رواية طيحة عكال الفصل التاسع 9 - بقلم لحن الهدوء

الرحمه والخلود الى الشهداء سقطوا من اجل العراق اللهم اسكنهم فسيح جناتك هم انفسهم لا يعرفون بأي ذنب قتلوا سوى انهم طالبوا بحقوق مغصوبه فداك روحي ياعراق ..دقيقه قبل لا تقرأ البارت تقرأ سورة الفاتحه الى شهدائنا شهداء الثورة بلدي ينزف العراق ينزف والحكومه لم تحرك ساكن الله ينتقم منكم بجاه آل بيت الرسول

وصلوا الف صوت وباجر الصبح انزل بارت اذا شفت التصويت صعد وين التعليقات الحلوه ليش ما جاي اشوفها فديتكم 😍منى الطيف

رفل

كال كلامه باصرار وتهديد وكأن انه سلعه عده مجرد شي رخيص
وانته شنو تريد مني حتى هيج تسوي مو تكول ما اريدج

اي ما اريندج بس عناد بيج وافقي وشوفي لو احسن شي ياهو يتقدم ترفضيه 

يعني شنوو قصدك  .. رفضي احسن وروحي نامي .. راح اوفق لو انه لو انته ما امشي على مرام حظرتك

رحت من يمه للغرفه حيل كرهته لا جذب رفل انتي تجذبين على روحج رغم كل الي سواه بس بعدج تحبي ..

ياريت لو بيدي اشلع اسمك من كلبي مجرد اسمك احسه محفور بروحي شحال شخصك رجعنه للبصره بدون ما نرد خبر للناس ابوي كل لعمي الي يريد بتي يجي هناك ويخطب حسيت حتى عمي ضاج من تصرف ابوي لان العم بمثابه ابو وهو كله حتى لو هاي خلي الخطبه تصير هنا بس ابوي رفض بعد ما صار وهو باعتبار قرب بته الهم ورفض احمد الي حسس ابوي انو زغير بعينهم طول الطريق وهو يسب با احمد ويلعن بي شلون هيج سوه اتخذت موقف السكوت ما كدرت احجي شي ..
وصلنه للبيت تعب الطريق بسرعه بين بيه ومنا سالفة احمد وكلامه يدك براسي

والله اوافق شنو يريد يسوي يكص راسي تهي بهي ابوي اصلآ كره احمد كلش بعد الي صار وحتى امير ضل يحجي على ابوي على ليش حجيت وياهم ورخصت بتك الي يريد هو يجي يخطب مو احنه ندل بناتنه كباله يابه ما يصير
ولك ادري بس حبيت لحمنه ما يروح للغريب المنك وبيك افضل واحسن .. يا احسن ما تكلي ومو هاي بتك الجبيره انطيتها للعمامي شنو استفديت اشو حتى ما تجي بلسنه حسنه يالله نشوفها والله ينطي المناسبات
.. كافي سد السيره ام امير ردي خبر لبتج زينب خلي تكل للناس يجون هنا لو ردوا يخطبون
طلعت امي بلغرفه جنت واكفه اتسمع على حجيهم

هاا شسوين هنا
يمه يعني شنو ابوي وافق

ايي ليش ما يوافق اشو الولد زين  امير سألته عنه يكول ادب واخلاق شايفه ويكول حليو بعد شتردين هم سوي الج سالفه ورفضي

يمه مو قصدي رفض بس والله ما بالي زواج هسه

اخذتني جرر للغرفه حتى محد يسمع ودفعتني سدت الباب وبتهديد احجي ولج مصخمه ويامن حتى كل ما واحد يتقدم ترفضينه شنو ولج عندج علاقه باحد

لا والله يمه شنو هلحجي انه تربيتج

ولج تربيتي وهيج تحجين ولج العمر يروح ما يجي كل مالج تكبرين مو تزغرين طبيتي ب٢٢شنو زغيره اختج ١٦ واخذت وشوفيها ليكول مره واحسن منج وهذيج زوجتها عمرها ١٤ شوفيهن ترى البنيه بس تكبر بلعمر بعد محد يجي الها  بس المتزوج والعده جهال يا امي انه مو ضدج بس شوفي هيه هاي حياتنه وشوفه عينج حتى ابن عمج رفض تدرين ليش لان شافج كبرتي بلعمر يجوز يريد وحده على مرامه زغيره يجوز راد بت ال١٥ وانتي شافج جي جبيره
ما رادج

كانت تحجي وبالي يمه لمن كالت يجوز راد بت ال١٥ انمرد كلبي صدك حبيت احمد يجوز صدك حاب وحده وهيج اصر يرفض واله مو معقوله علمود شي تافه يرفض ..
سكتت عنها ختمت كلامها وياي بعد محاظره طويله عن زواج البنيه وانو تعنس ليكول عمري مدري شكد ما ادري ليش عدنه وخصوصآ بلعراق البنيه اذا عبرت سن ال١٨ كالوا عنست محد ياخذها ولووو هلشي خف بلفترة هاي لاحظت هسه فترة حياة غير عن الي عشناها بهذيج الفتره ..اخذت موافقتي او مو موافقتي هزة راسي على كلامها وسكتت اعتبرت موافقه مني راحت من يمي وكعدت ابجي بأنين مسموع المن احجي والمن اكول عساها بحظك وبختك يا احمد عساك ما تتهنى حجيت هواي عليه بيومها ودعيت عليه لاول مره بدعاء من كل كلبي  بس جذب ما اريد يصير بي شي ..
.....................................................
زينب
صبح الصبح لعبانه نفسي ما ادري شبيه رعد ماكو ردت اكوم دخت بلزايد حطيت راسي على المخده حسيت رجفه بجسمي ما اعرف شصار بيه لفيت روحي بلبطانيه ردت اتقيئ كمت صار ألم بطني رحت على الحمام اتقيئ سمعت صوت من جوه زينب وينج ما عرفت الصوت ياهو الصاح جريت روحي جر ورجعت للفراش ردت اخابر على اهلي ما عندي نقال صحت عمه صوتي ناصي ما كدرت اصيح وجع بطني حيل ولعبان نفس قوي كلش شبيه يارب شبيه الباب انفتح عمتي ومرت حماي واكفه فوك راسي كومي مو جاي نصيح عليج شبيج شنو ما تسمعين

هاا ما بيه .. جنت اجر الكلمه جر

خوله .. وشبيج ما بيج حيل

عمتي .. شنهو شبيج شتهيسين

زينب .. الم بطني حيل جاي اتأذه

عمتي  .. يااا خاف حبله

كالت هيج لو احس روحي طارت حتى الالم نسيته شنو هو باوعت على مرت حماي يجوز صدك عمه حامل

زينب .. لا ما اضن .. وليش شبيج خلي اوديج للمستوصف يشوفج ..وافقت اروح وياها
بعدين صاحت ضلي هنا خاف ما بيج انطيني بطل صاحت على مره حماي

جابته وكالت هاج روحي للحمام وانطيني البطل
انطيتها ادرار وراحت هيه بحدها جنت متوجعه يعني صدك بطني ما اعرف كل وحده تحبل هيج عبالي شي سهل بسو اشو اختي شكد صار عدها جهال اشو من تجي هيه وحامل تركض ركض بلشغل ما تتوجع

ما  نزلت ضليت اتاني يارب صدك وهيج واطلع حامل جنت حيل متشوقه اصير ام

ضليت اباوع على السكف شوكت ترجع رغم متوجعه بس لو يطلع صدك حامل خلي اتوجع سمعت صعدت الدرج كمت من الفراش عدلت كعدتي كلت عمتي اجت فتج الباب عمي طب وهيه وراه كال يبوج مبروك يتربون بجالج انتي وابوهم
مشكور عمي ربي يخليك خيمه فوك روسنه باسني من راسي
عمتي .. حامل يمه الف مبروك
الله يبارك بيج
عمي دار عليها لو ماخذتها وياج جان شافوها

عمتي .. مو كلت خاف تتعب ما اريدنها تتعب وهيه متوجعه بس حاجيته الدكتوره وكالت جيبيها

الله كريم يبوج ديري بالج روحج طلع من يمي وعمتي ضلت خاف متاذيه اسوي الج شي
توسلت بيها والله ما بيه شي ضامه فرحتي بكلبي اريدها تروح بدي ابوس بطني المسها براحتي بس هيه ماكو ضلت يمي طلعت بلكوه ضليت كاعده اتلمس بطني صدك حصير ام راح اعيش دور الام ويحجي وياي زين هسه رعد شنو موقفه وشعوره لو عرف بلخبر

ضليت متانيه بدي هسه يجي واكله صعدت مرة حماي اول ما باوعت عوجت براطمها حشه خلقه الله شكد مكروه ولا واحد يحبها كالت هاج هاي الصينيه ودتها عمتي اخذتها من ايدها رادت تطلع واسمعها تهمس هيه هيج هللله هللله هنوب تحبل لا ربحنه 
حكرته طلعت وسدت الباب

تقربيآ نص ساعه حسيت الالم راح نزلت اشوف شغلي عمتي رفضت بجر وما يصير خلي نشوفه خاف مو زين عليج الحركه
لا عمه شسالفه هو اسوي شغلي

طلعت غسلت الحديقه نظفت الدوانيه عمي جان طالع للديوان كملت البره ودخلت للمطبخ مرت حماي جانت تطبخ الغده باوعت عليه وهزت ايدها المن نزلتي
اسوي شغلي

.. ما يحتاج حتى الاماعين غسلتهن صعدي حبيبه خاف يطيح

.. شنو يطيح شكوو .. حجيت بزمخه وفاكه عيوني عليها صدك ضجت منها ما اعرف شمسويه الها ليكول كاتله ابوها

وشبيج تزمخين شكلنه يعني

ترى ما كتلج غسليهن انه اغسلهن انزل واغسل الاماعين جنت مريضه ما شفتي بعينج

ترى حبلنه وجبنه وكمنه ثاني يوم

شنو شفتي نايمه لو كاعده وما مسويه شي ترى توني  عرفت بنفسي حامل وجانت بطني الصبح حيل توجعني حتى ما ادري بروحي

وشبيج تصيحين لو تردين مشكله صوتج حبيبه لا تخليني اسوي بيج دهر صوتج ما يعله عليه اكبر منج احترمي لو اهلج ما علموج الاحترام

احترمي نفسج انتي خوش ديري بالج تجيبين سيرة اهلي على لسانج شعليهم اهلي وتجيبن سيرتهم على لسانج

ولج هي نعال جلبه انتي خلك فصليه لا تشوفين روحج سووج مره براسنه

احترمي  نفسج ولا تغلطين فهمتي ..فرت منها وجهي شب نار رحت يم السنك اغسل وجهي

صاحت بدون تربيه تحجي وتصيح هلجلبه الما عده تربيه طايحه الحظ تحجي تصف وتعد هيج منج وهيج منج ضليت صافنه اسمع رجلها صاح ولج خوله طايحه الحظ هاي شنهي صوتجن طلع للشارع

صاحت تعلي صوتها عليه تقبلها تقبلها هاي وتأشر بيدها باوعلي باستحقار والتفت عليها وانتي تصيحين وصوتج وين واصل علمود هاي

جاا شنهي تراضى خلك فصليه تحط عينها بعيني وتكلي احترمي نفسج ما تستحين

ضليت فاكه حلكي شنو يمتى كلت ما تستحين باوع عليه هي انتي شنو ما علموج اهلج ما انطوج تربيه شلون تكلين لمرة حماج اكبر منج هيج
هيه ضلت تعوي عود مضلومه. هو انهد بيه صدك مرته عيب عليج وهيج وهيج

اريد احجي ما كدرت رأسآ لزمتني بطني عمتي احت على صياحنه هاي شبيكم فزيت من نومي على صياحكم
اشر عليه وهو يصيح هاي ما تستحي تكل لمره بكبر اختها احترمي نفسج مو عيب بالله

الام .. انته شلك بحجي النسوان

خوله .. شنو نسوان .. تحجي وتبجي نسوان عمه غير مرته شوفي ما احترمتني ولا قدرتني على الاقل جان حسبتني بمثابه اختها تغلط عليه

باوعت عليها والدموع عشره عشره عمه والله جذب بلقرآن لا غلطت ولا  شي ما حجيت غلطت عليه .. ردت اكول لعمتي ما كلت ما تستحين

رجلها صاح ولج شنهي هاي من عين صلفه شكد عينج صلفه جاا انه وامي واكفين وانتي تكولين عنها جذابه

ما كلت جذابه كلت جذب

اها جاا موش ابن ابوي اليوم اذا ما خليت رعيد يتصرف وياج

طلع وصاح على مرته وعمتي حاولت تهدي بيهم ما كدرت رجعت عليه ليش خايبه شمالج تردين وياه هاي اعرفها تريد العزال وما تعرف شتسوي حارت ما خلت شي ما سوته وهو ما منطيها نشده علتريده صيري مثلها تكسبين عوفيها يمه مالج شغل انه اتفاهم وي رعيد لو اجه

والله عمه ما حجيت وياها شي هيه بدت وحتى جابت اهلي بلنص ما انطوج تربيه يعني مو عيب عليها تكلي هيج

ادري بيها ادري

نسيت اكلها على كلامها مال فصليه وسووج مره براسنه بس والله حلفت من صعدت اذا اجه رعد وفتحوا وياه سيره اله اكله وره الغده هيه ما طلعت صبت اكل عمتي انه وياها صبينه عمي حاول يفهم شنو الصاير محد كله بس افتهم من عدم حظور خوله على الغده عمي بي طبع حلوو الي هو ما يقبل يدخل بمشاكل نسوان ابد ويكل لولده دائمآ هنه بينهن يتعاركن ويصافن مالككم شغل يسولفن عنه ومن عاشرته عرفت اكثر طبعه حتى علمود الجهال صار كم مره اشوف ولد حماي يتعاركون يصيح على الطرفين الظالم والمظلوم ما يقبل بطرف واحد وبعدين يلزم كل طرف على صفحه يبين اله انو هو غلطان ما يبيبن لاحد هو صح حتى ما يستقوون على بعض وحتى ولده يكلهم ولدكم اخوه بينهم واحدهم على الثاني واذا تعارك واحد من ولدهم وي جهال اخوانهم كلهم يضربون ولدهم ولد اخوهم هاي صفات هواي بيهم حلوه حبيتها وحبيت طبعهم
بس هاي العكرب الي وياي ما اعرف حظي هذا

اجه رعد جنت اغسل اماعين طب للمطبخ الله يساعدج

هلا
صاح عليه اخوه رعد تعال عندي حجي وياك
راح اله اجتني رجفه بطني انطركت ضليت خايفه شوي واجه كملت اماعين صاح وراي فوك
بس امسح الكاونتر
كلت تعاي

رحت وراه
شنو هذا الي سمعته ولج تطولين لسانج على اخوي ومرته مو عيب عليج

والله رعد افهم السالفه اول وشوف شنو وبعدين احجي

ما يحتاج افهمها فهمت من اخوي شرح الي كلشي

زين وشرح الج جذب مرته

عيب عليج استحي مره اكبر منج هيج تحجين كدامي وتنكرين انو انتي حاجيه

لان انقهرت غلطت عليه وعلى اهلي وماعندي تربيه وفوك هذا كله تكلي فصليه وسوواج براسنه مره تقبلها والله انته ما حسستني انو انه فصليه وهاي تكلي هيج ورجلها اجه يصيح عليه لان كلت احترمي نفسج بس والعباس ما كلت ما تستحين والله رعد

هيه كالت فصليه

والقرآن هيج كالت جرني من ايدي وهو ينزلي على الدرج حتى مالحكت اكله انه حامل بركضه حيل صاح عليها خوله ام علي ابو علي وينك وهو يجر بايدي طبني على عمي جان متمدد صاح يابه انته ما تقبل ادخل بسوالف نسوان وقبل لا اتزوج انطيت النه كلام ما اريد تحجون بشي يخص نسوانكم اجيت واخوي تلكاني مرتك ومرتك وهيج منها وغلطت صعدت احاسبها لكيت ام علي تغلط وفوك هذا تكلها فصليه وسووج براسنه مره

صاح عمي هيج كالت طب ابو علي خوله ماكو صاح وين مرتك كله يابه ترضع بلطفله

كله صيحها بصوت عالي بسرعه جابها واجه وجها ازرك من الخوف جنت واكفه ورعد كال تضلين واكفه هنا  خلي اشوف الحجي صدك لو جذب
اجت
عمي .. صدك هلحجي احنه من خذينه زينب انه خذيت بت اودم شفت اخوها ودم الحامي على واحد سكط كلت اله منهم مره ترى راضي بأي شي وجنت اكدر اتنازل بس لان شفتهم خوش اودام مال تكولين فصليه انه ما جبت فصليه
رادت تقاطعه سكتهغ برفعه ايده زينب مو فصليه زينب بت قبل ما تكون مرة رعيد كرامتها من كرامته عمج ما قبلت جنه تدخل بهذا البيت وهيه بدون مهر كادر اجيبها هيج واخليها خدامه بس ما اقبل على نفسي زوجه ابني تدخل فصليه فعلمود هيج خليت مهر وسويت زواج وكلت نروح نخطب رسمي وخليت مقدم ومؤخر وين الفصليه بلموضوع صاح عليها بزمخه

خوله.. عمي تجاوزت عليه

.. اي تجاوزت عليج تجين لعمتج وتكولين الها ترديها بغير كلمه مال تكولين الها فصليه جان خليتي حرمه الي

نط رجلها بويه انه واكف ما احترمت عمي سكته وشنو انته من يمتى انتم تدخلون بمشاكل نسوان
ما اقبل لا انته ولا رعيد تدخلون كلكم مو بس انتم كومي يالله طيح على مرت حماج وبوسي راسها هيه رفضت عمي ما سويت شي

كلها تكسرين كلامي رجلها خزرها كامت وهيه عيونها تجدح باست راسي جنت واكفه بصف رعد كلي بويه يالله طيحي على راسج مرة اخوج وبوسيها بستها

من اليوم ورايح ما اريد مشاكل وانتم الثنين سمعوني نسوان هذني بينهن تدخل الغيره وتدخل النفسيه وكلشي ما اريد يخربن بينكم
رعد وابو علي صار يابه
كامت خوله ردت اروح رعد كام وراي صاح عليه كله مرتك حامل دير بالك عليها بويه مو جايبها وتدفع بيها لا يروح يصير بيها شي التفت عليه خزرني

طلعت من الديوانيه كلي بهمس ليش ما حجيتي وين دره ابوي وشلون

ليش انته انطيت فرصه كبل اجيت عليه اليوم من طلعت تخربطت وعمتي راحت ودت تحليل وطلعت حامل

هاا زين يارب حسيت فرح كلي صعدي على كيفج صعدت مو مثل توه نزلني ليكول دفر يسح بي سح

وصلت لباب الغرفه كال
هاا حكه صدك نسيت اهلج خابروا امج تكول ندك وماكو وينها

يااا هاج خابريهم
اتصلت عليهم كالت وينج
سلمت وبلغتهم انه حامل امي خطيه تصلي وديري بالج على روحج حتى نست على شنو اتصلت عليها

هاا يمه على شنو متصله كايله لرعد خلي تخابر

هههه والله نسيت حتى استحيت من رجلج اكلج ابوج كال خلي يجون يخطبون هنا

هاا والله
اي بلغيهم اوك سديته منها بلغت رعد يروح يكل لعمي
لا والله هسه ابشر صويحبي اتصل بجواد يبلغه وكله لا تكول انه كتلك تعال لابوي العصر

العصر وطبوا عمي صاح عليه بلهول تعاي عمي اهلج ما ردوا خبر

هاا اي ردوا مساع خابرت امي

وليش ما تحجيتي

مو جنت نايم ما حبيت اكعدك

الله يريح بالج ويتمم عليج خوش جاا خابري اهلج الجمعه احنه يمهم

..................................
رفل
خابرت زينب تبلغ امي ضليت اجهز روحي بدون فرحه ولا شي جنت ضايجه من كل شي حتى امي تكلي جن مجبوره ما عبالك خطبتج راح تصير شمالج
يحظي شوفي البنات من يسمعن روحهن راح ينخطبن الضحكه تشك الحلك وانتي هل فهاوه ما ادري منين اجتج ما جنتي هيج شمالج

جانت تحجي وانه مو يمي اجن خواتي اثنيهن
جنت احجي بكلبي وياه احسه يسمعني وينك تعال احمد معقوله تقبل انزف لغيرك هيج هنت عليك لحد هاي اللحظه ما مصدكه انزف لغيرك ليش شنو سويته الك لحد هاي اللحظه اريدك احمد والله لو تجي اوكف بوجه الكل واكول اريده ما اريد اتزوج غيره

جانت اختي الجبيره واكفه على وحهي تحف بي بعد يومين الخطبه يوم الجمعه جانت ليلة اربعاء بوكتها زينب اجت وي اختي جابهن رجل اختي الجبيره

جنت ميته وبس جسد بلا روح حتى الضحكه بهاي السبوع الي كالوا عليه نسيتها
عمي ابوي بلغهم كله انشالله الخميس يمكم وصلوا النه الخميس عمامي الباقين كالوا بيوم المهر
اهل الولد كالوا فد مره هو خطبه وهو نلبس حلقات ومهر سوه

..........................
سمعنه صوت الطلق جان مثل الصلي خرط تقربيآ شاجور كامل خلص
وصوت خشن بي بحه اعتقد واحد رايح صوته يمكن جان  يبجي  وينهم وينهم الي بيكم رجال خلي يطلع يواجه اذا انتم زلم بيكم حظ ... يتبع

منى الطيف وصلوا البارت ١٠٠٠ صوت سووا تاكات لاصدقائكم تعليقاتكم خل اشوفها الحلوة مثلكم لا تنسون التصويت 😍😘