رواية طَوفانْ رَجُلْ الفصل الثاني والعشرون 22 - بقلم نورا ناصر

السلام عليكم ورحمة الله وبركاته
رواية طوفان رجل
الفصل 18

أبعد عن شكو ابنادم
مايتأمن لباچر
 ومثل نٓجمة انعزل عن الناس
ظل بس بالسما مسافر
أعيش لروحي أحسن ما أعيش بكسرة الخاطر
 

.
.
.

حجيت بتوسل وكلي رغبة اروح الهالسفرة
فدوة جدي اقبل عفية الله يخليك خلي اروح اتونس
والله محبوسة

هز راسه  كال اخ يالعرمة لوما انتي من دون بناتنا تداومين وينج بعد محبوسة ! الله يساعد شوكة لو بنات عمج يالمتعافية

تقربت منه  خليت ايدي على اكتافه امرغهن اله واحجي :- عفية  جدي فكٖر فدوه لا ترفض نهائي اعتبره اخر طلب حبٖاب والله كلش أتمنىٰ ٰ اروح وأصلا مانتأخر هو نطلع بوقت الدوام ونرجع بوقت الي نطلع من الدوام

گال لاء يعني لاء انسي

گلت اوووف ووخرت اديه هو رجع لزمني وكال مرغي

رجعت اديه غلى على چتاف جدي ووامرغله بس ماسكتت استمرت محاولاتي المستميتة خليتها براسي هالسفرة وماجاي اگدر اتصورهم يروحون واني مو وياهم ويوم ثاني كل اثنين بسالفة واني انقهر لااا مستحيل الا اروح

بقيت بالنص ساعة الح عليه وهو يغير الموضوع يسولف بغير شي واني ارجع احجيله على موضوع الحبانية والسفرة

گال شنو مامليتي ام راس اليابس
وهز راسه گال الله يرحمك بويه سلام
الخلف مامات

اندكت الباب صاحوا صار الغدة تعالوا تغدوا .. باوعلي وأشٰر على الباب كال اجه الفرج يله كومي

سويت صوت يدل على انزعاجي وبوزت شٰفايفي
هو باوعلي محتار وطلع قبلي كال يله بويه بدلي هدومج وامشي تغدي

دكيت رجلي بالكاع وكتله انسدت نفسي بعد مااشتهي
هو طلع واني طلعت

راح قبلي للسفرة مفروشة بالصالة واني فتت من المطبخ
ورحت على غرفتي شمرت اللفگس والجنطة وكعدت ع السرير وعيني على الباب هسه يجي جدي ويگولي إي روحي موافق ولا يهون عليه ارفضلج طلب

وبقيت على أمل يجي  بس ماجه

اني متعودة عليه ميرفضلي طلب جدي اكيد يوافق مية بالمية.

وظليت انتظره وماكو الى ان غفيت جريتها نومة للعصر كعدت شفت نفسي نايمة بملابسي مال الجامعة

رحت بدلت ملابسي وطلعت جانت بطني فارغة وميتة جوع ، شفت رنا بالهول كاعدة وتوكل ابنها سريلاك وتحاجي تقنعه حتى ياكل وتقشمره حتى يضحك ويفتح حلگه الي كله سعابيل يجننن يجبر الواحد يقرب منه ويبوسه ويعضه

كعدت يمهم اخذته منه يربي كون اكله شكد احبه واحب الاطفال أني كولش

التافت عليه رنا كالت ماتغديتي اليوم مكانج فارغ

سألتها شنو الغدا

كالت باميا تفوتج كولش طيبة

باميا احبها وانوب هسه موسمها توها نازلة وبيبي من تطبخها تجننن تسويها طيبة حييل

بووست ابنها علاوي

كالت أكوم اخليلج غدا شكلج تعبانة

لزمتها من ايدها لا يمعودة هسه اكل باميه واصير زينة

ضحكت هيه  واني هم ضحكت ، اريد اكوم بس تذكرت جدي ورجعت كعدت كتلها جدي وين

كالت بالديوان هو ووليد ويمهم جماعة مدري منو

اي همزين رحت للمطبخ صبيت وكعدت اكل هم زين جدي بالديوان ماريده يشوفني دا  اكل تروح هيبة الزعل

خلصت الماعون كله همزين مخليلي اكل وزايد من الغده جانت ظلت الباميا بنفسي

كمت اخليلي ماعون ثاني ورجعت لميز الاكل اكل بشهية مفتوحة وجوعانة

واني منغمسة واكل بنهم وسمعت صوته ورايه يكول بالعافية بويه

اجيت اغص باللگمة اجيت ابجي اصلا  حرامات راحت الهيبة والله

خليت الخاشوگة على صفحة وگمت وراه اسحب بي
جدي جدي ماغيرت رأيك فدوة خليني اروح

كال انت ماتملين بويه عوفيها هاي السالفة روحه ماكو
وخلاني وطلع

رجعت اكمل ماعوني والله البامية طيبة متتفوت وجدي شافني اكل بعد عليمن اعوف الماعون

عود بعدين على العشه اكمل زعلتي وماتعشى

كملت اكل وبعدها غسلت مواعيني ونظفت المطبخ جان مهووس خطية رنا ابنها مايخليها وبيبي مابيها بس تطبخ وشوكة وهنا مدري وينهن  طلعت للهول

سمعت بيبي تباوعلي وتكول شعدها بت الروسية شوو تحوسين وغده ماتغديتي

باوعت لجدي هز راسه بمعنى لا تحچين واني هميت ماحچيت بس ابتسمت بوجهه وكعدت يمهم جدي مخلي ابن وليد بحضنه ويلعب بي وهو يضحك  ورنا ماكو ..

شفت عمو حسن دخل للبيت سلم وراح يريد يصعد فوگ

بيبي كالتله اصبلك غده

اني كلت بقلبي يااا عزااا بس لا اكلت الاكل مالته الي بالجدر

بس هو جاوبها لا يووم متغدي ويه الجماعة

ارتاح قلبي فشلة اكل غداه عمو

هو عمو صعد فوگ وبيبي باوعت لجدي وكالتله شلون ويه حسن ماتحاچي يتزوج عمره راح يعبر الثلاثين شوكت يستقر

جدي كللهه وشبي مامستقر هسه هو وضيفة وراتب والحمدلله بس غير هو يقتنع لاتلحين عليه خليه براحته ..

اني طخت عندي وهم ديحچون عن عمو حسن ، عفتهم وصعدت لغرفة عمو حسن ودكيت الباب عليه

سمعت صوته يأذنلي افوت ، جان فاتح جنطته ويطلع منها اوراق مدري شنو بيهم

باوعلي كال ها دره تعالي
ورجع باوع ع الاوراق مالته ...

سديت الباب وفتت يمه كتله بحماس وكلي امل بي
عمو فدوة الي يمك طلب حباب

كال شنوو خيرج

جاوبتها بتوسل عمو حبيبي فدوة الشعبة مالتنا راح يروحون سفرة للحبانية

باوعلي وكال اي ؟

كملت كتله واني اريد اروح وياهم عفية حباب

كال وجدج شنو يكول ؟ قابل ؟

جاوبته لا هو عمود هيج جايتك اريدك تقنعه عفية

وكالعادة رأي عمو حسن من رأي جدي
كال  ماتروحين وخلص لا تفتحين حلكجد

كتله ليش عموو حباب متعشمة بيك اني

كال انت تعرفين شنو يعني الحبانية ؟ هناك المسؤولين واولادهم كله هناك ويفترون واكو هواي حجي يطلع يكولون منو الحلوة يترصدولها وياخذوها

هو كال هيج اني حتى خوف ماخفت كتله لا عفية حباب هو هذا بس حجي ممعقولة ياخذون البنات كدام العالم شون حجي هذا ناس بس تسمع بالحجي وماتشوف بعينها

كال سدي الموضوع ويله طلعي اريد ابدل ملابسي وجاي تعبان
‏
‏ظليت  اضرب برجلي على الكاع من الضوجه  اووووف ماتخلون الواحد يتونس يشوف خلك الله
‏
‏ظل يضحك وطردني ايده على چتفيى يطلع بيه من غرفته
‏
نزلت بخيبة أمل حيل ضايجة و‏ ظليت الح وكمت مااكعد على الغدا  وسويت اضراب عن الاكل
‏
‏وداومت وكملنا محاضرات واجا احمد بيومها
‏كتله اريد اروح سفرة ويالشعبة للحبانيه وجدي مايقبل
‏
‏ كام يضحك كال همزين ماقبل جان رحت وياج بس عندي امتحان والا هي خوش فرصة
‏
‏ كمت اشاقي ماتروح ويا شعبتك لازك بكليتي
‏
‏ظل  يضحك اني اتونس من اجي هنا ضربته على جتفه
‏كتله لاتفرح والله الا اخليهم يقبلون واروح
‏
‏كال يله شوفينا بالله تأثيرج على جدج
‏كتله اني اروح يعني اروح
‏
‏ السفرة الخميس واليوم ثلاثاء رجعت للبيت ممااكل قليل حتى جدي يوافق (القدر ويريد يصير واني  ابذل  كل جهدي و طاقتي  حتى احكم  على نفسي بالهلاك )

رجعت للبيت وكالعادة زعلانة على جدي ومااقبل اكعد اكل وياهم ، هو اجاني للغرفة وكعد كبالي على الكرسي واني واكفة يم التلفزيون

كال بقلق بويه عوفيها هاي السالفة گلبي ما مطمن

كتله جدي عفية بس هالمرة مرة بالعمر بس مرة وبعد مااكول اريد ارووح والله

هز راسه وهو يريد يطلع كال لو دكت
عساكر ماتجابلهم
‏اووف بويه

كعدت على الكرسي مكان جدي انفخ اريد اروح ياناس ياعالم والله اريد اروح

اجه العشه وماتعشيت ورى ما هم تعشوا نزلت يمهم بالمطبخ

بيبي تهز بيدها وهناء تعوج حلگها ويسألن شبيها العيارة ماتاكل هالايام

هناء كالت لبيبي يمكن عاشگة وتريدلها واحد بالكلية وعمي ماموافق

كامت شوكة خنگتني ولج صدك هالحجي ؟

بعدتها عني كتلها وخري هو هذا البطران

رنا كالت لا درة متسويها مو هاي اهتماماتها مو صح درة وغمزتلي واني ابتسمت الها وانطيتها بوسه بالهوا

شوگة كالت والله يا درة اذا عرستي گبلي الا اخنگج

كتلها أنت مو تگولين اذا عرستي تخلين الناس تشوفني وتجي تخطبني

كالت اي هم صح بس والله اغار اذا تعرسين قبلي

ضحكت رنا كالت شوكة صريحة تعبر عن مشاعرها بمنتهى الصراحة

شوكة اخذت علاوي من رنا وجعصت خدوده تجعص وامها تحجي عليها وهي تكول ولك اذا مشيت ومامشيتني اجعصك جعص

هنا كلتلها رجعي لأمه وتعالي جلفي

كالت ما بعد اخذته خلي امه تجلف ، رنا تشكلت
كتلها روحي يم وليد اني اجلفهن

اني اريدهم كلهم يطلعون من المطبخ حتى اكلي لگمة لان ميتة جوع

ورا مخلصت من المواعين رحت لجدي بالديوان كعدت يمه وبعد ملحة طووويلة  وافق جدي والحمد لله

وثاني يوم من داومت رحت دفعت فلوس السفرة
وطايرة  من الفرح
‏
‏وبيوم السفرة حضرت نفسي الصبح لابسه قميص ابيض وبي نجوم ازرق واحمر وبنطرون جنز جان موديله عريض نفس موديل ( بوي فريند حاليا ) طلعت انتظر الخط وجدي واگف يمي
‏
‏ طلع  مصطفى صبح علينه وعيونه مانزلت مني
‏
‏راح لسيارته و شغل قران بصوت عالي .. 
‏
‏ومد راسه و يا شر لجدي يكوله اسمع خالي بلكي الله يقبل دعائي
‏
‏ضحكت وجدي گاله لو تصلي منا ليوم القيامة
‏
‏هو ضرب وجهه بيده واني اجتي سيارة الخط
‏ وصعدت ...

گاعدة بالٖباص وسط زملٖائي وزميلٖاتي واصواتهم عالٖية يغنون ويطبلٖون فرحانين ومنطلٖقين ...

وأني اباوع علٖيهم واصفگ والابتسامة شاگة حلٖگي والفرحة مالية اعماقي ، ممصدكة جيت وياهم ممصدكة بيناتهم اني ، ماتوقعت جدي راح يقبلٖ اجي وياهم الا بعد توسلٖ وزعلٖ ودلٖع ..

وصلٖنا لٖلٖحبانية ونزلٖنا من الٖباص يم الكورنيش الٖجو جان روعة كولش حلٖو ، نزلنا كلٖ واحد اغراضه ..

والشباب ركضوا للبحيرة وصاروا يسبحون واحنه واكفين نتفرج عليهم ونضحك ...

صديقتي رحاب كالت راح يروحون مناك لذيج الجهة خلي نروح وياهم جاوبتها بحماس يله وخليت ايدي بيدها مثل العريس والعروسة ..

طلعت وجبة قبلنا واحنا وراهم مشينا ونسينا نفسنا واحنا نمشي ونباوع ع الاماكن جانت كولش حلوة الاشجار ، الخضار ، الاطفال يلعبون بمدينة العاب الحبانية والهوا يضرب بالمي وينطي منظر كولش حلو ماينشبع منه ..

فاتت من يمنه بس عكس اتجاهنا موكب سيارات حديثة ومظللة مبينة تابعة لمسؤول حكومي كبير ..

اني باوعت ع السيارات بنظرة عميقة وركزت بكل وحدة بيهم فضولي كتلني اريد اعرف منو بهذا السرب

لان كلهم جنه نعرفهم المسؤولين لان القنوات الاثنين الي جانت تطلع ع التلفزيون كلها الهم ولاخبارهم اغلب الاوقات

بقيت اباوع والسيارات تفوت وشعري صار على وجهي بسبب الهوا .. درت وجهي وعدلت شعري ورجعته ليورى ..

بللت شفايفي وقلق دب باعضامي فجاة صار عندي نوع من الخوف والبرودة دخلت باطرافي حسيت حيصير شي..

مشينه خطوات مو بعيده ورجعت نفس السيارات هنا حسيت استنزفت طاقتي والتفكير اخذ هوايه من عقلي

همست الصديقتي امشي بسرعه امشي لازم نضيع بنص الجموع الضاهر السيارات رجعت علينه

ضحكت كالت : شيسون بينه

جريتها بسرعه واعصابي متوترة : دمشي امشي يمعوده

جنت مثل الانسان الي هارب من الموت وهو يعرف هاي ساعته و وكعة ورقته...

جنت اريد اكذب الواقع جنت اريد اشجع نفسي واطمنها ان مو اني المقصوده ولا صديقتي بس ترجع الحقيقه وتضربني بقسوة وعرفت اني المقصوده

من صاح عليه بصوته الحاد ...انتي ام الابيض انتظري لحظه

وكفت من دون ما ادير وجهي وعيوني جحضت بلحضتها الف فكرة دخلت بعقلي نظرتي وكفتي صدمتي تكسير أجزاء بروحي بعد ما سمعت صوته

باوعتله بنظرات استجداء واستعطاف بلكي يرحم حالي بس شفت عيونه متجرده من كل معاني الإنسانية

بدت اطرافي تنتفض ضدي بمجرد ما شفت عيونه ما كدرت حتى ارد او اجاوب بكلمه ضاع الكلام مني

بذاك الوقت كانت الاقاويل والاشاعات منتشرة عن اختفاء جميلات الجامعات العراقيات وهالكلام مايخفى عن كل عراقي ومينعرف زيفه من حقيقته الى هذا الوقت كل واحد يكول شكل وضايعة السالفة

بقيت واكفة بمكاني اباوع للسيارات الواكفة وللولد الي كبالي والتفت لصديقاتي ومرعوبة خايفة ياخذني وياه اني هذا هم حظي ايام واني زعلانة وحرمت روحي من الاكل وقافلة على نفسي حتى يقبل جدي واجي يا جية الكشرة ..

زيه ولبسه يدل على رهبته مسلح جان وعيونه حاده مرعبه ونظرته تخوف كال بصوت جهوري...السيد « .... » يريدج

أني كال هيج لو كلبي انخطف مني!!! صرت ارجف مثل السعفة ميتة من الخوف جان اسم ثاني رجل بالدولة العراقية بذاك الوقت ...

انسانه مثل جنح الفراشه ما عندي طاقه اقابل عملاق من الدوله اكيد حكون كسيره انتهت الحياة بلحضتها وكأن تقيدت بسلاسل من نااار المصير المحتوم

الف فكرة اجت ببالي حكون انثى راضخه واتجرد من كل قيمي وشرفي وعزتي ونفسي لو راح اتمرد والمعجزة الالهيه الها دور...

حسيته حفر قبري بيده ما عنده هدف بس يلطخ صفحات بيضه من حياتي اخطاء تحيط بيه ادفع ثمنها مستقبلي وعفتي وعفافي...

رفعت عيوني اله بنظرات راجيه ومتوسله وذليله لكن قابلني بنظرات جامده وخبيثه بهل لحظه حسيت استنزفت قدرتي على مواساة نفسي ...

مشيت واني اسرد للناس لتباوع قصة عذابي واشكي على مسامعهم اهاتي وعبرتي ادور بعيون الناس على منقذ ينقذني من قهري وحزني وانتهاء حياتي

الوضع ما يطمن واحس حتصير مصيبه لا ما اتشائم بس هذا شعوري يمكن تنتهي حياتي هنا وتكون هاي اخر مطباتي

مشيت وياه وهو اشر للبنات يبتعدون من المكان صرت بس اني وحيده حزينه على نفسي شايله روحي بيدي وامشي بيها على طريق من نار

همست بيني وبين نفسي يا رب ادركي فإن لم تدركني فمن لي غيرك امن يجيب المضطر إذا دعاك ويكشف السوء ربي اكشف عني السوء وحصني بحصنك المنيع

الطريق صار اقرب عليه من نفسي ما حسيت نفسي الا وصلت خوف ورعب وقلق بردت اطرافي وتشنجت اعصابي واحس حتى گلبي يوجعني حسبنا الله ونعم الوكيل

وصلت عند سياره سوده نزل الجام من شفته كل خليه بجسمي انقتلت والصدمة اعتلت وجهي وجوارحي واسناني وسن يضرب بسن من شدة القلق ممتوقعه بحياتي ولا بأحلامي ان اتقابل ويه هذا الشخص شايفته بالتليفزيون بس بالواقع حتى بأحلامي مجنت اصدك اشوفه

ارتسمت على شفايفه ابتسامة شايلة هواي من الأجرام والغدر والغبن ابتسامة غرست اشواكها بقلبي البريئ

كال بصوت مليان غرور صوت ما اعرف شلون اوصفه صوت مال واحد خدران وعبالك هسه كاعد من النوم كال.. لا تخافين يابه شسمج ؟

اريد صوتي يطلع ماكو ما اعرف شصار بيه من الخوف بلعت لساني حطيت ايدي على حنجرتي واني اتاتا كتله.. اسم اسمي دره

رد بغرور .. الكامل

بلعت ريكي عدة مرات وگلبي دگاته الف حسيت حنجلط جاوبته.. دره سلام عدنان

رد وهو گوه يتنفس مثل واحد كاعد من الصبح وطالعه الدنيا من عينه كال.. ااا ما شاء الله اسم على مسمى

وكمل.. من وين

جاوبته وارجف..ربيعيهة من الكوت

ظل اللاسلكي يرن مالت الحماية بس هو تجاهله والضابط اخذه يتصل ، من الخوف احسه يرن بعقلي وگلبي

كال… جامعتج ؟؟

جاوبت.. السيد القائد صدام حفظه الله ورعاه للحقوق

اجاه الضابط كله.. سيدي الرئيس القائد طالب سيادتك ضروري

اخذ اللاسلكي ومن دون ما افهم منه شي طلب من الفوج يتحركون بسرعة و هم انطلقوا

واني وكعت من الخوف على رجليه و سجدة سجدة الشكر للرب العالمين على لطفه بحالي

من بعد ما خلصني من اكبر طاغية بزمنا معروف ما يعوف فريسته الا ينتهكها وتخضع اله واليي يفتح حلگه يبتلي على عمره

شويه واجو  طلاب مرحلتي اجو عليه و بسرعة حاوطوني مهبوطين

واني ابجي شلون موقف حلو منهم رغم خوفهم على نفسهم بس خوفهم عليه اكثر

وشفت بعيونهم القلق والحزن من اخذوني وتبدلت مشاعري فرح واستبشار بعد ما عافوني

جانوا قلقين عليه كالوا روحي بسرعة ارجعي لا يجون عليج مره ثانية

مهند خطيه كال اني اوصلج درة يله امشي

باوعتله متوسلة وجلبت اني برونق الا تجي ويايه

هي خافت وترددت لان اني صارت عليه بصمة وانظار يعني صرت خطر عليهم

بس بعدها استلمت واجت ويايه ...

طول الطريق اني ارجف ، واضرب بيدي على راحة كفي اني صووجي هوو اني مال طلعة بالله مال طلعة

مو هو جدي حذرني مااخذت كلااامه ابد واني متعودة اذا مااخذت كلامه اندم

هو جدي ليش خلاني ارووح لو ممخليني اروح اولي احسن ، ازعل كم يوم وبعدين طبني طوب

الطريق لبغداد جان بالنسبة الي دمار وقلق وكل شوي اباوع من الجامة على كل السيارات الي تمشي بصف السيارة الي رجعنا بيها

خاف رجعوا عليه جماعته او لحگوني يربي شلون بيه گلبي بعد شويه ويوكف

انوب من غبائي افكر بلكي يروح يدور بالكوت مو ببغداد لان احنه اصلنه كوت بس عايشيين ببغداد

وصلنه للبيت صارت عليه المسافه اطول من الحرب العالمية نزلت بسرعه حسيت نفسي طير حر وتحرر من سجانه

دااركض للبيت سمعت صوت مهند كال صيحي جدج احجي وياه

باوعتله وهزيت راسي ، و رحت اركض فتحت الباب وصحت جدي جدي  عاد جدو من شافنه هيج دب القلق والرعب بوجهها كال .. شكو

رد عليه مهند.. الحك حجي بنتك ما لازم تظل هنا شوفلها مكان واخذها بي رجال الدوله صادوها وربك ستر عليها

جدي كال بقلق منووو منووو شافها

جاوبه مهند بأسف (....)

بعدها حلف لجدي ان محد يعرف بالموضوع جدي تخبل من سمع بالخبر

اجه عليه حضني حيل وهو يبوس بيه ويتطمن عليه ويبوس باديه وكل شويه وصفك اديه بحسافه..

بويه بنيتي جا راحت مني بويه سلام امانتك جا ضيعتها ليوم وسفه على شاربي والله

ظل يبجي ويمسح دموعه بشماغه واني ابجي وياه صاح على شوكة تجيب عبايه اليه واخذ فلوسه كلها وطلعنا وهو يردد .. اللهم لا اسالك رد القضاء أنما أسالك اللطف فينا

مشينه بالسياره وصلنه للمزرعه طلع منها الحارس واحنه دخلنه جوه

و جدي ظل يلوم عليه وهو يعض باصبعه.. مو كتلج لا ترحين ولج انه شكلت مو كلت لا ترحين هي مال ونسه وفرح انوب ابوج معدوم جا تطين راسي جان رحنه بيها الحمدلله ربي على لطفك ورحمتك لهاليتيمة جا اجتني مصيبة تكسر الظهر وتعمي لعيون

حضني وهو يبجي .. جدي بعد جدج ظلي هنا انه اجمع ملابسج واجيبلج اكل واجي وسلمان هنا راح يظل عليج

وصل للباب جاي يطلع وهو عض اصبعه بتهديد وهو يكول.. انعل ابو الكليه لابو ابوج يا كلبة يا بت السطعش كلب بسيطه انه جان لازم ابطلج من زمان واكسر ضهرج
امهات الونسات رايحة تتونس المسعدة

يتبع ...

الغلاف الجميل الي يخص احداث البارت السابق بأيد المبدعة ام عبد الرحمن 😍