السلام عليكم
رواية طوفان رجل
الفصل 23
نورا ناصر ...
شكــراً سـيدي .. كـسبت الرهـان !
أتقــنت دور العاشـق ودور الفـارس ودور الإنـسان ..
أثـبت لهـم أنك الأقـوى وأنـك الأقــسى وأنك الأقــدر عـلى الـنسيان ..
زخرفـت الكـذبة الجـميلة وعــطرت الـسيوف المـلوثة وغرسـت الخـناجر بأمـان
أثبتّ أننا في زمن الغاب وزمن الذئــــاب وزمن الظالمين.. وجعلتني في منااافي الطوفان
أثبـت أن رجولتك مغرورة وان مـشاعرك مـقتولة و أن قـلبك مـدينة بلا عـنوان
أخـذت مـعك إحـساسي بالحـياة وإحـساسي بالـناس وإحـساسي بالأمــان !
نـسيتني فـوق سـطح القــمر وأشـعلت فـوقي الرعـب وأشـعلت تحــتي النيــران.. منافي الغرام.
حـولتني أنثــى بلا مــشاعر وامــرأة بلا أحـلام وعاشقة بلا وجــدان..
دخــلت بوابـة عــمري وحكــمتني وتنـازلت عـني وتنـازلت عن عـرشك بلا اسـتئذان في رهان الغرام..
منحــتني أحــلامآ لا تقـوى على الــنور وأقــداما لا تقـوى علـى السـير وأجـنحة لا تــقوى عـلى الــطيران..
جــئتني بــنزاهة المـحارب وغــادرتني بمكــر الــثعالب وتركــت قــلبي كالعـش المـهـجور فــوق الأغــصان..
كــسبت الــشمس كــسبت القــمر كــسبت الــدنيا وخــــسرتني منفاك.💔
بقلم.. هيام..الدليميه..🍂🥀
من سمعت كلامهم انهزمت بقوتي حتى لا يبين ضعفي دخلت للحمام شكو دموع جانت محبوسة على طول اليوم نزلن من عيني وغرگن خدي لحد ما غوشت عيوني وصارت تحرگني
مااحس بسَ الوجع وكسَران الگلب مستحل كل كياني
كلامها ررن بأذني ررن ووجعني فعلا الكلمة مثل الرصاصة ...
يارب حتى اذا جان يومي حلو لازم انقهر منهم بشنو مأذيتهم اني !! ليش هيج تتصرف بيبي ويايه !
وانت وليد شوكت توعى على روحك ماتكولي!!!!
مرتك ذهب وابنك يخبل استقر شنو هو الحب كوه !!
اخاطب وليد بداخلي ...
هم لان شافوني امشيه الامور ومغلسة عن تصرفاتهم الأخيرة
بس والله كل سكوتي هذا لخاطر جدي ، ساكتة بس على موده هو
وكعته الأخيرة كسرت بيه وظليت مثل الطير المدبوح
واني عكبه اضيع والله اضيع مارايده بس سلامته
هذا المهم والاهم عندي
وإلا اني مااسكت عن كلمة تجرحني وتأذيني أرد الصاع صاعين بس جدي واگف بعيني واالفُ عينٌ لأجلِ
عينٌ تكرمُ وجدي يستاهل فدوة لعينه وگلبه يستاهل اتحمل على موده هو روحي وهو ريتي وكلشي اسوي اله قليل بحقه
وحتى لو شنو اجاوبهم!!!
هو هم صحيح ، هذا فيصل هو هيج طبيعته صدك مزواج ويمل من المرة بسرعة
بس والله هي تجربة و لمدة سنة اخوضها واخلي يجوز من جنس حواء كلهم الا اتوبه على ايدي وعد وعدته لنفسي
ظليت اتساءل اني ليش اريد اثبت دهاء الانثى وهو
شنو الي بي بحيث مايخلي يأمن بجنس حواء!!!
وليش اني كلها تكول مختلف ويايه هل هو صحيح يحبني لو يريد يثبت للكل هو اي امرأة ماتصعب عليه
خاصة شاف الحولي كلهم يردوني ومانالوني!!
وجدي دائما يصيح بيه درتي غالية والي ياخذها يغليها اكثر يالله انطيها لواحد كفو لو اعرف ابقيها العمر كله يمي وماانطيها لأي واحد ... او حي الله واحد ..
افكر افكر واربط واحلل واقتنعت انو هو هذا التحليل الصحيح لوضع فيصل شافني صعبة وأصر عليه وهو ممتعود وحدة ترفضه ..
بس ميخالف اقنع نفسي انو هو رادني لهالسبب
بس شغلة ثانية هو عرض نفسه للخطر على مودي
وكف كدام مو اي شخص ، هذا عدي صدام وماادراك ما عدي !! شغلة ببالي لهسه هو عدي يكدر ياخذ اي وحدة تعجبه ليش اني نجيت منه
وخاصة رونق كالت انو هو الحماية مالته اجه يدور عليه بالكلية معقولة عاف الشغلة ، ياربي راسي افتر والله
هزيت راسي وتذمرت جدي يكول كل مفاتيح فيصل عندي وهو قاري ويعرفه كلش زين
اووف ياربي اجعله خيرا لي كل هذا التفكير واني جوه الدوش
طلعت للصالة ماشفت احد هم احسن ماريد اسمع كلمة ثانية تغثني وتعكرني اكثر مما اني متعكرة وبالي مو صافي
رحت للغرفة وخرت الخاولي من شعري وكعدت
امشط وراسي صاير بكد الكرة الارضية من التفكير
واروح وارجع وافكر بكلام بيبي .. ياربي ماكدر انسى
بيبي هيج تحجي عليه ، غيرها شراح يكول والكل يعرف فيصل مزواج
انفتحت الباب باوعت شفتها مني اشرتلها وكتلها
تعالي مناوي
اجت يمي كالت جدي والعريس يردوج بالديوان
كرصتها من خدها كتلها كوليلهم هسه تجي
ابتسمت وهزت راسها
كمت لميت شعري وهو منكع مي واني لابسه بجامه نيلي ربع ردن بيها احرف بالالوان
مشيت دااطلع وليد بيده ابنه باوعلي وصفن
تبعته امه كالتله وين رايح
جاوبها اودي علاوي لأمه ضاج
ردت عليه لتودي خلي تولي احرمها منه حتى ترجع المتعايرة
كاللها بعد حسرة يووم فدوة لعينج هذا مو حل
جاوبته انطينيا اني اربي والله اشربه منية ولااقصر عنه مثل ماربيتك اربي شعندي قابل
مارضيت على هالشي ياربي بس لا يسويهه وليد ويطيعها خطية رنا حرام عليهم هالبنية هم انظلمت
عفتهم يحجون و طبيت للديوان سلمت عليهم لكيت فيصل كاعد يم جدي بس دخلت باوعلي بنظراته القوية
ابتسمت ووكفت بمكاني جدي صاحني
كال تعاي بويه تعاي وياشرلي
رحت كعدت يمهم على التخم ، فيصل كال هاي ليش هيج شعرج مبلل نشفي لايبقى هيج
جدي كاله اي والله شكد احجي عليها وتالي اني انشفه الها
كتلهم اضوج طويل وثخين عاجبني اكصه هواي متعبني
صاحوا اثنينهم ابد والله اذا ينكص
باوعتلهم اثنينهم ودرت وجهي واكمش بشعري مبلل ايدي صارت كلها مي
سمعت صوت فيصل يحجي التفتت عليه
كال دره شنو هذا لبسج زنودج طالعة وبجامة
بسرعة كاله جدي اي والله هم احجي عليها
باوعت لجدي بنظرات تساؤول بمعنى
وين حاجي عليه
هو فهمني وغمزلي عود يريد اسايره
كال فيصل وبعد منا وجاي بجامه ماكو خوش
جدي كال اي والله
واني فاتحه حلكي عليهم ونظراتي تتنقل بينهم
حجه فيصل كال حجاب حتى بالبيت تلبسين وكدام وليد وماتطلعين من البيت ابد ابد
جدي يكله اي والله زين تسوي
واني متفاجئة وهو يلقي بأوامره وبس ساكتة
ارفع حواجبي وانزلهم
فر سبحته كال والخميس العرس ان شاء الله
جدي كال اي والله
اندار فيصل لجدي كاله شنو السالفة حجي انت وياها ويايه شو جلبت بأي والله
اني متعجبة كتله عوف جدي احجي ويايه اني
كل الي كلته بجفه والخميس العرس بجفه انت تحجي صدگ لو تتشاقة ؟؟
عدل كعدته كال اي مااضمن الظروف اريد اخليج يمي اامن واحسن شي
كتله مايصير وشون الحك اجهز نفسي والخميس هذا مبقاله شي !
رد و كال كولشي جاهز بدون متعبين نفسج
كتله بس اني اريد حنه وعرس ..
هز راسه بقبول وابتسامة
كال شنو الي تأمرين بي اني حاضر من ايدج هاي لأيدج هاي وعقد المحكمة باجر
صدمة ورة صدمة ابو النسوان مستعجل كولش
كتله وجهازي لعد ؟
كال كتلوك توصلج واختاري كولشي منه مايردج بس اللسانج
باوعت كل هذا وجدي ساكت
كتله لا على الاقل اسبوع الخ
كال ابد ماعدنا شي مخلصين ليش نأخرهه
كتله اجلها عفية مايصير هيج
باوعت لجدي كتله ماتحجي جدي
رفع اديه باستسلام كال بينكم مالي شغل
كتفت اديه ودرت وجهي كتله مااكدر
سكت شويه و كال شنو عندج عذر شرعي ؟؟
متت خجل فتحت حلكي ورجعت رگعت ايدي على حلكي من الصدمة
وهمه يضحكون
صحت بعصبية مااقبل هيج تحاجيني كله من جدي ساكت على هذا الكلام
كلت هيج وطلعت اركض واسمعه صاح وراي
باجر بالتسعة للمحكمة
عفتهم صوت ضحكهم عالي ... واني اركض
طبيت لغرفتي والخجل ذابحني
عزاااا شون هيج يكول والله وجهي وجسمي كله ظل يطلع حرارة من الخجل
بقيت كاعدة افكر وامشي بالغرفة رايحة جايه وافكر بلي كاله كله مستعجل حيييل يريد يتزوج
واني على هذا الحال طب جدي يضحك
ويكرر جان يكول طلعت حيا البت عدج جاا هو بعد رجلج ماتستحين منه
كتله زعلانة اني هو غير يستحي منك
كال يابويه بعد هذا حلال الله مالي كلمة وياه عليج والصدك شفته فرحان هو تعب بحياته هوايه ماردت الفرحه الي بعيونه اكسرها
يابويه هو مكسور خاطر مثلج هالله هالله بي هو هواي يشبهج يابعد جبدي
كتله جدي اني المكسورة جناحيني هو عنده خواله جيش وسلطة ومبين يعزونه اني طلعت بس بيك انت
كالي اذا مشيتي ورا كلامي هو يصير الج سلطة وجيش وكلها دكلج تحيه مثل شوكه
ضحكنا اثنينا
كتله اخاف يغدر بينه خايفة منه حييل
كال مو من شيمه راح تگربين منه وتعرفينه عدل
وهسه كومي نامي باجر وراج روحه للمحكمة
كتله تجي ويايه انته ؟
كال جاا شلون اعوف وردتي بهيج يوم طبعا اجتي بتي
كتله الله يديمك الي عمر وعافية وسند وخيمة كون اموت اني وياك نفس اليوم
كال اسم الله عليج اريد امنج وارتاح يابويه ماتدري شكد خايف عليج ، ودي اضمج بگلبي
باسني من راسي بوست ادين واني بداخلي غصه وخوفه من كل الدنيا
بس راح احاول اشوف الايجابيات الي بي واقنع بي بس مااحبه خاف اتعلق وهو ماادري هم مختلف وغامض مجاي افهمه ابد ...
بعدهه سوينه تحليل دم وجدي وياي ماتركني
وراح رجع رنا هو ووليد فرحت هواي وكعدنا حجينه اني وياها العلاقة طيبة كلش هي كلش متفهمة وتعرفني شنو ووليد كولش يحترمها بس احسها متغيرة عليه مو مثل قبل وياه اغلب اهتمامها بأبنها واشوف نظرة حزن بعيونها انقهر كلش واحس بتأنيب الضمير ... متستاهل ابد
وبيوم عقد المحكمة كعدت وطلعت طقم ستره ازرق صفين دكم وقميص ابيض وبنطرون نيلي لبستهم وباوعت على نفسي بالمراية
انوب تذكرت ربطة ماعندي رحت دكيت على شوكه الباب فتحته صاحت شكو ماتكولين نايمة
كتلها اريد ربطة منح
صاحت طبي رحت. دورت بملابسها
ما بيهم ماكو لانيلي لاازرق كلها ماكو ولا ربطة مثل لون ملابسي
كالت شتدورين
كتلها ازرك نيلي
كالت خايبة اني زركه البس ازرك فوك الضيم حتى خوش لقب شوكه الزركه بيها خوش أغنية
كتلها مو وكت أغانيج عندج لو لا ؟؟
كالت ماعندي
كتلها مااريد
كالت وجع حتى وجع بس اذيه وحركان دم انخطبت واني محترك الخلفني من الشفتهم هسه غير لو انسى شكولهم ياربي شنو غضبان عليه من صلوع وبسيط وحيزبون لمعرض سيارات اووووف
طلعتني وطبكت الباب بوجهي
ردت انزل شافتني رنا ابتسمت
كتلها اريد ربطة ماعندي وشوكه ماترهم وياهدومي
كالت تعالي انطيج للغرفة
قبل ماادخل دكيت الباب لكيت وليد مبدل للدوام صبحت عليه
هز راسه ، هواي ثگيل وياي صاير تحسرت على علاقتنا قبل وانقهرت اني خسرت اخ
كال وين رايحه
كتله للمحكمه اعقد
كال شنو لبسج حجاب؟
كتله بهدوء اي
كال بعد وبعد تشوفوين من فيصل
هزيت راسي انطتي رنا ربطة نيلي ساده شكرتها ونزلت وليد يباوع ورايه رحت اركض اريد البسه جبت منا رجعته منا ماصار
رجعت صحت لرنا عفيه بس سوي الي واني اتعلم اجت لفته الي وكالت ماشاء الله يخبل عليج
والله باوعت صدك حلو وجههي مثل القرص ولون عيوني بارز وبياضي قوي بحمار لان الحجاب غامق الحمد لله صدك اقتنعت وشحصلت من شعري بس الاذية
تشكرت منها و طلعت للصالة كلهم موجودين
جدي شافني باوعلي بانبهار
كال صلووات على النبي ربي يسعدج ربي يسعدج ربي يسعدج وفرح بعيونه اني هيج اشوفه لو الناس هم تشوف والله ماادري
اجت بيبي تكله شنو شفت الهلال شبيك دايخ بيها
كاللها احلى من الهلال عبن الهلال حلو من يكمل هي حلوه بكل احوالها
كتلها بيبي ليش اني مو حلوه لو لان تغارين على جدي
هي هزت ايدها وراحت تريكنا وكملنا ننتظر فيصل
اجه وليد كال اني هم اروح وياكم مااعوفكم وحدكم
ودره مو وحدها
باوعتله كلت بقلبي ماعرفتك وليد بشنو تفكر الله يستر
شوكه كالت خل اروح اشوف الناس شون تعقد ظلت حسرة
هناء كالتلها بصياح ولج فال مو زين لاترحين
هزت ايدها شوكة كالتلها على الاساس هسه الخطابه سره واكفه عليه واكص ايدي الناس ماتخطبني من وراكم انتي وابوي
سمعنا صوت سيارة جدي كام كال اجه خيالج اجه
وراح ورجع دخل فيصل وبيده علاكة
اباوعه الاناقه فوووووول لابس قميص مخطط ابيض ورصاصي طوخ والستره رصاصي فاتح وبنطرون رصاصي طوخ والحزام كحلي
طالع يلمع لمع عبالك هسه طالع من الحمام وعطره سابقه وبوجهه ابتسامه
فيصل وسيم بشكل ويجذب نظر اي مره صاحب حضور وفارض شخصيته
سلم على الكل وباوعت عليه انتبه عليه واني بالحجاب كال ماشاء الله خجلت ودنكت
كال يله نطلع جاهزين
كال جدي يله ...
هو فتح العلاكه وطلع عباية راس
ومدهه الي كال هاج لبسي
اني تفاجت كتله شنو هاي
كال عبايه متعرفيهه ؟
كتله ادري بس اني ماعرف البسها
كال لاء درة ماريد اعتراض عباية ستر وتتعلمين عليها
باوعت لجدي ماراضية واريده يعترض بس هو مااعترض
جدي كال ماكو احلى من الستر
كتله بحزن مااعرف البسها والله
كال تتعلمين
لبستها واني اتأفأف منها لبستها وهو وجدي يضحكون ويصلون على النبي
و بعيونهم رضا وقبول ووليد بايده جكاره ويباوع علينا مانطق ولا كلمه وحتى ماشارك بالحديث
طلعنا كال وليد اني الحككم بالسيارتي
اندار عليه فيصل كله ماكو داعي مانريد نتعبك توكل لشغلك
كله وليد مااكدر اعوف دره بهيج يوم دائما اشاركها كل لحظاتها
جدي ضحك كاله اي والله صدك وليد
فيصل حسيت دخان طلع من اذنه فور كلش
كال اي قبل لان جانت وحدها هسه فيصل وياها
رفع راسه وليد ونزله وتوجه لسيارته
صعدنا بالسياره والصمت سيد الموقف وحتى جدي مانطق
و وليد يمر من يمنا بالسياره واني اباوع على الطريق
صاح فيصل ليش مخليه مكياج مو كلت بعد ماكو
كتله مصدومه مامخليه والقران اصلا ماعندي مسحت خدي بيدي
وكتله بملل باوع ماكو
جدي ضرب على جتف فيصل وكله ماتخلي ماتخلي هي خدها احمر من الله عينك على الدرب مو بغير مكان
لاتنكلب بينا ...
اباوع عليه من يسوق واحجي بقلبي شنو راح اشوف وياك تكدر تلمني وتضمد جراحي لو تزديهم جرح فوك جرح
رديت باوعت لجدي يتبسم انتبهت جدي فرحان ومبتسم طول الطريق
وصلنا لكينا محامي ينتظره مخلص كولشي بس نطب للقاضي
واكفين يم الباب عاف المحامي واجا كلي البسي العبا زين وليش مفتوحة
كمت لميتها واصلا صارت طرف قصير وطرف طويل وهذا الطرف كنست المحكمه بي كلها تراب
نزلت لميت طرفها كال شنو مطلعة ملابسج
كتله والله راح اذبها مااعرف البسها ليش تجبرني
خزرني معصب وصرنا نتبادل نظرات الغضب بس هو اقوى مني اكيد
اجا جدي عدلها كال ساويهم وظل يعلم بيه
كال فتحيها
فتحتها وعدلتها
باوع علينا فيصل كال يله خلصتي خلي نطب
كتله خلصت شوف لافه نفسي مثل دودة القز ماطالع مني شي
ظلوا يضحكون مديت ايدي لجدي الزمها اخاف من كولشي جديد
باوعت لفيصل انتبه لايدي كال جدي مايصير اطب انتي مو قاصر روحي بويه
جريت ايده وبستها
اباوع وليد صافن علينا
جدي راح يم وليد واني طبيت
هو سلم على القاضي الظاهر يعرفه وسالوا اسئلة
لمن وصل للمقدم والموخر تفاجأت من المبلغ الي مخلي
نصقعت ليش هيج مبلغ چبير ، صرت افور هو شنو بيع وشره
تمت الاجراءت وباركولنا بس اني صرت مو طبيعية
طلعت وكفت يم جدي كتلهم شنو هالمبلغ شدعوة هلكد هو شنو عدكم بيع وشراء واني ما ادري !
هم سكتوا و كال يله نطلع مو وكته هالحجي
طلعنه برا المحكمة وليد سلم ورجع لدوامه بعد ماباوع عليه اخر نظرة
صعدنا بالسيارة واني ماسكتت كتلهم خمسين مليون مقدم والموخر ليش هيج مبلغ ماتحجون شنو اني سلعه شنو هل المبالغة
كال فيصل هاي فوك مااغليج
كتله ليش الغلا بس بالفلوس لو انت عندك كله بهذا المقياس لو شايفني فكر وما عندنا وتضحك عليه بهيج امور
عصب وبين على نبرته كال السانج الزمي خليتلج مهر تحلم بي كل بنيه هاي فوكاها
كتله واني حلمي هذا ماقيسها هيج لمن يكون الشي فوك المعقول معناها بيع وشره الموضوع
دار عليه وخرزني مو صوجج والله
كتله وليش تروح زايد هو اتفاق وبعد سنه كلمن يروح لحاله
جدي بس يباوع علينا وساكت
فيصل كال وهو بقمة غضبه وبنبرة كلها تهديد ووعيد
باعي هالمره عدتيها مرة ثانية اتفاق مااتفاق ماينذكر تنسي واذا جبتي طاريه اطيح حظج
كتله شنو ليكون مصدك ابقى يمك
جدي كال كافي بويه انحسدتوا شجاكم
كال حجي لحظة من رخصتك احاجيها ليش عيني لازم ماعاجبج
كتله مو هيج
كال لعد
كتله انت قطار يلم كل شي واكف بدربه واني كاع السكنها مايطلع منها
ظل خازرني وصار السكوت سيد الموقف لحد ماوصلنا
بقى معصب سلم وطلع من البيت بسرعة
واول ماطبيت جدي شبكني ويبوس بيه الضبعه ااااخ يابويه كلامج ذهب نعلتي والدي اليوم
ضحكت والله ياجدي محد بعيني بهاي الدنيا غيرك الحمد لله على كل حال
ظليت افكر يعني من الخميس للخميس زواجي والله خايفه مو من البشر لا والله خايفه من الدنيا شون تفر بيه فر مثل الناعور من حال للحال
وين تريد توصلني وليا ضفه ترميني وحولي ناس تاكلني لحم ني وماترحم وجدي كبر وفيصل شنو موقعه بحياتي وجدي متمسك بي
الاحد الصبح اجتنا صبوحه والجهال وراها وبيبي وهناء يتلوكن الها ويحتارن شنو يخلن كدامها
واني سلام مايردن بس هينه كلها راح العبها وياهم واكلب موازين حياتي وارتبها على مرامي وافصلها فصال
كالت بدلع الاستاذ دزني بخدمتج ذوله كتلوكات اختاري الي تردي واشري عليه والبدله ان شاء الله تجي الثلاثاء
كتلها نفس مااختاريت
كالت سويت تغير بسيط عليها
كتلها واني متفاجأة ليش غيرتي عليها ؟
كالت لان هذا شغلي واني اعرفه كلش زين
كتلها واني البس على ذوقج لو على ذوق الاستاذ لو على ذوقي
احجي وياهه رافعه حاجبي عبالها اني اسير على مرامهم والله الا اطلع اظافري على الكل متت مليت هلكت
كامت هناء كالت عمه هذا شغلها عيب تحجين
كتلها وانتي شعليج
فتحت عيونها كالت هههه مو عيب منها
كتلها هذا شغلها خياطه وتخيط على مرامي
صباح كالت باصرار اني مو خياطة
كتلها لعد شنو انت بلا زحمة
ردت اني سكرتيره لأمور الاستاذ الخاصة
كتلها تمام بس ماتفرضين رايج عليه واذا الاستاذ اعترض اني وياه نتفاهم
بيبي صاحت يمه مايصير انتي شتعرفين بهاي الامور
كتلها بيبي رحمه لوالديكم لاتدخلون
وكلت لصباح هاحبي اني طالبه حقوق سنه ثالثه ماخلصتها ومن العشره الاوائل يعني ماجايه من ورا الهوش واعرف البس والذوق وانتي بس تنفذين الاوامر
تنرفزت مااني من الخطبه كوه متحملتها احسها تتستصغرني
طلعت وطلبت منهم تخابر بالتليفون الارضي ....
رحت وراها جانت تحجي ويافيصل اسمعها تكله ماتقبل على ذوقي
صرت كدامها اشرت الها تنطيني احجي وياه
سلمت عليه كال يابه ليش هالاعصاب على شنو
كتله اني مالبس بذوق احد ولا امشي ورا احد واعتقد هذا من حقي مو هي الي راح تلبسهم
كال صار يجرالج الي تردي يصير ومايصير خاطرج الا طيب كم دره عندي
ضحكت كتله تسلم
كال يسلم قلبج اختاري الي تحبي وافرحي اريد اشوف فرح بعيونج ماراضي عليهم لاتشيلين هم اعيشج ملكه
كتله المهم حتى لو بكوخ بس بامان امان فيصل
كال اني حالي من حالج تره لاتغرج اللمعه من دمي ولحمي تاكل بيه
بقيت ساكتة ...
كال الو كتله اسمع بس افكر بكلامك
كال يتفسر بوكته دره شايفه العيد من يمر سنين على فقير وماعنده كسوه جديده يتغطى بقديم ومشكك شكد صعبه بس هالعيد اجا لبس سلطان من الغالي ومتعوب عليه ؟؟
ونفسي ضبط كولش انقهرت من تشبيه ورا هالجبل شكو هموم اه عمو النظيف وراه لغز الله يعلم شنو
كال الو تسمعيني
كتله وياك
كال يابه اخذي راحتج الله وياج ..
رجعت يمهم وفكري مشغول بكلامه عايزه هموم فوك همومي
كون واحد يهج بجزيزه مابيها بشر هاي شبيه صرت احجي اغاني مثل شوكه
ضحكت و اخذت الكتلوك واشر بالقلم كولشي ملابس واخذيه وسيتات نوم ومكياج وملابس داخلية
صباح بعد مافتحت حلكها وكولش ضايجة وتهز برجلها
افتقدت شوكه كلت لمنى وينها كالت هناء قافله الغرفه عليها لان كل مره تطردهم من يم الفلك صباح
تخبلت كمت طلعت ورحت لغرفتها
لكيت قافلاته صدك دكيت الباب
سمعتني كالت شفتيهم *** بسيط باوعت قافلاته بسركي وقفل لان المفتاح من جوه
كتلها هسه افتحه
رحت جبت جاكوج وادك الباب احاول اكسر القفل
وعلى الصوت واجت هناء انتي شعليج مسودنه وحابسيها شتردين انتي
كتلها ماغيرج مخبله شوكه اعقل منا بمية قاط واكسر بالقفل
عافتني هناء ورجعت وياها الماسحه وظلت تضرب بيه وبيبي تصيح حيل بيها عبالها ابو لنسوان يحميها طالع السانها هالايام
وظلت وتضرب واني ماعفت الباب لحد ماانكسر والله وطلعت شوكه ونهدينا على هناء
وهي تركض واحنا نركض وراها اخر شي طبت بغرفتها وقفلت الباب عليها
اخذنا نفس واخذنا القفل وقفلنه الغرفه من بره عليها وهي تكول من ورى الباب ولجن هسه يجي حامد يخلصجن خلاص بسيطه
واني شوكه نضحك اجت صباح
صبوحه كالت عيب مايصير مره جبيره هيج تسون احسبوها عليه وانت عيني عيب تحرضين البنية على امها
اخذت شوكة وظلينا نغني
احسبها عليه غلطه
مو بيده مايرضيني تزعل لو عني ماتسال
وانت ادره بيه
وشوكه تدبج
كالت شوكه عيوني صبوحه خطبها نصيب اوووخطبها نصيب ( اغنيه خليجي قديمه )
كتلها عيني ست صباح انتي خلصي شغلج وروحي
عوجت حلكها وراحت كعدت حطت رجل على رجل
وبيبي بس شافتنا صافين اني وشوكة
راحت لغرفتها ...
واني لليل ياله خلصت طلبات الكتلوك
كولشي اختاريت كملت شغلها وكالت العبايه توصاه قماشها من الخليج تحبين توصين بعد
كتلها اريد ٤ قماشات وثنين عبي باجر
كالت تمام وصلناها للباب وطلعت اجت سيارة اخذتها وراحت
كالت شوكه المن هذن الي طلبتيهن ؟
كتلها للجماعة ويله تعالي امشي
طبيت جوه شفنا عمه امل بالمطبخ وهناء تصيح من فوك افتحوا الباب اليوم يكطعجن حامد
عفناها وكعدنا نسوي العشا واجت رنا يمنا
كالت ميصير هيج درة حابسين عمه بغرفتها
شووكة كالتلها وهي متخصرة لعد واني من حبستني ماحجيتي
ردت والله مادري ملتهية بعلي اليوم ماله خلك ديطلع اسنان يله انطيني المفتاح افتحه لعمتي
واحنه دنحجي طبوا جدي وعمو حامد ووليد وعمو فلاح
بس عمو حسن جان مسافر للبصرة عنده بحوث لان هو يدرس ماجستير
هناء صاحت حامد الحكني يحامد
عمو حامد ركض وبيبي طلعت تركض وراه
وسولفت اله كولشي
واحنا شامخين شفنا اجا يركض ورانا طبينا بالغرفة
بسرعة وقفلنا الباب
وهو ظل يصيح بعلوو صووته اليوم اموتجن تمووت
ويغلط ويفشر
واحنا نضحك وليد لازم ابوه وجدي يكول هذا بيت كيويليه حرام شمالك ماتكولي زحمه يوميه صوتنا طالع
صاحت بيبي هسه نفوخ من تروح الطركاعه دره
شوكه لزمتني وظلت تصيح لالا دره عفية عفية لاتخابرين فيصل وتكوليله مااعرس بسب حامد
يجي يكلب الدنيا علينا وين نوولي
تحجي وتهز بيه ثولتني ثول وتغمز واني ماشيتها
كتلها معليه الا اكوله عليهم
عمو حامد خاف وكال يكول شنو عمو علمود هناء طبها مرض خليها محبوسة
كتله لا خطيه طلعها واحنا قابلين الصلح لان صرنا واحد
وليد وجدي يضحكون صار كم يوم مشايفة وليد يضحك ...
كال وليد دره شنو هي كرة قدم
كتله الحياه كلها اهداف والشاطر الي يحققها
كال لازم فيصل واحد من اهدافج؟؟
يتبع
روعة التصميم بأيادي أم عبد الرحمن 😍
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!