جايب ٤ شيش معلاك وبطلين عصير وخبز
سندني حتى اكعد على السرير وخله الصينيه على السرير وهو جاب كرسي خلاه يم السرير وكعد سوالي لفه اخذتها جنت ميته جوع
فتحلي البطل وقدمه الي بمعنى اشربي مايحجي
بقه يسويلي لفات واكُل وهو ابد مااكل

- مراح تاكل

- باوعلي ورجع باوع للخبزه الي بإيده جان دايسويلي لفه  مارد

- انت ليش من احاجيك مترد

- لان ماحب احجي

- اخذت اللفه وهم اكلتها حسيت مو بس بالشبع لا بالتخمه وهو يسويلي كتله شبعت ماريد بعد
هز براسه بمعنى اي
شال الصينيه اخذها وطلع بره واني رجعت مددت
سمعت صوت دراجه وفتحت الباب عرفت طلع
بقيت بمكاني
حسيت بروحي اريد اروح للحمام بس شلون حكوم ومنا محتاجه شغلات استحي اكله عليها شلون ماعرف
تقريب لساعه اقل رجع
فتح الباب نطاني علاكه سوده كال وهو يباوع للشباك ميباوعلي يحك ركبته
هذه شغلات بنات واذا محتاجه شي بعد كولي
خلاها وطلع
فتحتها باوعت
حمرت خدودي من الخجل حراره صعدت لراسي
ومنا مداانسه موقف الدم
خجل مو طبيعي
هذا شمدري شلون هيج كلشي يعرف
كمت بصعوبه اتمشى وي الحايط حتى لا اوكع ورحت للحمام اغير

طلعت شفته شايل فحمات ومخلي نركيله بالكاع وكرسي ويمه الفرس باوعلي ورجع باوع للفحمات جان ينفخ عليها وخلاها على فنجان النركيله
وكعد على الكرسي
عجبني اكعد اختنكت من الغرفه بس استحي اروح يمه  بقيت واكفه من بعيد اباوع للاشجار الجو جان حلو نهاية شتاء

دايشرب نركيله بعدين انتبه لوجودي
صاح عليه

تعالي كعدي اذا ضايجه

- صرت امشي بس كوه بصعوبه
كام اجه عليه لزم ايدي خلاها وره ركبته رغم اكصر منه اني ورفعني

- هاي شداسوي نزلني

- ماردلي

كعدني على الكرسي جان كرسي واحد بس
راح هو جاب بلوكه ورجع خلاها وكعد عليها
وصار يشرب نركيله احسه مندمج مبين يحبها

مشكلتي احوص ماعرف اسكت مثله بس اسأل
واريد اعرف هواي تفاصيل بس الي قاتلني سكوته
هذا

حاولت مااحجي بس اتفرج مثله بس هو يلهي روحه اما اني ف لا

سألته

- الحجي خو مدايشك بشي

- رد بدون ميباوعلي
ابو غضب مغطي

- ليش هو يدري بشي

- اي

- كتله يعني

-اي كتلو

- هسه يكله للحجي

- لا ميكولو حذرتو ميكول

- انتو هسه بالبيت لو رحتو لتل الذهب

- قبل شهر ونص رحنه لتل الذهب

- هو راد يتأكد منكم الحجي بالذات انت

- باوعلي....  شمدريج

- سمعته هو يحجي

- شنو علاقتج بالحجي انتي صار بينكم شي

- لا

- كل هالتودد وحسب معلوماتي مخليج للخواص

- اي ولهسبب ابنه فشل كل خططه

- يعني انتي جنتي مكيفتلها للسالفه

- جبرني

- شلون جبرج البنيه اغلى شي عدها شرفها بشنو جبرج

- كالي اخليج للحي كله

- ومن يخليج لجماعتو عادي تقبلين
كالها برفع الحاجب

- هيج
هيج
حخسر
خو اكسب اذا خسرت

- فلوس قصدج

- برأيك اكو غير شي اكسبه

- ليش منهزمتي قبلها

- مكدرت وخفت

عقد حاجبه بغضب - لا مو مكدرتي مكيفتلها للسالفه سمعتي ثكال وفلوس كيفتي ولو غير هالحجي جان ماعرضتي نفسج للخطر حتى تحتفظين بالطفل

- شتقصد

- انتي وحده بايعه نفسها للفلوس
عادي تجيبن طفل للدنيا بلا اصل ولافصل
بالج حيشوف الحجي حفيدو ويرق كلبو يكلج ارجعي اسويج مرت ابني

- مو من حقي ابنه اعتدى عليه مو من حقي

- مافكرتي يقتلج وابنج يبيعو اعضاء مافكرتي
لو همج فلوسهم
لو عاجبج جو الاجرام هذا

- ضيقت عيني
تحجي وكأنك مو واحد منهم

- عاف النركيله وكام
كال وهو ماشي بغضب  وحده رخيصه بايعه نفسها لهذا وهذاك علمود جم فلس 

باوعت ردة فعله فاجأتني احسه كدامي لغز مجاي اعرف افسره
لو باقي على سكوته افضل

طلع ملابسه وراح للحمام يسبح شويه وطلع مبدل وينشف بشعره متجاهلني

-  جو الاجرام هه
يعني انت مو مجرم حالك حالهم

- باوعلي ورد كمل تنشيف بشعره مارد

- غوركت عيوني وكملت احجي وي نفسي بس بصوت بحيث يسمع هو عيني على الزرع

اسوي اي شي علمود اطلع منا
امنيتي الكه اختي اشوفها وين عايشه واعيش وياها واخلص
لاتتوقع فرحانه اصير لهذا ولهذاك بس يمكن اذا سلكت هذا الدرب اطلع منه بشي على الاقل اتزوج

باوعلي صفح ابتسم استهزء
ورد التفت ينفخ على الفحم مال النركيله يعمرها من جديد

انت ليش مخليني هنا لشوكت حبقه

مارد

- شنو حتستفاد من بقيتي هنا

- مارد

- من احاجيك جاوبنييييي احجي وي الحايط اني

- نتر
شتردييييييين

- كلي ليش مبقيني هنا

- غمز وكال
برأيج ليش

-  بهذا حالي؟

- تصيرين زينه واصفي حسابي وياج

- وبعدين

- بعدين ( نفخ دخان النركيله فوك وكال بعدين 
ديكمل دك تليفونه
باوع على الشاشه وباوعلي
كام بسرعه وراح بعيد شويه يحجي على كيف ماينسمع الصوت رغم كبالي هو
يحجي بالتليفون ويباوعلي شويه ويرد يحجي بالتليفون ويهز براسه بمعنى اي شويه وسده واجه كعد رجع يشرب نركيله

- منو خابرك

- مارد

- منو حاجاك ليش كمت منا

- وانتي شعليج شنو مرتي

- باقيه وياك غير اعرف

- ميخصج

- الحجي جان يحاجيك

- لمن تعرفين بطلي تسألين

-  تاليتي شنو حترجعني اله لو شنو

- مارد ينفخ بالدخان فوك يتلهى احس بي

- احجي وياك

- رد برود
منتبها على نفسج شكد تحجين

- گولي لشوكت حبقه هنا

- حسب مزاجي

- هزيت براسي بمعنى اي
بكلبي اكول
خيصير بيه حيل واني اعلمك

نهضت حتى اكوم كام هو كال بهدوء

حترحين للغرفه

- اي

- لزمني من ايدي واني استند عليه اخاف لااوكع
مشيت ورحت جوه مددت
غطاني وطلع بره

بقيت اتصفن حسبه توديني وحسبه تجيبني قررت انهزم وهالمره خارج المنطقه اروح لاي مكان لازم انهزم...........

سديم ....

جانت رباب تحس بلذة الانتقام والانتصار اما هنده ف الخوف والتوتر يقره عدها الف معرفنه عواقب هذا التصرف شنو
الي جان يطمنه كلام رباب

- وهو شدراه احنه وره السالفه تعارك وي ولد وكتلوه احنه ياهو مالتنه

- واذا الولد حجو

- ميحجون وحتى لو حجو شنو دليلهم علينه

سديم - امجد ( حبيب هند)  مباشرة يتهمنه ويكول هنه

رباب- حلووووو يكول هنه زين مراح يسألو ليش تتدعي هم

سديم: • هااا
خرب
لج انتي شنووووووووووو
نطيني عقلج ابوسه

- ههههههه هاي حتى تشوفين عقل حبيبتي عقللللل

هنده- خايفه اني

رباب _ اهم شي انتي تخافين هو اني اريدج تخافين

- راح تورطينه رباب

رباب:- لا اورطج ولاشي هو حيبقه مخلي سلايه بحلكه ميكدر لايبلعها ولايذبها
اذا حيكول هنده حيكولوله ليش تتبله عليها
شيكلهم
يكلهم جانت عندي علاقه بيها وتركتها
ساعتها حتكلين هو اقام علاقه غير شرعيه وتركني
هنا هو راح يعاقب حسب القانون
وينسجن فوك مامكسر
فالافضل يسكت وميحجي شي وميبتلي
وداعتج يبليهم وهم يطابشون بيناتهم

- زين واذا الشباب معافونه وكالو انتو غدرتو بينه

- ميكولون تعرفين ليش

- ليش

- لان حيرحون بتهمة رشوه واعتداء على الناس
هنا هم هم ينسجنون بدال مايطلعون بكفاله وتفض السالفه
فيفضل السكوت هنا ياعزيزتي

- انتي منيلج هالمعلومات اليسمعج يكول جنتي قاضي تحقيق

-  هه قابل مثلجن ملتهيه بالحب والغراميات العطله التهي بهاي السوالف معلومات عامه

- هنده:- الله يعديها على خير

- ان شاء الله

جانت رباب تمتلك طاقه ايجابيه محفزه حماسيه
بحيث تهون عليك اكبر مصيبه
بالف رجال ويمكن الرجال مايوصل لربع تفكيرها ونضوجها وعقلها
بحيث بالاوقات الصعبه كلها تلتجأالها
جميل الانسان لما يكون عقله اقوى من قلبه وعواطفه يكون اكثر نضوج وحكمه
توجهت للشركه قبل لايوصل ادم
كعدت اشتغل على الحاسبه شويه واجه ادم

- مساء الورد

- اهلا استاذ مساء النور

فات لمكتبه واني رجعت لشغلي ساعه اكثر اجت
مره كانت سافره بدون حجاب بشعرها الاصفر الطويل الي يغطي ضهرها بشكل مرتب وكأنه قطعة قماش حرير عيونها كبار خضر وبيضه بياض الثلج
لابسه بنطلون وتيشيرت ربع ردن كانت مخليه ميك اب بشكل واضح جدا بحيث بارزها جمال اكثر
اني بنت استحيت من شفتها
اجت مباشرة تدخل مكتب ادم كمت مباشرة وكفت بوجهها امام باب المكتب

- تفضلي وين رايحه

- اروح لادم

- اكعدي انطي خبر ميصير تفوتين هيج عليه

- انتي الضاهر جديده هنا
حبيبتي عادي ادومي ناطيني الكارت الاخضر شوكت ميعجبني اجي

- وان كان لازم اكله

- نترت:  انتي شنو متفتهمين داكلج اني وادم واحد وخري يله شلون شكولات

- متحترمين نفسج شنو التجاوز

- صارت تدك بالباب
وادم مباشرة فتح الباب

- شبيكم شكو

- شوف موضفينك ادم شنو هالمهازل متخليني افوت

- جديد تشتغل يمي متعرفج

- فوتها وفات وياها وقفل الباب بالقفل واني واكفه حتى مابرر شي
حز بداخلي هالتصرف كعدت على الكرسي مااحجي شي

كملت شغلي من سكوت وبقيت كاعده انتظر وقت انتهاء الدوام
مرت اكثر من ساعه بعدها طلعت البنيه شويه ورن جرس من داخل مكتب ادم الي بمعناها يريدني
توجهت للمكتب

- تكلمت من دون مااباوعله عيني جانت بالكاع
تفضل؟

- هذه البنيه من تجي عادي خليها تفوت الا بحاله وحده من احد يمي لاتخليها

- اوك

- خلصتي شغلج

-  اي

- باوع للساعه
مابقه شي ويخلص دوامج

-  اوك

- تكدرين ترحين لمكتبج

- اوك

- جنت بس اريد انهي الكلام واروح من يمه قرفته نفسي بلحضتها وضجت حيل منه
شتقربله؟ 
هذا مايجوز من سوالفه 
بقيت كاعده لحد ماخلص الدوام وطلعت بعد ماهو طلع
رجعت للشقه لكيت هند ورباب مشغلين فلم ومطفين اضوية الغرفه مسويها ضلمه ومخليات راس براس يكرزن حب ويتفرجن

- مرحبا  وفتحت الضوه

- اشششش دنسمع وطفي الضوه

- شبيكم اريد ابدل

- يلا بسرعه

- بدلت وكعدت يمهم اشوف شنو يتفرجون
جان الفلم لعادل امام وهو متسول
يتفرجون وهدوء شويه وصارت بالفلم عركه لما عادل امام اعترض على كذبهم ولان يجدون
كانت عركه تصحبها كوميديها بكلمة ( سيبوه)  لينهبها عادل امام بكلمة سبوهم... سبوهم...  ويغمى عليه
رغم انه الفلم كان يتكلم عن التسول المر لكن الكاتب او المخرج اضاف الكوميديا الها
لكن اوصل معنى واحد وهو الكذب وشلون اكو ناس نفسها مريضه بحيث تستغل المستضعفين  وتخليهم يتسولون الافلام والمسلسلات والقصص لاتخلو من الحب عادل امام يعجب بفتاة يقابلها بمطعم ويضم عنها شغله الحقيقي وهنا يبقى متحير شلون يواجهها

- رباب  -  بله هسه شتكول من تعرفه مكدي ههههه تخيلي تحبين واحد يبيع مثاليات عليج وبالاخير يطلع مكدي

هند:- دااطم روحي يمه

- رباب:- بس يجوز يطلع رجال مو مثل حبيبج الشهم

هند:- الرجال ميبيع مي وجها وهو كلشي مابي

- رباب:- هه عيع شكد صرت اكره الزلم خاف جانت الي نيه اتزوج بسبب هذا حبيبج كرهته عفيه زلم لاتحبون نسوانكم ولاتزوجون الي تحبوها

- يعني هو هسه ميحب مرته

- لايعشقها ولايكرها مرته بعد عزيزه عليه

- اي واني هسه فلس مااسوه عنده

- سدي لهذا الموضوع اترجاج خل نتفرج

- سديم اتفرج وياهم بس بالي كل شويه يتذكر بموقف اليوم لحد ماكلمت البنات وكتلهم
.

- تدرون بنات اليوم صار موقف ماعرفت شفسره

- شنو شصاير

- اليوم ادم اجته وحده للمكتب وطبت ماطلعت غير وره ساعه ونص تقريبا

- دكت على صدرها رباب
عززه شتصير منه هاي

- ماعرفها حسب معلوماتي هو مامتزوح واهله مسافرين

-  زين وشكلها حالها البنيه شونه

- البنيه
شنو اناقه شنو جمال ولبس وهو من شافها نضرب على راسه ماعرف شنو صار بي مباشرة فوتها وقفل الباب

- شوفي حبيبتي
هذا معروف شنو ديربالج منه

-  يمكن لان اعرف شي عنه بالسابق هيج مابرر ولااهتم

- شتعرفين؟

- هم جان عنده علاقه سابقه وعرفتها عن طريق بنت عمته جنت اشتغل وياها

- لهسبب اكلج احذري لايخليج براسه

- والله متعرفيني لعد

- هاي النماذج مخيفه متعبه نرجسيه وماتحب الا نفسها

- اني حدي ويا على كد الشغل

- عشاء بزنسز وشغل غده وهالسوالف ديربالج

- لا اصلا حتى من يتصل رسميه ويا كلش بعدين هو ولامخليني باله معوده شجابني على الحلوات الي يعرفهن

- حلوات باللبس والمكياج عدسات وصبغ ليش متطلع حلوه سوي مثلهن وشوفي شتطلعين

-  بس مكيف عليهن

- لان يحسنون مزاجه

- مره كلي اهتمي بلبسج بالشغل اني زعلت طلع عنده حق

- لاتلبسين شي عادي دائما تأنقي
بعدين اني وهنده على طول نتبادل بالملابس ونلبس انتي هم شاركي ويانه نلبس سويه بهيج حاله بجامعتج يوميه لبس شكل او جنطه شكل وبشغلج هم
وحتى لو ماكو اي توادد او اعجاب بيناتكم بس الاناقه واحترام مطلوب هو من يشوف كشختج واناقتج يحترمج غصبا عليه

- حقج تحجين مشفتي الي عنده اكلج اني خجلت

- لان متتأنقين ومحمله طاقه فوك طاقتج داىما خلي ميك اب خفيف ابرز ملامح وجهي

- لا حرام ميجوز

- لعد شلون جنتي تشتغلين بصالون

- بس مجنت اخلي بالشارع

-  بس بالشغل مطلوب بعدين حواجبج حفيهن وجهج رتبي شكلج عفوي وطفولي والله انتي حلوه بس هاملتها لهاي الخلقه الحلوه الي الله نطاها الج

- مرت خالي تكول عيب البنيه تحف بعدني متزوجت

- وهي وينها مرت خالج بعدين انتي كبرتي طالبه جامعيه وهالامور مالها علاقه حفيفه او شي طبيعي لبس مرتب مالها علاقه انتي بنيه
اصلا عيب وجهج متروس شعر هاي نظافه حبيبتي

- هو صحيح بس استحي

- شو دسكتي تستحي والله اشو اليوم الا احفلج

- لا رباب شتحجين

- خل اجيب الخيط والملقط واني اعلمج
راحت جابت خيط وملقط وكعدت كبالي صارت تحفلي جان وجهي يوجعني اول مره احف حسيت نار وجهي صار وهي تحفلي شالت حواجبي بالملقط
ورتبتهن من باوعت على وجهي بالمرايه جني وحده ثانيه جان وردي من اثر الخيط والحفيفه حواجبي مرتبات تخبل ابتسمت بالمرايه حسيت اكتمال بثقتي بنفسي جنت اتمنه بس استحي

- ها شلونج هسه

- عاشت ايدج

- باجر ارتبج زين وهسه تشوفين  اذا تجي وحده حتهتمين وتكلين خجلت لو لا

- يمعوده اتشاقه شبيج

- لا سديم مو شقه انتي تكابرين بس كل بنيه يعجبها تكون جميله وهالشي انتي بنفسج هاملته مثل واحد يعلم الصلاه وميصلي تجملين بالناس بس نسيتي نفسج

-جريت نفس شسوي

- سهله وداعتجن جايتجن وحده وحده انتي وهنده النايحه

- هههههههههه حلوه هاي هنده النايحه

- ليل نهار تبجي ذبحتني

- شتسوي

- يله دنامي ورانه كعده الصبح

باليوم الثاني قبل لااروح للشركه نطتني رباب لبس منها جان قميص طويل وردي وبنطرون جينز نسقتلي ويا شال نيلي ساده وجنطه والحذاء اسود لون واحد لبستهن وكالت الا تخلين مكياج خفيف
وبحكم اني اعرف رتبت نفسي بميك اب خفيف بحيث برز عيوني كبار بالكحل وردي خدود حمره ورديه خفيفه وماسكارا من باوعت لنفسي جميله هواي خجلت وردت امسحه بس رباب ماخلتني

- ولج تخبلين شتحجين انتي

- استحي رباب والله استحي

- لج هذا واحد مغرور وشايف روحه ابد لاتنطي مجال يشوف نفسه عليج هيج شخصايت اعرف شلون تعامليهم

- يعني شسوي

- اتصرفي اعتيادي وكلما تكونين رسميه ويا ومتباعيله راح يتخبل نوبه عليج ف خليج رسميه هادىه شفافه

- بله وشعليه بي داتصرف هيج

- تبقين عوبه متصيرلج جاره خلقه بلا فهم بابا افتهمي حتى لو مو بينكم شي لتخلي يباوعلج بأقل من معارفه

- هففف نشوف تالي خططج

- انتو بس امشو وره خططي وتربحون دروحي عاد تأخرتي

- رحت للشركه جان بعده استاذ ادم مجاي
متوتره وكل شويه اباوع بالمرايه وعض شفتي خجل
مسحت الحمره متحملت استحيت يشوفني بس بقت شفتي ورديه اثر الحمره الممسوحه
شويه واجه ادم اني مباشرة وكفت ومدنكه وحجيت تفضل استاذ

دايمشي اباوع على رجله خطواته بعدين وكف كبالي بقيت مدنكه هو دنك يباوعلي ومن شفته دايباوعلي ابتسم بوجهي بعدين وكف عدل ورفع وجهي وجنت مغمضه فتحتها لعيوني ابتسم
جانت عيونه تتركز بتفاصيل ملامحي عيوني خشمي حلكي بعدين تكلم

- خجلانه؟  
واذا مامخليه مكياج كل البنات يخلن شنو انتي تختلفين حتى هيج خجلانه وتضمين بوجهج
عموما طالعه كمر
عافني وفات للمكتب

واني شنوووو نار احس تطلع من وجهي من خجلي تعركت وتوترت ايدي يصبن مي وكمت اهفي بالكلينكس

ااااخ منج رباااااااب اخخخخ

وكادت من فرط الهوى ان تسحرني بعيناها
تظن أنها لم تفعل شيء
لكنها قلبت حالي رأسا على عقب وكأنها قالت للجمال
تعال واستوطن في وجهي ومقلتاي وبعدي على الجمال العفا..........بقلمي رغد الموالي.......

مريم............

افكر انهزم بس وين اروح؟ 
حرجع لبهذلة الشوارع من جديد
زين شسوي
اصيرله مثل ميريد وابقه هنا 
خاف بعدين يغدر بيه ويسلمني للحجي
زين شلون شسوي
ماأأمن بي مستحيل
هذوله غداره وراح يغدر بيه اتغده بي قبل لايتعشه بيه انهزم واحمي نفسي لازم اخذ مسدسه زين شون وهو من ينام جوه راسه
اغوي؟ 
مبين نجر وراح يلكفها
زين شلون؟ 
من يسبح
اييي انتضره يدخل للحمام واخذه مستحيل حياخذه للحمام
مرت ٣ ايام صحتي تحسنت وصرت اكدر امشي بس هم تعب مو مال انهزم وهو يختفي مرات مو داىما بالمزرعه يطلع ويغيب بالساعات ويرجع
اجه جايب مسواك ومعلبات وخبز وفواكه
جنت كاعده يم الاشجار وشفته من دخل كل هذني
اجه كعد كبالي يباوعلي من جوه حاجبه ويرد يلتفت
ويرجع يباوعلي نفس النظره ويرجع يلتفت يلوب احس اكو شي يريد يكوله

شويه وكال ااااحم

باوعتله مارديت

  تكلم وجانت ملامحه تعبانه وعيونه تروح وترجع عليه
انه حروح كم يوم لتل الذهب

- مترجع؟ 

- كم يوم اغيب مااجي نهائيا الحجي بده يشك وابو غضب خلص حجج

- وليش كم يوم ليش مترجع شويه وتروح

- لو عرف انتي هنا مايرحمج

- بس اخاف وحدي

- من نهزمتي ماخفتي

- بنص الناس نهزمت مو البساتين لتعوفني اخاف

-مشكله مااكدر أأمن بيج جان نطيتج مسدس او موبايل

- انهزم ماابقه هنا لو عفتني

- اطلعي مااكلج ابقي بس المنطقه مليانه خنازير هنا وكلاب مسعوره حيايه هم اكو وانتي بقت يمج

- وتعوفني

- ماعندي غير حل

- اطلع وياك وصلني للمدينه وانت روح لتل الذهب

- مراقب افتهمي مااكدر

- لو مراقب جان لزمونه هسه

- مايكمشونه هنا بعدين وين اهدج هااااا وين الج كرايب اوديج عليهم عندج احد

- ماعرفهم

- خلص ابقي هنا وسكتي
طلع سجينه من جيبه نطانيها الي
هاج هذه لو احد تعرضلج تنشنين  على المكان الي تردي تستقر السجينه وتضربين

- شلون يعني

- تنهد التفت وراح وكف كبال شجرة الموز
كال
انتبهي عليه باوعي
صار يباوع بتركيز على شجرة الموز ورماها للسجين نبتت بالساق مال الموز

- شوفي هيج

- هزيت براسي بمعنى اي وهو باوعلي بمنونيه

يله حروح انه
جبتلج مسواك شوفي خاف ناسي شي او تحتاجين شي ثاني

- رحت باوعت
شكرا مااحتاج شي بعد

- انتبهي لنفسج
صعد على الدراجه ولف اليشماغ على وجها طلعت بس عيونه وحرك الدراجه وطلع

حسيت شي وياه اخذه وراح ماعرف يمكن احساس الامان

سديت الباب وراه وفتت جوه عزلت المسواك خليته بثلاجه جان جايب ثلاجه صغيره وسويت اكل وكعدت اكل واحجي وي روحي

- يعني اني حكضيها هنا وحدي فوكاها اي بشر ماكو
جريت نفس بعدين تذكرت كلام ام مازن لما كالت الله موجود بكل مكان وزمان
شوكت مانخاف نلكاه هو موجود شوكت مانختنك نشكيله يسمعنه ومايمل من عدنه ولايفضح اسرارنه ويساعدنه وما يحسسنه بهذا الشي
باوعت للسماء تمنيت لحضتها اتذكر شلون الصلاة واصليها نسيتها بس جانت تسجد وتكول
سبحانك ياعظيم ياقدوس ياكريم
اسجد اليك طاعة وحبا ف اجعلني من الساجدين الحامدين

سجدت وكلتها لهذه الكلمات.......

اول ليله جانت مخيفه الي خصوصا واني اسمع صوت الكلاب سديت الباب وخليت وراها كرسي ماعرف شنو دوره بس هيج خليته من دواعي الامان
وكلسع افتح السجينه وادقق النظر بيها
جانت السجين عاديه بس الحافضه مالتها
عليها زخرفه ونقوش وجان عليها حروف معرفت شنو هاي الحروف بس حلوه عجبتني كلش
خليت السجين جوه مخدتي ومددت بس الخوف داب بكلبي
نوبه طفت الكهرباء لو روحي ماعت احسها
غمضت قوي مااريد اشوف شي
سمعت صوت بداخل المزرعه شي وكع
خرطت من خوفي
ياهليله الي مراح تعدي
مر وقت طويل ماعرف شكد
سلطان النوم غلب عليه وحسيت بنعاس قوي
مددت وغفيت
وكعدت جانت الدنيا صبح وصوت عصافير

كمت طلعت بره تنفست بعمق
طلعت غسلت وجهي باوعت الشمس عاليه مو مال غبشه او بداية صبح يمكن صار الضحى
سويت لفة جبن وكعدت بره اكلها
وهيج عدت يومين وليلتين نهاري اعيشه براحه وليلي برعب
باايوم الثالث جنت كاعده بالمزرعه ودكت باب المزرعه
استغربت ضرغام مايدكها زين ارد لو لا. خاف احد يختبرني زين شسوي........

رغم خوفي منك الا انك وسط الغربة امان
معكم رغد الموالي في امان الله

اعزاىي من انزل صورة المجموعه الخاصه برواياتي واكول انضمو الغايه منها تعرفون شوكت انشر تحت اي ضرف انوه وانزل منشور اذا مااكدر انشر