السلام عليكم
رواية طوفان رجل
الفصل 36
نورا ناصر
"قد كنتُ في يومٍ بريء الوجه
زار الخوف قلبي فانتحر
وحدائقي الخضراء ما عادت تغني
مثلما كان
وصوتي كان في يوم عنيدًا وانكسر."
- فاروق جويدة
- جانت مهلة امان واني عنده ماتوقعتها تكون اخر فصول المعاناة والوجع ، جيته اطلب الامان ، وانشده امن عليه من كل الناس الا منه ...
وهذا اسوء شي صارلي انو اتأذى واتألم من الشخص الي لجأت اله واعتبرته ملاذي الأمن وبعدها مثل الي يوكع من الغيم للارض .
أول فصول حياتي واني اتخيل روحي جنين بأحشاء أُم رافضة وجودي ومجبرة عليه ، ممكن تشتمني بكل ذرة الم تحس بيها بسبب الم الحمل وثقله ممكن تدعي عليه وممكن تتمنى موتي قبل ولادتي .. هيج أفكر..
وبعدها طفولتي ومراهقتي وحرماني من أُنثى تحتضني رغم ارتويت من حنان جدي بس من اشوف بقية الأطفال الي بعمري وهم بحضن امهاتهم اتمنى اجرب هالشعور حنان الأم الي ماجربته ولا تذوقته ..
وراها عشت بمرحلة التعنيف والتعذيب الي جانت ترسملي أيام سوده بلون سواد گلوبهم ، عم مؤذي
وزوجة عم مابگلبها رحمة وبيبي الي جانت تصدمني بقسوتهه الغير مبررة ...
بس جدي جان دنيتي كلها ...
الى ان وصلت للمرحلة الي مكنت فيصل مني وتقدّمت اله على طبق من ذهب .. وهالمرحلة هاي اقسى مرحلة بحياتي وجاي انتظر الخلاص منها بفارغ الصبر ...
ما طلعت عليه سنة أحسها طالت كولش هواي ، ايدي
على بطني و كاعدة وحدي بالغرفة مقابيلي البلكونة مفتوحة ابوابها يدخل هوا بارد منها يتداور بالغرفة وينعشني واحس. براحة تنسيني همومي ..
هالفترة بطني كبرت وصرت حذرة بكولشي حتى اكلي بايدي اسوي والجاي اني اسوي جبت غلايه بالغرفة واسوي لروحي ، اني مااطمئن لأي شخص بالبيت غير رزان واحمد ...
فترة قبل السقوط وقبل اختفاء فيصل جنت اشوف بعيونه خوف وقلق ويتابع صحتي بجنون وبهوس ...
دخل عليه واني كاعدة اجه وكعد يمي ومرت ثواني صمت رهيبة اباوعله كاعد گبالي مخلي رجل على رجل
يتأمل ملامحي ، حافظت على صمتي واني انتظره يحجي ..
كال بعد حسرة ماناويه تفكين الحصار ؟
هزيت راسي وبنبرة شبه عصبية حچيت
- هذا الموضوع مابي نقاش فيصل
خزرني ودار وجهه جر نفس ... يتمالك اعصابه ...
واني اتفحصه بنظراتي دار وجهه عليه يباوع درت وجهي بسرعة قبل لا تدركني نظراته ..
كال بأسف شكلج تعبانة لازم اخذج للطبيبة تچيك وضعج بآي شهر انت هسه ؟
خليت ايدي على بطني اتحسسها واباوعلها بحنان وكأني ملكت الدنيا كلها وكلما اتقدم بالاشهر واني اتحمس اكثر لحتى اشوف طفلي الي راح ينور دنيتي ويملي حياتي ويصيرلي سندي ...
جاوبته يعني راح اخلص الشهر الخامس ....
كال راح احاجي هشام يشوف طبيبة زينة ...
هزيت راسي بإي ودنكت
حسيت وهو طلع وعيونه عليه ، الي هواي حارمته مني
اني هسه بس فرحتي بأبني مخليتني ملتهية عن هواي اشياء .....
بعدها فات للغرفة كال للعصر نروح حضري نفسج ، كمت على حيلي من مكاني ، احس بروحي ثگيلة وحركتي صعبة رغم بعدني بأول خمس شهور ..
حضرت نفسي بعد الغدا ونزلت من فوك فتت للصالة
شفت عمة صفية وفاتن ظلن يباوعن ..
فاتن ظلت تبوس بأبنها من شافتني وتدلعه تكوله حبيب البابا فدوة لبابا شككد يحبك فدوة وترفعه لجهة الشباك
شوف بابا عمار سوويله باي
اني ادري بيها هيج تسوي ، لأن عدها علم بفيصل مايريد جهال ابتسمت الها على عقلها اني صح انقهر بس مااهتم لموقف فيصل ، الطفل هذا اني گادرة اصير إله أم واصير اله اب
مثلما جدي صار الي اب وام ودنيا
كالت صفية يكولون تريدين تاخذين سونار اليوم تريدين تشوفين ولي العهد وابتسمت بازدراء ..
كتلها وين فيصل ؟
فرت ايدها روحي ينتظرج بالكراج هو وهشام
مااعرف هاي البشر شنو وشوون تكدر تغير الاقنعة الي
تلبسها كل شويه كدام فيصل تتصنع الحنية وتسوي نفسها تحبني وفرحانة وتداريني ...
ومن وراه تتعمد تأذيني وتستهزأ بيه ...اريد اعرف هايه شون ماتكره نفسها وهي بهالحالة هاية !
لفيت روحي بعبايتي وطلعت للكراج شفتهم هو وهشام ويمهم عمار
رحت وكفت يمهم بدون ما احجي ، هو باوع عليه
كال ها يله كملتي ؟
هزيت راسي بإي ..
عدل قمصلته وباوع لهشام وكاله يله ..
مشى للسيارة واني امشي وراه
فتح الي باب الورى وفتت بالسيارة
جان يوصيني على كيفج من تصعدين
واني فعلا ثگيلة گوة اصعد والسيارة عالية ..
كعد بالصدر هو وهشام ساق السيارة
واني طول الطريق متحمسة اعرف شنو بيه ومتحمسة اختار اله اسم ودوم اتخيل شكل الطفل الي راح يجيني مرة اتخيلها بنية تشبهني ، مرة ولد يشبهه ...
وكف السيارة بالكراج معناهه وصلنه ، تنفست بتوتر فتحلي الباب ونزلت ...
وطبينا للعيادة ولمن اجا دوري واخذت سونار طلع بيه بنية نزلت دموعي بلحظتها صرت ارجف ...
الدكتورة تكولي على صحتها واني بس اهز براسي
كتبتلي السونر وبعدها طلعت كتله ظل متفاجئ وصافن هي ثواني وظل يصب عرك ومد ايده يمسح بوجهه
ماعرفت احساسه جان غامض بالنسبة الي
خوف فرح مااعرف !!!
هشام كال ع الخير ع الخير ويباوع لاخوه ويضحك وهو وجهه احمر محتار شيسووي
اني ادموعي تنزل خوف وفرح من كولشي كولشي منين مااشوفها مقفوله وتخوف بوجههي ...
افكر بالبيت صفصف وفاتن واذا سلمت ورجعت يم جدي الكه بيبي وهناء واني شنو اصير وهذه ابطني وهيج
زين لو تطلع وين اخليها ياربي
امسح بدموعي وهو صار مقابيلي يعدل بالعباءة عليه وهشام يضحك ويغمزلي عود شوفي فيصل شون محتار بيج
ضحكت اني همين ... و طلعنا اباوع عليه ماادري شنو افسر وجهه كتله وديني مطعم بماانو طالعين
كال وين اكو مطعم هنا هسه
كتله بالجادريه اكوو
كال مو النا مو النا بالبيت يسووولج الي يعجبج بس كولي شنو مشتهية ؟
هزيت راسي بمعنى مااريد
سكت ثواني ودار وجهه عليه واني ضايجة
كال ولا يهمج بس ناكل بالسيارة ماننزل
ابتسمت كتله ميخالف ...
كال لهشام وكف السيارة
ركنها هشام ونزلوا جابوا كص
انطانيى واني شهيتي مفتوحة كعدت اكل بنفس
اندار يباوع عليه مديت ايدي انطيته لفه
اخذهه كال لخاطرج اني مااحب اكل البره مااستنضفه
ضحكت وكلت بگلبي عمو النظيف شون بي وبسوالفه زين هسه خلفته مثله تطلع لو لا ..
واني اكل يباوعلي ويضحك ... ضحكت وكتله شبيك
هز راسه مكو شي .. هزيت راسي ورجعت اكل
حرك السيارة هشام وصلنا للبيت ..
دخلنا للبيت وكالعادة صفصف وفاتن والجلسة الرهيبة مالتهن ، كاعدين بالصالة ويترقبن بس دخلنا عليهم
كامت صفصف تلكتنا بكلامها المعسول والمصطبغ بالحنية الزائفة والكريهة ..
ها يمه شلونها درة شلونه وليدنه شكالولج عن صحته ان شاءالله زين ..
جاوبهه فيصل زين يمه زين قصدي زينة بنية بنية
وهي طكتها ضحكة شعلوها بس مو ضحكة فرح لا مبينة ضحكة شماتة عود لأن بنية ماتدري أني طايرة بيها وفرحانة ..
هو ضحك وصافن عليها وبيده جكارة .. اجت يمي بوستني وراحت بوسته وباركت اله وهم فاتن لان كدامه اجت باركتلي وكالت شبيهه البنية هم حلوة لتضوج
جاوبتها ومنو كالج ضايجة أني!!
عمار كال شبيج عروسة لأبنه ...
اخذني فيصل من ايدي كال امشي ارتاحي بغرفتج تعبتي من الطريق والانتظار بالعيادة ...
اخذني ودنصعد الدرج واسمع صوت ضحكة صفية تلعلع ..
فريت بيدي شوون عقل عدها والله يا الله ..
صاحت على فيصل يمه فيصل لتضوج البطن الي تخلف البنية تخلف الولد ...
هز راسها وجاوبها اي يمه صحيح ...
واستمر يصعدني ويدردم عليها شون امج خلفتج وجابتج علة علينه هيج بالضبط
عاد مدري بيها سمعته لو لا صعدنه للغرفة .. واخذني للحمام الي بيها غسلت ورجعت تمددت عالجرباية
اجه كعد يمي ...
كال وضع العراق ابدد مو زين امريكا محشدة جيشوها على الحدود
هزيت راسي واباوعله
هو قرب مني وكال اسمعي زين كلشي يصير القاصه تعرفين رمزها تلمين كلشي وكون محد يعرف
فلوسي البره ومصانعي والعقارات والبستاتين كلها سنداتها يمج اي شي يصير كلها الج اني كاتب وصيه حافظي عليهم سمعي ياروحي
كتله لاتخوفني فيصل
خله ايده على ايدي
وكال لا يابه ماكو شي ان شاءالله خير
سحبت ايدي منه وكمت اغير ملابسي
وبالي يم حجي صفية
سبحان الله شكد زين ومعيشها بخيره ومايغزر بيها ابد
هو عبالك قرا افكاري
كال مبين الفرح بوجوهم وضحك باستهزاء
كتله عايزة على فرحتهم اني ؟
كام على حيله
كال باعي القاصه بيها شغلات تكسر ظهر صفيه بيوم اذتج او دكت ناقصه عندي شغلات تنهيها حتى ولدها يتبرون منها سمعتي واحجي بزودج وياها
كتله لاتخوفني عليك شنو انت منصبك مهدد بشي ؟
ضحك كال لايابه اني ماعندي شي اطمنئي بس هاي دنيا كلشي يصير بيها ..
تقرب مني كال تخافين عليه ؟
درت وجهي وهزيت راسي بمعنى ماادري
تقرب اكثر وقرب شفتيفه من خدي حس بصدودي اله
ظل يشم بشعري و همس مشتاقلج
رجعت ليورا بحركة عفوية ... واباوع بعيوني عليه احذره يتقرب أكثر ...
كال الحصار مانفتح عليه مو كافي درة ؟؟
هزيت راسي هو يقرب واني ابتعد
كتله بتهديد حدك لهنااا
كال حرام عليج الله يعاقبج اني زوجج
كتله فيصل احنه اتفقنا وانت انطيت كلمة اللتزم بيها احسن
تقرب ولزكني على الحايط جانت عيونه تنطق غضب مكتوم
كال بتهديد اندمج وروح امي اندمج صابر عليج صار هواي عبرتي كل الحدود
كتله تريد تقنعي كل هالمدة مالازم مرة تضحك عليه وانت ماتكدر تتحمل لاااا هههه وهم تهدد .... اعلى مابخيلك اركبه فيصل
رفع اصبعه السبابة بتهديد كال شوفي بس انطيتج مجال وكبرت راسج تفرعنتي مو نسيتي حتى الحلال والحرام لج مو مسوي قيمة ومكان الج لادفريها برجلج لا طلعين المارد البيه خليني قافله وشامر مفتاحه شتريدين بعد فهميني بس اشري بايدج
كتله هذا الشي ماينطلب عمو هذا ينحس ينحس واشر بعيني
كال هينه عموو هينه الا اخليج تركضين ورايه وماطوليني
فتحت عيوني واضحك بهستيريا. انت تريدني نفس الي اخذتهم اتملق واتلوك وتدوس عليه وارجع اتودد اصحى عمو اني دره الضبعه ونسيت ربيت ويالزلم راسي مااطخه لأكبر واحد اذا جنت مصدك لويت ايدي بجدي انت غلطان اني يمك فقط الي مساحة امان لفترة وبعدها باي باي
فتره وبح كلمن بحاله
هو ضحك كال قاريه قبل بالتاريخ الرسول من اجوا الكفار علمود يعوف الدعوه الاسلاميه لمن كال لو ضعوا الشمس في يميني والقمر في شمالي ماتركت هذا الدين سامعتها ؟
هزيت راسي
كال اني اكولج لو وضعوا الشمس في يميني والقمر في شمالي ماعفتج يادره ماعفتج يادره احفظيها زين لو شنو يصير بس الموت يا دره ....
............
چنه نتابع الاخبار وطالع بيها الصحاف وزير الاعلام العراقي السابق بحكومة النظام السابق
مؤتمر صحفي وهو يكذب خبر وصول الامريكان لأطراف بغداد ويكذب دخولهم للمحافظات ...
اندكت الباب طلعوا الولد فتحوها طب علينا جدي
رحت حضنته وبوسته سأل عن حالي كتله تمام بخير
كعد بالصالة واجت صفية سلمت عليه
كالت كومي درة سوي جاي لجدج
دااكوم واني كاعدة بصف جدي لزم ايدي
كال كعدي بويه وكمل حجي لموا غراضكم وتعالوا يمنا يكولون الامريكان راح يطبون على البيوت بلا حرمة ...
فيصل كال حجي بلغهم ينظفون بيت البستان واحنا جايين ان شاء الله ...
رد جدي اي فيصل احسن شي جيبهم يمنه للبساتين
اي حجي اليوم نطلع
تعاي دره يله يمه ووينها فاتن لموا نفسكم واخذوا الحاجات المهمة بس وخلينا نرووح ....
كمت بوست راس جدي كتله من رخصتك ...
لزم ايدي باسها كال مرخوصة بويه على كيفج ويه صعدة الدرج ويباوع لبطني .. ضحكت بوجهه شلون يخاف عليه ..
صعدت فوك وفيصل وراي وكفت بنص الغرفة
كال باعي كلشي لمي واخذي وياج
سألته وانت وين راح تروح فيصل ؟
مجاوبني راح جاب علبة جبيرة ومغلفة
كال هاچ اخذي هذا ذهب امي اريدج تحافظين عليه وهناك هم اكو قاصه دره احرصي عليهم
كتله ليش انت وين ليش دتوصيني ؟
كال اني موجود لاتخافين عليه
قرب مني و باس راسي
مشا ورجع باسه مرة ثانية سحبت روحي منه
كال بوسة الراس مالها علاقة بالزعل من جنتي صغيره ابوسج من راسج احب شمة شعرج هاي البوسه ماتروح لو نتذابح ونتزاعل ولو كلشي يصير مااعوفها سمعتي؟
يعني مثل الاكل ومثل الشرب من نتزاعل نعوفهم ؟؟
كتله لا ...
ضحك ورجع باسني طلع وهو مشغول هالايام كولش بوضع العراق حسيت بداه قلبي يرفرف عليه
بديت ادور ريحته اشمها اسال عنه وانتظره وافرح من يطب ولو شنو بي ومشغول هلكان بشغله يبوس راسي وحتى لو كدام منو دعيت الله يهدي عليه
تحولنا لكاعهم الي بديرتنا كولش جبير نفس المنطقه بس مسافه بينا لان كلها بساتين هي باطراف بغداد واختفى فيصل وماله اثر الكل يسال عنه وين ماكو خبر منه سألت اخوته واحد واحد محد يعرف ، سألت نفسي ليش هيج يسووي ليش يرووح وميكول
مرت ايام وبيوم نايمين ...
سمعنا صوت الطيارات والطلق وسمعنا نداء بالخروج من البيوت والانتشار بالمزارع لان انزال الامريكان صار على بغداد ...
انتشر خبر سقوط بغداد بنفس الليلة وانتهت حقبة كاملة انحكم بيها العراق بالحديد والنار وراحت هوايه ضحايا ابرياء ومن بينهم والدي الله يرحمه ..
الخوف سيطر عليه وابجي عليه اخوانه عادي بس احمد يحوس مثلي وقلق عليه وصفصف الجو حلالها لان ماكو صكارها ...
بقيت بحيرة من امري ووينه فيصل ووين راح ، سمعت هواي معارك طاحنة صارت ببغداد وراحت بيها آلاف الضحايا بحيث سمعنا بالراديو اعلان منظمة الصليب الاحمر وقوع مذبحة ببغداد واعلنت وقوع قتلى وجرحى بمعدل 100 جريح وقتيل كل نص ساعة يوصلون لمستشفى اليرموك
سؤال اردده كل شوية معقولة هو منهم !!
معقولة بنتي تعيش بلا أب! اني مقررة انفصل عنه لأن مستحيل اعيش وياه وهو بهاي الحالة من تخلص الفترة ارجع بس هم ماريد بنتي تعيش بلا أب! ع الاقل اسمه بالدنيا ماريدها تعيش مثلي يتيمة ..
بقيت مثل الطيرة المذبوحة ع النص
بهذا البيت ماكو مساعدات وهنه تعلمن على الراحة ويردن واحد يخدمهن ويردن ادخل وياهم بالشغل
وشلون اثنيهم هنَ
دخلت عليهم شفت صفية جانت تحجي وياعمار تريد مره تنظف الها البيت
كال الها بعصبية :- ماعندي فلوس انتن أربعة ونظفن
هو كرميده ماينطي الفلس على خاله الي هو عمو حامد
كالت منو ينظف بعد صدك تحجون اني مابيه
فاتن جاوبت اني اصلا مااعرف كولشي اسوي وابني ماخذ كل وقتي اني هم ما انظف مالحك بس دره ورزان فارغات هنه يشيلن الشغل ...
رفعت راسي كتلها نعم نعم احمدي الله مو زين عايفتكم بيتي واسمعي اكعدي عوج واحجي عدل اني مو خدامه لخلفج بيج خير اخدمي نفسج وبلا تشمر بالحجي
عمار كام كال عيب هالحجي درة
بعد دااجاوبه كامت عمه صفيه ولج بت الروسيه لمي لسانج هذا بيتنا بيت ابو فيصل واني الامر وانهي وسبعج ماكو راح وياه الراحوا و ضحكت
حجيت واني كاعده ههههههه هذا بيت رجلي ابو بنتي وانتوا جنت عايشين ببيت جدو قاسم عمو محمد
( ابو فيصل ) الله يرحمه ضيع كل ماله وحاله وهاا فدوه لادوخيني بهاي السوالف تره اني اعرف التاريخ كله مو كدامج زعطوطه اني صاحبه البيت واني الي امشي الي يعجبه كان بها والي مايعجبه بكيفه مااجبر احد
ظل عمار يسوي تؤتؤ تؤ
باوعتله عمار كلامي بي شي ؟
دار وجهه مني و صاحت صفيه والله اندمج واسحلج وادوس ابطنج اطلع مصارينج ومصارين بتج الخابصتنه بيهه
كمت و تقربت يم اذنها عادي اسحلي بس انتي تكدرين تخسرين ولدج لو اشوفهم الي عندي؟؟ غمزتلها اشوفهم شنو من دلائل عندي عليج
بههت وفتحت عيونها كالت خايفة على مصدومة
جذابه امشي ولي
كتلها براحتج بس فيصل امنهم عندي واني هم امنتهم
يم احد خاف يصير شي بيه وانتي للتاريخ مشهودلج
دفعتني من زندي
واني عفتهم وصعدت الدرج وطليت عليهم
وحجيت هاي اخر مره اسمح لواحد يتجاوز حدوده ويايه احترموني احترمكم
كلت هيج وكملت طريقي لفوگ ، احس دمي يفوور منهم
مااريد اكثر لا طامعة بمركز ولا بسلطة مااريد منهم غير الراحه لااكثر ولا اقل ويعوفوني بحالي ويااطلال فيصل
وين راح ياربي رجعت اتذكر من كال احجي بزودج وياصفيه ركضت وراه شنو لازم عليها وهيج تخاف منك؟؟
كال بعدين تعرفين بعدين درة لتلحين ...
كتله لاعفيه هسه احجي والله مااتحمل
ضحك ورد فضولية مو بيدج بس شتنطيني واحجيلج؟
كتله لا عااد شنطيك مثلا شنو عندي فلوس تريد ؟
و ضحكت بصوت
كال شنو فلوس شايفتني اگدي منج اني ؟
ابتسمت لعد شنو الي تريده ؟؟
مدايده على القراصة وفتح بشعري يلعب بي
كال مو طماع بس انت تعرفين الي اريده وهاا اريدها بنفس مو هيج جفيان شر ...
ظليت احك بشعري وافكر
كال لاتحكين هاي مقابل هاي بله الي يسمع شيكول يصدك مرتي و اتوسل بيها على حقي الشرعي والمشروع ..
كعدت عالسرير وحركت اكتافي وانطيته ظهري وحجيت موووالا اعررف
كعد يمي لزمتي من كتفي دارني عليه
كال راح اكولج بس لأن حتى يصيرلج علم لا أكثر ولا اقل
كتله بترقب شنو ؟
رد مو صفيه هي موتت ابوي
كتله شلون ؟؟
كال والله ابوي مات مسموم ...
لطمت خديى بقووة من الصدمة
لزم ايدي سحبها وكال لتسووين هيج مرة ثانية ديري بالج
كتله لا مامعقوله ...
وخليت اديه على خدودي اني وي منو عااايشة فيصل ويي منووو وانت عود امان اليه ومخليني عايشة وياها فييصل شلوون
جاووب بحزم شحدها تدنالج لتخافين متأذيج
رديت عليه عفية اذا هيج هي قتلت ابووك
ليش ماسجنتوها ؟؟؟
كال اني مااريدها تنسجن اريد اخذ حقي بيدي منها
وصراحة درة ابوي يستاهل ضيعنا كلنا حتى اخواني عدهم عقد بسببه ...
بااوعتله هذا صدك مريض نفسي يربي اني ووين اودي رووحي منهم هذوول كلهم مررضى معقدين ييمه وقتلى حتى فيصل قاتل مو راد يقتل ابني ابطني ... ليش هيج جدوو ليش
كتله عقلي ماجاي يشيل الموضوع جرني وطلع تقارير الوفاة من القاصة ..
كتله شون عبرت على الحكومة
كال حصار وناس موتها الجوع الكل سكتتهم بفلوس وهي اخذتها ونكرت ابد ماحجت بس هي ذكية دارسته للموضوع دراسة ...
تعرفين شنو جانت تنطي للزرنيخ على شكل دفعات يعني اسبوع وهو اذا قليل يسبب تقيء واسهال ويوميه تزيد شويه شويه
بوقتها هو ضعف وجلد وحيله باد من لكوه ميت محد فكر مسموم كالوا اتمرض من الشرب وفراك امي ومات بس اني متوقع منها بعد ماجنت اجي واذب حجي ابوي عنده كاع واشتريت بيت وخليته باسمه وفرحته وهذا كله طعم لصفف لج اني مااكدر استغنى عنها بحياتي مثلج بالضبط
كتله لاتخبلني حدث العاقل بمايعقل عقلي مايستوعب الي اسمعه ليش عايش بقهر وضيم خليها تنسجن وتاخذ جزاتها ليش تضيع عمرك تفكر بيها
كال منو كلج اني مضيع عمري اني مستمتع بيها وبعذابها
كتله فيصل جاي اخاف منك جاي اشوفك شخص غريب مااعرفه ليش هيج الحقد ياكل من عمرك الله يحاسبك
انكلب وجهه كال وسنين عمري تروح هيج شلون اذا مااعيّشها ضعف الي عشته ونفس الكاس ما ارتاح
كتله ياكاس فدووه عوفه هذا الموضوع لاتضيعنا اخوانك تخسرهم من يعرفونك تهدد بامهم
ضحك لج ياام شاذكر منها تعرفين اني اني من جنت اتمرض شنو تسوي مره جنت مستبرد اسهال وتقيء بالليل جانت تعوفني ازوع على روحي والاسهال هم وماترضى اكوم اغسل
وابجي تكلي الا اخلي الجهال تضحك عليك وجر البجامه مني وتتفرج وتضحك شنو جاي تكولين والله مااريدها تموت لان قلبي مايرتاح الا اشوفها اضعاف اضعافه ...
ودموعه تنزل شبكته وظليت ابجي وياه وادعي بقلبي الله لاينطيج صفيه عمره ٤٠ وماينسى كلشي سويتي بي حسبي الله ونعم الوكيل ظليت شابكته وهو متمسك بيه ...
نمنا على هالوضعية ... كعدنا الصبح
ورى ما صحصحنا كال يالماتخافين الله شون تنامين وانتي مطلوبة ؟؟
ضحكت كتله نسيت حتى اسمي من الي كلته البارحة
كال كل فكرج تخلصين منهم محد يكدر يحميج غيري كل عقلج يعوفوج من يموت جدج ؟؟؟
كتله اشش اسم الله لا تكول هاي الحجاية بعد
كال احجي حق الله على كاع ابوج هسه جدج مسكتهم واني بعده اوكف بوجه كل واحد كل واحد انتي لحد هسه ماتعرفين ماضيهم باعيني اخاف عليج اكثر من روحي ....
رجعت لواقعي لعد وين صرت احميج واحميج وينك خوفتني واختفيت شردت بروحك العزيزة ومافكرت بيه اخخ فيصل اخخخ مخليني وي وحدة قاتلة !!
ظليت ادور بالغراض الي ضامها عندي اكلب صور لزوجاته حلووات وحده احلى من الخ من كل شكل ونوع وهوايه فلك اسود شكد متزوج يبووه يكول ١٥ جذاب اكثر بهواي ظليت اتفرج بيهم
الى ان خلص النهار وسمعت الاذان تعوذت من الشيطان لميتهم وضميتهم بالقاصه وقفلتها وتوضيت وصليت ...
اجت يمي رزان وجهه مستبشر تضحك .. كالت سمعتج تصيحين شبيج ليش كل هاي العصبية على كيفج ويه نفسج محد يستاهل يمعودة خافي على البنوتة خطية تخاف وضحكت
تخصرت الهه اكولج انت شكووو وجهج يضحك تطلعين للمزارع متجين الا المغربية لج متخافين على روحج طيارات فوك راسج من غضب الله على راسج عندج اخوان خافي على روحج
ضحكت وتمددت وارتكت على عكسها
هسه شلوون درة خانم اخاف من الطيارات لو من اخواني ؟؟ حيرتيني ...!!!
رديت عليها ولج شعندج احجي !!! ومنووو
ضحكت وكالت داااحب ميصيرر ؟
لطمت خدي وتذكرت فيصل من يمنعني الطم
عصرني گلبي ومغصتني بطني
غضب الله عليك الشايب انت واختك !!!!
انوب هاي تمددت كلها عالسرير وضحكت الفطيرة شكلها غركانة بالحب
جريتها من عكسها ولج كعدي رزين هو وكت حب بهالزلك كعدي احجيلي يا مصخم الوجه هذا الي عندج علاقة وياه
كالت بصدمة عزااا درة والله مااكو علاقة لحد الآن مجرد نظرات ومدري شوكت تتطور عود من تتطور اكولج منووو
وخلت وكامت تضحك ... كتلها امج صفية واخوج فيصل عليمن اعتب عليج بعد
وكفت يم الباب كالت ليش شبيهم ؟
فريت ايدي تعاي ولج بس نظرات وتظلين للمغربيات برى البيت شحال لو علاقة
كالت شبيج اني يم البنيات وهو يتسرسح علينا كل شوية واني اشوفه تجي عيني بعينه وادنك خجلانة وهو هم يطل بوجهي ويضحك وكاضينها هيج والرزق على الله
كتلها ولج ثگلي ...
كالت خوش مرة ثانية اشيل وياي جم جيس سمنت
كالت هيج وخلت وطلعت ، ذكرتني بشووكة وظليت اضحك ...
نزلت من فوك المغرب ، تلگتني فاتن صرنا وجه بوجه اني وياها كالت شبي وجهج فالت وطكتهه ضحكة
لزمتهه من ايدي عصرتهه حيل احترمي نفسج فاتن وخليلج حدود من تحجين ويايه
سحبتها مني كالت شدعوواج دااشاقه وياج بس خلي اكولج شغلة تفيدج حتى لاتصرفين حزن زايد لأن فيصل عتوي بسبع ارواح هسه يروح ويرجع ووياه وحدة وانت ظالة جنج بوومة تندبين حظج
كتلها ترووحين فدووة للبومة منو انت وتجيبين سيرتها على لسانج انت وحدة نكرة
ردت بضحكة شبيج خايفة على مشاعرج
وكالت بتفكير اذا فيصل هسه بسوريا معناها راح لمرته السورية
فتحت عيوني مبهووتة شنوو ؟ انت ليش هيج نذلة حرام عليج ترى الجذب حرام شراح تستفادين تحصلين اثم على خالي بلاش
ردت لا ولج شبييج ههههه والله عنده وحدة سورية بين فترة وفترة يروح يمها ويعشقها يحبها بس متقبل تجي للعراق
باوعتلها بصمت فرفرتني وتضحك
كتلها ان شاءالله حرگة گلبي بيج
خليت ورحت للحديقة كعدت وحدي واضرب حسبات معقولة صدك حجيهه هاي فتينة !!! اخخ فيصل اخخ منك ..
صفنت وهي دقايق مااشوف إلا احمد كعد يمي
كال الي ماخذ عقلج يتهنى بي
باوعتله اتحسر
رد وهو يلزمني من حنجي لالا شنوو هالحسرة هاي ؟
لاتفكرين فيصل متعودين يختفي ويطلع فجاءة هسه ماتحسين الا طاب علينا
شنو مشتاقتله ؟؟
كتله لا مقهوره منه سمعت اكيد يم مرته السوريه احمد والله قلبي خلصان مو مال اتحمل غيره وهو مزواج
ضحك كال لا عاد انتي وحد عنهم كلهم يحبج مو بانصاف بجنون والله والله سوه عمايل يابو عمايل حتى تصيرين اله
هزيت راسي مثلا شنو هاا مثلا شنو ؟؟؟
عدل كعدته وظل يكح هاا احم احم
رديت عليه شبيك غصيت وظليت اضرب على ظهره
كااال خربيوومج غييير قووية ايدج دكاافي كاافي ملاكم انت ؟؟
رديت عليه لعد احجي شكووو ؟؟
طبت شوكه تلهث من التعب العبايه نصها وواكعه من راسها وكلها تراب
كمت كتلها شكو شبيج جايه تلهثين ؟
كالت اوكفي خل اجر نفس
باوعت لاحمد كالتله اكولك شبيك ماتاخذني ادللك دلال
كالها لايابه انتي اكبر مني بس الي يفيدج هشام بعمرج ودكتور يلمع يخبل شدي حيلج عليه
كالت خوش فكره ولولا انتو ولد صفيه ماوراكم بس شلعان الگلب
ضحكنا ... كالت المهم دره عمامج اجونا ويردوج ...
كتلها ياعمام عمو حامد وفلاح يردوني شنو يردون ؟؟
غمتني هم ذول عمام ويسالون عليج لا لا ذوله ستة يصفنون جنهم دنگ ولج من العمارة جايين
كتلها ماافتهمت منج شي جدي موجود؟؟
كالت اي هو دزني يله امشي وياي
كتلها خلي اجيب حجاب وعبايه واجي وياج
رحت للبيت طول الطريق افكر منو ذوولي عمامي وشتقصد شووكة !!
صعدت لغرفتي و لبستهم ونزلت واني هلكانة من التعب
باوعت لاحمد كتله بتوسل تعال ويايه احمد
كال يله امشي نرووح
مشينا بالبساتين تعبانه وبطني كبرانه كوه امشي وصلنا مسافه يمهم طبيت على الديوان كلت السلام عليكم لكيت جدي وليد كاعدين ووكوومة زلم داير مدايره كاعدين ...
لفيت نفسي زين منهم بالعباية كلهم شباب وضخمين وكفوا الي وبوجههم ابتسامة
كال جدي سلمي على عمامج ظليت محتارة مااعرفهم فكرت بثواني بالفصلية الي كلي عليها فيصل
كام رجال جبير بعمر فيصل طويل عيونه واسعه وشامه جبيره جوه عينه والشيب تارس لحيته وشعره رغم هو بعمر فيصل
لابس عباه وبيده سبحه بس نظرته الي دافيه وحنينه وحتى الولد الباقين يركزون بيه وبوجهم ابتسامة
كال كربي بويه هلا بت الغالي
كربت منه ولازمة بطني احس اجاني الم فجأة
يتبع ...
مشتاقتلكم 💕
على بركة الله نبلش النشر بين يوم ويوم ان شاءالله
🤫بدوون تذمر ونكد
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!