رواية تل الذهب الفصل السابع عشر 17 - بقلم Raghad Almoualy

لكل منا حكايه وحكاياتنا النهايه
النهايه هاي البداية الحقيقيه
هي قدرك الحتمي....!
~~~~~~~~~~~~~~~~~~~~~
سديم.....

ماكتيلي رباب شنو معناه الي كاله

- مااجه بالج شنو؟

-لا

- مبين وكع..

- يعني؟

- الاخ مبين بده يعشك

- واني شعليه

- لان الي بده يعشكها انتي

- انيييييي

- اي

- هه كل عقلج

- وليش مو كل عقلي

- حقج ماشفتي الي يجوله شنو
لج شنو جمال
شنو طول
شنو جسم

- وشناقصج انتي

- هه شجي يمهم يمعوده

- كالها الج بعظمة لسانه علاقتي بيهم مزاج

- وشنو يعني

- رجال يبرر لمره هيج شنو معناها؟

- ماعرف استغربت

- معناها بديتي تشغلين باله بده يهتم بده يخاف تزعلين

- مادري ماعرف انتي منين تجيبين هالكلام

- من الي دانشوفه ونسمعه

- سكتي بله

- مهم انتي شنو من ناحيته

- ولاشي

- يعني مالفت انتباهج معقوله

- الصراحه
فتره لفت انتباهي بس من عرفت قذارته وي النسوان كرهته

- بسسسس

- اي

- سديم انتي مو كرهتي انتي ضجتي منه او زعلتي لان هيج هو طبيعي اي مره تضوج ومتقبل

- اني مااحب ارتبط بهيج شخص ماناقصني وجع راس

- اجتج العدوى

- تفكيرج حلو

- هههههه بس اني تشافيت ونقلت العدوى الج

- شنو قصدج

- بصراحه سديم اكو شخص صارحني قبل كم يوم

- اي

- وهو ميتعيب مرتب من كلشي بصراحه مطابق مواصفات الي يريدها مزاجي

- يعني قبلتي

- مارديت عليه لان استحيت

- منو هذا

- دكتور جامعي يجينه مرات يقدملنه محاضرات بعلم النفس

- اي

- هو كاريزما وشخصيه تموووت هه من كالي اني معجب بيج وهاويج خجلت متت

- رباب تخجل وتستحي

- شلكيتيني ولج

- المهم شحتكليله

- ماعرف خايفه اقبل واتورط وخايفه ارفض واتندم

- طبعا تتندمين
رباب العمر دايمشي واءا تجي قسمه زينه لاترفضيها

- خاف بس شكل ومنظر

- مو تكولين دكتور بعلم النفس

- وان كان...... انتي سامعه يعلم الناس الصلاة ومايصلي

- يعني ممكن يكون مجال عمله شي وهو شي ثاني

- وارد جداا

- وليش منتوقع العكس

- لان العكس الي تكولين عنه هو الظاهر للناس اني اباوع خلف الكواليس

- وشلون بهيج حاله

- فكرت اختبره فتره اكله خليني اعرفك اكثر فتره صغيره اخم مايته مثل ميكولون اشوف عقليته

- وان ماعجبج

- مرفوض طبعا

- وسمعتج

- ليش ا حد كلج حنطي مجال اكلج اختبره يعني صداقه ابديها بعدين استفزه واضوجه واتعارك واعرف الي جواه شنو
البشر متنعرف طينته الا لما تختبري
مال تكضيها ويا حب بس هذا تسليه واني ماريد اتسله سديم

- هنده- والعركات متخلي يضوج منج

- راح تبين الي هواي امور

- وهي

- اولا حعرف طولة باله وهل هو عصبي او لا زين لما يعصب لسانه يحافظ عليه لو لا زين ايده يتحكم بيها لو لا وكت الغضب ردة فعله شنو

ثانيا حعرف هو فعلا يحبني لو مجرد يريد تسلى
اذا حيكلي تعالي يمنه اكله اجيك يسره
اذا حيكلي احبج حكله اثبتلي واخطبني مو اكله اني هم احبك
الحب التقليدي التافه مالتكم مااعيشه مااحبه

- هنده- حبيبتي هيج تخلي يشرد منج يطم روحه بالساعه الي فكر يصارحج بيها

- لا اذا رايدني صدك يتمسك بيه

سديم- بس تفكيرج صعب ويملل اكبر شخص

- مايمل تعرفين ليش

- ليش

- لان هو دكتور واكيد مارات عليه بنات بكد ش
عر راسه وكلها سهله وتحت طوعه الي تشل گلبه مااجت واني راح اكون هاي الي تشل كلبه

- هنده- هه والله لا تهججي

- من هذا هج حبيبج السبع وانتي صريتله محبس بيده

- باوعت لرباب هنده وسكتت بس عيونها لمعت بيها الدمعه واختنكت مباشرة عدلت نومتها بعد ماجانت نايمه على بطنها وغطت وجهها بالحاف
كامت رباب

- هنده اسفه والله موقصدي والله

- لا رباب الي كلتي صح يمكن اني نسيت تفكيرج صح

- ماعرف شكلج هنده بس تره من حركتي هيج كلت

- عادي لاتهتمين

- اسفه حقج عليه

احيانا يكون الكلام العفوي كسر خاطر مؤذي رغم انت متقصد تجرح هالشخص
مرات الغصه تبقه بالکلب متروح تنفضح لمن احد يذكرها بالوجع
مرات نتناسه بس مننسه لان النسيان صعب
مرات نخاف ننسه حتى لانرجع نغلط مره ثانيه

باليوم الثاني رحت للشركه قبل لااروح ترددت بين البس واتأنق مثل البارحه او لا

- رباب شسوي هسه شلبس

- شتلبسين غير حتروحين لشركه

- اي بس اقصد اتأنق مثل البارحه لو لا

- اي اكيييييد

- خاف يكول متقصده تلفت انتباهي

- وخاف يكول فعلا جانت متأثره بيهن وكشفتها وهسه تراجعت وجانت من غيرتها هيج مسويه

- هااااا والله صدك

- تكلمي ويا بثقه ورزانه ابرزي نفسج
علمود هو يحسبلج حساب مو انتي
خليج انتي سيدة المكان مو هو

- اوك

بدلت وتأنقت ورحت للشركه
اجه هو وتصرفت مثل مكالت

- مساء الخير

- مساء النور

- اليوم اكو حجوزات لا؟

- اي

- تمام حوليها الي للمكتب

- حولتها اله وبقيت كاعده اكمل شغلي
شويه واجه واحد كان مبين عليه من لبسه علامات الترف
خله رجل على رجل وكعد على الكرسي الي امام مكتبي

- اريد اقابل السيد ادم

- ثواني

- رحت لادم ونطيته خبر

- خلي يتفضل

- دخل الرجل واني كعدت اكمل شغلي دزيتلهم على ضيافه واجه العامل الخاص بالشركه ضيفهم وطلع
طول تقريب النص ساعه الرجل وطلع وصله ادم للباب وهم متصافحين مبين ضيف مهم
من دايطلع التفت الي وباوعلي بتركيز ماد ايده للسلام

- ولو ماتعرفنه بالسيده؟

الانسه سديم سكرتير الاستاذ ادم ومديت ايدي حتى اصافحه

لكن ادم نط من يمه وداره لعنده يحجي ويا وتمشى وهو يطبطب على كتفه وصله للباب وصافحه

خلينه نشوفك على طول البضاعه السبت يمك

راح الرجال ودخل ادم باوعلي بنظره يريد ياكلني بس ماحجه شي فات جوه

شويه ورن الجرس الي من مكتبه لمكتبي
وهذا معناه طالبني

- رحتله.... تفضل

- انتي شنو هالميانه وي العالم دايكلج سيده تردين عليه الانسه

- وشكو بيها

-( بنتره) لا بيها هواي هواااااي بيها

- مداافهم ممكن توضحلي

- والله انتي وضحي ست

- شوضح

- يكلج سيده تكليله انسه لييييييش

- لان اني انسه
متزوجه لعد اني؟

- وعلى شنو داتبينيله مامتزوجه

- لان فعلا مامتزوجه

- دك بطارف اصبعه على المكتب بسرعه وكف على حيله كتف ايده لوره
وهمس بخبث

- وكفتي وتبينيله مامتزوجه بعدين من دايصافحج شكو تصافحينه هااااااا؟

- لعد شسوي

- عيني ام المواعظ يلي تصلين مو حرام لمس الاجنبي لو هذا وحد

- انت ليش محروك دمك ليش تحاسبني حياتي الخاصه هاي مو مسموحلك تدخل

اتدخل.... لما يكون بمكتبي وبشغلي اتدخل

- مو من حقك

- لا حقي وغصبا ماعليج هم سميره وصتني عليج حتى بره الشركه اذا تلعبين بذيلج ماتلومين غير نفسج

- شوصتك هاااا شوصتك

- رفع اصبع السبابه بأبهام يهدد
اسمعي سديم ميانه وهي هيج خلق ماريد بنات يجني سوالف وتعارف وياهن ماريد عليج بشغلج مالج علاقه بلي تشوفي هنااااا مالج علاقه

- ليش شبيهن البنات واذا مااحجي شنو المشكله

- لايشبهوج ولاتشبهيهن دااحذرج اني

- انت شتريد بالظبط تريد اقدم استقاله تره جاي تدخل منتبه على نفسك انت لو لا

- كتلج موصيني عليج

- عاشت ايدك ورحم الله والديك حدك للشركه وبس خارج الشركه مو من حقك

- تنهد بلع ريكه باوعلي وكلي بهمس
تفضلي روحي

-عفته وطلعت كعدت على المكتب ضجت حيل من الي سواه بعد انتهاء الدوام طلعت قبله
اتمشى حتى اوصل للشقه لاكاني بسيارته بالشارع
باوعلي وحرك سيارته بسرعه وطلع خصم الكلام ونهى النقاش لما شاف نفسه محاصر.....

وصلت للشقه لكيت هنده تبجي ورباب ماكو

ـ شبيج شكو تبجين

ـ الحكيلي سديم هذا خابرني يهدد يكلي اعرفج انتي دزيتي عليه جماعه ويريد يسويها عشاير

- يولي شنو بكيفه عشاير؟

- ضربت على وجهها
وج شسوي سديم شلووووووون

- شيكلهم هاااا يعني شيريد يكول يكلهم ضحكت على بتكم وانتقمت مني

- رباب وين

- رباب راحت للقاعه الي بيها الشباب

- شتسوي

- تتفق وياهم ميكولون ولايجبونه بالطاري

- ولج حتجيب اخرتنه هاي تحجي صدك
نزلت اركض من الشقه تمشيت رايحه للقاعه
جنت حيل مستعجله مانتبهت منو وراي منو ممكن يشوفني كل همي جان رباب اوصلها
رحت لكيتها واكفه تحجي وي الشباب وجان واحد وياهم ثالث

رباب- احنه بنات وانتو تعرفون شحتصير علينه قضيه

- ولا يهمج خيتي نكلهم فلوس نكرها علينه وضربناه نخليها شباب بيناتنه شتكلون يولد

- هاهيه
مو كتلك نموته بس انت مسمعت مني

- لا عوفو هاهيه

- وكفت اباوعلهم مخليه ايدناتي على خصري من توتري اسمع الي يكولو وكل شويه اتلفت للشارع من خوفي باوعت ادم واكف يباوعلنه من سيارته تجمدت بمكاني ومباشرة كتلها لرباب

- يله رباب يله نروح

- وهي نازله وياهم حجي وتتفق
هناك وجان مشينه اني وياها دنرجع بسرعه مشى ويانه من يم الرصيف ادم كال

- صعدي سديم

- باوعت رباب... منو هذا

- هذا ادم الي اشتغل عنده

-وهو يخوزر بيه ويحجي من بين اسنانه صعدي سديم

- ماكدر مستعجله دااروح

- ومشينه وهو ويانه بسيارته ويكلي صعدي ومارد عليه وزيدت بسرعتي جان هو يحرك سيارته ومشى سريع راح

وصلت للشقه لكينه هنده
ونزلت بيها رباب

الله ياخذج ولج ورطتينه شصخمتي وجهج ولج اهلج الله ليعلم شراح يصير بحالهم
هذا نذل وراح يبتلي عليج

- وهي ترجف
وشلون شسويتو

- الولد ولد حلال مادري شمسويه جوه الله انتي وخله هالناس بدربج راح يكولون شغلة الفلوس حيفرون السالفه عليه بس ادعي ربج يعديها على خير
ادعي الله يعديها على خير وماتنتهي بفضيحه

- وج رباب حموووت اني مااستاهل اعيش اني غبره اني ثوله وثقت بي امنت بي الله ياخذني

- دك تليفوني باوعت ادم
فتحت خط

- والله بس الكفج لااحركج واكفه وي تلاث زلم بنصاص اليالي تلغين اني اعلمج بسيطه وين ترحين
سد الخط بوجهي باوعت هذا منين طلعلي النوب

.............
مريم..................

كعدت انتظره طول يله رجع وجايب ويا علاليك اشكال جايب
مسواك وحلويات وعصاىر وحب وكرزات وفواكه
اخذتها منه ورحت رتبتها بالمطبخ

اجيت لكيته صاعد على الفرس ويركض بالبستان بيها
بقيت اباوع ومبتسمه تمنيت اصعد
اجه يمي

تصعدين؟

- خاف اوكع مااعرف

- اصعدي واني وياج اعلمج

- نزل من الفرس وساعدني صعدت اني بس جنت كلش خايفه بس هو ماخلاه يركض تمشى على الكيف

- اهدأي لتخافين سمسمه حبابه تره

- خاف تركض

- لا متركض الا اني اكلها

- تمشت بيه بس جان كلش حلو فرحت هواي يمكن اول مره هيج
صرت اضحك واضحك واضحك بصوت عالي وهو على ضحكي يتبسم ويضحك

فتريت بالبستان لحد ماكتله ينزلني ونزلت

- شكرا كلش تونست

- باوعلي تبسم ماحجه

- ربط سمسمه بمكانها وكعد على الثيل كعدت يمه

اول مره هيج افرح بحياتي مافرحت هيج حتى بلعبه واني صغيره مفرحت بقت بنفسي

- باوعلي مستغرب بس ساكت

- جان بنفسي اعيش مثل بقية البنات اشتري لعبه واتدلل على امي ابويه اروح لمدرسه
واتعلم
بنفسي اشتري فستان بالعيد وافرح مثل بقية الجهال او حتى البنات الي بعمري

- منو جان يشتريلج الشي الي تحتاجي

- بدريه وجنت اسميها ماما لان عبالي امي

- هز براسه بمعنى اي وبقه يستمع

جانت بدريه تشتريلنه باله صيفي شتوي باله كله لبسنه وناس تلبس من ناس يتشكك يتخيط عادي
الاكل جان ماينوكل المرك مي ومعجون اذا فاصوليا او باميه بالاسم تنعد الحبات الي بيها وتمن كوه ينوكل بس جنه ناكله من الجوع
نخاف نتمرض واذا تمرضنه منكول حتى لايبيعونه اعضاء
جنه نخاف

نخاف من كلشي حتى لمن جواني 
بوكتها تحملت الوجع ووكفت بالتقاطعات اجدي حتى لايبيعني اعضاء الحجي

عشت طفوله مره وحياة مره وصرت اخاف من البشر

- ليش ماجنتي تنهزمين من التقاطعات

- جان سعدي يوكف يراقب من بعيد ونخاف جهال وين نروح منعرف
نبقه نجدي طول النهار والفلوس ننطيها لسعدي وسعدي ينطيها للحجي

- جر نفس بحسره وساكت مايحجي سألته

- انت شلون جانت حياتك

- باوعلي احسه مترردد يحجي
طول يله تنهد وحجه

- تربيت على ايد الحوت بشبابي علموني على القتل
جنه نقتل حيوانات بديناها من الحيوانات الاليفه لحد الاسود وصرنه نقتل صغار الحيوانات كبال امهم
حتى يموت گلبنه ومايرفلنه جفن لاحد

يكعدونه الصبح على صوت رمانه يفجروها وطلق منعرف منين يجي
جنت ذكي حيل والحوت انتبه لهذا الشي
دربني وعلمني على التفجير وحتى شلون افكك تعلمت

صرت افجر ومااهتم

افخخ واشوف العالم تتطشر وانه واكف بعيد اشوف شكد حيموتون شكد حقبض على هذا التفجير

بالبدايه جنت اتأذه وانقهر على الناس الي تموت
بس الحوت جان يشربني حبوب وانسى
اشرب هم انسه لحد ماتعودت
صرت هسه ماانجرع اي عمليه صعبه يطلعوني بيها

تفجير
قتل
مداهمات
كلشي كلشي انه اول واحد

- مرات اكول اكو ناس تستحق تموت وتتفجر
طلعت وانهزمت وشفت حقارة بعض الناس

- بس هذا مو مبرر نفجرهم ليش الله خله جنه ونار

- وتعرف بهالامور

- انه مو كافر

- شفت ناس تلم قواطي من الشارع وناس تمر من يمها راكبه سيارات عاليه وفخمه ولاتهتم للي يشوفه

- بس مو معناها تحكمين عليهم بالموت

- لعد ليش تفجرهم

- حك طرف ذقنه وكال
شغل هذا

- بس الناس شنو ذنبها

- ضيق عينه همس
تخافين على ارواح الناس

- مادري
ماجربت اخاف بيوم على احد بس اكول خطيه

- سمعي مريم
الحياة هذه صعبه كلش صعبه فلازم تصير اسد حتى متنوكل

- حتعيشني هنا للابد

- رجعنه

- اريد افتهم نهايتي شنو

- مادري

- الحجي هسه يحس

- تنهد وجر نفس متحير

- حتى انت سكتت

- شتعرفين عن الحجي

- انت ليش مهتم هيج بي

- لان ايدو اليمنه انه لو نسيتي

- بس هسه انت مفروض تعرف اكثر

- هز راسه بمعنى اي
بهلااثناء دك تليفونه غطى الشاشه وكمز راح بعيد يخابر

رحت وراه اريد اعرف شمتفق عليه هو والحجي
اشوفه يأشر بنتره ويحجي
كل الي سمعته

ماكدر بعد اكثر

- باوعلي وهمس بصوته اكثر بحيث مااسمعه
وصار يهز براسه وبعدها سد الخط واجه

- منو خابرك

- الحجي

- شيريد

- لازم اروح مريم ماكدر ابقه

- ماشي

اتبسم بحزن ولبس قناع وطلع
بقيت هم وحدي واحس المكان ياكل بيه اكل
مادري شسوي

بقيت وحدي ماعرف ليش كمت اضوج لمن يروح
صرت اهتم بالمزرعه انضف التهي بسمسمه
مرات اصعد وتهرول بيه بالمزرعه صرت صديقتها
مر يومين وبعدها اجه
جان ينهت مبين جان يركض

- شبيك

-ماكو شي

- ليش تتنفس سريع

- كتلج ماكو شي

- حسيته ضاج من الح عليه سكتت وعفته
رحت عنه شويه بعيد وكفت باب الغرفه
هو راح يم حنفية مي
نزع بنطرونه جانت رجله بيها دم

سألته شبيك

- التفت باوعلي ورد فتح المي وغسل رجله بس جانت تنزف

صاح

جيبيلي شي اشد رجلي

- رحت جوه دورت مالكيت شي اخذت تيشيرت مالتي شكيته ورحت بسرعتي نطيته اله
جان مبين متألم بس ساكت
غسلها مره ثانيه من الدم ورجع شدها
وقف النزيف

كال جيبلي بجامه من جوه
رحت بسرعه جبتها ونطيتها اله لبسها
و مشى طبيعي ولاجنه رجله جانت تنزف راح كعد بالكاع ومدد جان صدره يرتفع وينزل من كد مانفسه سريع

اجيت يمه

شبيها رجلك

- باوعلي بطارف عينه ومارد خله عكسه على عيونه

- تريد تنام فوت جوه

- ماردلي

- اجيبلك شي تاكله تشربه

- ماردلي

عفته هو اني ليش ابقه أسأل اذا ميرد
رحت كعدت بعيد شويه حسيته غفى مبين تعبان وضايج

كلت احضرله شي ياكله
رحت للمطبخ سلكت افخاد وسويت تمن احمر وبعدين شويت الافخاد قبل لاتستوي كعد على صوت سمسمه وهي تصهل
فز وراح يركضلها مبين متوتر كلش
راح يمها وكف يباوع يمنه يسره على سياج المزرعه ماكو شي

اخذ يمسح على راسها

اجيت عليه

جوعان

- باوعلي رافع تك حاجب احسه ولاطايقني

سألني

- البيت الي يروحلو الحجي منو يعرفو غير انتي وابو غضب

- الي التقينه بي اول مره..

- اي

- مادري

- بنتره) انه شنو شسألج تكليلي مادري

- مادري الحجي ميدرينه بشي

- عشتي وياهم متدرين بكلشي
نتر
هذا بيتو يعني اهلو عائلتو تجي هنا لو لا

- لا متجي هو ميدخل عائلته بشغله ابد
اصلا ادري انو
واحد من ولده يدرس طب بجورجيا
واحد خريج هندسه كهرباء واحد بالنفط كلهم شهايد واصلين ومتعينين وحتى متزوجين الحجي اصلا جدو

- عفييييييييه هسه بديتي تفتهمين
اي وبعد

- بعد شنو

- يجيب بنات الحجي لهذا البيت

- مادري بس مره سولفتلي لمى كالت خاص لراحته هذا البيت شنو جانت تقصد مادري

- هز براسه بمعنى اي

تعالي لعدي

- شنو ليش

- تعالي

- اجيت

- طلع موبايله وشوفلي صورة رجال لابس دشداشه بيضه ويشماغ ابيض مربي شوارب وسكسوكه يغطسها شيب خفيف

- هذا شايفتو

- لا

- مو هذا الي راد يبيعج الو لو لاااااا

- مادري يمكن

- زين مدريتي ليش راد ينطيج الو

- كالي ثكيل جري وكعي

- مكتيلو ليش

- لا مكتله

- عض على شفته بتوتر ويهز براسه كالي روحي

- حضرت اكل تعال ناكل

- ماشي جاي

- صبيت التمن والافخاد خليتها عليه وخليت زيتون وطماطم وفلفل وليمون رتبتها بماعون وجبتها كعدنه بره نتعشه حيصير الليل

اجه هو

- هاي شمركبه صايره تعرفين تسوين اكل

- اي تعلمت

- منو علمج

-الشردات كلشي تعلم ام مازن علمتني

همممم

تاكل تره طيب

- جوعان حتى اذا مينجرع حكلج طيب

- بله؟

- اي شسويلج لعد متت جوع

- اكل وكمل ومن كام كال عاشت ايدج طيب

- تبسمت وسكتت

غسل ورجع مدد يمي جنت اكل بعدني طلع جكاره وكعد يشرب

شبيها رجلك

-باوعلي صفح وهو يشرب جكاره
نفخ الدخان فوك كال

-ياهو اليجي صار يجرب براسي ضرب السجين

-حسيته يبسمرلي بس غلست........ منو ضربك

-زعطوط هه عبالهم يكدرولي

-منو وياك

- مطارد انه اكو ناس تريد تقتلني
كوه خلصت روحي منهم واجيت

- علمودي

- لعد اعوفج

- وي منوعندك عداوه

-وي كل امة محمد عدا المجرمين ههههههه

-شحتسوي

- ماعرف

- خلصت جكارته ورث الثانيه مباشرة واحسه متوتر كلش يمكن لان مدايعرف منو هيج مطارده
كمت حتى اودي الصينيه
كال

اريد جاي

رحت اسويله جاي

منو يعني ممكن هيج يريد قتله معقوله الحوت يمكن لان عافهم خاف القبرص كرها بالحجي خاف شرطه

صار الجاي ورحت وديته اله

- خاف الحوت لان. عفتهم

- الحوت بالسجن

- خاف دزلك احد من ربعك

- يمكن مادري

- شحتسوي

- ( نهض شويه على عكس ايده مرتجي وهو مدد حتى يشرب الجاي)
ولا شي
شسوي يعني

- لو تبقه هنا متروح بعد لو تروح يم الحجي متجي بعد هنا

- ليش

- خاف يقتلوك
انت صرت امل بالنسبه الي
ماريدك تموت

- اتبسم بتعب
وخله ايده على خدي تلمسه بحنيه

لو صار عليه شي
لو رحت ومارجعت
اريدج ترحين منا
ترحين لمكان أأمن من هذا المكان وتخلصين من كلشي

- وين يعني

- باوع بعيوني مركز حدما لمعت عيونه تنهد جر نفس
مكان انه ربيت بي
راح اوصي بيج مريم انه ماعوفج حتى لو متت
راح يجي واحد من طرفي
ويوديج للمكان الي اكلو عليه
وتعيشين

- منو هذا

-مو مهم تعرفي مهم انه اعرفو وثقه هذا

- اريدك ديربالك على نفسك

- داير بالي على نفسي بس اذا قدري جا بعد ماكو باليد حيله

- لخاطري

- لخاطرج انه منتبه وداروح واجي بدمي

- ضرغام اريدك تعلمني شلون اضرب بالمسدس

- تبسم .... هه شنو تردين تطورين قتلج

- لاتذب صجم
بس اريد اتعلم

- كمل الجاي وكعد متربع شال المسدس جان يم راسه

تعالي لعدي

- حتعلمني هسه

- اي

- ليل

- احسن شي بالليل تعالي

- كعدت يمه

- باوعي هذا تجري هيج تسحبي
من تسحبي معناها صار بكل سهوله تضربين
منا هيج تدوسين يطلع الشاجور وتشوفين اذا بي رصاص لو لا

من تلزمين المسدس مو مقربتو يم وجهج
غلط
بعدي شويه واضربي حتى مايرجع على وجهج يدمر وجهج يسوي خريطه تره

- اي جنت اشوفهم من يضربون يمدون ايدهم ويضربون

- اي عفيه

المسدس سهل اسهل من الرشاشه بس انتي بمجرد تعلمتي شلون تضربين بالمسدس سهله تصير عليج بالرشاشه تضربين

- اجرب هسه

لا باجر خاف هسه تضربين تنبهين احد علينه وانه مطارد

- هم صح

- يله روحي نامي

- وانت

- ماكدر انام روحي ارتاحي من انعس اجي

- رحت للغرفه مددت
صار يشغل بالي هواي واشتاقله بمجرد ابتعد عنه
امدد افكر بي وحتى باحلامي يجيني

مددت متبسمه كلامه حلو مليان دفو وحنيه

تلمست گلبي احسه يخفق بسرعه

يمكن الي اني بي حب....!

- كعدت الصبح فتحت عيني لكيته نايم بالكاع ومخلي مخده جوه راسه بس اول مانزلت رجلي وكمت شويه طلع صوت فزز

- جنت داريد اكوم مو قصدي اكعدك

- لا هاهيه كعدت

- كمت رحت للحمام وغسلت رحت للمطبخ احضر ريوك شفته طلع غسل على الحنفيه البره ورد شاف الجرح وبدل ضماده اني بقيت جوه بالمطبخ خليته ياخذ راحته
جهزت الريوك وجبته لما شفته كاعد ماعنده شي

خليت الصينيه وكعدنه نتريك

- اليوم حتروح

- باوعلي ورد باوع للاكل
همس
ماعرف

- لتروح

- ليش

- اخاف عليك

- رفع راسه مباشرة متفاجأ

- اقصد يعني خاف يلحكوك

- قابل ابقه هنا لعد

- راح ترجع مره ثانيه وخاف يضربوك

- لتخافين ماعليه شي

- كمل اكل وكام غسل وراح لسمسمه صار يفتر وياها
اجيت يمه كعدت اباوعلهم
شويه واجاني

تجربين اليوم تضربين بالمسدس

- يعني تقبل

- تعالي

طلع السلاح وكف موجه على زرع بس مكان مفتوح
وكفت يمه
كال سحبي السلاح

سحبته

وبعدته مثل مكالي وضربت بالسلاح

جانت اول مره اجرب بس نجحت بيها بهالاثناء دك تليفونه وجان ابو غضب

- هلو ضلع

-انه بالمزرعه الحجي انتبه

- خوش.... اي جيبلي وياك راسي حينفجر

- ديربالك وانتبه
ماشي

سده للخط

- منو حيجي

- ابو غضب

- ليش شلون دلي

- لتخافين امن وامان هذا

- سكتت مايحب يتناقش هواي وماردت الح عليه لليل اجه ابو غضب

باوعلي مضيق عينه كال

شلونج عيني

- زينه

- ركله بيده للضرغام وغمز بشر شلونك مرتاح

- ها هههه اي كلش

- نطاه علاكه سوده وكعدو صارو يشربون نركيله وطلعو بطاله بيها مشروب وصارو يشربون
جنت كاعده يمهم وهم سوالف وحجي وشقه بعدين
انتبه ضرغام كال

- شعدج كاعده يمنه فوتي جوه انتي

ابو غضب:- شتريد منها خليها تونسنه متعلكنه ردح

- باوعله ضرغام بغضب
سد حلكك انت ضاهر ثكلت بالشرب

صرخ بيه كوووومييييي

- كمت بسرعه فتت جوه وسديت الباب
احس كلبي حيطلع من دكته كلش خفت
بعدين سمعتهم يحجون وعلت اصواتهم

- ولك راجعه الي والله اذا تدك الناقصه لا اطشرك

- ولك اكل للحجي وتعرف شيسوي بيك اذا عرف
سنين يربي بيها تجي تاخذ على الجاهز انت

- جرب تكلو وتشوف ضرغام شيسوي خاف ماسامع بيه

- لعد اعقل وخلينه نغير جو 

- اطلع بره ثكلت وصرت تخرررببط

فتحت الباب شويه اباوع شفت الضرغام لازم ابو غضب من ياخته ويجر بي ديطلع وهذاك متخبل ويحجي

ضربه ابو غضب لضرغام بوكس ودفعه عنه
وتخبل ضرغام

وضربه هم وصارو يتضاربون واحد يكاوي الثاني ثنينهم نفس القوه تقريبا
اخر شي واحد شال سلاح على الثاني واحد وكف بوجه الثاني يريد يضربه

هنا تجمدت معرفت شسوي وخفت لاينقتل ضرغام هالمره يموت ويندفن ولامن شاف ولامن عرف.....

تابعو احداث الحلقات القادمه كنت معكم انا رغد الموالي في امان الله

شكرا لكلامكم الجميل 🌷🌷 وشكرا لدعمكم للروايه