رواية طيحة عكال الفصل التاسع عشر 19 - بقلم لحن الهدوء

اضغط على النجمه لطفآ 😍

رفل رجعنه للبيت متت من التعب
كبل للمخده حتى ما غيرت ملابس
احمد شافني هيج صاح ادري خاب على الاقل بدلي نايمه بملابس
والله مالي خلك بس ذبيت العبايه
هههه يالله نامي سبح وبدل اجه يمي عيوني مغمضه تك عين
باوعت اله هااا اشو اجت ايدك ..حط ايده على خصري
كيفي غير مرتي
احمد لا عفيه والله اريد انام
شبيج ومرض ما راح اسوي شي
تقدم باسني على خدي حظني ونام
طار النوم من عيوني التهيت اباوع اله احبه ياربي احبه لو شكد ما اوصف حبي اله ما راح تصدكون
رغم اذني ورغم انه جرحته مرات وهو اكثر طبعآ ولحد الان ماكو بيت يخلو من المشاكل بس احبه
لوجه الصبح يالله غفيت كعدت ماكو طالع

اجو الظهر بس تغده صاح عليه جنت واكفه اغسل اماعين وي جيهان
هاا
تعاي ولج مشتاق
هههه والله شفتك عرفتك من عيونك
تعاي يالله
لا عفيه بس اكمل وي جيهان هسه عيب شتكول عافتني وراحت
خاب سكتي هنه صحنين عندي شغله اريد احجي وياج بيها
شنوو.. انصدمت عبالي ما ادري شمسويه وهو بي طبع حتى لو شغله زينه يخلي الواحد عباله ميت ابوه
كال ابوي اشتره القطعه اليم ام حسين تصير بت خالته
المن
جاا المن غير النه كال هاي الك ضمان

الفرحه بعيوني ما توسعني وكأن هو سوه هيج عمي لان حجيت لعمتي شنو عمها سوه هو جان موجود من كلت الها شلون عزلها لزينب يمكن عمي حب يبين نفسه الي انو عمج مو اقل شأن من عمم زينب

كلت لاحمد صدك والله
والله شبيج انصدمتي
بس شلون وبسرعه حتى ما كلت لا حجيت
اكلج هو انه ادري توني دريت كال هذول رايدن يبيعون القطعه وانه حاجيتهم عليها الك اشتريها واتفقنه بقن بس الفلوس هو العصر يروح ينطي الهم

ههه وهسه شنو
شنهو يعني هسه اريد مرتي بعدين اشرح التفاصيل
هههه خرب
تعاي مو كافي سويتي نفسج تعبانه والله حتى ما بدلتي
والله صدك احس نفسي تعبانه مدري شبيه بدي بس انام
يمكن بيج ولد ام الولد يكولون تحب النوم بدها بس تنام
وهاي المعلومه منين جبتها
سمعتها بعد منين جبتها
منين بيبي ام امي مره كلت لمرت خالي انتي بيج ولد لان تنامين هواي

هههههه والله قنعتني صدك يمكن ولد
هسه تعاي وعوفي من بيبيتي الله يرحمها
مرت الايام والشهور ودخلت بشهري بيومها احمد كان يرجع من وكت يكول خاف تضلين بحدج وي امي واحنه ما موجودين وتصير عندج ولاده يجي ويضل يمي
المهم جنت امسح الكاونتر وعمتي وياي وجيهان مسوينه عمل شعبي عمتي كالت اليوم الثكيل الثكيل كله عليج حتى بسرعه تجيبين نريد نشوفه شنهو لزك خووما لزك

دنكت امسح الكاعيه وحسيت شي نزل وي كعدتي
صرخت
اخخخ
هااا يمه شبيج
عمه ظهري
اي انشالله
ولك احمد يمه احمد
هاا رفل .. اجه يمي كاعده مكرفسه رجلي وعمتي تصيح ولج كومي وين تكرفسين رجليج مو زين

ضليت اصرخ ااه ااااه لحكوني
احمد رغم الالم بيه ولادة وصخام وهو محتار ولج صوتج فضحتينا

ااه اه اااحمد احمد الله لا ينطيك شسويت بيه موقف الالم البي انه لا نحسد عليه شاب راسي صار عندي الم قوي كلش بحيث من ١٠ ل٤ يالله جبت وما قبلن يحولني عمليات رغم توسلي بيهن ما اعرف شي ولا اكدر اصبر وجع موتني وهنه يكولن لا ما بيج شي ما ضل شي هسه تولدين
عمتي فوك راسي وتقره قرآن عليه وتسبح وانه اطفر عمه احمد كولي اله ما اريد جهال بعد شلع كلبي
ضلن يضحكن النسوان الكاعدات انه ابجي وهنه يكركرن
عابت اي والله
مره جانت واكفه صدك هاي البت تذكرني بروحي هم هيج انه كلت جبت منا نسييت منا
كلامهن لحد الان اذكره واضحك على روحي وعلى سب احمد الي صار بفلس وعمتي الي تكلي ولج خايبه يااا كافي شعلتي الرجال شعل عمي ابتله خوما ابتله راد خلفه
بلكوه يالله جبت بين الم وجع بس من شفت ابني ليكول انمسح كلشي من عقلي نسيت شلون تأذيت من شفت وجها بعد كلبي يخبل وجه ابيض ومدور وعيون بارزه وخشم جبير عمتي تكول وارث كلشي منج والخشم من عندي
هههه امي تكول ضلي جري خشمه وهو يرجع
ياا شني تلعبين بلولد عوفي شحلات خشمه عاد عده شي يذكركم بينه خاف نموت

يا اسم الله عليج عمه
بين وجع وجع هناك يكون امل صغير وضعه الله لك لا يظهره اله اذا شاء هو
لحد الان ما انسى احمد وفرحته من طلعنه والمره تدفع بيه اخذني من ايدها وباسني من راسي وعمتي بيدها علي عمي الي حظنه ورجع عليه باسني
كال يبه شنسمي
يبه انه كلت علي
ليش مو شهاب حتى اول فرحتك والناس تصيح عليك ابو شهاب
لا بويه علي احلى
كيفك بويه كيفك
كملنا الاجرائات وطلعنه ما بقيت ما عولت اطلع

وصلنه جيهان فتحت الباب وطايره بدها بس تشوف الطفل حظنتني واخذته من ايد عمتي وهيه تكلها على كيفج وعمي الي خبصها ما خلاها تعرف شلون تلزمه
ديري بالج بويه بهيده
طبيت للغرفه لكيت جيهان فارشه مندر خطيه ومخليه مخاد والبطانيه يمي والكاروك منزلته مخليه بس الجربايه مالته لان من اشتريت اشتريته كامل هو جرابيته

دخلت واحمد لازمني وعمتي وجيهان بيدها علي ورانه
خلوني على الفراش
خلته بلكاروك كلت الها جيبي بدي بس احظنه طلعت عمتي كالت اروح اسوي الج شي تاكلينه احمد ركض كلها انه رايح اجيب عشه جاهز
راح نص ساعه واجه
جايب اشكال ترس الثلاجه ترس
التفت عليه بتعب احمد كلت لاهلي
اي خابرهم ابوي
وزينب
لا ما خابرت خابريها انتي هسه بس لا جابت وياج
هههه انطيني موبايلك
اي هاج
اتصلت عليهم دك بسرعه ردت
شلونج اخبارج شلون صحتج
الحمدلله زينه انتي شلونج شبي صوتج
جبت انه

يااا صلاوات على محمد وال محمد الحمدلله والشكر وهسه شلونج

الحمدلله زينه
شنو جبتي
ولد
الحمدلله يارب ربج ما يقصر ادعيلي دعاء النفسه مستجاب يكولون
انشالله ما انساج بلغي كفاح
هسه امي بلغتها هاا حكه يدرون اهلي

اي يدرون عمي متصل بيهم
هذا هو يالله اخذي راحتج ديري بالج على نفسج وعلى ابنج
انشالله يالله مع السلامه الله وياج
سديته منها باوع الي احمد هاا اكلج مو جن يشبهني
لا ما يشبهك. اصلآ انه ومحطوط بس الفرغ الخشم خشم عمتي
هههه صدك خشم امي
خوما يوجعج شي
لا وين اصلآ فد مرتاحه
خهههخه ادري بيج اكبر جلبه وحقيره ليش ولج هيج شابعتني غلط مو حرام عليج
ههههه غير ما لكيت واحد اطلع حركتي بي بس انته كبالي اجيت بالي وحركتي كلها بيك طلعت بس هذا وبعد كافي
لا بالله كولي والله خاب انه حالف فريق اله ٢
شنوو لا والله رفعت حواجبي
صاح شبيج هاا مو احسن من ما اتزوج واخلي ذيج ٦ وانتي ٦ احسن ما ينقص الفريق شتكولين
خنزرت عليه لا تحجي هيج حتى لو بلشقه
هههه شبيج مديت بوزج هاي بوسه على هلبوز بعد شرايده
ضحكت غير اموتك لو سويتها
ما اسويها غير عدي مره تسوه العشيره على شنو اسويها

وره ايام وزينب اجت واهلي تباركوا الي وامي من اجت كالت بعد ما اروح لان زنوبه على وشك ولاده اضل هنا يوميه رادين رايحين ابوي هم وافق لان كال ضوجه هناك شوي نغير جو
ضلوا يمنه تقربيآ اسبوع
واتصل رجل زنوبه كال عمي مروا الي للمستشفى زينب جاي تطلك ابوي اخذ امي وراحوا وعمي وياهم ومرت عمي هناك
ضليت اندعي الها ربي يسهل عليها
شوي واتصل ابوي كالت جابت بويه بنيه خبلتهم كل شوي وماخذه تلفون عمتي واتصل

من كال جابت يالله هديت فرحت ومتشوقه اروح واشوفها بس امي وعمتي ما خلوني كالوا طلعي من الاربعين
يالله ترحين وره اربعين يوم ورحنه انه واحمد اهلي بقوا يمها ١٠ ايام وانه رحت تقربيآ ٢٠ يوم وطلعت
كانت تعبانه حيل لان قبلها مسويه ربط بلكوه جابت سولفت الي جابت وتسب بروحها
وانه سكرت من الضحك كلت ولج انه شبعت احمد مسبه ليش تسبين روحج هيه بحجه معصبه وضحكت

ردت عليه يااا غير احسن غالطه من صدك ولج لو يطلع للشغل وما اشوفه كل شوي وادك عليه يمتى يجي احس روحي معلكه بي
ههه هذة يسموه ادمان الحب وروحي معلكه بيك

والله مو شقه ترى
ادري مبين من يحجي تضلين فاتحه حلكج سدي معوده لا يطب بي ذبان
اهههه يمتى شفتيني
مساعه من سلم وكلج طبي عبالك واحد وكلج احبج
ههه لا عود خايف عليه
ادري اعرف الحمدلله راحوا خل نحجي براحه
عفيه ضلي اليوم يمي
لا غير احمد يذبحني انتي مو روحج معلكه برجلج انه روح رجلي معلكه بيه

ضلت تضحك كالت اكلج هم احمد اربع وعشرين ساعه من يجي مكابل ابنه وما يقبل حتى تشلينه خاف يتاذه
لا اصلآ يخاف يشليه
باع ادري حظي فكر غير العندي مكابل الطفله وناسيني
ههه ليش غير بته خلي يدلل بيها
يااا ما تشوفينه يجي طاير ناسي انه مرته جاا مو جان يجي كبل يبوسني على راسي هسه كبل عليها اليوم تعاركت وياه ما تشوفين تكولين ضليتي فاكه حلكج عليه

ليش بالله
جاا مو اجه طاير عليها حتى الله يساعدج مالته ماكو انتظرت ضليت بلمطبخ اتاني هسه يجي ماكو
اخر شي طكت روحي
اجيت عليه لكيته حاط بته بحظنه ويشم بيها ويبوس بيها يبعد ابوج انتي ادري
ههههه خرب يومج ولج تغارين عليه من بته خلي يدللها شتردين منه

مو اغار ولج علاوه خلي يدلل بيها بس انه جن ناسي عده مره وين راح دلالي صرت اخاف من بتي اذا هيج بعدها زغيره وخذته مني

هههه لا ولج هذا يحب الجهال رجلج يحب يريد جهال مبين بيج خير وخلفي

يااا شمالني
كبلتج كلت ترى ما اخلف صدكي بس راح الالم نسيت وهسه مستعده للثاني

ياا صخام
ضلينه للعشه رجلها جاب جاهز وانه وياها كملنه بسرعه وصبينه عيالها عمتها اجت سلمت عليه وعمها هم مرت حماهت الجبير اليم بيتهم هم اجت

خلصنه عشه سولفت وياها شوي وصاح احمد من طلعت غمزت الها واشرت لبطني خلفي

هههه روحي انتي سوي وعود انه وراج
وصلت للبيت احمد لاحظ ابتسامتي كل شوي واضحك
كال خير ام علاوي اشوفج تضحكين
لا هيج
لا شنهو هيج اكيد صاير شي شوف شنهو كلت الج زينب من اجيت ليهسه بس تضحكين
لا غير اختي تغار من رجلها لان مدلل بتها
لا والله كولي...ضل يضحك
هههه وانه زيدت عليها امشي واكلها دوري دوري وخلفي وهسه جهاله ياخذونه منج اكلك احمد شنو رائيك نخلف ثاني
هاي شني مرتي تكلي اكلج مو جن طلعتي علرون غير انه اكلج اريد بس والله جن حجيتي البكلبي هسه تردين طفل

هههههههاي شبيك جاي اشاقه والله شبيك

اييي تعاي شبيج نشاقه سوه
............. .....
زينب .. حياتي يوم عن يوم تحلى وياه صح اهتمام بته خلاني احس انو انه ما الي قيمه وزعلت عليه ورفل الي تكلي خلفي هههه وشعليه اذا يحب الجهال اخلف ليش لا بس خاف ياخذونه مني اذا هيه وحده عافني وكابلها مو بتي واغار عبالكم مثل تفكير رفل بس حسيت بي اول ما صارت يجي ملهوف وانه نساني جان قبل يجي كبل الله يساعدج ارد عليه الله يساعدك يسبقني وساعات يكلي قبل لا انه احجي هو ينطق

بس بعدين من صالحني وهو يكلي والله مو قصه ناسيج بس تدرين بيه من مات ذاك الطفل. وانه احس بلذنب احس الله عوضني بشي مو غاضب عليه لان انطاني هاي النعمه تدرين هسه ارتاحيت من شفتج جبتي بسلام وما بيها شي يوميه اكول ربي خليها سالمه ما اريد شي بعد خاف الله سبحانه وتعالى يطلعها بيه
رعد ترى انته مالك. ذنب هذا زرع ربك انطاه وخذاه لا تضل تحمل نفسك ذنبه انته مالك ذنب

كان حبه الها يختلف ومن شفت حبه يزيد حبيت كلامه وياها لعبه وضحكه قررت اسوي اله ولد وصدك حبلت وره شهرين
ورعد من دره طار ليكول اول مره ما جن عده بنيه وجبت بتي الثانيه عسل هو سماها كال شكلها جنها عسل صدك حلوه
دلاله لبناته يختلف بكل شي حتى الناس لاحظت هلشي
كلها تكول رعد مدلل بناته ومرته اذا تمرضن يركض كبلي ياخذنهن للدكتور بس يكحن يابه ما بيهن شي
لا خاف يصير بيهن شي
ياخذهن ويوديهن يركض
من خذيته فاطمه وعسل ازرف اذنها وهو الطريق كله يحجي يكلي خاف يتأذنه عوفيهن لا تاخذيهن

بلكوه قنعته اخذتهن وزفت اذنهن
يوم يومين ومضت السنين وحبلت مره ثالثه كلت بلكي يجي الولد لان خوانه يدورون وعليه يحجون خلف ولد يشيل اسمك يمتى يصير عدك ولد وهو يكلهم عندي نعمه
ما ادري شبيهم ليكول ما ادري شكد عده ما جن هنه ٢ رجعت حبلت وهم جبت بنيه بس رعد فرحته موجن بنيه وشكد حجوا ملوا من الحجي وما صار الي يردونه هو يكلهم بناتي عندي هنه ولد وهنه بنات عدي نعمه اروح اتزوج علمود ولد يمتى ما يجي يجي واذا ما يجي لا يجي الله ينطي مو احد لو نفرض تزوجت وهم خلفت بنات ذيج الساعه شسوي مرتي عدي بلدنيا ما بدلها جانن نسوان حمويني كل وحده تجي يمي تحجي شنو يحجي لان يوصلون الهن رجولتهن

صارن عدي فاطمه عسل وكوثر
ابوهن ااي محتار شنو يجيب الهن فاطمه عمرها ٥ سنين يالله حبلت بكوثر سجلت مدرسه وجبت كوثر
صارت بلثاني وكوثر توها تزحف وعسل صف اول عمتي بين يوم ويوم اخذ البنات واروح يمها وخوله شكد تسمع حجي اغلس ما اسمع ليكول

بيوم كاعده فاطمه كالت يمه اشو احس نفسي مخنوكه وهاي اول مره تحجي هيج يعني بنيه بصف ثاني ابتدائي احمد اول مره يروح ويعوفنه راح لبغداد لبيت خاله كال مشتاق الهم وطلع
انه سويت عشه ولا اشتهي اكل احط اللكمه بلكوه كوثر بحظني تزحف عمرها سنه وتكول ابه با متانيه يمتي يجي تتلاكه من الباب يوميه وتضل تصرخ وهو يشيل بيها ويعض بخدودها

كامت تريد تمشي وطاحت توها تخطي صاحت فاطمه الله طكت كلاص الجاي بيدها ونجفه
متت بدمي احنه عدنه اذا اتبده الجاي مو زين بعادتنه بسرعه ذبيت عليه ماي صحت اسم الله شيريد يصير دخليك ربي
رأسآ خابرت رعد
رد هاا حبي شبيج
هاا وصلت
مو توج خابرتي وكتلج وصلت شلون البنات خوما صاير شي
لا ما صاير بس دكيت اتأكد شبيك
ههه شبيه ما بيه شي
تعال رعد البيت فاهي البنات ما اكلن
يبه بعد كلبي عود صدك
والله ما كلن وهاي فاطمه تريدك
اخذت النقال فاطمه وتحجي وي ابوها وهنوب عسل حتى كوثر تكله ابه اسمعه يبعد ابوج شحلات هلصوت غير ما اتحمل باجر هنا عكبه جاي

خاله يمه خاله انه ما شايفته مره وحده اجه من حطيت بلبيت وبلعرس وبس من تبارك الي حتى ما حافظه صورته

المهم اسمع يكله هاي شنو ولك مو هسه كلت اسبوع يمك
لا خالي يا اسبوع كلي روح غير عدي بناتي يموتن لو ابوهن مو يمهن
سديت النقال وكلبي كارصني
يوم ثاني هم المغرب واجت فاطمه كالت يمه كلبي يوجعني
شبيج يمه
ما ادري احس مختنكه ابوي وينه
شبيج يمه هو انه بروحي مخنوكه هنوب انتي عليه هسه باجر يجي ابوج
خابري اله
خابرته وهم ضل ساعه يحاجي بيها ويهدي بيها
وعسل تكله يمتى تجي
وكوثر مجلبه ابه اهبه .. احبه اكلها كولي احبه تكله اهبه
اتصل الفجر كال فتحي الباب خلي مفتوح خاف ادك والبنات يكعدن اريد اسويها مفاجئه الهن

طلعت الفجر توه طالع كتله انته وين كال على السريع
شوي وخابرته كال ساعه اوصل
صار الصبح وهو ماكو وين صار ضليت مكابله الباب
كعدن البنات عدهن عطله جان يوم جمعه ماكو اخابره ما يرد
هسه وين صرت شوي وانغلق الموبايل
خليت ورجعت تمددت لان طفيت عيوني كلش ما نايمه
صحت على البنات اذا اجه ابوجن كعدني
ردت انام بس افكر وين صار
شوي واندك الباب البنات كاعدات على التلفزيون يباوعن

صاحن اجه ابووووي
طفرت شفت ابن حماي هااا
هلا عمه
هلا بيك عمه هاا شنو
عمه بيبي مريضه تكول خلي تجي وتجيب البنات يمي
حسيت بي عيونه بيهن حزن هو جان يحب عمه حيل حتى من انتقلت للبيت هو ويانه
كتله شنو عمه وين اجي هسه يجي رعد اصب اله ريوك واجي
كال جدي يكول خلي تجي واذا اجه عمي رعد انه اكله راحو هناك
جاا خوش ابدل للبنات واجي
بدلت وكلمت تعطرت وراحت رغم قرب المسافه الا ان احس كلبي ينغزني وي كل خطوه حاسه صاير شي يمشي كبالي وانه اصيح يااا ولك اوكف شمالك تركض ركض كوثر ما اكدر امشي بيها حيل ثكليه
وصلت وجانت صدمه عمري شفت كلها اسود بس انه بيهن لابسه اللوان
طبيت بين مصدكه وما مصدكه او انه ما اريد اصدك ما اريد اصدك بي اكول مو هو ما يعوف بناته وصلت للبيت بلهول عمتي مشككه ملابسها وكلها تباوع عليه بيدي كوثر هاا شبيجن ياهو مات

صاحت ولللللللك يمه اجت مريتك بناتك منو الهن
رعيييييد يييييييمهههه
طيحت كوثر انسطرت بلكاع شالنها النسوان ما ادري بروحي بعد شصار بيه شنو حجوا شنو كالوا لحد ما جابوا التابوت طلعت مفرعه دخلوني كالوا نجيبه للهول احسن نسوان بره ما يصير يطلعن اريد احاوط التابوت ما خلوني لحد ما دخلوا جوه شكبته كوم عليك الله كوم رررعد تقلبها منو النه من بعدك رعد هاي كوثر تصيح بابا كتلي فتحي الباب ما اجيت ليش فاطمه وين تروح عسل كوثر كوم عمتي فقدت ما تدري بروحها شنو تسوي ركعت راسي بلحايط كضني النسوان امي اجت وزينب فقدت طكتني صفنه كل ضني هسه يرجع
هسه اشوفه يطر التابوت ويرجع والله ما يكدر والله اذا ما يتأكد من عدنه وحده وحده نايمه يالله ينام
ليش ربي لو ماخذني ومخلي
هسه يجي زينب هسه يرجع هسه يوصلون للكبر ويلكونه عايش شلون مات ما يموت كال فتحي الباب
كعدتني امي من صفتني وهيه تعصر بيدي وتبجي
هااا يمه كولي والله مو هو يمه رعد ما يعوفني يمه مو اجي الله عليج اكو يوم فاركني ذبني عدكم ورجع مو اجي ما يقبل اذا ما فراشنه سوه شلون ينام بحده شلون
يمه يكلي فتحي الباب جاي ما راد يكعد البنات ضليت ادك على راسي

..............
رفل .. انتهت تقربيآ حياتها بعد موت رعد لمن دخلنه وشفنه صفنه ما خلصت منها لحد ما امي غسلت وجها وتعصر بيدها يالله حجت وتدور تدور وتكول هسه يجي وبته الي تكسر الخاطر كوثر تبجي وتصيح ابه
انتهت زينب خطيه والله انصدمنه بخبر وفاته من خابر اخوه على احمد وكله

رعد متوفي مسوي حادث نازل يشوف السيارة واكفه عليه واحد طابكه عليه تريله وطابك على رعد وشامره رأسآ صار عده نزيف داخلي ومتوفي بسرعه تالي سولف الي احمد لان حجي النسوان كل وحده تكول شكل هاي تكول خابروا مدعوم وهاي تكول نازل يشتري هو شنو يشتري والساعه ٧

الحمدلله على كل حال اختي كدرت تستعيد حياتها بعد مرور سنه يالله وكفت على حيلها وضلت تلتفت لبناتها ابوي رجعها لبيتنه بس هيه كالت اريد بيت رجلي ورجعت هنا
اما انه رفل فعندي ٣ ولد وبنت حياة اختي بحزنها طغت علينه حتى خلتني اعيد حسابتي وي احمد حبها اله وشوقها وبجيها لحد الان كل ما تتصل بيه اذا ذكرانه تبجي مرات بناته يذكرنه بس كوثر ما تعرفه لان جانت زغيره كلش
احمد حياتي اسأل ربي ما يحرم محب من حبيبه ولا ام من ضناها ولا زوجه من زوجها لان محد يعرف بس ربي شكد شافت اختي عذاب والم من فقدته وهيه تكول جذب اكو رجال مثله
ترفض حتى مجرد فكره اوحجايه تنطق عن الزواج
ام رعد توفت وراه وابوه هم ما طولوا وره تقريب ٣ سنوات
اختي لحد الان صابره بناتها مدللتهم وعمامهم هم رغم انه وابوي وامير هم ما مقصرين امي وابوي من يجون يحير شنو يجيب بس تضل بنفسها انو رجلها ماكو
صورته اول ما تدخل للبيت مخليتها كبالها كلش جبيره تكول حتى ادور ادور واشوفه

الى هنا احبتي انهيت وياكم قصه طيحه عكال قصه واقعيه حقيقه لاتخلو من الخيال بين سطورها واكن محتوها حقيقي اني مو النوع الي يحب قصص الفصليات بس هاي القصه اثرت بيه لان اكو بيها هواي امور تختلف عن الفصليات المعهوده وزينب بحكم زوجه وليست فصليه رغم كلشي رعد الله يرحمه حبها وهيه عشقت الكاع اليمشي عليها تحبه بجنون
زينب الله يبرد كلبج وتشوفين بناتج متخرجات وصايرات نفس ماهو يريد يارب
رفل ديري بالج على احمد ترى ماكو بيت ما بي مشاكل والرجال يوم زين ويوم شين ولووو مو كاهم بس اتحملي والحياة تكظي وداعتي ما تضل
اشكركم جزيل الشكر على المتابعه لا تنسون التصويت تحياتي لكم منى الطيف