السلام عليكم
رواية طوفان رجل
الفصل 19
نورا ناصر
"لا تبحثوا عن الحُب، إبحثوا عن السند، عن مَن يحنُو مودة و يَدنو رحمة، عن ساتر العُيوب بما تحملُون من ميزات، عن الأمان الذي لا يعقبهُ خوف، عن الدفء الذي لا يتبعهُ برد، إبحثوا عمّن تتخطون معهُ عتبات الحُب إلى منزلة المودة والرحمهة."
.
.
.
بعد ماصيح عليه جدي وتأفأف واستغفر وكان يلوم نفسه واعصابه كووة لازمها ، خلاني وطلع
طلع جدي واني بقيت ابلع الغصة ورى الغصة ، ياربي شسويت بنفسي
ظليت ابجي بجي مصاير واشهك واخلي اديه على راسي
حسيت بتعب فضييع وطاقة خلاصنه
شبكت رجليه وكعدت ، افكار تقتحم مخيلتي واني افكر بالموقف افكر بنظراته الي يربي اذا كمشني شراح يسووي بيه
اكيد ماراح تعدي سلامات عليه ، معقولة يلگاني ياربي خلصني خلصني ماعندي غيرك
اي والله ماعندي غير ربي ، مسحت دموعي ورحت توضيت ماكو غير رب العالمين يرحم بحالي ويبعدهم عني
ظليت اصلي واردد ( ربي مسني الضر وانت ارحم الراحمين)
وظليت على الصلاة والتسبيح وعيوني مااوكفن احسهن راح يطلعن من مكانهم على كد مايحرگني ويأذني
انوب مو بس خفت على نفسي لا الخوف على عائلتي كتلني كتل
يمه بالي يم جدي بشنو ورطتك يابعد روحيي
خاف ياخذون جدي اذا ماسلمني الهم واصير سبب
لزمت حلكي اريد اضرب روحي اريد اوكف عقلي اريد افقد ذاكرتي بس اريد اتوقف عن الفكير بهاي الافكار
ماكدر كلما احاول بس انسى تجيني افكار ثانية ، انوب خفت على جدي اكثر من نفسي
سجدت وظليت ادعي ربي فكني من شرهم ، ربي فكني منهم خلصني واحفظلي جدي وعائلتي ياربي
صارت دنيا مغرب انفتحت الباب اني ويه فتحتها اني روحي صعدت للسماء ونزلت ، كلت اجوي عليه ، لگوني وراح ياخذوني
طلع عمو حسن خطيه جايني ارتاحيت شويه بس من الخوف رجليه ماتعيني اكوم
وهو خطيه وجهه اصفر ومخطوف وخايف
بس شفته شهكت عبالك رجعت الروح بيه
اجه يمي حضني ويبوس براسي
كال ان شاء الله سلامات شكلنه ها دره
مسحت دموعي وبنبرة كلها بجي
جاوبته فدوة عمو لا تلومني والله البيه كافي وزايد
هو جر نفس كال لتخافين هذا هو عدت سلامات ان شاءالله الله لطف بحالج
ظليت شابكته خطيه يكول طلعتي من ايدهم بعد مايلكوج هسه نشوف شلون الحجي راح لفيصل يشوف حل الله كريم
كتله واني امسح دموعي واباوع بوجهه يعني هذا هو بعد مايجوني ؟ الله خلصني منهم
كال اي ان شاء الله حلهه يم فيصل
كومي هاي ملابس واكل الج جبتلج وياي
كتله كولشي مااريد اكل
كال لازم تاكلين متبقين هيج
هزيت راسي وكتله بس اريد اغير ملابسي
اخذت دشداشة واديه ترجف بعدهه ، كووه كمت من مكاني
رحت بدلت ملابسي وطلعت كعدت بقيت صافنة وحاضنة روحي وافكار مثل الروج مال البحر تاخذني وتوديني
الساعة تعدي عليه سنة ، حسبي الله ونعم الوكيل هم يجي يوم ونخلص من حكمهم شويه ونتنفس
مستحيل يجي هذا اليوم ...
شبعنا حروب وويلات وحصار واعدامات وابويه راح ضحية واحد منهم
واني على هذا الحال سمعت صوت سيارة كمت على حيلي ، بكل قوتي عبالك رجعتلي طاقتي الخلصانة عبالك الخوف رجع الحيل الي بيه
ضرب ضوه السيارة على الشباك
ظليت الطم على خدودي واباوع لعمو حسن واصيح
عموو اجوي حياخذووني عمووو عمووو ضمني احميني فدوة عموو لا تسلمني الهم اخاااف والله اخاااف
اجه يمي لزمني من زنودي باثنين اديه وعاط بووجهي يصحيني من انهياري وصدمتي
كال بنتر اهدييي شبيج ولج الخوف راح يمووتتج اهدي دره اهدي بابا هذا جدج وفيصل شجااج
من كال جدي وعمو فيصل اني تذكرتهم وهدأت .. خليت راسي على صدره وارجف هو مسح على شعري
لمساته هدأتني ، وخلاني اكعد بهدوء على على التخم
وكرفص كدامي ، كال تنفسي بويه تنفسي
اني اجر نفس وارجف ، لزم اديه عصرهم قووي
يريدني اسيطر على رجفتي
دقايق و طب جدي ووياه عمو فيصل يرعد ويتوعد
اجا يمي وعمو حسن گام
هو ميل روحه و لزمني من عكسي وقربني اله
حجه بنبرة غضب ثايرة بت النعال احنه كوه امشين الدنيا وانت سفرات انوب صخمه ماتردين بعد ترحين للملهى حتى مايضل بنفسج شي ؟؟؟
باوعتله بصدمة واتسعت شفايفي
وهو كمل كلام وكلما اله يزيد من قوة ايده على عكسي لدرجة تأذيت حييل
كال بعصبية طلعت عينج زايد عن اللزوم وهو وعاض على شفته وعاكد حواجبه
كمل كال انتي دواج بيت وعجن وخبز ودك على فركج
ظليت اباوع لا اكدر احجي ولا حتى اكدر اتنفس
وحقهم بكولشي يكولوا
تسللت ايدي من قبضته تلقائيا وكعدت على القنفة
ظليت بس ابجي مابيدي شي ...
وهو صياحه وصل للظالين وعمو حسن وجدو يهدأون بيه
وگوه هدأ ، جدي سوده عليه وجهه اسود واحسه ياكل بروحه اكل ، اباوعله بقهر وبداخلي اكله سامحني جدي
ورا ماهدا فيصل جدي سأله لعمو فيصل
كاله فيصل بشرني انت شسويت من رحت ؟ يعني هذا هو اكدر اريح گلبي عليها
جاوبه عمو فيصل وهو يلتقط انفاسه بعد عصبيته المفرطة
حجي شسوويت يعني شسوويت !! كل الي كدرت اسوي اني تلفت كل شي متعلق بيها بالكلية ، يعني هسه بس اكو درجات الها اذا يدورون ماكو لااسمها ولا عنوانها وادعي الله مايصير غير شي
جدي رفع راسه للسما وظل يستغفر بصوت عالي نبرته بعد شويه ويبجي اخخخ يجدي شسوويت بيك اني شسوويت سوودة مصخمة بووجهي يااربي مااتحمل اشووفه يتألم گدامي ..
بعدها باوعلي فيصل وبعده عيونه حمرة من الغضب
وكال منا وجاي تنسى شي اسمه الكلية وتكعد وتسكت بالبيت وطلعة ماكو
وهسه رجعها للبيت حتى لحد يحس بشي وتحضر نفسها للخطبه وللعرس ....
اني هنا بعد ماجنت بالعة لساني وساكتة وبس استمع من كال خطبة وعرس كسرت كل قيود الصمت وطلعت لساني
وكلت شنو ياخطبة ياعرس عليمن ؟
رفع تك حاجب وملامحه كلها غاضبة
وكال عليه
كمت على حيلي كتله نعم شنو عليك تحجي صدك لو جاي تضحكون عليه؟؟
كلهم سكتوا ، عمو حسن دار وجهه مبين معترض بس مابيده حيله جدي توكأ على عوچيته اكثر وكانه الحمل الي عليه مايكدر بعد يتحمله
باوعت لجدي بنظرات متوسلة
كتله احجي جدي ليش ساكت؟
جدي انطاني ظهره ومتوجي على عوجيته شالهه ورجعها على الارض تنفس وكال بنبرة أمر وإصرار فيصل كبع واخذ
اني تخبلت تهسترت مابقى عقل براسي
مستحيييل ولمنوو فيصل !! عميي فيصل ؟؟
رحت يمه لزمته من ايده كتله بصدمة جدي شجاي تكول ؟ جدي لا تسووي هيج بيه
التاف عليه و كال هذا احسن حل نستر على رواحنا ونسكت لمصلحتج بويه
تركت جدي يائسة مستسلمة متيقنة ماله موقف غير هذا الموقف
وباوعت لعمو فيصل كتله انت .. قطعت كلامي بتنهيدة
وكلت بأصرار وعيوني بعيونه وشددت على كلمة
((عمو)) انت شون تفكر بيه؟
كال وهو يرفع اكتافه ووياهه تك حاجبه
ليش لازم ماعاجبج ؟؟
هزيت راسي تعبانة تعبانة حييل كوة اتنفس
كتله لا اني ماافكر بالزواج الله يخليكم البيه كافي مستقبلي ضاع وتعبي راح
وجهت كلام لعمو حسن الي واكف ومنتجي على الحايط
استنجد بي بنبرة صوتي ونظراتي عموو احجيلك كلمة
يريد يحجي عمو حسن
قاطعه فيصل كال لا تفكرين غير بشي واحد وهو مستقبلج ويايه اني وبس
كتله بثوورة عاارمة يامستقبل انت ماتفرق عن عدي بس انت بطريقة دينيه وغطاء شرعي تقنع نفسك بيها
وهو طريقته بالغصب انتوا وجهين لعملة وحدة
تقرب مني مد ايده رفعها و ضربني راشدي على خدي
فر وجههي فر ...
شهكت وعطت و كبل اجووي عمو حسن وجدي
لزموه وبعدوه عني
كاموا يحجون عليه جدي صاير مقابيله وعمو حسن لا لازمه من عكسه ويسحب بي
جدي يصيح بوجهه ايدك فيصل ايدك عنها مامرخوص تمد ايدك عليها
هم همين انصدموا من ردة فعله
هو بعدهم عنه وتوجه عليه وعاط بووجهي
كال مااكو اي وجه مقاارنة لا تفتين بكيفج وتشبهين
صحت واني لازمة صفحة خدي الي ضربني عليها
وكتله بنبرة مخنوكة لازم دست على الوتر الحساس وشككت بطريقة زواجاتك
صااح بتهديد ونبرة مرعبة وهو ضاغط على اسنانه دررررره
جاوبته بصيااح والله احرك روحي واخلص سمعت احررك روووحي
وخليت عيني بعيونه بتحدي وعناد وحقد
عاط نزلي عينج لللللج
ادبسز لحد هسه محد وكفت بوجههي ....ديري بالج انت ...
اجاني عمو حسن دار وجهي عنه وخله ايده على وجهي يسكت بيه
جدي صاح بينا احنا بيا حال وانتو تتعاركوون امشوا للبيت وانتي دره الي يسألج كليلهم مثل ما انه كتلهم
امها جايه من روسيا ورادت تشوفها بالفندق سمعتي ؟؟؟ عبالي تطول المده ياله ترجعين
مسحت دموعي وكتله تمام
باوعت لفيصل جانت نظراته عليه قووية
شحيت نظراتي منه بتحدي ..
جدي اشرلي كال يله دره لبسي العباه وامشي
رحت يمه جدي خايفة
مسح على راسي لاتخافين بوويه الله موجود انت بس سمعي الحجي
جدي فدوة
اريد اكمل كلامي عرف هو شنو اريد احجي سكتني وباوع لفيصل
كال جيبي عباتج يله
رحت جبتها امشي بخطوات ثگيلة خمشتها من على القنفة وخليتها على راسي واخذت علاكة ملابسي
التافيت اجت عيني بعين فيصل
صعدت العباية على راسي وخنزرت عيوني ودنكت
هو بس ينفخ وسمعت صوت الشخطة مالة الجداحة
واجتني ريحة دخان الجكاير ..
طلعت ورا جدي وهو ورانا وعمو حسن قبلنا
سمعته سحب الباب حييل وركعه عود يسده
التفتت لاارادي وقبل لا تطخ عيني بعينه درت وجهي والعباه توكع واصعدها مرة ثانية واسحل بيها برجليه
صعدت بالسيارة مالته كعدت ليوره يم عمو حسن
وهو وجدي كدام
رجعنا للبيت وطول الطريق عمو يحرك بالجكاير ووصلنا ونزلنا وجلب بي جدي ينزل وهو رفض
نزلوا والتفت رجعت اخذ علاكة ملابسي من ورة نسيتها
جان يندار عليه
يكولي هذا السانج الا اكصه بسيطة
جان كاعد ولازم الستيرن والدنيا ظلمة بس ضوه البيت يعكس عليه ويخترق داخل السيارة
باوعت عليه اخذت العلاكة جريتها بعصبية ونزلت
رحت يم يم جدي
كالي جدي شنو كلج فيصل
كتله يكول السانج الا اكصه
جدي ضحك جا اليوم حجايتج ذبحته من الوريد للوريد صدك والله عرمه وكويه خايبه بس هو يكدر يحميج
كتله مااريده ماريده هو بشنو يختلف عن ذاك ؟ يعني هو الي جاي يسووي حلال ؟ وذاك حرام ؟ اثنينهم يجرون ورا شهواتهم
كال بوويه ولا تكعدين
انوب صفكني راشدي شنوو هو اني مالة الخلفووه ويضربني شكد كرهته
كال فوتي فووتي ... ونزعي العباه وبدربج للغرفة
نزعت العبايه وركض للغرفة وباعت بالمرايه شلون خدي صاير ازرك من اثر الضربة انشلت ايدك كون شون فرفرني
طلعت اغسل بالحمام ورجعت دااروح لغرفتي
لزموني بالصالة ويسألون
البيت كله يسال على امي الروسيه واني بيا حال وشوكه تغمز شونها امج ولج غير ابوي ذبح روحه ليش ماجبتوها اهنا
كتلها بدون نفس ماتقبل توسلت بيها ومارضت
انوب اجا عمو حامد ويمسح بكرعته كال دره حبيبتي ليش ماجبتي امج هنا
ظليت صافنه هم يضحك وهم يبجي
كتله ماقبلت عمو
كال ليش يابه حبيبتي اني وياج نروح نجيبها هنا
كال جدي اظنك خال ابالك شي
شوكه كالت هي امج مسودنه؟
كتلها لا ليش
كالت خوش عبالي ترضى بجامبو الجبار
شويه وراحت شوكه كالت لعمه هناء ابويه راح يتزوج ام دره
وكبت بينهم للظالين الصياح والضرب وتكله اكيد جنت يمها العصر وهو يكلها بالعباس تكتل كتل كون دره تقنعها واني وجدي مدري نضحك مدري نبجي
كمت طبيت للغرفة واجتني شوكة ووراي
كالت بحماس اكولج انتي مو عندج اخت واخ روسيين
كتلها اي وتنهدت
كالت ياثوله زوجيني لاخوج شبيج قحط هو اخوج روسي اكيد يشبهكم
كتلها صغير اصغر مني بسبع سنين
كالت واذا صغير اربي على ايدي واني بت عمج اولى من الغريب
كتلها شوكه هو طلي؟؟
هجمت عليه وحصرتني على الحايط كالت باعي غصبن عليج تزوجيني اخوج لا اغتالج
كتلها هاي هي تمام الي تريدي يصير الصبح الله كريم
شويه وليد دك الباب كتله ادخل
فات كال شنو هذا الخبر
كتله الحمد لله
كال بشك شعجب امج بعد هاي المده كلها هسه اتذكرتج؟؟
نطت شوكه وكالت نصيبي هذا
هو باوعلها بتعجب ورجع باوع بعيوني يتفحصهن
كال وهلكد باجيه لدرجة عيونج حمر ؟
ماحجيت اكتفيت بس هزيت راسي ، اريدهم بس يطلعون راسي يوجعني وعيوني مورمة من البجي
بعدين جدي سوده عليه اجا لغرفتي وطلعهم كالهم باجر اسالوها خاويه من البجي
طلعوا وطب باس راسي وكالي تعاي نامي يمي بالديوان اليوم جا رحتي مني
رجع وليد فزينا اثنينا والظاهر سمع جدي من حجه
جان يكول شنو جانت ناويه تعوفنا وتروح لامها؟
هز راسه جدي بمعنى أي انوب تورطنا بهالكذبة هاي !!
وليد صفن وبينت الصدمة على ملامحه
كال بحزن صدك دره تعوفينا شون يصير ؟؟
اني العبرة خنگتني و بس اهز راسي اصلا هلكانة طاقتي خلصت حرف مااكدر انطق بيه صرريخ كوون اصررخ مااهرف شوون اعبر عن حالتي اليوم مناوي يخلص تمنيت اهيم بجزيرة لوحدي لالا اني وجدي
شوكه اجت وراه كالن شعليك انت لاتخاف اني اروح يمها واخليها بعيني راح اصير حماتها انت لاتفكر
جدي يضحك كال وليد زين سويتي ومارحتي وياها واذكرتي كلامي ماصرتي الي ماتصيرين الغيري مو دره خليتي على بالج هالكلام صح
كال هيج ورافع تك حاجبه متساءل
واني تهسترت عبالك اطلع القهر الي بقلبي كولشي جاي يصير فوق طاقتي وبصوت عالي صحت بي باوع ليكون صار مرتين اسكت منك وكل مره اتعس من الثانيه ورحمت بيك وكعة جدي الله بسما وليد هالمره ماتسلم مني سمعت اني حدي ويالبشر تعرفني تلث غلطات الرابعه عليه وعلى اعدائي
فتح عيوونه مصدووم تقرب مني و رفع ايده يريد يضربني
وجدي بسرعة وكف بيناتنا و ضربه هو انصدم لان اول مره جدي يسويها
لزم وجهه وكاله اني ناهي عليها وهي تبقى هنا مثل البيت الوقف لاينباع ولاينشره
واني سمعت هيج وشكو عصبية بيه طلعتها بي
خليت و هديت عليه شنو ليكون صدكت نفسك رجال عليه وربك ادير على البيت بانزين واحركك انت واهلك
شوكة من كل عقلها صاحت اني مرة اخوج شعليه احركيهم همه وهم اساعدج شمحصله منهم بس اكرب ليل ونهار
دار وجهه مفزوع يباوع لجدي يكووله سمعت جدي سمعتها شتكوول خليني اربيها الظاهر انت ماعرفت تربي زين سلمني المسؤوولية هايه
جدي ظل يصيح بي اطلع لابارك الله بيك كدرتك على اليتيمة ولك هاي بعدني عايش وهيج تحجي اطلع اطلع لا اجيب التفكة هسه افرغها براسك
وعلى صياحنا البيت كعد واجه عمو حامد وافتهم على السالفة اجه يمي يصيح ولك ووليد لاتضوج دريه ( عود يدلعني بالمصري )
رفعت اصبعي بتهديد بوجهه كتله وليد لاتختبر صبري حدي لهنا واشر على خشمي
جان يكول العندي كلته وحالج واكف طلعة من البيت ماكو بس للمقبرة
صحت لعد اسمع ربانا والخوه ماغزرت بيك ورس اهلك طلع لعد انتظر الجاي وليد انتظر...
رجع عليه كال تهددين صاايرة ولج موو اطلع من طوري وصدك اربيج واكسر راسج واكص لسانج
كتله اي اهدد وانت تعرف كولش زين اني كد هالكلام ولك اني طول عمري ساندتك طول عمري مااخليك وحدك وياك وياك مايوم صرت عليك
شنو وشنو انسى وشنو اذكر ولك ووليددد
جنت احجي بعصبية وحركة گلب و اشر باصبعي على روحي
كملت كلامي بغضب ودموع صدمتي بيك كسرت ظهري ولك عضدك قوه بيه اذكر زين لاتضيعها كولش وليد لا تخلي ايدي والكاع منك ماريد اضيع البقى بينا اني الضبعه تذكر لو لا؟؟
(الضبعة لقب هذا كاله جدي عليه ، من جنت كله وياهم اطلع مرة جنا طالعين بالبر بوقتها اني بالاول متوسط
جدي معزوم على صيد وولد عمنا ويانا وكلها تنيشن وتصيد الا وليد يضرب بوش....
وجانوا يضحكون عليه واني جنت اصيد همه يضحكون عليه يكلوله دره احسن منك توكع وتصيد
اني تدخلت هنا و كتلهم لا اصلا هو ينيشن ويصيد بمكاني حتى لاتضحكون عليه
كالوا يله لعد خلي نشووف بالله شوفينا
ووكفنا كلنا واني يمه تقربت منه وهمست اله كتله راح اوكع وكول اني وكعت
هو ابتسم وفعلا وكعت وكتلهم هااا لخاطري يوكع ويكول اني
ضحكوا اكو الي صدك واكو لا ، جدي كبل كال دره ضبعة ومانغلبت بيوم )
من ذكرته قصدي قوته مو عليه ذني طلعهم على غيري ...
جدي تدخله قليل وخاصة من اتعارك وي وليد
جان يكول علمود اخليلج قيمة بين الناس وتعرفين تحجين وماتخافين
وهم المقابل يعرف انت قووية من حالج بدون تدخل مني ومامتقوية بيه
لون انا اظل ادافعلج هسه من اموت شلون!!!
وليد صفط ايده على الحايط بقووة ولج شنوو انت عبالك موو انت درره رجعي مثل الاول وصيري ادمية
كتله انت اصحى وانسى عندك مرة وطفل التهي بيهم واتركني لحال سبيلي لا تخليني اخليك براسي وغرفتي هاي بعد ماتعتبها ااافتهمت وهسه اطلع برا وجهك مااشوفه بعد
هو ضرب الباب حيييل وكال تهديد يصيير خيررر وكانه اني ناقصني بس وليد ...
من طلع تهسترت وكعدت ابجي وجدي يردد لاحول ولا قوة الا بالله
شوكة كالت لاتبجين دره هسه نروح اني وياج لروسيا انت ترحين لامج واني اتزوج اخوج ونرتاح منهم
تقرب عمو حامد وباس راسي كال دريه لاتبجين هسه اطيح حظه الج بس انت بالاول كليلي شوكت نروح لامج باجر مو ؟؟
باوعت عليه ودموعي على خدي جدي ضحك
واني هم شاركت جدي الضحك
واثنينا سكرنا من الضحك وهمه مصدومين من ردة فعلنا ... فعلا شر البلية مايضحك
وانتهى يومنا بضحكة استمرت نص ساعة بعد ماجان يوم مشؤووم وعصيب
وورا مالحوا تعبوا وراحوا ناموا شوكة وابوها ...
وانغمست اني ببحر افكاري اباوع لجدي عيوني كلها حجي كتله جدي يعني شنوو صدك عود انت راح تنطيني لعمي فيصل ؟؟
يتبع ...
بايادي الجميلة ام عبد الرحمن اكيد 😍
تصويت 💥🌟
متابعة لحساب Asoo_hadi حسابها ذاك انغلق
ومتابعة لرواية وئام فتحت كتاب جديد حتى تكمل الرواية بي Wyaam1990
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!