رواية #تراتيل القدر الفصل السادس 6 - بقلم همس ليل

#تراتيل القدر

همس ليل

البارت السادس

صفنت بوجهها من كالت انقلت المفروض افرح ...مراح تكون كدامي طول الوكت...

ماراح احترك واني اشوف البعض شلون يتقرب لها...

ماراح اتعصب وبودي اهزها واكول لها بطلي النية السليمة...

بس بالعكس...احس بقرارها كتلتني...

عل الاقل جنت اشوفها يوميا...

صعبة تحب واحد...وتحسه مستحيل يكون لك...

اكو ناس تكول انتة رجل وقرار قرارك....

بس اكو ظروف مرات تجبرك ....تتخلى عن راحة نفسك

وتفكر براحة غيرك...خاصة اذا كان امك وابوك...

خلي احجيلكم شوي عن نفسي...

حيدر عمري ٣٢ سنة....مهندس من كربلاء...بالذات منطقة الحسينية...

من تعينت خلصتها مشاريع خارج محافظتي...

جانو يوفرون لنا سكن واطعام أباقي المحافظات وننزل اسبوعيا او كل اسبوعين حسب الشغل...

مثل العسكرية يعني بس الفرق مو حرب ....

احنة عدنا اراضي زراعية وحقول دواجن ....

بس وكت التسعينات ...وكت الحصار والضيم على كل العراقيين....

تأذينا خاصة بعد ماصار من انسحبنا من الكويت...

والانتفاضة الشعبانية...

تعبت احوال المحافظات ...والزرع مالنا تاذى...

والحقول اغلبها ماتت الدواجن بيها لان ماكو تصريف لها...

والمتبقي خلص بين توزيع للي حولنا وبين الطبخ...

كهرباء جانت ماكو ...تجي ساعتين طول اليوم ...اعتمادنا جان على المولدات ...بوقتها جانت موجودة بالمحافظات..

وبعدها ما واصلة لبغداد....

وضع اهلي هم تعب...

احنة خمسة اخوان...واحد من اخوتي جانت زوجته غريبة

اهلها بالخارج ..بعد الصار سحبوهم

والثاني راح ضمن الراحو بالانتفاضة ....

.وبقينا احنة تلاثة ومع اخواتي...واحد مزوج ...شايلين البيت..

والدي انكسر على اخوية شاب صغير...

والنوب الثاني سافر ومانعرف عنه شي ...ماكو موبايلات قبل

فنادرا مانسمع عنه ...وبعدين انقطعت اخباره رغم شكد حاولنا...

بس السفر جان مكلف وصعب...

بقينا احنة تلاثة ..واحد مزوج ..بالاضافة لرضيعاتي اقصد اخواتي

عدنا كلمة الوالد ماشية ...تعرفون طبع اغلب المحافظات...

عوائل متماسكة ...والاب كلمته تمشي على الكل الصغير والجبير ...

الوالد هواي تعب ويانة ..

لذلك قراري كان امشي حجايته...ومن ازوج اختار من اقاربي...لانه رافض ياخذ اي واحد بعد غريبة

وفعلا على اساس اخطب بنت خالتي...بس هية من بغداد..

اهلها مارضوا ينطوها لا اجي لبغداد

فماقبلنا...واني مالي نية اخذ من القرية..فعفت الموضوع اصلا...

صار السقوط...والشركات انحلت...وبقينا نجي لبغداد شهريا ينطونا الرواتب بشكل دفعات...

بعدين صار دمج للشركتين...وطلبوا من مهندسي المشاريع...يجون يصفون اعمالهم....

رحنا واول يوم داومنا...نسبونا للقسم الفني...

وبعد مالتقينا رئيس القسم...رحنا وية الوكيلة للغرفة

جان الموظفين بدو هسة يجون...

اول ماتعرفنا على مها....

وسمعت صوت ضرب كعب حذاء بالكاع جان واضح لان ساكتين ...

اني فكرت شكد مؤثر صوت كعب المرة من تمشي ...حتى تحفز الشخص يشوف منو راح تدخل...

شوي اقترب الصوت...وية دخلتها للغرفة التفتنا...

من الباب عيني مانزلت من عليها....دخلت بنية

لابسة قميص مخطط ابيض ونيلي وتنورة نيلي...

بس شنو من لون عين ...ازرك بلون السما الصافي

والنوب لابسة نيلي...

هية شافت العيون متوجهة لها ...انحرحت

وجها صار مثل الطماطة احمر...ماسلمت

وصلت لميزها وراسا كعدت...

بس عيني مافاركتها من دخلت لحد ما كعدت...

شايفين الواحد الي ينبهر بشي...شلون يظل يتمعن بيه

حلوة صح...بس شايف احلى منها...

بس ماعرف شنو الي جذبني بيها ...

عبالك من دخلت تمشي ...تمشي على كلبي

تكولون تبالغ...واني لو اسمعها من احد هم اكول يبالغ..

بس هذا الصارلي....

مرت الاسابيع ...واني عيني تراقبها...كل حركة ...

كل كلمة....حبيتها من اول نظرة...

شكد جنت ما اؤمن بهاي الحجاية ...

وماصدك احد اذا حجاها...بس صارت وياي...

صديقي باسم...اصغر من بالعمر...بس تعارفنا بواحد من المشاريع

من شاف نور عرفها...كال شايفها بالكلية...

ومن حجى على مواقف لها بالكلية...

مثل منو كروبها...وين جانت تكعد...

منو صديقتها ...وهواي شغلات ...

عرفته ...جان عينه منها...وشفت شلون جان يعاملها

وهية ماخذة راحتها وياه بالحجي والشقة...

جانت نار وتشتعل بية ....

وخاصة من فسخ خطوبته من بنت خاله...

وكال راح اخطبها....حسيت بلحظتها اختنكت..

بس ماكدر احجي...يجوز هية تقبل بيه...

يوم الحجى وياها...جانوا كاعدين كدامي..

واني روحي تلوب ...

وكل يوم ومامنطية جواب لباسم...احسه سنة يمر علي

لحد ما ماوافقت...فرحة بكلبي مو طبيعية

بس طلعت شغلة ابو امجد...جنت اشوفها تطلع من الغرفة...

راقبت وين تروح عرفت تكعد يمه...

شعدها هناك وهو شخص معروف سمعته...

مرات ادخل عليهم اشوفهم يسولفون سوة ..

ويوم اجى كال لها يلا....من طلعت رحت وراهم شفتها صعدت وياه...

بيومها كرهت نفسي...ويني وين الحب...

وبعدين هيج شخصية متقلبة ماريد..

بوقتها نزلت لاهلي....وجنت احس حتى النفس يضيق بصدري...

اطلع اتمشى بالزرع ...اباوع للسما اذكر عيونها..

من رجعت ...الغضب الي بداخلي...

الغيرة عليها...كله طلع بشكل ثاني.

ماعرفت شكد ضغطت عليها لحد انفجرت بوجهي...

ومن شفت دمعتها ..ماعرف شصار بية..

حاولت افهم منها شنو يربطها بيه...

بس جان ردها مال واحد مامهتم برأي غيره...

يعني معقولة عدها شي وياه...

شبيه تخبلت اقبل على نفسي مجرد التفكير عدها شي وية واحد بكد ابوها...

بعدها من صار الحادثة لهم...وشفتها دخلت ترجف وجها اصفر...

خفت عليها...نسيت كل عهودي....نسيت مواقفها...

بس خوفي وحبي بقى ...

بيومها عرفت شكد جنت غلطان بظني ...من اجى وكال لها عمو...

سالت مها...كالت اي الدائرة كلها تعرف...اصلا هية اجت عن طريقه...

ماعرف شلون اصحح تجريحي لها...

ومن حاولت...عصبتني وهية تتهمني اني متقصد

اتصور الاشياء الخطا...

وبدون قصد وبلحظة عصبية اعترفت لها ...بحبي

بس من رجعت للبيت...تندمت ...

لان اني ماكدر انهي هالحب نهاية صحيحة...

ليش اورط بنت الناس وياي...

مو من طبعي العب على البنات...

اصغر مني بالعمر...مبين مرتاحة بوضعها...

من بغداد..يعني شيوديها للمحافظات

زين شريد منها...خلي اعوفها بحالها....

هية تكولي انتة تتعمد تظن بية السوء...

من صفنت وية نفسي شفتها صح حجيها...

اريد ابرر لنفسي ...والكة نقطة عليها...

حتى انساها او اشوفها ما مناسبة لي...

من داومت...واعتذرت بصورة غير مباشرة عن حجايتي...

بعده كم يوم اخذت اجازة ...اشتاقيت لها كلش...

جنت اباوع لمكانها ..اتمنى لو اشوفها

اليوم خلصت اجازتها ...كل شوي اباوع للباب اكول هسة تجي...

بس تاخرت .. ..

شوي دخلت...واني اتامل مشيتها....عيوني ماتفارق تفاصيلها...

اتاملها بعين عاشق ...

عين تلاحظ ادق حركاتها...

بس تفاجات بنقلتها ...ظليت صافن ماعرف شنو اكول...

فكرت خليها احسن ...هسة انساها...

قابل الي خلقها ماخلق غيرها...

من اخلص ذرعات وارجع لاهلي ازوج وافضها...

بس جان حجي ...خلال الايام لبعدها...

اشتاقيت لصوتها...لمشيتها...لحجيها...

حتى للسانها ..المنشار اذا انطلق....

مرة طكت روحي ....شفت نفسي بعد ما اتحمل...

صعدت لغرفتهم ...من الباب شفتها كاعدة صافنة...

بشوفتها ...قررت شي...

نزلت لست سمر

_ست سمر...شو مانسبتو بعد مهندسة ويانة

_والله استاذ حيدر ماكو هسة

_ليش نقلتوا نور

_هاي بعد ....عمها له صوت يم المدير

_زين على الاقل رجعيها تكمل بس شغلها عافته على النص

_خلي احاجي المدير...

_لا تحجين كدام احد ...لا يسمع عمها ويحاجي قبلج...

_هم صح خلي انزل هسة احجي وياه ...

وفعلا وافق المدير ...ترجع فترة لحد ماتخلص شغلها...

ثاني يوم اجيت للدوام ...وبكلبي فرحة...

راح اداوم يمنا بالقسم...

وصلت بعدي....والظاهر صاعدة فوك ومبلغيها برجعتها لقسمنا...

لان ست سمر كالت عمها دخل للمدير...

والمدير كاله بس فترة وترجع لقسمك...

دخلت للغرفة وسلمت...بس من مشيتها ...

حركة ايديها المتوترة....وجهها الاحمر...

عرفت صايرة عصبية...

ياستارمن الجاي...ضحكت وية نفسي

_ممكن اعرف شنو قصدك من الي سويته

وللحكاية بقية