رواية تراتيل الاسد العاشق اماسي الليل الفصل الحادي عشر 11 - بقلم مريم اماسي الليل

الجزء الاخير ( قصة قصيره )
اماسي الليل حقوق النشر محفوظه
بيوم الحنه
حواء: كعدت كالعاده الصبح ويا البنات حتى انسوي الريوك
خاله سهام ما قبلت اشتغل وياهم ... گلتلي انت روحي گعدي أسد
دخلت للغرفه ... ما لگيته ... معناها گعد ... وراح للهول ...
بداخلي احجي ويا نفسي ...
باجر هالغرفه اتصير غرفتي ...مملكتي الي تجمعني ويا حبيبي
تمددت بالمكان الي هو ينام عليه وخليت راسي على مخدته ...
سرحانه ما حسيت بصفنتي ولا صارلي شكد
الا من فتح باب الغرفه ... مبين سابح ... ولابس دشداشه بيضه
من الفزه عبالي احد غيره ... طفرت من مكاني
شفته غمضت عيني وخليت ايدي على صدري احس قلبي راح يطلع من مكانه
اوه اسد فززتني عبالي غيرك ....
أسد: صباح الخير ...ههههه ليش فزيتي غرفتج وفراشج...
وحلالج وياج ( اني)
حواء: شفته إجى باتجاه الفراش ... كمزت من الطرف الثاني ووگفت
يله امشي نتريك اجيت اكعدك ... خليني اروح اساعد البنات
أسد: يله .... تعالي اطلعي ...
حواء: ادري من ابتسامتك ...ناوي على شي ...
وخر ... حتى امر اطلع
أسد: ههههه الاسد يريد ينقض على غزالته .... بنتر تعالي هنا
شعندج بالغرفه
حواء: فزيت من العيطه وعكدت الحاجب ...
رحت يمه ... اجيت اكعدك ... جرني لحضنه
أسد: شعندج بالغرفه ويا أسد ... مشتاق لغزالته الي تصبح وتمسي كدام عينه بس بعيده عنه ينتظرها تدخل للعرين وينقض عليها
حواء: ابتسمت ... يعني الغزاله اليوم اجتي برجلها ... للعرين
والاسد...جان ناوي يصيدها ...
أسد: والله بقيت انتظرج تجين تكعديني شفتج تأخرتي ...عاد گمت صحصحت ... ما بقى يومين وأصبح عليج وانت بصفي .
تحتاجين شي ... لان اني من ورا الغدا اطلع ما اجي للبيت الا تالي الليل ....
حواء: لا سلامتك قلبي ... مكمله كل اموري ..

وتالي نسيت اهم شغله ... الذهب بقيته بقاصة أسد الي بالكنتور ... ما فطنت عليها الا من
كملتلي نور مكياج ولفتلي شعري ... من اجيت ابدل ... اتذكرت
الذهب واسد طالع
دكيت عليه ... الو
أسد: الو اثگلي ... يا عروس ادري بيج مشتاقتلي ..بس انتظري ارجع بلليل ونشاوف
حواء: ههههه شكد مغرور .... أسودي فدوه انت وين ...
اسد: طالع بشغله .... ليش
حواء: نسيت الذهب بالخزنه وانت هم نسيت ما طلعتلياه
أسد: اف ... حواء غير تذكري ... هسه شيرجعني ... يله ماشي ادزلج المفتاح بيد ضرغام ... هسه اتصل عليه اخلي يجي ياخذ المفتاح ...
حوا: مو تنسى قلبي ...
ورا دقايق ... اتصل سالني احد يدري بسالفة الذهب
جاوبته لا ليش
أسد: لعد لا تحجين لاحد ... وصيري نبهه حبيبتي لا تنطين لزمه على نفسج ... ادري بالج مشتت بس الغير يعتبروها فهاوه ... تنحسب عليج
حواء: هسه شنو راح ادزلي المفتاح ... بيد ضرغام
أسد: لا ما ادزه .. حتى تتعلمين مره لخ متنسين شي ....
بس يله ادري بيج دايخه بيه .... انتِ وين
حواء: لعد شلون .... اني بغرفة البنات
أسد: دنتظريني دقايق .... هسه اجي ... بحجة نسيت شغله
راح إطلعة واخلي بالكنتور ... عود بعدين فوتي اخذي ...
حواء: حرام احس راح نسوي سطو على قاصتك ههههه
أسد: مو هاي مشكلتج مو مثلي متحسبين حساب لاي شي
لذلك محد يكدر ينتقدني ... وانت اول الناس ما كدرتي تلزمين عليه غلطه وحكمتي عليه بالغرور لكن هي ثقه بالنفس ... موغرور
واريدج تصيرين مثلي ... لان العين راح تكون عليج ... لان انت تابعه الي ... اذاتغلطين او تصرفين تصرف غلط ... ينحسب عليه
حواء: حبيبي انت نبهني ...وعلمني ..يله انتظرك ...
أسد: وصلت ... للبيت
حواء: دقايق واندگت باب الغرفه .... فتحتها ... گلي تعالي ورايه
حواء: دخلت ورا للغرفه ..صاحني اجي اوگف بصفه ... طلع
الحزام الذهب لبسنياه لزم وجهي بوسني من جبيني
أسد: يا فرستي صرتي رفعت راسي ...كل كلمه وتصرف يطلع منج خليني كدام عينج ... من اليوم انت كدام الكرايب مرت الشيخ
حواء: ان شاء الله بس انت ابقى بظهري علمني ...
أسد: ان شاء الله .... يله اني اروح ...
حواء: من هاليوم ... انتبهت كل العيون عليه .... حسيت خلال الحفله ... نظرات التفحص والترقب من كرايبهم ....
بالاول ما فهمت ... لكن بعد كم يوم من زواجنا طلبت من خاله سهام تعلمني على اطباعه والامور الي يحبها وخلال الكلام
فهمت من خاله سهام ...
سهام : مرته الاولى ... جانت وهي على ذمته طبيعتهااطلع أسرارهم ومشاكلهم ... تحجيها كدام الكرايب ...
ومطلعة نفسها مظلومه ويا ...
وانت هسه .... بالنسبه الهم الي راح اثبتين كلامها صحيح لو كذب على أسد .... من خلال علاقتكم انت وياه ... لذلك تكولين هو نبهني ... من الكرايب وگلج لاتنطيهم مجال ... دائما خليهم يهابوج ... ما يريد تصير ميانه ويجرأون يسألوج على امور تخص حياتكم انت وهو ... فهمتي
حواء: اي فهمت ... اتذكرت كلامه بليلة العرس من اكد عليه ...
غرفتنا مثل البيت لازم نحافظ على خصوصيته وأسراره ....
سهام : خاله ترى اسد ...خوش رجال ... بس للمره الي تفهمه وأطيعه وتحافظ عليه وعلى مكانته بين اهله وناسه ...
حواء: بين كلام خاله سهام كلتلي هو حبج واخذج ولا هو جان قافل عن الزواج وجان مخلي باله اذا راد يتزوج بيوم ياخذ شروق اخت فاتن لان يشوف اختها حبابه ومريحه مصطفى
بلحظتها دخل بقلبي شي اسمه غيره ... من شروق لان اتذكرت
مره سمعت نورس تحجي ويا براء اول ما اتعرفت بيهم وجنت اجي اساعدهم ( گلتلها طلع اخوج يحبها همزين ما اخذها واخو رايدها )... عرفت اسد المقصود جان مخليها باله معناها جانت عاجبته وهي صدك حلوه
يعني جان يحبها ولان اخو رايدها ماكو غير ضرغام رايدها واسد عرف ومكدر يتزوجها اتزوجني .... معقوله اسد محبني مجرد ... رادني
هالفكره خلتني ... أستشيط غضب ... بيومها رجع بليل ويا الولد ... دخل سلم ... وراح للغرفه واني مثل ما علمني اروح ورا ...
دخلنا للغرفه ... بدل ملابسه ... وعلگتها ...
أسد: بيج شي
حواء: لا مابيه ... بس تعبانه .... حاولت اخفي عنه الموضوع
لكن ورا فتره اجتي شروق وامها يمنا العصر ... البنيه حبابه بس مجرد اتذكر رجلي ممكن حبها بيوم انجن ..
بداخلي انتظرهم يروحون حتى ميشوفها ... وكأنه احد قرا افكاري
جلبوا بيها تبات يمنا ... واني بداخلي اغلي ... دخلت للغرفه ...قلبي يدك بسرعة بعد شويه يجي وهي بقت ... هسه يشوفها ويستذكر حبه ...
(بهالفتره جنت ببداية اشهر حملي ... بيوم الي سمع الخبر طار
ومن يومها صار لين ويايه ... بالغرفه ويايه شخص ثاني يضحك ويداهر ...ياخذني على كد عقلي
لكن برا الغرفه حدي .. حتى الابتسامه ما تطلع اذا مو بوقتها )

ما ادري بي من وصل الا من فتح باب الغرفه ... ودخل هلو شلونك
أسد: الحمد لله شو كاعده وحدج مو ويا البنات
حواء: ليش منو بالهول من البنات ...
أسد: كلهم ملتمين ... ويا منو اجتي شروق
حواء: تنهدت حسيت وغزني بدنبوس من جاب اسمها ...
جاوبته مرت عمك ... والبنات جلبوا بيها ... وانت ليش تسأل وفرحان ... بدل ملابسه
أسد: على شنو فرحان سألت عبالي عمي هم مار
يله امشي خلي نطلع نكعد يمهم
حواء: روح انت اني تعبانه ... ظهري يوجعني ... خزرني
أسد: شكو شبيج شو وضعج مو تمام
حواء: مابيه شي ... تعبانه و اريد اتمدد
تقدم بأتجاهي
أسد: وتالي وياج ... احجي صاير شي ...
حواء: لا مصاير يعني الي يسمعك يگول هاي مرته يوميه مسويه مشكله ويا احد من البيت .... ابتسم وتقدم بتجاهي
أسد: كدامي ...
حواء: من عاندت صار قريب عليه ... لزم ايدي جتفها ورا مبتسم
أسد: اي يا فرستي ... منو مضوجج لو شنو الي غاثج ...
حواء: بعصبيه انتَ.... كتلت روحك حتى تطلع وتشوف حبيبة القلب وتريد تاخذني وياك اتفرج عليك ... تستذكر حبك القديم
عبالك اني ما ادري بيك جنت تحبها وتريد تزوجها ومن دريت بأخوك رايدها بطلت ما اخذتها ... كلت يله اخذ حواء اسمها مره
أسد: فتحت عيني متفاجئ هاي مرتي شدتخربط .... ومنو الي مسمعها هالكلام ... ومقهوره تحجي بعصبيه وراها طفله تريد تنزل دموع
دقيقه ... يا حبيبة القلب اريد اشوفها? ... ليش مو هياتها گدام عيني خليت راسها على صدري ... وبحضني ... شبيج حبيبتي
منو لاعب براسج ...كل هالحجي ما اله اي صحه ... غير شغله وحده
من ملحة امي وخالتي سهام اتزوج اتزوج واني جنت قافل عن الزواج قبل ما اشوفج ...
جنت مرات افكر حتى أريح امي اخذ شروق لان اخت فاتن ... وفاتن ورده ...
بس الفكره بسرعة تروح من بالي لان البنيه صغيره واحسها مثل براء اختي ... يعني لا حابها ولا معجب بيها ... بس كتلج لان اعز فاتن
ومن يوم الي شفتج يا فرستي ... انضربت على راسي ... وبقلبي ..وگتلهم اريدها ... وطبعا الفضل لخالتي سهام
لان جانت يوميه ....تسرد براسي حكايات حواء.... من ادخلين لبيتنا لحد ما تطلعين
وكم مره من الكاج وحدج بالمطبخ ... تكون هي مرتبه السالفه ...
لحد ما خلتني ما انام الليل الا وفكري مشغول بيج
ثانيا والله ماكو هيج قصه مال لان دريت بأخويه رايدها ما اخذتها منو گلج هالحجي بله
حواء: من جرني حضني حسيت جنت اضغط على نفسي وارتاحيت من نزلت دموعي .... أسمعه ....وبداخلي حتى لو كان يكذب بس اني اريد اصدگه ...
جاوبته ... اني سمعت مره نورس تحجي ويا براء اول ما بديت اجي لبيتكم
اذا صدك متحبها ابقى ويايه بالغرفه لا تطلع يمهم
أتحجج راسك يوجعك وحتنام
أسد: حواء يله كدامي
حواء: رفعت راسي ... گتله ما اطلع روح انتَ.... خلى عينه بعيني
مبتسم
أسد: راح ابقي شروق يمنا اسبوع حتى تنزل هالدموع و صدك استذكر امور حلوه ...بس هالمره دموعج بدون كحل
يله حبيبتي ... اعقلي وخلينا نطلع يمهم ...
حواء: يعني راح تطلع ....
أسد: وانت ويايه يله كدامي ....
حواء: طلعنا بالهول يم الكل بقيت منتبهه عليه ... اكو ابتسامه
بوجهه حس عليه دا اراقبه ...
سألها على عمه ... واخوتها ... بسوبعدها مصار بينهم كلام البنيه ما شفت منها شي يثير شكي من ناحيتها ... بي الشيطان يخيلي ... هسه هو گاعد كبالها وگلبه يدك لان يحبها ....
ما اتحملت ... مبين على وجهي مكتئبه ..اترخصت من خالتي الحجيه گتلها ظهري يأذيني
(شفته انطاني اشاره بدون محد ينتبه معناها ابقي كاعده )
راح اروح اتمدد ... مسيت على الكل ... ودخلت للغرفه ... تمددت بفراشي من التفكير ... تعبت ما حسيت على نفسي ...
الا من كعدت الصبح ...فتحت عيني ... شفت وجهه گبال وجهي ... وايده ملتفه على بطني ...
حركت اصابعي على رموشه الطويله ... فتح عينه فتحة أسد مدعي النوم ... كأنه جان صاحي وبس مغمض عينه بعدني ما فتحت حلگي اكله صباح الخير
بسرعه شال ايده وانطاني ظهره ....
عرفت زعلان .... واني ما اتحمل زعله ....
سألته على شنو زعلان ... ما جاوبني ... بقيت كاعده الى ان سمعت اهل البيت گعدوا ... بدلت دشداشتي وخليت شالي وطلعت لكيت البنات وشروق وياهم بالمطبخ صبحت عليهن و
حضرنا الريوك گتلهم خلي اروح اكعد اسد
نورس : كعد هسه شفته بالهول ويا الولد ...
حواء: دخلت اخلي السفره شفته طبيعي جاوب من صبحت عليهم ... ومن كمل غسل ودخل للغرفه دخلت وراه ...اگله اريد اروح لاهلي اليوم ...
بس گتله اريد اروح لاهلي جاوبني بعصبيه
أسد: اذا رايحه زعلانه بعد مترجعين ....
حواء: انقهرت من كلامه ... جاوبته انت مثل الواحد الي يريدها حجه تريدني اروح ... حتى تاخذ راحتك اظاهر حنيت...
بعصبيه لزمني من زندي ....
أسد: ترى زودتيها شنو تاخذ راحتك الي دتحجين عنها بت عمي
عرضي حالها حال خواتي ...
قسما بالله اذا عتبتي باب البيت ... مترجعين واذا بقيتي خلي عقل براسج ... وفكري صح والكلمه الي تطلع منج أوزنيها 

والبارحه استفسرت من نورس عن هالموضوع .... وانت مفتهمه غلط
ضرغام الي رايدها ... ومصطفى من زمان گايله عليها ... ومعترف يحبها للبنيه بس مأجل موعد الارتباط ... وافتهمت
هو الي سامع امي حاجيه ويا خالتي سهام على ان اني گايللها عود من انضرب على راسي وافكر اتزوج اخذ شروق
وهو الي مبطل ... يتزوجها بسببي ....
ومن شافني اتزوجتج .... وفهم اخذتج عن حب راجع يفكر بالبنيه .... وگايللها لنورس ... شوفيها اذا اريد احجي ويا اسد يخطبلياها من عمي ... توافق .
ولحد هسه ما منطين للبنيه خبر وامي ناويه تبقيها فد يومين ... حتى يخلون فاتن تحجي وياها
حواء: بقيت متفاجئه ... بس بنفس الوقت ارتاحيت ... وقلبي طار من عرفت رجلي ميحبها ومو هو المقصود بكلام نورس ...
جاوبته واني شمدريني ... بهالموضوع ومو انت المقصود بي
المقصود ضرغام ...
ثانيا من حقي اغار عليك انت رجلي ... بقى ساكت ما جاوبني ... طلع من الغرفه ... ما دخلها
للعصر بس بدل وطلع ... حتى الظهر متعلم ينام ما نام ...
استفزني ادزله مسجات ميجاوب ...
رجع بليل ... كدام البيت من دخل سلم وباس جبيني ...كدامهم طبيعي بس من ندخل للغرفه يگلب وجهه وميحاجيني .....
خبلني ... من كعدنا بالهول ... ردت اضوجه ... بقيت احجي وياه واسأله ... كدامهم يجاوبني ... بس فهم اني متقصده ...
لان ادري بي ميحب احد يحس بيناتنا خلاف ...يرد عليه
بلحظه شاف الكل ملتهين خزرني ... هنا حسيت لحيت وهم رجعت مثل قبل ما اعرف أتصرف ويا ... اترخصت منهم
ودخلت للغرفه ... طفيت الضوه وتمددت بفراشي طكيت بچي مهظومه ما ادري منه من نفسي ...
وهم كعدت الصبح بس هالمره ... ما لگيته موجود ... من طلعت
عرفت كاعد من وكت ...ومن رحت اصبح على خالتي ... فتحت الباب لگيته يمها ... وجهت لكلام لخالتي گتلها صباح الخير ... جاوبتني وهو هم جاوب طلعت من كعدنا على السفره ... بقيت عيني بعيده عنه حتى ما التقي بي
ومن يدخل للغرفه ما أدخلها ومن يطلع بشغله ويرجع ما اتواجد بنفس المكان حتى لا ينجبر كدامهم يسلم ويبوسني من گصتي ...
واني ادري بداخله يسويها مجبور ...بهاليوم ما اجاني نوم ...
حسيت عليه من دخل للغرفه ... تمدد بس ما نام الا فايت وكت من سكنة حركته عرفت نام
واني بقيت كاعده الى ان صليت الفجر ...وطلعت الشمس يله نمت ... ما كعدت الا على صوت نورس ....
نورس: حواء امي تگول مو عوايدج تبقين لهالساعة نايمه ...واسد گللها لامي انت للصبح منايمه بيج شي
حواء: اي والله للفجر ما نمت ... معدتي تأذيني .. وما اكدر اخذ
علاج ... الى ان تعبت وما ادري شوكت نمت ...
( عرفت من كلام نورس جان يدري بيه كاعده وهو هم كاعد معناها ما نايم مثل ما اني اتصورت ...بحيث يعرف شوكت نمت )
نورس: ارتاحي اليوم ماعدنا شي ... واسد وضرغام اليوم
ميجون يبقون يم بيت خالي ببغداد ...
حواء: اتفاجئت رايح واليوم ما يرجع واني ماعندي علم ....
من طلعت نورس ... فتحت تلفوني ... ((دا اعاتبه من بابها ميريد احد يعرف بيناتنا خلاف ومن بابها ما ينطيني علم ومن اسمع اتفاجئ ))
لكيته دازلي مسج ... من قبل كم ساعة منطيني خبر رايح لبغداد بشغله وما يرجع ...
(بداخلي ضجت اتعلمت عليه هاي اول مره من نتزوج لليوم ابات وحدي ... بالغرفه حتى يم اهلي ما يخليني ابات ...يوديني يمهم من الصبح ويجي عليه من يريد يرجع للبيت ورا المغرب ... )
دزيتله مسج ... ماطول انت ماموجود ... خلي اروح لبيت اهلي ابات يمهم اليوم ... صارلي كم يوم ماشايفه امي وابويه ... بس نور تجينا ...
جاوبني ...
أسد: باتي وانطي علم لأمي ... اني باجر اتغده بالبيت ....
(جنت اقصد من هالملاحظه اگلها لحواء شوكت ارجع واريدها بالبيت من اجي )
حواء: ترخصت من خالتي اروح لاهلي ... وانطيتها علم اسد باجر يتغده بالبيت ...
كضيت اليوم ويا ابويه وامي ... بالليل دخلت انام يم نور
بقينا نسولف ... هي نامت ... واني بقيت كاعده اشتاقيتله
يوميه كدام عيني ... حتى من مختلفين اسمع صوته اليوم لا شفته ولا سمعت صوته ... شكلي اني الي راح اتعلم على طبعه مو هو الي يتعلم على طبعي ... شوكت تخلص هالزعله ... ياربي طبعه شكد صعب ...
دزيتله مسج اتوقعته نايم .... ( شكد مستفز ومغرور )
دزلي ...( نسيتي سالفة برود الاعصاب ) ( بارد) ومتسلط
حواء: يمه شكد يداهر ولا اكدر عليه يستفزني ويخليني اندم دزيتله مسج ...
ثواني ...دك التلفون جاوبته بصوت ناصي الو
أسد: هاي الالو مال وحده دتحجي ويا صاحبها من ورا اهلها تالي الليل ... مو رجلها شنو تستحين تحجين ويايه كدامهم
حواء: لا اهلي نايمين بس نور نايمه بصفي ...
انتبهت عليه هو هم گام يحجي ويايه بصوت ناصي
أسد: يعني اليوم نور ماخذه مكاني ...عاد اكو احد اخذ مكاني بالقلب ...
حواء: ما بقالك مكان ... شعجب اليوم تنازلت ... وتريد تحجي ويايه صارلك كم يوم
عادي ما مهتم ... اني كلت يجوز نسيت اني مرتك عبالك بعدك عازب
أسد: يوميه كاعده بقلبي وكدامي اسمعج واشوفج ... اليوم بس بقلبي ...عيني واذني اشتاقولج ...
حواء: هذا بس حجي لان لو ما اني اتحارش بيك وادزلك مسج اصلا ما اخطر على ببالك ... لو مشتاقلي صدك جان دكيت سمعت صوتي من الصبح لهسه ...
أسد: والله سمعته ... بدليل البارحه ما نمتي لان معدتج اذتج ومكدرتي تاخذين علاج ...
اني دزيت عليج نورس مو امي ... والخط جان مفتوح ... واني الي گتلها تنطيج خبر اني ما موجود وما اجي اليوم حتى يكون عندج علم من اهل البيت يحجون ...( بموضوع ... روحتي على خالي الجبير علمود خطبة ضرغام) وخفت متشوفين المسج ...ولحد ما طلعت نورس من الغرفه اني وياكم على الخط
وهسه لو ما اني هم ادگ انت ما يخطر بالج تتصلين لو تسألين
عليه الشغله الي اجتي على بالج واني ماموجود تروحين يم اهلج
والثانيه قلبج ضعيف ويايه أشتاقلي وخلاج ادزين المسج هسه ولا لو نبقى على عقلج نتخارب
حواء: شكد مغرور ... تدري اني مراح اكدرلك واستسلم يم دهائك لان بكل مره أنت الي تغلبني ....وصدك متنطي على نفسك لزمه ....
أسد: هههههه وهو هذا الي ردت اوصله صيري عاقله واسمعي كلامي وطيعيني ... لا تعاندين حتى ما اتعبج لان انت مو كد العناد
من گتلج قلبج ضعيف ويايه بدليل مسهرج لحد هالساعة اني مكذب
حواء: لا ممكذب بس حبيبي انت هم قلبك ضعيف ويايه ومسهرك لحد هالساعه ...
أسد: هالمره غلبتيني ...كتلج مره اني ما اصالح احد ... غير امي .....بس سويتها وياج ... اعتبري هالكلام تراتيل عاشق انتِ عندي روحي و امي الاغلى من روحي ...
مشتاقلج حبيبتي ....البارحه ما خليتيني انام بقيتي صاحيه واني يوميه انتظرج تنامين والف ايدي على بطنج وانام
دا انتظر يوم يوم ... يجي الطفل وينام بيناتنا ... اذا ولد اسمي فهد واذا بنيه جنات
حواء: اني هم مشتاقتلك قلبي ....ان شاء الله يجي الطفل بالسلامه ويقر عينك بي
أسد: امين باجر اول ما اوصل امر عليج ترجعين ويايه... ما اتحمل افوت للغرفه وانتِ مو بيها ...
حواء: بعد اشهر صار عدنا فهد ... ويشبه ابو .... واسد جان طاير بي ... من شاله شفت دموع محبوسه بعينه وابتسامه ... عرفت اتذكر
ابنه فهد( المتوفي) وشافه بفهد الجديد الي عنده نفس شكل واسم اخو
أسد... بقى على طبعه ... لكن اني الي اتعلمت عليه وعلى اطباعه وبمرور الوقت عرفت شلون اكدر اتعامل وياه .... والحياة الزوجيه لا تخلوا من المشاكل و
ايقنت الاطباع ما تتغير لكن .... بالعشره نوصل مرحلة التفاهم
ونتعلم نتعامل ويا بعض بصوره صحيحه ... تنهي اي خلاف
والاهم الي بالقلب .... ماطول الحب والاحترام موجود ... ينخلق التفاهم والموده ... وتسود الرحمه بين الازواج
أسد: هالمره يا فرستي اذا الي بطنج ولد اسمي ليث واذا بنيه جنات
وصدك... اليوم اتصلت على اهلج (ورا ما رجعوا للموصل ) اسأل على عمي.... وفهمت نور رايدها ابن خالتج وعمي دينطيني علم
انتهت قصتنا
وكانت هذة تراتيل حبيبي واسدي العاشق

اماسي الليل