السلام عليكم
رواية طوفان رجل
نورا ناصر 🌸
شيضمهن عليه اندلهن اندلهن
باأول نظره شاماتك افرزنهن
وإذا مريت من عندي بهبوب الريح
إذا رايدني البجيدك اعددهن
اعرف صغارهن وكبارهن و
اعرف الخافيات الما تبينهن
سولت عيني كل شامه على جيد
البنيات تفرزنهن
من گد غيرتي مرات
انشدك ،
آنا
أغار اعليك منك
و انت تدري ،
رگبتك اعتبرهاا حلالي
وهاي شامه ،
شبيها و شعدها علة رگبتك؟
ــــــــــــــــــــــــــــــــــــــــــــ
لــ(شآعِرهاا)
ضحكت ابتسمت بوجهه واستغربت يا شامة يقصد عليها !
گعد بصفي حسيت بتوتر ، جريت نفس وتسربت احاسيس ومشاعر لداخلي فجأة
اجذب اذا اكول ماصار قبول اله بداخلي ، فيصل منو ماتنعجب بي و بشخصيته وثگله وكلمته موزونة وبمكانها مايكولها شخص عيونه تحجي قبل لسانه
يمتلك هواي صفات اي بنية تتمناها ، انسان ملتزم بالدين من صوم وصلاة
وعنده وشهادة مهندس معماري ويساعد اي محتاج يجي وميقصر وي اي احد ابد
يسافر ويهاجر اشهر في سبيل مساعدة الفقراء ويسعى على حساب راحته للاخرين
انسان ناجح بعمله بذكاءه كدر يشارك بأسهم حكومية ومااننكر جده ساعده هوايه
هيج انسان ماممكن ماننعجب بي ، زايد على وسامته واناقته و بار بأهله ...
والا صفصف منو يجرعها وخاصة هي جانت تأذي بصغره
وبس لم توفى أبوه اخذهم يمه وتحملها لخاطر اخوانه
اذن هو انسان مسامح وماكو حقد يملي گلبه ...
تبقى فقط الخصلة الموجعة الي بي و هو الزواج وتبديل النساء باستمرار ، هذا الشي اكيد ورا لغز والله اعلم شنو هو شكد فكرت شكد حاولت افسر واحلل واربط تعب عقلي ومالكيت اجابة
جانت واكفة يمنا بيبي زهرة تهوس اله( تعاي تباركي يامن تودين ، خضّر عودنا اليابس من سنين ) هي تهوس وكلها وياها يهوسن
اجت عمة امل جابت الحنة اخذ و خله بأيده حتى يحنيني
انتبهت هو محنين اصبعه الصغير ويالزلم
لشويه وحسيت ايده تسللت على جتفي وظل يتلمس
بيه عرفت يقصد الوحمة الي گال عليها اول مااجه وهسه عرفت شنو يقصد
بين جتفي وصدري وقريبة على عظم الترقوة
هي مو شامة وانما وحمة اعتقد امي متنسية بيه بالرمان وهي تتغير حسب فصولهه ساعة تصير حمره مره جوزيه مره سوده ..
ظل فيصل يخلي اصبعه السبابة عليها
و يصعده وينزله عود يستكشف ملمسها ...
جريت ايده ووخرتها واباوع بوجهه
ضحك وقرب راسه يم اذني همس
كال ليش توخريها مو هذا فضول مال سنين اريد اعرف شونه ملمسها
باوعتله بنطرة تعجب متفاجئة وين شافها ؟
اريد اسأله بس صوت الهلاهل ماخلتني علت بسرعة
لزمني من ايدي وكفني ، اكلني من الكيك وشربني من العصير
واني كذلك ...
گاعدين اني وياه ورى مخلصنه واحد اكل الثاني وكدامنا يهوسون ويصفكون والهلاهل عالگة وصوت المسجل عالي
اجتي رنا يمي شاورتني لان مااسمع شي من الهوسة
كالت درة عمو حسن جاي من السفر يريد يشوفج ...
كتلها هسه اجي .. باوعتله لفيصل قربت منه
وحجيت وياه وهو جان مقرب مني ويسمعلي بتركيز
كتله اجه عمو حسن اكوم اسلم عليه
كال يله نطلع نسلم مشيت وياه لزمني من ايدي
لشتي رجفت وهو من حس بيه رجفت لزمني بقووة أكثر
باوعتله ابتسم بمكر ، دنكت وايدي بيده تحوس لاارادي
طبينا للبيت استقبلني عمو حسن فاتح اديه اليه
فدوه وضحكته مرسومة على وجهه احبه ومشتاقتله ردت روحي من شفته
حضني وحضنته كال ماشاء الله ماشاء الله هاي دره ماعرفتج متغيرة ابتسمت
وخرت منه و سلم على فيصل كله بالخير والعافيه شايفين كل خير كوه طبعا اخذت اجازه لباجر مااكدر دره تتزوج واني ماكو شون مازفها
دمعت عيوني وفيصل كله لاتبجيها عاد
هو ضحك بس يحجي بعبرة ووجه كلامه
اله كله :- فيصل ماراح اوصيك على دره لان حجي عدنان ادري مايرحم بيك بس اني بعده اني ابوها واذا مو كد الامانه لاتنطي وعد
لان الوعد ينطي امل والامل من يخيب يدمر الانسان
جاوبه فيصل يمعود حسن على كيفك وياي ترى دره بعيوني واني حريص عليها اكيد وتدري انت اني شكد احبها واعزها
ديحجون طب وليد للصالة واني بحركه لااراديه صرت ورا فيصل وهو صار كدامي وصاح ياابه غير تنطي صوت البنات منا .....
اجانه صوت وليد واني واكفه ورا فيصل
كاله العفو غير داخل بيتي وسمعت بعمي حسن رجع واجيت على طول ...
اني عفتهم ورحت يم النسوان
بعدها فضت الناس الغربه وطلعوا بقوا بس الكرابة
كمت طبيت لغرفتي بدلت ملابسي و جان يطبون جناين بيت جدو قاسم
وحدة من جناينه اسمها هيفاء كالت اي درة تعرفين شراح يصير باجر وكملت كلامها بغمزة
خجلت ودنكت اني وهي تربعت بنص الغرفة
وكعدت تعلمني عن ليلة العرس واني خجلانة وبس استمع
وحدة تكول هي مثل چكة الابرة ووحدة تكوول لا والله ألمها يموت هاي كلاوات مال جكة ابرة
والثانية تصيح ولجن لاتخوفنها خلوها وحدهه تنصدم
ع الاساس هي ماجاي تخوفني ووينج يشووكة عني
تعكرت وحدة تجر طول وحدة تجر عرض
دخلت شوكة وهي تصيح… هااا ولجن شتعلمن بالفرخة دهر صاب الزلم كلهم حلوين
وحده ردت عليها كلتلها.. جاي نگلها ذيج الشغله مثل جكة الابره
صفنت شوكة.. يا شغله ولجن هااا تعرفن بشغل الزلم وما تگللي وبعدين جكة ابره جكة بعير حلاله عسه ما يركعني بهاون
عاطن بيها… هااا هااا هي شبيج ياهون
جاوبتهن.. اندري اكلجن ليش هو الزلمة عود ليش يجكجك شني رجال مضمد ويجكجك
راحت تركض وهي تصيح… خرب حظي ولك حامد ابو صلعه يكولون الرجال يجكجك بالابره عندك ابره لو لا
امها عاطت بيها.. ولج صخام بوجهج شني ليجكجك
ردت عليها.. اندري غير هن يكولن جكة ابره ما عندج ابره اشوفلي زلمة يجكني يعني لا متزوجة ولا زلمة جاكني ترا مو عيشه هاي
وكفت امها وضربتها.. لصمي حلكج عيب ولج استحي انتن شكو تسولفن الها هيج سوالف تضيعن برائتها
ردت على امها.. خاب تطيري بالعباس تنطيني ابره واروح لمصطفى يجكنكي اريد اجرب تجكجك الزلم
امها.. دهر صابح كون ولج بعد ما تكعدين ويه نسوان متزوجات
غمزت الها وهي تبتسم.. اعترفي شنو موضوع الجكة
جاوبتها بعصبية.. مو اكوم اجكجك عيونج زماله
راحت كعدت يم امها وهي زعلانه.. فدوه فدوه حبابه بس كليلي ابوي جاكج لو لا وصدك توجع لو لا والله عندي فضول والله وابرة ابوي صغيره جبيره
صكتها بضربه على ظهرها.. نجبي والله من اسمعج تجيبين هاي السيره اشك حلكج
وكفت.. جااا ما دام ما تحجيلي اروح اشوف ابرة ابوي واجي شلون تقاليد حلوه وعادات ماسامعه عنها انوب حبيت الزواج بالزايد
جاوبتها بيبي .. ولج يمه شوكة هاي اشياء عيب من تزوجين عود نفهمج هسه خلي يجي الرجل والله كريم لا تحجين هيج سوالف
ردت عليها بتفكير.. يعني بس المزوجات محصلات جكة الابره واحنه العزبات كل شي ماكو خرب شكد نقهر هسه غير نزوج مو حتى حمضنا
گوه سكتنها والصمن حلگها لو بيدي تروح تاخذ ابره وتصيح جكوني خطيه ما تفهم شنو السالفه
واجه المنقذ مالتي كاعدة يمهن و اسمع صوت جدي يصيح يالله يا الله ووراهه دك الباب ...
هيفاء صاحت تفضل حجي تفضل
هو احم احم وفتح الباب باوعتله بحب شون راح افارك جدي اني بالله دنكت افكر بلحظة الفراق
هو بعد عيني عينه وگلبي گلبه
... سلم عليهم رفع ايده
كاللهم بويه اني ربيت وتعبت وصرت الها اب وام واخ واخت وبعرسها اعوفجن تاخذن مكاني لا يابوي تنحسب عيبه بحكي من اوصل دره لهيج مرحلة من حياتها واعوفها انتن ترضلي انعاب؟؟
وهنه كلهن صاحن بصوت واحد حشاك حجي حشاك حجي
وكامن ترخصن وطلعن وسدن الباب وراهن
هو اجه وكعد يمي وضحكنا اني وياه
كال هاااا كبرتي وصرتي مرة
جاوبته عمري مااكبر عليك انا وياك من يوم ربطت الحجل برجلي وكتلي هذا ماينزع بعد مااموت يالله وانا اكلك حتى بعد عمرك الطويل يظل برجلي لان احسك كبرته بروحي وبرجلي واذا صارت بنيه عندي اورثه الها ...
ضحك كال تسوين درزن جهال
كتله اي درزن بس شوكت بعد على الاقل يراد تلث سنين وانوب من يكول الكه واحد ادمي
كال لا بويه ماارضى بكلامج هذا تروحين تعيشين وياه بمايرضي ربج وتخافين الله بي فيصل خوش فيصل بس يرادله تعب شويه ومالكه احسن منه بالدنيا كلها الج اعرفنه مثل مااعرفج واعرف مايه شنو انتي رايحه لاتخلين مدة السنة ابالج
كتله جدي بس
قاطعني كال منا للسنه الف عمامه وعمامه تنكلب لاتسبكين ابد وخليها ترجيه باذنج فيصل تردي يعوف النسوان دوخي بيج
كتله شلون يعني ؟
كال لاتجين وياه بفراش ولاتطلبين منه فلس
كتله شنو قصدك مو حرام هذا حقه ؟
كال لا مو هيج قصدي الي اريده منج هو لاتونسي بالفراش كون يحسه فرض عليج وتأدينه
واني استحيت ودنكت كتله جدي عيب هو قصده مااتفاعل وياه ولااندمج
ابتسم وكال بويه وياج حتى المستحى والعيب انساهم عبني اخاف عليج اكثر من روحي يابعد روحي واهلها
ضحكت يحفظك الي ربي ويطول بعمرك وينطيك الصحه والعافيه
باوع على الساعه صايرة بالوحده
كال ياباه وراج تعب ونامي وهاا لاتخلين مره تعلمج لان فيصل مدرسه ويعرف دروب النسوان لا تاخذين بحجيهن خلي ورى ظهرج
ضحكنا كتله عاد بهاي مشهودتله ومحد يلحكه
ضحك اي بعد انت تعرفين
يله نامي وارتاحي
كمت وراه حتى اقفل الباب فد نوب فتحت الباب هو طلع من الغرفه و باوعت واشوف وليد بالهول يشرب جكاير ويمكن حتى سمع حديثنا الله اعلم لأن جان هدوء كولش ماكو صوت والكل نايمين
كاله جدي هاابويه ليش عايف مرتك وسهران
كال بعد حسرة النوم مجافيني
وعينه عليه ...
اني بسرعة كلت تصبحون على خير ... وطبيت للغرفة
و اسمع صوتهم جاي من الشباك
جدي يكوله شنو هي صارلنه يومين نحجي خلها تروح بفالها
كاله وليد والله مو بيدي والقران والفرقان هي دكمه وخلصت
كال جدي الا اكلك انت مو كفو الها بس كالت لا وانت كبل رحت عرست عبنك جبان والعشك اله ناسه تدري البارحة من شفت مصطفى شكد انقهرت عليه بس حسيته صادك انت ورطت حتى بت العالم وياك ومو صاحب حنكة
كوم تعوذ من الشيطان وادعيلها الله يسهل امرها وخلها اخت الك احسن ماتظل تتحسر على شوفها الزم العصا من النص ياكديش
ابتعدت عن الشباك ورحت مددت على السرير
ظليت امدده واسبح واقرا ايات خايفه من الحياه الجديده ومااريد أمل بنفسي زايد بي
واصلا غاسله ايدي بس قنعت نفسي تجربه نخوضها وان شاء الله ماتأثر عليه ومنها نعرف ماهي خبايا عمو النظيف ..
غفيت وكعدت على الهوسه والهلاهل وشوكه يم باب الغرفه تصيح بعلو صوتها لحد يكعدها عروسه وراها تعب ....
لعد هي هسه شجاي تسوي من تصيح الحمد لله الذي لايحمد على مكروه سواه
كمت لميت شعري وخليت حجاب على راسي و طلعت صبحت عليهم
بس شافتني هلهلت بوجهي ضحكت ومشيت رحت للمطبخ اسويلي ريوك جوعانة حتى بهاي محد موجود الي
عمه امل كالت مايصير هسه اسويلج
كتلها لاعمه مايرادله شي هي هم خطيه مسطوره بالجهال وتركض للبيت هي
وشوكه كلساع تشغل المسجل على كوكتيل قاسم السلطان جان دارج بوكتها وحافظه الاغنيه كلش وتهز وياها ( حمودي حماده ياعسل وسكر زياده شلون شلون يلعب الزغيرون)
وبيدها الجدر وتهز وتطبل بالجدر
اجا عمو حسن يبوس بيه وفرحان وراه عمو فلاح فقير ويتجنب المشاكل وبحاله هو مرته مالهم علاقة بأحد
شويه واندكت الباب راحوا فتحوها واجت بيبي زهرة
اجيت على مودج اليوم اني اسحبج
(احنه عدنا عاده العروس تسبحها امها ) بس اني وين الي أم
كتلها اابيبي فدوه لعمرج وين تكدرين واني اسبح روحي استحي عفية ماريد اتعبج
تخصرت وهي لابسة عبايتها وكالت اهاا تستحين مني جاا لو اجه الليل هم راح تستحين؟
ظليت اضحك وكتلها عزاا بيبي عفية والله هم استحي
كالت هااا ولج انت امج رويسية مالازم تستحين
وهم ذاك وحد فيصل يعرف يدوهن النسوان
كتلها بيبي فدوه كلما اتذكر بطني توجعني
كالت امشي اسبحج لااسحلج سحل
جاوبتها بضحكة هو انتي وين تكدرين تسلحيني كوه تمشين
كالت لا ناذره نذر الج وانوب لفيصل عزيز قلبي يابيبي تعاي يمي خل اكلج شي قبله
ادنيت يمها همستلي كالت جاا هو غير عاشكج عشك المسودن
متت ضحك كتلها بيبي هو يعشك النسوان كلها كلبه مو بيده
غمتني على راسي كالت صدك وعلي انتي زمال
تذكرته من كالي زمال متتت ضحك وهو اكيد لاكطها منها الحجاية لان هي ربته ...
دنحجي اني وياها و طبت ام سعد سلمت وكالت اليوم غسولج عليه عبن انتي بنيتي صدك
بيبي زهرة تخصرت والتافت عليها كالتلها بصدمة
ياااااااع دكوولي غيرها
ام سعد كلتلها اي جاا شننووو
وظلت هي وبيبي تتعارك لحد ماخصمتها ام سعد بحلفانها
احنه عاداتنا بالغسل نخلي تلث اسطول وحده بيها حنه وحده بيها شب مطحون ومي ورد وحده مي صافي وننكع رجلينا بطاسه بيها ورك ياس ونبك....
وطبعا شوكه تريد تطب ويانه تكول ادري بروحي مااعرس عاد خلوني بس اشوف العروس شنو تسوي
كوه دفعناها وطلعناها من الحمام .. وبدت ام سعد فدووه لعمرها تقرا ايات وتسمي وتصلي على النبي واله....
بدت بشعري بمي الحنه وصابون الرقي وخطيه تليف بي وتدعي اليه بالسعادة
واني اموت عليها هاي المره تنكط محنه وطيب حسيت اليوم نفسي وياها مو ييمة ام ابد صح امي عايشة بس دوم احس روحي يتيمة
السطله الثانيه الي بيها الشب والمي ورد ريحتها تخبل
وهي تذب عليه اتنفس ريحتها
خلصت السطل الثالث واخر شي ظلت تذب مي صافي عليه ووياهه تصلي على النبي ...
وبعدها سمعتها تقرا اللهم نسألك بحق فاطمة وابيها وبعلها وبنيها والسر المستودع فيها أن تسعدها وتوفقها وترزقها بالذريه الصالحه وتبعد عنها شر بني ادام وحوطها بسورك العظيم ولاحول ولاقوه الابالله العلي العظيم ...
من خلصت ظلت تهلهل بعالي صوتها ولفتني بالخاوليات
طلعت من الحمام ورحت لغرفتي وام سعد ويايه فتحت الباب لكيت الكادر ينتظرني برئاسة صبوحة
بلشوا شغل بيه طلبت تسريحه بسيطه رفعوا شعري ونزلوا خصل طويله منه وردت مكياج يبرز عيوني بحمره وردي زهري باوعت لبدلتي ماشاء الله نازكه فتحت سبعه ردن تول ابيض وبي تطريز يتخلله اغصان فضي وابيض(تشبه بدلة لنجوى كرم بوحدة من اغانيها )
الشي الوحيد الي راضيه عليه بزواجي هو البدلات كلها جانت فدشي بالوانها وتصماميها كلها
واني طويله وجسمي رشيق رغم عندي مفاتني بارزه بس بتنسيق الظاهر طالعة على خوالي الروس ماعندي كرش شكد مااكل مايكبر كرشي
لان عمتي وبنات عمامي عدهم كرووش حتى قبل ميتزوجن
لبسوني عقد امه وصارت مداهمه للغرفه من شوكه
طبت باوعتلي كالت ماشاء الله
وظلت تدبج بالنص مااريد العشا زفوني ماريد العشا زفووني
وتهوس بنص الغرفه كمت بوستها كتلها
يوم الج ان شاء الله وهاي غرفتي اذا تردين تكعدين بيها كعدي براحتج وديري بالج على غراضي خليتهم بخانة الكنتور وقفلت عليهم
كالت خايبه شو انتي ماتستحين هم مااخذه رجل وعنده بيوت ومجلبه بهالمهجومه لخاطر الله
باوعت عليها بحزن كالت يبووه لاتخليني ابجي عفتيني وحدي بعد ماصرنا صحبه بالكفاح المسلح الواحد
ضحكت كتلها لاتخافين موجوده ودكي عليه وشوكت مادز عليج تجين يمي
كالت والله؟؟؟
رمشت بعيوني كتلها وداعت جدي
طلعت بالهول اجا جدي يصلي على النبي وبعيونه دموع واني طفرت مني دمعهة بسرعة بس شفته
كال لاتخربين وجههج بويه انا وين عنج طاير واذا كلش يوميه نتخابر يابعد جبدي
قربت منه شاورته يوميه مو تعوفني وحدي اموت وراك وفقيره اصير
كال افاا ماربيتج فقيره الضبعه انتي بس لاتنسين الوصيتج بي
هزيت راسي بنعم واحنه على هالحال مر وليد لابس قاط كحلي بقميص ابيض يباوع بعيون تحجي ومتروسه دموع
كال ليته مكاني ياوجع گلبي كتله مكانك اخو وسند وعزوه من دنياي تميل اركضلك لاتسد بابك بوجهي
نزلت دمعه وحيده كال تلكيني مثل ماتريدين ومااتخلى عنج بيوم حتى لو فيصل يسعدج
كتله اي هذا وليد الي ينشد الظهر بي
ضحك وكال الله يسعدج خل نطلع جدي قبل الزفه ماتجي
ظليت اباوعلهم اثنينهم وعيوني ونظراتي تتوزع بينهم ودموعي كووة حابستها شنو انسى من جدي ووليد وذكرياتي بهذا البيت ياربي
اجتي أمل اخذتني وعيون وليد مانزلت لحد ماطبيت الديوان الناس كلها كاعدة بي
وشوكه بالنص ذابه لحم بالرگص وكلها موجوده حتى ام سعد وبيبي وهناء وذن حتى ماتقربن يباركن الي استغفر الله ربي ليش هيج
كعدت رغم الخوف الي بداخلي افكر بالحياة تركض بيه وتمشيني حتى احس روحي بلا وعي قبل عشر ايام جنت اداوم كلية
وقبلها چنت طفلة بهذا البيت العب وي وليد وجدي مداريني ، اتعارك وي شوكة ومرات صحبة احنه انكتل من عمو حامد وهناء وبيبي
عمو حسن يداريني ويحبني ويحميني بوقت مموجود جدي ، ويغطي على وكاحتي
بنات عمه امل الصغيرات الي جنت العبهم ، سوالفي وي رنا وابنها علاوي العبه
ايام الي جنت اكعد بالبستان ادرس واحضر دروسي واقراهن وارسم احلامي وطموحاتي
غرفتي الي شاهدة على هواي امور تخصني دموعي رگصي على اشرطة الفديو الي جنت اجيبها واكعد اركص وحدي و وكل هذا واكثر شنو انسى من حياتي هناااا
حكمة ربي بهذا ماعرف شنو ، اني ادري راح اتعب وانقهر وحروب بس اني قويه اي دره انتي قويه اشتري نفسج وكرامتج اولا والباقي ارتبه من اشوف الوضع ... راح اماشي القدر والله كريم وموجود وجدي هم موجود
وراها صاحوا اجت الزفة
انعصرت بطني عصر من الخوف ولوتني ، واباوع
كلها تركض تستر روحها والجهال تصيح توترت بالزايد وخفت اكثر
عبالك صوت الطبل بقلبي يدك مو بالحوش وكلها تركص لحد مافات رفعت راسي لابس دشداشه وعباه وعكال ...
طب وياه جدي والله مااذكر شون باوعلي بس اذكر نظرة
جدي اي بيها هواي خوف وفرح وحزن وفخر وانكسار لفركتي امل وخوف من الخذلان هوووووواي امور اول مره راح نفترك العشگ جدي اي العشك جدي ....
وگف يمي فيصل بس يكول ماشاء الله تقرب وهمس باذني بعد ماعندي شي اطلبه من ربي انتي اخر دعائي وتحقق ...
ابتسمت والهوسات تركع لمن بيبي زهره هوست (اسد ضرغام ياولدي ابد مايهاب لعداه اسد مو بس اسم ياناس هذا الخير طرواه )
رفع ايده لصدره وتشكر منها ....
جاوبتها ام سعد
(عطاي الله يامحب لوزه
وفوكاها اللب
يامستكه وريانه
طولج نبع ريحانه)
ابتسمت الها كومني جدي وطلعنا للحوش وكفنا وكلها تركص احمد كابل شوكه احتاروا شيسون والناس تضحك
عليهم
اني دنكت ولازمة ايد جدي وجدي يضغط عليها كولش
ماودي افارگه
اجه عمو حسن باسني وعمامي سلموا
فيصل كال يله يابه ورانا عشا
تقرب جدي شبكني عبالك مايرضى ينطيني واثنينا بجينا
بجينا بصوت عالي و كال لفيصل اخذت گلبي اليوم
ضحك كاله گلبك بعيوني
واني اريد اسكت ماكو شهگة سيطرت عليه ، مثل طفل يوجعه شي ومايسكت عن البجي ويظل يناشغ اني هيجي بالضبط
طلعت كوة واتلفت اشوف جدي عيونه دمووع تجري
اتمنى افررر من رووحي وارجع اله ياربي والله صعب فراكه
كل شوويه اريد ارجع و يلزمني حييل فيصل ويمشيني
الى ان صعدني بالسيارة بالصدر ودار من الجهة الثانية صعد يسوق
دخل وشغل السيارة وصوت المزيقة يدك بأذني بس اني فاصلة عن كل العالم غصة شكبرها على فراك جدي
حسيته لزم ايدي حسيتها مو لزمه لايضمها بيده مايريدها تبين يتلمس بيها ..
ضربوا طلق عمامه يعني عمو حاتم وعمو جعفر وطلعنا طبعا مايحتاج استوديوا لان عدنا كادر تصوير يفتر فديو وفوتوغراف ولاني ركزت بهيج امور تركيزي ويا عمري الراح والجاي جدي منو يسكته بعدي منو يصبره
حرك و طلع بالسياره التفت عليه كال شصار شدعوة هالبجي كله هو جدج يوميه راح يجيج والتليفون موجود
احجي وياه النهار كله محد يحاجيج لاتخربين علينا فرحتنا اليوم هذا تمنيته من ربي والله حققه اذا طلبت بعد منه شي ذكريني وكليلي طمعت هواي فرحان دره هوواي فرحان عادها مرتين
جريت نفس وكتله بنبرة كلها بچي الحمد لله
كال ماراح ماتندمين والله
سكتت
كال هاااا شون نسيت عليه نذر بيوم الزفه اشغل هاي الاغنيه من ارجع منكم و اخر مره اسمعها بعرسي منج
ضحكت وهو شغل الاغنية جانت لأسماعيل الفروچي
(اشمعنى أنتي وياج گلبي يبتدي
رحلة جديدة وليش أنتي وگلبي
يدري انتي شگد بعيدة أني دنيـا
بغير دنيا بأيده رأسـمـهـا القـدر
أنتي عالم غير عالم كله احلام وصـور
مستحيل أرجع أطاوع گلبي لالا مستحيل
شما يصحيلي المواجع مـا أحن ولا أميل
خلي يذوب يصرخ يون خلي يذوب
لابد يتعبه الحزن لابـد يتـــوب
وشـمـعـنــى أنـتــي
الليالي عودتني الگه غير الحب بديل
وگلبي لسـه مابرا من أثر جرحي القديم
شـمعنـى أنتي والوجوه هواي شمعنى
هسه تبدلت دنياي أني دنيا بغير دنيا
بأيده راسمها القدر وأنتي عالم غير عالم
گله احلام وصور وشـمـعـنـى
أنــتــي ...
لحد ماوصلنا يغني وياها حافظها وفرحان كولش ويضحك وهورنات والهوسه
واني كلبي كله يم جدي اتذكر وياه مواقف ولحظات مرت بلمح البصر وصارت من الماضي
واباوع من الجامة و شويه والمحه كاعد يم وليد بالصدر عبالك عيد صحت بعلو صوتي بجنوون وگلبي فر مني اله
جدي جدي موو
ضحك ومال اي جدج صار ساعه احجي مافتحتي حلكج من شفتي جدج طلع صووتج والله هنياله ياابه والله احسده
ضحكت واباوع لسيارة وليد الي بيها جدي مرة نسبقهم ومرة يسبقونا ...
وصلنا لبيتهم نزلت واتلفت ادور جدي ، سحبني هو وظلينا نمشي ببطى لحد باب البيت الرئيسي والمزيقة تدگ ...
اول طبتي ذبحوا طلي جوه رجلي وبعدها
طبيت مخلين طاسة مي وطاسة تمن وطاسة شكر كالو ضربيهم وضربتهم برجلي وطبيت
دخلت وحدة فاتحة القرآن واني لازم امر من جواه مريت القرأن فوگ راسي وفتت كعدني بالحولي ...
كعد شويه و طلع لخطاره اجت يمي شوكة ماخلت احد يكعد مكان فيصل غيرها حجزته الها ...
واحنه كاعدين اجت صبوحه طلت بوجهي
كالت اهووو شنو هاي شصاير من البجي اووف
انصدمت من فعلها ث سمعتهاا شوكه
كالتلها شدعوه عيوني هذا شغلج وتاخذين عليه فلوس فلك وعلي فلك اسود طر التنك جانها خراعة خضرة
( هاي العابه الي نخليها بالزرع حتى العصافير ماتاكله )
قربت كالت اني الحارس الشخصي مال الخلفوج
ضحكت عليهااا واني بنص دموعي ...
كالت يكولون مسوي عرس شكبره حتى الوزراء جايين انهجم بيتج ياجوبلس عمي اني جوبلس مطين بالسرجين
و انتي قندره روغان بكعب عالي
هي تسولف واني اضحك ... رغم وجعي الي بگليي ودموعي الي مسيلة مكياجي على خدي ...
صفن صفيه وبيبي واجن يمي يحجن على كيف
كالت بيبي مو تعاندين وتسودين وجهنا حتى لو هو يستر عليج
فتحت حلكي بتعجب انوب صفيه كملت
تكولها لاتفشلنا كدام خالاته مرتبات وهي مكضيتها سلاح بيدها
شوكه كالت صفصف تهدي خايبه دره حامله بيبي لخاطر جدي بس انتي ماتحملج لان هذا بيت رجلها انتي تحمليها
هي انصدمت خلت ايدها على صدرها
كالت صدك دره
هزيت راسي بأي وابتسم
وشوكه فاتحه حلكها وتضحك ، كرصتني وكالت لازم تلكين رجال اليه اهنا حتى نتساعد على الحيزبون الصغيره صفصوف ....
هزيت راسي مبتسمة ...
وراها اجت صبوحه ورزان يصعدوني لان راح يصبون العشا صعدت صباح كالت تفضلي لهاي الغرفه
رزان كالت الها لا بغرفته مو بهاي
كالت صباح متفاجأة متاكده مو بهاي ؟؟؟
كالتلها بأصرار اي متاكده
هيه كالت هيج وصباح انكلب وجهها واني اطرش بالزفه مادري شيقصدن وشنو الفرق بين هاي الغرفة وهايه
طلعت مفتاح وفتحت الباب طبيت بس اني ورزان
كالت هاج المفتاح سدي من جوه
صباح كالت مانطب احنه ؟
رزان كالت الها انتي شوكت طابه بيها حتى هسه تردين تدخلين ؟
كل هذا واني متفاجأة سألتها رزان ليش؟؟
كالت هاي مملكة لفيصل محد يدخلها غيره طبي حبي والعشا من يجي يصعد الكم طبيت للغرفة
بدايتها هول صغير بي تخم ابيض واسود مقفل وطبله دائريه بالنص وتلفزيون جبير وثلاجه صغيره
اكو باب فتحته طبيت على غرفه نوم كولش جبيره يمكن مساحتها وتقريبا كولها شبابيك وبلكونات وبردات تول لونها بيج فاتح
الجربايه راسها نقش راسي ابيض وذهبي واركانها دنك ذهبيه ومرتبطه بتول ومقروصات الكسرات
وبي ميز مرايا كولش عريض هم رئاسي واكو شاليز عريضه لونها بيج وذهبي وبالجهه الثانيه تخم قنفه وكرسيين بيجي ومقفله بذهبي ...يعني
الغرفه عباره عن لون ابيض وبيج وذهبي ...
واني اسحل ببدلتي وامشي تقربت من الشباك منظر مبدع بلكونه جبيره وبيها ميز وكراسي طليت اباوع من البالكون والناس شكد عازم والسفر الي منمده فدشي مبهر كم طلي ذابحين او عجول منسف كولش جبير وعليه حشوه ونص طلي هالكد ماكبار شفتهم من فوك
وناس بقوط وناس بعكل بس ميزت جدي كاعد يم فيصل ومدنك بالكاع سوده عليه مكسور خاطره تمنيت اطير واروح اكعد يمه
رجعت كعدت افكر اني وين هسه وشحيصير بيه
دنيا صيف وحر حسيت عطشانة
كمت ادور على مي ، رحت للثلاجة شربت وكعدت اسمع بس الهوسه والطلق ...
كلساع كمت فتحت القران الصغير الي اطتنياه عمه امل اقرا سوره الفتح كلساع اعيدها مرت ساعتين تقريبا بس اسمع الهوسه لااحد دك الباب عليه ولاسالوا ابد
شويه واسمع اهازيج ومهاويل بالحديقه وبعدها الهوسه الظاهر راح يزفو ...
توترت من حسيت قربت الزفة كعدت افرك باديه
دقايق وفعلا وطب مبتسم يباوع عليه
كال شونها عروستي
كتله الحمد لله
سألني شنو صوتج وينه
باوعت بوجهه ابتسامه حلوه تبعد الخوف
كتله جدي راح
ضحك كال يابه بعد شعليج بجدج صرتي مره ومسؤولة عن رجال
اني بس اهز براسي وارجف من الخوف يظل داخل المراه خوف لو شكد ماتكون قوية
لزم ايدي شافني ارجف تركني و كال ليش ترجفين شكو مو اليوم باجر ارتاحي ولاتفكرين بالموضوع المهم انتي يمي كلش كافي
اني بس ساكتة .
يحجي وهو ينزع المحابس والحلقه والساعه والعباءه يصفط بيها ويخليها على الشاليز
ظل يباوع عليه كومي بدلي واسبحي واتوضي حتى نصلي
سألته بس ملابسي وينها مااندل كولشي
كال كولشي بالحمام متحضر بس طبي
هزيت راسي وكمت امشي ببطئ ..
دخلت للحمام بكد غرفتي الي ببيت جدي بي جاكوزي جبير واكو حمام زجاجي على صفحه ورف بي شكد غسول اشكال وانواع وهاي شنو كميه الفرش الموجوده انصدمت بقيت احسب بيهن متفاجأة
واني هيج دااحسب بيهم ومنبهررة دك الباب فززني التفتت ايدي على صدري وشهكت
انفتحت ودخل قبل مااكووله كال اساعدج
كتله لاشكرا ..... خلى وطلع
نزلت البدله وسبحت وتوضيت مشطت شعري ولبست سيت النوم المعلك فقط ستان ساده والداخلي ازقيات خفيفه وهو فوك الركبه كولشي مابي ...
طلعت كال اي هسه احلى اني مااحب تخلين مكياج تعاي نصلي
وكف قبلي وصلينا بعدين لزم راسي وردد دعاء خلصنا كال جوعانه تعاي اكلي
كتله مااريد اكل ...
هو سحب ايدي وحضني وبما انو هو شاطر بهيج اشياء مااخذت اكثر من نص ساعه
ونصيحة جدي نسيتها ....
طلع رمى طلقه وحده وشفته ياشر بيده على صدره وراسه طب سد باب البلكونه
كال هسه يالله جدج ارتاح كال هيج وراح وطب للحمام هو كال هيج والله ذب عليه ادموع مابيها عدد حتى بهاي جدي نفس الام من تنتظر بتها هواي هواي الجاي تسوي تكسر كل القواعد والمقايس بحياتنا ومايهمك الناس اتخيله يلوب لحاله لحد ماطمنه بجيت بجي ماصاير
طلع كال شنو اذيتج كتله هزيت راسي
كلت شويه
اجه يمي لزمني كال اكو مسكنات
همست بعبرة كلت لا ...
كال لعد ؟؟؟
كتله علمود جدي
ضحك كال سهله كومي اسبحي يله
كومني سحبت نفسي منه ورحت اسبح
بعد ماضميت نيشاني وطبيت للحمام
سبحت ولكيت نفسه السيت مره ثانيه نفس الشي بالضبط حتى عبالي اني مالابسته كملت طلعت
شافني انتبه عليه كال جججج لاتطلعين بعد وشعرج مامنشفته
ميلت راسي وهزيته
كال تعاي نحجي حتى تضبط حياتنا ونخلي النقط على الحروف
مشيت وكعدت يمه
كال اولا شغلي اهم شي بحياتي
ثانيا طلعت تاخرت وين صرت شوكت تجي شنو صرفت شنو انطيت ماكو
تعيشين بنظام البيت هذه الغرفه محد يدخلها نهائيا
هو يحجي بس مايباوع عليه
و اني مركزه وياه واهز براسي
باوع عليه كال ممصدگ بويه انتي دره يمي هسه مو ؟؟
ضحكت وافرك بأديه
قرب حضني حضن لم كل الشتات الي بداخلي ويشم بيه
مد ايده فتح الجرار وطلع منه حبوب
وكال اخذي منها
كتله شنو هاي؟؟
رغمَ حظّي السيء وكل شيء..
رغم الصفعات القوية التي نالت منّي ، رغمَ التعب الذي تجَلّي في ساحتي ، رغمَ فُقداني لكل ما أحببت ، لازلتُ أحتفِظ بهدوئي وأرتدي ثوبَ الصبر ، وأراقب الحياة من نافذة روحي متسائلة:"ماذا ينتظرني بعد؟؟"
يتبع ...
تصميم هدولة 💕
تصميم عبد الرحمن 😍
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!