رواية تل الذهب الفصل السادس عشر 16 - بقلم Raghad Almoualy

               تـــــــــل الذهــــــــــب
كفي عن الترقب
كفي عن استجوابي
كفي عن قلبي
لاتقتربي
لاتقتربي يامريمي......
ـــــــــــــــــــــــــــــــــــــــــــــــــــــــــــــــ

مريم.......

ترددت بين ارد او لا وكفت متحيره شسوي
شويه وصاح من وره الباب

..  انه من طرف الضرغام دزاني عليج اذا ماتردين راح اعبر اجيت اشوفج واطمن عليج وارد

- جاوبت بتلكأ..  انت ممنو..

- كتلج من طرف الضرغام كالي شوفها اذا محتاجه شي هو مايرد هالايام طلعته مطوله

- ليش وين راح

- شغل انتي محتاجه شي

- لا بس كله اني خايفه ومااريد ابقه وحدي

- تامرين بعد شي ثاني

- لا

- هذ هوا...... اودعانكم

وين راااااااح وييييييين
شعنده
لو بس اعرف
ااااخ
بقيت الوب حايره ماعرف شسوي

تمشيت شفت الحصان مالته جان رابطه وره البنايه
تذكرت يمكن صوت مال هذيج الليله هو صدرها وخفت هيج
اي يمكن

جان مخلص مي ترست النجانه مي وخليتها كدامه
وجبت حشيش وخليته كدامه وكفت يمه
حصان حلو كلش ابيض وشعره كثيف نازل منه تحسه شعر بنيه طويل نضيف مبين معتني بي الضرغام يمكن يحبه وهيج مهتم بي
ردت اصعد بس عالي جان مكدرت وبنفس الوقت وضعي مو مال اجازف اكتفيت بالوكفه يمه
وصرت اسولفله
واسأله

- انت تعرف الضرغام؟
من شوكت تعرفه
زين هاي مزرعه مالته وانت هم راجع اله لو ماخذها خاوه
يمكن معتدي على فلاح مسكين كاتله وماخذ بستانه
يمكن مهدده ميوصل لهنا

انت هنا وحدك واني هم وحدي
انت تخاف؟
لا مااعتقد تخاف يمك حيوانات اما اني لو اكو ناس جان ماخفت

باوعت على روحي شنو جاي احجي هاي شبيه
استسلمت لقدري وكلت ابقه هنا اشوف مصيري وتاليتي

مرت الايام جنت نايمه حسيت على دكت باب الغرفه
باوعت ضلمه ليل بس ضوه بلاجكتور من بره داخل من شباك شويه ناطي ضوه للغرفه

خفت حيل ندكت الباب
جمدت هاي منو الوقت مبين متأخر

ندكت وياها همس اني الضرغام مريم فتحي الباب

- حسيت امان ونزل فجأه كمت على الباب فتحتها بلهفه باوعته هو رغم جان مقنع بس من طوله جسمه صوته عرفته
كمزت حضنته وهو بقه متحجر بمكانه ماصدرت منه اي ردة فعل

- هاي وين جنت وين رحت ليش عفتني

وخرت عنه وهو فات للغرفه فتح الضوه ونزع القناع

- اجيت اشوفج شلون صرتي واروح

- ليش
ليش تروح

- مااكدر ابقه لازم اروح

- عرف شي الحجي

-  ايدو  اليمنه  انه هسه

- ليش
شنو الي صار

- اكلج
هم لمنو تابعين الحجي لصالح منو يشتغل؟

- ماادري

- زين ولدو ليش ميشغلهم ويا

- كل الي عرفته يخاف عليهم ميدخلهم بهذا الشغل

- منين يستلمون بضاعتهم

- من تجار ليو يعرفهم والولد مره حجالي ليو كال تجار يونانيين ماعرف منين

- ليو هذا الولد الناعم الصغير

- اي

- شنو علاقتج بي

- ولا شي

- وبقية الولد

- ماعندي شي وياهم

- ولو ممصدكج بس يله

- براحتك

- حروح انه هاي جبتلج شغلات الج كلت خاف تحتاجيها ومسواك هم

- هزيت براسي نعم وهو كام ولبس القناع توجه دايطلع

- حتطلع

- اي

- زين واني شلون

- ابقي هنا وين اوديج

- لشوكت

- منزعجه؟

- اريد استقر تعبت

- باوعلي بنظره طول بيها بعدين هز براسه كال سهله سهله اروح انه
ديربالج على نفسج

- بعدها صعد دراجته وطلع وسديت الباب وراه
صرت ابجي ماعرف شنو من احساس يجيني كلما اشوفه
اول مره هيج الكه اهتمام
افتقدته هواي لمن راح وغاب عني ايام
تمنيت اكله ابقه لاتروح بس معذور
فتحت العلاكه اشوف شنو جايب جان جايب شغللت تخص البنات وجبس ونساتل وعصائر اتبسمت لمن شفتها اني يمكن مره وحده بحياتي اكلت جبس وماتذكر قبل كم سنه
بقيت بهذه المزرعه انتظر النهايه لحد وين حتصفى
تعودت عليها صرت انضف واشتغل بالمزرعه
مرات اكعد يم الحصان اسولف رغم هو حيوان ومايفهم بس اريد احد يمي مامتعوده هيج
جان وكت الكوجه والتفاح الاخضر الصغير
والمزرعه مليانه بهذه الاشجار جنت اخذ شويه واجيب ملح واكعد اكل

حتى نفسي صرت اهتم بيها
احف وجهي لو انظف اسناني بالفحم مال نركيله
جانت اكو شجرة جوزه بس ماشايله ورقها يلون الشفه من اخليهن تصير شفايفي ورديات

شفت نخله كلها سعف جبت سجين وصرت اكص بي
نخله نوعها جان يسمو المتقزم تصير كصيره وتشيل تمر وطيب طعمه
خليتهن كم يوم يبسن السعف وصرت احوك بالسعف
سويت حصيره بيها وسله ومكنسه
تعلمت هذه الحرفه من بدريه جانت تسوي هالاشياء

حبيت العيشه بالمزرعه لكن قلقي من  الضرغام رغم  ما اذاني بس متخوفه منه
خوفتني مساعدته الي
جنت متوقعه لو عاش راح ينتقم مني
بس الي سواه العكس
وهالشي زاد قلقي وخوفي

ليش؟  وعلى شنو ناوي.... 
ليش ساعدني؟ 

هم لايعرفون رحمه ولاشفقه اساسا الضرغام سمعت عنه هواي قبل من جان وي الحوت مجرم سفاح

وهواي كتل ناس وفجر هواي شنو الي يخلي ميسويلي شي

معقوله لان غرضه مني ياخذه

معقوله حيجرم بطريقه ثانيه

ناويلي شي

اي
اكيد

مستحيل يعدي ضربتي اله هيج مستحيل

زين شسوي

لو نهزمت ماعرف وين اروح

زين ارجع لتل الذهب واسلم روحي للحجي

لو شافني يمكن يسويني للقطاع كله ويمكن يشغلني وي البنات
يمكن يكتلني كبل

شلون

شسوي

بقيت متحيره مرت ايام واني الف فكره اجت براسي
من راح الضرغام زاد خوفي منه وتحسباتي وبديت افكر هواي خصوصا واني اشوف روحي زينه
طول الضرغام هواي
سبوعين من يوم الي راح لليوم
بعدها جنت كاعده بالمزرعه سمعت صوت دراجه فز كلبي ويا الصوت وكفت الدراجه يم الباب شويه ونفتحت من اباوع الضرغام وجان مقنع بس عيونه طالعه من كمت وابتسمت هو نزع القناع
وابتسم

اجه تقدم بخطوات ثابته

- شلونج

- طولت وين هالغيبه

- جر نفس وباوع للزرع كال شغل

- هزيت براسي بمعنى اي وسكتت

تكلم هو

شلون صرتي

- نخطف لوني وي هالسؤال...  ليش

- تحتاجين اوديج لدكتوره

- لا

- هز راسه بمعنى اي وكعد على بلوكه

- تاكل

- باوعلي مغمض عين وحده من الشمس
ليش تعرفين تسوين اكل

- لا بس هالاعرفله

- اذا عندج جيبي ماجبت وياي شي جانو لاحكيني

- فزيت  منو

- ناس وتيهتهم واجيت

- الحجي
خاف الحجي يدور عليه

- كتلج تيهتهم

- باوعت عليه مثل الي اريد التمس امان بس ماكو خايفه وهو متوتر بس ساكت

كمت للمطبخ سويت جاي وجبت جبن وخبز واجيت جان صبح

- هاي لهسه عندج اكل

- جبت هواي انت وبس اني

- عبالي تشاقين من كلتي اسوي اكل

- لا

-جان جوعان كعد اكل وره ماكمل اكل تذكر بالحصان

فز
المهره
سمسمه اهتميتي بيها لو لا وينها كام وراح يركض عليها كتله

لتخاف مابيها شي

شافها وكف وتنهد
باوعلي ابتسم

عاشت ايدج

- اسمها سمسمه

- اي
عزيزه عليه هواي

- شفتها جوعانه وعطشانه صرت اهتم بيها اني عبالي حصان

- لا مهره هاي سمسمتي اول مره هيج تروح عن بالي

- دوختها لسمسمتك شكد خرطتلها

- حتى سمسمه ماخلصت منج
دوختيها هم

- شسوي وي منو اسولف

- هم صح

- جنت يم الحجي؟ 

- اي
اكلج الحجي كل معلوماتج عنو شنو

- كتلك قبل
هو مايدري احد

- الحوت سولفلي عليه وكال خطير جان هو يتحذر منو

- انت هم مو قليل شر

- بعدج مشفتي شي

- شتقصد

- مااقصد شي    ولتخافين
ادريج خايفه
انه ماطلع عضلاتي على مره
هه
لا ويامره
مخطوفه بالصغر وباقيه لا ام ولااهل

- شمدريك

- ابو غضب سولفلي لو نسيتي

- شفت ليو

- اي

- شلونه

- شلونو..  ليو يشم

- لا مايشم

- بالجديد يمكن مهم شفتو يشم يخبط وي النركيله ويشم

- وانت

- بس المنكر هه

- يعني شنو

- يعني اكثر بشرب الماي

- هاا

- اروح اسبح

- صاير تحجي وتكول شحتسوي

- ردني وهو يمشي متوجه للغرفه ياخذ ملابس
من عاشر القوم...

- اخذ ملابسه وطب للحمام يسبح

من فتت وراه للغرفه شفته مخلي مسدس وبطاقه وسبحه شكلها غريب وعليه كتابات ماعرفها شنو
شلت المسدس ودست على الزناد ضربت طلقه بالحايط واني رجعت لوره وساده اذني من الصوت
اجه هو لاف المنشفه عليه متلهف
شافني بهذا الوضع

همس

خو ماتأذيتي

- لا

اخذ المسدس والبطاقه والسبحه وراح
شويه واجه لابس

- شجابج يمو

- مادري دست عبالي ممسحوب

- ليش

- ردت اجرب

- جربتي هسه

- سكتت

- بعدين ليش خايفه

- تفززت

- تعالي لعندي

- اجيت يمه وكفت
سحبني من ايدي وحضني

لتخافين تره مبين عليج اول ماشفتج
وجهج لونو مخطوف ومصفر باين ماتاكلين زين والاكل زايد عدج
ليش هيج

اني ساكته اول مره احس بدفىء مشاعر واحساس غريب وحلو جانت هاي الثواني اتمناها تطول والزمن يتوقف لهذه اللحضه اول مره يغمرني هيج

خفتي بهذه الكم يوم الي عفتج بيها؟

اي

- شدعوه
الي يخاف يخاف من البشر مو من حيوان او شي ثاني

- خايفه منك

- ليش

- وخرت عنه

باوعتله بعتب
شناويلي

- هز براسه بالرفض
ولا شي

- ليش خافيني من الحجي وجماعته

- باوع بعيوني متحير احسه ماعنده جواب

- سكوتك هذا الي دايخليني اخاف

- ضيق عينه وسألني
مريم اريد اسألج وجاوبيني بصراحه

- اسأل

- لمنو تابعه جنتي بالحي

- ولا واحد

- ابو غضب؟

- لا ابد

- ليش ابو غضب يعرف تفاصيل عنج

- مثل شنو

- مخطوفه وعندج اخت وربيتي وياهم

- مااتذكر منو الي خطفني جنت صغيره
بس هم يعرفون ويعرفون عنوان اختي يدرون بكلشي

- ليش ماجربتي تنهزمين كل هالفتره منهم

- وين اروح مااندل اختي
بعدين جنت مستقره وي بدريه والجهال
الجهال
صدك الجهال شخبارهم

- يتاجرون بس بالولد مو؟

اي

- والبنات للملاهي مو؟

- اي

- شعجب خلاج انتي بنات حلوات هواي شفت تابعات للحجي بالملهه

- ماادري
هو انت رحت للملهه

- اي كل يوم تقريبا جنت اروح

- وتكلي شغل

- طول النهار نشتغل وبالليل نروح نحسن مزاج انه والولد ونص الليل تجي مرات بضاعه لو شغل خاص

-جنت اشوفهم من يجيبون بضاعه بنص الليل وكت ما الكل نايم اتفرج مره من المرات شافني الحجي وعاقبني
جواني هنا برجلي
وطلعت اثر الجويه جان مكانها مشوه شافها كشت روحه كال وهو رافع حاجبه ثنينهن مستغرب

معقوله
لان شفتيهم

- اي

- شكبرج جنتي

- طفله صغيره
جنت فضوليه واحب اعرف شنو يجيبون خصوصا واني اباوع لصناديك التفاح تنزل وي البضاعه جان يعجبني اكل بس مااتجرأ اخذ
تجي وتروح تنباع بالسوك
اكو تفاح يسمو خاص هذا التفاح يخلون عليه علامه

- ليش

- يصير محقون بماده مخدره
يعني مخدرات ويوزعوها لطلاب المدارس هذوله الكبار يسموهم عداد مادري عدي

- اعداديه

- اي

- وهذوله لمن يتعودون عليها يكومون يبيعوها ويجي الطالب يشتري لان مجبور
لحد ما يكوم يشتري مخدرات ويدمن عليها

- معقوله ماكو رقابه صحيه تابع هيج متجولين ويبيعون

- ماادري

- مره شممني سلام ودخت تحارش بيه وره معافته دعاء

- سلام هذا الي صاير فيترجي بالقطاع

- اي

- تحارش بيه واني جنت مسلوبه القوه ماكدر اتحرك الا شويه ويعتدي عليه بس خلصني سعدي
وبوكتها تضاربو وصارت عركه وصلت للحجي ولمن عرف الحجي كال بعد متطلع البنيه يم بدريه تبقى

- جان اول واحد ابن الحجي؟

- اي

- وبعدها

- لا مصارت

- هز راسه بمعنى اي

الحجي منو ساندو

- مادري

- انتي مو جنتي وياهم

- علاقته بالحوت زينه شعجب متعرف

- نسجنت الحجي ماعرفو

- شكد بقيت بالسجن

-  تلاث سنوات

- ليش

-  هواي سوالف مسجله عليه اخر وحده جنت شايل سلاح بالسياره ولمن وصلت السيطره
ضربتها وطلعت  رمو عليه ولحكوني واستلموني ضرب على السياره لحد ماكعدو التايرات ولزموني
انه اصلا جنت مطلوب تفجير تهريب خطف
فلتمت

- تقتل؟

- برأيج ايدو اليمنه للحوت ميقتل

- جنت تعذبهم يله تقتلهم لو كبل قتل

- ضيق عينه وجر اخر نفس من الجكاره
شمرها بالكاع وداسها
ليش هالسؤال

- مثل الحجي؟

- مرات
حسب
مرات اعذب يله اقتل ومرات قتل مباشرة

- الحجي يستلمهم تعذيب
مره ابو غضب لزم طلاب خطيه شسوه بيهم
يايمـــــــــــــــه عينك لاشافت

- شسوه

- جلدهم ضرب بحيث صارو يصرخون صراخ النسوان وكتل واحد منهم
الحجي بوكتها تعارك ويا وطرده

- اي حجالي بهذه

- جان ابو غضب قريب من الحجي وكلشي يعرف عنه

- غريب ولا كلي

- هو ميكول لان الحجي حرك الكارت مالته

- علمود الطلاب

- مو بس الطلاب ابو غضب قتل واحد من زلم الحجي لان مصورهم وتعاركو وقتله ابو غضب

-  اي مانع عنهم التصوير الحجي

- لان يخافون لا الفيديوهات توكع بيد الشرطه

- حقه معذور
الحوت هم مجان يقبل احد يصور

- من شوكت وي الحوت انت

- من زمان ربيت وكبرت على ايد الحوت

- ليش اهلك وين

- اهلي ماعرفهم
كبرت وربيت على القسوه اساسا مستغرب من روحي شلون متعاطف وياج اول مره اسامح انسان يأذيني
كلها الولد تعرفني الي يطرني بريشه تعرفين شنو الريشه اندمو على اللحضه الي فكر يطرني بيها
حتى مزح مااتقبل
بس تدرين
احساس انك تسامح شخص حلو
فد شعور حلو

- كلما اباوع لوجهك جنت اكول مادري وين شايفتك لحد ماتذكرت اني شايفتك من قبل لما جنت بالشوارع نكدي

- فتح عينه بوسعها
شنو
وين شايفتني
شنو جنت لابس!!

- شبيك تخرعت وفزيت.. شفتك تتعارك

- عقد حاجبه مستغرب
شلون يعني

-  ماتذكر شنو جنت لابس بس اكيد قميص وبنطرون وتتعارك وي ابو سياره جنتو متداعمين يعني حادث بالشارع

- هااااااا هههههههه
اي
اتذكر
صار شـــــكد

- اي وشفتك شلون تتعارك وتريد تضرب ابو السياره وتدخلت الشرطه

- ضرب السياره هذا تعده عليه وكام يغلط ويتجاوز لو مابالشارع طلقه براسو واطيح حظو
بس شفعتلو الناس

- خطيه تلكاه عنده جهال

- الي عندو جهال يحترم نفسو انه مامجبور احسب حساب للي وراه اذ هو مامحسب
يعني يضرب السياره ويطيح حضها بعتها بخساره بوقتها والاخ هو المحترك

- تستخدم ال و هواي ليش ماتكول نفسه ليش نفسو

- وبشنو زاعجتج ست

-مازاعجتني بس احسك تقلد الرئيس السابق  نفس اللهجه

-  ههههههههههههههه ضحكتيني وماريد اضحك

- اي

- كل محافضه والها لهجتها
يولو.. دحكن.( تعالن) ... تزحكين ( تباوعين)...  انبار

قولو....  قالي( غالي)...  تقديت( تغديت)....  موصل

فريخات ( اطفال )...  تدني( دنك)....  جا...  سماوه بصره محافضات الجنوب

كاكا ( رجال) .....  به يان باش ( صباح الخير)  ...باشى.. شلونك

  عَجل....  كِعدن....  كركوك...  اطراف من صلاح الدين

كتلو....  جيبووو.... لعد....  صلاح الدين والموصل مناطق منها

جيبااا.... كتلاااا.... مناطق متفرقه بالعراق والاكثر في صلاح الدين

جيبيالي.....  وديالي.....  كاظميه... منطقه في بغداد

نطيته....  نفسها ... اطفال.... لعد......  بغداد وبعض مناطق صلاح الدين وكركوك وديالى 

مريم...  هاي شنو حافظ كل مناطق العراق ولهجاتها

- مغامراتي بالاجرام بعد ههههه

- اليوم حلو تسولف طلع لسانك حلو متطربنه هيج على طول ليش ساكت

- اضوج احجي  بس اليوم ردت احد احجي ويا ضايج

- ليش

- ولا شي لاتهتمين

-هزيت براسي بمعنى اي سكتت ماحجيت شي

شويه وصار يتلفت يمنه يسره كال
راح اروح اجيب كم شغله واجي وين السويج يمكن هنا جان

- هسه اجيبه
رحت بسرعتي جبته واجيت نطيته اله اخذه وصعد بالدراجه وراح 

مرات استغرب منه ومن تصرفاته ساعه احسه قريب مني ساعه ولاكأنه يعرفني

رجع وره شويه جايب مسواك  طلع خياره وخلالها كومه ملح

هاي ستسوي بيها

- ضغطي هابط

- كعد ياكل خياره واني تذكرت لما مره كعدت تقرالي ام مازن جان اتذكر السوره الحمد

اجيت وكفت يم راسه هو جان كاعد وكفت وراه باوعلي ملتفت شبيج واكفه

- خليت ايدي على راسه وصرت اقراله

بسم الله الرحمن الرحيم

الحمد لله رب العالمين

الرحمن الرحيم

مالك يوم

ونسيت بقيت اردد مالك يوم

مالك يوم

جاوبني

مالك يوم الدين

مالك يوم الدين

نعبد ونستعين

جاوبني

إياك نعبد واياك نستعين

ورديتها وراه

اهدنا الصراط المستقيم
صراط الذين انعمت عليهم
وسكتت

كمل هو
ولا الضآلين

هه خوش حافضتها

- ام مازن حفضتلياها

- منو ام مازن هاي النوب

- لمن نهزمت كعدت عدهم فتره والمره طيبه وساعدتني هواي

- كام وكف على حيله وكأنه يريد يسمع

ايييي وليش طلعتي منهم لعد

- خافو من طلايب العشاير

نزل راسه متفهم
ورد رفعه من رجعت اكمل كلامي

- كالتلي طمنيني عليج من تستقرين
اتمنه اشوفها

- تندليهم وين

- اي

- اوديج لعد

- طريق تره

- ميهم

-صعدت بالسياره ورحنه سويه تقريب ساعه وصلنه
كتله بهذا الفرع

وداني لبيتهم

دكيت الباب وطلعت ام مازن فرحت هواي من شافتني

ياهلا بمريم
يمه نورتينا شلونج

- اني زينه شلونج حجيه

- بخير يمه بخير دام شفت هالعيون الحلوه بخير انه بخير

- كتيلي من استقر اجيج

- واستقريتي

- اي

- منو هذاك الواكف يمه عبالك ينتظرج

- باوعتله جان واكف بعيد شويه مخلي ايده بجيوبه ويحرك برجله بالحجاره مثل الطوبه

كتلها ولكعت عيوني لمن اكللهاعليه
هذا
هذا زوجي
اي
تزوجت اني

رفع راسه باوعلي
خفت معقوله سمعني

بس ابتسم لما شافني متبسمه واباوعله

تعالي فوتي يمه

- لا راح اروح

- مايصير الا تفوتين

- اذرلي ضرغام انه نروح مو مال نبقه

كتلها

خاله زوجي يريد يروح مستعجل غير مره

بوستها ورحت

صعدت يالسياره ومن فرحتي لما صعد ضرغام بالسياره حضنته وبسته من خده

اشكرك

- باوعلي متفاجأ من ردة فعلي بعدين باوع للطريق وحرك السياره ومشى.....

تركيبة هالانسان غريبه واول مره اشوف شخص شايل كل هذا الهدوء
فكرت اسايسه مبين عليه گلبه طيب يمكن يوصلني لاختي اكله ليش لا
يمكن القدر يخليني اعثر بأختي......

سديم.....

خلص دوام اليوم توجهت حتى اطلع سبقني ادم

ادم:- اوصلج؟

- لا مو بعيده الشقه

- ميخالف خل اوصلج

- لا مو لزوم والله لاتعب نفسك

- ماشايلج على ضهري

- سكتت

- يله امشي

- صعدت ويا بالسياره
مشى واحسه يريد يكول شي
وقف السياره امام الشقه وي مداانزل كال

- سديم لاتتأثرين بهذولي البنات الي يجوني مالج علاقه بيهن

- ليش بدر شي مني

- لا بس الي شفتي هذاك اليوم انسي تره علاقتي بيها بس مزاج

- واني شيخصني من كل هذا

- باوعلي متحير يدير بعينه
مو قصة ابرر او شي

- تبرر؟!!!! 

- عبس وجهه مثل الي واحد زلك بكلمه
لا لا
اقصد
انتي حسيتج نزعجتي يمكن البنيه مستفزه

- تنهدت هه وعلى شنو تستفزني

- ولاشي ورد
اخذي راحتج

- عفته ونزلت
ماعرف ليش كلمني هيج مشيت وافكر ليش يبرر ليش يحجي

احجي وي نفسي تلكتني على الدرج رباب نازله

- ها شبيج تدردمين وي روحج

- فزيت
رباب هه ولاشي

- امشي نروح نجيب كم شغله تره صار هواي مامتسوكين

- اوك

طلعنه للسوبر ماركت جان مو بعيد عن الشقه نمشي مسافه قصيره
سوبر ماركت جبير وكلشي بي
جبنه فواكه خضراوات وجبات عشاء ريوك منضفات ورجعنه للشقه
كوه شلنه العلاليك جانت هواي وبيها غراض هواي
بالطريق سولفنه

سديم:- اليوم يكلي لاتتأثرين بصديقاتي

رباب:- هه لازم انتبه على التغيير

سديم:- اول مافات تصوري

- لابشرفج

- والله

اي وشكلج بعد

- كلي
  الي شفتي هذاك اليوم انسي تره مزاج علاقتي ببها مو اكثر

- وليش يبررلج

-نفس السؤال سألته تصوري

- همممممم عرفت

- شعرفتي

- نوصل للشقه واذب هالثكل هذا واكلج
وصلنه الشقه خلينه المسواك وحضرنه عشه
جانت هنده ذابه روحها على الكتاب تدرس امتحاناتها قربت وهي بهذيج الفتره نفسيتها تعبانه
لكن بمرور الايام تحسنت وبدت تفكر شلون توكف على رجلها من جديد واول خطوه هي تكمل دراستها
وتنجح

كعدنه نتعشه جنه مسوين بيض وطماطه وبتيته وخضراوات

رباب:- تعالي هنده السجاجه اكلي شويه

هنده:- صنفي صنفي هي بقت عليج

- سديم:- لو مترفعين راسج من الكتاب لو متعترفين بي

- شسوي

- رباب:- اكلكم هذا المكسر طالع من المستشفى

- هنده:- يطبه طوب عساه لاكام

سديم- حقدتي عليه

- كلششششش

رباب:- هو اني ليش مااقبل احب من وراكم
تبدوها بغراميات وتنهوها مسلمتك بيد ابو فاضل

- هنده:- ااااااخ توبه توبه

رباب'- دعيديها ياهنده اذا مااكطع النعال على راسج

- توبه ابددددددد

دكومي كومي ناكل برد الاكل

- كمت متت جوع....

التمينه ضحك وسوالف
جانت لمتنه وشقانه تسوه الدنيا ومابيها
فعلا الصحبه تخفف عنك احزان هواي
هنده رغم حزنها بس الي مخفف عنها حزنها احنه
الانسان شكد مايكون قوي بس تمر عليه مصاعب بالحياة تخلي يكون ضعيف وخايف
خايف من المجهول
خايف من باجر
خايف من كلشي
ومحتاج شخص او اشخاص يسنده بهذه اللحضات
محتاج كلمه طيبه تسعد خاطره
وتفك ضيق صدره
وتطمن گلبه
مرات جنت اكول ليش القران هيج مريح للنفس
وللقلوب
بس من قريت الايه
ألا بذكر الله تطمئن القلوب
لان هذا كلام رب العالمين
تحس اكو من يصبرك على مر هذه الحياة وتعبها
من خلال وعد الله بالجنان والحياة الاخره الابديه
يواسيك من خلال قصص الانبياء
مثل ما انتم هسه تواسون نفسكم وتتعضون من هذه القصص الي تقروها حاليا........

مهلا بكسر الخواطر
فإن جبرها لايجبرُ
ومهلا بمخارج كلامك
فإن لسانك اذا ثُلِمَ يجرحُ
ورفقا بالقوارير ياآدم
فقد اوصى فيهن المصطفى الحبيبُ

كنت معكم انا رغد الموالي في امان الله....... 

تابعو اخر اخبار روايات رغدالموالي على مجموعتنا في الفيسبوك