اتل الذهب
رغد الموالي
°°°°°°°°°°°°°°°°°°°°°°°°°°°°°°°°°°°°°
꧂
سديم..... ماكان ينبغي منك كل ذلك الخذلان كل ذلك الالم وكل تلك الخيبه ف أنا حقاً احببتك...
قرار الانفصال صعب جدا صعب لما يكون بينك وبين الشخص الي تريد تنفصل عنه طفل
الزواج الي يكتمل بطفل مايبقه مجرد زواج وبس
ينتقل لمرحله ثانيه وهي العائله كلمة عائله عظيمه جدا عائله معناها بيت معناها ضحكه وجمعة اهل
عاىله معناها ملاذ من كلشي مخيف بالحياة
لما تنهد هذه العائله وتتشتت حتتفكك وياها هواي اشياء والي هي الاولاد وحياتهم ومستقبلهم
ب اختصار اولادناهم لانفسنا واخترنا حياتهم هم لاجل انفسنا
بس احيانا الحياة والضروف تجبرك تتخذ قرارات بعمرك ماكنت تتخيل انك تتخذها او ممكن كنت بيوم من الايام انت من المتعصبين منها لكن فجأه تلكه نفسك انت محاط بيها او تمارسها
ببساطه ماكو شخص بالدنيا بينا مايحب يعيش ومايحب يكون عنده فلوس ويسافر ويشتري اجمل واغلى الاشياء لكن مو كل انسان يكدر على هذه الامور
البعض يتعب ويشتغل حتى يوصللها والبعض يولد وبفمه ملعقة الذهب هذه بحيث كلشي متوفرله والبعض يخلي ايده على خده وينتظر شوكت يمتلك كل هذه الاشياء ولما مايحصل عليها يبدي يتذمر ويحارب الي وصلولها وحتى يعيب هذه الامور
وينتقص منها
الانسان بطبيعته متناقض يتكلم شيء اليوم وباجر يتكلم بشيء ثاني حسب الطبيعه والظروف
وحسب مايوالمه وتناسب الحياة الي هو عايش بيها
المثاليه...
هواي الي يتمنطق ويتكلم بالمثاليه لكن لما توگعه وتحاججه يبرز هذاك الانسان المتمدن المتناقض الي كان مختبىء خلف وجه بريء
الناس بطبيعتها متمدنه ومتمدنه يعني الي تحصل عليه اليوم تريد الاحسن منه باجر ولو شيء فائض عنده يفضل يحتفظ بيها ليوم غد بالرغم من ان غد يريد الافضل من هنا تنطلق تسمية الانسان المتمدن
اما التناقض ف الي سبق ذكرناه
اباوع بعيونها البريئه ولغتها الي مامفهومه لحد الان ولسانها الي مايعرف غير كلمة ماما وبابا
ضحكتها الي تزيلي كل تعب وكل حزن
مسكت بإيدها الصغيره وتلمستها بإبهام ايدي واني اهمسلها
... يروح الماما انتي يعمري انتي
اقبلها واني الخنكه محتبسه بصدري ياترى الى متى تبقه هيج ادم
او ممكن تكون فعلا كطعت علاقتك بيها لكن عقلي وقلبي مدايتقبل يمكن لان حبيتك فعلا متحملت فكرة وحده تساعدها وتعطف عليها
كلما اباوع لعيونها اتراجع وگلبي يعصرني خصوصا وادم متمسك بيه مااهون عليه تراجعت عن فكرة طلاكي لكن زعلي ثكيل من يمه كلش
بقيت ايام اني مااكلمه حاول يراضيني لكن كنت زعلانه عليه هواي
صرت انام بالغرفه الثانيه اني ولارين
بيوم اجه فتح الباب سويت نفسي نايمه
كعد يمي همس سديم
سديم
مارديت
... صار كم يوم تنامين وانتي زعلانه
مايهون عليه اخليج تنامين وخاطرج مكسور مني سديم
صدكيني انتي اجمل شي صارلي بحياتي انتي ولارين
احبج اني صدكيني يوم عن يوم احبج اكثر واكثر
لج تزعلين مني علمودها تروحلج فدوه والله عندي انتي تسويها وتسوين عشره مثلها
سديم
سديم رديلي اعرفج منايمه
بيني وبين نفسي كلت... هذا شلون عرف منايمه اني
سديم اذا متكعدين راح اكعدها لارين اخليها للصبح متنيمج
فزيت مباشرة.... كول شتريد
... يعني الا اهددج يله تكعدين
... كول شنو تريد
... لتبقين زعلانه مني
... مزعلانه
... لعد ليش عازله روحج بغير غرفه
... حتى تاخذ راحتك اكثر تخابر تجيب وحده براحتك
.... كافي سديم كتلج والله وروح امي الي نحرمت منها ماعندي شي وياها
... الي قهرني ياادم صار الحادث يله حجيت لو ماصاير الحادث متحجي
... حتى متزعلييييين
... خلص اني عرفت قيمتي عندك
.. والتمن
... وتصنف فوكاها؟
.... لتصيرين عكره وكافي زعل
... بشرط
.. شرطي ست
... مكالماتك وي تقى كدامي
... بسسس سهله هاي
.. يله نشوف كلامك صحيح لو كذب
... يعني هسه گلبج راضي عليه
... اتبسمت وسكتت
... جيبيها لارين وتعالي لغرفتنه
... تمام
مريم.......
طلعنه من المطعم ورحنه زرنه مره ثانيه
وبعدها فترينه بالاسواق
الاسواق شعبيه تضج بالناس
مرينه من محل العاب زهراء شافت لعابه باوعت عليها ومدت ايدها بمعنى تعالي او اريدها
وصارت تبجي وتسوي ب بابا
باوعلها واتبسم
شتريد عيون ابوها
علي... ياب تريد لعابه انه اعرفها من تريد شي
ضرغام... عض شفته وباوعله كال... انت ااااخ منك ومن لسانك منو يلحكك
شالها ضرغام وقبلها وكلها امشي اخذلج احلى لعابه لعابتي زهوره
رحنه لمحل الالعاب صرت اباوع للالعاب كلش حلوات
اول مره ادخل هيج محل او محل العاب اساسا
صرت اتفحص بنظراتي لعبه لعبه باوعت لحسين اخذله سياره وباوعت لعلي يجرب ياهو مسدس احسن اشتراله مسدس
اشترالهم وطلعنه مشينه شويه بعد دنك على امه وهو يدفعها بالكرسي خله شفته يم اذنها
يوم شنو محتاجه اشتريلج
الحجيه... ريتك سالم وليدي
ضرغام... كولي ييوم احنه بالسوك هسه واشكال بي شنو عاجبج
الحجيه... هو انت مخليني احتاج شي كلشي ممحتاجه
... ماشي يوم
تمشينه وكف يم محل ملابس... شوفي شنو محتاجه انتي مريم اشتري
... ممحتاجه ضرغام
.. اهووو صارووو كلهم ممحتاجين
طلع فلوس وحسب حسب وانطاني هاج اخذيها وروحي اشتري شنو يعجبج ملابسهم هنا تخبل كلش حلوات
.... اتبسمت وفتت وهم اجوي بعدين وراي
شفته يم الدشاديش واكف وعلى مايبدو يختارلها للحجيه
اشترالها للحجيه واشتريت اني هم وطلعنه
شويه نوب وشاف محل ملابس اطفال دخلنه واشترالهم للاولاد
مشينه بالسوك كل شويه يشتري شي اخر شي وكف يم ابو احجار كريمه ومحابس اخذلها للحجيه محبس
منقوش بالشذره سوره قرانيه
اخذه ولبسه بإيدها
فرحت كلش الحجيه بي
الحجيه... يوم ضرغام هذا شنو لون الشذره مالتو
... احمر غامق منقوش بسوره قرانيه
... عاشت ايدك يوم ريتك طيب
... اخذ اله هم محبس ومشينه
حدما رحنه للفندق الاولاد مباشرة نامو من التعب حتى اني والحجيه غلبنه النوم ونمنه
حسيت على صوت مثل واحد يبجي بخنكه
فتحت عيني جانت ضلمه يتسلل للغرفه ضوه خفيف
باوعت ضرغام كاعد جان مرتجي بالحايط ويدخن بالجكاره ماانتبه اني كاعده بالبدايه باوعته يمسح بوجهه كمت وانتبه الي عدل كعدته ومسح وجهه بسرعه
تقربت يمه.... ضرغام شبيك
.... مابيه شي مريم
... ليش كاعد
.... ماجايني نوم
... صوتك ليش مخنوك
... ب انزعاح... مابيه مريم
... خليت ايدي على خده تلمست وجهه
همست جنت تبجي ضرغام
... بتلكأ وتهرب ... ا ا لا
... من كعدتك المغرب انتبهت عليك منزعج وهسه اتأكدت
.... روحي نامي مريم
... مااروح لازم افتهم شبيك
... الله يخليج عوفيني مختنك
... تمام براحتك
رجعت لمكاني ومددت بس بالي بقه يمه شبي وشنو الي هيج خلاه يتأذى
الفجر كعدت لكيته ماكو
جنت بعدني نعسانه رجعت نمت
حسيت على ضوء الغرفه شتغل صاح صح النوم كعدووو
فزو الاولاد من اماكنهم وراحوله بابا.... بابا... بابا
فتحلهم ذرعانه وكال... هلو ياب
وجه كلامه النه
يلا اكعدو صح النوم
كعدنه وتحضرنه وطلعنه توجهنه للمقبره
طول الطريق وهو يسوق تساؤلات بالي نام لو لا
مااعتقد نام لان الفجر حسيت عليه هو ماكو وهاي هسه يله اجه
زين اسأله خاف يضوج
بس احسه احسن من الليل هسه فاك ورجع لطبيعته يحجي ويسولف
عجيب امره كل شويه بمزاج
وصلنه للمقبره الحجيه تكلمت
ضرغام يوم شكد بعد ونوصل
.... احنه بالمقبره هسه مابقه شي ونوصل قبورهم
.... صارت تبجي الحجيه مباشرة
ضرغام... ها يوم هم حتبجييين
... ااااااخ يانار گلبي اااااخ
سكت ضرغام عرفتها ليش هيج انهارت
وصلنه لقبورهم جان ابو ضرغام واخوه اليا وزوجته نور
الحجيه اول مانزلت صارت تبجي لزم ايدها ضرغام وصلها لقبورهم
الحجيه... قبر اخوك ويين
... هذا يوم هذا
خلاها للحجيه يم القبور وهي صارت تبجي بحركه وكف هو على جنب متكأ على احد القبور طلع جكاره وصار يشرب ويباوعلها بألم لامه لان هيج متألمه
علي وحسين جرتهم الحجيه وصارت تحاجي نور
...يمه نواره هاي جبت جهالج واجيت
نواره يمه يبعد گلبي احنه كلنه مشتاقيلج
ضرغام هم مشتاقلج ضرغام شو مااسمع حسك انت وينك
ردلها وهو وراها واكف... موجود يوم
يوم ليش واكف هنا تعال على ابوك اخوك مرتك بعدها مصارلها شي من ماتت
.... جنت يمهم قبل شويه يوم
باوعتله فتحت عيوني بوسعها
استدار نطانه ظهره قرينه الفاتحه وكملنه وتوجهنه حتى نطلع صعدنه بالسياره ومشه بينه وگفنه بمكان هم كال نزلي مريم
.... استغربت اباوع كلها مقبره وين انزل
.... باوع للحجيه كال يوم عشر دقايق ونجي ابقي انتي والجهال هنا
... وين رايح
هسه نجي يوم
نزلنه واني مستفهمه وين حنروح
لزم ايدي وتمشينه حدما وكفنه كدام قبور كال
مريم هذوله اهلج
باوعتله مصدومه ماتكلمت بس عيوني جانت تسأل
... تكلم برفع الحاجب... شبيج مستغربه هذا قبر ابوج وهذا قبر امج وهذا قبر عمج وهذا بيبتج وهذا عمج الثاني
بقيت بمكاني مااعرف شسوي اجه تقرب يمي همس وهو يباوعلي وعيونه تتفحص كل تفاصيل وجهي توقع بيه شي لان لاحجيت ولا وجهي كان مبين عليه الحزن
.. شبيج مريم متصدكين؟
... باوعتله وحضنته بخوف وبجيت ضميت وجهي بصدره همس شبيج
... مااعرف شنو من شعور داهمني بلحضتها
خوف على صدمه على تقلبات اوجاع الماضي شعور ممزوج صعب اشرحه
طبطب على ظهري برقه همس
حبيبي لو خايفه نرجع انه اسف توقعت حتفرحين
شددت بيدي عليه هواي
همس... لهل الدرجه انتي خايفه امشينه مريم امشينه نروح
باوعتله وهزيت براسي بمعنى اي ومشينه من يمهم كم خطوه ابتعدت تقريب 4 امتار والتفتت باوعت لقبورهم وكأنه يكلولي مريم شتاقينالج هواي ويوم الي نتلاكه هذا انتي
توقفت وباوعلي مستفهم وعفته ورجعت الهم اركض
هو اجه بسرعه عليه عباله بيه شي
تكلمت واني ابجي
ضرغام امي وين
... هاي امج
... وقفت يمها واحس بركان من الدموع يريد ينفجر او نار ونشبت بصدري
.... يمه حبيبتي
اول مره اكولها من صدك كلمة ماما... يمه...
كعدت يمها احجيلها ورديت باوعت لقبر ابويه وكلمته
سولفتلهم. وكأنه يمهم اني بالحياة وكأنه موجودين
شوفو هاي اني تزوجت وهذا زوجي
يمه يابه لتخافون عليه ا ا ا اني بخير
وضرغام يحبني ومدللني
يمه انتي هسه قريبه يم الرب اندعيله لضرغام يمه
هو يشتغل بمكافحة الارهاب عمه دكول شغله خطر وتخاف عليه واني هم اخاف عليه
بقيت احجي هواي وهو تعب من الوكفه كثر ماطولت حتى مدد على قبر وصار يدخن كمت ولما شفته هيج تخبلت
... ضرغام كوم ليش نايم هنا
رفع راسه والجكاره بشفته ها كملتي حجي
... كوم منا اخاف عليك
... ليش تخافين هو شكو
... اموات هنا
... باوعلي واستهزء باابتسامه بسخريه
كام وكف ونفض ملابسه وتكلم
الي تخافين منهم العايشين مو الميتين
بعدين جيت انه نمت على قبر هذا المرحوم مو زين تحملني هالدقايق هاي
... لا ضرغام اخاف عليك
... دمشي ابويه امشي
مشى كدامي واني اجيت بركضه مسكت باايده لان خايفه باوعلي وضحك بصوت وفر براسه ومشينه حدما وصلنه للسياره
الحجيه... ادري وين صرتو حتى الجهال نامو
ضرغام.. هي احسن فقره من ينامون ويريحوني من دوختهم
مريم... تقبلين حجيه كاعده يم قبر اهلي التفت عليه الكاه مدد على القبور ويدخن
الحجيه... دكت على صدرها بشهكه... شنووو ضرغام صدك هالحجي
ضرغام... ضحك تحسسيني مسوي جريمه
الحجيه... ولك يمه ميجوز القبور الها حرمه
ضرغام... ماشي يوم
الحجيه... رجعنه بطريق طويييييييل للبيت بعد تعب مفرط بحيث الكل مددو بفراشهم ونامو
ومشى اليوم طبيعي جدا
...... سديم....
الايام تمشي وي اقتراب العام الدراسي قررت ارجع لدراستي وفاتحت ادم بالموضوع
.... ادم اني اريد ارجع لدراستي
.... ولارين؟
... لارين اخليها بالحضانه
... سديم هو انتي بعازة الشهاده محتاجه فلوس انطيج وربيها لارين واهتمي بيها
... اني مراح اهملها ولااقصر وياكم بنفس الوقت اكمل دراستي
... اي شلج بيها ياعيني
... ادم اني حلمي اكمل دراستي وحاربت وجازفت علمود هالشي
... اذا هذا الشي يريحج سوي ماعندي مشكله
... واني اوعدك مااقصر وياكم ابد
... هاهيه حبيبي
مرت الايام بشكل طبيعي لحد ما بيوم خابرو ادم
.... ادم ابويه توفى
... شنوووو
... وصانه يندفن بالنجف
... انت شتحجي شوكت مات وشلون
... نوصل ويتوضح كلشي
... تمام تمام
باوعت ادم تغيرت كل ملامحه
منو مات؟
.... ابويه
... البقاء لله حبيبي
... حيجون اهلي سديم
... هلا بيهم
... حروح للنجف موصيهم بالنجف يدفنوه
.. وحدك؟
... هناك اخوتي يجون مباشرة للنجف
... تمام
راح ادم بسيارته وثاني يوم بالليل يلا اجو
اخوته جانو اربعه وهو الخامس
واحد منهم كلش يشبها
كعدو بعد ماعرفهم عليه وعرفني عليهم
رحت للمطبخ حضرتلهم الجاي وقدمته الهم سمعت محمد وادم يحجون وي اخوتهم البقيه
محمد .. احنه لشوكت نبقه عايشين نرجع لهنا نعيش
امجد... احنه هناك تزوجنه واستقرينه شيرجعنه
ادم... ويعني تبقون بالغربه
امجد... والله مرتاحين هم نرجع للعراق والقتل والانفجارات
ادم... عمي ياانفجارات ياقتل صحيح اكو بس مو مثل قبل الامور احسن بهواي وان شاء الله تتحسن
سمير... مرتي لو تسمعك ادم كبل تفرح صارلها شهور تلح رجعني واشتاقيت لااهلي
ادم... حقها اخذتها للمره والها سنين ماشايفتهم
سمير... ماادري والله هي حيره اني اتفق وي امجد بس مرتي ليل نهار تبجي على اهلها
شتكول امجد نرجع ونكمل حياتنه هنا
امجد... لا ماارجع اني مستقر هناك
سمير... اني حرجع علمود المره والجهال
اتفقو بالاخير يرجعون الا امجد بقى ثابت على قراره
وقرر يرجع لبلده الي عايش بي
بقو اسبوعين يمنه اشترو بيوت ورتبوها وبقت بس ينتقلون بيها
بعد مرور اسبوعين اجوي وياهم زوجاتهم واولادهم وادم جان كلش فرحان بجيتهم
ادم... احس هسه استقريت وارتاحيت من صدك سديم الحمد لله اخيرا رب العالمين جمعني بااخوتي وعشنه
سديم... الحمد لله
مرت الايام جنت واكفه اطبخ وحسيت اريد اتقيأ
رحت اركض للمغسله اتقيأ
مرتين وتلاثه وصارت روحي تلعب من اي شي
حللت وطلعت حامل رغم هالشي سببلي قلق كون راجعه لدراستي لكن ادم فرح كلش لان حيجينه طفل ثاني
......
مريم...
باليوم الثاني جنت دااطبخ حضرتلهم الاكل ورحت حتى اصيحلهم يتغدون
داافتح الباب وقبل لاامد ايدي على الباب سمعت ضرغام يكلم امه
ضرغام... كالتلي ضرغام اشتاقيتلك هوايه
وانه زعلانه عليك من زمان مااجيتني شبسرعه نسيتني وتزوجت
كعدت يمي وانه جنت مدد شلون هسه هيج مدد
كالتلي ديربالك على اولادي انتبهلهم زين
اشتاقيتلها يوم هواي
الحجيه... نواره يمه زينة البنات ام ضحكة الحلوه وحجايات الطيبه راحت بعد شنسوي
.... لهل السبب رحتلها بهذاك الليل متحملت ابقه انتضركم للصبح بقيت حاضن گبرها ونمت عليه
... ولك يمه تحجي صدك نمت بالمقبره
... ارتاحيت لما رحتلها وحضنت كبرها ارتاحيت يوم
كعدت فجر حتطلع الشمس يمكن مانمت غير ساعه
.... بعد لاتسويها ضرغام يمه مو زين
... تعرفين يوم مرات ماافهم نفسي شلون عايش بهيج تناقض شلون احب مريم وبنفس الوقت احبها مداافهم بنفسي يكولون اليحب يحب شخص واحد انه شلون ثنينهم هيج حبيتهم
... ليش انت مريم خذيتها على حب ضرغام؟
يعني الي حجتو سندس صحيح
... لا لا لا يوم ا يعني وره متزوجتها
.... لا يالضرغام يوليدي انه اعرفك واعرف بهذا گليبك انت عشكتها للبنيه انه ماالومك مريتك جانت مريضه واذا تتزوج ماالومك بوقتها بس گلي شلون جبتها شنو الي جان بينكم وجبتها
.... يوم ماكو شي من الي تحجي صدكي
انه بس جنت اكلج انو حبيتها انه هم بس اكيد نور هم حبيتها يعني دااكلج ثنيناتهم
داايحجي واني اسمع وبهل الاثناء فتح الباب علي وشافني ضرغام واكفه بالباب باوعتله بعتب وعفته ومشيت وكام بسرعته عليه
مريم.... مريم
عوفنييي عوفنيييي
... مريم اوكفي
.... بالنهار تغازلني بكلامك وبالليل تروح تنام على قبرها
... لج متوفيه هي تغارين من مره ماتت
.... دكللها لاامك مشتاقلهاااااا
ونترت تشتاقلهاااااااا
.... خزرني ونتر.... الف مره كتلج صوتج ميعلى عليه ونتراتج هاي جوزي عنها
مايصير خير لو بقيتي هيج مريم
نترت... لايصير خير اصلا اني مااريد واحد كذاب وروحه وعقله يم ثانيه اني غلطت لما حبيتك وتمسكت بيك
باوعلي بخزره.... تعرفين شنو الي يخليني اكره المره
الي مثلج الي متحترم
لج انه زلم مشوربه واحدهم بعمر ابويه تهابني وتحترمني وانتي تنتريييين بيه
جاهل كدامج انه
مريم.... بتلكأ... ا اسفه مو قصدي
ضرغام... باوعلي من فوك لجوه بقهر وعافني ومشى اخذ سويج السياره وطلع وساقها بسرعه مفرطه
صوتها من دايحركها ينسمع واضح جدا
كعدت الوم بروحي واحجي وي نفسي
شجاج يامريم ليش هيج تسوين
هسه اني شحجاني اغار من وحده توفت لا ومنووو نور الي ماشفت منها الا كل طيبه وخير
بقيت انتظر جيته مااجه تأخر
باوعت للساعه تعدت ال1 بعد منتصف الليل ومااجه
واتصل عليه يرفض الاتصال
بعد انتظار طويل اجه
فتح الباب ودخل السياره ونزل طلعت عليه اتلكاه باابتسامه
.... هلو حبيبي
... ردلي من دون مايباوعلي اهلا
... تأخرت
... لاباوعلي ولا رد
فات للبيت ودخل للغرفه وكف كدام المرايه يفتح بدكم القميص كلمته اني اعتذر ضرغام والله مو بيدي اني غرت متحملت
.... مارد نزع قميصه وبنطرونه ولبس بجامة نوم وفات للحمام غسل وجها واسنانه وطلع مدد على سرير
اجيت كعدت يمه.... ضرغام اسمعني اني احبك والله
ومو بيدي من اتعصب
.... طفي للضوء اريد انام
... حتبقه متحجي وياي
... طفي للضوء كلت
... سكتت ورحت طفيته للضوء واجيت يمه لكن هو استدار عني بيومها ماحبيت الح ويا خليته براحته
لحد اليوم الثاني كعدت قبله وحضرت الريوك وريكتهم للاولاد والحجيه وبعدها هو كعد
صباح الخير يوم
... هلا وليدي صباح الورد تعال يمه تعال اكل ويانه
... مااشتهي انه طالع محتاجين شي قبل لااروح
... باوعتله وهو لا يباوعلي ولاكأنه موجوده
قبل الاولاد وطلع
احترك دمي تجاهله الي دمرني
للظهر هم اجه ونفس معاملته اجيب الغداء يتغده وبعدها يكوم يروح لغرفته اجيب الشاي ياخذه من دون مايباوعلي زعلان مني لليل ونفس الشي وديتله الجاي ومايكلمني متت
اخر شي كعدت يمه متحملت بجيت
... لتبقه زعلان مني والله مدااتحمل
ضرغام... من تعدلين اسلوبج ماازعل منج
.... اني مااتحمل من اصير عصبيه
... اساسا عيب المره تصير عصبيه وتصيح وصوتها يطلع
....حبيبي ضرغام والله احبك والله بعد مااعيدها
... مسحي دموعج
... مااعيدها بس لتبقه زعلان فدوه
... جر نفس وسكت ماحجه جان يشرب بالشاي والجكاره
.... ضرغام اني مو بيدي اغار مااتحمل
.... باوعلي بطارف عينه وعلى نفس سكوته
... جاوبني انت تحبها مو... بعدك تحبها وتشتاقلها هم
... مارد
... انت ماتحبني الي اخذتني شفقه مو لان شفتني اني احبك اما هي الها تحبها وتريدها
.... جر نفس تنهد.... نفض جكارته بالمنفضه وجر نفس ويباوعلي زفر دخان الجكاره وتكلم... شتردين مريم
... بعيون دامعه... تحبها مو
.... جر نفس من الجكاره ويباوعلي وزفره... مو المفروض هي مرتي ولازم احبها
.... لعد اني شنو
.... باوعلي ضيق عينه وسكت
... واني نار شتعلت بيه اكثر... كلي اني شنو
.... شتشوفين نفسج
... اريد اسمعها منك
.... حالج حالها هم مرتي
.... لا
انت تحبها الها
واني تعطف عليه اخذتني حتى تعالجني مو
والدليل مقبلت تعقد عليه محكمه
ضرغام انت تعطف عليه مو تحبني
.... جر نفس جكاره... صار يدخن هواي ويتأخر يله يحجي
تعرفين مريم
جانت دوم مثلج تنقهر ودكلي ضرغام انت متحبني
وانت تحبها ل لحبيبتك القديمه وعايش على ذكراها
جانت دوم مثلج تبجي وتنقهر
وخواتها يلعبون بعقلها يكلولها ضرغام مايحبج
جيبي بالسحوره
هه شكد هي ملتزمه ونضيفه بس غلطت سوتلي حجاب ومادري شنو هاي السوالف بعد انتو تعرفوها ولما عرفت مسويه هيج عاقبتها
تعرفين شلون عاقبتها شسويتلها يعني
.... بتلكأ..... شنو شسويت
.... شبيج وجهج صفر... عبالج ضربتها مو؟
انه ماامد ايدي على مره او طفل مريم
انتو ضعفاء كل قوتكم تبجون وتحجون
بس ماكلمتها ماحجيت وياها ولاعاتبتها ولاكتلها ليش هيج سويتي بأختصار تجاهلتها
.... وهي شسوت
.... هي تخبلت تجي تحجي وياي تسوي اكلات احبها
تحاول تراضيني تركتها وقفلت من يمها
بقيت اسبوعين يمكن اكثر مااحجي وياها ولا بالبيت اكل كلو مطاعم كتلها بعد ماأأمن بيج واكل من جوه ايدج بجي تبجي انه اعرفها هي شكد تحبني بس الحب الي يتحول لاذيه للمقابل هذا مو حب
وهي لان مشت بكلام هاي سندس كتلها اختج هاي اذا بقيتي تمشين وراها تهجم بيتج وهي حتكون سبب طلاكج
بعد بجي وتواسيل مشيتها وياها انه هم اشتاقيتلها
هي ماتهون عليه جانت حامل بعلاوي وماردت اقهرها اكثر بس جنت ضايج من تصرفها
... 3 اسابيع وتكول ماردت تقهرها اكثر لو رايد تقهرها شسوي
... ابتسم سكت ثواني بعدين تكلم
تعرفين انتي لحد الان ماقافل من يمج زين وغلطاتج امشيها مريم سامحتج هواي لاتبقين تختبرين صبري
من اكول على شي متسوي تكليلي صار
مو تعانديني لاتعاندين
... وعد بعد مااعاندك
بس اني غرت والله حتى اني اعرف بتصرفي مو حلو والمفروض اكبر عقلي بس مو بيدي ضرغام والله
.... مره راحت لدار حقها لاتصغرين عقلج
عشرة عمر بيناتنه طلعنه وطبينه واكلنه وشربنه وبجينه وضحكنه سويه ماانساها انه مريم اشتاقلها واحن الها واتمناها لو عايشه هالشي مو من حقج تمنعيني منه او تضوجين انه مامقصر وياج وحبيتج رغم هي جانت عايشه يعني خنتها بقلبي وياج جايه تكليلي انت تحبها ومتحبني
.... سكتت ماعرفت شنو اكوله
... باوعلي بطارف عينه جنت اباوعله بعتب والدمعه تلمع بعيني مختنكه طلع جكاره وشعلها وتكلم والجكاره بين شفايفه
تعالي
... سكتت مارديت عليه
... تعالي مريم لعندي
... اجيت من دون كلام
.... اخذ الجكاره سحب منها نفس واندار زفر دخانها
تقرب اكثر عيني بعينه صارت تتنقل عينه من عيني اليمنه لعيني اليسره
همس
احساسي تجاها غير احساسي تجاهج
انتي احسج طفله صغيره وروحي تعلكت بيها
مريم انه وياج غير صدكيني حبيتج ماعطفت عليج
.... اني هم حبيتك واغار مااتحمل صدكني
... اعرف بس غيرتج هاي لاتخليها تأثر علينه صيري رزنه وعاقله حتى احبج اكثر لاتشلعين گلبي
... خلص اوعدك اصير عاقله
... اخليج تصيرين ام وغصبا ماعليج تعقلين
... اتبسمت بخجل ودنكت
... من حنكي بطارف ايده رفع وجهي تكلم ونفس همسه ونبرة كلامه
احبج
.... اتبسمت وخجلت دنكت رجع رفع راسي
... تعرفين شنو الي سحرني بيج اكثر شي
... همست... شنو
... عيونج هاي
بقيت اباوعله من دون مااتكلم......
****
ثاني يوم حسيت عليه دايلبس بالبدله العسكري
فتحت عيني هاي شنو ضرغام شو طالع
... عندي واجب مهم خابروني راح التحق
... بس ليش انت هو مو نزولك
... اي بس كتلج طوارىء مهمه عدنه مجموعه خطره ومطلوب القاء قبض عليهم
... جماعة المخدرات مو
... اي طلعو وراهم بلاوي
... ضرغام اخاف عليك
... ادعيلي ولاتكلين لاامي من الحجيتو كليلها شغله صارتلو وراح ماشي
.. اي
... باي مريمي انتبهي لاأمي وللجهال زين
.. ماشي
خله البيريه على راسه وطلع بسرعه حتى سيارته ساقها سريع....
... جنت كاعده اني وعمتي وهوسه بالمنطقه صارت
اطلاق الرصاص صار هواي كامت الحجيه كالت بسم الله هاي شنو يوم شكو
والله ماادري حجيه
نروح نشوف شكو
رحت اركض فتحت الباب تابوت وملفوف بعلم العراق ضباط وجنود وشرطه ويرمون بالرصاص بالجو وناس تهوس
بالروح بالدم نفديك ياعراق
باوعت هاي منو الخطوات جانت تجي بااتجاهنا
باوعت بالوجوه كلها مو عرف
ضرغام ماكو وياهم گلبي وغزني وجمدت اطراف ايدي رجلي ورعشه تملكتني
الحجيه صاحت وين صرتي مريم
جنت اسمعها بس ماارد بقيت واكفه اباوعلهم صارو يقتربون اكثر
والطلق الناري صار اكثر باوعت العلم ملطخ بدم
صارو قريبين علينه حدما وصلو للباب توقعت حيتعدوها لكن وكفو بالباب وكالو سويلنه درب توخرت وفاتو ودموعي نزلت وحدها
جانت الحجيه على وكفتها والاولاد هم واني بقيت مااتحرك مااخطي خطوه واكفه واحجي
مو هو لا لا
فتحو التابوت باوعت جانت مبينه رجله بسطاله وبنطرونه وملابسه العسكريه بقيت اباوع ودموعي تجري والصوت صدى دخل لااذني
حجيه ابنج شهيد
فدى نفسه لتراب الوطن
ماصدكت مااستوعبت تمشيت بخطوات بطيئه كلش
خطوه خطوه وخايفه حيل مره اخلي ايدي على شفتي مره افرك ايد باايد صار يبين اكثر صعودا بجسمه ورقبته واخيرا شفته هو
جان مغطى بالدم وجهه كله دم
مذبوح على النص بحيث متكطعه الشرايين والاورده
بدلته كلها دم
من شفته هيج صررررخت بعلو صوتي
ضرغااااااااااااااااااااااااااااااام وايدي ترجف وي صرختي
كان غيابك مؤلم جدا لي ألمني بشده
كنت معكم انا رغد الموالي في امان الله
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!