رواية تراتيل الاسد العاشق اماسي الليل الفصل الخامس 5 - بقلم مريم اماسي الليل

#تراتيل_الاسد_العاشق
الجزء٨
اماسي الليل
حواء: قريت المسج اكثر من عشر مرات ... وبقيت لليل ... ما رديته
بديت اتحجج وابرر لنفسي واحاورها
شفتها قلة ادب ...
يعني كاعدين ببيته واتجاهله ... صعبه
دزيتله ... شكرا
اسد: جان طعم الجاي عادي مثل اي چاي ... بس الي قدمه
هالمره خلى قلبي يدك واحس بسعاده لاول مره من سنين ...
من اول ما دخلت وشفتها ... حسيت مشتاق لشوفتها ...
هالبنيه بيها شي جذبني غير الشكل لان شايف الاحلى منها وما اثرت بيه ...
لاول مره اخلي بالي يم التلفون وابقى مترقب ولاكثر من مره بدون وعي ... اطلعه من جيبي أتأكد  ما واصلني ... شي
رفعت عندي هرمون الادرنالين ... بسبب الترقب ... والخوف ماترد
واكون بهالشكل نزلت نفسي  وبعد ما اكدر حتى اباوع بوجهها .
لليل حسيت بندم على تصرفي .. لان دزيت المسج .. واني متأكد شافته .. خفت لا تربط موقفي منها وكلامي وياها ذاك اليوم ... ويا المسج وتتوقع .. دا اتعامل وياها كبنيه سهله ... او دا اختبرها وتفهم غايتي غلط ...
دوختني هالحواء... لدرجه من رجعت للبيت ... وامي وخالتي سألوني ... على روحتي يمهم
نترت بيهم  بعصبيه  شخبصتوني بحواء واهلها
_ رحت أديت الواجب واجيت  الي فوك راسي كافي عليه انوب افكر بحواء
هالمره خالتي سكتت , حاجيتها بداخلي( من قلبي حبها سكتي من جان قلبي خالي ومرتاح البال   تزنين براسي )...
حتى النوم طار من عيني ... للحظه فكرت اكتبلها ...
ترى جاملتج لخاطر الوالده لان حست اني ورا عدم جيتج يمنا
بعدين انتبهت هالبنيه خلتني حتى تفكير بتعقل ورزانه ما بقى عندي والعذر  أقبح رحت لغرفتي متملل ومنزعج  اخذت ملابسي ودخلت سبحت من طلعت
ورا فتره ... بينما اني متمدد وصلني مسج فتحته بسرعة  كلمة شكرا حسيتهامثل المخدر
الي يسكن الالم
طفيت التلفون وبداخلي قررت هاي اول وأخر مره ادز مثل هالمسج
حواء: ورا يومين اجتي نورس يمنا بين السوالف بقى الفضول ملازمني ليش يسموا ابو فهد ...
حاولت اعرف بصوره غير مباشره ... گتلها ابويه فرح بجية ابو فهد ذاك اليوم ... صدك ليش تسموا ابو فهد ... المفروض ابو ضرغام
نورس: فهد ابنه الله يرحمه توفى عمره ٣ سنوات ونص تقريبا
حواء: اجاني الخبر مثل الصاعقه ... يعني أسد متزوج
بدون ادراك سالتها ... لعد وين زوجته شو مشايفتها
نورس: منفصل عنها ....صار سنين ... اتزوجها من جان بالكليه
وما تراهموا... بينهم مشاكل وبنفس الفتره توفى ابنه وطلگها ...
ومن توفى ابنه ولليوم ميقبل يتزوج ...
حواء: بداخلي اتألمت ما اعرف لان عرفت بي متزوج لو لان عرفت ابنه صغير ومتوفي ...
يا قلبي اختاريت الشخص الغلط اكيد اكو اسباب
ورا هالطلاگ اكيد مرته ما اتحملت اسلوبه وغروره وما كملت وياه
بعدها الحجيه دگت على نورس رادتها  ونورس  طلبت من امي اروح وياها
شي بداخلي جان رافض اروح لكن استحيت افشل البنيه بعد ما الحجيه  هم اصرت تجيبني وياها رادتني اتعرف على اخت فاتن  حاجيتلي عنها وگلتلي فد يوم اعرفج بيها من تجي يمنا رحت وياها دائما من اروحلهم ادخل من باب المطبخ لان اعرف اكو اوقات ولدهم موجودين ...
اول ما دخلت تلگتني خاله سهام  حسيتها صدك مشتاقتلي
اني هم احبها ،شبه رزلتني لان صار ايام ما واصلتهم
سهام : بعد من متجين ادز عليج نورس اتجيبج ماطول اني ما الي خاطر يمج
حواء: لا والله خاله انت على راسي بس ... امي تعبانه وتحتاجني ونور بعدها صغيره ما معتمدين عليها ...
ورا دقايق دخلت البنيه الي اسمها شروق ... كلش حلوه وهادئه
اتعرفت عليها ...سألت على براء گالولي بالهول يم بيت عمها وخطيبها ...
بقيت ويا البنات  بالمطبخ  بعدها بمده دخلت الحجيه سلمت عليها بس حسيتها زعلانه مني ...
گلتلي بعدين نكعد وحدنا  و گالت للبنات أبدوا بالعشا ...
استحيت منها  خفت لا ماخذه موقف مني  مثل الي اتعزز
لان هي والبنات ذيج الفتره يوميه يتصلون ويريدوني اجي واني اعتذر
ورا شويه اجتي گلتلي حواء تعالي اريدج رحت وراها لغرفتها
نعم حجيه
الحجيه : خاله انت مثل بناتي ... واني لو ما احبج ترى ما اصيح عليج البنات خير من الله بالبيت ... يعني اني من اطلب منج تجين اتساعديهم دا اتعامل وياج مثل بنتي ... مو قصدي يعني شلون اوصلجياها
حواء: خاله افتهمت قصدج
( قصدها يشغلوني لان مكعدينا ببيتهم ) والله الشاهد اني ما حاسه بهالشي واني الي بوقتها عرضت عليج اساعدكم ... وادري البنات مو قاصرات ... بس انت گلتيلي احنه اهل واني معتبرتكم اهلي ... وما كدرت اجي ذيج الفتره لان ابويه  بعافيه وامي تتعب وحدها وهسه الحمد لله صار احسن واجيت ...
الحجيه : خاله امانه محد مضوجج لو مسمعج حجايه ترى اني ادري ... بأمنه عدها غيره على رجلها وتدرين هالشي مو بيد المره هي تسمع سوالف بنات هالوكت وتخاف بس اني وكل البيت نعرف انتِ ما بالج هالشي
حواء: الحجيه فطنتني على تصرفات امنه ومنها عرفت سبب
تغيرها ويايه والموضوع مو بالي ولا متوقعه هذا تفكيرها )
لا خاله البنيه ما مسمعتني حجايه واذا وجودي يسبب مشاكل
حضرتج و البنات تعالو يمنا واي شي تحتاجي اني اسوي وادزه ومستغربه ليش تغار على رجلها مني  اني الاخ حتى ما شايفته ولا ملتقيه بي
الحجيه : لا يمه اني لو اريدج متجين جان ما ادز عليج بس گلت
اخاف تسمعين لو سامعه حجايه  عوفيها وحدها تحجي
وادري هو هم ما شايفج  بس عندي الصغير يحب يشاقى
ومره شايفج انت ونور
ويحب يداهر اخو الجبير  لان يدري بي نحس بهيج سوالف
گلهم والله الموصل حلوه  ويضحك
اخو رزله  والولد افتهموا  عليكم  قتيبه هم يداهر  گله هسه يله دريت وهاي مرته متتحمل شقى ضاجت
بس خالتج سهام حجت وياها والبنيه سمعت الحجايه
حواء: بقلبي اويلي على حظي يحجي الصخر
دا اجاوبها انفتحت الباب ...
أسد: يمه  ،سكتت من شفت حواء ما ادري بيها موجوده
جان بالي اگلها لامي راح اطلع عندي شغله ابقي يم بيت عمي
بس غيرت رأيي
السلام عليكم
حواء: وعليكم السلام
الحجيه : ها يمه
أسد: غير وكت ... احجي وياج ... اخذي راحتج ... من يطلعون بيت عمي نحجي
حواء: خاله  اخدي راحتج اني اروح يم البنات
أسد: مرت من يمي وراحت يم البنات ... التفتت للحجيه
يمه الموضوع الي حجينا بي قبل كم يوم بخصوص شروق
مو تفتحي ويا مرت عمي بطلت ما اريدها .
الحجيه : يمه والتالي وياك ... كل ما اكول الله يهديك ... وتوافق
تزوج تبطل
أسد: ابتسمت  بعد وكت ... يجوز الله قاسملي غير وحده ...
الحجيه : اوي بعد ما الي شغل ... اني هم تعبت منك ...
شكد حجيت وخالتك تحجي ... وثاريك تاخذني على كد عقلي ...
أسد: يجوز اخذلج وحده انت تحبيها ...
الحجيه : شروق هم احبها وخوش بنيه ... گتلك على حواء هم ما قبلت بوكتها ... ادري شتنتظر يا هي الي اگلك عليها
تگلي لا
أسد: يمه بعدين نحجي بهالموضوع ... مو وكته هسه عايفين
العالم يمنا خطار ... اني من دخلوا بيت عمي ...
جنت انتظرج تگومين وانبهج متحجين ... وتالي نسيت هسه اتذكرت
الحجيه : براحتك ... خلي اشوف شوكت الله يهديك ...
أسد: ضحكت ...مشيت بطريق الهدايه بس انتِ اصبري ..
فد يوم اجيج مهتدي  واگلج زوجيني ...
الحجيه : ان شاء الله
أسد: رجعت للهول يم بيت عمي ... شروق احلى من حواء ...
بس حواء احلى بشي ثاني ...تخليني من اشوفها... اريد
انطق بشي مابي تعقل وياها احس بمشاعر جانت بقلبي
قديمه حسيتها قبل ويا انسانه  ما صارت من نصيبي  لكن هالمره الاحساس اقوى وانضج 
بحكم عمري وعندي تجربه سابقه اكدر اميز الي دا احس بي
بقت شاغله تفكيري اريد حجه حتى اروح للمطبخ  بس
صعبه لان اذا اريد شي اكدر ادز احد من الصغار ...
لزمت التلفون صافن بي (بس انت الطريقه الوحيده الي اوصل
بيها لقلب هالحواء )
بقيت افكر بحجه حتى ادزلها مسج
الى ان دزيتلها ( خو ما حجيتي شي ويا الحجيه بخصوص
ذاك اليوم وكلامي وياج )
حواء:  الحجيه من دخلت للمطبخ التفتت على  خاله  سهام
من طلعت شروق ... وكلتلها
_هم قشمرني وبدل ما قبل على شروق
سهام : عوفي هذا ميريد يتزوج
بالاول اتوقعت ديحجون على الصغير لان ادري بي ما متزوج
بس الحجيه  گالت حجايه وسكتت مبينه مقهوره  عرفت يقصدون اسد ...
الحجيه : شلون اعوفه حتى شيب طگ براسه شوكت بعد يتزوج
حواء: بداخلي صار شعور خوف خارج عن ارادتي زين ليش خفت ،
خفت لان يدورله على عروس؟ واني شعليه قابل مخليه بالي راح يفكر بيه واني هم ما اريد افكر بشخص كله غموض حتى شخصيته غريبه ،بس كذب اني احبه ومن عرفت ميريد شروق فرحت واطمئنيت شال فكره الزواج خليني ابقى احبه من بعيد وخلي هو ميتزوج .
ورا شويه وصلني مسج اتوقعت من اهلي ... فتحته لگيته منه
رديتله الجواب ... لا
أسد: بشنو جانت امي رايدتج ...
حواء: عتبت عليه لان ذيج الايام ما مريت
أسد: لعد لا تغيبين عنها لان تعزج تسأل عنج  ( جنت اكتبلها الي اني احسه بصيغه الحجيه) اتحمليها لان  مستفزه ومغروره حسب ما يگولون اني أشبهها  بالشكل وبالاطباع
حواء: ابتسمت عرفت يقصد من گتله مستفز ولان هو يشبه امه معناها بنظري هي هم مستفزه ومغروره
جاوبته الحجيه ورده  ماكو منها
أسد: يعني اني هم ورده  .
حواء: جاوبته ان شاء الله ما ازعل الحجيه . لغمطت الجواب
أسد: ابتسمت وكتبتلها يعني بعدني مستفز ومغرور ...
مو يمكن انت استفزيتيني .
حواء: اذا اجاوبك متزعل  وتتقبل اي جواب
أسد: ما ازعل واتقبل اي جواب
حواء: انت تفسر الامور على هواك بدون ما تعرف داخل الشخص تحكم على الظواهر وعندك اسلوب متسلط وبي قسوه يمكن اكو شي بداخلك( قصدت ألم على ابنه)  تحاول تعكسه على الناس
ما جاوبني ...