تل الذهب
رغد الموالي
ـــــــــــــــــــــــــــــــــــــــــــــــــــــــــــــــ
سلام عليكم أحبتي
طاب مسائكم بكل خير
اعود وياكم بتكملة رواية تل الذهب متابعه طيبه اعزائي...
ـــــــــــــــــــــــــــــــــــــــــــــــــــــــــــــــ
ضرغام...لزم وجهي بيده الاثنين برقه مريم انه روحي متعلكه بيج
أحبج بكد رحمة الله....
... باوعتله عيوني صارت تتنقل من اليمنه لليسره دمعت من الفرحه صدك الي دااسمعه ودااشوفه لو كذب
ضرغام... خلص صبري ماعاد اكدر اتحمل مااعترفلج
مااكدر ابقه ضام عليج وحبج يوم عن يوم يزيد بگلبي
مريم... اكتفيت بالسكوت مدااصدك احس الدنيا ملامتني من الفرحه تمنيت اكول للعالم كله تعال اسمع وشوف ضرغام شلون يحبني
ضرغام... اعرف بيج تفاجأتي
باوعلي لثواني ولزم راسي قبل جبيني همس رايح انه واعوفج انتي بحفظ الله
استدار حتى يطلع تمشى خطوتين همست
ضرغام صدك تحبني
... اي ياروح ضرغام والله احبج
رايح انه مريمي باي
... الله وياك
... روحي وردتلي مااعرف شنو اكول او احجي
فتت جوه جانت سديم بالمطبخ والابتسامه تارسه وجهي
سديم... ابتسمت وغمزت... شكلج
مريم... فرحانه... فرحانه سديم مدااصدك
گلبي ولج گلبي يدكك
سديم... شكو احجي
مريم... كلي
كلي احبج
سديم يعني صدك يحبني من كل گلبه مو شفقه ولامساعده لا لا صدك يحبني يعني عشك يعني يتزوجني سديم
سديم... ابتسمت.. صدك والله اني من شفته وشفت شلون يخاف عليج وغيرته فضحته بالمستشفى عرفت يحبج
مريم... مدااصدك والله مدااصدك كرصيني خاف دااحلم سديم
سديم... لا حبيبتي مو حلم هذه حقيقه
مريم... دمعت عيوني فرح
هاي اول مره تخنكني العبره فرح سديم
اني حيل احبه روحي من الدنيا هوا والله مدااصدك
سديم... على كيفج لايصير بيج شي
حبيبتي ربي يجعله من نصيبج ويسعدج
مريم... يارب
يارب
اكلج سديم علميني شسوي شلون اصلي اريد اكوله لرب العالمين شكرا
اريد اتشكره سديم جنت على طول اسولف لرب العالمين هواي شغلات بگلبي واكله اني متأكده حتساعدني واني اعرف انت تسمعني سديم سمعني وساعدني وخلاه لضرغام بطريقي ساعدني وحيخليني اكون زوجته
كليلي شسوي اريد اصلي ناسيه شكول
سديم... مو علمتج شلون تكليلي دااصلي جنتي تكذبين عليه مريم
مريم.. شسوي انسى فدوه دعلميني ووعد بعد مااعوفها اني اصلا حابه اصلي والله حابه اتغير اريد اصير المره الي يريدها ضرغام اني اعرف شلون يحبها شلون يريدها لزوجته تكون
سديم... اعلمج ليش لا
تعالي توضي بالبدايه لو هم نسيتي
مريم.. اي نسيت
سديم... حتوضى كدامج وتعلمي مثلي
بدت تتوضى كدامي واني اباوعلها واتوضى مثلها
بعدها رحنه لبسنه الايزار الخاص بالصلاة ووكفنه نصلي شكر لله
اني اكول وهي تعيد وراي حدما كملنه الصلاة
سديم... حجيبلج سبحه وسبحي
كولي الحمد لله والشكر لله فريها للسبحه كامله
وردي سبحي استغفر الله العظيم
حروح اسويلها ممه لارين واجي الكاج مكمله التسبيح علمود اقره دعاء وانتي ترددي ورايه
مريم... اي يله
راحت سديم على بنتها واني كعدت اسبح مثل ماعلمتني سديم سبحت حدما كملتها واجت سديم
ها كملتيها
اي
تعالي نقره هذا الدعاء لتسهيل امرج
كولي وراي
اللهم لك الحمدُ كلُّه، اللهم لا قابضَ لما بسطتَ، ولا مُقَرِّبَ لما باعدتَ، ولا مُباعِدَ لما قرَّبتَ، و لا مُعطِيَ لما منعْتَ، ولا مانعَ لما أَعطيتَ اللهم ابسُطْ علينا من بركاتِك ورحمتِك و فضلِك ورزقِك، اللهم إني أسألُك النَّعيمَ المقيمَ الذي لا يحُولُ و لا يزولُ اللهم إني أسألُك النَّعيمَ يومَ العَيْلَةِ، والأمنَ يومَ الحربِ، اللهم عائذًا بك من سوءِ ما أُعطِينا، و شرِّ ما منَعْت منا اللهم حبِّبْ إلينا الإيمانَ وزَيِّنْه في قلوبِنا، وكَرِّه إلينا الكفرَ والفسوقَ والعصيانَ واجعلْنا من الراشدين اللهم توفَّنا مسلمِين، و أحْيِنا مسلمِين و ألحِقْنا بالصالحين، غيرَ خزايا، و لا مفتونين».
ااااااامييييين يارب العالمين
مريم... شكرا سديم وحضنتها وهي هم حضنتني
انتي اروع اخت بالدنيا
سديم... لا مريم اني صرت سبب بأذيتج
مريم... لا انتي متقصدين واني هم صدمتج صدمه وره صدمه حقج
حتى هو ضرغام جان يكلي اني مااريد اسوي وياج شي يخليج تكرهيني بعدين
جنت اشوف قربي منه عادي
بس هو يكلي لامريم هالشي غلط مو عادي
راح يجيي يوم وتعرفين لااي درجه غلط وبوكتها حتكرهيني
سديم.... اني فعلا نصدمت وحترك دمي وشفتج تحجين ولامهتمه فانفعلت
مريم... عادي ماصار شي
يله اني اروح لغرفتي نعسانه
سديم... تصبحين على خير
بليلتها مانمت مباشرة من فرحتي
بقيت اضحك واحاول اكتم ضحكتي شيكولون عليه لو سمعوني تخبلت
حاولت انام مدااكدر اتصلت عليه
ررن... ورررن.. وررررن يله جاوب يصوت ناعس
..الوو
... هاي نايم وكعدتك
... من صوته بين صحصح رد بخوفه ها مريم بيج شي
... لا لا مابيه شي اسفه كعدتك
... لا لا عادي بس كليلي بيج شي ساعه بيش هسه
... مااعرف بس مااجاني نوم وكلت اخابرك
... ساعه 2 ونصف.... ايييي ليش ماجاج نوم
... مااعرف... وتبسمت
... عادي لانج نمتي البارحه هواي
... يمكن... يله كمل نومتك صحيتك من نومك
.... عادي
.... تصبح على خير
... نامي مريم لاتبقين كاعده
... اي
... تصبحين على خير عيني انتي
... وانت بخير
سديته منه فرحت اكثر
حضنت تليفوني ونمت
حسيت على تليفوني يدك باوعت جان ضرغام
فتحت خط....
ضرغام... صباح الورد
... صباح الخير
... جنتي نايمه
... اي
.. البارحه ليش سهرانه
... هيج جنت افكر
... بشنو تفكرين
... افكر
... اي غير اعرف بشنو
... هو انت شوكت كعدت
... الفجر
... ليش
... مااكدر انام هواي مامتعود والبارحه رجعت جنت تعبان لكيت زهراء مضوجيها اخوانها خليتها بحضني ونيمتها ونمت
... منو يمهم
... امي وبنت خالي هم يمهم
... شوكت تروح شعدها باقيه
... ضحك... سندس شوفتها نجوم الظهر كامت بين يوم ويوم تجي
...اي بس يعني ليش تجي
... تغارين مريم
... لا بس
بس يعني
... لا انتي تغارين مريم
... سكتت
... تكلم... ومالي اشتاق لصوتك في كل ثانيةً
...جفيت الاصوات ام انت كل اوتار النغمات
... اتبسمت وبقيت ساكته
... همس... أحبج
... اني أحبك بكد هاي الدنيا كلها
... مريم
... ها
... مريمي
... هااا
... عيني انتي
.. شنوو
... أحبج وغلات امي
... ضحكت
... اموت بضحكتج هاي لج تخلي گلبي هيج يدك سريع
... لعد هو يدك بطيء
... ضحك... لا بس هيج احساس ماعرف شوصفو مريم انه عسكري مو قباني واشرحلج صحيح
... اني هم هيج كلبي يصير يدك سريع والله من اكلمك
... دايتكلم واجه حسين يبجي ويشكي لاابوه
مريمي راح اخابرج بعدين ضاهر علي ضارب حسين
... اوك باي
... باي عيني انتي
كمت من فراشي وكلي نشاط وحيويه هيج احس الدنيا ماواسعتني اريد اضحك واريد اطير واريد افرح رحت للمطبخ خليت الجاي على النار وبديت احضر الريوك وااغني كعد ادم لابس متوجه داايطلع
ادم.. صباح الخير شنو هالنشاط والاغاني من الصبح
سديم... تبسمت... هيج حبيت اغني
تعال نتريك مكعدت سديم
... لا بارحه لارين صخنت وبقت سهرانه عليها
... خل نتريك لعد
... يله عاشت ايدج.... مكتيلي شمكعدج من الصبح
... نمت من وكت
... هااا... باوعلي وكأنه مامصدكني... بدينه نتريك ونسولف
ادم... ضرغام خوش ضرغام رجال والنعم منه
... اي حباب وماكو منه
... متزوج هو
... اي وعنده 3 اولاد بس زوجته ماتت
... هز براسه بمعنى اي بعدين تكلم
شوفي مريم راح انصحج واعتبريها نصيحه من اخ
اني هم اخوج وتهمني مصلحتج واخاف عليج
ضرغام صحيح خوش رجال وشهم وابو وكفه بس لاتنطي مجال تحجين ويا وتخابري لااوقات متأخره مريم هالشي غلط قبل جان غير ضروف جبرتكم تحجون جبرتج تسولفين اني هم خليتكم تحجون وحدكم بوجودنه وكلت هم جانو قبل يعرفون بعضهم وانطيتكم فرصه تحجون
انتي بعدج صغيره وهو رجال شايف وعايف واني اخاف عليج اني سمعتج تره وانتي تخابري قبل شويه لاتعتبري تجسس ثقي جانت صدفه
وكلت مااتدخل هاي حياتها وهو حافظ عليها ومستحيل حيأذيها هسه
اني اشوفه مخليج باله بس انتي تقبلين بي وهو عنده تلاث اطفال؟
... يعني شكو بيها
... ثلاث اطفال معناها مسؤوليه مريم اضافه لهذا الشي انتي بعدج صغيره وحتريدين اطفال هو يمكن يكلج اني مكتفي بالاطفال ومااريد ويخليج تربيهم وبس مستعده تقبلين هالشي
... لا ضرغام مايسويها
... شوفي مريم لا عبالج اني رجال همجي بالعكس اني كلش اتفهم هاي الامور واحترم مشاعركم بس خل نعوف العاطفه ونفكر بعقل نفكر صح
الحب ميبقه نفس لهفته بعد الزواج اساسا الحب الحقيقي بعد الزواج مريم قبل الزواج هاي رغبه بمجرد تتحقق بعد يبدي الكلام الحقيقي
اني من دااكلج حتى تفكرين صح تشوفين نفسج هل انتي مهيأه لدخول عائله بيها اطفال
... يعني اني اشوف هالشي بسيط وعادي
... صحيح انتي تشوفي عادي بس اني دااكلج انتي مستعده تتحملين سلبي قبل الايجابي
يعني ضرغام هسه انتي داتشوفي وقت ماهو مزاجه تمام انتي مستعده تتحملي وقت ماهو عصبي
وقت ماهو خل نفترض يمر بضروف صعبه ماديه او عائليه
انتي مستعده تتحملين اطفاله
الطفل كلشي متوقع منه واي خطوره تصير عليهم كل اصابع الاتهام تتوجه عليج لان حتكونين زوجة اب مريم لهسبب فكري بعقل
وأفضل تتركيه حاليا اولا انتي بعدج على ذمة حسن وهالشي شرعا حرام
ثانيا انتي من رجعتي شهرين ونخطبتي وهسه حتفسخين وبعدج مافسختي دخلتي بعلاقه جديده اني اكول لو تنطين لنفسج وقت
تستقرين وتفكرين صح تعيدين نظام حياتج من جديد تشتغلين على نفسج
تره الرجال يحب المره الواعيه اكثر من الحلوه
.. شلون يعني
... يعني اني لمن اجيت اتزوج مريم شنو الي خلاني اتزوج اختج سديم؟
- مااعرف غير حبيتها
... لا مريم مو شغلة حب
اختج اكو الاجمل منها واذا على الحب فحبيت قبلها
واذا على رغباتي ونساتي فجنت كومه عندي بنات بحياتي بس لما فكرت بعقل وردت اتزوج اختاريت اختج تدرين ليش
... ليش
... لان واعيه اولا
ولان بنيه محافظه على نفسها ثانيا
ولان شفت بيها صفات الزوجه الي ممكن تكون ام لااولادي حاربت وياها لحد ما بقيتها تره كلها قبل كم شهر جنه متفقين نتطلك بس اني اصريت يكون عندي طفل منها تعرفين ليش
... ليش
... لان جنت متأكد انو بمجرد حتشوف الطفل حتتراجع غريزة الامومه راح تغلبها وراح تفكر بطفلها سديم واعيه واحب عقليتها رغم وياج طلعتها ابد مو محببه لكن بصوره عامه اني احب عقليتها وتفكيرها
جانت تشتغل عندي سكرتيره راقبتها ودورت وراها واختبرتها
... شلون اختبرتها
... تحارشت بيها مانطتني مجال وعاندت وتعاركنه بس خليتها بالي اكثر وقررت اتزوجها بس جنت اعرفها لو تقدمتلها حترفضني
... ليش ترفضك... انت وين اكو منك
... جنت قبل علاقاتي هواي بالنساء مريم وهي تدري وعرفت كل اموري لهسبب عرفتها مستحيل تتقبل هيج زوج مثلي
... لعد شلون قبلت
... النصيب لما يريد يصير بعد يرهم كلشي مرت خالج خلود تمرضت واحتاجت فلوس عمليه
اني استغليت هالشي وكتلها اتزوجج واعتبري مهر هي ضطرت توافق وتزوجتها
... عزززه شلون هيج
... ردتها ام لااولادي مريم اني قليل الثقه بالنساء من كثر ماعشت وشفت جانت اختج الانسب الي
... الله يسعدكم
... لهسبب اكلج فكري صح ضرغام تطلع على كل جوانب حياتج ممكن ينعكس هالشي سلبي بعدين عليج الحب ميبقه نفسه وره الزواج
فكري صح وبعد لتخابري
باوع للساعه...
تأخرت اني راح اروح باي مريم
... الله وياك
شفت كلامه نوعا ما صح هواي جوانب مافكرت بيها الي فكرت بي هو ضرغام وبس
لكن لو مهما صار اني مستحيل اعوف ضرغام واتحمل كلشي علموده
كمت على البيت اشتغل بواهس ونشاط
وبالي اتخيل اكول هسه بيت ضرغام لمن اتزوج هيج حشتغل وهيج حطبخ وهيج حسوي
اخذني الواهس بالتنظيف ماحسيت بالوقت حد ما كعدت سديم
سديم... صباح النشاط شنو هاي كاعده ومن وكت
مريم... اي وكملت شغل بس اطبخي اني طبخي مو هالكد
سديم... عاشت ايدج ليش مكعدتيني
مريم.. ادم كال سهرانه على لولو اكلج شلون صارت
سديم.. زينه صخنت بالليل وبقيت سهرانه عليها
... حبيبتي تلكيها خاف ماخذه برد
.. يمكن .. يله اروح اطبخ يادوب الحك
كملت تنضيف وحضرت ملابسي وفتت للحمام سبحت وطلعت انشف بشعري وسرحته
وحسيت بنفس الشعور الي كل مره احسه بسبب المخدرات نسيت اخذ العلاج
كمت بسرعه واخذت العلاج لكن الاعراض بعدها بيه
كورت نفسي مثل كل مره وبديت اتوتر جانت لارين تبجي وسديم ملتهيه عنها بالمطبخ
احس صوتها بنص راسي تبجي توترت حيل
واسد بأذني بس متحملت صرخت بسديم
روووووحييييي لبنتجججججج
شنوووو انتيييييي من أأأمممم
اجت... هاي شبيج مريم ليش الصراخ
... كمت ونترت بعصبيه .. سكتيهاااا كافي حسي بغيرج مو عيشه هاااايي
باوعتلي وعافتني وطلعت
رغم الاعراض بدت بالتراجع بعد مااخذتالعلاج لكن التوتر بعده
كمت شغلت التلفزيون جان طالع فلم اكشن كعدت اتفرج عليه انتبهت لنفسي انو اني اشجع الشرير الي بالفلم واحسه هو الصح ولما تصير حروب او يقتل اشوفه حلو هيج تصرف وعادي واحسن ويستاهل الي قتله
انتبهت لنفسي صايره اتوتر بسرعه
والاكشن والاذيه اشوفها راحه نفسيه
اجه ادم بسرعه خليت الشال على راسي
ادم.. هلو ضلعه
.. هلو ادم
.. شونج كاعده هنا وحدج
... اي سديم يمكن فاتت للحمام
... تمام اني هم اريد اخذ دوش احس روحي متكسر شو تعبان اليوم
... سلامتك ليش
... تعبان هالايام مداانطي لروحي مجال هو ضغوطات عليه
... هزت براسي بمعنى اي وهو راح جوه بقيت اني بمكاني مددت احس نفسي احسن من قبل شويه
صرت اعيش بتناقض مدمر
ساعه اتصرف صح وساعه غلط
ساعه هادىه واخلاقي حلوه ساعه العكس
تعبت من نفسي حيل
فكرت بكلام ادم للمره الثانيه وكلت
ياترى ضرغام حيتحملني بهاي مزاجيتي وتقلب حالي؟
مابين صفناتي وحسباتي اجت سديم
طالعه من الحمام لافه الخاولي حول شعرها كعدت يمي وتكلمت بهدوء...
مريم حبيبتي اكدر احجي وياج.
مريم... شنو
سديم... شبيج قبل شويه ليش عصبتي
... مااعرف
...اني عرفت تأثير المخدرات بس يامريم غير تاخذين علاجج بوقته
... نسيت
... دكومي يله هسه نتوظه ونصلي
... هزيت براسي بمعنى اي وكمت وياها حتى اصلي
جانت ترفع بصوتها بالصلاة واتعلم منها وبكل مره صارت تعلمني بديت احفظها للصلاة
وحتى سورة الحمدو حفظتها والاخلاص
كلش فرحت لما شفت روحي صرت اعرف حتى حماسي زاد صرت هواي اسبح لان التسبيح سهل وسديم كالتلي بي حسنات هوايه ورب العالمين يغفرلنه لمن نكول استغفر الله ونبقه نكرر يمسح من ذنوبنا
مريم... يعني شنو ذنوب وشلون يمسحها
سديم.. يعني اخطاء احنه نسويها وهي حرام رب العالمين ميقبل بيها فلمن نكول استغفر الله معناها تندمنه على خطأنه وطلبنه من رب العالمين يغفرلنه ذنوبنه
مريم... يعني الانسان شنو يكون مسوي بس من يستغفر الله يسامحه
سديم... اي طبعا شوفي مريم اهم شغله انو مانأذي الناس يعني الانسان ممكن مسوي هواي غلطات بحياته بس مأذي نفسه وتندم بعدين ويجي يطلب رب العالمين يسامحه راح يسامحه لان الانسان خطاء
لكن لما يأذي الناس ممكن يشهد زور عليه ويدمر حياته هاي ذنبها جبير حيل عند رب العالمين لان الله مايقبل بالظلم مريم
مريم.. وبقية الامور...
سديم... شوفي هو الانسان بكل الاحوال يستغفر وهي بقت يم رب العالمين بعد يسامحه او لا
بس اكيد يسامحه اذا شاف نواياه صادقه وان مايكرر الغلط
مريم... اي اني بعد مااسوي شي غلط والله
سديم.. اعرفج حبيبتي
مريم... زين اكلج هاي شلون اكدر مثلكم اقرأ بالقران نور مرت ضرغام جانت شكد حلو من تقره سديم صوتها يخبل بالقرايه وتقره هيج يعني تطول بالكلمات
سديم... قصدج تجويد
مريم... مااعرف المهم هي تقره كلش حلو هاي شلون هيج عفيه علميني
سديم.. مريم انتي متعرفين تقرين حبيبتي لازم تعرفين تقرين بالاول بعدها حتعرفين تقرين قران
مريم.. شلون اتعلم هو اني مدخلت مدارس اني وصغيره شتعلم هسه
سديم... سهله اسجلج بمحو الاميه وتدرسين
... شنو هاي
... يعني مدرسه مال كبار بعمرج بس ميعرفون يقرون
... اي ياريت... زين اكلج هو انتي ليش تجي ايام تقرين بيها القران وتجي ايام ماتقرين
... لان مو شرط يوميه
... يعني هو من العباده
.. بلي من العباده مريم بس رب العالمين مخيرنه بكيفنه شوكت منحب نقراه بس تعرفين ياوقت يكون افضل القراءه بي
.. ياوقت
... الفجر... كلش بي اجر عظمة كلش جبيره والملائكه تزور البيت الي يقرأ فيه القران
... الله شوكت اكدر اقرأ
... ان شاء الله حبيبتي انتي هسه ماعليج احراج لان انتي ماتعرفين تقرين لكن الي يعرف يقرأ ومايقرأ رب العالمين بيوم القيامه يحشره اعمى لان يعتبر من المتكبرين على ايات الله سبحانه وتعالى
... هسه اتعلم اقرأ واكتب واتعلم اقرأ قران سديم
... اي ان شاء الله حبيبتي
مرت الايام والتزمت بعلاجي ضرغام مرات يخابرني مكدرت اكله لا ولتخابرني او حجيت شي
جانت فترة هدوء مرت لحد ما بيوم اجه خالي دك الباب بقوه
فتحت الباب سديم
ها خالو خير ليش هيج تدك الباب
... اختج وينهااااااا
...شكو شصاير شبيها اختي
... تالي جايتنه وره مالعبت لعببب جايه تخلينه علج بحلك العالم وينهااااا
طلعت وشافنييي وعاط بيه
ولج ام النوادي شلفاج علينه بعد هاي السنين جايه تطمطمين بلاويج بينه
... باوعت لسديم ولخالي وكفت شبكت ايدي ووكفت متوتره وخايفه وساكته
... وهذا الكلب الي مسوي نفسه حريص وجايبج علينه عود مسوي فضل جايبج بعد مامله جيوبه زين
هاااااا
سديم... وانت جاي تحاسبها الها
حاسب روحككك انتو الي تعاجزتو منه واحنه بنات ثنين صغاااار عفتونه يوميه بيت لحد ما اخذو اختيييي انتو السببب
.... احنه السبب سدي حلكج واعرفي شلون تحجيييييين
... اييييي انتو السبببب انتو الي ضيعتووووو اختييييي انتو الي خليتوهاااا توصل لهاي المراحل
لعد هاي السنين كلها شفكررررت وين ممكن تكوووون
... مربيها عنده تكبر يشغلها بالنوادييييي والله لااكعده عشاير والله لاافضحه فضيحه
... راح تفضح بنت اختك قبل لاتفضحه
... بنت اختيييي نفضحتتتت
فيديو مالتها يتنقل بين الزلممممم
... باوعت ولطمت على وجهي شنوووو شتحجي خالو
... والله اليوم لااطلع بروحج
اجه عليه وضربني كف وسديم صارت تصرخ وكفت بوجها دخل ادم وصاح بي
خاااااال
كف عني ضربي وباوعله اجه ادم
مو عيب عليك تمد ايدك على مره متستحييييي
... هاي الي كدامك بنت نوادييييي جايه بعد هاي السنين تحط روسنه بالكاع
... والله وهاي بدل متحاسب روحك هو منو السبب بكل هذا
... انت لتدخل حي الله نسيب اختها نفضحت باجر هم تطلك اختها وتكول مااتشرف بيكم
... هاي عقليتك الطايح حظها تحجي هيج مو اني احترم نفسك وتفضل منا من غير مطرود
... باوع لمريم... امشي لجججج امشي يمي والله لاادفنج بالحياة اني اعلمج
ادم... تدفن منوووو شنو تايها
... انت لتدخل مخليها بيتك على شنووو احنه خوالها واحنه اوله
... هسه تذكرت من الشي مسك خفت وعرفت عندك بنات اخت وين جنت عنها هاي السنين كلهاااا هااااا
... صار مناوش كلام بينهم وغلط وصياح اخر شي خالي كال اني اعلمج مريم مراح اعوفج ياعار انتي عار واجيتي علينه
طلع خالي باوعتلهم واني ابجي وارجف
ااني والله مامصوره فيديو ولا طالعه وي احد
ادم... دايكول فيديو مريم يعني مدايتبله عليج
مريم... ماادري يجوز احد مصورني واني ماادري
ادم... ( هز راسه بتأسف) ليش هيج مريم ليش
مريم... اني حجيتلكم كلشي ماضميت شي
ادم... ادعي ربج يطلع كلامه جذب لان اذا صدك ورقه واحتركتي مريم
عافني وراح جوه وسديم صارت تضرب على وجهها
شلون ولج شحنسوي
مريم... بدال مايروح يدور منو مطلع هذا الفيديو
سديم... خوالج جلااااب شفتيييي جا طلع مراجله عليج كليلي شلون
مريم... اني اعرف منو يخلصني من هاي الورطه
سديم.. لا لتكليله اعرفج تقصديين ضرغام مريم خاف يصير ضدج من يسمع بالفيديو
مريم.. لا يسمع مني احسن من مايوصله الفيديو سديم
رحت جوه لغرفتي واتصلت على ضرغام
... ضرغام شلونك
... زين انه مريم مرتااااح حيل مرتاح
... ان شاء الله دومك... باوعت لسديم اشرتلي بمعنى لاتكليله تكلم هو
.. كولي مريمي محتاجه شي بيج شي
... لا... ترددت بين اكله بين لا... سألته
... ضرغام هو انت لو سمعت شي عني شنو تسوي
... مثل شنو يعني شلون
... يعني لو مهما يصير تتخلى عني ضرغام
... انه مااعوفج مريم شلون الواحد يعوف روحو
... غوركت عيني اختنكت وبين هالشي من نبرة صوتي...
بس مرات نعوف مجبورين
... شنو شلون يعني مريم شبيج
... ضرغام اني احبك خليك متذكر هالشي حبيتك اني ويوم الي أذيتها لنفسي جان بسبب فراكك عذبتها لروحي
... شذكرج بهذا الحجي هسه
... لان.... وسكتت... لان
... لان شنو
... لان اني قررت نترك بعضنا وينتهي كلشي
... شنو ليش
شصاير
... يجيت متحملت اكتم اريد اشكيله تعودت اشكيله
... مريم تبجين منو وياج منو مضوجج
... مصوريني واني بالنادي والفيديو منتشر ضرغام
قد تظن انك نجوت ثم تكتشف انت في اول الطريق
كنت معكم انا رغد الموالي في امان الله ♥
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!