تــــــــــل الذهــــــــــــــــب
رغــــد الموالـــــــــــــــــي
ـــــــــــــــــــــــــــــــــــــــــــــــــــــــــــــــ
مريم... بقيت الوب اطك ايد بإيد من شدة توتري
متحملت ابقه تسللت شويه شويه حتى اسمعها شنو تحجي
سندس... وداعتك ياضرغام وروح اختي الغاليه اني جيت بس اشوف الجهال وكلت اخذهم يمي كم يوم هم خالاتهم مشتاقيلهم وميكدرون يجون يكولون مالنه عين نجي للبيت واختنا ماموجوده وهسه ابن خالتنه تزوج ومره غريبه بالبيت والا جان اجوي
اني كلت اريد اخذ الجهال مرتك تلبس بيها الف جن لااا وشنو تاخذيهم ومو بكيفج وهذاك الغلط والحجي ووصوتها وصل سابع جار وهاي خالتي سألها
ضرغام... اولا امي مادخلها بهيج سوالف لاحك ولا باطل
ثانيا الي يجي ويحترم نفسو اخلي على راسي
والي يطلب شي يطلب بذوق
انتي جايه وتردين تاخذيهم وانه ماموجود على اي اساس حقها مريم تكلج متاخذيهم انه مااقبل يصير شي بدون علمي
سندس... واني غريبه ضرغام اني خالتهم
ضرغام... ميخالف انه ماموجود انه الي اكلج تاخذيهم او متاخذيهم
سندس... ومرتك
ضرغام... اسمها مريم
سندس... اي ومريم تقبل بلي سوته
ضرغام... يعني معقوله انتي جيتي طلبتي بهدوء ومريم انفعلت هيج مباشرة
سندس... بنتره... اييييي طبعااااا شفتتت تطبك وياها
ضرغام.. نتر.. سمعيييي احترمي نفسج من تحجين وياي صوتج مترفعي بوجهيييي
سندس... لعد ليش دكلي ماتنفعل هيج كبل
ضرغام.. لاني اعرفها واعرفج هم
سندس... اخذلي حقي ضرغام
ضرغام... شوفي سندس اترجاج طلب اخوي اذا تحبين اختج وترديها ترتاح بگبرها لاتجين الا لمن انه موجود ولمن تجين بهدوء وبلا مشاكل تره لحد الان اكول مره واختها ماتت وعاذرج بس كل صبر وراه حد
سندس.. اني اسفه ضرغام واذا على الجيه بعد مااجي
ضرغام... مااكلج لاتجين تعالي بس وكت ماانه موجود
سندس... ماشي
ضرغام... هسه تكدرين تاخذين راحتج
سندس... يعني متنطيني الجهال اخذهم
ضرغام.. الي مشتاقلهم يجي انه ماادز جهاالي
سندس.. ماشي ابن خالتي مع السلامه
الله وياج
مباشرة فتت للغرفه بسرعه
شويه واجه ضرغام فات وطبك الباب بقوه فزيت من اثر الصوت
... تكلم بحديه وهو يخزرني... انه كم مره كتلج صوتج ميعلى وانه موجود
... تلكأت وتكلمت ب ب س ض ض ضرغام
... نتر.... وتطرديها بأي حق تطرديها؟
... انت متعرفها شسوت
... سوت ماسوت عندج رجال تنتظري يجي وتكليلو تتصرفين من يمج ليش
... هي دتعرفها
.. قاطعني... هي ماعدها رجال بي خير يكعدها
انتي شنو هم مابعينج انه
بتلكأ.... لا حشاك اني مو هيج قصدي
... قصدج مو قصدج انتي محترمتي وجودي ولاحترمتي غيابي
انه مااقبل مرت الضرغام تصير على لسان النسوان يحجون بيها
سندس وحده ماعدها لاشغل ولاعمل غير المشاكل واساسا متقصده تطلعج من طورج حتى تحجيج وتروح تحجي بيج وبيه
انتي قدمتيلها الي رادتو على طبق من ذهب
مريم... فاتت لاسلام ولاكلام وتغلط وتحجي
وتكلها للحجيه منعرف اصلها من فصلها جابها وخلاها عدنه
ضرغام.... هي حجت هيج
... اي لهسبب اني ضجت وعصبت ضرغام
تحجي وي علاوي وتكله موتتها لامك هو بعده طفل تزرع بتفكيره هيج حجي ترضاها
.... هي حجت هيج؟
... اي والله واسأل الحجيه
... هز براسه بمعنى اي... جر نفس وتنهد تكلم بهدوء... مع ذلك لاتتجاوزين دافعي عن نفسج بس لاتتجاوزين مريم
... شلون وين تجاوزي بالموضوع
.... من طردتيها هذا تجاوز منج مريم
يعني انه بدال ماادافع عنج لان هي هيج حجت خليتيني اسكت ببساطه دكول طردتني مرتك واني حجيت
انتي لمن تصرفتي وطردتيها وبعدها انه اجي اصير وياج ضدها راح تنقلب الموازين وراح يحجون اشكال مريم سندس وامثالها متقصده تخليج توصلين لهيج مرحله حتى دكول شوفو مرت ضرغام طردتني وهو قابللها وحده بلا اخلاق ويبدي كلام النسوان التعبان انتي ليش تنطيهم هيج لزمه
.... لعد اعوفها تحجي
... انه اجي واخذ حقج من عيونهم بس لاتتصرفين انتي وتخليني مااكدر اطلع حقج سكتي وحقج يجيج ليمج
... اني اسفه
... هالشي مااقبل يتكرر مريم لاتعيديها
... اوك
.. خلهم يكولون يا زين مااخذ الضرغام
لاتخليهم يكولون العكس
... سكتت وباوعتله بنظرات حزينه
اتبسم واقترب ضم راسي لعنده همس فززتج بالباب
.... لا عادي
... همس... مريم مااريد احد يجيبج بالعاطل
.... اسفه
تنهد جر نفس همس انه رايح يم الجهال
طلع بهل الاثناء اتصلت سديم
... هلو سديم
... شلونج مريم
... اني زينه الحمد لله
... شلونج على العلاج شكالج الدكتور
... غيري علاجي وكالي كل اسبوع تجين
.. ان شاء الله شفاء وعافيه... مريم اني كلمت صديقتي معلمه وكالت تدخلين يمها بمحو الاميه تدرسين
... شدرس يمعوده صدك تحجين
... لازم تتعلمين تقرين وتكتبين لاتبقين متعرفين كلشي
... شنو جاهله اني وادخل مدارس
... لا هي اساسا مسويه دورات محو الاميه بيتهم تدرس بيها اهليه يعني على حسابج تدرسين تتعلمين احسن من ما تبقين كلشي متعرفين
... يمعوده عادي
... ولج كدام رجلج عيب حتى حرف متعرفين تقرين رجلج مثقف ومتطلع يصير زوجته حرف متعرف تقرأ
... لا ماادرس وضرغام يعرف بكلشي عني مو مهم كليلي ادم شلون صار
... اويلي من عنادج... زين ادم
... بهل الاثناء اجه حسين... ماما بابا يليدج ( يريدج)
... ماشي سديم اكلمج بعدين اني اروح ضرغام يريدني
... ماشي حبيبتي سلميلنه
... رحت لكيته كاعد هو والحجيه والاولاد
.... كول ضرغام صحتلي
... تعالي يمنه ليش وحدج كاعده
... اجيت كعدت يمهم وخليت حسين بحضني
باوع ضرغام لعلي ورد باوعلي وتكلم
... علاوي ياب
بيبتك حجتلي على سوالفك وي مريم ياب ليش تستهر من انه ماموجود
... بخوف... لا بابا انه كلشي مسويت
.... انه كم مره كايلك تحترم الاكبر منك ومتغلط
... لا ياب بيبي تتشاقه
الحجيه... اسكت ولك ولسانك شطولو والله ياضرغام كدامك اكول انت تطلع يحير شيسوي لايخليلي حاجه بمكانها لايعوف مرت ابوه بحالها يلزم اخوه يضربو وزهراء ياخذ منها العابها يخليها تصرخ هارج البيت هرج علينه
... باوع لعلي برفع الحاجب بمعنى صحيح هالشي؟
... بخوف وتلكأ... ب ب بابا انه مااسوي هيج بعد
الحجيه... لزم مرت ابوه انتي موتيها لاامي انتي وابويه هاي سندس اشكال عبت براسو
ضرغام... جر نفس وبعدين زفره وتكلم... هو طفل احاسب الطفل على هالتفكير لو الي داتعلم وتلقن بالطفل
الحجيه... مادري شصار بيها هالسنيدس هاي تخبلت علينه فد مره
.... انه اشوفلها صرفه بسسيطه
الحجيه... مريم يمه متشوفيلنه بيش الساعه
باوعت للساعه مااعرفلها سكتت وباوعت باانكسار مباشرة رد ضرغام. يوم الساعه 4 وريع
.... دجيبيلي مريم العلاج من يمج يوم تأخرت
.... ماشي حجيه
نطيتها العلاج وطلعت من الغرفه
مر اليوم اعتيادي بااخر الليل بعد ماعم الهدوء وانتظرت جيت ضرغام
وتوجهنه حتى نام فتح جهازه ضرغام وتكلم
... مريم تعالي يمي شويه
... اجيت ها شنو
... جان مطلع ساعه بشاشة تليفونه تكلم
داتشوفين هذا الميل الصغير هذا يحدد الساعه بيش
وهذا الميل الجبير يبين الدقائق للساعه
.... اي يعني شنو مفتهمت
... شوفي هاي الارقام هذا العدل يعني واحد
وهذا 2 وهذا يعني رقم 3
هنا الميل وهنا دقائق
بده يعلمني شلون اعرف الوقت واعرف اسم الارقام بالشكل
بقه يعلمني وقت طويل سهرنه واني اتعلم معرفة الوقت حدما صرت اكولها صح
ضرغام.... هسه الساعه بيش
مريم... ساعه 3
وهسه... 3 ونصف
وهسه.... ساعه 5
صار يفر بالميل حد ما عرفت الوقت ابتسم ومسح على راسي شاطره مريمي
.. اتبسمت وهمست شكرا
... تعالي نامي عيونج خط بيها لون كلما تنعسين يطلع لون فوك جفونج
... عقدت حاجبي مستغربه اني؟
... اي انتي شنو مامنتبها
... لا
.... انه منتبه على كل تفاصيلج يله مريمي هسه نامي
... تصبح على خير
.. وانتي بخير
سديم....
مشت الايام وتحسن وضع ادم وحياتنه استقرت اكثر واكثر خصوصا بعد ما تعرض لحادث ادم جانت الفتره الي هو محتاجني بيها كفيله بأن تحسن من علاقتنه صرنه قريبين كلش من بعضنا
ادم... اني مااعرف بشنو اجازيج اشكرج على تعبج وياي سديم
سديم... هذا واجبي اذا مااوكفلك بهيج شده شوكت لعد اوكفلك
.... انتي مو بس ساعدتيني هسه انتي من اول ماعرفتج ساعدتيني
.... مفهمت؟!
... اول مره شفتج بيها من اولها حسبت حساب وماجنت منتبه بس هسه عرفت ان اني وكعت بحبج من اول مره
سديم انتي غيرتي ادم كله
اني مو نفسه ادم قبل سنه او سنتين
جنت خايف ارتبط بيوم من الايام
خايف اتزوج
اخاف لاتطلع مو زينه شلت هم لزواجي
بس لما تزوجتج صرت احمد ربي لان رزقني بهيج زوجه صالحه علمتني الي اهلي ماعلموليا
علمتني هذا غلط وهذا حرام رغم جنت اعرفه بس غافل عنه مااعرف عواقبه من حق وحقيقي
بس انتي صحيتي بيه كلشي نايم
جنت انقهر لان ماعندي ام علمتني الصح والخطأ مثل بقية الاولاد بعمري لمن كنت صغير
بس تعلمت واني جبير
شكرا على كلشي قدمتي الي سديم
... خليت باطن ايدي على خده وتكلمت باابتسامه...
لاتشكرني على شي هو من واجباتي ادم
اني سعيده لان انت تغيرت وعفت كلشي
... تغيرت بس ماعفت كلشي سديم
... عقدت حاجبي بااستغراب يعني شنو؟
... تتذكرين تقى الي جانت تراسلني وكم مره صارت مشكله بيناتنه اني وياج
.... اي
.... اني اتواصل وياها بس
... بس شنو
.. سمعيني ماعندي شي مو حلو وياها عفتها هي كتلها خلص الي بينه ينتهي سديم والله دااحجيلج لو عندي شي مااكلج
... نار واشتعلت بصدري... اي... كمل
... عدها ابنها مريض واني ماكدرت اجوز عنه
.... يعني تروحلهم للبيت لو شنو بشنو تقصد ماجزت عنه
.... لا لا لا.... اقصد بالعلاج هو يتعالج واني اساعده بالعلاج وبالطبيب
.... افهم منك انت على تواصل وي تقى
... على كد ابنها وبس
.... باوعتله بعتب وعفته وكمت ماحجيت شي
ادم... هاي شبيج شو كمتي
واجه وراي.... سديم احجي وياج شبيج
.... لاتحجي ادم لهنا وكافي تتواصل وياها بحجة ابنها ليش حتى هسه داتكلي
... حتى متسمعين من غيري هاي اني اكلج
... شلون يعني مفهمت
.... اني سويت الحادث جنت بيومها دااوصل تقى وابنها للدكتور وديتهم ورجعت سويت الحادث
ضرغام عرف بيها جانت وياي
... ضرغام؟! وشلون عرف اذا انت موصلهم ومو وياك بالسياره
... الراجيته مال الدكتوره بالسياره جانت وهو سألني منو هذا مصطفى وحجيتله
.... نزلت دموعي لااراديا دااروح عنه استوقفني
سديم والله ماجنت اريد اكلج واجرحج ماعندي شي وياها تركتها
.... لا انت متركتها بقيت تتواصل وياها بس لان عرف ضرغام انت كتلي
... ماردت اقهرج اعرف الشيطان حيدخل براسج وتصير مشاكل سديم اني مااريد مشاكل تصير بيناتنه
... جان تكدر تخليني وسيط بينكم مو وراي تحاجيها وتوديهم وتجيبهم هي مو مكطوعه من شجره مااعدها اخ عم خال شنو السالفه
... محد اله علاقه بأحد هالايام
... وانت الجمعيه الخيريه ادم لاتقنعني بهذا الكلام سوي خير ماامنعك اني بس جان على الاقل تقدر مشاعري كول لو عرفت بالصدفه شلون؟
يعني لو مو صاير الحادث وعرف ضرغام وخفت لااختي تعرف ودكلي انت متحجي
.... اي مااحجي لان حتصير مشاكل وهسه كتلج حتى تسمعين مني وتفهمين
... واني ماافهم ولا افهمك ودام ياادم رجعتلها لتقى كلشي بيناتنه ينتهي جنت ناطيتك فرصه بس هالفرصه خلللص ضيعتها انت
... هيج صارت
... اي الي بينه ينتهي
.... الي يجمعنه مو بس عقد زواج بيناتنه طفله واني ماسويت شي حتى تخربين حياتنه بهذه السهوله تردين اشوفلج كلامي وياها خاف عبالج بيناتنه شي ماعندي شي
.... متفق وياها وتشوفني شعليه بالمسجات انت مطلعها وياااااك
... لج علمود ابنهاااا انه علمود ابنها حتى ابنها كعدته يمي وهي وره كعدت
.... مارديت عليه عفته وفتت للغرفه وقفلت الباب عليه
صاح طلعه ماكو منا سديم طلاك مااطلك انسيي
مارديت عليه كعدت ابجي احس الدنيا تلاشت مني
رجعت لنقطة الصفر بعد ما حسيت روحي كلشي اكتمل عندي
هاالمره جان احساسي غير عن كل مره كل مره خذلان لكن هالمره غيره ونارها حركتني
اكتشفت روحي احبه ولما ذكرها كدامي متحملت ولاتفهمت وبجيت.....
مريم.....
الايام صارت تمشي صرت اروح للدكتور كل اسبوع واتعالج بديت احس بنفسي احسن بهواي فرقت هواي صرت احب الحياة واحب التجمعات صرت احس بالثقه بنفسي شيماء وسندس بعد مااجو وحياتي استقرت هواي
بيوم جنه كاعدين الحجيه كالت..
مريم يمه صار هواي مااحد قره قران بالبيت متقريلنه قران
تلكأت وحرت فكرت شكلهابقيت ساكته
... جانت نواره ماكو اسبوع ماتلمنه وتكعد تقرأ القران واحنه نستمعلها جيبي الكتاب وتعالي يمي
.... حجيه اني مااعرف اقرأ زين يعني قرائتي مو قويه
... اكو احد ميعرف يقرأ يايوم
... اعرف حجيه بس بالقران مااعرف زين
... هاااا خوش لعد
حسيت بوكتها بالاحراج حسيت شكد جان صحيح كلام سديم ان لازم اتعلم اقرأ
مباشرة اتصلت عليها
.. هلو سديم..
... هلو حبيبتي شلونج
... سديم اني فكرت وقررت ادرس منو هاي البنت الي كتيلي عليها
... صديقتي من باجر تكدرين ترحين اذا حابه
... لا لا خل يجي ضرغام من دوامه واكله
... ماشي حبيبتي
الايام صارت تمشي واجه ضرغام من دوامه وفاتحته بالموضوع
... ضرغام اني اريد ادرس
.... اتبسم نسجلج بصف الاول يعني
... لا احجي صدك سديم شافتلي وحده تعلم اميه بالبيت واني اريد اتعلم اقرأ واكتب
... اي عادي ماعندي مشكله بس وين هاي ومنو هي وشنو اسمها بنت منو
... هاي شنووو ضرغام قابل حتطلعلها هويه
... لازم اعرفها يله اخليج ترحين لبيتهم
... باجر نكدر نروح سديم كالت هي قريبه عليكم تنطيني العنوان ونروح
... الله كريم سهله مريمي تدللين عيني انتي
بس اجليها يومين انوب
... ليش
.... لان اريد اخذج لمكان
... ابتسمت وين
.. للنجف وكربلاء ازوركم
... نزور؟ لمنو
... اوديج واحجيلج تحضرو اليوم بالليل نطلع
.... ان شاء الله
كمت مباشرة حضرت الجنط بيها ملابس للاوللد وللحجيه وجهزنه نفسنه
بيومها طلعنه بعد منتصف الليل
وصلنه النجف الصبح
لما باوعت لااجواء النجف ودرابينها القديمه ااي مرصوصه بالمقرنص المائل للاحمر اما بيوتها كانت بسيطه وابواب صغيره البعض يسميها النجف القديمه لان بنائها قديم حركة الناس داخل الاسواق الصغيره والباعه المتجولين واصواتهم وهم يروجون لبضاعتهم وصوت الناس المستطرقه بالشارع ضرغام كال سواح جايين يأدون الزيارات ومو كلهم اهل النجف ولاكلهم عراقيين من دول متعدده
جنت متمسكه بالاولاد حسين وزهراء بالعربانه ادفعها وعلي مخلي ايده بجيوبه ويتمشى كدامي لان معتقد هو رجال ومايصير عليه شي ضرغام كان يدفع الحجيه بكرسي المتحرك حدما وصلنه مطعم وكعدنه نتريك جان الخجل كلش مبين عليه
ضرغام... شبيج هيج طول الطريق تباوعين مستغربه وخجلانه
مريم..... اول مره افوت بهيج مكان واجواء
ضرغام... النجف حلوه توديج عالم غير الي انتي عايشتو
مريم... حلوه حيل مره جابني ابو غضب بس مافتنه لهاي الاماكن اجينه للمقبره
الحجيه... ابو غضب منو يمه
ضرغام... رجل اختها تصيحلو ابو غضب لان عصبي
الحجيه... بله الي يجي يروح بس للمقبره هو الي مايزور علي ابن ابي طالب عمرو خساره
ضرغام... مزورهم يوم مزورهم بس مايرحون هيج اماكن وعض شفته حتى مااحجي شي بعد
سكتت واكتفينه بالريوك تريكنه وكملنه وطلعنه بعدها لمرقد الامام علي ع
اباوع قبه ذهبيه كبيره ومنارات مذهبه كلش حلوات
فتنه للصحن العلوي الشريف جان مكان واسع مفروش كله بي رائحه كلش طيبه وكأنها رائحه من الجنه انشرح صدري لمجرد فتت للمكان حسيت بطمأنينه بقلبي مسكت ايد ضرغام وهو باوعلي تفاجأ بيه وعرفني مو على طبيعتي من رجفة ايدي واندهاشي بالمكان طمني بنظراته
كعدنه بالصحن واجه كعد يمي همس يم اذني
.... شبيج مريم ليش مو طبيعيه حالج تغير مجرد فتنه النجف
.... ضرغام روحي. روحي احسها نفضت مثل جانت كلها جروح وأثام وبديت اتخلص منها مااعرف اوصفلك بس احس روحي بالجنه الي يحجون عنها ماادري اني بحلم لو حقيقه
.... اتبسم وهو يباوعلي ماحجه شي
اخذ ايدي الاثنين وغطاها بجفوف ايده وكأنه يحاول يهدأني جانت ايده دافيه مقارنة بإيدي الي ترتعش وبارده بقه ماسكها حدما هدأت شويه
تكلم اخذي امي وزوريها وزوري وانه حاخذ الاولاد ازورهم
... حتى زهراء
... اي
... لا ماتخليك حخليها بحضن الحجيه ونزور
... ازدحام ماتكدرين خليني ازورهم نلتقي هنا بمكانه هذا ماشي
... ماشي
اخذتها للحجيه حتى ازورها ولان بصعوبه تمشي بالاماكن الي متعرفها تخاف لاتوكع لان متشوف حركتها بطيئه خلينها بالعربانه ( كرسي المعاقين)
فتت داخل الحضره الرائحه بعد ازكى واطيب
استنشقتها حدما مليت ريتي كتلها حجيه شوفيها شلون رائحه طيبه
الحجيه... بعد ابو الحسنين يوم امشي زوريني
دفعتها بالكرسي وزورتها جنت اشوفهم يقبلون الشباك ويعكدون شبك ( علك.. اوشريط اخضر اللون)
زرنه وصلينه وطلعنه بقيت مستفهمه عن الشبك هذا
شنو وصلنه للمكان الي جنه كاعدين بي لكيت ضرغام والاولاد كاعدين ينتظرونه
اول ماشافنه ضرغام وكف كال... زياره مقبوله
... شكرا
.... يله نروح
الحجيه... وين
.... نشوف فندق نسبح نغير ملابسنه
... طلعنه من الصحن العلوي توجهنه لفندق قريب دخلنه وحجزنه غرفه توسعنا كلنه
كعدنه وارتاحينه وسبحنه الجهال مباشرة نامو والحجيه هم نامت من. التعب حتى صارت تشخر
فتت سبحت وطلعت انشف بشعري واسرحه اجيت كعدت يم ضرغام
ضرغام.. شلونج هسه
مريم.. زينه
ضرغام... خفتي هواي؟
... يعني
تقرب بكعدته يمي وهمس مرتاحه مريم
... اي
... وياي؟ انه دخلتج حياتي انتي مرتاحه؟
كدرت اسعدج لو لا
.. باوعتله..... شوفتك هي سعاده بالنسبه الي
... الاولاد متعبين واعرف دايتعبوج
... لا بالعكس
... ابتسم وهمس... احبج مريم
... ابتسمت ودنكت
... شو باوعيلي... رجع خصلة شعري وره اذني كال صدقه الله سكت ثواني ورجع تكلم وعينه بعيني
وأغار عليها من نسمة تداعب خصلات شعرها
ومن شمس تدخل لعـينـيها فتبرز جـمالــهــما
واحــقـــد عـلـى شــمس تعـــكـــس ظـلـها
وأغــار علـيهــا من أرضٍ تمشي وتجلس وتنام عليها
واغار عليها من كأس يقبل شفتيها
وأغار عليها من ثوب يلامس جسدها
واغار عليها من مشط يسرح شعرها
أنتي ياساحرتي يابهجتي ومقلتي
ياروحٍ دخـــلـــت في جـسـدي
فسكنت فأحتواها قلبي
أنا قبلك لم اكن انا
ولم اكن الان أنا
كلي أنتي
وانتي انا
أحبك
تبسمت بخجل ودنكت وهو عينه مافاركت محجر عيني تكلم
فرحتي لمن اشوف هاي الابتسامه بنص وجهج
لمن اشوفج تضحكين احس الدنيا كلها تضحكلي
مريم... هو انت لهاي الدرجه تحبني
... واكثر
... بس اني احبك هواي هواي هوووواي يعني مااعرف شلون اعبر عنه
... همس بأذني... اعرف ومتأكد منج لاي درجه تحبيني مريم
... باوعتله وعيوني تتنقل لكل تفاصيل وجها
مرات احسد نفسي عليك
واشكر الرب لانك بحياتي
لاني عرفتك
حتى وجعي القديم صار بالنسبه الي مو وجع لان بسببه انت طلعت وشفتك وصرت بحياتي
ضرغام... صرت احب شغلي اكثر من الاول لان بسببو عرفتج
مريم..... متندمه على كل لحضه ويوم عشتها واني مااعرفك او اعرفك وبعيده عنك
... اتبسم... وهاي انه يمج
... أحبك بكد هذا الكون لا اكثر ماله حدود
... اتبسم... وهمس... خل ننام هسه امي تحس علينه وتكللنه شبيكم تبسبسون
.... اتبسمت وهمست بااذنه.... هسه تكول عشاق وصرت انه بينهم خربت عليهم الجو
... ضحك بصوت ناصي وعض على شفته
اااخ منج ولج نامي كافي عاد
....اخذت نفس باابتسامه ملئ الرئه... تمام
تغطيت ونمت يم زهوره
كعدنه عصريات كلش الوكت ماشي حتى ضرغام غافي ولا حس
كمت بهدوء اني والجهال لبستهم وحضرتهم حتى اول مايكعد ضرغام يلكانه جاهزين الحجيه هم لبست وتحضرت
همست... يمه ضرغام لساه نايم؟
... اي حجيه
... شوفي شبي يوم تره هو ابد مايغط بنومه
... حجيه تعبان من دوامه للطلعه وطريق هم تعب عليه
... شنو الوكت هسه خو ماغابت الشمس
... بلي حجيه وقت غروب
.... يله يمه كعدي الجهال تلكيهم جاعو حتى ماتغدينه
... اول ماخليت ايدي عليه حتى اكعده فز
.... اسم الله.... ردت اكعدك الوقت تأخر
... فرك وجهه همس بيش الساعه
... باوعت 6
... كام بدون مايتكلم شافنه متحضرين
فات للحمام يسبح وبسرعه حضرت ملابسه
ونطيتها اله
تحضرنه ولبسنه وطلعنه هو ذابها صامت مايحجي شي بمجرد كال نتعشى وراها ارجع ازوركم
دخلنه مطعم وكعدنه نتعشه طول الوقت منتبها عليه نفس هدوءه ساكت والموبايل كالعاده يرن لكن هالمره ماجاوب بعد الحاح برنة الموبايل جاوب
... ليش تلح بسام داتشوفني ماارد
... انه بالنجف
... لا مااجي خابر على مقدم زين هو يحلها
... انه هسا اخابر الامر معليك
رجع اتصل على الامر
... نعم سيدي
انه بالنجف
احنه بعد الرصد والترقب تأكدنه ميه بالميه تجار مخدرات وعدهم زبائن يشترون وعرفنه زبائنهم
وهم اساسا يبيعوها على طلاب المدارس
هم ثنين بالبيت عايشين والبقيه يتنقلون ماثابتين
حتى البيت ماثابتين عليه قبل شهرين جانو بمنطقة ال.... وراها جون بهاي المنطقه
انه قدمت كل التقارير يم مقدم زين
ماشي سيدي
تأمر
صار تدلل
مع السلامه
سده ورجع اتصل على مقدم زين
.... التقارير حول جماعة المخدرات تنطيها لواء سلام
تمام
وسده وكالعاده الحجيه حجت
ضرغام يمه حتورط روحك وي تجار المخدرات نوب
... يمه شنو شفتيني جديد على الشغله حتى اول مره اتورط خلينه نتعشه فدوه لقلبج
.... شبيك ضايج
... جر نفس بقهر وكال ماكو شي يمه اسويلج لفه
.... لا هاي سويت
..... مد ايده حتى ياكل وعينه صارت على الحجيه ضل يباوعلها شلون داتسويها للفه وبعد ماانتهت منها داتاكلها مباشرة سوالها لفه وانطاها الها
يوم هاي اكليها
... دااسوي يوم
... ميخالف من ايدي
... عاشت هالايد هاي يوم
تبسم رغم عينه تذبح بحزنها ومااعرف شنو الي گلب حاله هيج قبل لاينام ماجان هيج عادي ويضحك نام وكعد مقهور كلش مقهور
..... لطالما غبت عني إلا أنك في مقلتي وذاكرتي وأحلامي...
أشرفنا على الحلقات الاخير قبل الختام
اتمنى دعمكم وتصويتكم للروايه
اما الي ممتابع رغد يتابعها والي هي اني
ايضا حسابي على الانستكرام لاتنسون تابعوه
كنت معكم انا رغد الموالي في امان الله ♥
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!