السلام عليكم
رواية طوفان رجل
الفصل 22
نورا ناصر
ٱصعب ٱنواع النساء في التعامل
هي التي لا تهتم للنقود
تلك التي لا تستطيع ٱبهارها بالهدايا
و لا تهتم لنوع سيارتك و لا لساعتك
و لن تستطيع معاقبتها بحرمانك لها من كل الأشياء المادية
و في نفس الوقت لن تستطيع ٱرضائها و لو ٱهديتها ٱغلىٰ ما تملك
همها الإول و الإخير هو معاملتك و ٱحترامك لها
هل كنت بجانبها عند الحاجة
هل كنت سنداً لها عند ضعفها
هل كنت لها ظلاً تستضيء به في الهموم و الإحزان ٱم لا
هذه الإشياء التي تهمها .. حساسيتها مصدر قوتها
تتحمل ثم تتحمل .. عنيدة لكن دمعتها قريبة
تسامح لكنها صعبة النسيان
تضحك بصدق و تحب بصدق و تحزن بصدق
تكاد تؤمن ٱن الحب لا يناسبها ٱطلاقاً
لإنها حين تشتاق .. تقسو
و حين تغار .. تجن
و حين تخاف .. تبتعد
و حين تشعر بأن كبريائها في خطر .. ترحل
لإنها تؤمن و بشدة ٱن عزة النفس
نقطة ينتهي عندها إلف صديق و حبيب
مادري شبيه ، شعور مايتفسر من سمعته يتغزل بيه ختمتها وياه سديت التليفون ورجعت لغرفتي ، افوت من يم هناء وبيبي ولا وحدة كالت شتردين شمحتاجة
بس اني ابد مجنت انتظر منهم شي ، مكتفية بنفسي
بس هم انهضم على نفسي
اقل من نص ساعة اندكت الباب وانفتحت بنفس اللحظة
دخلوا ال كادر متكون من تلث بنات ووياهم الفلك
الي قبل كم يوم اجت اخذت القياسات
دخلوا واني من شفتهم وكفت هم سلموا واني رديت
عليهم
وهسه طلعن الحبايب من شافوا الكادر طبوا الغرفتي هناء وبيبي
كالت البنية الاستاذ دزنا احنه بامرج جايين
هزيت راسي ابتسمت مجاملة وجانوا
جايبين وياهم جنط كبار خلوهم على الارض
وظلن يحوسن بيهن يفتحنهن ويطلعن اغراض منهن ...
اني باوعت لشوكة
وهي كامت طلعتهم بيبتي وهناء والجهال
كالت طلعوا طلعوا خلونا نشوف دربنا بره بره
ولاتستحي من احد
غموها بيبي وهناء وطلعن والجهال يتوسلن يردن يبقن بس هي وين عبالك صول طلعتهن وسدت الباب
ورا ماطلعتهم دكت تحية صاحت حاضر سيدي عندج اوامر ثانية؟
ضحكت و كتلها مي جاي حتى من يخلصن مني يستلمنج انتي بس حفافه ماكو
كيفت وضربت تحية ثانية و البنات ضحكوا
وبلشوا البنات بيه ، كعدت على الكرسي وهن استلمني حفافة وتنظيف بشرة وماسكات اشكال والوان
وشوكه ويايه ويايه .. بعدها طلعت فستاني باوعت عليه كلش حلو كمت حضرته وعلگته
وبلشوا مرحلة المكياج
اني كتلهم اريد مكياج هادئ ومرتب مو صاخب وهوسة احب فد شي يبرز ملامحي بس بدون مبالغة
جبيرتهم الي عرفت اسمها صباح جانت لازمة بيدها
فرش المكياج جاوبتني
كالت الاستاذ وصانه وكال ابد لاتصبغون شعرها يريده على الطبيعة
وابتسمت ...
كتلها اي أني ما اريد اصبغه بس اريد تگصي مسطرة شويه وشسوار وكصي كذله طويلة لحد حنجي ...
گالت تمام يجرالچ ...
بدت تخلي مكياج رسمت عيوني ايدهه خفيفة وناعمة نعست وهي تمكيجني اجيت اغفى لو ماصوت شوكة فززني لازمة مجموعة اصباغ اظافر وتسألني منو منهم تخلي
اختاريت الها لون مناسب لملابسها ورجعت لصباح كملت مكياجي
خلتلي حمرة وردي فاتح و ردت تبرز عيوني اكثر
كل هذا ماشفت وجهي كلت للنهاية يله اباوع
ووهم شوكه سولها مكياج خبلت البنات بس خطيه تستاهل وكلساع طاكتنا بتحية وتكمز
والباب لابوها ماتفتحه الجهال يدكدون على الباب
تطلع تكفخهم وترجع
اجتي امها وبيبي صاحوها من الشباك
ولج شوكة شووكة
جاوبتهم شوكه ماتت احتركت
ردت عليها بيبي فتحي الباب بس اريد اشوف بت الروسية المصخمة شلون طلعت
ردت عليها هسه مانعرس مانحس بشعور العرس الله اكبر عليكم بيت مال حرك من صلوع وشيل ايدك
صاحتها امها اشقيقة ويهد تعاي عزلي المطبخ انترس امواعين
كلتلها لو يجي جدج اليوم ما اشيل عود من الگاع
گلتها احرگ شعفتج والله وامسح وجهج بالحايط ويروح المكياج
هي خافت من تهديدها كالت شتردين يمه
كالت بحزم اريد اشوف درو
ردت شوكة بعدهه مامخلصة تخلص واشوفجياهه
طكت الشباك بقووة وكالتلها فتحي وولج مسوودنة
كامت فتحتها وظلن يدورن عليه هي وبيبي
بيبي كالت لصباح الي جانت وكفة كدامي تعدل بيه وتخلي اللمسات الاخيرة
الحلوة الحبيبة وخري خلي نشوف بنيتنه
شوكة تهز بيدها وتكوللها هسه صارت بنيتكم
ايبااه من شوكت ها حيزبون ها بسيط
بيبي تعض بأصبعها لشوكة
وهناء لازمة الجفچير وتهدد بي من ورى الشباك
صباح كالت صار حجية ،، وخرت وظلن يباوعن
وعود ظلن يصلن على النبي بس مجاملة ورياء
وشوكة ماخلتهن يكملن مجاملتهن سدت الشباك بوجوههن
ذني البنات الي ويه صباح متفاجئات وحدة تباوع للثانية ويضحكن
، صباح ابد ماحبيتها او حتى محبيت شغلها الي بي تشرف على زواجاته
هي سكرتيره لهيج امور وشكلها مامريح او لان فهمت طريقة عملها كشت روحي منها
هيج شغلة وضيعة اول خطوة لازم اطعلها من عالم فيصل لازم وهاي من الامور المهمة
لان حتى لو مو اباله الموضوع راح تغري بعروضها المغرية ماحبيتها ابد وحتى حسيتها ضايجة كولش مني
وظلت تسأل عن ظروف زواجنا وهي تشتغلني
كالت شعجب قبلتي بفيصل
باوعتلها بنظرة تساؤول هي عرفت اعتراضي على سؤالها
لزمت فرشة البلاشر بأحكام ووزعته من العلبة على خدودي وبدون متباوعلي كالت اقصد استاذ فيصل يعني اقصد فارق العمر بينكم هواي ؟
ابتسمت بوجهه من ورى خشمي ..
كالت بتردد يله الله يسعدكم
وشوفتني وجهي بالمراية كالت حبيتي هذا اللون على خدودج ؟
جاوبتها شوكة اصلا هي خدودها حمر
اندارت عليها ردت لا مو خليت اساس وباودر ولازم فوكاهم احمر خدود
تحجي بأنفة ويه شوكة واصلا اغلب كلام شوكة ماتجاوب عليه بس هي انحرجت من لبستها
وبعدها كفت عن اسألتها المستفزة الي
لان ماانطيتها مجال
بيه خصله مااعرف حلوه او محلوه من احد يسالني مااحب اجاوب كلشي احب تكون ردودي مختصرة
واذا المقابل ظل واستمر يلح اكثر اني هم اعند اكثر لهذا حسيت عرفتني مو سهلة او حستني اختلف عن زواجاته
الي هي جهزتهم اله ...
حسيت بنظراتها قووية حيل عليه ، رفعت عيني عليها سألتها خلصتي ؟
عگدت حواحبها كالت شنو ؟
يمكن عبالها اقصد على اسألتها لذلك ارتبكت ..
جاوبتها اني واشر على وجهي
اقصد خلصتيني اكدر اكوم اروح اشوف روحي بالمراية ؟
ردت بلي كومي وانطيني رأيج اني سويتج مثل مكلب مني هو
حسستني هو المسيطر حركت شعري بغرور
وكمت بدون ما اجاوبها ظليت اباوع لروحي بالمراية اتفاجت بشكلي صح حلوو بس حسيت نفسي كبرت
صفنت على روحي قربت وجهي للمراية اكثر اتمعن
اي والله كبرت هوايه بالعشرين سنه يمكن
الحواجب قبل ضايفة براءة لشكلي اكثر
اليوم حسيت انشال مني هوايه
مو بس شعر الحاجب انشالت وياه الاحلام والتخطيط والاصرار والعزيمة وروح الشباب الي امتلكها
وامالي بالمستقبل ودخلت عالم مثل النسوان بحياتي البيت والرجال والمطبخ صرت مثلهم حاجه لامتاع الرجل واسعاده
ركزت بشكلي باوعت لفستاني ، اني اختاريت فستان ابيض جرجيت بي نجوم ذهبي صغيرة وحزام ذهبي من الخصر ومن جوه كلوشه عريضه وبنص ردن
و شعري مفتوح بسواده الفاحم الي يغطي الورك
لبست حذائي الذهبي العالي لان هو طويل
ظلت شوكه تباوعلي وتصلي على النبي
وتهلهل وترجع تصلي على النبي
وهي همين طلعت حلووة ... حضنتها يوم الالج همست باذنها
سمعتي وظلت تهلهل بصووت عالي
وصباح صافنه عليه
وخرت من شوكة و باوعت عليها ركزت بعيونها
هي فزت من صفنتها
كالت استاذ فيصل عرف شلون يختار
ابتسمت الها وهي هزت راسها كالت يله بنات
لموا الغراض خلي نروح انجزنا المهمة وتضحك
كتلها عاشت ايدج...
سلموا وراحوا
بقى على الموعد نص الساعه البيت مگلوب شويه طب عليه عمري الراح والجاي جدي
شافني تفاجا ويصلي على النبي يكررها ويقرا المعوذات ويفتر عليه بعباته وهيبته والسبحه وعطره الي يروي روحي وينشنها
شميته وحضنته كال انهجم بيتك يافيصل والله ووكعت بالضبعه الله يساعدك ويعينك على درتي
ابتسمت واجيت ابوسه كال لا انتلف حمرة انه ابوسج انه
و باس راسي
دمعت عيوني شوكة كرصتني ولج لا يسيل المكياج لاتبجين
جريت نفس وحاولت الزم نفسي ... وهو جدي لزم خدودي كال اي بوويه لا تبجين
باوعلي بنظرة تفحصني بيها ورجع باوع لعيوني
كال البسي ذهبج
كتله مو هو كال لاتلبسين يريد يلبسني طقم امه
كال هااا جاي يشتغل من وراي انتي قبلتي؟
كتله مابيها شي
كال بسرعة قبلتي بويه ؟؟
تلكأت كتله لا الا لمن عرفت محد لابسته قبلي غير امه
ظل يضحك كال بويه اني بعد مااعلمج انتي لحالج تشلعين قلبه ولا تتچين هواي سمعتي
ابتسمت وهزيت راسي واشرت على عيوني بمعنى من عيوني ..
وبداخلي ضجت من نفسي اني شلون شكيت لفيصل علمود الصالون والترتيبات حسيت بتأنيب الضمير واني جدي موصيتي ما اطلب منه شي ولا احسسه اني محتاجة
ضجت وهو حس عليه ، اشر بيده
وسألني :- شنو بويه شبيج ؟
دنكت واعصر بأديه ، واهز براسي
بهالاثناء سمعنا الهوسه ، جدي طلع للناس
طبت عليه بيبي زهرة تهلهل وفرحانة
واني اموت عليها اجتي يمي استقبلتها
حضنتها ظلت تبوس بيه وتصلي على النبي
طلت بوجهي كالت هنيالك يفيصل
كالت يايمه فرحانه بكد الدنيا عبنكم اثنينكم اعزاز كل واحد يداوي جروح الثاني يايمه شفتوا ضيم هوايه واريدنج شاطره وتلفي جوه ابطج لاتاخذه النسوان منج صيري سباعية
ضحكت كتلها بيبي انتي وصي عليه اني الي الدنيا مايله ويايه مو هو
كالت يااا بدون ما تكولين طبعا اوصي
باستني وطلعتني طلعت من الغرفة شفت مسوين مثل المسرح الحايط مغطي بتول ابيض وبي خطوط ذهبي رفيعة ونجوم كبار ذهبي منسقي ويا فستاني واطرافه بأشرطة ذهبية وقوس جبير
فوكها نفاخ ابيض وذهبي ومن نص المسرح مثل وردة عباد الشمس وبيها انارة وكرسين رئاسية
لكيت الحبايب فاتحات حلكهم لان قبل ماكو هيج شي ولا شغلات للمهر ابد
الجهال تحتار شنو تلزم وشوكه بيدها عوده واكعة للجهال ركع وسالختهم سلخ
وتسلم المهمة لمنى ومنى ماصدكت جهال بيت جدو قاسم
كلها تبجي وانوب شوكه شافتني طلعت ضربت تحية ...
دخلت رنا وامها ام عادل فرحت بجيتها اني هي بعدهه زعلانة بس اني دزيت شوكة تعزمها وكتبت الها رسالة فصلت كلشي الها وقنعتها ترجع وفرحت من شفتها اجتي
اجت وكفت يمي هلهلت وبعدها بوستني وباركتلي
همست باذنها رجعت وحتبقين موو ؟
جاوبت علمودج اجيت اني ومن تخلص الخطبة ارجع ويه امي
لازمتها من ايدها لا حبابة ارجعي مو وضحت الج كل شي
كالت اصلا لو ما انت مااجي بس انت عزيزة عليه
ووليد عزيز عليج وانت تحبي انت ويا مابينكم شي هو يحبج ويحترمج
كالت اكلج درة انت ليش متعبة نفسج ؟ لو تحسين بتأنيب الضمير اذا هذا احساسج فاحب اكولج بطلي وارتاحي انت معليج الصوج موو منج
دنحجي همس اني وياها
وبره النسوان كلبتها بالهلاهل الظاهر اجوي فيصل واهله
والبنات والنسوان راحوا يباعون للزلم من الشباك
اجت شوكة شاورتني كالت الديوان ماكفاهم صارت الكعده بالحديقة البره
هزيت راسي ، رنا رادت تروح تكعد لزمتها من ايدها
رنا فكري حبابة
كالت لتخافين ما اهجم بيتي اني بس مو اليوم ارجع انت ارتاحي اليوم يومج عيشي بسعادة واتركي التفكير بغيرج
غمزتلي وابتسمت وراحت كعدت يم امها .. واني ظليت اتابع خطواتها وهي تمشي تنهدت ..
جايب خواله الي همه اخوان جده اللواء والغريب كلهم لابسين قوط وراهم حمايات بحيث الشباب تركض لخدمتهم
لاحظت شوكه تركض هيج وهيج وياها بنات غريبات شابات
اشرتلها اجتي سألتها منو ذني شوكة ؟
كالت الاستاذ دزهم يخدمون بالناس ومحذر صفصف وفاتن اذا كلمة منهم تطلع واذا وحده خدمت اسمعها تشتكي لبيبي خايبه تكول قبل لانطلع من سالته شنو تدزلهم خدم كالها حتى ماظل بعازتج انتي وامج
خيه ضبهن ضبهن تاشر بديهه وتحجي وظلت تغني
ناسبنا الحكومة وبقينا قرايب وشبكنا الحكومه وبقينا حبايب
هزت شوية وميلت روحها عليه تعدل بشعرها
وظلت تحلفني عليج الله كولي حلوه طالعه
ضحكت كتلها تخبلين تخبلين
صارت الهلاهل تركع واني لا اخت لاام لابيبي تحن عليه لامره بيها رحم غير مرة عمو جعفر خطيه واكفه يمي
طب وليد عيونه بهامته مخنزر اجت عيني بعينه
وخرها بسرعة وكاللهم اسكتوا خل الزلم تحجي
و اجت عينه ونظراته عليه مرة ثانية
اتمنيت ماشفتها ولالمحتها
اخذ ابنه من رنا الي جانت تباوع عليه بنظرات
نارية وغضب سحبه منها بنص الزحمة والهوسة
بوسه وراح عنها .. طلع هو وياه ..
اجت عمه صفيه تسلم عليه كالت والله حلوه طالعه زين شكلج مايفشل
ابتسمت الها
وفاتن كلتلها طلع هم ذوقها حلو
هزت بيدها عمة صفية باستهزاء
واشرت لنسوان خواله اجوي سلموا عليه
اباوع عليهن شنو الجمال والنزاكه والرقي والابتسامة الحنينة
حسيتهم فرحانين هواي وخالته تبجي من الفرح
اجتي يمي باركتلي سلمت عليها وابتسمت الها
دموع بعيونها وتحجي ياعيني شهالجمال والله مااصدك فيصل يستقر ربي يسعدكم
بعدها علت اصوات الزلم بالصلاه على محمد وال محمد الظاهر تفقوا
اجت شوكه كالت خيه جدج قاسم انجلط لان الخطب لفيصل جده منعم ابو امه يبووووه ياقاسم صار دحاجه مهلسه من الفشلة
ضحكت واحوس بمكاني ..
كامت بيبي زهره ترش ملح ومي ورد وتهلهل
وبيبي عبالك خطار وتعوج بحلكها
وهناء تاكل بشفتها وشوكه تصنط للزلم وتطلع كلساع بلكي احد يشوفها ويرزلها وماتتوب
تطب وتطلع وتجي يمي
كرصتها ولج كعدي فشلة لااحد يشوفج
كالت ولج اريد اصيد
كتلها شتصيدين زوري
ردت ولج رجال رجال اي واحد من خواله حتى لو جده الي رجله بالگبر قابلة المهم اعرس
انفتحت الباب طب وليد يباوعلي ويصد بنظراته
مقهور حيل كلبي رجف عليه ياربي شجاي يسوي بروحه ومرته عند أهلها من ذاك اليوم لليوم يله اجتي وهم علمود خطبتي مو على موده
هو شكم مرة راح وماترضى ترجع ، وجدي وعدني بس تخلص الهوسة مالة المهر هو يتعنى ويجيبها بس هم يريد يسوي لوليد جرة اذن حتى يحس بقيمتها وقيمة ابنه
وليد كال جيبوا العروس راح يعقد الهم من ورا الباب
كال هيج باوعلي بنظرة ذوبت عظامي من القهر ودار وجهه
كمت رجليه طكطك من الخوف خايفة من الحياة الجايه جنت مسيره ابد مامخيره يارب ارحم عبدك الفقير يارب
جابت شوكه كرسي وخلته يم الباب
و اجت خالته طلعت قماش ابيض ستان منقوش عليه بالذهبي اسمي واسمه وبي ايات قرانية
قال تعالى (ومن اياته ان خلق الكم من انفسكم ازواجا لتسكنوا اليها وجعل بينكم مودة ورحمة ان في ذلك لآيات لقوم يتفكرون )
غطوا راسي بي كاعده شكد نسوان واكفه تتفرج بس احس وحيدة بينهم
ثواني صاح جدي بصوت سمعته بگلبي گبل إذني
وتراقصت كل مشاعر الحب على اثره بداخل روحي
كال اعذروني بويه اني اطب يمها وانفتح الباب جان يطب نور عيني جدي صاح يالله انا اوكف يم بتي ماعوفها
هم ضحكوا واني دموعي نزلن وهو عيونه عليه عبالك نتذكر كولشي مر بعقلنا من يسبحني ويمشطلي من يلمع حذائي بالمدرسة من يلزم
القراءة واقرا المحفوظة
من يفكدني بالعيد يحضر هدومي والازم اول وجه اني يشوفني واعيده
اليوم اتخلى عن مشيخته حتى مايخليني وحيدة
الناس تباوع علينا سكتنا ووتم العقد بعد لفظ عبارة
نعم وانت وكيلي
جدي لازم ايدي طول العقد لا استحى من مرة ولاخاف على صورته شيخ عشيرة
عاف عمامه وخطاره وطب بس على مودي لان يدري بيه وحدي
ارتفعت اصوات الهلاهل والتبريكات واخذوني ودوني للكوشة وطب فيصل
اتفاجأت من شفته لابس قاط اسود بقميص ابيض طالع وسيم بشكل ابتسم بعيونه نظرة فرح واعجاب
ابتسمت وجدي لازم ايدي ماهدها
تقرب فيصل جدي كله مبروك عليك زرعي وثمري وكاعي سلمتك جبدي يافيصل هاي الامانة
كال فيصل واني اسكي واروي واحرث اني كدها
علت الهلاهل وخالته طلعت علبة فتحتها
كال هذا طقم امي والغالي للغالي
اباوع عبارة عن طقم غريب شغله وحلوو نادر يحتوي على فصوص خضراء حجر زمرد بصياغة نازكة
الكلادو ثلت احجار بينهم مسافة
وزنجيل ذهب يربطهم بصياغة البرم
لكن ثقيل وتراجي هم حجر وسوار
ومحبس وياهم حجل
بس الحجل يختلف عن الطقم باوع لرجلي
كال غير تنزعين الحجل
كتله بس هذا مااكدر انزعه
الحلقة جانت عباره عن ذهب ابيض واصفر
وهالاثناء ماكو كل صوت
هو يلبسني وشوكه ثالثتنا ماده راسها بينا وتصيح يوم الي واذبح طلي وازور علي
وساعه تصلي على النبي وبعدها شاورتني
كالت كليله احنه ننطي هدايا وياالعروس شوكه خايبه خاله يموت يذبح يالعباس كليله هديه ننطي مثل صابون وعد الزنابيلي
كالت هيج وراحت واني كوه لازمه نفسي مااضحك
وانوب كادر تصوير موجود فديو وفوتغراف
كمل وبيبي زهره هوست فرح كلبي يوم لدكت طبوله ابن الزين يستاهل الهلهلوله
وهوسوا وياها وخالته تهلهل ، جده راد يسلم عليه رفعه الغطا وكلي من اليوم شعرج بعد مايطلع لأحد غريب ويغطي بشعري
طبوا خواله وعمامه يهوسون هو ساكت كلها ماسمعتها وشكلهم يخبل رغم بالقوط بس الظاهر يحبوه كولش
بحيث اعداهم اكثر من ولدنا وهو محتار بالغطا مال شعري لان ستن يزحلك وهو يرفع بي كلساع
بعدها اجا احمد كله ذبه هذا من شعرها خل نشوف جمالها انشلع قلبك
هو جاوبه بعد ذني مالاتي محد يشوفهن
ويضحك
هوس جدي ردا على هوسات خواله لفيصل كال ( تره البستان يتباهه بنواطيره )
باوعت لجدي وحاجيته بعيوني
ياجدي حتى بالهوسات تقصدني من عمري على عمرك
اني كله مدنكه بس سمعت صوته لجدي رفعت راسي
اجه جده كمت سلمت عليه بخجل و هو تقرب باس راسي وهمس اكول حفيدي مااندل دربه اثاري عيونج صدك تذبح
ابتسمت وخجلت كلش اطرافي نملت
و رجع باسني فيصل كال كافي يابه كافي
هوو ضحك وانطاني ظرف بي فلوس وسلموا الباقين وانطوني ظروف وطلعوا
بقت بس النسوان تهوس صاحت مرة عمو حاتم بهوستها
يالعباس سبع حظوظ حط بيها خسر من باعها وربحان شاريها ...
ختمتها شوكه بهوسة
كلها تزوجت بس احنه ظلينا وين ام البنين رجوله تنطينا
كلبت الخطبه كلها ضحك ...
بعدها شوية شويه كلها طلعت وخلصت الخطبة الحمد لله ...
طبيت ابدل لغرفتي ابدل اندفعت الباب وطبت شوكه كالت خايبه اليوم متت وسحت شنهي خواله حلقوم لوز وخيه يلمعون لمع وعلي مال واحد يخليهم بالمعرض البوفيه ويتفرج عليهم حتى مايلزمهم يتوسخون
ورجلج والحسين ردت ابوسه سحت من لبسج القلاده يشم بيج اوووف شصار خل ياخذني وياج الله اكبر
وطركاعه على روسكم ولد الجلب ولد النعال خلونا بضيمنا جايب ويامعرض مال سيارات عبالك جنهم ذوله بالتلفزيون هم ذوله خايسين خواله احلى من عمري الفات والجاي فكري عايش بيت العگرب
كتلها ولج كافي بالعة مسجل
كالت وخرري ووخري خليني بضيمي وخري
رااحت ورجعت كرصتني حييل عطتتت اخخ
كالت ووجع
رجعت مرة ثانية دااست على رجلي حيل
كتلها بحزن هاي ليش بالله ..
كالت خايبة حتى اعرس وراج
غمتني وراحت
رحت للكنتور وفكري كله بلي صار اليوم طكيتلي صفنة وخليت راسي ع الكنتور ، زين اني شون راح اصبر ابعد عن جدي سنة !! وهو شلون يصبر بدوني
شكد افتخرت بنفسي اليوم من اجه ووكف يمي
ياربي شكد احب جدي والله هو بطلي اخخ وين الكى مثله
هو مال فيصل مثله ويشبهه بس والله مااظن
طلعت هدوم من الكنتور واخذتهن
اريد اسبح ...
طلعت لكيت الحبايب بالهول ووياهم ووليد وابنه بحضنه هم زين رجعت رنا وهو يشمشم بي ويبوسه ويلعبه
بس فتت من يمهم بيبي شمرتلي حجايه
كالت لوليد لاتخاف هسه يملها ويطلگها وهي ترجع تركض وراك
وضحكت ووليد هز راسه وتحسر
واني سويت روحي ماسمعتها وليش اقشمر روحي اني راجعة اكيد ويتزوج عليه اكيد بس ارجع اركض ورا وليد مستحيل
يتبع ...
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!