تحميل رواية تزوجتها رافة بعائلتها بقلم اية محمد pdf

♡

الفصل الحادي عشر♡♡♡

يوم الخطوبة

وصل جريح وأهله المنصورة وعدو على بيت نرمين وأخدوهم وراحو يجيبو الشبكة

ف محل الدهب

واقفة نرمين بتختار دبلة ومعاها وردة وولاء ويسرا مامت جريح، وجريح واقف مع أحمد وحازم ووالده ونائل بلامبالاة، خبطه حازم ف كتفه وقاله بصوت واطي: ما تروح تنقي الشبكة مع نرمين

جريح: هي بتختار مش مستاهلة ومعاها ماما ووردة وطنط

حازم بإستغراب: مش مستاهلة!! وماما ووردة وطنط!! روح ي عم نصيحة مني عشان هيطلع عليك إنت ف الاخر

جريح بعدم فهم: قصدك إيه؟!

حازم: بعد الجواز هتسألك ليه ما اختارتش معايا الشبكة هتقولها إيه؟! ماما وطنط نقوها معاكي!!

جريح بتعجب: فيها حاجة أما اقول كده؟!

حازم بصدمة: لا لينا قعدة مع بعض أديك من خبرتي إنت معلوماتك صفر، دي فيها حاجات وخناقات ومشاكل اسمع من أخوك وريح نفسك أقف جنبها وخلاص

جريح بملل: طيب

راح جريح وقف جنب نرمين اللي قالت بفرحة: كنت زعلانة إنك بعيد، كويس إنك جيت يلا اختار معايا الدبلة

جريح بلامبالاة: شوفي اللي يعجبك إنتي

نرمين برفض: لا اختارلي إنت

جريح بتساؤل: هيعجبك ذوقي؟!

نرمين وهي تهز رأسها بإيجابية: أكيد

جريح وهو بيختار دبلة: طيب ي ستي، اختار واحدة وقال: إيه رأيك في دي؟!

نرمين بإعجاب: روعة عجبتني برده أول ما شوفتها، يلا دورك نقي دبلة ليك

جريح: اختاري معايا

نرمين بفرحة: أوك 

نقو مع بعض الدبلة وخلصو وقررو يلبسوها في بيت نرمين، رجعو البيت وأول م وصلو اتفاجئو بالباب مفتوح وصوت أغاني من جوه البيت، دخلو البيت بسرعة ولقو مجموعة من البنات والولاد قاعدين في البيت، بصو لبعض بإستفهام وقال أحمد بإستغراب: مين دول؟!

مكملش جملته ولقى نرمين بتجري على البنات وحازم بيجري علي الولاد وقالو هما الاتنين بفرحة: يلا نخربها

بدأو يرقصو نرمين مع صحابها وانضمت ليهم وردة، وحازم مع صحابه تحت صدمة من العيلتين

بعد شوية نرمين قالت لصحابها: تعالو ندخل الاوضة نهيص، بعيد عن الزحمة دي

بعد دخولهم مسك حازم ازازة غريبة وشرب منها وبدأ يتحرك بعشوائية ويرقص ويغني مع الأغنية بطريقة هبلة تحت صدمة أحمد والبقية، قرب جريح ونائل منه بسرعة ومسكوه قبل ما يقع وقعدوه على كرسي

حازم بصوت واطي ل جريح ونائل: امسكوني الله يستركم الميه سكرتني

جريح بصدمة: ميه!!

غمز حازم ل جريح وقاله: احنا بتوع منكر برده ي برنس

نائل بصدمة هو الأخر: يخربيتك ابوك هيحصله حاجة

حازم بضحك: خلينا نتسلى شوية ي عم

قرب أحمد منهم وقال بصدمة ل حازم: بتشرب ي حازم؟!

حازم بتمثيل السكر: إنت تعرف عني كده ي حاج؟!

أحمد بعصبية: دي أخرة تربيتي ليك ي حازم، بتحرجني قدام خطيب أختك وأهله

حازم وهو بيغمض عينه ويفتحها: أنا معملتش حاجة ي بابا

رفع أحمد إيده يضرب حازم بالقلم لكن جريح مسكها وقاله بضيق: المتخلف ده مش شارب حاجة ي عمي، الإزازة كان فيها ميه

أحمد بصدمة: ميه!! إزاي بمنظره ده؟!

قام حازم وقف وقال بحزن مصطنع: مكنش العشم ي حاج، تشك ف ابنك إنه بيشرب وكمان كنت هتضربني، إنت اتغيرت ي بابا

أحمد بغضب: وإنت بروح أمك مستنيني أقف أسقفلك وإنت بتطوح يمين وشمال!!

حازم بضيق: ولو ولو حتى لو شوفتني بشرب بجد تكدب عينك ي أحمد، المفروض تكون واثق ف تربيتك ي جدع

أحمد بصدمة: جدع!! اصبر عليا، البهوات بتوعك بيعملو إيه هنا؟!

حازم بلامبالاة: جايين يِحْيو الخطوبة

أحمد بغيظ: وحيات أمك

حازم: ااه والله

أحمد بغضب: أنا مش مانع دخول الأشكال دي هنا؟!

حازم وهو يهز رأسه بإيجاب: ااه

أحمد بنفاذ صبر: طيب مشيهم

حازم برفض: مينفعش بعد الغدا

أحمد بتعجب: غدا!!

حازم: ايوا احنا صحاب واجب برده، الناس جت وجَّبَتْ وفرحت معانا أقل حاجة نغديهم

أحمد بسخرية: ومالو غدي صحابك، ادخل اطبخلهم بالمرة

حازم بلامبالاة: طلبت أكل وعلى وصول

أحمد بوعيد: ومالو راجعلك ي أخويا 

حازم وهو يهز رأسه بإيجاب: في انتظارك ي أبو حميد

راح أحمد عند نرمين الاوضة وخبط على الباب، فتحت نرمين وهي رابطة طرحة على وسطها وقالت بإستغراب: في حاجة ي بابا؟!

أحمد بغيظ: بتعملي إيه ي روح أبوكي؟!

نرمين: برقص مع صحابي

أحمد بنفاذ صبر: بترقصي!! ما شاء الله، ابقي خلي صحابك يلبسوكي شبكتك

نرمين بلامبالاة: طيب ا. وكملت بتذكر: شبكتي!! أيوا شبكتي أنا نسيت والله ي بابا، يلا يلا بسرعة جريح بره هيقتلني وطلعت تجري على الصالون

مسكها أحمد بسرعة وهو بيقول بعصبية: هتطلعي رابطة وسطك ي آخر صبري؟!

نرمين بإحراج مصطنع: لا مؤاخذة ي حاج مخدتش بالي، فكت الطرحة ونادت لصحابها وخرجو الصالون

قعدت نرمين وجريح على كرسين وحواليهم صحابها ووراهم حازم وصحابه، دخلت ولاء ويسرا بينهم وقالت ولاء: خلونا نشوفهم وهما بيلبسو الشبكة احنا زي أهلهم ووقفو جنبهم

بصت نرمين ل جريح وقالت بصوت واطي: سوري

بصلها جريح بلامبالاة وقال: جيتي على نفسك وخرجتي ليه؟!

نرمين بتوتر: ما يبقاش قلبك اسود ي جريح

جريح بوعيد: طيب هنشوف الموضوع ده بعدين هاتي ايدك لبسها الدبلة وظغرطت ولاء بفرحة

نرمين ل جريح: إيدك ولبسته الدبلة وظغرطت يسرا بفرحة

سقفو العيلتين وصحاب نرمين وحازم وبدأت المباركات

بعد فترة مشيو صحاب نرمين وحازم بعد م اتغدو طبعا

قعدو العيلتين ف الصالون بعد الغدا يشربو قهوة

ولاء ل نرمين: م تاخدي جريح وتقفو ف البلكونة شوية ي نرمين

نرمين بخوف: لا.

رأيكم♡♡♡

رأفةً بعائلتها

ل/ آية محمد

د

واقفة عندك كده ليه ي آنسة؟!

كنت واقفة ف شارع بقالي كتير مستنية عربية، لكن بسبب المطر مفيش عربيات، لحد م لقيت القمر أقصد الاستاذ واقف قدامي بعربيته وفاتح الشباك وبيكلمني

رديت عليه بقرف وقولت: وانت مالك؟!

دور العربية عشان يمشي وهو بيقول: انا غلطان

فكرت اني مش هلاقي اي مواصلة فمضطرة اركب معاه مش عشان هو وسيم لا خالص

نرمين بسرعة: هو انت هتمشي؟!

الشاب: شايفة اي؟!

نرمين: شايفة انك مينفعش تسيبني هنا

الشاب بسخرية: مش كنت وانا مالي من تلت ثواني!!

نرمين بإبتسامة: انت لسه فاكر؟! قلبك اسود

الشاب: طيب اركبي

نرمين بتوتر: وانا اي الا يضمنلي انك م تخطفنيش؟!

الشاب بتعجب: اخطفك!! تمام خليكي واقفة وهيمشي

نرمين بسرعة: استنى بس

الشاب بتساؤل: خير؟!

نرمين: اقصد يعني م انت ممكن تعملي حاجة

الشاب: تصدقي ممكن برده لا خلاص م تركبيش معايا وهيمشي

نرمين بسرعة: استنى

جريح بنفاذ صبر: نعم؟!

نرمين: انت باين عليك محترم

الشاب وهو يهز رأسه برفض: لا انا مش متربي

نرمين: م تقولش كده علي نفسك

الشاب: انا عارف نفسي مش هتبقى ف امان معايا انا ماشي

نرمين بلوم: وهتسيبني لوحدي؟!

الشاب بضيق: هو اي الا وهتسيبني لوحدي؟! انا خلفتك ونسيتك ي آنسة؟!

نرمين: لا

الشاب: يبقى تكملي وقفتك وتركبي مع أي حد

نرمين: يرضيك اركب مع حد غريب؟!

الشاب: هو انا من بقيت عيلتك ي أستاذة!!

نرمين: انا ارتاحتلك والله

الشاب: لا معلش انا ممكن اخطفك وممكن اعمل فيكي حاجة

نرمين: لسه قلبك اسود؟!

الشاب بملل: اركبي اركبي

نرمين بخوف: هتعمل ليا حاجة؟!

الشاب برفض: لا

نرمين بشجاعة مصطنعة: م تقدرش اصلا

الشاب بسخرية: ليه ان شاء الله؟!

مدت ايدها ومسكت صوابعها وهي بتقول: عِد معايا بابا رائد، عمي لوا، خالي قاضي، عمي التاني محامي، خالي التاني،.

الشاب بمقاطعة: متهم وكام كرسي ويقعدو ف محكمة صح؟!

نرمين بغباء: انت عرفت منين؟!

الشاب بغضب: اركبي ي آنسة وبطلي هطل

نرمين: هتعمل ليا حاجة؟!

الشاب بعصبية: برده!!

نرمين بسرعة: خلاص هثق فيك

الشاب: الله يسترك

نرمين: ربنا يكرمك

الشاب: ايه؟!

نرمين: ايه؟!

الشاب بلامبالاة: مفيش اركبي

ركبت العربية ومشي وبعدين سألها: اوصلك فين؟!

نرمين: المنصورة

وقف العربية بصدمة: قولتي اوديكي فين؟!

نرمين بإستغراب: المنصورة في حاجة؟!

الشاب: انتي عارفة احنا فين؟!

نرمين: ايوا ف القاهرة

الشاب: وراحة المنصورة بالليل ليه؟!

نرمين: مروحة البيت

الشاب: انتي من المنصورة اصلا؟!

نرمين: ايوا

الشاب: وبتعملي اي ف القاهرة؟!

نرمين: كليتي هنا

الشاب: ومروحة متأخر ليه كده؟!

نرمين: انا طلعت بعد المحاضرات كانت الساعة خمسة، روحت جبت حاجاتي من السكن وقولت هلحق المواصلات لسه بدري، فضلت واقفة الوقفة الا انت شوفتني عليها دي لدلوقتي والساعة بقت تسعة ومفيش مواصلات خالص

الشاب: كنتي استنى لبكرة

نرمين: مينفعش عندي فرح ولازم ابقى موجودة من الصبح

الشاب: ليه يعني؟! انتي ممكن توصلي ع الضهر او العصر عادي

نومين: لا عشان اروح البيوتي سنتر مع صحبتي

الشاب: العروسة صحبتك؟!

نرمين: ايوا

الشاب: طب اوصلك لفين طيب؟! مش هعرف اروح المنصورة انا

نرمين بعتاب: يرضيك تنزلني واركب مع حد غريب؟!

الشاب بغيظ: دا انتي مصرة بقا خلاص هوصلك

نرمين: فيك الخير والله

الشاب: شكرا، هكلم بابا طيب اعرفه اني رايح المنصورة

كلم والده وعرفه عشان م يقلقش فصل معاه وطلع بالعربية

نرمين: انت كنت جاي منين؟!

الشاب: من الشغل

نرمين: ااه تمام

الشاب: كلية اي؟!

نومين: هندسة

الشاب: حلو زيي تشتغلي عندي بقا

نرمين برفض: لا مش هشتغل

الشاب: ليه؟!

نرمين: انا مش بتاعت شغل بصراحة، انا براضى عيلتي بالكلية غير كده انا مستنية قرة عيني، الا اتعلمو خدو اي يعني؟! والبنت تلف تلف وترجع للطبخ

الشاب بسخرية: منطق

نرمين بفخر: لا دا انا أعجبك، تسمحلي انام شوية لاني صاحية بدري؟!

الشاب: اوك مفيش مشكلة

نرمين: اول م نوصل المنصورة صحيني عشان اعرفك البيت فين

الشاب بوقاحة: انا ممكن اوصلك اوضتك كمان عادي

نرمين بغضب: انت قليل الادب

الشاب بلامبالاة: عارف؛ انتي مرتبطة؟!

نرمين: بقولك مستنية قرة عيني تقولي مرتبطة!!

الشاب: طب نامي نامي

نرمين: طاااه

الشاب: طاااه!! اللي انتي شيفاه.

رأيكم وأكملها ولا لا؟!

رأفةً بعائلتها

ل/ آية محمد

الفصل الثاني♡♡♡

بعد اربع ساعات وصلو المنصورة

الشاب وهو بيصحيها: آنسة يااا انا م اعرفش اسمك حتى، استاذة ماتت دي ولا اي؟! أستاذة اصحي آنسة، حط صبعه على كتفها وهزها: ي أستاذة يخربيت سنينك بص حواليه ودور على ميه، رش عليها صحيت مخضوضة وصرخت: بغرررررق

الشاب بإستغراب: نقطتين غرقوكي!!

نرمين بإستغراب: انت مين؟!

الشاب: انا جريح

نرمين بنوم: مجروح من مين؟!

جريح بتعديل: انا اسمي جريح

نرمين: وعايز اي؟!

جريح: وصلنا المنصورة بيتك فين؟!

نرمين: وعايز تعرف بيتي ليه؟!

جريح: عشان اوصلك

نرمين: لا مش هقولك ونامت تاني

جريح بصدمة: نعم ي اختي؟! بت يخربيتك نمتي تاني ورش الازازة كلها

صرخت تاني: بغرررررق

جريح: دول كانو كتير حقك

نرمين بلوم: ينفع الا انت عملته ده؟!

جريح: م انتي منوم انا بحسبك موتي

نرمين: بعد الشر عليا، انا لسه عايزة افرح بيا

جريح بفضول: اي سبب هوسك ف الجواز نفسي اعرف؟!

نرمين بإبتسامة: الحب حلو

جريح: ايه؟!

نرمين: حلو اوي اوي

جريح: ده السبب؟!

نرمين: ايوا

جريح بملل: بيتك فين ي أستاذة خلصيني؟!

قالتله العنوان ووصلو قدام البيت ونزلت ونزل معاها

نرمين: اتفضل اشرب او كل حاجة

جريح: لا شكرا

نرمين: طيب انا بشكرك جدا

جريح: العفو معملتش حاجة 

تليفونها رن وكان باباها عرفته انها بره فتح الباب وخرج واستغرب اما لقى معاها شاب

والدها (أحمد) بإستغراب: مين ده ي نرمين؟!

نرمين: ده الباشمهندس جريح ي بابا وصلني لاني ملقيتش مواصلات خالص فاضطريت اركب معاه لان الوقت اتأخر

أحمد بإمتنان: شكرا ي ابني

جريح بإبتسامة: العفو ي عمي، الأنسة زي أختي

أحمد بإبتسامة: تسلم ي حبيبي، يلا ندخل

جريح: طيب أستأذن انا

أحمد: إنت سمعت انا قولت ايه؟! يلا ادخل

جريح بإستغراب: ادخل ايه ي عمي م ينفعش لازم امشي

أحمد: الوقت اتأخر والطريق طويل الصباح رباح

جريح: مينفعش والله انا م عرفتش حد من عيلتي

أحمد بتصميم: كلمهم جوه ادخل يلا

جريح بإحراج: ي عمي.

أحمد بمقاطعة: وفر كلامك حازم ابني جوه هتبات معاه

جريح بإستسلام: حاضر 

دخلو البيت وقعدو في الصالون 

أحمد: قومي ي نرمين هاتي كوباية مايه ل الباشمهندش

نرمين وهي بتقوم: حاضر

جابت الميه وقدمتها ل جريح: اتفضل

جريح بإبتسامة: شكرا

أحمد: تعالي ي نرمين عايزك دقيقة بعد اذنك ي ابني

جريح: براحتك ي عمي

مشيو وهو طلع موبايله وعرف والده انه هيبات بره النهاردة

أحمد خد نرمين ووقفو ف جنب طلع فلوس من جيبه وقالها: خدي دول وروحي هاتي عشا من السوبر ماركت للراجل زمانه جاع جاي من مشوار طويل، وأمك نايمة ومفيش اكل عشان لسه من ساعتين متعشيين

نرمين بصدمة: نعم ي حاج؟! يعني انتو اتعشيتو من غيري وكنت هاجي مش هلاقي اكل ليا!! وبعدين هو الراجل بس اللي جاع؟! م انا جاية من نفس الطريق معاه وجعانة انا كمان

أحمد بسخرية: انتي طول عمرك جعانة اخلصي روحي

نرمين برفض: الساعة واحدة ي بابا مش هعرف اخرج لوحدي خلي حازم

أحمد: اخوكي نايم

نرمين برفض: صحيه

ضربها على كتفها وقال بغيظ: اخلصي ي بت اخوكي نايم تعبان

نرمين بغيظ وهي بتمسك كتفها بألم: تعبان من ماتش الكورة ي بابا مكانش جاي من القاهرة او ف الشغل

أحمد بغيظ: بطلي طولة لسان ي نرمين

نرمين بغضب: ي حاج الوقت اتأخر افرض اتخطفت؟!

أحمد بتريقة: متقلقيش محدش بيبصلك اصلا

نرمين بغيظ: وليه الصراحة ي حاج؟! طب مش راحة

أحمد بصوت عالي: هتروحي ي نرمين

نرمين: ي بابا ا.

جريح بتساؤل: في حاجة ي عمي؟!

أحمد بإحراج: لا ي حبيبي

نرمين بغيظ: لا في بابا عايز يطلعني دلوقتي اجيبلك عشا

جريح: لا ي عمي شبعان والله، ولا اي حاجة تسلم

أحمد: مينفعش طبعا انت جاي من مشوار طويل اخلصي ي نرمين

نرمين: ي بابا الوقت اتأخر مش هعرف اروح لوحدي

أحمد وهو بيضغط على سنانه بغيظ: معلشي روحي النهاردة بس

نرمين: ي با.

جريح بمقاطعة: خلاص ي عمي هروح معاها

أحمد: خليك ي جريح هي هتروح

بصيت ل بابا بغيظ وقولت: خليه يجي ي بابا

أحمد بغضب: ماشي خلي بالك منه ي نرمين

نرمين بغيظ: ومالو ف عينيا ي حاج

طلعنا من البيت

جريح بتساؤل: نروح بالعربية ولا المكان قريب؟!

نرمين: لا مش مستاهلة دا ف الشارع اللي جنبنا

جريح: أوك

مشينا وكنا ساكتين بس.

جريح: واضح ان باباكي بيحبك جدا

نرمين بإحراج: بيموت فيا

فجأة وقف.

رأيكم♡♡♡

رأفةً بعائلتها

ل/ آية محمد

الفصل الثالث♡♡♡

جريح: واضح ان باباكي بيحبك جدا

نرمين بإحراج: بيموت فيا

فجأة وقف

بصيتله باستغراب وقولت: وقفت ليه؟!

لقيته فجأة بيضحك اوي ووشه أحمر وبيقول من بين ضحكه: هههه انا مكنتش قادر اكتم الضحك هههه، بيقولك محدش بيبصلك ههههه، وخلي بالك مني، ومش سايبنلك عشا ههههه

نرمين بإحراج: دا انت سمعت كل حاجة بقا؟!

جريح بضحك: دي حقيقة ههههه

فضل يضحك لمدة خمس دقايق ف.

نرمين بغيظ: طب خلاص

وقف ضحك وقال: خلصت خلاص

كملنا مشي وكنت بضحك بصوت واطي من احراجي علي الموقف اللي الحاج حطني فيه وببتسم عشان شكله حلو اوي وهو بيضحك

وصلنا السوبرماركت واشترينا حاجات خفيفة ورجعنا البيت جهزت الاكل وحطيته على السفرة وقولت بصوت عالي: يلا ي بابا

أحمد: ماشي يلا ي جريح

قعدو ع السفرة وقعدت معاهم

أحمد بتساؤل: اي ده انتي قعدتي ليه؟!

نرمين بإستغراب: هو المفروض اقوم؟!

أحمد بسخرية: تخيلي

نرمين بتعب: بابا انا جعانة والله

أحمد: قومي الاكل ده ل جريح

نرمين بغيظ: ي سلام انا اللي جيباه

أحمد: وانا اللي دفعت الفلوس

نرمين: وانا اللي جهزت السفرة

أحمد: وانا اللي جايب السفرة

نرمين: وانا.

جريح بمقاطعة: خليها تاكل ي عمي بالله عليك

أحمد بغيظ: عشان خاطرك انت بس

جريح: تسلم ي عمي كلي ي نرمين

نرمين بإمتنان: روح ربنا يسترك

جريح بملل هز رأسه بإيجابية من غير كلام

بعد الأكل

أحمد: قومي اعملي شاي

نرمين بتعب: بابا انا نفسي انام

أحمد: بعد الشاي

نرمين: ي بابا

أحمد: قومي ي بت

قومت بغيظ عملت الشاي وقدمته وقولت: انا داخلة انام

أحمد بتساؤل: مين هيغسل الكوبيات؟! 

دخلت اوضتي وانا حاسة اني هتشل من بابا بعد م غسلت الكوبيات، رميت نفسي ع السرير بتعب ونمت على طول

جريح بتعب: عمي انا عايز انام لاني فصلت

أحمد: طبعا قوم معايا

وخدو أوضة وفتح الباب ودخل وجريح وراه، شغل النور لقي حازم نايم على بطنه والبطانية ع الارض والاوضة كإن حاصل فيها زلزال، الهدوم ف كل ناحية على الارض والكراسي والسرير والكوتش ع الكرسي وزلزال زلزال يعني

بص أحمد بإحراج ل جريح اللي بصله بإبتسامة وقال: كلنا كدا

أحمد بإبتسامة: حيث كدا ايدك معايا نحرك الجثة دي ف جنب من السرير عشان تعرف تنام

جريح: ماشي بس كدا مش هنقلقه؟!

أحمد بسخرية: نقلق مين ي ابني؟! دا لو حصل ايه جنبه مش هيقوم، نومه تقيل جدا 

حركوه بالعافية ونام جريح جنبه بتعب بعد خروج أحمد

بعد ساعتين

حس جريح بحازم بيحضنه وبيقول بنوم: سندس ي حبيبتي بحبك اوي

زقه جريح وقال بنوم: سندس مين ي عم؟! استهدى بالله كده

قرب منه حازم وحضنه تاني وقال: بطلي كسوف بقا ي سندس انتي ف اللي ف القلب ي بت

فاق جريح وقال: قلب ايه ي عم؟! اي العيلة دي ياربي، انا مش سندس ي حازم اصحى، وزقه وهو بيضربه على كتفه عشان يصحى

صحي حازم وقال بنوم: انت مين؟!

جريح وهو بيقعد: انا سن. انا جريح ي عم

قام حازم قعد وقال: معرفتكش برضو بتعمل ف. اي ده؟! حراااامي حرااامي ومسك جريح من هدومه وضربه بوكس، زقه جريح وقال بغضب: حرامي اي ي غبي انا مش حرامي

حازم وهو بيهز رأسه بإيجابية: هصدقك حاضر ومسك جريح من كتافه وهو بيقول بصوت عالي: ي باباااااا

جريح وهو بيكمم فمه: بس ي حازم بقا ابوك نايم ي عم

حازم بإستغراب: انت عرفت اسمي منين؟! انت مين؟!

جريح وهو بيتاوب: هقولك بكرة عشان جعان نوم والله

حازم بغضب: بكرة!! انت هتقعد هنا ل بكرة؟! ياااا باااااباااا

جريح وهو بيضربه بوكس: اخرس بقا دا انت بني آدم رزل، انا بشمهندس جريح من القاهرة وصلت اختك لهنا وابوك أصر اني أبات هنا النهاردة وياريتني م سمعت كلامه

حازم بإحراج: خلاص ي عم ميبقاش قلبك اسود، ما هو برضو مش حاجة عادية اني الاقي واحد غريب ف اوضتي ومتفاجئش

جريح: باباك الا قالي ادخل أنام معاك

حازم بإبتسامة: نورتني ي عم والله

جريح بنوم: طب انا نفسي انام ممكن؟!

حازم: ايوا طبعا اتفضل

نامو الاتنين وقرب حازم من جريح اللي زقه وقاله: ابعد ي عم الله يكرمك

حازم: اي ي عم عادي

جريح بغضب: عادي ايه انا مش سندس والله

حازم بإستغراب: انت عرفت سندس منين؟!

جريح بضحك: منك ونام بقا الله يكرمك.

رأيكم♡♡♡

رأفةً بعائلتها

ل/ آية محمد

الفصل الرابع♡♡♡

تاني يوم صحي حازم وجريح على صوت خبط ع الباب

حازم بنوم: قوم افتح بالله عليك

جريح بنوم هو الاخر: بالله عليك افتح انت عشان دا بيتك انت

حازم بإصرار: انت مبقيتش غريب افتح افتح متتكسفش ورجع نام

جريح بغضب: الله يخربيتك

الباب خبط تاني قام جريح فتح ولقى ست كبيرة استنتج انها مامت نرمين (ولاء) فقال بأدب: أهلا بحضرتك

ولاء بإبتسامة: أهلا ي ابني شكرا انك وصلت نرمين

جريح بإبتسامة: لا العفو انا معملتش حاجة

ولاء: كلك ذوق ي حبيبي صحي حازم وتعالو عشان تفطرو

جريح بسرعة: لا لا ولا أي حاجة انا يدوبك انزل عشان قدامي الطريق طويل

ولاء: وده اسمه كلام برضو هي ساعة هناكل لقمة سوا وتشرب الشاي وتتكل على الله

جريح: والله ي ست الكل على عيني بس مش هينفع

ولاء: انا غلبت يا حاج تعالي اتكلم انت معاه

أحمد: اللي ام حازم قالت عليه هيتنفذ

جريح: ي عمي بس.

أحمد بإصرار: متتعبش نفسك هتفطر قبل م تنزل، صحي حازم يلا وتعالي انت وهو وسابه ومشى

دخل جريح الاوضة وهو بيقول كلام مش مفهوم، شافه حازم وقال بضحك: خد من ده كتير، هنا تقول حاضر تريح نفسك على طول

ضحك جريح وقال: حاضر ي عم بينا نفطر واعمل حسابك هتحكيلي عن سندس واحنا بنشرب الشاي

أحمد: بس كده عيني ي برنس

على السفرة

قاعد على الكرسي الرئيسي أحمد ومن اليمين ولاء ونرمين ومن الشمال حازم وجريح كان الهدوء يعم المكان قطعته ولاء وهي بتقول: اي ي جريح مش بتاكل ليه؟!

جريح بحرج: اصل انا مش بحب افطر

ولاء: كُل أي حاجة طيب انت وراك طريق طويل

جريح: هبقي أجيب أي حاجة علي الطريق لكن دلوقتي أنا مش قادر والله

أحمد: م تسمع الكلام ي ابني بطل عناد

جريح: ي عمي ا.

حازم: م تاكل ي عم احنا هنتحايل عليك؟!

جريح: اسكت ي بتاع سندس

حازم: حاضر

نرمين وهي بتقدمله سندوتش: اتفضل ده ي بشمهندس

مد ايده وخده وقال: شكرا

نرمين بإعجاب: لا مؤدب

جريح بإستفهام: قولتي حاجة؟!

نرمين برفض: لا

بعد الأكل قعد أحمد مع جريح وحازم ف الصالون ونرمين وولاء ف المطبخ

ف الصالون

أحمد بتساؤل: وانت ي جريح شغال؟!

جريح: ايوا ي عمي عندي شركتي الخاصة

أحمد بإعجاب: ما شاء الله، سامع يلي ف بالي؟!

حازم وهو بيهز رأسه بإيجابية: سامع ي حاج

جريح وهو بيهمس ل حازم: الموضوع ف تلقيح مش كدا؟!

حازم بموافقة وهمس: لا كدا، الحاج بيهزقني بس ف الخباثة عشان انت قاعد 

جريح بإستغراب: ليه انت خريج إيه؟!

حازم: بعيد عنك آداب

جريح وهو بيبعد عنه بهزار: ابعد عني ي عم انا شاكك فيك من امبارح اصلا

حازم بضحك: آداب الكلية ي هندسة

جريح: اي حوار سندس معاك؟!

حازم: الحب عارفه؟!

جريح: اسمع عنه ماله؟!

حازم: خبط على بابي

جريح: ورديت عليه؟!

حازم: جريت فتحتله م سألتش مين اللي على الباب حتي

جريح بإهتمام: وبعدين؟!

حازم: لقيت سندس

جريح: هي اللي بتخبط؟!

حازم: ايوا

جريح: وبعدين؟!

حازم: قولتلها اتفضلي ي قلبي اتكسفت مني ودخلت على طول أوضة نرمين

جريح: هي تعرف نرمين؟!

حازم: ااه تبقى صحبتها

جريح: امم واعترفتلها بحُبك؟!

حازم وهو يهز رأسه برفض: لا

جريح: ليه؟!

حازم: أصل.

جريح: أصل إيه؟!

حازم: فرحها النهاردة

جريح بصدمة: ايه؟!

حازم بتكرار: هتتجوز النهاردة

جريح بسخرية: انت بتكررها؟! انت غبي ي ابني؟! بتحب واحدة متجوزة؟!

حازم: كانت سنجل اما عرفتها

جريح بنفاذ صبر: لا اله الا الله وما عرفتهاش ليه انك بتحبها؟!

حازم: م انا سألت نرمين ان كان في حد ف حياة سندس قالتلي ااه واللي هو هيتجوزها النهاردة ف قررت أضحي بحبي عشان حبيبتي تاخد حب حياتها

جريح بتأثر مصطنع: أثرت فيا ي ابني، انت نموذج مثالي للحب

حازم بإمتنان: الله يكرم أصلك

جريح بتريقة: يكرم أصلي!! ااه هستني ايه من اخو نرمين

جت نرمين ومامتها قدمو الشاي وقعدو معاهم، بعد م خلصو قام جريح وقال: طيب ي عمي أستأذن أنا

قامو كلهم وقال أحمد: نورتنا والله ي جريح.

رأيكم♡♡♡

رأفةً بعائلتها

ل/ آية محمد

الفصل الخامس♡♡♡

قام جريح وقال: طيب ي عمي أستأذن أنا

قامو كلهم وقال أحمد: نورتنا والله ي جريح

جريح بإبتسامة: تسلم ي عمي انا فرحت جدا بالليلة دي واتمنى اقابلكم تاني

أحمد: ابقى كررها احنا اتعودنا عليك

جريح: اكيد ي عمي ان شاء الله

جريح ل ولاء: سلام ي طنط

ولاء: سلام ي حبيبي

جريح ل نرمين: باي ي بشمهندسة

نرمين بإمتنان: مع السلامة ي بشمهندس، وشكرا مرة تانية على امبارح

جريح: العفو

جريح ل حازم: سلام ي مُضحي

حازم خده من ايده وقاله: لا انا جاي معاك

جريح بإستغراب: جاي معايا فين؟!

حازم: اوصلك عند عربيتك ي عم

جريح: ااه طب تعالى، سلام ي جماعة

ولاء: مع السلامة خلي بالك من نفسك ي ابني وركز ف سواقتك

جريح: حاضر ي طنط

خرج هو وحازم من البيت وقفو قدام العربية وقال حازم: رقمك ي برنس

جريح: خد ي باشا بس ليه؟!

حازم: عشان أكلمك أحكيلك مشاكلي العاطفية

جريح بسخرية: ومالو اكتب ********012 

حازم: الف شكر ي هندسة

جريح: حبيبي، بلاش تفكر في سندس تاني بقا عشان م ينفعش

حازم بحزن: هحاول

جريح: وبطل تحلم بيها

حازم: هحاول

جريح وهو بيطبطب على كتفه بتشجيع: ربنا معاك

حضنه حازم وقاله: بعيدا عن الهزار انا حبيتك والله ي عم

جريح بتريقة: القلوب عند بعضها وانا والله م شوفتش حد مهزأ اكتر منك

حازم بغباء: تسلم ي برو

جريح بنفاذ صبر: سلام ي حازم اصلي هتشل لو وقفت معاك اكتر من كده

حازم: مع السلامة

ركب جريح عربيته وشاور لحازم ومشي، رجع حازم البيت

جوا البيت

ولاء: كويس جريح ومحترم

أحمد: ااه ما شاء الله عليه ومهندس وعنده شركته

ولاء: ما شاء الله، اي ي نرمين مش هتروحي ل سندس؟!

نرمين وهي بتقوم تقف: لا هقوم دلوقتي ألبس عشان أروح معاها البيوتي سنتر وحازم حبيبي هيوصلني

حازم بفرحة: عيون حازم حبيبك طبعا ي روحي أوصلك، ووصلك البيوتي سنتر كمان

نرمين بخبث: انا برده؟!

حازم بإحراج: م انتي عارفاني صاحب واجب

نرمين بغيظ: ايوا طبعا وبالذات مع سندس

قام حازم وزق نرمين دخلها اوضتها وقال وهو بيضغط على سنانه بغيظ: ااه م هي زي اختي ي حيوانة

نرمين بسخرية: هصدقك وأكدب عينيا

بعد نص ساعة جهزت نرمين وخرجت مع حازم وراحت ل سندس البيت اللي قابلتها على الباب وقالت بعصبية: ما لسه بدري ي أستاذة نرمين

نرمين بخوف: خلاص ي ولية انتي هتاكليني؟! كان في ضيوف عندنا ومعرفتش أخرج

نرمين بغضب: وده وقت ضيوف د. ازيك ي حازم؟!

حازم بحب: أهلا ي سندس قلبي ألف مبروك

سندس بخجل: الله يبارك فيك عقبالك

حازم بحزن: بعد ايه بقا؟! انا خلاص سنجل فوريفر بعد اللي حصل

سندس بإهتمام: ليه ايه اللي حصل؟!

حازم بوجع: حبيبتي فرحها النهاردة

سندس بصدمة: ي نهار ابيض

حازم بحزن: شوفتي ي سندس اللي حصلي، انا حزين بجد

سندس بشفقة: م تزعلش ي حازم، انت م اعترفتلهاش بحبك ليه؟!

نرمين كانت واقفة بينهم وبتبصلهم هما الاتنين بقرف

حازم بحزن: أصلها بتحبه

سندس بحزن عليه: اووه مين دي؟!

حازم بغباء: انت.

نرمين بسرعة: بس بس اي ي سندس احنا اتأخرنا هنقضيها كلام؟! فين جوزك يوصلنا البيوتي سنتر؟!

سندس: نادر العربية عطلت ومش هيعرف يجي دلوقتي واحنا اتأخرنا ممكن توصلنا ي حازم؟!

حازم بسرعة: طبعا انا عندي أغلى منك ي سن.

خبطته نرمين ف كتفه بسرعة فقال بتلعثم: ي نرمين

نرمين بغيظ: طب يلا عشان م نتأخرش اكتر من كده

وصلو البيوتي سنتر ونزلو ودخلو من غير م يشكرو حازم، فقال بإحراج لنفسه: ألف شكر ي زوما على التوصيلة، لا ي جماعة شكر على واجب أستأذن انا بقا ومشي

بعد كام ساعة ف الفرح

وصلت سندس مع نادر جوزها القاعة ووراها نرمين اللي كان شكلها قمر بتعدلها الفستان، سابت سندس بعد ما قعدت ف الكوشة وراحت تقعد مع أهلها شوية واتفاجأت بوجود جريح معاهم على الترابيزة وقالت بصدمة: انت جيت ازاي هنا؟!

رأيكم♡♡♡

رأفةً بعائلتها

ل/ آية محمد

بارت كمان تعويضا عن بارت امبارح 

الفصل السادس♡♡♡

بعد كام ساعة ف الفرح

وصلت سندس مع مع نادر جوزها القاعة ووراها نرمين اللي كان شكلها قمر بتعدلها الفستان، سابت سندس بعد ما قعدت ف الكوشة وراحت تقعد مع أهلها شوية واتفاجأت بوجود جريح معاهم على الترابيزة وقالت بصدمة: انت جيت ازاي هنا؟!

جريح: جيت بالعربية

نرمين بتعجب: نعم!!

جريح: م انتي اللي سؤالك غريب

نرمين: اقصد جيت امتى انت مش رجعت القاهرة؟!

جريح بتريقة: رجعت ايه ي بنتي م انا قدامك اهو!!

نرمين بغيظ: يووه الواحد ما بياخدش منك إجابة على طول ليه؟!

جريح ببرود: انتي اسألي صح وانا هجاوب

نرمين بغضب: والله م هسألك ي عم، قولي انت ي حازم جه ازاي؟!

حازم: جه بالعربية زي ما قالك

جريح بسخرية: اهو

نرمين بغيظ: والله لنا ماشية عيال رخمة، شكلي حلو ي ماما؟!

ولاء بحب: قمر ي روحي

نرمين ل أحمد: هروح عند سندس ي بابا

أحمد: ماشي وأقفي ف جنب، بلاش حركة كتير

نرمين بطاعة: حاضر ومشيت

جريح شد حازم من إيده وخرجو من القاعة وقفو جنب عربية حازم و.

جريح: قولي بقا رجعتني ليه؟!

حازم بحزن: انا حزين

جريح بإستغراب: ليه؟!

حازم: سندس بتتجوز جوه ي جريح انت نسيت؟!

جريح بتذكر: ااه لا فاكر، بس برده كلمتني ليه؟!

حازم بغيظ: تقف جمبي ي جدع هو انا مش صاحبك؟!

جريح برفض: لا

حازم بإحراج: بلاش تبقى صريح زيادة

جريح بنفاذ صبر: يعني انت عايز ايه دلوقتي؟!

حازم بألم: عايز أنساها

جريح بغيظ: لا اله الا الله وهو انت ي بني آدم عشان تنسى البنت اللي بتحبها تقوم تيجي فرحها وتوديها البيوتي سنتر لا وكمان تزفها للقاعة وتتصل عليا بعد م كنت قربت اوصل القاهرة وتخليني أزفها معاك وجاي تقولي عايز أنساها!! دا جنان رسمي

حازم: بقوم بالواجب ي جريح

جريح بغصب: على حساب قلبك ي متخلف!!

حازم بحزن: ايوا انا متخلف بس؛ بحبها

سابه جريح ودخل القاعة وهو بيقول بنفاذ صبر: ياااارب

دخل لقى نرمين بترقص مع سندس وأمها وأبوها بيرقصو مع بعض فقال بتريقة: لا وبيقولها أقفي ف جنب بلاش حركة كتير وهو بيرقص، العيلة كلها مجانين

راح على الترابيزة وقعد يبص عليهم لحد ما لاحظ ان في شاب بيقرب من نرمين وعايز يرقص معاها فقام بسرعة زق الشاب وقعه وخد نرمين من ايدها تحت استغرابها وقعدو على الترابيزة

جريح بغضب: أقعدي م تتحركيش من هنا

نرمين بعدم فهم: نعم!!

جريح بزعيق: انتي سمعتي انا قولت ايه؟!

نرمين بغضب: لا ما سمعتش وانت مين انت عشان تقولي اقعدي؟! انت ابويا وانا مش واخدة بالي؟!

جريح بغيظ: بلاش كلام كتير أقعدي من سكات

نرمين برفض: مش قاعدة دا فرح صحبتي انا حرة

جريح بعصبية: انتي مخدتيش بالك من الحيوان اللي كان بيقرب منك؟!

نرمين بإحراج: لا طبعا مخدتش بالي مين هو؟! وانا اروح اعجنه

جريح شدها من ايدها قعدها بعد ما قامت: اتنيلي اقعدي وخلاص

نرمين بملل: طب انا عاوزة ارقص

جريح: باباكي قالك أقفي ف جنب وبلاش حركة كتير صح؟!

نرمين وهي تهز رأسها بإيجاب: ااه

جريح بغيظ: ما بتسمعيش كلامه ليه؟!

شاورت بدماغها ناحية باباها اللي بيرقص مع والدتها وقالت بسخرية: انت مش شايف الحاج ي بشمهندس ولا ايه؟!

جريح: ولو، قالك اقعدي تسمعي الكلام

نرمين بغيظ: أديني قعدت هاا أعمل إيه دلوقتي؟!

جريح: اتفرجي وخلاص

بعد نص ساعة

جريح بملل: انا زهقت اوي تعالي نطلع بره شوية

قامو وخرجو من القاعة وفضلو يتمشو

نرمين بإستغراب: هو فين حازم؟!

جريح بسخرية: حازم بيحزن مع نفسه سيبيه

نرمين بحزن: صعبان عليا اوي

جريح بسخرية: انتي هبلة انتي كمان، هو ايه اللي صعبان عليا اوي!! دا بيحب واحدة فرحها النهاردة، دا مجنون

نرمين بإستغراب: هو قالك؟!

جريح بغيظ: للأسف ما هو ده اللي رجعني

نرمين: وهتمشي امتى؟!

جريح بإحراج: اي السؤال الرخم ده؟!

نرمين: لا مش القصد يعني هترجع القاهرة امتى عشان شغلك؟!

جريح: باباكي أصر اني ارجع معاكو البيت النهاردة بعد الفرح بما ان النهاردة الجمعة اجازة من الشغل وكده

نرمين: ااه وانت وافقت؟!

جريح بإستغراب: هو المفروض أرفض؟!

نرمين بسخرية: خدت علينا اوي ي بشمهندس

جريح بغيظ: اي قلة الذوق دي؟!

نرمين: وهتقعد معانا على اساس ايه؟!

جريح بلامبالاة: اساس اي حاجة

نرمين: زي؟!

جريح بتفكير: ابن عمك؟!

رأيكم♡♡♡

رأفةً بعائلتها

ل/ آية محمد

الفصل السابع♡♡♡

نرمين: وهتقعد معانا على اساس ايه؟!

جريح: اساس اي حاجة

نرمين: زي؟!

جريح بتفكير: ابن عمك؟!

نرمين: معنديش اعمام

جريح: ابن خالك؟!

نرمين: خالي مات وهو صغير وما اتجوزش عشان يبقى عنده عيال

جريح بغيظ: صاحب اخوكي؟!

نرمين: بابا مش بيحب صحاب اخويا ف مش بييجو البيت 

جريح بنفاذ صبر: استغفر الله العظيم اخوكي طيب؟!

نرمين: الناس عارفة اني معنديش غير اخ واحد

جريح بعصبية: وانتي مالك ومال الناس؟!

نرمين بغضب مصطنع: يقولو اي عليا وانا بنت لوحدي؟!

جريح بإستغراب: لوحدك فين م والدتك ووالدك وحازم موجودين!!

نرمين بعند: لا مش هينفع تقعد كده من غير صلة قرابة

جريح بنفاذ صبر: يعني ايه؟! أمشي؟!

نرمين برفض: لا انت ضيف عندنا مينفعش نطردك

جريح بغيظ: ما انا مش فاهمك مطلوب مني اروح فين دلوقتي؟!

نرمين: هو في حل

جريح بإهتمام: الا هو؟!

نرمين: تتجوزني

جريح بصدمة: نعم!!

نرمين بتكرار: تتجوزني

جريح بغيظ: انتي هبلة صح؟!

نرمين وهي تهز رأسها برفض: افهم عشان محدش يتكلم عنك وعني

جريح بصدمة: دي طقه منك على الآخر

نرمين: اسمع بس انت هتلاقي زيي فين؟!

جريح: في كتير وأحلى منك كمان

نرمين بغرور: أحلى مني ااه بس مفيش زيي

جريح: دا ايه المنطق ده؟!

نرمين بفخر: م انا قولتلك دا انا اعجبك اوي تاني حاجة

جريح بإهتمام: تاني حاجة؟!

نرمين: انا مش هلاقي حد زيك

عدل الجرافات وقال بفخر: طب بس عشان هشوف نفسي

نرمين: ما ده اللي انا بتكلم فيه احنا لايقين على بعض جدا

جريح بتساؤل: دا مين اللي قال كده؟!

نرمين: انا

جريح: ايه؟!

نرمين: انا شيفانا قمرات مع بعض أقف جنبي كده وقفو قدام عربية وقالت: بص ف المرايا كده ها قمرات ولا مش قمرات مع بعض؟!

جريح: قمرات

نرمين بغيظ: طب ليه رافض بقا؟!

جريح: عشان.

نرمين بإهتمام: عشان؟!

جريح: انا عاوز واحدة عندها طموح

نرمين بتفهم: هقولك على حاجة

جريح: اتفضلي

نرمين: مش احنا مهندسين زي بعض؟!

جريح: ايوا

نرمين: ودرست ف جامعة القاهرة زيي؟!

جريح: ايوا

نرمين: وقريبين لسن بعض تقريبا فرق اربع سنين بينا؟!

جريح: ايوا

نرمين بغيظ: طب ايه بقا؟! معقد الدنيا ليه؟! طموح مين اللي هيفيد الايام دي؟! احنا بينا حاجات كتير مشتركة وكمان انا ست بيت شاطرة

جريح برفض: لا مش حاسك

نرمين بإصرار: هتحسني مع الوقت

جريح: طب اديني وقت أفكر انتي فجأتيني وبعدين استنى هنا احنا لسه شايفين بعض امبارح قررتي امتى تتجوزيني؟!

نرمين: امبارح

جريح بصدمة: في نفس اليوم!!

نرمين وهي بتهز رأسها برفض: ف نفس الثانية اللي شوفتك فيها وحياتك

جريح بتعجب: ودا اسمه ايه ده؟!

نرمين: حب من اول سؤال

جريح بعدم فهم: يعني؟!

نرمين: انت امبارح وقفت بالعربية قدامي وسألتني واقفة عندك كده ليه ي آنسة ساعتها حبيتك وقولت باااس هو ده هو الحب اللي استنيته واللي عرفت الدنيا معاه

جريح بقرف: اوفر اوي

نرمين بلامبالاة: هاا قرارك؟!

جريح: هفكر قولت

نرمين بنفاذ صبر: قدامك ثانيتين

جريح: ثانيتين ايه؟! دا قرار مصيري

نرمين بحزن مصطنع: انا حبيتك ف ثانية وانت تفكر ثانيتين بحالهم عشان تتجوزني ي شيخ اتقي الله

جريح بغيظ: اتقي الله انتي وسيبيني ارجع بلدي، مش مسامحني اني وصلتك بلدك

نرمين: خلص ي بشمهندس والله مش هتلاقي زيي

جريح: عارف والله اني مفيش زيك بس.

نرمين: بس ايه؟!

جريح: انتي هبلة اوي

نرمين: بس بحبك

جريح: مش حاسسها

نرمين: م انت عديم الاحساس هااا؟!

جريح: طيب خلاص انا هعمل معروف مع عيلتك وهخلصهم منك

نرمين بفرحة: هيدعولك كتير والله

جريح: م انا عارف، هشيل كارثة من عندهم

نرمين بتوتر: بس عايزة اقولك حاجة.

رأيكم♡♡♡

رأفةً بعائلتها

ل/ آية محمد

الفصل الثامن♡♡♡

جريح: طيب خلاص انا هعمل معروف مع عيلتك وهخلصهم منك

نرمين بفرحة: هيدعولك كتير والله

جريح: م انا عارف، هشيل كارثة من عندهم

نرمين بتوتر: بس عايزة اقولك حاجة

جريح بإهتمام: قولي

نرمين: قدام أهلي انت اللي اتقدمتلي

جريح بإستغراب: بس ده محصلش انتي اللي اتقدمتيلي

نرمين وهي تهز رأسها بإيجابية: ايوا بس احنا مش هنقول كده عشان برستيجي قدام أهلي

جريح بسخرية: برستيج إيه ي ام برستيج انتي؟! باباكي لسه قايلك امبارح ان محدش بيبصلك

نرمين بإحراج: عادي انت اتعميت وأعجبت بيا

جريح برفض: انا مش كداب

نرمين بغيظ: دي كدبة بيضة

جريح: ي سلام

نرمين وهي تهز رأسها بإيجابية: اسمع مني

جريح: يبقى هنروح ف داهية

نرمين: يلا نرجع بقا عشان الحاج هيقتلني لإني خرجت من القاعة من غير م اقوله بس؛ اتس اوك هقوله جريح كان بيعترفلي بحبه بره

جريح: ودي كدبة بيضة برضو؟!

نرمين بتأكيد: طبعا

جريح: استغفر الله العظيم قدامي

نرمين: استنى آخر سؤال

جريح بنفاذ صبر: اسألي

نرمين بكسوف مصطنع: انت بتغير عليا؟!

جريح بتعجب: نعم!!

نرمين بخجل: يعني انت شوفت واحد عايز يرقص معايا جريت زقيته وسحبتني زي البقرة غيرة دي ولا مش غيرة؟!

جريح وهو يهز رأسه برفض: لا دا موقف جدعنة عادي، اي حد مكاني هيعمل كده

نرمين بغيظ: طيب ابقى فكرني اقولهم ف البيت ان انت بتغير عليا وأحكيلهم الموقف ده وااه كدبة بيضة عشان انت بني آدم عديم الاحساس زي م قولت

جريح بعدم اهتمام: اعملي اللي انتي عايزاه بس خلينا نرجع يلا

مشيو وكان داخلين القاعة لكن اتفاجئو ب حازم داخل ومعاه بنت ماسكها من ايدها، عدى من جنبهم وقال بعدم اهتمام: هاي شباب وكان داخل القاعة 

مسكته نرمين من الجاكيت وقالت بإستغراب: هاي ورحمة الله وبركاته خير ي حبيب أختك؟!

حازم بإستغراب: خير ي نرمين في حاجة؟!

نرمين بفضول: ااه مين الأستاذة؟!

حازم وهو بيبص للبنت اللي معاه: دي سندس ٢

نرمين بعدم فهم: سندس ٢ مين؟!

حازم: صحبتي وحبيبتي

جريح بصدمة: الاتنين؟!

حازم وهو يهز رأسه بإيجاب: ااه

نرمين بإستغراب: من امتى الكلام ده؟!

حازم بغباء: خلصت كلام مع جريح وحبيتها على طول

جريح بتساؤل: يعني بتحبها بقالك ساعة؟!

حازم: ايوا

جريح بسخرية: ومزهقتش منها طول المدة دي؟!

حازم: دا اسمه الحب الحقيقي ي جريح، اما تحب هتحس نفس احساسي دلوقتي

جريح بإهتمام: وانت حاسس ب ايه دلوقتي؟!

حازم بفخر: حاسس انا حاسس بالانتصار

جريح بسخرية: دي خالتك صح؟!

حازم بفرحة: حاسس اني باخد حقي من سندس ١ ، جاي أكسر قلبها زي م كسرت قلبي

نرمين بسخرية: سندس ١ مش شيفاك اصلا عشان تكسر قلبها ي حزين

جريح بتريقة: انتي ركزتي في دي وسيبتي انه عارف واحدة اسمها سندس تانية عشان ينسى سندس الأولى!!

حازم: لا دي اسمها نورهان بس انا سميتها سندس ٢ عشان انا متعود على اسم سندس وطول م انا نايم بقول اسمها م انت عارف

جريح بإستغراب: انت كده هتنساها؟!

حازم: المفروض

جريح ل نرمين: لسه مصرة على قرار جوازنا؟!

نرمين بإحراج: بصراحة ااه، هو ابتلاء بس انت اصبر

جريح بيأس: عليه العوض ادخل ي حزين ادخل

دخلو القاعة وقرب حازم ونورهان (سندس ٢) من سندس وقالها: سندس أحب أعرفك دي سندس اتنين حبيبتي

سندس بإستغراب: دي اللي سابتك؟!

حازم بغرور: لا دي الاستبن

سندس بلامبالاة: ااه اوك مبروك ي سندس اتنين عقبالكم وسابتهم عشان تتصور مع صحابها

حازم بغيظ: جيت اغيظها غاظتني شد نورهان وراحو قعدو على الترابيزة تحت شماتة نرمين وجريح

بعد الفرح رجعو البيت ومعاهم جريح قعدو ف الصالون و. اتكلم أحمد وقال: والله ي جريح أحسن حاجة انك رجعت

جريح بإبتسامة: تسلم ي عمي انا حبيتكم والله

بصتله نرمين بكسوف من كلمة (حبيتكم) فكرها انه قاصدها هي كمان، جريح خد باله من نظراتها وكسوفها ف بصلها بقرف، قطع الصمت الا حل فجأة ف الصالون صوت نرمين وهي بتقول ل أحمد بكسوف: بابا في عريس عايز يتقدملي

أحمد بتعجب: دا مين اللي اتعمى ده ي نرمين؟!

بصت نرمين ل جريح اللي اتكلم وقال: انا انا ي عمي اللي اتعميت وقررت أخطب بنتك

أحمد بصدمة: ايه اللي وصلك للقرار ده ي جريح؟!

جريح وهو بيبص ل نرمين بقرف: الحب ي عمي، عارفه انت طبعا ي حازم؟!

حازم بحزن: عارفه للأسف

جريح بحزن: دق علي بابي بس انا مجريتش وفتحتله ذيك، لا انا حاولت اقفله بالمفتاح بس هي سبقتني وكسرت الباب وكانت أختك ي حازم كانت أختك 

حازم بتأثر: لا إله إلا الله انت اتعديت منى ولا ايه؟! ربنا معاك ي ابني

أحمد: متأكد من قرارك ي جريح؟!

جريح وهو يهز رأسه بإيجابية: للأسف ي عمي ااه

أحمد بفرحة: ظغرتي ي أم نرمين.

رأيكم♡♡♡

رأفةً بعائلتها

ل/ آية محمد

الفصل التاسع♡♡♡

أحمد: لازم تجيب أهلك وتيجي تتقدم ل نرمين رسمي ي جريح

جريح وهو يهز رأسه بإيجاب: طبعا ي عمي، ان شاء الله ارجع القاهرة بكرة واتكلم مع والدي ونكون هنا الجمعة الجاية نتقدم ونقرأ الفاتحة ان شاء الله

أحمد بإبتسامة: ان شاء الله

حازم ل نرمين: مبروك ي نيرو

نرمين بفرحة: الله يبارك فيك ي زوما عقبالك

حازم بإبتسامة ثقة: ودا اللي هعمله انتظروني

جريح بسخرية: دا حد داعي عليها والله ي حازم

حازم بتهديد: ما بلاش انت بدال م اقفلك ف الجوازة

جريح بهمس ل حازم: اعملها وعروستك عندي

حازم بهمس هو الاخر: على عينى والله بس انت جيتلي على طبق من دهب

جريح بعدم فهم: ازاي؟!

حازم بصوت واطي: هنقل ف أوضة نرمين اللي هموت عليها لانها واسعة وكبيرة

نرمين بشك: سيرتي ف الموضوع ليه؟!

حازم بإبتسامة سريعة: بالخير ي حبيبة اخوكي

جريح بضيق: واطي ي حازم

حازم بضحك: اي نو مان

أحمد: نرمين

نرمين: نعم ي بابا

أحمد بغضب مصطنع: انا قولتلك بلاش حركة كتير وأقفي ف جنب، مفيش عشر دقايق ألاقيكي بترقصيلي!!

بصلها جريح بشماتة

نرمين بغيظ: كله كان بيرقص ي حاج حتى انت

أحمد بغضب: انا اعمل اللي انا عايزه، كمل بغزل ل ولاء: وكنت انا وولاء بنجدد شبابنا ولا اي ي لولو؟!

ولاء بكسوف: أحمد العيال

حازم صفر وقال بإبتسامة واسعة: أيوا ي أحمد ي جامد

أحمد بغضب مصطنع: احترم نفسك ي قليل الادب

حازم بإبتسامة: حاضر ي حاج اوعدنا يارب

أحمد: قومو نامو يلا الوقت اتأخر

جريح: انا همشي بكرة بدري ي عمي ان شاء الله

أحمد: الساعة كام؟!

جريح: خمسة الصبح

أحمد: بدري اوي

جريح وهو يهز رأسه بإيجابية: يدوبك عشان ألحق شغلي

أحمد بتفهم: ربنا معاك ابقى صحيني ي ولاء عشان ابقى معاه

جريح برفض: لا ي عمي شكرا لحد كده، انا هصحي واطلع على طول بلاش تصحى بدري

أحمد: هتطلع لوحدك ي ابني؟!

جريح بإبتسامة: انا صاحب بيت ي عمي ولا ايه؟!

أحمد بموافقة: طبعا ي حبيبي

جريح: يلا ي حازم تصبحو على خير

الكل قام نام

تاني يوم صحي جريح وصلي الفجر وطلع على القاهرة

طول الاسبوع كانت نرمين مستنية اتصال من جريح وكانت بتفكر تتصل بيه بس.. بس ايه كلمته طبعا

نرمين من غير مقدمة: الا م رفعت السماعة حتي

جريح بإستغراب: مين؟!

نرمين بشهقة: كمااان مش عارفني!! مين هي؟! قولي هي مين عشان اجيبها من شعرها؟!

جريح بتعجب: نرمين!!

نرمين بغضب مصطنع: ايوا نرمين ي خاين

جريح بصدمة: خاين!! في حاجة ي نرمين؟!

نرمين بعصبية: في حاجات ي أستاذ

جريح بملل: خير؟!

نرمين بغيظ: مش تطمن عليا

جريح بإستغراب: ليه انتي حصلك حاجة؟!

نرمين بخجل: مش بالمعنى الحرفي يعني ترفع سماعة التليفون، تكلمني، اذيك ي نرمين، اخبارك، طبختي ايه، كلتي ايه، عملتي ايه النهاردة، والذي منه لكن البيه مش معبرني

جريح بإستغراب: وانا مالي بكل ده؟!

نرمين بغضب: مالك ازاي؟! انت هتبقي خطيبي الجمعة الجاية يعني بعد يومين

جريح بغضب مصطنع وتهديد: انتي هتنكدي عليا من دلوقتي ولا ايه؟! والله أهرب احنا لسه على البر

نرمين بتراجع: مش قصدي ي جريح انا قصدي تفتح باب بينا للكلام وهكذا فاهمني طبعا

جريح بتفهم: ااه وبعدين ي ستي اديكي قولتي بعد يومين، بعد اليومين هبقى اتصل أسألك طبختي ايه وكلتي ايه مبسوطة؟!

نرمين بفرحة: جدا

جريح بتساؤل: انتي جيبتي رقمي منين؟!

نرمين بفخر: سرقته من موبايل حازم

جريح بسخرية: أد ايه فخور بيكي

نرمين: ربنا يكرمك

جريح: باي عشان عندي شغل

نرمين بسرعة: استنى

جريح بملل: هااا؟!

نرمين: هتكلمني بكرة؟!

جريح بنفاذ صبر: ربنا يسهل

نرمين: هستنى اتصالك

جريح: تمام سلام

نرمين: باي وكملت بعد ما قفلت بوعيد: هتحبني يوما ما وساعتها انا اللي هطلع عينك اصبر عليا

تاني يوم استنت نرمين اتصال من جريح بس طبعا معبرهاش (ما تضايقوش من جريح واللي بيعملو ف نرمين لانكو هتشوفو اللي هي هتعملو فيه وهتعطفو عليه)

جه يوم الجمعة اليوم اللي هيتقدم فيه جريح رسمي ل نرمين، وصل جريح المنصورة مع أهله اللي احترمو قرار ابنهم وسابوه يختار شريكة حياته

استقبل أحمد وولاء وحازم جريح وأهله وبعد سلام وكلام قالت مامت جريح (يسرا): اومال فين عروستنا ي ام نرمين؟!

قامت ولاء وهي بتقول: هناديلها حالا

قامت أخت جريح (وردة) وقالت تحت نظرات حازم: ممكن آجي معاكي ي طنط؟!

ولاء بموافقة: طبعا ي روحي تعالي

ودخلو أوضة نرمين اللي واقفة قدام المرايا وبتكلم نفسها وتقول: انا هاخد موقف منه ومش هسلم عليه، ااه دا مرنش عليا امبارح، ماشي ي جريح كله هيطلع عليك، اول م ادخل أسلم على مامته واقولها اذيك ي طنط لا لا اذيك ي أنطي أنطي!! يع، اذيك ي. اذيك ي أم جريح لا لا مش حلو، اذيك ي خالة لا بيئة اوي، بعد تفكير قالت: بااااس لقيتها اذيك ي حماتي حلوة؟! لا لا لسه بدري على الكلمة دي، اممم اذيك ي. اذيك ي. انا هريح نفسي وأولها اذيك ي..

قاطعها صوت من بره بيقول: اذيك ي طنط أحلى.

رأيكم♡♡♡

رأفةً بعائلتها

ل/ آية محمد