السلام عليكم
رواية طوفان رجل
الفصل 26
نورا ناصر 🌸
أنا لستُ كما تراني أبداً..لستُ ناعمة كالسلام ولا قوية كالحرب..في لحظة ما تجدُني لا شيء حتى..فارغة كجَوف يستجدي الحقيقة ..كفِكرة تتناثر كالغُبار..تحُط على سطح بحر أو كتاب لا فرق..أشعر أنني جزء من شيء ما ..لا أنتمي له..وانتهَى وانتهَيت معه..
هزيت راسي بضحكة وعيوني تتنقل على كل وجهه
وسألته شنو هاي ؟
كال حبوب مانع حمل حتى من باجر تاخذيها
كتله عاشت ايدك بس ليش اني اخذ؟ مو اكو طريقة ثانيه تمنع الحمل الزلم يسووها ؟
باوعلي متفاجئ وخلى الحبة بيدي
اخذتها من ايده واني استجمع قواي الضايعة
وكملت كلامي واني اباوعله
_لان صراحة اني اخاف على نفسي وهم اريد اطفال
كال باصرار وحزم :-واني مااريد ديري بالج
كتله اعرف انت ماتريد بس اقصد ورا ما تمر السنة
كال وهو يعلي صوته شويه حتى لو ورا عشرين سنة هم ماكو
كتله بابتسامة واني متوترة حيل
اقصد من غيرك مو منك يعني ورا مانتطلق
كام من يمي وكال وهو بقمة غضبه ياأدبسز ياطايحة الحظ على ذمتي وهيج تحچيهه بوجهي !!
ورفع ايده ويأشر بأصبعه :- ولعلمج مااعوفج للگبر افتهمتي !!!!
درت وجهي ابتسم فرحت لأن استفزيته ظلين اضحك وايدي على حلگي
عمو النظيف النازك اندك بالضبعة تربات التفكك ...
ظل شرب جكاره ويأفأف ويدردم
الله ياخذج حركتي گلبي
درت وجهي عليه واني كاعدة ع السرير وهو ورايه ومنطته ظهري
كتله اشو من نخطبنا لحد هاي الساعة بس تنطي اوامر عبالك زمال كبالك وتريد كولشي يتنفذ حسب ماتريد ولازم سمعاً وطاعة لاتريد اناقش لاتريد اعترض بابا اني مو عبده عندك ولا الي انت اشتريتني بفلوسك زواج باتفاق خليت شروطك وانفذها كلها مثل ماتريد واني مااريد منك بس الامان الامان ياامة الاسلام ....
سكتت شوية وكملت بتوسل الله يخليك الي بيه كافي وزايد خلي نعيش بسلام ورا السنة الله كريم
خليت عيني بعينه وكتله بغصة يجوز ميته قبلها وخلصانة
بس كلت هيج اشو هذا تخبل
شمر الجكارة بالطفاية واجاني حضني حييل وسحبني لحضنه حييل وايدي على جبيني ويرفع بيها شعري ليفوك
ويحچي :- اسم الله لاتكوليها ابد ابد مااتتكرر مااسمعها منج هالحجاية سمعتي ؟؟
رفع وجهي ليفووك صرت ويه بفد نظرة
واباوعله بتعجب شبي انكلب حنين بسررعة قلقني
وكمل كلامه يباوع لعيوني :- من يوجعج شي تكوليلي زيين ؟ تحسين نفسج موزينة احجي تشووفين نفسج مريضة هم كووليلي
بقيت فاتحة عيوني عليه وساكتة ، هو شبكني وظل يكول ماتعوفيني ابد مو؟؟ ماتعوفيني ابد
وظل يشم بيه ويقربني اله
ماحجيت حجاية سكتت فد نوب لأن حسيته بي مو طبيعي ...
ظل يكرر سؤاله درة ماتعوفيني موو ماتعووفيني ؟
انفرجت شفايفي گوة طلعت الحجاية مني
و كتله لامااعوفك
من سمعني گتله هيج سكت ...
اخذني وهو حاضني مددني ، وابد ماعافني حتى لو اندار مايخليني اندار بقى حاضني
حسيته غفى لأن انفاسه ثگلت ، جريت نفسي منه وانسحبت شويه شوويه
طلعت من الغرفة للملحق مالتها الي ببداية الباب يصير
كعدت واخذت التليفون الارضي خليته بحضني
ودكيت رقم بيت جدي
اريد اخابر عشكي شون انام ومااسمع صوته اشتاقيتله من هسه والله ...
بس دكيت اول دكه جاوب جدي الوو
كتله بلهفة وحزن ألو جدي
اجانيى صوته يابويه مانمت كلت لكت حضن غير حضني ونامت ...
كتله بعبرة شون انام وتغفى عيني ومااسمع صوتك
رد بعد روحي شونج زينة
جاوبته الحمد لله بخير انته شونك
يحجي بغصة :- شوني بويه البيت فرغ عليه مااشوف الناس رحتي واخذتي البيت ...
كتله سوده عليه من عمري على عمرك ارجع مااعوفك انتظرني والله ارجع
دااحجي هيج وانجر التليفون من عندي
رفعت راسي باوعت فيصل اخذه من ايدي
ويخلي السماعة على إذنه
من سمع صوت جدي حسيته تفشل شك بيه احاجي واحد غيره ... وظل يسلم عليه ورجع اليه السماعة اخذتها منه اباوعله بعدم رضا
سلمت على جدي وسديته منه
بقيت كاعدة هو واكف بصفي كال هاي انت هيج تحجين وياجدج؟؟
هزيت راسي بأي
ورافعة راسي اباوعله ... منزعجة من تصرفه ليش يشك بيه ...
كال اكول هاجرها لبيبتج شيشوف منها وانتي كلامج هيج وياه
كتله مثل ماكلت شغلي اهم شي بحياتي اني اكولك جدي خط احمر ... تصبح على خير
كمت و عفته صافن عليه رحت للسرير مددت رجليه
دخل هو كتله طفي الضوء بلا زحمة
مد ايده و طفا الاضويه و نزل البردات بس اضوية الحديقه كاسره على الغرفة
كتله وهاي ماتطفا؟؟
اجه كعد على الجرباية كال مااحب انام بالظلمة.
وتره شعرج مزعج لأن رطب اضوج منه يبلل الفراش ...
كمت على حيلي ورحت جبت خاولي وفرشته ومددت
هستوة مغمصة عيني حسيت بي اجه يمي
مدد ايده جوه اكتافي سحبني اله و شبگني ...
شويه و كال بانزعاج :- اهوو ضجت من شعرج
سحبت روحي منه ونمت على الصفحة الثانية
غمضت عيوني سمعته كال كومي نشفي زاعجني كلش ماريده انوب تجين تنامين يمي وشعرج مبلل
رفعت راسي كتله تعبانة عفية عوفني
و كمت گلبت روحي يعني رجلي يم راسه وراسي يم رجله وغطيت راسي
سمعت صوته بانزعاج كال هاي شنو ليش عود ؟
وخرت الغطه شفته عاكد حواجبه يباوعلي
كتله فدوه راح ابجي خل انام عووفني
ضحك وگلب راسه يمي كال نعيش الجنون وياج ويامحلاه ...
هزيت راسي وغمضت عيوني ...
وخلصت ليلتنا بعد صراع ومشادة و اعصاب
وين تريد توصلنا وشلون نمشي المركب مااعرف
كل شيء مجهول الي ..
حسيت على الصبح اجه من الشمس القوية الي تسربت اشعتها من الشباك
فتحت عيوني اريد اتذكر اني وين ماكو
كلت اعوذ بالله شجابني هنانه ثواني عبالك فقدت الذاكرة
شويه شوية انقلبت ومن شفته يمي استوعبت الواقع ظليت ادور على ساعة اريد اعرف شكد الوقت هسه
ظليت احوس بمكاني و فز يتمطط ويباوع
وورى ثواني كال شكو شبيج تحوسين ؟
كتله صلاه الفجر عزا العزاني فاتتني
ارتجى على عكسه وبيده اللخ لزمني من رسغي
كال بعصبية وشكو تدعين على نفسج ؟
سحبت ايدي منه و كمت اركض اسبح والم شعري لبست البرنص مااعرف المن مالتي مالته
كتله بس فهمني وين الكنتور ؟؟
ضحك كال على كيفج يابه
كتله هاي بدايتها فوتت صلاة الفجر ، اني الصلاة بعمري مااخرتها
كعد فرك وجهه وكام على حيله وظل يأشر على باب وراية
التفتت سحبني وراه
دخلني من هالباب لغرفة كلها رفوف ساعاته هواي والاربطه الوان والقوط بكل تدرجات الالوان
والدشاديش بكل الالوان والاحذية تلمع مخليها كل زوج بخانة
انتبهت على البروشات بعلب ومسفطات بشكل مرتب ومتناسق حسب الحجم والشكل ... الظاهر مهووس بالمثالية ...
اني اباوع منبهرة ع الترتيب و هو يباوع ويضحك
مابينت تعجبي بملابسه حاولت اخفي دهشتي
حتى ليكول مشايفة
التفتت عليه كتله ملابسي وين ؟
كال واشر ورا الحاجز ، لفيت انتبهت
هي غرفة وقاطعيها بحاجز خشبي
انداريت اشوف ملابسي نفس ترتيب ملابسه كولشي حسب اللون وتدرجاته
وين احنه شيش بيش نخبط ونعلك ناس فوك ناس اهنا حتى الاحذيه مقدريها يلمعن والجنط و حتى الكلابيات معلكة
انتبهت حتى تسفيط مثل المحلات يعني بالوجه تصير الياخه والدكم اني والحمد لله المهم القطعه تصير مربعه حتى التسفيط عدل وشكله مرتب وياخذ مساحة اقل
اخذت كلابيه زركه جويتي شيفون بيها تطريز فضي نازك يم الصدر وتطريزه مربعة من جوه و بيها حزام تبين الصدر يعني الحزام بالظهر يصير ووياها وشاح هم ازرك وبي فضي ...
مديت ايدي اريد اشده , بعدها عفته ورحت شفته يصلي
فرشت سجادة الصلاة وراه و صليت ....
خلصت الفرض التفتت ورايه شفته مكمل صلاة وجاي يسبح بالسبحة انتبه عليه ابتسم ابتسامة كل حب ...
هم ابتسمت اني كتله اهنا شيطانكم قوي بحيث حتى الصلاه انساها ...
ضحك كال طبعا اذا عدنا صفصف ابليس وناشرة الشياطين يمنا ...
ضحكت كتله لا لا الشيطان اني اربطه
جدي يكول الشيطان احنه نفوته بحياتنا مثل مايعجبنا والا ربنا ليش خلى الاستغفار والتعوذ والصلاه حتى يبعده احنه نخلي يتشعب ويكبر بينا ويغوينا ونتلذذ بهيج شي ونخلي حجة علينا
ظل يصغي الي طول ما اني احجي ، حسيت بوجه علامات تعجب لكلامي ..
طويت السجادة و رحت للمراية كحلت عيوني وخليت مسكاره ورشيت عطر ...
طول مااني ارتب روحي هو بيده جكاره ومبتسم يباوعلي . ...
طلع ورجع للغرفة واني اكمز هيج وهيج واصلا غرفته جبيره وتتعب
كال وين تعاي نشفي شعرج
كتله مالي خلكه ... جرني من ايدي وكعدني
وعلك الشسوار ويضحك كال بله اني وين صايره انشف شعر احد اوووف شكلج راح تتعبيني يالله تاخذين طبعي
كتله ماجابرتك انت تريد هيج شي اني مامجبوره هو شعري اني
كال اششش ولا كلمة ... ووشغل السشوار صوته عالي حتى لو احجي مراح يسمع كلامي ...
كمله نشفه كله و خر عني وراح موخر السشوار من الكهرباء وربط الواير مالته عليه
واني كمت شديت الوشاح على شعري وعفته مفتوح
كتله بس الذهب مالتي وين دزيته بيد رزان
كال تعاي وياي رحت وياه وكفت وهو فتح رمز القاصة
واني كمت طلعت علبتي
سحبها مني كال لاعوفي هذا تعاي البسي ذهب عرسج
كتله مو لبسته طقم امك بعد ماعندي غيره
كال لاشلون اني اخذتلج على ذوقي بس اذا ماعجبج كولي اغيره الج
هزيت راسي كتله بس هالمره اني مااعرف البس بذوق احد اهم شي اني عاجبني ...
ضحك وكال ااااووف يادره اوووف
ابتسمت وظليت ادور لكيت طقم عجبني
زنجيل ناعم وبي دعابل تراجي ومحبس وكلادة ...
نزل من الغرفة واني استمريت اكمز منا ومنا وارتب بروحي ، مرة ثانية فتح باب الغرفة واجه يمي ...
كال جدج جوه وجايب كيمر ...
من كالي هيج اني حتى قلبي وجعني مثل الام الصبح من تجي لعروس وتجيب ريوك اووف ياجدي حتى ترفع راسي ومايحسون مالي احد ...
دمعت عيني حتى هاي ما نساهه جدي ...
كتله منو بعد وياه ؟
ويابيبيتج ومرة حامد وبتها السمرة الضخمة ...
عرفت يقصد شووكة من البارحة لليوم اشتاقيتلها كل يوم جنت اصبح بوجههم ...
تحمست انزللهم بسرعة رحت سابقته بخطواات .. رجعني صوته ن من يگول دره
ويشدد على حروف إسمي..
رجعت يمه وكفت ورى ثواني كال يله ننزل ومد ايده يلزم ايدي انطيته ايدي ظل يفرك بااصابعي
ايده دافيه ولمسته حنينه والله محتاجه هواي اشياء وداخلي عقد نفسيه بس اني اعالج نفسي بنفسي ماانتظر من احد شي
وهالمرحلة وصلت الها من جدي وكع وانجلط كمت حتى مااشكي اله اي شي اخاف عليه يكفيني يشم الهوا كلش كافي عندي
نزلت من الدرج واني ع البايات حسيت اكو فرح بداخلي او اطمئنان بدا يسري بعروقي بصوره مفاجأة مثل الخدر شل ايدي هلكد ما انطاني فيصل جرعه قويه وهو لازم ايدي
حاجيته بقلبي بهيده بهيده يافيصل شجاي تسوي بيه انت !!!
دخلنا للصالة الكل يباوع ويبتسم والعيون على ادينا صارت عيني على جدي فدوه ياربي ميتة على شووفته
عبالك سنين ماشايفته بحكم المسافة الي صارت بيناا
تقدم باتجاهي واني عفت ايد فيصل
ورحت عليه شمرت نفسي عليه هو ظل يصيح صباحي غايبه شمسه والخير فاتني اليوم عبن انتي ماكو بي ....
كتله الخير والعافية انت و انت الي فياي من تحركني الشمس وخيرك كله يا بعد جوعي ....
ظل يشبك بيه يروح هيج وهيج ونضحك وفيصل يسلم على الباقين وشوكه هلهوله ورا هلهوله
كال فيصل شون مانسلم اليوم
ضحكت والدمع بعيني
سلموا عليه حمويني كلهم سلمت عليهم
واحد واحد ... واحمد يبوسني اختي و اختي
بعد سنين فراك رجعت عاشت ويايه
وهمه يضحكون كعدنا بعدها واني كاعده بسد جدي ولازمه لحيته من يم حنجه عادة مابطلتها
من جنت صغيرة لهسه
اتلمس وجهه والعب بلحيته هاي اسويها من يبات بره البيت واشتاقله ويرجع اسوي هيج
وهو سوده عليه يبوس ايدي لو يخلي ايده على ايدي عبالك يعرف التوتر الي بداخلي
واحنه كاعدين صاح فيصل يمه صفيه كتيلهم يحضرون الريوك ؟ احنا نتعبج بس اسبوع تحملينا بعد اجت ام البيت
ويباوع عليه ويبتسم والوجوه كلها انكلبت من بيبي وهناء وصفصف وفاتن ...
الشي المشترك بيني وبين فيصل هو صفصف وبيبي
اني عرفت شنو يقصد وجاوبته على مرامه
كتله تأمر أمر بعيوني حقك خطيه شايله المسؤولية البيت جبير عليها وهي مريضة
ضحكوا وجدي كالي عفيه بتي عفيه عينج على عمتج
گتله بعيوني ان شاءالله ... وباوعتلها هي وجهه مگلوب
دارته وگامت للمطبخ بدون تعليق ..
بعدها نصبوا الريوك وكمنه كلنا نتريك
وطول مااني كاعدة اتريك جدي وفيصل يشيلون بالاكل ويخلون كدامي
عبالك يتنافسون بيناتهم ، جدي يكول بويه
هاج اكلي من هذا وفيصل يكول هاج حبي اكلي من هذا ....
واني حبيت هذا الشي وفرحانه ماا انكر هذا الشعور اشوفه يشرب جكاره وبيده استكان الجاي بيده الثانية
وصافن عليه حتى ع الريوك هالجكارة ماتوكع من ايده. ..
رفعت عيني عليه وخليتها بعينه واحجي بقلبي
ياريت يافيصل تكون صادق وياي وتعيشني مثل ما اني اريد ...
بعدها نزلت عيني وكملت اكل ... جدي وفيصل طلعوا اثنينهم اجوهم زلم تبارك الهم. ..
اجت عمة صفية كالت يله عيني كملي اكلج بسرعة انت هم اجت اجت ناس تبارك الج
كلت الحمدلله وكمت اغسل ورا مخلصت رحت عدلت الحمرة ونزلت جوه سلمت ...
وظليت هيج نسوان رايحه ونسوان جايه وصبوحه يمي تكسرت رجليها شغلتها صارت تصعد الهدايا فوك
وشوكه واكفه لصفصف خاف تاخذ من الهداية الي جابوها ...
شافتها اخذت بطانيه وشوكه ركضت
كالت الها وين عمه وين ماخذتها حرام مو الله يشلوطج بنار جهنم ويطبب السيخ باذنج لا تبوكين ...
كالت صفصف بتوتر هااا مو هذا ابني اكو ام تبوك من ابنها شكو بيها اذا اخذت
شوكه صاحت احووو احووو ابنها خطية ابنها
ياحنينه جانت تلفه بالحضينه المنكعه حتى تخلي يتمرض وتخلص منه
فتحت عيونها عمتي كالن المسودنه معليج انت سدي حلكج
كالت شوكه موش مسودنه فرحانه موش مسودنه فرحانه وتهز ركبتها ...
بيبي كامت كرصتها وتسكت بيهاا
راحتلها عمه صفية كالت الها منيلج هذا الحجي شمدريج اني اسوي هيج بفيصل ؟
كالت شوكه بيبي كالت البارحة سمعتها اني
وخلتها تعلك بين بيبي وعمه صفية
بيبي ظلت تعض شفتها واصبعها وتكرص بشووكة وهناء تصيح ولج سكتي فشلتينه
عمه انهدت بيبي وصيحت عليه يممه انت شلج بهالحجي تحجينه كدام هاي المسودنة
بيبي كالتلها وانت تصدكينها تولي مسودنة وتعض بشفاها
كالت الها اي اصدك يمه اصدك هي منين تدري !!
وباوعتلي وقطعت جملتها
معناهه الكلام صحيح والا ليش انفعلت هيج
اخر شي اشرت بيدها مزعوجة وبيبي جانت تحلف الها
والله وداعة ذاك وهذا ما حاجية ..
صفية كالت لامها سكتي يمه سكتي سممتوني وعكرتوني واني من غير شي متسممة ..
تحجي اخر جملتها وتباوع عليه ..
!!
وانتهت العركة بغمة شوكه من الجهتين وصار الزعل بين الاثنين بين بيبي وعمتي
و خلص الصبح ببطئ شديد ...
صعدت للغرفه امدد تعبت نهار جان مزدحم
بوقتها هو جوه يم الناس ..
دك التليفون الارضي الي بالغرفة ، كمت رفعته
سمعت صوت رزان تصيحني على الغدا
كتلها لرزان مااريد راح انام من يجي احد دكي عليه
كالت تمام نوم العوافي ولا يهمج
... سديته منها ورحت نمت نعسانة كلش ، يوم وليلة متعبين
واني نايمة حسيت بأيده على رموشي يحرك بيهم
فتحت عيوني لكيته يمي
كال صحي النوم ....
باوعت للساعه صار المغرب يعني وقت صلاة ..
كتله هاا اكوم اصلي ...
كال انتظري يمعوده بعد مااماذن وبعدين خوش حجة هاي كلما اجي يمج تردين تجين
و يضحك ...
نزلت من السرير ... كتله اروح اتوضى
رجعني وكال د تعاي تعاي
رجعت كعدت يمه وهو سحبني و انتجا على الجربايه وجرني للحضنه ويخلي راسه بركبتي
كال احب ريحة جلدج ممااعرف شنو ووصفها لاتخلين عطر وممااريد ملابس نوم ومكياج كوني مثل ماانتي عفويه وطبيعية اني حبيت روحج كطفله مو كزوجة
رفعت راسي منه هو رجعه كال خلينا بس بالاحساس ....
رجعت دفنت راسي بحضنه غريب مثل الجو من الدنيا رعد وبرق ومطر قوي وجو مخيف و نايمه بفراشي الدافي ومأمنة هيج اكدر ا وصفه حضنه بالضبط
حضنه مو قوي اكدر اتحرك بس محوطني كولش ويلعب بشعري يريد يتقرب مني
سمعت الاذان عفته وكمت اصلي صلاة المغرب
بعد الصلاة ورة مخلصت ...
نزلنا بعد ماشفته ناس جايه تبارك وهو وياهم
خلصوا العشا وصعدت لليل اني اظل اسهر متعوده من كمت اخاف من عدي صار ارق ظليت سهرانه لل2تقريبا دخل واتفاجا بيه كاعدة.
ووجهه نكلب وعروك وجهه احسها بينت
كال ليش سهرانه تنظريني ؟؟
كتله لا متعوده على السهر
تقرب الي واني رجعت
خفت منه
كال لامنتظرتني ترديني انام وياج مو؟
كتله لا ابد شدتحجي انته وخخرر
دفعني على الجربايه ولزم اديه بايد وحده وانام ويايه بس بطريقه سريعه ومكروهه
ونوجعت كولش ادفع بي وارفس وخرمشته وماكو عبالك فقد ومايدري بنفسه
جان شكله مرعب كمت ابجي بطريقه هسيتريه كولش
هو ضال ساكت كبالي وبيده جكاره ويباوع عليه
اني كاعده بالكاع وطابكه رجليه ومخليه راسي بينهم وابجي
فجأة وهو ظل يصيح كافي كاافي واني مستمرة ابجي ... انقهرت على رووحي وتوجعت ..
ظل يكول كافي تعاي نامي
رفعت راسي كتله ديربالك اني ممو مثل الي تزوجهم جواري وحيونات ذالهم بفلوسك ويقبلون باسلوبك واهاناتك ديربالك
حتى لو الوكت جبرني بزواجي منك مااقبل بالذله والاهانه ولا انت ولاجدي تكدرون عليه
لو اعرف ادير على نفسي نفط واحركها
احجي واناشغ بالبجي دنك ولزم راسه
واني كمت سبحت وطلعت وهم طب ورايه وسبح
واجه ...
اجيت انام اجه تقرب الي واني دفعته
كال اسف ماادري شون هيج سويت فقدت
وهذا الموضوع ماصاير بقاموس فيصل الاعتذار مو من صفاته نهائيا مايعتذر وجاي اعتذر الج...
اني سمعته وسكتت و نمت بعدها
صبحت عيوني مورمه شفته وهو الظاهر مانايم الليل كله
بس شافني كعدت باوعلي بنظرات اسف وندم
ورجع كال اسف ساعديني حتى اتعالج اخذيني من ايدي لكاعج ولاتخليني اطلع منها ...
يتبع ..
اذا ممكن متابعة لقصة الكاتبة Dyana-lan
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!