رواية تراتيل الاسد العاشق اماسي الليل الفصل السابع 7 - بقلم مريم اماسي الليل

#تراتيل_الاسد_العاشق
الجزء التاسع
اماسي الليل
ورا ساعة تقريبا وصلني مسج يله ارجعي للبيت قبل ما تظلم  الدنيا
فكرت يمكن انغث  من كلامي ودزلي هالمسج
جاوبته بقيت لان دا اساعد البنات  من اخلص ويصبون العشا اروح .
أسد: انطيني خبر حتى اطلع اوگفلج لحد تفوتين  للبيت
حواء:  هذا اليوم شبي  متغير كأنه حجايتي اثرت بي ويريد يثبتلي
العكس
دزيتله شكرا ميحتاج  اني متعلمه ارجع كل مره وحدي ...
أسد: ادري بس هالمره احنه موجودين بالبيت  كل مره اني ماكو واخوتي ما منتبهين على هالموضوع وحاليا بس اني ومصطفى موجودين بالبيت فأكيد اني الي راح اوگفلج ...
حواء: ان شاء الله
ما اخذت الموضوع ولا فكرت بي  كأهتمام لان ادري هاي اطباعهم عدهم غيره وميقبلوها على نفسهم يخلون بنيه تطلع بليل وهم موجودين  فأكيد راد يوگفلي  من باب الشهامه
من خلصت قبل ما يصبون  اترخصت اروح لان ما ردت اكلفه ويمهم ضيوف
أسد: من طلعت اغسل صحت على نورس
من تريد تروح حواء گليلي حتى اوگفلها ميصير تروح وحدها
نورس : حواء راحت من قبل ما انصب العشا ..
أسد: مره ثانيه انطي خبر لامي لا تخلون البنيه تتأخر أو تجلبون بيها متخلوها تطلع الا يجي احد من عدنا يوصلها هسه انطي خبر للولد ولأمي ...
حواء: مرت ٣ ايام يله مريت العصر شغلة نص ساعة ورجعت
للبيت للمغرب اندكت الباب جنت اني وامي بالمطبخ نسوي الطلبيه  صاحت امي على نور 
فتحت نور باب المطبخ   بعد ما خلينا الشالات على راسنا
صار بوجهنا نزلت عيني وبقيت كاعده بمكاني  امي گامت رحبت بي
ودخلته للهول يم ابويه
الي افتهمته  مر حتى دينطي علم لابويه هاليومين العمال  يصبون كدام الباب
( هاي فكره عمو ياسين من إجى  قبل فتره گال على الفسحه الي كدام الباب  بالشتا راح تتأذون منها لان تصير طين لازم يسووها  صبه شويه طويله .. وبدربنا اذا اكو خلل بالبيت يصلحوا  قبل الشتا ))
هالمره سويت الضيافه ودزيتها بيد نور ودا اسمع يسولفون عن بناء ومبيت من رجعت سألتها شكو
افتهمت منها .. ديتفق ويا ابويه ...يأما نروح يم عمو ياسين ٣ ايام او
نجي ببيتهم هالثلاث ايام ... يفرغولنا غرفه ... والحجيه باجر تمر لامي ...تحجي وياها ...
اتفاجئت نبقى يمهم ٣ ايام .. بس بداخلي .. اتمنى الفكره تصير صدك ... بس كافي ابقى اسمع صوته مثل هسه   رجعت كعدت على الميز اكمل الشغل الي بأيدي  سمعت نغمه التلفون
وصلني مسج  فتحته
_اكو شي أو بيج شي .
استغربت ليش هيج كاتب هالكلام جاوبته
_ لا الحمد لله
أسد: لعد ليش ما اجيتي سلمتي ولا ضيفتيني  دزيتي نور
حواء: ما متقصده بس انت من دخلت سلمت علينا ورديتلك السلام بس يمكن ما سمعت  ولان جنت اشتغل  نور الي ضيفتك اريد اطلب منك طلب
ياريت  بعد ما ادزلي  مسجات لان الحقيقه اني انجبر اجاوبك وجاوبتك اول مره بخصوص الموضوع الي صار وهسه المسجات ما الها علاقه بالموضوع  لذلك اني بعد ما اكدر ارد اتمنى ما تزعل وتقدر موقفي 
أسد: لا ما اقدر لان ماعندي طريقه ثانيه اكدر اسألج بيها عن سؤال يشغل بالي
وما اتصور دزيت شي خارج حدود الاحترام او اتعديت حدودي بالكلام .
حواء: يبو ولا اكدرله فشلني شلون عقل عنده منين ما اجي يفر السالفه عليه ما جاوبته 
الى ان سمعته ترخص من ابويه مر من يمي جنت منزله راسي
سمعته گال
_في امان الله 
امي جاوبته الله وياك ابني
ثاني يوم الحجيه اجتي على امي
وبقت تحجي وياها وقنعتها نبقى يمهم لان اقرب من بيت عمو ياسين وهي شغله ٣ ايام
الحجيه : يا عيني حظرتلكم غرفه  انت وابو حواءوالبنات ينامون ويا بناتي .
بعد ما حصلت امي الموافقه من ابويه  بلغت الحجيه واتفقت ويا امي ثاني يوم  من الصبح .. ينتظرونا  نتريك وياهم حتى العمال من باجر يبدون يشتغلون
أسد: رجعت المغرب عرفت من نورس جانت يمهم حواء ...
جنت متأمل اليوم اشوفها ،لكن بالوقت الي طلعت بي  هي ماره، طخت بعقلي اريد اشوفها بلحظتها بقيت افكر بطريقه او حجه
أتذكرت السالفه الي اتفقت بيها ويا عمي ونسيتها كلت اتحجج بيها وأمرلهم بالبيت
بقيت افكر بالتفاصيل شلون يشتغلون العمال والبنات بالبيت  وبنفس الوكت من يصبون بعد محد يكدر يطلع
وهم عدهم رجال مريض صار بي شي فجأه  ميكدرون حتى يطلعوا بالكرسي
شفتها صعبه
قبل لا اطلع حجيت لامي عن الموضوع وفهمتها الي رايح احجي ويا ابو حواء وطلبت منها تقنعهم يجون يمنا ما يروحون لبيت عمي بداخلي احس هالبنيه تابعتلي
ما اتقبلت تروح لبيت عمي وعدهم ولد على الاقل هنا كدام عيني ابقى مرتاح ...
الحب مبررات لا طلاق العنان لحماقاتنا
اريدها قربي ... وفِي عيني اجلسها
فإلاشواق حينها تلبي صدى ندائاتنا
اخذتني خطى القلب الى عقر دارها ...
لتستطيب الروح بلقاء نظراتنا
ايعقل اني غيرت مساري لاجلها
ما الحب الا جنون وضياع لقناعتنا
اول ما دخلت ... وصارت كدامي ... حسيت روحي جانت لايبه على شوفتها ... هالنظره الخاطفه ... من دخلت ما روت اشتياقي
رجعت للبيت ... طلبت من امي تروحلهم وتقنعهم ...يبقون يمنا .
خالتي سهام شكت ... بسبب ملحتي بالموضوع
لليل دخلتلي للغرفه
سهام : ها يمه خو ما تريد تنام
إسد: جنت متوقع مراح تصبر ... حتى تستجوبني عرفتها من نظراتها
ابتسمت لا يمه منايم ... محتاجه شي
سهام: بروح الغاليين ... انت رايد الجماعة يجون علمود ... الي بالي
أسد: منو الي بالج ... ( حاولت اسوي نفسي ما افهم قصدها)
ضاجت جاوبتني بعصبيه
سهام : ترى اني مربيتك ... يعني اعرفك من تغشم نفسك ...
هاي سوالفك قشمر امك بيها ... اني تدري بيه بس اباوع بوجه الواحد اعرف الي بي
انت هاويها للبنيه ... شكو تشلع قلبنا ... خلي نخطبها الك
فرح امك وانت هم ترتاح والله يفرحك بطفل يعوضك عن الي راح
إسد: من يذكرون ابني كدامي قلبي ينقبض جاوبتها الله كريم خاله بعد وكت
كلشي بأذن الله ... خليني اتأكد من امور تخصها ... وراها افكر ... بالموضوع
بقيت مكتئب اتذكرت ابني ... اختنگت ... اريد اطلع من الذكريات والتفكير بي ...
بدون وعي ... لگيت نفسي داز مسج لحواء
بعدج كاعده
حواء: حسيت المسج مكتوب بعصبيه هيج مجرد احساس بس قلقني
جاوبته كاعده
أسد: راح ادزلج صوره ... شوفيها
حواء: وصلتني صوره طفل صغير ركزت بملامحه ... عرفته ابنه
لان يشبهه
كتبتله فهد
أسد: معناها تعرفين ...عندي ولد متوفي .... وهو نفس السبب الي قبل كم يوم گلتيلي يجوز بداخلك شي تعكسه على الناس
جنتي تقصدين ... حزني عليه
حواء: اي قصدت مشاعر الالم الي بداخلك تخليك ...اطلعها بصوره قسوة وغضب ...
اعرف شعور من تفقد شخص عزيز على قلبك ...
أسد: لا متعرفين ولا تحسين بلي بقلبي ... ميحس بالالم بس الي عايش حالته
حواء: لا اعرف لان جان عندي اخ اصغر مني بسنتين .... بالمتوسطه نايم بالهول بصف الصوبه ..وامي وابويه بذاك الوقت جانو موظفين ... وما ادري شلون صار الحادث يمكن ضارب الصوبه برجله وهو نايم والبطانية ماخذه النار ... وهو متلفلف بيها ... ما ادري بالتفاصيل بس ... اتذكر من شفته يركض وواجه بي النار ... والهول احترگ من الصدمه وحالة الخوف والرعب ما اتذكر
شنو صار ولا شنو سويت بوقتها ... كل الي اتذكره ... خالتي الصغيره بقت يمنا من اخذو للمستشفى
استلمت خبر وفاته بالتلفون ... من خالي ومرينا بكم سنه حداد وكأبه وابويه تمرض وصارت عنده جلطه من القهر ... وبعدها كام منها سلامات .. حتى البيت كرهه باعة وانتقلنا لغير بيت ..
يعني كل واحد عنده مصيبه لكن اكو شي اسمه صبر والإيمان بأمر الله ...
والنسيان نعمه ... صح ما ننسى العزيز لكن ربك يلهينا عن التفكير طول الوقت بيهم وبألم فراگهم ... بنعمة النسيان
الله يعوضك بالخلف الصالح
أسد: الحمد لله على كل حال ... الله يرحم اخوج ... بالفعل كل واحد ... عنده هم بقلبه ما يحس بي غيره ...
الكلام وياج مريح .... اخذي راحتج ... اسف اذا ذكرتج بالمرحوم تصبحين على خير
حواء: اني ما ناسيته اصلا لكن صابره ...
وانت من اهله
أسد: بهاليوم حسيتها صارت اقرب لقلبي ...وتعلقت بيها اكثر ...
كلامها ريحني وخفف عني ...حسيت هالبنيه قويه ...تعرف تمتص غضبي وحزني ... بسهوله ...
حواء: ثاني يوم الصبح ... الولد ضرغام ... هو الي إجى علينا گال الحجيه وابو فهد ينتظروكم حتى من تجون نتريگ سوا ...واخذ ابويه لبيتهم ... قبلنا
بين ما قفلنا واخذنا احتياجاتنا ورحنا ... يمهم
كعدنا على الريوگ ... كلنا .. انتبهت من دخلت لهسه ... أسد ما باوع بوجهي ... على كد رد السلام ... من دخلت ... وهو وجهه لابويه وكعدنا وياهم بالهول ... بين ما صبوا الريوگ وهو ابد حتى ما لمحني ....
هذا بي خلل ... بليل شكل والصبح شكل خبلني ...مره احس
مهتم ومره احس ولا معبرني ولا اصلا اجي على باله
امي يم الحجيه وخاله سهام وابويه يم الولد ... واني ونور يم البنات
ساعدناهم وراها دخلنا للغرفه بقينا ... نسولف ونضحك ...
بس حسيت بأمنه ... وجهها كلش ثگيل مبينه ما عاجبتها جيتنا يمهم هالايام ...
حتى انتبهت عليها كم مره تباوعلي ... فهمت دشوفني اباوع على رجلها ...ومن اجيت اكعد على السفره ... انتبهت دشوفني وين اكعد ... تقصدت اكعد بمكان يم البنات ما اكون بوجه رجلها ... ( عرفت هالبنيه عدها مرض الشك ... بداخلي اضحك عليها واحجي وياها لتخافين على رجلج لان قلبي اخذه حماج الجبير )
إسد: مكدرت ارفع عيني ...واشوفها لان ابوها الرجال موجود ...
قبل الغدا ... خالتي سهام شافتني ... طلعت من غرفتي راجع للهول ...مشت خطوتين ورجعتلي امك تريدك بالمطبخ ..
اني هم رحت ... لگيت بس حواء وحدها ....
ابتسمت ... على سوالف خالتي ... دزتني حتى اشوفها ....
شلونج حواء
حواء: اتجاهلته ... وبقيت مستمره الف بالدولمه ... جاوبته الحمد لله (لان الحجيه طلبت مني ألفها وخاله سهام بقت ويايه تطبخ للغدا ... والحجيه يم امي ... والبنات عفتهم بالغرفه )
اسد: انتِ كل مره بحال ... شو اليوم السلام من ورا خشمج
حواء: رفعت وجهي ... جاوبته بشبه عصبيه بس بصوت هادئ اعتذر بس ملتهيه انت تتحسس
بينما اني من دخلت وسلمت عليك ماعتبت من رديتني داير وجهك
لان گلت ملتهي ... تسولف ويا ابويه
أسد: ابتسمت لان ابوج موجود ... استحيت الف وجهي وارد السلام ... حتى ويا نور ما لفيت وجهي ... حتى تصدگين ما متعمد .... يا مستفزه .. هالمره سماح لخاطر الدولمه لان اني طلبت من امي انتِ اسويها .
حواء: ابتسمت ..يا الله شكد احبه واحب خلقته انوب اليوم يبتسم
احس قلبي راح مني ...
ترى اذا احد يجي ويشوفك واگف بالباب ..تسولف ويايه يفكر
اكو شي
أسد: ليش هو ماكو ... يعني هم مستفزه وهم عديمة احساس
راح اروح فكري بالحجي ...
حواء: دخلت خاله سهام مبتسمه ... .. وجهت لأسد الكلام
سهام : اذا دتسأل على الغدا فبعد وكت ... ها خاله حواءاعذريني عفتج وحدج ... بس اخذتني السوالف ويا البنات
أسد : ضحكت على سوالف خالتي تريد توصل لحواء اني اجيت من وحدي ... والله يا خاله ثاريج مو هينه ... اذا خليتي بالج يم شغله وردتيها ...
جاوبتها ...اخذو راحتكم اجيت عبالي امي هنا
سهام : امك بالغرفه ويا ام حواء....
أسد: سويت نظره لخالتي فهمتها وابتسمت .... گتلها خاله من رخصتج
اريدج شويه
سهام : طلعت ورا ها هم گول مو علمودها ... ترى سمعتك بأذني
أسد: ههههه والله يمه لو خليتي راسج بسالفه ... محد يسلم
اي علمودها .... بس لتسوين هالسوالف ...
وتحرجيني ... يعني هسه تتوقع ادري بيها وحدها واجيت استغل الفرصه
سهام : بعد خالتك ... على اساس ما استغليت الفرصه وطلعت الي بقلبك ...
والله يمه انت الحب جاب رجلك .... لا تذبها براسي ...
دخلي امك تحجي ويا امها وعمك يحجي ويا ابوها ....
واخذها ... والله خوش بنيه وقلبك هاويها ... شعندك منتظر
الا ياخذها واحد منك ...
أسد: ومنو يگول اهلها يقبلون ينطوها لواحد متزوج سابقا ومطلگ
سهام : هاي خليها عليه ... افرلك راسها فر .... ها وترى عن الحلال والحرام راح افرح امك بلي سمعته
أسد: ابتسمت الله كريم بعد وكت ... هسه هذا الحجي سابق لوقته

لكن عند رب العالمين وقته اذن ثاني يوم ...
الظهر ورا الغدا
ورا ما دخل ابو حواء للغرفه ينام ... طلعت من الهول اروح اتمدد بغرفتي.... اتذكرت انطي خبر لامي اليوم بيت عمي ياسين يجون
يمنا على العشا ... ديمر على ابو حواء
شفت امي مغثوثه ومن دخلت جانت تحجي ويا خالتي ومن شافتني سكتت بس حسيت اكو شي ...
سألتهم شكو
الحجيه : ماكو شي سلامتك ... يمه صدك خالتك هسه گلتلي انت تحبها لهالبنيه ...
أسد: اتنهدت ( خالتي متضم حجايه) يعني اذا خالتي گلتلج تتوقعين معلوماتها غلط ...
ابتسمت والله يا خاله الله لا يوگع واحد وياج ....
سهام : والله البارحه من كلتلي بعد مو وكتها ... والله كريم ...
سكتت ما حجيت ... بس هسه حجيت لان مرت اخوك .. تغار على رجلها من البنيه ... واليوم تبسمر حواء بالحجي كدام
نورس وفاتن جانت موجوده وحست البنيه فهمت ... الي تقصده
وانغثت .. بس تگول ما حجت شي بقت ساكته ... ونورس
هي الي اجتي بلغتها لامك گلتلها احجي ويا امنه ... ترى
اذا البنيه افتهمت ... بعد متوصل وطلعت صدك البنيه مفتهمه لان امك حاجيه وياها بهذا الموضوع من ذاك اليوم وعرفت أمنه متقصدتها بالكلام لان تغار على رجلها وتخاف عليه من حواء

أسد: حسيت شي يغلي بقلبي ..جاوبت امي اي احبها ...
واذا سمعت امنه غاثتها بعد ... ارزلها كدام فرقد ... واخلي يطيح حظها
فالافضل تلزميها تحجين وياها ... مو بس عيب من حواء عيب
من اهلها شنو متعرف الاصول يعني ضيوف عدنا تهينهم
شنو ما مخليه اعتبار لاحد ... يعني لا حشمتج ولا حشمتني
لو لان تعرف البنيه راح تسمع وتسكت ... لان الظرف الي هي بي
يجبرها تتحمل لخاطر اهلها ... هسه تصيحها لأمنه تحجين وياها
الحجيه : ددخل وسد الباب بالاول عندي حجايه وياك ...
حواء: قبل الغدا ... فرقد من باب المطبخ ... دخل مسواگ
من شافني واگفه بصف نورس يم الكاونتر نزل عينه گلي شلونج اختي ..... جاوبته الحمد لله الله يسلمك
اخذت منه امنه المسواك وراح بس حسيتها گلبت خلقتها عليه
وبقت وراها تحجي ... وأذب حجي معنى الواحد خوفه من الي مسويات نفسهن شريفات ...
واخر شي البنيه الي تباوع على متزوج شكد غبيه لان هو راح يعتبرها
مجرد تسليه ومرجعه لمرته ...
ختمتها شتگولين حواء... جاوبتها بعدني ما متزوجه من اتزوج
اعرف اجاوبج ...
فاتن يمكن تعرف بالموضوع لان البنيه حست اني ضجت ....
گلتلي تعالي اشوفج صور عرسي
گتلها استحي افوت لغرفتج اخاف ابو الجهال يجي على غفله
جيبي الصور بالغرفه يم نور وبراء ... نتفرجها سويه ...
بقلبي ما اريد حظي انت هم يگلبج عليه ... اخاف من ورا زن امنه
هم تصدگين اني ميته على رياجيلكم ... بداخلي ابتسمت ماعدا واحد منهم هذا مو بيدي ... بالاخص البارحه من گلي( ليش ماكو
وعديمة احساس ... دماغي كبرها وسوها قصة حب ويجوز هو قصده على المشكله الي صارت بيناتنا بسبب المسج ومن باب يمازحني كلي عديمة احساس
عمي
حتى اسد بعد ما احجي ويا لا بمسج ولا حجي وجها لوجه ...
ليروح احد يشوفه ميانه لو يشوف المسجات و تجيني احجايه ... واني ما ناقصه هم
ورا الغدا البيت فرغ كل واحد راح لمكانه متعودين هم ينامون
ورا الغدا
جنت بالغرفه ويا البنات وصلني مسج ... انتظرج بالمطبخ اريد احجي وياج
جاوبته ما اكدر عفيه اخاف احد يشوفنا ويفتهم غلط وتجيني حجايه وامسح المسجات اخاف احد يشوفها ويعرفون نحجي
بس ميعرفون كلام عادي ... وبعد ما اجاوبك حتى على المسجات
انت اكيد متقبلها تجيني حجايه من وراك
وصلني ... (راح اخليج غير الي ذكرتيهم تحجين ويايه حتى مكالمه غصبا عنج )
بقلبي عزة العزاج حواء...هذا افتهم السالفه غلط طبعا لان انتِ ثوله هو رزلج لان دزيتيله مسج واكيد خلى باله انت مو راحه ...
وگلك خلي اكضي وكت واتونس براسها ... وانت غشيمه من توكعين يله ... يصير عندج عقل ...
دوخني بالمسج ... هذا شلون راح أتصرف ويا ... هاهيه اتجاهله وبعد ما ارد المسج
وخلي شيريد يسوي ... ميكدر ... عمه صديق ابويه وهو شيخ ممعقوله مايخاف على سمعته ... فأكيد من مراح يشوف مني وجه ..يمل ويبطل ...
بقيت اقنع نفسي بهالحجي ... وبقيت خاتله بالغرفه اخاف لا التقي بي
للمغرب ... عرفت اجوي بيت عمهم ياسين ... والكل ملتمين بالهول أمنت ...
اجتي نورس گالت تعالوا يبنات عمي سأل عليكم ...
طلعنا اني ونور وبراء ونورس ... للهول ... الحمد لله ما باوعلي
سلمت على عمو ياسين ومرته وگعدت وكعدوا البنات بصفي ..
والوجوه كلها فرحانه
عمو ياسين گال ماطول العروس هم اجتي ... خلي نسألها ونتمم الموضوع ماطول الكل موافقين
اني بالاول عبالي ديقصد على براء لان هي الوحيده بين الكاعدين عروس
جنت منزله راسي ... بس من گلي شتگولين عمو حواء
رفعت راسي مصدومه ...ويايه الحجي ..
الحجيه : حجي البنيه متعرف بعدها ... محد گللها
الاب : بابا عمج رايدج للشيخ ... واني گتلهم بكيفها ...
حواء: كلام ابويه ثگيل بس يفهم ... لا اراديا من سمعت الطلب صارت عيني على أسد ... ردت اتأكد لگيته هم ديباوعلي ومبتسم
انثولت ... مثل الي مدا افتهم السالفه تخصني صدك لو اني ما مفتهمة واخاف اجاوب
بس هو ماكو شيخ غيره ... قلبي من الفرحه نطق قبل لساني
بكيفك بابا واني منزله راسي
ما حسيت الا بوسه على خدي ... طلعت من خاله سهام وياها هلهوله