رواية تل الذهب الفصل التاسع وخمسون 59 - بقلم Raghad Almoualy

تل الذهب
رغد الموالي...
ـــــــــــــــــــــــــــــــــــــــــــــــــــــــــــــــ

ضرغام .. مريم تبجين منو وياج منو مضوجج

مريم ... مصوريني واني بالنادي والفيديو منتشر

ضرغام... شنووو... سكت لثواني رجع تكلم
وين الفيديو

مريم... مااعرف خالي اجه وكام يصيح عليه بالبيت ويهدد بيه ويكلي الفيديو منتشر بين الزلم

ضرغام... انطيني عنوان خالج مريم
باوعت لسديم لان مااعرفه سديم اخذت الموبايل مني وكلمته وردتله العنوان
وبعدها قفلت الخط

مريم.. ها شكلج شحيصير

سديم... راح يروح على خالو

مريم... خاف اخسر الضرغام سديم

سديم... وهو انتي هذا الهامج ادعي يطلع كذب سالفة الفيديو

مريم... لعد ليش اكلج اخسره مستحيل حيتقبلني بحياته بعد سديم

سديم... الج الله ادعي كون مايصير شي

بقيت الوب حايره شسوي ماادري
طلع ادم وشايل لارين كال
منو تتوقعون اله مصلحه بهذا التخريب ويتهم ضرغام مريم

مريم... هااا منو حيكون

سديم... غير احد مشوفله الفيديو

ادم ... انتبهي لكلامه يكول ضرغام مكيف ومشغلج منين جاب هاي المعلومات

سديم... بس هي مو صحيحه

ادم... اذا ماطلع وراها حسن اني ماافتهم

مريم.. فزيت... اييي حسن ماكو غيره هو جان يهددني دائما وعرف من صاحبه بشغلي اي صحيح ادم خل اخابر ضرغام خل اكله

ادم... وليش تكلين لضرغام
ضرغام لو عرف ميباوع بوجهج بعد

مريم... هسه خابرته وهو راح لخالي

ادم... انتي شتحجين كتيله

مريم.. لعد اسكت غير افتهم شنو الموضوع

ادم... طلع موبايله وخابر على ضرغام
رد عليه جان فاتح سبيكر

ادم.. شلونك حبيبي

ضرغام... ياهلا الحمد لله انت شلونك

ادم... مريم كالتلي انت على علم بلي صار

ضرغام.. اي وهسه رايحلو انه

ادم... معروفه منو وراها ضرغام

ضرغام.. هاي منتهين منها بس الفيديو اريد اعرف شنو موضوعو

ادم... اتمنه الموضوع بيناتنه يبقه ضرغام لو طلع سالفة الفيديو مو صحيحه

ضرغام... توصيني على عرضي ادم

ادم... اشكرك

... بالطريق انه من افتهم التفاصيل اخابرك

... مع السلامه... وقفل الخط

باوعلي... هنيالج عليه مريم... كالها باابتسامه

سديم... شراح نسوي شلووون

ادم... هو شنو الي شلون ننتظر ونشوف
اجاه اتصال لاادم وراح يخابر
اجت سديم همست

... مريم كليلي شنسوي اذا الفيدوهات صحيح ومنتشره

... شيصير خل يصير اني ميهمني بعد وبالنسبه لضرغام هو يدري بكلشي اني ماضميت عليه شي

... حتى ادم ممكن يتخلى عني يطلكني حتى لارين ياخذها

... هاهيه خل تبين معادنهم لعد سديم ونعتبرها فرصه الله كشفهم النه

... سكتت وباوعتلي بااستيعاب وهمست
صحيح على كولتج فرصه تنكشف معادنهم هم بالتالي يدرون بكلشي

... اي خلص ليش شايله هم

... صرتي متهتمين ولا جنج قبل شويه خايفه لاتخسري

... هذا العقل المنطق هيج يكول بس لو تجين لگلبي اريده ومااتمنه نترك بعضنه

سديم... مااعرف هاي الدنيا لوين حتصفه بينه مريم انتي تعبتي واني تعبت
اني صح عايشه وي ادم بس افتقد الامان
متوقعه بأي لحضه يرجع لسوالفه متصورين شكد تجرعت ايام مره

مريم... ان شاء الله ماكو شي سديم
اني صدكيني تعودت على المر حتى صار الحلو شي غريب عليه مكتوبلي ياسديم اتعذب حتى بالانسان الي حبه گلبي اتعذب الشي الوحيد الحلو الي صار بحياتي وهاي شوفة عينج ممكن يتركني حيصير صعب يتزوجني
هو مكانته معروفه بين الناس واله احترامه وجان متزوج مره ماشاء الله من كلها اني وين وهي وين
اني ماصدكت ينسه يوم الي شافني بالنادي تكوم تطلع بوجهي الفيدوهات حينعاد عليه كلشي

سديم... جان لبسج شلونه مثل هذني الي نشوفهم بالتلفزيون مريم؟

مريم... جنت مو بوعي سديم مقهوره وشاربه كلولي لبسي هذا الفستان لبسته جنت متصوره عافني خلص مهمته براسي وتركني بوكتها انتقمت من روحي
لما شافني واني بهذا لبسي ضربني متحمل نقهر من شافني حتى مره كلي
مريم اني لحد هسه مناسي هذاك اليوم يحرك بگلبي حرك

وااني ماالومه فستاني جان مخصر عليه فتحة ودلعته الفستان كانت كبيره لهسبب نقهر

سديم... شلون اجتج هيج الجرأءه مريم معقوله
لج يكولون الطبع يغلب التطبع

... كتلج مقهوره وصرت اشرب حتى ماافكر بشي فمو بوعي هو حتى لما اجه لكاني مو بوعي خلاني جوه المي حتى اصحى

... يارب كون يوكف وياج بهاي المصيبه مريم

... اعرفه حيساعدني اني واثقه منه تبقه يمه بعد اذا يريدني او لا بكل الاحوال اني عاذرته اني غلطت واتحمل نتائج غلطي

الوقت يمر واحنه نترقب شوكت يتصل شوكت يبشرنه لكن مااتصل
ساعات مرت ومااتصل ابد
بده القلق بداخلي بس جنت اكابر وماابين شي
ادم جان طالع بالشركه اتصلت عليه سديم

بشر مخابرك

... لا مخابر

... دخابره شوف شصاير

... لا سديم هو يتصل

مريم... عفتها تخابره لما بديت احس بالشعور السيء الي احس بي كلما اترك العلاج رحت اركض اخذت العلاج لكن ييدو ان الاوان فات
وغزات وتعرق وتوتري زاد كلش

... اجت سديم عليه

... شبيج مريم

... كلمتها بتعب... مابيه شي

.... مريم اخذتي العلاج

... اي هسه ارتاح

... سوده عليه يامريم شلعبت بيج الدنيا لعببببب
توتري زاد كلش وكوه صرت اضغط على اعصابي جنت مكوره نفسي وكاعده راسي بين رجليه اتهرب من كلشي من المي من عالمي من ماضيي
سمعت الجرس رن
راحت سديم فتحت الباب
ودخلت تركض من باب الغرفه كالت مريم اجه ضرغام واادم
ردت اكوم بس ادري بروحي تعبانه وخاف ازعله بكلمه بقيت بمكاني
ــــــــــــــــــــــــــــــــــــــ
سديم... طلعت عليهم

ادم... وين مريم

سديم... نطيتها خبر هسه تجي

اجيت عليها لكيتها على نفس كعدتها
اجيت يمها
مريم

شبيج مريم امشي اجه ضرغام ويريد الا تجين يلا يحجي

... نترت... كليله هسه تجي

... شبيج على كيفج

... نترت اكثر... لتلحيييين كتلج لتلحيييييين

ضرغام كال سويلنه طريق سديم
اجيت خليت الحجاب عليها وكتله تفضل

دخل وجان نفس وضعها تقريبا
تكلم... شبيج مريم اهدأي على كيفج

مريم... م م مابيه

ضرغام... الفيديو مامنتشر لتخافين مريم هاي زايد من خالج

مريم... هسه عرف عنده بنت اخت

ضرغام... هو مقهور بسبب الي صار وحقو

مريم... حقيش هااااا حقييييييييش
انت صرت ويا وصرت تشوفه صحيح ودكلي حقه
وتهسترت وصارت تضرب على وجهها
كلكم كذابيييين كلكممممم
وانت وياه صرت

اجه عليها ولزم ايديها حتى مااتبقه تضرب بوجهها
مريم كافي مريم سكتي مو هيج قصدي
شبيج

باوع بغضب شبيها ليش هيج منهاره من خابرتني مو هيج

سديم... يمكن مااخذت العلاج

تكلم بحديه... استغفر الله.

مريم....
حاول يهدأني ماهدأت تهسترت هواي حاول يوقفني ماتوقفت على صوتي صراخ واحاول اخلص نفسي منه ضربني كف

وي ضربة الكف توقفت جانت عينه متركزه عليه باوعتله متعجبه

تكلم وعيونه تتنقل لكل تفاصيل وجهي
لازم تتعالجين مريم
باوع لسديم... اختج يرادلهاطبيب نفسيييي

سديم... تكلمت وهي ترجف... اني ماادري والله يعني كلت اعراض مخدرات وهيج

ضرغام... لا اختج عدها حبوب مهدئه وي العلاج من ماتاخذها هيج تصير حاله نفسيه وي المخدرات
باوعلي

مريم لازم تتعالجين حالتج داتزيد ومااكدر اخليج بعد تنهارين وتموتين كدام عيني

مريم... عوفني معليك بيه

ضرغام... مااهتم لكلامي كام وكف على حيله وكلم ادم

انه رايدها لمريم على سنة الله ورسوله

ادم... بس بعدها مخطوبه

ضرغام... تفسخ خطوبتها وانه اخذها

مريم... باوعتله وباوعت لاادم وادم انتبه دااباوعله
هز براسه بتفهم كال ضرغام خل ترتاح البنيه ميصير من شي لشي

ضرغام... اساسا اريد اتزوجها هسه علمود انه اهتم بيها وبعلاجها هنا هي مارتاحت ومريم هواي بعيده عني بقت وبكل مره تتأذه انه مااعوفها بعد

مريم... بس اني

ضرغام... قاطعني... شششش انتي سكتي

ادم... والله القرار الها بالنهايه

ضرغام... وهي موافقه

اتبسم ادم... تفسخ خطوبتها ونكدر نكلكم مبروك

التفت الي ضرغام... اخذتي كل علاجج مو

هزيت براسي بمعنى اي وكال... اترخص انه

ادم... بس ماعرفت شنو الصار

ضرغام... احلها واسولفلكم خلها مريم ترتاح هسه

ادم... مثل متريد

باوعتلي سديم... بعيون كلها امل... مريم بعده يريدج

مريم... خجلت من كلشي شلون وبعد كل الي صار يريدني يمكن يحبني اكثر من مااحبه

سديم... ادعي من الله يعدي كلشي على خير وراها تكوم تضحكلج الدنيا مريم

مريم... ان شاء الله

وحسيت نولد امل جديد وحياة جديده رغم كل المصاعب والمعوقات
مر يوم واحد بعده اتصل ضرغام كال

... حسن طلكج مريم ولازم بالمحكمه تطلكون بااعتبار عقدكم محكمه

... الحمد لله

... يومين ان شاء الله تطلكين محكمه وكلشي ينتهي

... ان شاء الله

... انتبهي لنفسج

... ماشي

.. اروح انه وسده مباشرة
انتبهت كلامه عادي ومو هذاك ضرغام الي يحجي بكلامه المعسول وسده مباشرة عرفت ضايج بس مشي حاليا سكتت وسلمت نفسي للايام والقدر
هي تاخذ مجراها
يومين مرت وهم اخذني ورحت للمحكمه حتى اتطلك جان ضرغام مبين عليه كلش ضايج بس مايحجي شي

وكفت كدام القاضي واجه حسن وكف جان مدنك وبملابس السجن طلكنه القاضي وباوعلي قبل لايروح بنظره مليانه حقد وراها راح
طلعنه اني وضرغام وادم وصديق ضرغام جانو شهود
صعدت وي ادم ورجعنه سويه للبيت ضرغام طلع وي صديقه مااعرف وين راحو

بالطريق تكلم ادم... الي فات مات مريم تنسي وتبدين بدايه جديده

مريم... ان شاء الله

ادم... ضرغام تعابير وجها ماتبشر بخير وادري الي دايسوي مجامله احس حتى من رادج زواج هم مجامله

مريم... اني اصلا مليت بعد شلون متريد تجي خل تجي

ادم... عفيه بيج

مريم... هو ماحجه شي من الي صار

ادم... لا ماحجه ولا راح أسأله

مريم... برأيك ليش ماحجه

ادم... مااعرف

سكتت لان اساسا مااعرف اي شي من الي دايصير
وصلنه للبيت ومشى يوم اعتيادي
عدت الايام مكالماته صارت شبه معدومه بين يوم والثاني لو يتصل لو مايتصل اني مشيت بكلام ادم مااتصلت عليه كلت حتى لو كنت اريده بس مو معناها انسى نفسي ميصير اذب روحي
صرت اهتم بنفسي والتزمت بعلاجي
صرت بالبيت اتعلم شغلات جديده
صفه حلوه بيه بسرعه اتعلم تعلمت طبخ وي سديم
وقت فراغي جنت اتفرج على محاضره دينيه يوميه العصر لسيد يطلع بالتلفزيون يفسر بالقران ويحجي محاضرات كان اسمه السيد مرتضى القزويني هواي يعلم اشياء حلوه صرت احب استمعله دائما واطبق ادعيه يذكرها او صلاة مستحبه او تسبيح
حتى سديم اننبهت عليه

سديم... صايره تسمعين محاضرات وتصلين

مريم... والله حلو كلامه ارتاحله من يحجي وهم اتعلم ضوجه بيش التهي

سديم... ان شاء الله تسجلين بمحو الاميه مريم وتتعلمين تقرين وتكتبين

مريم... اي والله اريد اتعلم اقرأ واحفظ القران

سديم... تحفظين القرآن

مريم... اي شفت دورات تحفيظ القران شكد حلو وحبيت احفظ مثلهم

سديم... شكو بيها ربي يبارك بيج

مريم... جريت نفس تصحبها امنيات بعيده... تدرين سديم بنفسي اتعلم بنفسي اصير فد شي يساعد الناس او الاطفال المتشرده بالشارع تدرين اني عشت معاناتهم واعرف شلونها عيشتهم
اتمنه اساعد الناس الفقره والايتام والي ماعدهم بيوت يعني اتخيل لو اني مكان رئيس الوزراء
تدرين شسوي

سديم... شتسوين

مريم... افتح معامل واشغل هاي الناس الي متشتغل
واسوي بيوت الهم واسوي الشوارع وهذوله الاطفال الي يجدون بالشارع كلهم اخذهم واساعدهم يعني اشتغل للناس اخلي الناس تعيش بالخير

سديم... كل وزير او رئيس لمن يحب يجي يحب يخدم هاي الناس بس تعرفين شنو الي يخلي ميشتغل

مريم.. شنو هي

سديم... الخيانه

... الخيانه؟

... اي الخيانه... لما هو ينطي أمر بتنفيذ كذا شارع او كذا متنزه او مستشفى او مدرسه ويخصص مبلغ معين للشغل طبعا مو هو الي يخصص هذا الشي يجي بعد ما يحسبون الموازنه ويشوفون الميزانيه ويصوت مجلس النواب وتفاصيل كثيره واسع مجالها لكن حاليا نتكلم عن المبلغ المقرر لخدمه معينه تخدم الصالح العام مثلا المبلغ مقرر 80 مليون
60 مليون يتم سرقته من قبل الجهات المختصه
و20 مليون يشتغلون بيها
لهسبب يامريم تشوفين ان العمل رديء وبطيء
التذمر يوقع على كاهل الجهات التشريعيه لكن الجهات التنفيذيه لازمه الحجج والاعذار
فبالتالي يصير تسيب وغضب شعبي مدمر

مريم... يايابه شنو هااااي

سديم... متشوفينه منتقدم بسبب الطمع

مريم... دااتكلم رن تليفوني
باوعت ضرغام فتحت خط

ضرغام... شلونج

مريم... زينه

ضرغام... اليوم الاهل يجون يمكم

مريم...( باوعت لسديم وتبسمت) ليش

... يشوفوج

...اوك

... اشوفج بالليل باي

... الله وياك

سديم... حيجون اهله؟

مريم.. اي يكلي يشوفوج

... راح يخطبج مريم

... يمه گلبي معقوله

سديم... ليش مو معقوله هو مو طلبج كدامنه

مريم... بس صارله كم يوم متغير عليه

سديم... عوفي براحته
وهسه لازم تتحضرين مريم ماعدنه وقت

... شنو يعني شنو اسوي

... ملابس حلوه تلبسين ومكياج مرتب حلو وهم حروح اسوي كيكه نضيفهم كيك وعصير وفواكه
ارتب الاستقبال اكثر لازم كلشي يكون تمام ومرتب
كومي كومي بسرعه

كمت رحت للغرفه وسديم راحت للمطبخ تسوي الكيك
طلعت فستان بينصل ساده لونه وردي غامق
فليت شعري وسرحته بالمشط والكاويه بقه المكياج كلت بعد صلاة المغرب اخلي

رحت لسديم... شوفي حلو هذا الفستان؟

... اي كلش حلو... ليش ممخليه مكياج

... كلت اصلي واسوي عشاء وبعدين اخلي مكياج

... لا ادم حيجيبلنه عشاء مم بره توضي هسه وخلي ميك اب وبعدين من يأذن صلي

... لا افضل انتظر بعد الصلاة

.. بكيفج

جان قلبي يدك من فرحته مامصدكه
بقيت انتظر لبعد الصلاة وراها توضيت وصليت واجت سديم هي خلتلي المكياج هادئ وبسيط
باوعت لشكلي بالمرايه كلش حلو

مريم... احس المكياج البسيط يلوك على وجهي اكثر

سديم... اي حلو عليج

مريم... جانت لمى تخلي مكياج كلش بارزز بحيث جفوني كلها الوان جريئه والحمره طوخ كلشي طوخ

سديم... ذوق بعد بس هي شغلتكم تتطلب هيج.

مريم... ولا حلو.... هذا حسيته كلش حلو

سديم... بالعافيه حبيبتي
سمعنه صوت ادم بره صاح... ها وينكمممم
تعالو جبت العشاء

لبست عبايه اسلاميه فوك ملابسي وشال وطلعت شافني ادم بااستغراب

اشو هيج لابسه

.... ملابسي كصيفه

... هاااا عبالي حتطلعيلهم هيج

... اتبسمت لا

... خوش... عاد انتي موافقه لا

.. اتبسمت بخجل وسكتت

... باوع لسديم... يله عيني رتبيلنه الصينيه خل نتعشه الناس على جيه

جابت سديم الصينيه وبيها العشاء وكعدنه نتعشه
جان شعوري متقلب لدرجه اكلت شي قليل متلهفه لهذه اللحضات كملنه العشاء وشرب ادم الجاي وترخص وطلع

ادم... اعوفكم براحتكم واي شي تحتاحو خابريني سديم

راح وطلع مرت نصف ساعه تقريبا ندك الجرس راحت سديم فتحت الباب باوعت من الشباك جانت ام ضرغام ومره هم جبيره بالعمر ماعرفتها وياها
ام ضرغام مستنده بالعصا وبهذه المره لان متشوف رحبت بيهم سديم ودخلو للبيت تحديدا بالاستقبال

ام ضرغام... وينها مريم والله ماصدكت من كلي ضرغام عليها

سديم... هسه اصيحها خاله

احت همست يله مريم تريدج امه

مريم.. بهمس... لج مستحيه اطلع

سديم... لويش تستحين باعي جيبي هسه مي وقدميلهم وسلمي اكعدي شويه وبعدها اطلعي جيبي العصير والكيك قدمي وروحي

...اوك

رحت للمطبخ جبت المي واخذته ورحت للاستقبال سلمت عليهم وقدمت مي بالبدايه مثل ماعلمتني سديم
وسلمت على خاله ام ضرغام فتحت ذرعانها اول ماشافتني تهلي بيه

ام ضرغام... هلا... هلا... بمريمه يمه شلونج

مريم... الحمد لله زينه شلونج حجيه

.. انه زينه والله ماصدكت من كلي ضرغام عنج كتلو تاليتك رايد البنيه
يكلي يمه حليوه مثل وجهج
اتبسمت بخجل والي يمها تكلمت

... ماشاء الله تبارك الرحمن والله وعرف يختار ابو علي

مريم.. شكرا خاله... اترخصت منهم وفتت للمطبخ حضرت العصير والكيك انتضرت شويه وبعدها فتت قدمته الهم دااطلع

صاحت ام ضرغام.. بنيتي مريم اذا هنا ابقي لاتطلعين

باوعت لسديم بمعنى ها ابقه اشرت بعيونها بمعنى اي
فتت كعدت وسألت ام ضرغام للمره الي يمها

ها هي هنا لو لا

... اي هنا احجي حجيه

ام ضرغام... يمه انتو اكيد عارفين سبب جيتنه بس راح احجيها لان الاصول اصول

يمه انتي اختها تسمعيني

سديم.. بلي حجيه

ام ضرغام... يمه انه عندي وليدي ضرغام وهالواحد جنت مزوجتو قبل بس حكمة ربج مرتو تمرضت بهذاك المرض وانطتكم عمرها وبقه الوليد بلا مره وبركبتو تلاث جهال يرادلهم حيل انه مابقه بيه حيل يمه شكدرلهم

احنه كلنه نمر بضروف صعبه وممكن منكدر نتخطاها بس بالنهايه الحياة لازم نعيشها حلوه مره هاهيه بعد لازم نعيشها
كتلو يمه اريد ازوجك جان رافض وميقبل والله حتى بنت خالو هذيج البنيه الكحيله فلقه مال كمر مارادها وماقبل يتزوج

جان يحبها لنواره يمه هي شنواره
مااخيرها على مريمه بس نواره هاي العزيزه والله حركتو لگلبي حرك وراحت ربيتها على ايدي وكبرت صارت جنها طيره تخبل من هي وصغيره كلت هاي لضرغام الا ضرغام گلبه هوه بنت جيرانه وحبها
كتلو يمه هاي مو من ثوبنا مانريدها هو ماسمع لحد ما ربج كشفها النه وعافها وانه خطبتلو نواره
صحيح بداية زواجهم ماتفاهمو بس وي السنين والجهال لا صار يحبها وميريد يتزوج بعدها
الا لمن كمت الح عليه علمود الجهال كال يمه
انه رايد مريم

يامريم وليدي

... مريم هاي الي جتي قبل فتره يمنه وراحت

... اي هاي شتعرف عنها متزوجه مو متزوجه

.. لا بنيه مامتزوجه وعايشه وي اختها

... باين حاط عينك عليها من الاول ضرغام وتعرف اخبارها

... يوم هسه تخطبيليها لو لا

... هاهيه اخطبها الك

متحمل لثاني يوم كلي اليوم اوديج يمه وهاي اجيتكم انه وام محمد صديق ضرغام

سديم... تشرفنه

ام ضرغام... ها يوم شنو رأيها العروس

مريم... من سمعت كلمة عروس گلبي صار يدك بسرعه من فرحته متحملت كمت ورحت جوه
تذكرت العروس الي تلبس فستان أبيض بسيارة عرس مره لماجنت بالتقاطع عرفت

من الذاكره ...

وسط الشوارع فاتت سيارات هواي ومقدمة السيارات جانت سياره تزينها ورد ودبدوب كبير
ونشرات لفتت انتباهي هواي وبقيت اباوع لحد ماصارت قريبه عليه وشفت العروس بيها بنيه تلبس فستان ابيض ومغطى وجهها بالقماش الابيض ويمها زوجها لابس بدلة رسميه سوداء
وبعدها راحو وجان مصور يصور وناس طالعه من ابواب السيارات تركص فرحانه بالعرس
بقيت اباوع وحجيتله ليو وكتها كال

... مريم هاي زفه يعني يزفون عرسان

... يعني يتزوجون مو

... اي

... بس شكد حلو فستانها

... اي حلوه الزفه... تتمنين مريم تلبسين مثل فستانها؟

... اي حلو

قاطع ذكرياتي صوت سديم وهي تسلم عليهم حتى يروحون

سديم...فاتت كالت ها مريم شنو رأيج ضرغام واجه خطبج بعد شتردين

مريم... بفرحه... مامصدكه والله مامصدكه سديم

سديم... لا صدكي رب العالمين عوضج حبيبتي

مريم... حروح اخابره
رحت بسرعه واتصلت عليه نطاني رفض
عفته مااتصلت بعد جنت عايشه بفرحتي
ياربي العوض منك واخيرا

تقريبا ساعه اكثر اتصل وفتحت خط مباشرة

... شلونج مريم

.... شنو هاي المفاجأه ضرغام

... هاي مو مفاجأه هاي الي لازم اسويها من زمان

... فرحت حيل توقعت متريدني بعد كل الي صار

... اعرف الي صار مو بيدج لو انتي رايدتها طبعا مااخذج مريم

... شوكت نتزوج

... ضحك بصوت عالي اول مره اسمعه هيج يضحك
كال... مستعجله مريم

... يعني اقصد نعيش سوه

... هانت حبيبي مابقه شي وعيونج
كليلي امي حجت كلشي مو ماضمت شي

... تبسمت وكتله الحجيه الخير والبركه شتحجي عادي

... باجر امرلج انطيج فلوس تشترين كل لوازم العرايس شيشترون انه مااعرف بهاي السوالف
انتي وسديم روحو

... اوك

.... يله تصبحين على خير باجر دوامي لازم انام

... وانت من اهله

... اخابرج الصبح كعدي مو متردين

... اوك

... باي

رحت لسديم وكتلها

... باجر حيجي كال انطيج فلوس واشتري شنو تحتاجي للعرس

... هو كبل جهاز غير تعقدون محكمه يدفعلج مهر شو هيج كبل

... هاااا
ماادري منتبهت

... وهو؟ هاااا شنو ميعرف لو مامتزوج قبل

... اكله؟

... اي اتخابري وتكليله لتجيبلي غير بالاول يدفعلج مهرج

.... ماشي حخابره

... خابري وافتحي سبيكر اريد اشوفه شيكلج

اتصلت عليه وفتح خط

... كولي مريم

... ضرغام اشو انت مباشرة حتجيبلي فلوس اشتري جهاز ولوازم عرس غير بالاول تجيبلي مهر ونعقد محكمه

... سكت لثواني بعدين تكلم...

مريم انه ادفعلج مهرج وكل حقوج بما يرضي الله يمج بس مهر وكعدة زلم لا
زوجتي ماصارلها شي من ماتت مو حلوه بحقي وبحقها

... وعقد المحكمه

... سكت لثواني بعدين تكلم... ملحوك عليها شنو ماعندج ثقه بيه

... طبعا عندي ثقه بيك بس يعني ردت اعرف

... كلشي بوقتو حلو مريم

... اشرتلي سديم بمعنى فلوس مااريد باجر وكتله
فلوس مااريد باجر لاتجيبلي

... ليش

... يعني خليها من تجي ليش الاستعجال

.. براحتج مريم

... ماشي باي

... قبل مااكلج باي اريدج تتأكدين من شغله وحده انو مريم رجال عدها والرجال لايغدر ولايأذي خليج مطمئنه من هذا الشي مريم ومااريد بالج يودي ويجيب انتي غاليه عليه مريم لاتخلين الشيطان يلعب بعقلج
تصبحين على خير مره ثانيه

... وانت بخير

باوعتلي سديم... سالفته مو خاليه وكولي سديم كالت

... كلمتها بنفاذ صبر.. هه ماعاد اهتم يريد يتزوجني فتره ويطلكني عادي مااعتقد اكثر من الي صار بيه سديم

... انتي شلون تقبليها على نفسج

.... وشنو بيدي ىسديم هاااا خلص تقدملي واني وافقت وخلص

... مريم لازم تعرفين ليش ميقبل يعقد محكمه عليج
اذا مايعقد محكمه الزواج هذا مايصير

تشتتنا الطرق وتزرع العواقب لكن كلانا يؤمن بأن القلوب اذا تحابت تلاقت

كنت معكم انا رغد الموالي في امان الله ♥