رواية تل الذهب الفصل الثامن عشر 18 - بقلم Raghad Almoualy

اي حب ذاك الذي يستوطن قلبي وعقلي وكل جوارحي
اي عشق أهيم به انا فأكتمه خوفا من كل شيء خوفا منك انت
ــــــــــــــــــــــــــــــــــــــــ 
بقلم رغد الموالي
ــــــــــــــــــــــــــــــــــــــــ

سديم.....
سد الموبايل بوجهي ادم
جان كلش ضايج احسه نار واشتعلت بي
بس مااهتميت بالبدايه جان همي مصيبة هنده

جانت تبجي ورباب تشرحلها وتحاول تهدأها

- كافي عاد كلنالج الولد يحلوها

- واني كتلج مراح يعوفني بحالي

- وتالي شلووووووون

- اخابره واكله شرايد

- ويطلع مسجلج ويورطج

- لعد شلووووووون

- سكتي وخلي الشباب تحلها سدي حلكج انتيييي

- سكتت بس دموعها مانشفت

باوعت بأتجاه السماء بكلبي اكول
ربي انت ارحم الراحمين
ترحم بهلانسانه وتخلصها وتنجيها من هذا الهم
ذنبها وثقت وامنت وعشكت
ذنبها حبت ورادت تفرح بدله بيضه وي الانسان الي حبه كلبها
شنو هالانسان هذا من ياطينه مخلوق
معجون بالشررررر
لدرجة انه ممكن يأذي بشر بكل سهوله
اعوذ بالله

رباب بطبعها عصبيه ومتتحمل تبقه تجامل اعرفها من تتهزم وتخصم الكلام لان اذا تبقه تجادل ماتجامل بعد تحجي

هدأت هند خليتها تمدد على سريرها ترتاح رباب راحت تحضر اكل
واني كعدت يم هند اقرالها على راسها يمكن تهدأ
تعويذات  وايات قرانيه علمتها الي مرت خالي
تخلي الانسان يرتاح
وحصنتك باسم الله الواحد الاحد
الفرد الصمد
باسم الله العظيم
بااسم الله القدوس الكريم
بااسم الله الرحمن الرحيم

اللهم اني اعوذ بك من كل حاسد
وعدو حاقد كالشيطان المارد
اللهم انا نعوذ بك من الهم والغم
اللهم ياكشف الكرب وياشارح الصدور وياباعث من في القبور

اكشف عن هم وغم هند بنت حواء وفرج عنها واشرح صدرها
اشرح صدرها بالايمان والاسلام دين السلام الذي ارسلته على لسان حال انبيائك

اللهم يامن انجيت يوسف ويونس وموسى وابراهيم
ويامن شفيت يعقوب وايوب
ويامن جبرت خاطر مريم وام موسى
اجبر خاطرها بحق اسمك الاعظم يالله

هند سبحي هاي التسبيحه مجربه لاتتماهنين بيها سبحيها

( سبحانك لا إله الا انت اني كنت من الضالمين)
سبحي شكد متكدرين

- حانت تبجي بس اني واقرالها احسها ارتاحت وهدأت من البجي مسحت دموعها ولما كملت معدت وقبلتني من راسي

- اشكرج ريحني كلامج وهذه الدعوات

- كنت كلما احس بضيق تقرالي مرت خالي تعلمتها منها وحفظتها جنت اسبح هذه التسبيحه متصورين شكد جنت احس براحه

- حسبحها ادعيلي فدوه

- ان شاء الله والله بدون متكليلي بصلاتي اذكرج وادعيلج

-متقصرين

اجت رباب جايبه صينية الاكل كعدنه ناكل بس كلنه قلقين ومتوترين لايسوي شي هذا النذل

ثاني يوم رحت للشركه وداومت عادي حتى ادم الي صيح عليه بالموبايل اجه ولاكأنه صاير شي مشاها عادي لاحجه ولاكال حتى اني تفاجأت بس دام سكت اني هم مافتحت موضوع
داومنه عادي يومين مرت هدوء ماكو شي

بالليل خابرو الشباب على رباب

- ها شو هذا صاحبكم مسوه شي

- مادري

- هذا بوخه بس حجي وداعتج
مدكليلي شحيكول

- احنه هددناه اذا يلعب بذيله منسكت نطلع الاول والتالي

- عفيه بيجن

سد الخط وراح

- ها شفتي طلع بوخه

هند- راح اخابره

رباب - تخبلتي ولج

- لعد شلون

-شتكليله اذا تخابري

- اكله ليش مااجيت لو بس تحب تحجي

- يله دنشوف

اتصلت عليه فتحلها خط يحجي من وره خشمه

- خير شرايده

- اشو مابينت  ..... 

- هه كيفتيلها للعشاير

- شتقصد

- ولج عبالج غبي اني اعرفج تردين تفريها عليه وتكليلهم جنه سوه وتثبتين تجي من يمج هاي

- شنو المطلوب شرايد انت هسه

- سمعي داكلج زين
خلقتج وصوتج لااريد اسمعه ولااشوفه من هاللحضه
لا عبالج صدكت انتي مو وره سالفة هذوله الشباب بس حسوي نفسي مصدك عركة ولد
بعد لدكين عليه

اخذته رباب منها وحجت

ـ كملت هه تدري انت واحد جبان مع الاسف  تنحسب على الزلم
متستحي تتلاعب ببنيه لمجرد انها حبتك

شسوتلك هي هااااااا شسوتلك وهيج داتسوي
شوف تحل عنها تحل ماتحل عنها اوكعك بتهلكه واكعدك عليها عشاير وقد اعذر من انذر

- يمه يمه صرت ارجف هه والله تالي وكتي يهددني بنات

- مو بعينك مو

- ولا تهزولي شعره

- شوف  ابني مكالمتك هاي سجلت هسه اكدر اوصلها للامن الوطني تلعب بيك جوله
ديربالك تخابرنه ديربالك تتدكر بيها بعد
جبان  تهددنه عشاير والله اخلي عشايرنه تلعب بيك جوله انت والوراك فوك ما تلعب بااعراض الناس
وسدته بوجها

- سديم،  عفيه خوش رزلتي

- يستاهل مو

- اي.

- هند...  خاف يسوي شي

-شوف هاي ابتلي بيج هسسسسسسسسه
ولج من سويتي ويا علاقه مخفتي هسه خايفه

- سكتت
كدرت ارتاح نوعا ما تقريبا بدت تنحل مشكلتها لان حبيبها طلع بوخه مامن وراه شي
بس بجبنها خلته ينفش ريشاته
مرت ايام والشغل ماشي عادي وادم سكوته جان قالقني يتصرف برسميه كلششش
مرات يجون بنات والي تجي يطلع وكتها هو وياها من الشركه
مشت الايام وعم الهدوء اكثر
بيوم جنت داسلمله اوراق فتت للمكتب جان هو دايخابر

- نعم...  بلي.....  صار  ... صار

- هي توصل الشاحنه سلم تستلم واي خلل مرجوع

- جان يخابر ومركز وياي نظراته عليه  بس كلت يمكن مو يمي لان دايخابر

- تمام....  الخميس يمك
الله وياك

سده
تنهد وخله ايد باايد على الميز وكال

- كملتيها

- اي

- اخذها مني وخلاها على الميز توجهت حتى اروح
كال

- اوكفي

- التفتت عليه نعم؟ 

- كام من كرسيه متوجه الي

وحجه بطريقه غريبه

صايره حليوه هواي
شبيه اني اعمى مااشوف الجمال الكاعد بره كل يوم

- من رخصتك توجهت دااروح

- استوقفني
همس رافع حاجبه
اوكفي
همس وتقرب اكثر
اني ماخلصت كلامي

- شتريد
ليش تحاجيني هيج بطريقه غريبه

- لان...  لان... 
لان اني احبج

- شنو

- اني احبج

احبج واتمنه اكون قريب منج

ابتعدت
تكلمت بنتره

اليحجي يحجي عدل مو هيييج

بعدين شنو احبج
شنو هالكلام هذا

- اي شكو بيها

- احترم نفسك لاعبالك سكرتيره عندك اصير لعبه باايدك نجوم السمه اقربلك

- والله هه ( ابتسم بااستهزاء)

- شوفي ثكل يمي لتبيعين من الاخير حجيبها الج

- يعني؟

- يعني شغلج من جوه لجوه كشفته واني اولى من الغريب ههههه

- باوعتله معرفت حتى ارده نزلت دموعي وحدهن

- صار يباوعلي باستهزاء
يبو عليه وضرب على خده خفيف
حتكوم تبجي

واني موهيج
واني كذا

وهي الله يعلم

الله يرحم وكفتج على الرصيف وي الشبان ال 3

- ماعندي شي وياهم والله

- ههههههههههه
هههههههههههههههههههه

سولفيها على دبه

لو ماشفتج انتي وهاي الوياج 

- شوف اني مامجبوره ابرر كتلك بشغله عندي شغله وياهم

- بنيه متغربه تحجي وي شباب غربه بالليل شنو معناها

- بصوت  معناها تفكيرك وسخ وكلشي يفسره عكس لان هو زباله وعباله الناس هم زباله مثله

- اني حشوفلج الزباله هذا شنو ممكن يسوي
تقدم اليي بسرعه ودفعني على الحايط

صرخت سد حلكي  وحجه وهو ضاغط على حلكي
محد هنا والدنيا ليل هه قبل لاتجيبين الاوراق قفلت باب الشركه يعني محد يفوت

تخبلت هاي شوكت طلع شوكت قفل الباب شوكت راحو المحاسبين
من شفت ماكو مجال للهرب وهو مرتب كلشي

كعدت بالكاع ثنيت رجلي وكورت نفسي لميت روحي

صرت ابجي اكثر واكثر بصوت وحركه
هو ماعرف وين راح بس تركني جنت ابجي ضامه وجهي
بعدين رفعته بعد مااجهشت بالبجي هواي
باوعته لكيته لازم راسه بيده الاثنين يباوع للكاع كاعد على الكرسي

لمن سكت صوت البجي مالتي رفع راسه

باوعلي ورد دنك

همست

- ليش اني شسويتلك

- رفع راسه بفزه باوعلي معرف شيجاوب
كام واجه بااتجاهي
صرخت بي

لاتقترب

كعد على بعد مسافه صغيره مني

همس

اسف

- وديني للشقه ( نترت واني امسح دموعي) 

-سديم اترجاج اسف مو بوعيي والله

- توصلني لو اروح اني وافضحك وافضح نفسي

- بس أهدأي بعدين قميصج تمزق هم

باوعت ولانتبهت بقيت ساكته

حروح اجيبلج قميص واجي

راح وسد باب المكتب قفلها
نص ساعه ورجع جايبلي قميص

- اطلع داالبس

- طلع وكف بره بدلت قميصي وطلعت لكيته كاعد على مكتبي
مباشرة فز اخذت الجنطه دااطلع لزم ايدي

اوكفي

-  نترت
وخر ايدك

- مو بوعيي اسف

- خللللص افتهمت هسه شتريد يعني

- بس على كيفج اهدأي وكعدي خل احجي وياج

- ادددم خليني اروح لااصرخ والم العالم عليك هسه

- مااخليج تروحين ومقهوره مني ابد

- كمت اصرخ....  عوفنييييي عوفنييييييي

- اشششششش وسده لحلكي بقوه
سكتي فضحتينه

- وخر عني

- ابتعد باوعلي
راح اوصلج بس تنطيني فرصه نحجي مره ثانيه

-  وجهك بعد مااريد اشوفه
مع الاسف امنت بيك وثقت هيج تغدر بيه
لييييش
شسويتلك

- متحملت..  موقف هذاك اليوم ياكل بيه اكل اموت الف موته باليوم

- كتلك ماعندي شي وياهم ماعنديييييييي شييييييي وياهممممممممممم

- بس اهدأي واسمعيني

سكتت وكعدت بس جنت ضايجه كلش نار تحس تشتعل بيه

كعد كدامي على الكرسي الثاني وتكلم

سديم اني رجال وصعبه عليه اشوفج واكفه وي تلاث زلم بنص الليل وتحجين وامررها مرور الكرام

- نترت
وانت شعليييييك
اطلع اىوح اجي وياهم انت شعليييييك

من كلت هيج تخبل
جانت اكو منفضة جكاير على الميز شاهلها وشمرها كسرها وكام وكف على حيله
يفرك بيده متوتر احسه كوه جاي يحاول يلزم اعصابه

راح ورجع بالغرفه ويباوعلي بغضب من شفته حيل خفت بس جنت اضهر العكس وابينله عادي ومااخاف

حجه بهمس بس بغضب شعليه

وصرخ بيه
مووووووووو

بس فهمني انت ليش محترك دمك ليش تحاسب شعلييييييك

لربما تفضحنا افعالنا
نحن نستطيع كتم المشاعر لكن حتما ستفضحنا الافعال
ستنبهنا المواقف ان الذي امامك شخص عاشق
فتقبل شقاوته مهما كانت.....!

مريم....

واحد موجه سلاحه على الثاني واعرفهم ثنينهم مو بوعيهم بس احس ضرغام واعي مو مثكل مثل ابو غضب

طلعت وكفت بنصهم واصرخ

كاااافييييي
اصحووووو انتو متدروووون بنفسكم

- صرخ بيه ضرغام:- شطلللللللللللعج انتيييييي

- كافي اروحلكم فدوه كافي

تقرب عليه وهو عيونه تجدح نار
جرني من زيك دشداشتي ومشى طببني للغرفه وسد الباب بقوه
خفت ارجع افتحها اشوفه شيسوي وماعرف شنو حيصير

بس سمعت صوت ابو غضب عله وصاح

لتخليني اطشر راسك اليوم واكله للحجي ضامها عده

- صرخ بي ضرغام
ولللللللك تخبللللللت وضرب نار ماعرف وين
بس وراها صار هدوء

جمدت خفت لا ثنينهم ماتو فتحت الباب على الكيف شفت الضرغام خانك ابو غضب بعكسه ولازم ايده الي شايل بيها السلاح
نفرها برجله بقوه نشمر المسدس بعيد
سحبه باتجاه الحمام
ذب عليه مي بارد واصلا هو الجو حار
وهذا يصيح

- ينعل رسسسسك وخررررر
اليوم اقتلك اليوم

- ولك ثكلت

- ضرغام وخرررررررر

- ها صحصحت ولك
ابقه بعد صحصح

- شويه وطلعو ثنينهم منكعين بالمي
صاح ضرغام

مريم سوي جاي

رحت ركض للمطبخ سويتلهم جاي وهم كعدو ولاكأنه صاير شي

جبته الهم
اشرلي بعينه وهمس

جوه

- فتت للغرفه وكعدت وهم خفت لايصير شي
بقيت كاعده وكل شويه اكول هسه يروح ابو غضب
هسه يجي ضرغام 
ومشكله ماكدر امد راسي اشوف اخاف من ضرغام يصيح بيه
بقيت كاعده
وره وين حسيت بنعاس
صرت اتثاوب
مددت على السرير ونمت

غفيت وحسيت على صوت طكطكه بالغرفه فزيت لكيت ضرغام داياخذ السويج

من شافني فزيت همس

هاي اني لتخافين

- وين حتروح

- لازم اروح

-وين

-  سكت بقه يباوعلي يمنه ويسره

- ليش سكتت

- حغيب كم يوم واحتمال اطول ماعرف شنو وضعي بس انتي لتخافين راح اوصي عليج

- ليش شصار

- مصار شي حروح بمهمه

- باوعتله اختنكت وبينت على ملامح وجهي

- تقرب ولزم وجهي برقه بيده الاثنين

مجبور
لازم اروح

- لتتأخر عليه

- احاول

توجه حتى يطلع ورد رجع
شكد اكدر اثق بيج

- ليش

- عموما انه ماخاطفج بس اي حركه منج نطيح بالرجلين
مريم هذا موبايل خلي يمج اخابرج بين فتره وفتره اطمن عليج اشحني هذا يخلص شحن تره شايفتني من اشحن جهازي الثاني

- اي

- اي اشحني وهم بي العاب تونسي بيها دوريها للشاحنه بارحه جنت اشحنه مادري وين خليتها
وشحني 
ولتخابرين انتي  حعوفو يمج لهذا جهازي واي شي يصير لاتنطي لاحد ابد مريم ابد

-  حتى لو كلي ضرغام دزني

-حتى لو الا انه اكلج نطنيا يله

- ماشي

حروح انه ثيمالا

- راح هو وابو غضب بقيت بالمزرعه
شلت هم للوحده هم راح ابقه وحدي

مر يوم اعتيادي بس بالليل كالعاده اخاف
نمت وحلمت اني صغيره واختي يمي وامي وابويه بس شكلهم مو واضح مغوشين
وكأني بينهم والعب واضحك وشايله دبدوب صغير

لكن امي راحت هي وابويه بطريق
واختي بطريق وبقيت وحدي بمكاني وابجي
وعله صوت البجي بس مالتفتو الي

صيحت وهواي صيحت بس ماردولي
كعدت فازه
الدنيا حتوشك على شروق الشمس سمسمه جانت تصهل باوعت من الشباك مابيها شي ليش تصهل
هواء المبرده حار جان
طلعت بره اشوف ليش جان خلصان مي التانكي
بديت اترس مي وبين ماينترس التانكي بقيت كاعده
راحت نومه بعد
افكر
وين راح
وليش كال اتأخر
ليش گلبي هالمره نعصر

يمكن لان تعودت عليه

هو راح يمكن لتل الذهب ويمكن طلع وي الحجي
يمكن عدهم عمليه جديده يمكن صعبه
مادري

بديت اتذكر لما جنت بتل الذهب وياهم عايشه

لاصباحنا مثل البشر ولامسائنا
اساسا العيشه الاعتياديه مااعرفها شلون الواحد يعيش

بأي لحضه تكب عركه بين الولد وياخوفي لاتنتهي بقتل واحد منهم

اقمار وشرب ونسوان بتوالي الليل ومحد يكول ليش هيج تسوون

اتذكر مره تعاركو الولد بينهم على لعبة الرايسز ( اقمار) 

لما حمزه غلب عريوش
ورجع غلب مناف وغلب ستار

ماتحمل عريوش وكب

- هييييييي تضحك علينه انت
داتغشششش ماكو هيج لعب

وهو يضحك برود وبحقاره

هه غلبتكم انتو متعرفون تلعبون انه شعليه

-  شوف حمزه لعبك هذا والغش مايعبر علي انت مسوي ملعوبه وينك وين العب انت
عمي احنه اهلها جاي اليوم تغلبني

- مناف:  كله جوكر ويكلي اعرف العب

حمزه:-رد بغضب
هييييييييييي اعرفو ويامن تحجووووووون

- استهزأ ستار
وركل مناف بضحكه وكال
هه نحجي وي الكابتن اسطورة اللعب حمزه

-تصنف عليه ولك مو
ورده بوكس

- هذاك من شاف روحه نضرب تخبل وجات عليه وصارو يتعاركون واحد يضرب الثاني
وصارت عركه نتهت لما شافو الحجي على راسهم ضارب طلقه بالجووو

وحجه...

ولكمممممم زعاطيط انتوووووو
تتعاركون من وره لعب

- حجي يوميه مخسرنه ميصير يغش هذا

- ممجبور تلعب

- صارو واحد يصيح على الثاني حمزه ومناف وعريوش وصرخ بيهم الحجي

- اذا متكبرون كلولي حتى طلقه براسكم من هسا واخلص 

بوكتها جنت اتفرج عليهم من بعيد وليو واكف يمي يهمس
مريم شرايج ابوك الاوراق ونلعب اني وياج

- اسكت ولك شيخلصنه من حمزه

- ميلعبوني وياهم

- عوفك منهم شعاجبك اشو ينهوها بعركات

- رجعت لواقعي هه ذكريات للاسف ذاكرتي تحتفظ بماضي تعبان

مر يوم ولااتصل ولاابد واني ماعرفله الموبايل

لكن بالليل رن التليفون
دست بالدكمه الي علمني عليها وطلع صوته

- شلونج مريم

-اني زينه

- خو مداتخافين

- لا

- اكلتي

- اي

- محتاجه شي ادزلج احد من الولد يجيبلج

- لا ممحتاجه شي ضرغام....  بس هو انت شوكت تجي

- جر نفس.....  ماعرف

- انت وين

- انه طالعه بشغل

- ليش هسه خابرت

- مكدرت مريم اخاف اخابرج ويدرون احاجيج
يأذوج لو احد عرف راجعتلي
حروح انه هسه وحخابرج كل متصيرلي فرصه
ديربالج على نفسج خوش

- خوش

- ديربالج على سمسمه

- ماشي

-يلا ثيمالا

- بيباي

سده هو الخط من يمه
بس اختنكت لمن راح

ماريده يروح حتى لو مجرد يتصل هو امان بالنسبه الي

بجيت ولاول مره ابجي من لاشيء

احس بروحي طفله صغيره لمن اشوفه او اكلمه
مثل وطن امن الي

اهل او بيت دافي يحتويني

- ضرغام صار بالنسبه الي كلشي لدرجة خفت افقده بيوم......

غفيت صح بجيت بس بجي بحب هالمره احساس دافي وحلو مرافقني
كعدت ثاني يوم الصبح وطلعت بره شفت سمسمه وتذكرت من كالي ديري بالج على سمسمه

رحت يمها وتذكرت من جان يصعدني
فكرت اليوم اصعدها وحدي وصعدتها
فتحت الباب وجنت راكبه الفرس طلعت وصارت تهرول سمسمه
تمشيت وسط المزارع جانت منطقه متشعبه بالاشجار وكلها مزارع مسيجه
مابيها بيوت
تمشيت وفرحت كلش
سمسمه احسها تفتهم لما تحسني فرحانه تهرول وتصهل ولما اكون حزينه واجي يمها ماتصدر منها اي ردة فعل بس اشوفها تباوعلي وكأنه تواسيني بنظراتها
عرفت ليش ضرغام يحب سمسمه هيج ثاري تسيلي هي مؤنس تحسها

ضرغام هواي متعلق بسمسمه وحتى وصاني عليها
لهسبب محتفظ بيها بهذه المزرعه ومخليها علمودها
ويتردد من الاول هنا تذكرت لما سولفلي مره

سمسمه لما نولدت ماتت امها وجانت مهره صغيره
ربيناها انه واخويه لحد ماكبرت

- اخوك؟  
انت مو كلت ماعرف اهلي

- انتبه لكلامه بعدين كال
يعني صديقي مثل اخويه وداىما نحس اخوان مو اصدقاء

- وينه اخوك لعد

- مات

- مات؟  شلون

- قتلو....  ولمعت عيونه بدمعه التفت الي وكال
نقتل صديقي الي جان روحي من الدنيا

- منو قتله

- جانت عندي عداوه وي جماعه وقتلو حتى ينتقمون مني
قتلو وعافوني مثل طير المذبوح
جابولي بس راسو

- وشسويت

- هز براسه وهو يباوع للاشجار البعيده
قتلتهم
مسح وجهه وابتسم ابتسامه كاذبه كال
اي
هسه عرفتي ليش احب سمسمه
سمسومة روحي

- انت حبيت بحياتك

- اي

- منو

- وحده

- ايييي وشصار

- حبيتها هواي هواي حبيتها بس الي بيني وبينها صعب
مستحيل نكون لبعض

- شلون  وليش

- جر نفس بحسره كال
منكدر

- ليش

-بيناتنا دم

- ثار يعني

- هي مالها ذنب بس الناس الي حواليها
لو تدري انه نتقمت من اهلها تكرهني وانه ماريدها تكرهني اريدها تبقه تحبني
ابقه احس اكو انسان بهذا العالم يحبني

- هه وشراح تستفاد

- الحب اذا يكون بي استفاده مو حب هذا مريم
انك تحب مجرد تشوف هالانسان انت ترتاح
شنو بيك من هموم تروح

تعرفين شوكت تعرفين قيمة الحب

- شوكت

- لما تكونين بلحظة خوف
مريم بالنهايه احنه بشر وتمر علينه لحضات 
نكون ضعاف وخايفين بيها
تعرفين دور الحبيب شكد مهم هناا

كلش تحتاجين لطمأنينه لقلبج احتواء لروحج فتحتاجين لهيج شخص

بس وكتنا هذا مابي الحب الحقيقي كلها مصالح

-  انت تحجي وكأنك واحد ثاني لاتفجر ولاتقتل

- انه بشر بالنهايه مريم

- مريت بهذه التجربه

- اي

- شوكت

- هي الفتره الي بيها صديقي وكتها تأذيت ونهاريت
ودخلت حاله نفسيه وجسديه متعبه
انطويت على نفسي
وبقيت بغرفتي وعلى طول قافل الباب وكاعد

- وشلون تعديت هذه الفتره

- هذه الفتره متتعده بسهوله تحتاج وقت
تحتاج دموع والم
تحتاج سهر وصبر
تحتاج وقت هواي كلش هواي مريم

- نوجعت من قلبك لهدرجه

- كلش

- ولاتوقعت

- ماكو انسان مابي الم مريم
كل القلوب تألمت
واذا متألمت فراح يجي اليوم الي تتألم بي

هذا الالم هو نقطة تغيير بحياته يكون

ألم يا أما يصعدج فوك

ياأما ينزلج جوه

يمكن يصنع انسان قوي
ويمكن يكون ضعيف ومنكسر 
ويمكن يتولد شخص حاقد ويأذي باوعلي

هذا الشخص احذري مريم ( كالها برفع حاجبه الاثنين) 
احذري كلش مريم

-  وانت

- انه
هه
مالج علاقه بيه انتي

حتى لمن اطلعج منا واخلصج تمحيني لان اذا تذكرتيني أأذيج

- تأذيني

- اذا ترجعيلي بعد مااأمن عليج راح أأذيج

رجعت لواقعي
كلت خل ارجع للمزرعه خاف يصير عليها شي وضرغام مااخلص منه

رجعت وبقت بالمزرعه واني ماربطتها تركتها براحتها كلت خل تكسر شويه وحشة المزرعه عليه

غرب الغروب ودخل الليل بظلامه هدأت الاصوات اكثر الي جان اساسا بس اصوات عصافير
هدأت وصار الصوت البعييييييد تحسه قريب منك

نمت وغطيت بغفوه ماعرف شوكت وبيش الساعه مااشوف الا الضوه نفتح

فتحت عيني اباوع الحجي وجماعته على راسي.....

دائره تدور بي الحياة لاهنالك مخرج فأخرج
ولاهنالك زوايا فأهرب اليها

تباعو احداث الحلقه القادمه من تل الذهب
كنت معكم انا رغد الموالي في امان الله

لاتنسون اشتركو ويانه بالمجموعه سيدات العراق للكاتبه رغد الموالي الرابط بالبايو ( حسابي الشخصي)  موجود
وهذه صورته
واي كاتبه تحب اسويلها دعم تراسلني وتدلل