تل الذهب
رغد الموالي
ـــــــــــــــــــــــــــــــــــــــــــــــــــــــــــــــ
- لاتحزن فالخالق يُرسل لك الأمل في أكثر اللحظات يأسًا ، لا تنسَ أن المطر الشديد يأتي مِن الغيوم الأكثر سوادًا.
- جلال الدين الرومي 📚.
ـــــــــــــــــــــــــــــــــــــــــــــــــــــــــــــــ
مريم....
حسيت بضرغام يكعدني يهمس
مريم.... حبيبي.... صح النوم
فتحت عيني وشفته كبالي اتبسمت اول ماشفته
ضرغام... صباح الورد
مريم.. صباح الخير
... صح النوم يله كعدي حتى نتريك
.. هزيت براسي بمعنى اي وكمت من فراشي
ضرغام... غيري ملابسج وتعالي انه بره
غيرت ملابسي استحيت اطلع من غرفتي بقيت متردده بين اطلع بين لا
اجه ضرغام ... وينج يلا
... همست بخجل... استحي
... ليش شنو اول مره تجين
... لا مو البارحه جان عرسنه استحي من خاله اطلع وبعدين راح ابقه هنا وااعيش مااعرف استحي اطلع
... اتبسم... عادي كل العرايس هيج يستحون بالبدايه
بس انه مو جديد عليج وامي مره متشوف اذا طلعتي صوت حتعرف بيج يمها ماطلعتي صوت شمدريها والجهال صغار مايفتهمون شكو بالدنيا
يلا امشي تره متت جوع وامي تنتظرنه
مسكني من ايدي واخذني للمطبخ جانت الحجيه كاعده
همس يم اذني قبلي ايديها وكليليها صباح الخير
... ليش
... الماشي هنا هيج العروس الصبح تقبل ايد عمها او عمتها
رحت عليها صباح الخير خاله واخذت ايدها توني اقبلها كالت
... لا يابنتي صباح الخير ... صباح مبارك عليج يوم
خلت بإيدي خمسين الف
... لا خاله مااريد عاشت ايدج
... لا يوم هاي مني الج
باوعت لضرغام هز براسه بمعنى اخذيها
اخذتها ودنكت بخجل كالت ام ضرغام
تعالي كعدي اتريكي يمه
كعدت اتريك وجان ضرغام والحجيه وبنته الصغيره
كاعدين نتريك والحجيه سوالفها حلوه
اخذتها بالسوالف واحنه مندمجين وياها
بهذه الاثناء ندكت الباب بقوووه راح ضرغام فتح الباب وفاتت
اييييييي عينيييييييي ليش لااااااا
مووووو داكوووووووول
والله وعرفتها هيييي
ضرغام... الي يفوت لبيوت العالم يحترم نفسو شنو هالتصرفات هاي مالتج
سندس... تصرفاااااااات اني الي مامحترمه نفسي لو انتتتتت يالشيخخ
ميتتها لااختي انت وهاي الحيه الي جايبها
باوعتلي وطبطبت على ايدها
ولجججج عرفتج من اول ماشفتججججج
عرفت بينج وبينه شييييي
وهذيج اختي الغبيه الي مصدكتك
مصدكتك يانذل
ضرغام... عليه انه نذل ضبي لسانج سندس
دااكول مره ومااقبل اتجاوز حدودي وياج
سندس... لا بالله شو دجاوز حدودي وميتني مثل ماميتت اختي على البطيء
وتربعت وكعدت بالكاع وهي لابسه عباتها وصارت تحجي وتبجي
سوده عليييييه نوووووور
ولجججح تعالي وشووووووفيييييي
ولج حذررررتج من هاي العكربه تاليها تزوجهااااااا
الله ينتقم منك ومنها عساكم لاتهنيتوووووو
مريم.. دااحجي عض شفته ضرغام بمعنى سكتي
وهو ربع ايده وارتجه بالحايط يشوفها شحتسوي بعد
سندس... ولج كتللللج كتلج بينهم شييييي ولج جيتها مو خاليييييه
يافاقده الذاكررررره
والله ماكو غيرج جانت فاقده الذاكره ومتدري بالدنيه شكوووو
الله ليعلم شتو جنت تشربها وتخليها تسمع كلامك وتصدكك بكلشي
وانتي يالعكربه ماخفتي من الله ماكلتي رجال متزوج مره مريضه عيب اخذه من مرته
ولج ماخفتيييي من ربج
ليش ولج ليش هااا
شسوتلج نور داتأذيها هيييييج
شو جابتج وكعدتج بيتها وامنتج على بيتها وجهالها ورجلها تالي تحطين عينج على رجلها وتاخذي منهاااااا
يبووووووووووو
سووووده عليييييه ينوووووووور
منين اجيببببججججججج
منين احفر الكبررر واطلعججججج
ولج تعالي شوفي رجلجججج
الي صرتيله خدامه
تاليها سنويه مالتج بعدها مطالعه وتزووووووججججج
اييييي طبعااااا تتزوج شفتها صغيره وحليوه كلت خوش صيده ليش افوتها
طاح حظك من رجال خاين
هو انتو هاي الزلم خونه
ميملي عينكم بس التراب
لا والله حتى التراب هم ميملي عينكم
كون عزرائيل يتذكرك ياضرغام
لان بس هو حيملي عينك
مريم... جنت اباوعله برود مو طبيعي بحيث طلع جكاره وكعد يدخن ويباوعلها ماردها بكلمه
وهي مستمره تحجي
سندس.. بس عزرائيل يملي عينك
خليتها لااختي خدامه للحباله والكراب
وجبتها للست مقرتها وخليتها بيت حايم تايم
محافظه على جسمها وشكلها وكلشي على الجاهز
وبس هذيج تحملت كلشي سوده عليه
طلعت خالتي ام ضرغام وحجت... ولج سندس جايه على ابن خالتج تباركيلو لو تتعاركين ويا
شسوه هو الرجال مشى بشرع الله كفر خو ماكفررر
سندس... كامت على حيلها وحجت بغضب
وانتتتييي خالتي يالحنينه هاي جزات نووواره خدمتج وقامت بيج جزاتها تزوجي ليش خاله ليييششش
ام ضرغام... وصية اختج هاي ثاني شي اختج مريضه والرجال صبر عليها وعالجها ومافاد شيسوي يعني هااااا
سندس... بصوت وفاتحه ايديها ثنينها وتصيح والعبايه كل شويه توكع من راسها وترد تصعدها
ونوووووب مطلعين اختي ووووصتتتت
ولج خافي الله مو رجلج باب كبرج
صاح بيها ضرغام
تكلم والجكاره بين اصابعه مأشر عليها
صار ساعه متحملج اكول اختها وحقها تحجي محروك گلبج وقدرت هالشي
بس من توصل تتجاوزين على امي مراح اعرف ولااقدر لاانتي مره ولامحروك كلبج
احترمي نفسج وحددودج لاتتجاوزيها
سندس... لعد هاي سالفه منها تزوووجك
... انه ردت اتزوج وانه الي خطبتها لمريم امي مالها علاقه
... سندس... شلون تخليها بيتج خااااله تاخذ مكان نوررر وغرفتها وفراشها ورجلها وجهالها شلووووووون
ام ضرغام... وينها اختج هااااا وينهااااا
امر الله بعد وراد يصير وتروح لدار حقها نعارض امر الله احنه هااااااا كليليييي
سندس... بس مو تزوجي انتي تدرين شكدهي تحبه جانت
ضرغام... تزوجي شنو انه مو جاهل حتى امي تزوجني ماتزوجني انتبهي لكلامج واعتقد لهنا وكافي تحملتج زياده كلام زايد مااسمع بعد
سندس... ماشي يالضرغام اني رايحه بس جهال اختي ويايه
ضرغام... انه ماذابهم بالشارع حتى يجون وياج ابوهم انه وانه الي اربيهم مراح تكونين احرص مني عليهم انتي
سندس... جبتلهم مرت اب يالشيييخ يالاب الحنيييين جبتلهم مررررت اب
ضرغام... وشبيها مرت ابوهم تاكل اوادم سندس الف مره كتلج انتبهي لكلامججج
سندس.... وصرخت بصوت... يبوووووووووو ولكم ياااااااناااااااس يااااعالمممممم تعالو وشووووفوووووووووو يهددني علمود مرته
تدافع لمررررتك طبعاااااااا عينيييييييييييي
ضرغام.... طلع موبايله وخابر
وهي مابطلت حجي
سمعتي خاله شفتي ابنج يهددني علمود مرتتتتته
شفتي سم الحيايه شلونه
شفتييي لج ماكلته لعقله اكلللل ميميزززز
ميكوووول هاي اخت المرحومه شلون احجي وياها هيج وكعدت وتبجي
جان المفروض تعزني على معزة نوووور
بس يانوووور ياسندس المهم العكربه مالتككك
عافها وفات جوه صاح مريم سويلي جاي
وخاله ام ضرغام كعدت يمها تحاجيها
ولج ليش هيج سندس
عبالي جايه تباركين لبن خالتج
سندس... ابارررك حقج والله مفروض اباركلهم واجيبلهم الهديه هذا الي تردي موووووو
ام ضرغام... يمه مو هيج على كيفج ميصير هيج تطبين عليه هو اولها وتاليها جان تزوج يعني شيسوي
سندس... وياخذها لهااااااي
جان عاشكها اني ادرييييي اعرف اختي بالتالي موتها القهررررر تكتم بداخلهاااااا
اختبييييييي متحجيييييي
ام ضرغام.. اختج تعبت بالفتره الاخيره هواي وبعدين تعالي اكلج هي ورجلها عاشو سويه منعته عنها دكله مريضه وعوفني تأزمت نفسيتها وهو يداريها وعينه عليها يكلي يمه حقها عاذرها
رجال صبر عليها وياها شيسوي بعدد هااا
ثاني شي هي وصته
كلتله خالتي متشوف وجهالي صغار تزوج من بعدي ضرغام كلتله جيبلهم وحده تسد مكاني هنا تداريهم
تدري بي على طول بره البيت من يبات بره هي تلمهم وتبقه جانت يمهم فكرت بجهالها
تدري ضرغام حيتبهذل بين داومو وبين جهالو
سندس... مو دانجي احنه اني وبنت اخوج بعد شنو هاللواكه الا زواج مو علساس هو جان وفي لااختي
ام ضرغام... شششش سكتي لايسمعج
سندس... لا مااسكت
وخل يسمعني
خل يحس بغلطه
بعدها تربة اختي خضره وتزوج
وصاحت عمري ماانساها الك يالضرغام عمرييي
والله بس يكبرون جهالك لااحجيلهم على عملتك هاي
والا لااخليهم يشوفون مرت ابوهم عزرائيلللل
اني الكمممم
ولبست عباتها وطلعت
صار الجاي اخذته ورحت على ضرغام جان بغرفته كاعد على الكرسي ويدخن صافن
مريم... هذا الجاي
اشر على الطبله اخلي من دون مايحجي
كعدت على جربايه انتظرته يحجي يكول شي لكن ماحجه شي جانت تعابير وجهها تبين منزعج ويفكر بشي صافن
تركته براحته وطلعت من الغرفه
رحت يم الاولاد جانت زهراء موسخه ملابسها
شلتها وغسلتلها وغيرتلها ملابسها ورتبت شعرها
والاولاد كعدو اخذتهم للمطبخ غسلتلهم وجههم وريكتهم وصارو يحجون ويايه
... بيبي كالت هاي امكم الجديده
... اي حبايبي اني اريدكم تصيحولي ماما
علي... هو يصير الواحد يجيب ماما جديده
مريم... لا ميصير بس مرات يصير
علي... لعد اريد بابا غير هذا
هذا مااريده لبابا ضرغام
مريم... ليش
علي.. لان.... وسكت بعدين تكلم
لان ميطلعنه مثل ابو مجتبى
ابوهم ياخذهم بسياره ويوديهم لبيت جدهم لو
للملاعيب بابا ابد ميطلعنه
مريم... حبيبي لاتتقهر هسه اكله لبابا ونطلع
علي... لا مراح يقبل
مريم... لا حيقبل هسه احجي ويا
علي... بس لمن تجي ماما نروح ناخذها ويانه
هواي راحت صارلها ١٠٠ و 200 ايام ماكوو
مريم... يله ننتظر ماما وتجي ونروح
علي... بابا كال هي سافرت للسماء هناك بالجنه
بيبي دكول هناك عدها بيت وتاكل موز وتفاح وجكليت وماخذتنه ابد وياها ابد
مريم... مو انتو تبقون يم بابا هنا احسن
علي... هي شلون راحت للسماء فوك شنو صارت مثل الطير عدها جناح وطارت
مريم... ( نزلت دموعي بعد مكدرت ابقه كاتمتها وصرت امسح بيها )..
علي... هو انتي ليش تبجين هاي ليش كل الامهات يبجون ماما هم جنت اشوفها تبجي
مريم... ليش جان بابا يزعلها
علي... لا بس هي تبجي مااعرف
كتلها ماما ليش تبجين كالت روح لغرفتك
مريم... احنه مرات نبجي لمن ننقهر
علي... انه ماابجي حتى لمن حسوني يضربني ونتعارك ماابجي بابا يكلي الرجال عيب يبجي مثل النسوان
مريم... بعدك صغير معليك بابا انت
علي... لا انه رجال وراح اصير ضابط مثل بابا واقتلهم للناس
مريم... ضحكت رغم دموعي تنزل... ليش بابا يقتلهم للناس
... اي يحطهم بسجن مرات يضربهم
... ويضربكم هم؟
... لا بس تدرين هو مدللها لزهراء وهي وكحه تكسر غراضنه وميقبل نضربها ابد وشكد يشتريلها حلويات احنه مو مثلها
... علوشي انت طلعت هنا مضطهد ومسلوبه حقوقك
لازم اشوف ليش بابا هيج وياك
... لاتكليلو علاوي حجالي ابد
... لا مااكله
عفتهم يلعبون توني اروحله للغرفه ندكت الباب
رحت حتى افتحها
فتحتها وجانت مره شفتها بالعرس
... صباح الخير
... صباح النور
... مبارك حبيبتي سبع بركات هاي جبتلكم الغداء اني من البارحه كتلها لاام ضرغام وينها هي
... جوه
... دسويلنه طريق دينزل حسين الجداري حبيبتي
.... اي خاله
فتت جوه ورحت نطيت خبر لضرغام
وطلع عليهم
شويه واجه كال
... هاي جيرانه جابت نزله غده
... عاشت ايدها
... راح يم ام ضرغام جانت بالمطبخ شفته مدد وراسه ومخلي راسه على رجل امه ويسولف وياها
... شبيك ليش هيج ضايج يوم
... مابيه شي
... من ساعة مااجت سندس وانت فتت لغرفتك وساكت قابل مااعرفك من تنقهر
.... جر نفس بعدين تكلم بندم... جان المفروض مااتزوج هسه بعدها سنوية نور مطلعت
ام ضرغام ... رغم انه احبها لنور الا انه اكثر وحده مرحبه بهذا الموضوع بيتنه صار محط رجل راحه مشفناها وره ماماتت نور
ضرغام ... بس سنويتها مطلعت
... بهاي حقك هي زوجتك واكيد المفروض تخليلها احترام كدام الناس
... وهاي انتي كلتيها
شحال اهلها والناس ولو كلهم ميهموني والله وجنت متوقع يحجون بس تذكرتها هي
جانت دوم تكلي ضرغام من اموت هم راح تتزوج وتحبها وتنساني
... ياابني مو مسألة حب وزواج
هو اساس الزواج استقرار ومن ماتت مريتك البيت نهدم جهالك تبهذلو وبصراحه انه بالبدايه ردتها لبنت محمد بنت خالك لكن انتبهت البنيه مهمله وجايه لغايه وهو انت
ضرغام... هاي وحده من الاسباب كلما افوت للبيت مينقبل مو نظيف الجهال اجي عليهم مو مرتبين وحتى ريحتهم مو طيبه اشوفها زحمه اكلها سبحيهم
لعد اجي انه من الدوام اكعد اسبح بجهالي وسندس كل يومين تلاثه مسويتلها مشكله وهذيج متقصر تهد لسانها الكاها عالكه بينهم هاي مو عيشه
ام ضرغام... والله علمود هالشي ردتك تستقر وترتاح على الاقل من اكو مره بالبيت كلها تتكتر على صفحه
لاتلوم بنفسك ابني الناس ميرضيها اي شي وتبقه تحجي شما تسوي لهسبب لاتضوج ولاتنقهر خلص انت تزوجت واستقريت بعد خلص هم جيبلنه جاهل من عروستنه يونسنه شويه
ضرغام... لا يوم شايل فكرة الاطفال من راسي
عندي تلاثه من نور هاهيه مااريد بعد
مريم.... سمعته هيج كال نقهرت اختنكت وفتت جوه مقهوره معناها ميريد مني اطفال
لعد ليش تزوجني شفقه يمكن شفقه لو لان شافني اني احبه واريده زوج الي مفروض هسه متلهف وينتظر شوكت يصير عدنه طفل اني هم حقي يصير عندي طفل
مااشفته الا اجه بقيت على نفس كعدتي غلى سريري مخليه ايدي على خدي وحتى ماباوعتله
ضرغام... مريم
مريم
باوعتله عقد حاجبه بأستغراب هز راسه متسائل
شبيج؟
باوعتله بعتب ودرت وجهي عنه
كعد كبالي ودار وجهي اله بطارف اصابعه
ضرغام... باعيلي مريم... شبيج
مريم... اني من حقي اصير ام
ليش تريد تحرمني من هذا الشعور... ونزلت دمعتي
فتح عينه بوسعها متعجب... انه احرمج من هذا الشعور؟ وتبجين؟
مريم... سمعتك وانت تكللها لخالتي مااريد واني مكتفي بجهالي من نور
ضرغام... سكت لدقائق ملامح وجها تغيرت مثل الي انتبه لكلامه همس بلين... بس مااقصد
مريم انه مااقصد مااريد اطفال منج لاتاخذيها من هذه الناحيه
مريم... لاتقصد انت متريد مني اطفال تستعر مني وحتى عقد المحكمه هم يثبت هالشي بالبدايه صدكتك وكلت مهم تزوجنا بس اكو هواي تفاصيل هواي ماحسبتلها حساب
ضرغام... لاتخلطين الامور انه لو مامأمن بيج ماادخلج لبيتي ونور عايشه من الاساس ولااتزوجج واخليج انتي تربين جهالي
مريم... كمت وكفت بتوتر تكلمت
لعد الي سمعته هذا شنووووو
كلييي لتخبلنيييي
ضرغام... وكف وي وكفتي وتكلم يحاول مايخليني ابقه زعلانه... اذا بنفسج طفل ماعندي مشكله
كلامي جان بدون تفكير
انه لانه اكتفيت بالاولاد هاهيه وكلت نكمل حياتنه بهدوء المشاكل تعبتني مريم لهسبب اريد اعيش انه وياج والاولاد كلت انتي تربيهم واولادي هم اولادج
بس اذا تردين طفل انتي مااحرمج من ان تكونين ام
مريم... اني احبهم والله بس هم حقي يكون عندي طفل قطعه مني
اني من جنت حامل بهذاك الطفل وخليتني انزله متت قهر عليه
... ملامح الغضب بينت على وجها لدرجة فرك وجها بعصبيه وتكلم بحديه نوعا ما
سمعي مريم الحياة الي عشتيها تنسيها
وتنسين شنو شفتي وشنو صار وياج
هاي اول واخر مره تذكرين سالفة حملج من هذاك النذل
بعد شويه عني وتكلم وي نفسه
اااااااخ لو الزمووووو لو بس ادري وين راح
مريم... ليش ماحققت وي الحجي وعرفت
... وانه لحكت عليه
قضيا عليه بكد القطر والمطر حيعوفون المصايب الي مسويها ويدورون ابنه واعتدائه عليج
انتحر حتى لانبقه نستجوب بي ضيع علينه كومه تعب
مريم... خل ترتاح العالم من شره
ضرغام... هواي اكو مثل الحجي مئات شترتاح الناس يروح هو يجون غيرو اضعاف تعرفين ليش
... ليش
... لان احنه دوله ناميه يعني تحت رحمة الدول المتحضره المفروض احنه بلد اقتصادي احسن بلد بالعالم بس للاسف العكس عايشين
... اي نكدر شنو المشكله
... ابتسم بااستهزاء... تعرفين شنو يعني دول ناميه؟
يعني دوله تصدر بسعر وترجع تشتري الي صدرته بسعر مضاعف
.... مفتهمت شلون تصدر بسعر وشلون تشتري بسعر مضاعف
... يعني تصدر مثلا منتج هذا المنتج الي تصدره الدوله الناميه للدوله المتقدمه شنو راح يصير راح الدوله المتقدمه تعيد عليه وترجع تبيعه للدوله الناميه بسعر مضاعف لهسبب تشوفين الدوله المتقدمه اكثر تطور من الدول الناميه لان الدول المتقدمه تفكر يلا تشتغل اما احنه نشتغل يلا نفكر
.... زين يعني ليش هيج يصير مثلا الدوله متكدر تفكر وتستفاد من اخطائها
... المسأله مو بهل السهوله مريم متعلقات هواي
لهسبب تشوفين كلشي مقيد وتشوفين الي مامقيد الفقر والجهل وسوء الخدمات والموت
هذا الي احنه نتاجر بي
طبيت السلك العسكري وتحديدا جهاز مكافحة الارهاب من بعد ما شفت الموت والقتل بالجمله صار
امي منعتني بالبدايه بس انه عاندت والا افوتلو
ودخلت وتدربت وتعلمت وتخرجت
لزمنه واجبات بأخطر الاماكن الي ممكن تتوقعيها
ايام ماجان الذbح على الجناسي جانت امي تاكل بگلبي ليل نهار
ام ضرغام... ولك يمه اترك هالشغله ولك لايذبحووووك شلون يعني انت تريد تميتنيييي
ضرغام... الله يخليج يوم كافي مااعوفها كتلج
اموووت ومااعوف شغلي
ام ضرغام... ولك يمه ناس رايحه بدربها جايه بدربها يكتلوها انت تريدهم يعوفووووك
ضرغام... الرب واحد والعمر واحد وهو الي انطاها للروح هو الي ياخذها محد ضامن روحو باجر عايش
ام ضرغام... شوف ضرغام لون ماعفت شغلتك هاي انه رايحه لعمامك هم يتفاهمون وياك
ضرغام... اكبر شارب ميهزني انه مو صغير وتهدديني بعمامي يوم مامقبوله منج هاي
ام ضرغام... لعد مقبوله منك تموت وتحرررك گلبي عليييييييك
ضرغام... كتلج كلمن يموت بيومو كافي الله يخليج
مره القينه القبض على وكر ارهابي جانو مختطفين بنيه الحمد لله تلاحكناها بالوقت المناسب والا كان الله اعلم شنو حالها
لكن على البقيه مالحكنه منهم قاتليهم ومنهم مثلين بجثثهم
مريم ... شلون يعني
ضرغام.... يعني يشوهون الجثه يطفون بيها جكاير لو يشككوها بموس يدجون بيها سجاجين هيج شي
مريم... يمه معقوله
ضرغام... شفت شغلات تشيب الراس بالنسبه الي جان الحجي نقطه بحر وماكان هدفي هو بكد ماكان الي وراه مريم
مريم... زين انتو هاي البنيه الي لكيتوها وديتوها اهلها
ضرغام... اي وديناها بس شنو جانت خايفه حيل حتى من عدنه خافت
مريم... ليش تخاف
ضرغام... حقها بنيه... ومن حقها تخاف على نفسها كلها زلم وبس هي بنيه بنص منطقه مهجوره تتوقعين ماالمفروض تخاف على نفسها
مريم... اكيد طبعا تخاف
المهم وصلناها لبيت اهلها
مريم... جانت حلوه؟
ضرغام... شوف انه وين احجي وهي وين تحجي
مريم... يعني سؤال
.. ويعني جواب سكتي ولايصير عقلج صغير
... بس بعدني زعلانه منك
... زعلي مريم زعلي وتدللي عيني انتي وحضريلنه الغده تره جوعان
.... باوعتله بعدم رضا
وهو رفع تك حاجب دار عينه بجهة الباب بمعنى يلا
رحت من دون كلام احضر الغده
وخليته بالصينيه واجوي الاولاد والحجيه وضرغام وكعدنه نتغده
اوقات الحياة تكون حلوه بلمه بسيطه مثل لمة الاهل على الصينيه شعور حلو واحنه كلنه ملتمين واني الي محضرتلهم حسيت اني امهم فعلا وكأني من زمان عايشه وياهم
شقاوة الاطفال جانت تضيف روح للبيت رغم هوستهم
مرت الايام وخلال هالايام هواي غيرت بالبيت ترتيب وتنضيف وديكورات بديت احب حياتي اكثر وبيتي
خصوصا وان ضرغام كان زوج اي بنت تتمناه بطيبته وحنيته ومعاملته ويايه
سديم...
فراغ جبير تركت مريم لمن طلعت من البيت رغم فرحت الها بزواجها من ضرغام وجان فعلا الرجل المناسب الها امنت عليها يمه
سديم... تتوقع ضرغام حيسعد اختي حيكون مثل ماتكلمت عنه مريم
ادم... ضرغام رجال والنعم منه وصدكيني اختج مريم مايرهملها غير ضرغام اقلها يعرفها اكثر مني ومنج
سديم... ماعرف شلون خليتها تتورط بهذا النذل
ادم... الاستعجال والخوف الزايد كلشي وارد منه شتوقع من تفكيرج يعني
سديم... مااعرف ماادري شلون هييييج
ادم... الحمد لله الله خلصها لااختج منه والرجال شاريها ورايدها رغم كلشي والااااا خل نكون صريحين منو يقبلها على نفسه يتزوج وحده ماضيها بنص قتالين قتله ونوب تنخطب وخطيبها يخليها بيته اسبوع منو يعقلها مامسويلها شي بس هي حجت وهو صدك رغم اعرف بي مامقتنع
سديم... شنو هو گلك
ادم... اني رجال وافهم الرجال شلون يفكر سديم محاجيه يكول بس هو يحب اختج لهسبب ميوكفلها على الغلطه
ضم على امه وكللها بنيه وفاقده ذاكره ورجعت لااهلها وانه حتزوجها على اهله وناسه ولو واحد غيره على سالفة الفيديو الي صارت اكبر حجه يترك اختج بيها بس هو لا ماعافها تتوقعين منه مراح يسعدها هذا هايم بيها مو بس يحبها لااختج
سديم... مريم تستاهل هذا الحب وهذا العوض
العوض من رب العالمين من يجي ياادم محد يكدر يوكف بوجها
ادم... بالضبط لهسبب لاتخافين عليها وخيتج هي سباعيه وتحبه هم
سديم... هواي تحبه شوكت نروح عليهم
ادم... خليها فد اسبوع مترهم هسه نروح بعدهم عرسان
سديم.... ان شاء الله
يغمرنا الحنين بعد ليالي من العواصف البارده
اعزائي اتمنه دعمكم للروايه والي ممتابعني ياريت يضغط زر المتابعه بالبايو بااسم Raghad almoualy
تحياتي
كنت معكم انا رغد الموالي في امان الله ♥
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!