السلام عليكم
رواية طوفان رجل
الفصل 35
نورا ناصر
سنرحل جميعًا،
ورغم علمنا بهذا الوداع المؤكد
لا نزال نؤذي بعضنا بأشد أنواع الأذى .
باوعت لجدي الكاعد بصفي وصفنت ورحت بعيد بصفنتي واحاجي فيصل بقلبي شيخلصها وياك وشتريد مني لخاطر الله
والله خايفة منه شون بلوى ابتليت بي وشون وياي وشنو حالي من يدري بيه حامل ووكوومة أسئلة محيرة روحي
رمشت وركزت بعيوني على جدي مرة ثانية تأملت تفاصيله كلها ...غترته ودشداشته ، عوجيته الي مخليها يمه ، عروق ايده البارزة شكد احبه ياربي
وتنهدت ماعندي غير الدعاء ..
دعيت يارب ساعدني وارحمني ولاتكسرني بجدي ولا تحرمني منه انت ارحم لراحمين
باوعلي وابتسم وعبالك يقرأ كل افكاري ، ابتسامته الحنونة الهادية خلتني ارتاح أحمد ربي على وجوده والباقي كله يهون أني ما اكدر بدونه ..
اجيت أكوم ، مدلي ايده وكومني ويحجي
على كيفج بويه من تگومين
لزمت ايده ارتاح انته جدو اني بيه اكوم انت هم تعبان
جر راسي وباسه ، حضنته وكوة كوة لازمة نفسي ما ابجي
كال روحي مددي وارتاحي لا تظلين كاعدة هواي موزين عليج
دوم يهتم بيه وبراحتي ياربي اني طلعت من الدنيا بس بي وماعرف بعد بهذا الطفل الي ابطني مدري يسلم منهم مدري يسلبونه مني مثل ما سلبوا كل قوتي وخلوني هشة وضعيفة
بس أني كلش رايدته هذا الطفل رغم كل شي جاي امر بي رغم ممأمنة على حياتي ولا على حياته
رغم ابوه مريض نفسي ومااعرف بأي لحظة شنو ممكن يسووي يقتل يحرك يشوه يكسر كل شي اتوقع
ولا حتى اعرف لاي درجة حالته سيئة
ولو هي مبينة حالته سيئة من راد يقتل الطفل وهو ببطني
بس حابة وجود هالطفل بحياتي احسه مثل وجود جدي ...
عفت جدي بالحوش وتوجهت لغرفتي ، فتت من باب الصالة
ومريت من يم الهول لكيت رنا ووليد كاعدين لا ارادي راحت عيني عليهم ...
جانوا قريبين على بعض يتهامسون ويضحكون
مبينه امورهم تمام خطيه اثنينهم تعبوا رنا ذهب ووليد سوده عليه قلبه انكسر والله اموت عليه وقريب الي
يمكن لما حاجز حبه اليه والي خلاه بينا جنت سولفتله عن كل مخاوفي واسراري جان اقرب شخص الي من بعد جدي
نظراته جنت اشوفها صافيه من احجي من اصد بيها ابعد عيوني كمت اقراها وفيصل الي جان وين من اشوفه ابتهج وافرح هسه صارت شوفته ومن اذكره حتى معدتي تاذيني
شون الدنيا جاي تفر بيه وين توصلني ماادري
دنيا تبعد القريب وتقرب البعيد ...
جنت امشي محنيه ظهري مكسورة وين راح ذاك الجبروت !
اجت عين وليد عليه ، سألني بلهفة
-ها محتاجة شي درة ؟
جاوبته لا وهزيت راسي وبعدت عيني عنهم وجهتها لطريقي لغرفتي
.. مشيت و اسمعه يگول لرنا روحي شوفيها خاف محتاجة شي ومتحجي هيه ..
بثانية سمعت صوت خطوات رنا ورايه واني بلحظتها داافوت لغرفتي .. لشويه واجاني صوتها
حبيبتي درة محتاجة شي كولي لاتستحين ؟
التفتت عليها جاوبتها لا رنا مشكورة عليمن استحي منج اختي انت بس اريد اتمدد
راحت هي للفراش عدلتلي المخاد ورجعت الي لزمتني من ايدي تمشيني للفراش
ضحكت كتلها والله مابيه شي واكدر امشي
هي هم ضحكت كالت هايى شبيج يمعودة غير جاي ادلعج وادللج شبيج كون هسه انت تكيفين
والله خطيه أني صدك كون وحدة بدالي يدللوها
خاصةً أول طفل بس أني وين وصلت بيهم يقتلونه وهو ببطني .. حاجيت روحي صدگ انقهرت بالحظتها ..
كعدت رنا يمي عالسرير .. كالت درة شنو مشتهية شي اكلة
كوليلي اني اسويها الج
فتحت عيني رنا تعرف أني حامل!
هي فهمت وظلت تحجي كالت احمد حجه لوليد ووصاه عليج ووليد فهمني ولتخافين أني حريصة مااكول لا لعمتي ولا للحجية ولا حتى لشوكة لأن فضيحة ماتضم سر
ضحكنا اثنينا وسكتنا شوية ..
كالت بس جم دوب يا درة تبقين ضامة عنه فيصل لازم يعرف
جاوبتها والله مااعرف اني هالموضوع محيرني كلش وانتظر الوقت المناسب واكيد ما اكدر اضم هالشي أول وتالي بطني راح تكبر وتبين وتبرز ويلاحظ عليها
جاوبت اي بلكي يكبر الطفل ببطنج شووية شويه وهو يستسلم ويتقبله وذيج الساعة هو جبير ميكدر ينزله أكيد راح يصير اكثر خطر على حياتج
هزيت راسي الله كريم شوفي شون راح تصفى
عوفج مني اني سالفتي داچه انت شلونج انت ووليد ؟
ردت بابتسامة .. والله زينين تدرين اني مالي غيره تعرفين اخوي عادل شكد صعب وميتفاهم وعمتي هددتني بي
فتحت عيوني متعجبة ولو ليش استغرب كل شي اتوقع من هناء
هي كملت كالت اي والله تعرفيها بعد انت وحتى كايلة لوليد امشي نروح نكول لعادل يطيح حظها شون تلاسن
ضحكت وانت صدك لاسنتيها ؟ ماصدك انت كلش فقيرة
كالت اي هم بوقتها تعجبت على روحي شلون ثرت بوجههم كلهم مثل البركان الخامد
بس هو وليد محاجي امه كايل الها ماتدخلين اذا تدخلتي اعزل عنكم .. اني صراحة فرحت لأن وكفلي ولو متأخر بس خلالها حد ماتهدد
ولو ماتاركتني بحالي بس هالموقف ينحسب اله لان جنت ميتة خوف من عادل محلوة بحقي يضربني واني متزوجة وعندي طفل .
صفنت بكلام رنا كل واحد همه شكل بس همي ميتقارن اني شلون بيه ياربي
ماريد احسدها أبد هي تستاهل كل خير بس الي حظها نحس من ولادتها بعد شون تسعى لتغيير قدرها
اني بس محظوظة بجدي
طلعت رنا من يمي وبقيت وحدي ابجي ، اناجي ربي
احاجي طفلي محتارة واتقلب بفراشي عيني ماتغمض راسي يوجعني ..
وراها اندفرت الباب واني على هالحاا وطبت شوكه الي محد خلصان منها
من طبت عليه وشافتني ابجي غمتني كالت شبيج ياحظي تبجين على الاقل انتي شفتي وعرفتي مذاقه ومو اي واحد لا السيف المكور خايفه اني لاسيف لاسجينه اظن تاليتي اوكع بخاشوكة جاي
بعز البچي خلتني اسكر من الضحك ودموعي على خدي كتلها اطلق وارجع شون بي اني بنيه وشسوه بيه
كالت خليها على الله وها كولشي ولا ترجعين لهنا بالعباس انتحر ماصدكت افتكيت منج عاد هسه الي يجي على حفيدهدة حجي عدنان نجلب بركتبه
استمريت اضحك على سوالفها وانسى همومي الي مثل الجبل على گلبي ولو لحظات
كالت خاتون تعاي تعشي ...
كمت من السرير كوة لا ارادي غريزة الامومة خلتني أخاف على طفلي ..
هي انتبهت عليه كالت شبيج درة بس لا شكلتي ؟ خاف حامل
وكفت باستقامة لا يمعودة شبيج انت بس هيج جسمي مكسر من التعب ...
مشيت وراها وهي تدردم ...
كعدت على العشه جان جدي بعده ماجاي كاعد عالسفرة
اجت هناء خلت كدامي صحن بي بتيتة وطماطة گلي
كالت هاج اكلي جنة صفية هم هيج تداريج صفصف هناك
صفنت عليها كالت لو ماخذة وليد جان هسه انت ايديج فوك الايدين بس غير انت تعافيتي على نعمتج هاج اكليها هسه
بيبي كالت عبالها فيصل يتعاشر ويدلل هو كل يومين مرة وظلت بس تفر بيدهاا
وكملت هسه تلكينه جايب اثنين فوكاج للبيت وانت هنا عشتو ..
اني مالي خلكهن يحجن متشمتات مااعرف شلون انخرس لساني بس جاي اكره نفسي واكره ضعفي وهن جاي يستفزني ويردن بس احجي ...
عفتهن ولا جن اسمعهن و اجه جدي والكل اجو
و تعشينا
ورى العشه بالهول كعدنا اني وعمو حسن جان يباوعلي بعطف كال ابوي يكول تردين ترجعين ؟
جاوبته والله عمو صراحة اي ارجع
رد درة اذا احد مضوجج هنا كليلي هذا بيتج وبيت ابوج مثل ما هو بيتنا كلنا
جاوبته عمو اني لازم ارجع
ليش فيصل هددج شي ؟ كولي ترة مايكدر يسوي شي
رديت لا عمو بس اني تعودت هناك واريد ارجع بس حدي ماقابل
كال فكري بعد درة فكري لا تستعجلين
هزيت راسي ومدنكة واديه بحضني واعصر بيهم
بقيت وحدي بالهول صافنة حتى مابيه اكوم وكلمن راح لغرفته بالعادة ينامون على وكت ، دك التليفون رفعته طلع فيصل كال هلا والله شنو سويتي
كتله جدي قافل وجاي اقنع بي
كال هاي شنو فوكاها صوبني وهيج مقهور مني لعد گلبه شون يبرده بله
تأفأفت مو طايقة حتى احجي وياه بس لخاطر جدي كتله فيصل راح اقنع جدي مدة السنة تخلص وارجع بس بهاي الطريقه واني هم مااكدر اعيش وياك اكثر ليش اجذب عليك
رد بقهر :- ليش ولج والله وكتبه ورسله وسماواته احبج كلشي بيه يريدج اشرطي كولي الي تريدي شنو عمري ماتخليت عنج ولا بيوم لاتتخلين عني مااكدر اعيش بدونج اني
ساعديني وصليني مدي ايدج وصليني يمج دره غلطت دره اخاف تموتين مثل امي مااريد اصير نسخة ابوي اذا صار عليج شي اتخبل مااظل عاقل
كتله بعصبية كلامك شكل وفعلك شكل ماردت منك غير الامان هواي عليه ياناس فهموني هيج الامان صعب هيج اني الدنيا تكسر بيه هيج ماكو احد يرحم بيه بس جدي!!
انهاريت اناشغ :- ليش هيج مكروهه هيج اني زايده على الدنيا بحيث ماكدر انام الا يم جدي
حاولت اهدأ گتله تمالكت نفسي
- فيصل ارحموا من في الارض يرحمكم من في السماء تذكر حجايتي على القطار يابه اني كاعي بور ماتنسكن ولا تنزرع وانت قطار دستها وطلعت عوفني وراه ظهرك
كله بس حجي الي يحب يسوي كل شي انت عوفني اعيش وحدي صدكني حتى زواج مااتزوج تريد اوثقلك هذا الكلام؟؟
فيصل عوفلي جدي جدي الدنيا جدي المي والهوا اذا تأذي جدي راح اطلع الضبعة البيه والضبعة ماتنام اذا ماخذة حكها
... ظل ساكت ثواني كال ماشي ارجعي لحد ما مدة الاتفاق تخلص والله كريم منا لذاك الوكت
كتله ان شاء الله
رد ممحتاجة شي شوكت اجي عليج ؟
جاوبته مو دااكلك خلي اقنع جدي
جاوب يله لعد استعجلي أني وين اكدر بدونج كل هالمدة انت ما اشتاقيتيلي درة ؟ الله عليج
تحسرت وكتله تصبح على خير..
رحت ادور على جدي لكيته بالديوان بالمكان الي احبه وارتاح بي
شافني جايه باتجاهه سوالي مكان ونظراته ترحب بيه
ونبرته الحنينة الي ما اشبع منها .. تعالي بويه ..
رحت مددت يمه من جهة الحايط هذا اامن مكان بالعالم الي ، ادنه وهو صافن بالسكف تقرب عليه كال مانايمه يابعد جدج ريت الهم الي ومايلوحج منه ابد وكون عيونج ماتشوف بس الفرح
خليت راسي على ايده كتله جدي راح ارجع لحد ماتخلص السنة الي اتفقنا عليها فدوه لاتعارض هو هم خطيه
كال خطاه البين موتنا موتني عبنه اذاج والي ياذي دره ياذي گليبي
كتله يسلم ربي گلبك خل ارجع فدوة
كال هاهيه امري لله هو انه من يمتى ارفضلج طلب
كتله مايعرف حامل عباله طرحت
كال هااا بصدمة
جاوبته والله ماكتلهم اخاف على ابني
كال دوختيني يادره دوختني وجم دول
كتله عوف هذا الموضوع خل نستمتع بهالوقت
ضحك كال دره ياحلاها گصايبها وراها اجا الخطاب يخطبها وجدها مااطاها واني اضحك وجان تطب علينا شوكه
كالت كومي كومي. خل انام بمكانج جدج من انتي صغيره يغني هاي الاغنيه والخطابه كومه عليج خل انام ويغنيلي يجوز السر بالاغنيه
جدي يضحك كالها ولج موعيب كدامي هيج تكولين انت شنو من لسان عندج لا عندج حسبة لصغير ولا جبير
كالت معليه اريد اعرس ياناس اريد اعرس.
وتخلي اديهه على جوانب راسها
جدي يضحك ولج شهرتينا سكتي كافي
كالت لا انت ظالم تحل مشاكل العالم وعايف مشاكل بت ابنك شوفلي صرفه لا انهب لو انهي على ولد عمي شنهي بله انهي على هشام ؟؟ اي والله يسوى دكتور وحلو اي وعلي خوش فكرة
واني وجدي ميتين ضحك صدك فلم هي
وهشام نسمة العشيره مرتب وشاطر وهادي طول عمرنا نلعب ومهوسين الا هو بس يباوع علينا ويضحك ولا عبالك ابن صفصف
والله ياشوكه بس انت الي تنسينا همومنا
متنا ضحك بيومها والحمد لله نهت ليلتنا بضحكه ونمنا تلاثتنا بالديوان
ظليت اخاف من الصبح وتبعات اليوم اباوع الساعه ب١١ كمت من الفراش هستوى كايمة اجت شوكة
تصفك باديها وتحجي كومي يالمسعده السيف المكوار تلث مرات دك وكناله نايمه
كال عوفوها ترتاح تنام لحد يزعجها
شوفي رفعت اديدها يارب خاشوكه جاي واني ادبر اموري
ضحكت ماتدري الزواج طيحان حظ ومو اي زواج من فيصل افندي رحت غسلت وجهي والغثيان الصباحي مافكني كلش لعبانة روحي وريحة الريوك بخشمي جايه من المطبخ ظليت الوب
اجت وراي كالت دكي عليه كال بس تكعد وتصحصح خلي تدك عليه ..
سكتتت فززتني بصووتها شبيج دكي يله
صحت بوجهه خوش افتهمت افتهمت رايحة
حقها ماتدري شيسووي بيه الحمل والله كارهة روحي احس گوة مقاومة
رحت للصالة اخذت التليفون دكيت عليه شوي وجاوب
عبالك ينتظرني ...
اول مارفعته كال كل هذا نوم ؟
سكتت مجاوبته ...
رد كال بشري شسوويتي ؟ كتله كوه قنعته فيصل اني راجعه لخاطر جدي لااكثر ولا اقل ولاتظن ينصلح حالنا
انت ماكدرت حتى تحرث كاعي وطشيت ملح ويبستها حرامات جنت بعيني شي جبييييير وهسه !!
سكتت كملت كلامي بحسرة وأوف طالعة من روحي قهر
كال كملي شنو هسه كملي؟
اتنهدت كتله بالضبط مثل السراب الي يشوفه عطشان بصحراء ويركض يريد يرتوي ويشبع ويأمن ويرتاح وينام وينهي تعبه ويوصل يمه يلكاه وهم يفتر على روحه لان اجا يركض نفذ وخلص كل الي عنده لو يكدر يكمل لو لا ...
بعد ظليت ما اسمع حسه صحت الووو تسمعني فهمتني كال بنبرة فهمت العصر اجي الله وياج
سديت التليفون وحسبات تاخذني وتجيبني شون بله بيج يادره الها تالي لو تظل معلكه لاطايله ارض ولا انتي بسما
للعصر سمعت صوت سيارة وكف گلبي ببلعومي
وصرت ارجف
ووراها اجه صوت دكة الباب عرفت فيصل باوعت من الشباك شفت وياه عمار واحمد دخلوا
سمعت صوتهم يحجون و يعتذرون لجدي وفيصل صاح لعمار كوم بوس ايد جدك ... واعتذر
وفعلا سمعته يتعذر هواي من جدي ..
على كلامه الي كاله بذاك اليوم
جدي كان بارد وياهم واني اعرف جدي بس هيج يمشى الأمور
طلع عمو حسن واجه يمي كال يصيحوج
رمشت بعيوني وتنهدت ، جيت دا اروح
لزمني درة متأكدة ؟
باوعت بعيونه وبداخلي استنجد بي بس شسوي بعيني جدي خاف يأذي فيصل مريض كل شي اتوقع منه ..
هزيت راسي لعمي بمعنى اي .. هو لزمني من زندي
كال مامجبورة ترحين ترى
كتله لا عمو اروح اني احسن
كال عندج فرصة هسه
رديت عليه عمو اني واثقة من قراري
كال هاي هيه على راحتج ..
مشيت كدامه طبيت عليهم للاستقبال سلمت
سلام عليكم..
ردوا ونظرات فيصل تقيمني .. حاجيته بنظراتي اي تعبانة تعبانة منك شتتوقع تشوفني يعني ! بعد الي سويته بيه كله ...
نزل راسه متندم .. جدي كال امشوا درة وفيصل عندي فد سالفة وياكم
طلعنه للديوان
صرنا بس احنه الثلاثة
جدي رفع عصاته بوجه فيصل وكأنه يهدده
لحد ماتقبط سنه ترجع سمعت؟؟
كال فيصل ان شاء الله حجي ..
تقرب مني كال جاهزة درة ؟
ابتعدت عنه كتله بملل واشمئزاز اي
رحت للغرفة لميت اغراضي وطلعت وليد بوجهي
ظل يحجي درة ترجعين ؟ صدك ؟ عاقلة انت !!! نسيتي شسووى بيج انت شوون ترجعين بس كليلي
صاح فيصل وهو يتهدد ووليد
قاطعه وليد اشش لا تحچي والله اذا مديت ايدك عليها مرة ثانية ا ني چتالك يا فيصل ....
شويه ورادو يگبون واني بداخلي صرخة شكبرهاااا اريد اسكت كل العالم الي تحجي تعبت من هذا الضجيج ...
عمو حسن واحمد لزموا وليد ويحجون وياه
واجه فيصل لزمني ديسحبني يمه ، فلتت ايدي منه ومشيت وياهم روح خاويه
ورجعت وياهم وجان قلبي مقبوض مااحابه الرجعه بس مابيدي شي
طول الطريق الصمت سيد للمكان ووجوهنا مقلوبه كل واحد باله مشغول اباوع لفيصل ايده ملفوفه ووجهه اصفر ويباوع بالمرايه عليه يصفن بيه وفرحان
ظليت احاجي بقلبي وبنظراتي الي تبث اله حقد وقسوة
شنو انت لخاطر الله مااعرفك مره حنين مره قاسي مره امان مره خوف
نزلت عيني منه انكت بعباتي الي من خلاها على راسي لهسه صارت حياتي بلونها صبغني بيها مابيها خيط ابيض يبث الامل بيه
شكد ماهي تغطيني واحسها امان بس الخوف مستعمرني من الداخل
وصلنا للبيت طفر احمد فتحلي الباب
ونطق كال دره ردت لعيالها طير السعد يبرالها
كوة كدرت اضحك مخنووكة حيييل ...
نزلت من السياره اجه فيصل يمي جرني من ايدي
كال تعاي لحديقتج مااشتاقيتي الهاا
رجفت ايدي بيده تذكرت من ضربني بيده ، رجفت ايدي ماريده يلزمني هو حس وابتعد
صار كدامي واني مشيت وراه
وصلنه للحديقة كال وهو يضحك تعاي شوفي زرعج شون صار حلوو
واني ساكتة باوعلي بنظرة ندم واسف
دنك ورجع كال وهو مبتسم تعاي شوفي هاي ياسمين البر شون بدت تنبت وتزهر
ماحجيت بس اباوع بعيوني ، روحي هشه والف بالعباية على روحي اريد اخفي نفسي واحميها واضم طفلي رغم لحد الان ماعندي بطن بارز
تقرب مني لزم ايدي رجفت واجيت اسحبها بس هو لزمها قوي وخلاها على كلبه
كال وهو قريب مني وانفاسه سريعة
كال وداعتج يالماعندي اغلى منج احلف بي هذا الگلب مايرف ويرتاح الا يمج رفف وداخ بيج
تدرين شوكت ؟
رفعت عيني بعينه بفضول ...
هو كمل باشارة من عيوني الي تحثه يكمل
كال من اجيت اتوضا ووكفتي فوك راسي وتحجيلي على قبول الجامعه ، صار النفس يشعلني شعل وخصل الشعر الي نزلن على المغسله والعيون مرايه صافيه شفت بيج الدنيا بهاي اللحظه
هاي اللحظه الي يكولون يوقف بيها الزمن والساعه نسيت الوضوء والصلاه نسيت ديني بيج
سحبت ايدي لا اراديا منه وابتسمت باستهزاء ..
هو تقرب مني اكثر ويطلع بوجهي ويتأمل ملامحي التعبانة بسببه
كمل كال وطلعتوا من عدنا واني بس افكر بيج ماطلعتي من راسي اسبوع اتعوذ من الشيطان واشيلج من بالي ماكو ابد ورحت لجدج وطلبتج منه وماقبل
كالي انت مابيك قصور بس دره محد الها بهالدنيا بس اني ازوجها لرجال طول العمر وياها وانت مو هذا طبعك
والبنيه متعوبه بحياتها ، هنا اريدها ترتاح وانت تشلع گلبها وهي رغبتها تكمل واني ماارفض لها طلب وهي هم شاطره وتشوفها ياريت فيصل هذا الكلام بينا ومحد يعرف وماتزعل مني دره النفس اليصعد وينزل وياي
كتله عندي استعداد لأي ضمان مااتزوج عليها
كلي فيصل مو بيدي صدك البنية مو مناسبة الك
طلعت ودبرت لج موافقه لجامعة صدام ومن اجيتي لبيتنا جنت منتظر جيتكم واحجي ويا نفسي شبيك فيصل تحجي صدك النسوان تبدلها مثل ملابسك شنو هاي الطفلة وسيطرت عليك
بعد ما كمل كلامه بعدت وجهي منه كال
دره ساعديني ادري اذيتج بس اني تعبان وانتي علاجي ساعديني واني اوعدج مالمس شعره منج ولااذيج بس لاتحرميني منج اني اضيع
اني مااشوفج مرتي ابد اشوفج بنتي والعشك واللهفه الي جنت بس اسمع بيها واتمناها صارت بيه توجع توجع تعاي حضنيني ...
بقيت متصنمة بمكاني تقرب و حضني احس برجفه جسمه حضنه مايروي روحي الخايفه ماجاي الكه الامان الي حسيته قبل ...
اتذكرت قبل اسبوعين حاضني ويهز بيه كال يله كولي كتله شنو؟!
رد عبارتج الي اموت عليها
ضحكت كتله سقط حقك بيها بعدني عن حضنه
كال لادره حتى لوجذب كوليها عليج الله
كتله مااكدر انت مو كدها
ضغط على ايدي حيل وجعتني حس بيه وخف مسح وجهه
كال ارجعها اي ارجعها سمعتي باعي مو تنطيني فرصه مو باعيلي مو ؟؟
هزيت راسي مجبوورة ...
تعاي نتعشا لزمني من ايدي واخذني وطبيت سلمت عليهم شفت فاتن ونظرات الشماتة ...
طب للحمام الي بالصالة
من شافته راح حجت عمه صفيه باستهزاء شلونج جان ظليتي يم جدج خطيه يكسر الخاطر
اني استفززتني كتلها والله جدي ماقبل يكول بيتج تايه اني صرت زينة وفيصل هم كلساع يدك عليه ..
هو طب كال اي والله نور البيت هسه لان راعيته ماكو وغمز الي كدامهم ابتسمت ورافعة تك حاجبي ...
صعدت فوك فتت للغرفة طب ورايه احتضن وجهي ويتأمل اثار الضرب الي على وجهي رفعت حواجبي ابتسم باستهزاء ومرارة ...
تقرب يريد يبوسني لزمت اديه وبعدتها
فيصل دير بالك ترى وجودي هنا بسبب جدي لا تتوقع اغفر لك على الي سويته بيه ولا راح انسى
ظل يفرك باديه وكال شنوو ونسيتي استغفالج الي واتفاقج عليه انت وجدج
وشنوو هسه انت جاي تبرر لرووحك فيصل ؟
من البداية جان هذا جان هذا اتفاقنا وانت وافقتي صح لو لا ؟؟
حاولت اغير الموضوع لأن ارتبكت ماريد احجي بموضوع الحمل
كتله وتكوم تهددني بجدي فيصل ؟ وانت تعرف كلش زين جدي شنو بالنسبة الي وتهدديدك اله خلاني اكرهك تعررف شنووو اكرهك ؟!
فتح الباب صاح رزااان وطلع
ورى ثواني اجت رزان فاتت للغرفة
قربت يمي تباوعلي بحزن كالت فيصل كال اساعدج
رحت كعدت على السرير وهي كعدت يمي ظلت تسولف وياي ... تحاول تطلعني من الي أني بي واني بالي وين ممرتاحة خايفة بأي لحظة يعرف أني حامل بس هالشي راح يكون عقاب اله راح اعاقبه وانتقم منه بحملي ....
بعدها تغير ويايه او اشوفه يسعى لارجاع كلمة امان فيصل امان ...
بس اني كارهته شكد حاول يتقرب مني ، صديته مااخلي ابد ماانام اذا ما اقفل الغرفة ، ظليت اوصي على ملابس اكبر من قياسي ...
اجه شهر التاسع وبلش الدوام وهالسنة اني محبوسة سجينة ومقيدة ... شكد انقهرت لان كل احلامي واماليى تحطمت تذكرت الثلث سنوات الي كضيتهم بالجامعة شون ايام حلوة جانت الا بنهاية السنة من اجت سفرة الحبانية خربت كل حياتي
بعدها دخلت بشهر الرابع .. بدت بطني تبرز ... سمعت فاتن تكول لصفية اقسم بالله حامل هي ومتحجي
ردت عليها صفية ولج ميبقى ببطنها صدكيني يموته مخبل هذا مايريد جهال
جاوبت فاتن اي والله احسن عمار يكول اذا صار عنده ولد ماراح ناخذ ذرة من الورث وهاي بت الروسية تلغفه كله هي وابنها احنه لازم نتصرف عمة
خفت من سمعت كلامهم خفت من مؤامراتهم خاف يقتلوه وهو ببطني .. قررت اواجهه
خابرته و بالشغل جاوب كتله لازم نحجي ضروري
كال بس ارجع ...
بوقتها عليه اربع اشهر و بطني بدت تكبر ...
بقيت انتظره اني هسه بين نارين ، نارهم وناره بالحالتين اني راح اخسر طفلي ، خفت كلشي يسوون هذن يسوون السعلوات
خاف يدفعوني لو يضربووني لو لووو .. اي شي اتوقع منهم ، خلي اعلن عن حملي
دخل جنت واكفة يم المراية ، خليت ايدي على بطني وبرزتها اله واشوفه صفن عليها وعيونه تجدح نار كال شنو هاي بطنج ؟
خفت منه بلحظتها لو كايلة لأحمد يجي يمي يمنعه مني خاف يأذيني ، بس بوقتها احمد بالجامعة واني تسرعت هواي ...
كتله و ارجف اني حامل فيصل
كال متعجب شلوووون؟؟
تقرب مني انتي مو طرحتي ؟؟
هزيت راسي كتله اي بس واحد والثاني ظل
كال شنو يعني توم ؟؟؟
هزيت راسي ... اني اتذكر وحدة من جناين جدو قاسم هيج واحد وكع واحد ظل وبوقتها تعجبنه شوون هيجي ظلت ابالي هالشغلة واستغليت هالكذبة حتى انقذ احمد ....
كال بعصبية وخري من وجهي وعااط ووووخري وووخررري
ركضت طبيت بغرفه للملابس ارجف شنو راح يسوي بيه واسمعه كسر الاغراض والمرايا وصياح صيااح ليش ليش وصوته يبجي عبالك حنجرته راح تطكگ
ماكدرت اعوفه طلعت لزمته وحضنته
كتله والله مااخلي يمك اخذه ولاتشوفه ولا تعرفه ابد
رفع عينيه بعيني واذا متي شلون بيه وبي
كتله من يكول يجوز اعيش واظل يمك نربي ماتحب تشوف ابنك؟؟
كال لا يتبهذل ويتاذى والعقد الي بيه تطلع بي وياويلي اذا متي وشهق بالبجي ...
ظليت حاضنته وابجي على شنو وشنو عليه لو على روحي ماتشوف يوم حلوو
نهضت بروحي لزمت وجهه ومسحت دموعه اخذت ايده وخليتها على بطني باوع هسه هذا ابنه ليش ماتكول نعيش وياه الي ماشفناه بحياتنا نندللهم ونربيهم احسن تربيه اصلا اني اريد يصير عندي ست جهال لان طول عمري وحيده اريدهم يلمون حولي وانت ويانا مو فيصل؟؟
باوعلي هز راسه واذا متي؟؟
كتله من يكول ؟؟
كال اني الي احبهم يموتون
وخر اديه منه وعافني وطلع
بقيت محبوسة بالغرفة هووسة الغرفة كلها زجاج متناثر واخشاب وتحفيات وحتى الثريا موكعها من السكف
ظليت شوي شوي انظف بيها وواجت رزان واحمد حجيتلهم وساعدوني بتنظيفها
وعمة صفية تنزل تصعد تخوف بيه ولج مايخليج يكتلج نزلي الطفل احسن الج لا تموتين
جاوبتها شنزله اربع اشهر ببطني جبيير
تقربت مني معليج أني اعرف دكتورة جراحة شاطرة ننطيها كم فلس يسوون وننزله
صررخت بوجها طللعي بره طلللعي
كالت اووي فوكاها بعد فووك ما اريدج تعيشين يطبج طووب عسااج متي شعليه
تحجي بحركة كلب ماتريد طفلي يعيش يريدون ورث فيصل الهم ...
نمت بعد تعب و كعدت من النوم العصر هذا طفلي مكضيتها كله نوم بي
اباوع فيصل ماكو خلال هاي الفتره لاتقرب مني بالفراش ولا حاول بس مكتفي بالحضن وبدون كلام واني محتاجته اكثر منه احنه اثنينا نتشابه باكثر الامور الحرمان العاطفي واللمه النظيفة
لا وانوب يخاف عليه من الهوا الطاير يوجعج شي كولي كل اسبوع ياخذني للدكتورة يضبط وضعي اذا اتقيء واكف فوك راسي ويصيح بيهم سوولها عصير
اكتشفت انو خوفه على حياتي اكثر من اي شي ثاني
بس الطفل مايحب اجيب سيرته يكول مااحبه راح ياخذج مني ..
فد يوم انتبهت يباوع على ايدي ورجلي فدمره مركز
جنت كاعده ظل يباوع على رجلي مد اصبعه على حجلي ويفر بي اني اضحك اكوله ادغدغني هيج
كال ضيك عليج؟؟
كتله لا زين
كال لا ضيك شوفي كد اصبعي
ضحكت كتله لازين لا تحاول اذا اكبر يوكع
كال اتمنى تسمن رجلج واني اخذه واكبره حتى تكولين فيصل ضاف جزء بروحي لحد حسه وصفج للحجل مخبلني
لزمت ايده وخليتها على بطني كتله هذا جزء منك بروحي ومو اي جزء هذا الروح نفسه
سحب ايده من بطني كال مااظن اكو اغلى منج انتي بتي اي شي يوجعج كولي حتى لو شي بسيط صفيه لاتاكلين من ايدها ابد ابد حتى لو مي سمعتي؟
كومي اريد اعلمج على شي وضع العراق مو زين ابد كومني للقاصه علمني رمزها وشوفني شنو بيها واملاكه وعقاراته وعقود هوايه وصور بس شوفهم سريع ماركزت عليهم
بوقتها جانت سنة 2003 بدايتها ..
بدت اخبار العراق تسوء وامريكا مهددة صدام يتنازل عن الحكم بس كل مره يصير هيج والناس تخاف وبعدين صدام يقبل بشروطهم هالمره ماقبل يعوف الحكم
بس فيصل يكول هالمره قوي التهديد وامريكا محشده جيشها لدخول العراق وعلى الحدود موجودة
هو الولد ليل ونهار يلمون بالمصانع السجلات والمواد والفلوس يصفوهم ويضموهم وحملوهم بسرداب البيت ليل مع نهار
واحنه وياهم نترتب ونعدل ونحضر المعلبات وفيصل يروح ويرجع يحضن بيه وكدامهم حفضني رمز القاصه وشوفني كولشي مهم بيها واملاكه الي محد يعرفها غيره
بشهر الثاني وقبل ماتبلش الحرب غاب فيصل عن البيت بدون سابق انذار اخذ كل مستمسكاته بدون ميحجي شي ..
أسأل اخوته وولا واحد يعرف .. ولاااحد يحجي خفت على نفسي ابينهم لو ما ووجود احمد هو الملاك الحارس مالتي بوقتها من اختفى جنت بشهر الثامن من الحمل
٢٠٠٣/٤/٩ سقطت بغداد وسقط الصنم ودخلوا المحتليين
وفيصل مختفي ...
للحكاية بقية ....
لا تزال الحكاية تحمل بين طياتها الكثير ...
لهنا نتوقف للاسف هواي تذمر تذمر تذمر
بارت قصير ماكووو احداث وهالجملتين هواي تتكرر حتى معنوياتي هبطت
اريد افهم ليش ماكو أحداث ؟ يعني خلال 34 بارت كتبت من سنة 93 الى ال2002 ورجعنا لقصة سلام والروسية للسبعينات وتطرقنا لاعدامه الله يرحمه ورجعنا لطفولة فيصل وقصة حب امه وابوه وحلينا هواي من غموضه وشخصيته وتصيحون ماكو احداث مااعرف شنو تردون ؟
اطيرلكم فيل ؟ امكيجلكم دنياصور ؟ ازوجلكم ارنب وهايشة ؟؟؟ بس اريد افهم !!! طلباتكم شنووو ؟
المهم القصة لهنا نتوقف نكتب البارتات البقية وانزلها
شوكت؟؟ ! بدون موعد محدد ...
اشكر كل الي ساندوني بهالقصة وتفاعلوا وياي
خاصة بكروب فراشات ماريد اذكر أسماء أخاف انسى احد ويزعل عليه
بأحد المشاهد المستقبلية بينت شكد جانت تعبانة البطلة وهالمشهد جان من فترة مو بعيدة عن هسه وهي هواي جاي تعاني حتى تتذكر التفاصيل لذلك البارت تشوفوه قصير ..
المهم اشكر كلمن راح يعذرنا والي يحب يعتبر هاي النهاية براحته والي يحب ينتظرها ان شاءالله مااقصر بالجزء الثاني ويكون افضل وحظي وياه افضل ...
جنت ملتزمة رغم البارت قصير بس مايوم تخلفت عن التنزيل واذا ماكدرت وصارلي ظرف انزل تنويه ومرات اعوض على كد ما اكدر بس هواي مايعذرون ويذمون ويتجاوزون ..
تحياتي للجميع
نورا ناصر
19 اكتوبر 2022 ..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!