تحميل رواية «يا أجمل الوحوش» PDF

التصويت + التعليق بين الفقرات لُطفاً

يا أجمل الوحوش

- رُسل فَهد

...

حزن تارس حنايا الروح

خَلصنه العُمر وَ الحزن منخلصه

كُل هاي الخلگ أبطال

و ورا كل دمعة الف قُصة

- رُسل فَهد

....

" عالية "

انفتحت كل بيبان الغرف و كلها تصيح شَكو نزلنه جوه و طلعوا بالشارع

و عجيبة تصيح بالشارع و تبجي امجد و ولاء وراها يصيح زِناد

زِناد : شبيك ولاء شبيك

ولاء : زناااااد مرتك انتحرت

زِناد : فضةةةةةةة

كلها صاحت و ركضت وره زِناد للبيت مرت ولاء تبجي و عجيبة

تصيح بالشارع و تبجي بصوت عالي عمتي لبست عبايتها و طلعت

وراهم و احنه مصدومات وحدة تعاين بوجه الثانية

بقينه واكفات بالباب و صياحهم بصوت عالي طالع من بيت عجيبة

واحد يصيح على الثاني اريج و سلوى لبسن عبيهن و راحن يركضن

گلت ضلت عليه أنا هم صعدت لبست عباتي و طلعت

رحت يمهن كلهن واكفة بـ باب الغرفة و زِناد لازم ظهرة يعاين عليها

الدم تارس الكرسي و الگاع و السجينه بنص بطنها ما طالعة

و ورقة و قلم على الميز شال الورقة يقراها و عاقد حواجبة

ينفتحن بصدمة كل ما يعاين على سطر جديد

بلع ريگة و ضم الورقة بجيبة يعاين عليها اول مره أعاين وجهة هيج

منهار هو ما يبچي بس ملامح وجهة كلها تقرة بجي بلاية دموع

و اصواتهم ما تنطق غير لا حول و لا قوة إلا بالله

لا حول و لا قوة إلا بالله

لزم الكرسي من الجهتين و مَيل راسة عليها مدنگ

زِناد : هاي انتِ فضة لا ما تسويها حاچيني شو

محمد من دونهم طَب يمه و حَط ايدة على چتفة يحاچي

محمد : متعارك وياها انت

هز راسة بـ لا و باس راسها وخر محمد على جهة و هي راسها

مايل على حافة الكرسي

زِناد: ولج فضة كلها تكسر ظهري ضنيتها إلا انتِ

مو گبل شواي خابرتيني تسألين اعله جُمارة

جانت اول مرة بحياتي اخاف هالكثر و دموعي تجري بخوف بخوف

اكثر من القهر أعاين لمنظرها و الدم التارسها

هذا كله بچفة و من طبت جدة عاينتها بچفة و تصرخ

رهينة : ولكم فضةةةةةة هاي فضة ولكم ما تكتل روحها

لا ما تعوف زِناد و تحطة بهيج موقف هي اصيلةً و بت شيوخ زِناد لا تصدگ

عاف جدة و طلع شوية و صارت اصوات سيارات الشرطة بالباب

رحنه گبل لبيت جدة رهينة كلنه و خلص الفجر و الصبح كله تحقيق

من الشرطة و الظهر يالله نصبوا الچادر

قسم ينصب بالچادر و الباقين بالمستشفى بعدهم

بين ما كلها تتراكض النسوان تلبس دشاديش سود نَزلوا الجنازة من السيارة و حطوها بنص الساحة اجوي يشيلونها حتى يطببوها بالبراني جدة طاحت على التابوت و كالت بعد رجلية ما تعيني و تضرب راسها

بالتابوت و الولد لزموها

مرت ولاء تنوح بصوت عالي و كلنه واكفين داير مدايرهن نبچي

بس كلها مو مثل من أنفتح الباب و طبت وحدة تعيط بعالي صوتها

صوت يفطر الحيطان أنا ما عرفتها منو بس رقية بصفي كالت

هاي العاملة مالتها

- يمههههه هديتج امس المغرب و مشيت تضحكين

شصار و هيج سويتي يَـ فضة مووش الج هاي النومة

و لا هاي المووووته كوووومي اسبحنج انااا

جا موو امسسس كلتي نروح للسوك شنهي الگه قطعتج

معلگة بالباب خايبةةةةةة فضة

أعاين مو جنها مره غريبة خرمشت وجها و تلطم لطم

مال وحدة جثير محروك كلبها كامت من كثر العياط تعيط و مامش صوت يردون يشيلون التابوت و هي مچلبة بي

طَبن الجارات كلهن و الشيخة ربيعة كدامهن يصيحن بصوت عالي

الولد طلعوه من الحوش

- جا إذا مريضة و نايمة بالمستشفى

ليش ما كتلونه نروح الها

ام عدنان : تفرهدت يحجية من أدينه بساع بساع

ربيعة : ما ندري الولد برة كالولنه جانت مريضة والله

جا رحنالها سودة بوجهي

من كالوا يالله راح نطب ناخذ التابوت كلمت ربيعة و العاملة

و جاراتنا شدن العبي على الخواصر

ربيعة : خبر موتج نهيبة و عيب نحچها

وحدة تصيح و الباقيات يلطمن على متونهن

- و هذا موش يومچ ، يومچ بعيد

يالفرگاج ذلة و شوفتچ عيد

كلهم منگبين "ملثمين "

طَبوا شالوا التابوت و أخذوها شَيعوها

و البقوا، واگفين يشدون بالحديد و جدة تصيح و تبجي بعالي

صوتها و العالم من سمعت الخبر كلها اجتي مصدومة

و ما مصدكة اكثر شيء بالدنيا يقهر فضة وحيدة و بلاية أهل

بس جدة عادلتهم كلهم هي و المره الجانت تساعدها

يمكن لو فضة عندها ام ما ناحت عليها بكثرهن

اول ما طلعوا اجه ولاء گال كولن تمرضت و ماتت لا تحجين

غير هذا الحجي و الموجودة دكول للما موجودة

امجد محزم بالساحة و بالشارع يديرهم هو و عمي عمار

لان زِناد حاير بوكتة و زمانه راح هو و عمامي و جم واحد من الولد

يدفنوها و لازمين إنذار لان محمد ملثم و يشتغل وياهم

ما يرضى يبقى بالبيت

و كل شوية يجرونه و يتعاتت وياهم و احنه گلوبنة خلصانه من القهر

جدة طلعت و وكعت بالحوش من سمعت زِناد الضغط مالته صاعد

و متخربط و ما خلوها تطلع كامت تبجي بالساحة بصوت عالي

رهينة : يمه يزناد يجدة شوكت ترتاح

أنا اعرفنة يوگع وراها هاي آمانته الصارله سنين

حاطها بعيونه

عمار : چا هي هينة السالفة خلينا نكف الفاتحة و نشوف دربنه وراها حفيدج الما يحافظلة أعلى مرة شلون تتأمن بيدة عشيرة

رهينة : ولك انتَ تهوس على جروحة ما تبچي اعلى الراح تبچي شماته يمن عمت عين گلوبكم شني من حقد شَايلة

امشوا أخذوني لزنااااااد

خالد : جدة اخذوا شريك و علي و صاحبة هسة يردون

خابرتهم

آمجد : يالله يالله مرتضى و ولاء عاينهم جابوا الصحون

واكفة أنا و عيني عليهم بالساحة

عجيبة : الله يرحمها هي البت صارلها جم يوم ضايجة

و مقهورة مدري شمالها لا تاكل و لا تشرب

نورس : عمي شبيها مو گبل جم يوم ويانه بملچة شريك

كاعدة بصف جدة

رقية : جا هي نارها جواها تعاين رجلها گبال عينها

يجهز و يسوي لبت عمة و هي مشمورة

حياة : بالله امشي عليجن موسى ابن جعفر مالنه خلگ الطلايب عوفن المرة بحالها ترابها بعده اخضر و السالفة ما ضنها تخلص اكو زلام و تحلها شيخ زِناد ما يسكت

عجيبة : و شنهي الما يسكت عنه هم عوزة و يحجي بعد

لو خاف تردون تتهمونه احنه چاتليها مبينه ذيج هي

السالفة فضة ما رادت جُمارة أنا غير عاينت الورقة

و قريت البيها

رقية : خطية والله جا ذنبهة بركبة زِناد و جُمارة الرضت بي

هاي أنا لو ما عندي بزر و ادري راح يضيع وراي چا حالي من حالها

دمعة : خايبات الغسل و أنا أضيع عمري و اكتل روحي

لخاطر زلمة يروح نعال و يجي نعال

ورود : ماكو نعال غيرج ادبسزز

دمعة رادت تجر ورود بَس ورود لزمتها و وحدة اجتي تملخ الثانية

صارت لارا و نورس بالنص يفاككن بيهن حياة خلت و طلعت من المطبخ تركض لا تجيها دفرة و يطيح الطفل اخذن وردة يم امها

و بقت دمعة بالمطبخ تغلط

عجيبة : سكتي انتِ و چفنه شرجن لا وعلي يطبولچن

اخليهم يگطعوجن

وخرت من الشباك من عاينت يونس ابن عمي فاخر جاي يحچون

بنتر و صياح و ساعة واكف منتظر مرته تطلع و هي يم امها

من اجتي عاط بيها بصوت عالي و اجتي امها

ام سلام : شمالك شمالك شني فصلية عندك

يونس : صارلي ساعة من صحت لبتج لو عدها احترام

جا أجتي من ساعتها

- و شصار هسة انتَ ياهو و هيج تحاجيها و الله أخليك

تحلم تعاين خلقتها بالبيت

- دياااااااالله أخذيها ادبيها و رديها و لو منين تتلگاها

ام سلام : ولك يعني أنا ما ميدبة

كامت تغلط و اجه غسان جره من ايده و طلعه و يسدن بحلگ عمتي

و ما ينسد اجه امجد يمشي سريع وجهة كله شر ختلت يم القنينة

ضرب باب المطبخ و صاح

امجد : صوووتمن هذا

ام سلام : الجلب النذل يكول عليه ما ميدبة

حسبالي راح يتحزم و يروح يطگ يونس كف دشداشته و اجه على عمتي مرد حلگها بيدة و امه تجرجر بي

كلهن طلعن من المطبخ خايفات منه و أنا لابدة يم القنينة

لا تجيني منه كفخة من الصدمة عمتي سكتت و هو دفعهن هي و امه

و طلع بره ضلت عمتي فاكة حلگها من الصدمة خَلت و طبت جوه

و هي تغلط على يونس و امجد

عجيبة : يالله كملن لا تخلن نواقص أنا رايحة انام شوية راسي يوجعني من امس ما نايمة

طَب شريك من باب الساحة و اجه للمطبخ كبل لا يشوفني كال

وين عالية

- ها خوية

اشرلي تعاي نزل راسة يشاورني

شريك : زِناد شوية حالته تعبانة كولي لجدة زين حتى ما تطيح هي هم علينه و لحد تفتح طاري اي موضوع هسة

عالية : شبي يعني شماله راح يموت

شريك : طاح حظج شني يموت اسم الله عليه

بس ضغطة لان صاعد كال الدكتور بينه و بين الجلطة

شعره

عالية : بس ما انجلط يعني مو

كفخني على راسي خفيف

شريك : شني طالبته بطلابة انتِ طبي جوه يالله و صيحلي امي حسبالي كبرتي و صار بيج حظ

طبيت اصيحلة امي لكيت شمعة و امها كاعدات

يم ربيعة اجت شمعة باستني

شمعة : ولج عالية شريك اجه من الدوام

شو دگيت عليه و ما حصلته

عالية : اي اجه ذاك عايني يم الباب

مدت راسها عاينته بس هو ما لچحها راحت كعدت يم امها تحومي

لو ما تخاف مصيبتنا جبيرة چا كالتلي صيحيلة

كلنه واكفين نشتغل چايات و غده النسوان نكف بي و ما ينكف

النسوان حايرة بالنسوان و الزلم حايرة بالزلم

رقية : اجت ساس البَلة مثل اليكتل الميت

و يمشي بجنازتة

عجيبة دفعتها بطرف ايدها و اشرتلها سكتي

درت وجهي لباب المطبخ عاينت جُمارة و امها و خالتها طَبن

" جُمارة "

عجيبة : ولج يَـتغريد فضة أنتحرت

صرخت بصوت عالي احس بلاعيمي طگت من الحرگة

جُمارة : شنوووووووووو

اجتي روز عليه تركض تأشر شكووو شمرت التليفون بالگاع

دنگت روز شالته و امي طلعت من الحمام تصيح شكو جرت التليفون

من روز و كالت الو بقت صافنة بمكانها اثر الكلمات السمعتها

كسرت الصمت بـ لطمة على خدها

تغريد : إلى رحمة الله بس شلون ؟ يالله نجي نجي

جرتني روز للهول و اني ما جاي اصدك

و اني اباوع لامي بسرعة صدك

تغريد : انتحرت طبعاً تنتحر شوفي هذا الوحش شنو من ضيم و قهر مراويها و هي ماتحجي لحد ما انتحرت و ماتت

منو جان يكون فضة تنتحر على ذاك الذهب و العيشة و الفلوس

روز : انتحرت زين شلون انتحرت لا مجاي اصدك عفية

هزيت الها راسي لا لا لا

جُمارة : فضة متدينة ما تنتحر هاي حيلة من عجيبة

تغريد : ولج عجيبة شعليها خابرتني تبجي تفرفح

امشن بدلـن يالله خلي نروح للفاتحة

روز : ابقي جُمارة اني راح اجيبلج هدوم

عيني على الباب و أهز براسي لالالا

فضة ما تموت مستحيل تموت شلون تنتحر و هي جانت دائماً

دكول اني مرتاحة هاي السنين كلها ما انتحرت شصار هسة

و انتحرررت

شلون بدلت و اجرنه تكسي و وصلنه لبيت جدي هذا كله مو عقلي لحد ما طبيت بيت جدة و السيارة وگفتنه براس الفرع لان شارعهم كله چادر اسود و القطعة على حايط بيت جدة

انتقلت إلى رحمة الله عقيلة الشيخ زِناد يوسف آل سرهيد

" إن وعد الله حَق "

السواد تارس البيت و جدة اكثر وحدة تبجي بصوت

عالي و تضرب على رجليها و يمها الكرسي مال فضة

رهينة : بساع بساع رحتي تفرهديتي ولج يفضة ولج موش احنه حبايب ليش هچي

امي سلمت على جدة و كامت جدة لزمتني من وجهي

رهينة : راحت فضة يجدة جثير تحبج جانت

يمهههه ولج فضة يا حبيبة يا يمه

ربيعة : غَـريبة أنا و جاراتي غَرايب

و ما إليّ بهالنزلة حَبايب

جانت تنعي بصوت يفطر الگلب فوك ما الگلب مفطور

رهينة : مچانج يالعزيزة لهسة خالي

راحت هيبتي و عزي و دلالي

يـ جدة البيت ما أطبة بَلياچ

أريدن للگبر و أتمدد وياج

كامت جدة تضرب على وجهة و اجن النسوان يهدأنها

قرت المله و صوت العياط يگلي ترى ماتت فضة ماتت

و اني بعدني ما بية و لا اكدر اصدك

راحن امي و روز للمطبخ و اني واكفة بالنص بعدني اباوع

مو يم الهوسة الداير مدايري شفايفي ترجف و اني عيني على كرسيها

جانت ربيعة كاعدة تدنت و سوتلي مجال مديت

ايدي لزمته و تَچيت راسي عليه

جُمارة : لا تخافين اني يمج فضة ما اعوفج

نزلت دموعي مديت ايدي على خدي تلمستهن هاي ليش ابچي

- فضة عود صدك رحتي ؟ شنو شبسرعة شفتهمت منج اني

لا لا ما تنتحرين اني ادري بيج ما تنتحرين

شنو شصارلج و انتحرتي

دموعي حارة تنزل على وجهي بس ما توصل لحرورة گلبي يفور

جدة من كثر اللطم تخربطت و اني احرك راسي بحرگة اضربة بحديدة الكرسي اريد وجع راسي يهيد و اتذكر ملامحها معقولة هيج

الدنيا بساع تكدر ملامح شخص تختفي من الحياة

و بعد ما تكدر تشوفها غير بالصور لحد ما تنساها

شنو هاي المراحل الصَعبة الي لازم نواجها

احس الهضمة البداخلي ما الها وصف

حضنت كرسيها و بعد ما كدرت اضم حسرتي اكثر صار صوت

البچي مالتي عالي

- كلشي احبة يروح كلشي كلشي حتى انتِ فضة رحتي حتى أبوية راح حتى أمير راح كلكم رحتوا

هسة اني والله تعبانة و بعد ما بية حيل لو تأخذوني وياكم احسن

امير كتلوه و أبوية هم كتلوه بس انتِ ليش تكتلين روحج

شلون كدرتي فضة حبيبتي شلون ايدج أنطتج والله ما جاي اصدك

سمعت صوت النسوان صارت موجته اعلى من قبل رفعت راسي عليهن يباوع عليه اني و الكرسي درت وجهي و أشوف حمامة بيضة

واكفة على حافة الكرسي اباوعلها و دموعي تجري

مرة جدة كالت الحمامة التطب للفاتحة هاي روح المات تفتر تشوف

منو يبجي عليها و منو لا ما ادري بيها جذب لو صدك بس بذاك القهر حتى الجذب اصدگة المهم اچلب بريحة منها

بدت النسوان تروح و البيت فرغ من الناس و الوجوه مو بس حزينة

جانت مصدومة لان هذا خبر لو كلشي متوقعينه بالدنيا ما توقعنه

هذا الشيء يصير و لا فضة تصدمنا هيج صدمة

رهينة : ها يجدة راحت رفيجتج

جُمارة : مدري شوكت أروح أنا

صرخت بوجهي جدة و هي تبجي

- كااااافي ولج لا تذكرين الموت بعد ان اضمنكم لجنازتي

تبجون عليه و أنا يومية باچية اعلى جنازة واحد منكم

بقت ورود يم جدة تهدي بيها و أنا والله والله والله لحد هاي اللحظة عندي امل يكولون مشتبهين و هاي فضة عايشة ادري ميصير بس ابقى

على هذا الأمل كل ما يموت عزيز عليه

غفيت و أنا راسي على كرسيها كعدت لكيتهن كلهن فارشات و نايمات نص بالبراني و نص بالهول طلعت من البراني و أني بكل خطوة اريد اطيح لحد ما وصلت المطبخ مديت ايدي على البوري غسلت وجهي و نكعت شفتي و لساني ما بية حيل حتى اشرب المي

انفتح باب الساحة باوعت منو يطب و الدنيا نص الليل

طَب واحد ملثم مدنگ و ايدة على خاصرته يمشي گوه لابس دشداشة

سودة و الشماغ ابيض و اسود لو ما الچفوف ما اعرفة هذا زِناد

بقت عيني عليه لحد ما طب للديوان و سد الباب ورا

ضليت واكفة اباوع لباب المضيف و باب الشارع شوية و صار الأذان

توضيت و طبيت لغرفة جدة هم متروسة نسوان بدن يكعدن للصلاة

صليت و رجعت خليت راسي على كرسيها

اجت جدة كعدت يمي

رهينة : هذا كرسيها قديم بقى يمي چنه رايحين زيارة

و رجليه توجعني أخذوني بي لكربلاء لان هي جثير عدها

و هسة راحت الحنينة ام گلب طيب

جُمارة : خاف تخاف من الظلام وهي هناك وحدها

حضنتني جدة و هي دموعها ما وكفت

و اجه يوم الثالث و الناس اكثر من البارحة و اني على حطتي

ما كمت كاعدة بالكاع و راسي على كرسيها

بس دموعي تجري

و جانت النسوان الغربة من تفوت تسأل علية عبالهم اني اختها

رهينة : فقيرة و مالها بگلب واحد علامة

والله حتى الطيور الفوگ بيتهم تحبها خلصت عمرها

تشيل هم غيرها اكثر من روحها

عجيبة تلطم بكل قوتها و تبجي و تنوح اول مره بحياتي تقهرني

خلصت الفاتحة و راحت العالم و حتى القريبات راحن و بقى البيت

رغم كلها تحجي بحال زِناد و شصاير بي بس ما رف گلبي عليه

و لا فكرت أشوفه و احجي ويا لان اكو صوت بعقلي

و خايفة لا يطلع صحيح و من وره هذا السبب بقيت طول الوكت وحدي

و ما تقربت لحد و سولفت ويا خايفة لا اسمع الأني خايفة منه

شالوا الچادر و القطعة و كلشي بده يرجع لمكانه

و شكد ما اني حزينه و مقهورة على موت فضة ما جاي اصدك

حادثة موتها و لا اصدك هي كدرت تكتل نفسها

كلها نايمة الصبح و اني لافة الشال و جفوف ادية اثنينهن جوه خدي

و منتجي راسي حافة الكرويته و دموعي تجري كعدت جدة و ورود بقت يمنه و عمامي بدوا يگعدون

انفتح باب المطبخ و طَب زِناد باوعت لوجهة و لحيته مدري شبساع

هيج تغير

كمت من الهول بساع و رحت لغرفة جدة احس تأنيب الضمير ياكل بية

على كل يوم غرت بي منها و يجوز هي واصلها الحچي

امي كعدت تلم بغراضنه حتى نرجع و جدة دكللها ابقي للسابع

طلعت من الغرفة و رحت فوگ اريد انام بغرفة ورود

شمرت روحي على الجرباية و ابجي بصوت عالي

شوية و انفتح الباب مدت راسها دمعة مبتسمة

دمعة : اااا هاي انتِ حقج لان من صعدت سمعت صوت البجي كلت اكيد جُمارة جاي تحس بتأنيب الضمير

ما جاوبتها غمضت عيونها و طبت

دمعة : تـؤ تــؤ تــؤ والله خطية فضة ضلمها ويا زِناد

عاد لو طالبة الطلاگ و لا منتحرة بس وين تتطلگ وين تروح

كمت من الجرباية اريد اطلع لان صدك ما بية حيل أجاوب

مديت ايدي على اليدة اريد اطلع و وگفتني كلماتها

دمعة : يكولون فضة كاتبة ورقة قبل لا تموت و هي الي خلت زِناد ينهار و يتمرض ضمها محد يدري بيها وين

بس عجيبة قاريتها

درت وجهي عليها بساع

جُمارة : ورقة ؟ يعني وصية

دمعة : ما ادري وصية عتب بس المهم ورقة كاتبتها هي

فتحت الباب ردت اطلع

- هاااا و يمكن سمعت گالوا اسمج بيها

بلعت ريكي و نزلت بساع اركض نمت بحضن

روز ابجي و هي تسكت بيه و تمسح دموعي

روز : كافي جُمارة راح تموتين من البچي حتى فضة تحبج

و ما تقبل هيج تسوين بروحج

تغريد : يالله كملتي جنطتج روز خل نرجع لا يصير بجمارة شي و لج على امير ما يجيتي هلكد عبالجن اكرهجن و ما اريد مصلحتجن من اكول ال سرهيد ما ينعاش وياهم

كلبي كام يدك سريع كمت وكفت افرك بي لان كل ما تسرع دكاته تصير نغزة بقيت واكفة بمكاني لازمة كلبي و احس الدنيا تفتر بيه

لزمت راسي و طحت بالگاع اسمع صياح امي و روز بس الدنيا

ظلام و مابية احجي فتحت عيوني على رشة المي بوجهي

و اي بحضن امي كلها فوگ راسي حتى جدة

ورود : جا طبعا توگع إذا هي صار الها يومين و اليوم الثالث

كلشي ما حاطة بحلگها

- صبيلها خل تاكل

درت وجهي بساع و امي وياي دارت وجهة على اثر الصووت

وهو واكف بـ باب غرفة جدة و عينه على الهول مو علينه

راحت ورود تصبلي و جدة تباوعلي بعصبية

رهينة : تغريد وكليها لا اگول أكتلها و اكتل روحي أنا

كلبي خلص منجن وًمن هبطاتچن

لان تخربطت امي ما راحت و بقينه لحد يوم السابع قراية

و هم كلهن من الصبح اجن كاعدة وحدي بالغرفة امي و روز بره طبت جدةً كوه تمشي بعكازتها

رهينة : ها وحدج يجدة كاعدة

هزيت الها راسي بـ أي

رهينة : اليوم امج داگة عنجر " معاندة " إلا تاخذجن و تروح

ديري بالج اعله روحج هناك و أنا بس اصير زينة و زِناد يصير زين اجيج اخذج

ما جاوبتها

رادت تطلع و دارت وجهة عليه

رهينة : ولج لا سألتي شمالة زِناد و لا بحالة چا فوگ المصيبة

الطاحت على راسة انتِ تزيدي إذا ما يلگاج هسة جا شوكت يلگاج

جُمارة : شگلة و بيا عين احاچي و اني جنت من تجي ويا

أغار ليش خلاني احبة وهي تحبة ليش هيج راح يخلي الندم ياكل بية طول عمري

رهينة : ولج جُمارة ياااا صدك تحجين والله زِناد ينجلط هسة لو يسمع الجاي تحچينه

جُمارة : شنو بيها الورقة الكاتبتها فضة ليش ما تحجين

- ما بيها شي

- لا بيهااااا بس انتِ و حفيدج اهم شي عدكم مصلحتكم

صحيح لو مو صحيح

رهينة : لا تصيحين عليه لا اكسر راسج ولج أنا جدتج

طبت امي و روز و رقية طلعت جدة و اني بقيت ابجي لحد ما خلصت

القراية و رجعنا ولاء لبغداد روحي القهر ياكل بيها اكل

اول ما وصلت البيت توضيت و لبست الجادر صليت

وكعدت بالهول اقرالها قرآن و ابجي

اجت امي كعدت يمي حضنتني سديت القرآن و نمت على رجلها

تغريد : أنا من اكره شغلة و ما أريدها تصير لان اعرف عاقبتها شنو يعني أنا ازوج جُمارة وحيدتي لواحد متزوج

متسلط و خشمة حتى الموت ما يكسرة هذاك مرته ماتت

و چنه صل كلشي ما بي جا هي لو مرتاحة ويا تنتحر ؟

حور ليش ما انتحرت لو امجد صدك يعذبها و هي مظلومة

لو مظلومة ما ترجع بكل زعلة و تعيش ويا بس غير هو عنده صبر و ما كتلها خلاص وين اكو رجال يومية يلزم مرته مصادقة بالتليفون و هي ما تخلف و صابر عليها

جُمارة : لا حور مظلومة والله ما تسوي هيج

تغريد : جا يمة هي التسوي غلط تكول أنا سويته ؟ طبعا

ما تكول لان كل إنسان من يحجي سالفة يلغي الجزء الي

هو غلطان بي

هزيت الها راسي بـ لا مستحيل

تغريد : هسة أنا يا يوم كتلج حجاية و طلعت مو صحيحة

جُمارة : يمة فضة كاتبة ورقة قبل لا تموت و جدة ما كالتلي

شبيها سألي عجيبة

تغريد : بعد شوية اخابرها و هي تريد تجينه

راح اخليها هي تسولفلج و تگلج شبيها

غفيت بحضن امي لحد الصبح و اني اخلص اليوم كله لابسة الجادر

و كاعدة اقرا قرآن بلكي اخفف من تأنيب الضمير الما جاي يعوفني

نمت على السجادة بالليل و فزيت بنص الليل مخروعة حتى

روز نزلت تركض و امي كعدت

تغريد : شبيج يمه شكو

جُمارة : فضة فضة والله شفتها بالحلم فضة

- اسم الله الرحمٰن يمه كافي راح تتخبلين كاااافي

باوعت لروز

جُمارة : زِناد طايح على طولة و فضة تريد تشيلة وحدها ما تكدر تصيحلي تعاي وياي و اني ما اقبل اروح الها

دكلي زِناد هذا مو حبيبج تعاي شيلي وياي

روز : خطية خاف زِناد بي شي

صرخت بوجهة امي و جرتني نيمتني يمها و لحد الصبح ما غفيت و لا مر على عيوني نوم ضليت أفكر بالحلم امي شامرة تليفونها على الكرويته كعدت الصبح راح للمطبخ تسويلنه ريوك اخذت التليفون مالتها

بس اكله شلونك و اسدة حتى لو امي شافتني ما جاي احس

روحي اخاف

فتحت تليفونها حطيت بالبحث حرف ز حتى يطلعلي اسمه

ما طلعلي معناها امي ماسحة رقمة دكيت على جدة جاوبتني

سلمت عليها و سألتها شلونه زِناد

رهينة : تعبان والله يجدة

طلعت امي من المطبخ معصبة الظاهر جانت تتصنتلي

جرت التليفون من ايدي و قفلته

تغريد : هم الج عين و تسألين عنه بعد هم تسألين عنه

ولج جمارررررة و التالي وياج

جُمارة : بس اشوفة شلونه

تغريد : ان شاء الله بكبور النجف

درت وجهي عنها مهضومة و لا بية حيل اراددها و أتعارك و تضربني

بقيت ساكته و اتخيل الحلم و شكل فضة من تحاچيني

ثاني يوم اجتنه عجيبة ما صعدت و لا سلمت بقيت كاعدة بالزاوية مال الهول

عجيبة : بتج بيها خرعة مال موت اخذيها لسيد مو من مات اخوها انخرست ديري بالج

تغريد : لا والله هي زينه بس البارحة الفجر فزت حلمانه بفضة و صارت بيها مثل الخرعة

عجيبة : حقها جا الله يساعد كلبها واحد لا بيها و لا عليها يعاين لروحة يلگاها سبب بچتلة بشر بس هي جاهل شمعرفها لو ما هو يخليها تحبه

تغريد : ما تحبة حبته حية ام سبع روس

جُمارة : فضة شكاتبة بالورقة

عجيبة : خلي تولي السالفة انتِ مريضة

- شكاااااااااتبة

فزن هي و امي و هي جرت تليفونها فتحته

عجيبة : صورتها خاطر ما تكولين چذابة

كمت بساع و رحت يمها اخذت التليفون و ايدي ترجف الخط مو كلش مفهوم ابقى بالكلمة شكد يالله افهمها

- زِناد ورة ما تقرا هاي الرسالة أنا ميته اختاريت الطريق

السريع حتى اروح يم ابوي لان انتَ ما صنت الأمانة

فكرت بحبك لجمارة بس ما فكرت بگلبي و انت هاجرني

كل هاي السنين عرف هسة انت أخذتني بس حتى تاخذ الشيخة و ادري بيك تريد تتزوج و أنا ما أتحمل أعاين حبك لجمارة و اسكت انتَ جثير ظلمتني من حبيت جُمارة

تزوجها بس ما أبريكم الذمة

اريد ابلع ريكي بس حتى حلكي يابس كلبي يريد يطلع من مكانه من كد ما يدك اخذت امي التليفون وهي بدت تقره بيها

كعدت على الكرويته و صافنه على باب الشارع و يدور براسي

كلامها من جانت دكول اني ما اريدة يمي ينام جا شنو جان

هو يدزها حتى تقنعني

جابتلي امي كلاص شربت

تغريد : شربي شربي لا يهبط ضغطج

صدك حسيت ضغطي يريد يهبط كعدت شربت شوية منه

و صعدت فوگ يم روز لكيتها تشم بغطاها و تغمض عيونها

عفتها و كعدت بجربايتي فتحت البردة و عيني على الشباك

اباوع للجهال تلعب طوبة و الكول حاطين نعالين و يلعبون حفاي

جُمارة انتِ مو اي إنسان عادي تدرين بروحج لو لا

تدرين اكو شخص مات من وراج مو تدرين بي متزوج ليش

حشرتي روحج بيناتهم لو انتِ بمكانها ترضيها على نفسج

طبعاً مترضيها

هذا الحجي كله يطلع من عقلي و گلبي يريدني امد ايدي

جوه المخدة و اطلع غترته اشتمها

جُمارة : روز اني اقرا قرآن لفضة و هي ماتت من وراي

روز : شبيج جُمارة شعليج انتِ

سكتت و بقت عيني على الشارع أباوع و دموعي تجري

احس بروحي تحترك و من كد ما الحرارة قوية احسها تطلع من راسي

ضليت على هذا الحال ما ادري باليوم من يجي شنو من يوم و الوكت اعرفة من ضوه شباك الغرفة حتى الاكل اكل وجبة وحدة من احس

ضغطي يريد يهبط

انزل اسبح و اصعد اجتي جدة علينا نزلت سلمت عليها و صعدت

صاحتلي و ما نزلت لان ادري بيها تريد دكلي امشي اخذج وياي

مرت ايام جنت اكول لسوء ايام تمر عليه بكل حياتي

ما ادري بحياتي شبيها من مفاجئات بَعد

صار أربعين فضة و اني كلت لأمي ما اروح كيفت و حتى هي ما راحت

بس بيوم الأربعين اجانه ولاء و ويا امجد كالت امي ما اكدر أفشلهم لان ولد صديقتها كالت هيج لو جاي واحد من ولد عمار جان رجعته

بدلت و طلعت و طول الطريق اتمنى يصير شي و نرجع للبيت

وصلنه و طبينه للبيت هم قراية و عشاء و الميوزة منصوبة بالشوارع

و يطبخون بالساحة دموعي تجري من اسمع المله تقره و من اتذكر الكلام بالورقة تشوط روحي يعني هي من موتت نفسها جنت

كل السبب اني

اتمنى ابجي و اصيح كدام النسوان و اكللهم و الله مو اني السبب

و لو كايلتلي احبه و أريده والله اشلعة من كلبي شلع دموعي تجري

و ابجي بصوت عالي كلها تباوع عليه

أخذتني روز غسلت وجهي و تسكت بية

روز : كافي ولج صدك تحجين راح تموتين من القهر

دمعة : خليها تبجي احسن ما تكتم بداخلها و تموت

كعدت بالغرفة مال جدة و عالية اجت لروز حتى تساعدها

بغسل الماعين بالمطبخ صايرات صدايق اليوم

....

"روز"

روز : اكلج هاي عمتج شبيها شَر تمشي و تعارك

عالية : هو الشر يخاف من عمتي والله بطرانة

- يعني شلون عيشتكم

- بالضيم مسيطرة على الرجل و الولد و الچناين

وحتى على الجيران

بلعت ريكي و صرفنا الردان اغسل الماعين و ما ببالي غير ذاك الوهمي المگطوعة اخبارة مادري مثل گلبي اكو گلب بالدنيا هلكد يحب محبوبة

و يخلقلة اعذار و هو كل افعاله وياي ما ينلبس عليها ثوب

عالية : منو المآخذ عقلج خايبة هنيالة

روز : هنيالة ولج كولي غيرها مراويني نجوم الظهر

- عادي أنا علي من اخذته هم راواني نجوم الظهر

و هسة أنا مراويته مو بس نجوم حتى الگمر مال الظهر

روز : حباب وياج

عالية : يموت عليه ما يگدر عليه يتعارك وياي الظهر

و العصر يصالحني

- الله يحفظكم ، اني لا إذا زعل بعد يزعل يضل شهر شهرين

و من يرجع و لا جن جان زعلان

ام عدنان : ولجن يمة وحدة تجيبلي ذيج المعجنة بالساحة

عالية : والله جان جبتها بس اخافن علي و شريك يطبون

و يطلعون

روز : اني أجيبها عادي لا حسيب و لا رقيب

عدلت الشال و طلعت عيني على المعجنة الواحد من يباوع من بعيد يشوفها قريبة و من يروح يجيبها يصير الدرب شطولة

جبتها وطبيت اركض لان طلعوا من المضيف جم واحد

روز : ترحين للنجف بالليل احنه يمكن نرجع للبيت

عالية : لا ان شاء ترحون ويانه حتى نكعد نفس الكراسي

- مو جُمارة مريضة تغريد ما تجازف بيها

- خطية خاف سمعت بسالفة الورقة كالوا هنا لا دكلولها

- لا درت ماكو شي ينضم

تقربت عليه حجت بصوت ناصي

عالية : يعني شنو جُمارة ما تريد زِناد بعد

روز : مادري بس هي مريضة و تريد تكمل جامعة

- أنا ما احبك اخاف منه بس خطية خو ما يخسر كلشي

- ما ادري اني ما اعرف عنه بس هي جانت هواي تحبة

خلصت الهوسة و اني و عالية كاعدين نسولف على بيتهم

و تقهرني فوك ما اني مقهورة منه و صبو العشاء و خلصت الهوسة طَب شريك گال يالله همن أديچن ساعتين و نروح للنجف حتى الصبح

احنه هنا لا الحامل و لا العدها جهال صغار تروح و اي جاهل بالكوسترات ماكو

عالية : و أنا خوية

شريك : گلت جهال صغار بابا انتِ جاهلة مو رجلج يروح و امي تروح طبعا ترحين جا وين تضلين

كرصتها

روز : اكلج الله يساعد رجلج عليج لا تخلفين إلا تكبرين

عالية : لا مو هو هم حاسبته ابني خطية محروم من حنان الأم امهم ضاله بس للمشاكل حاضرة

روز : رجال و عسكري شكدة و شكبرة و انتِ حاسبته ابنج

ضحكت راحت تحضر هدومها و تغريد اجت كالت تروح لان عجيبة قنعتها و هي ما ترفض لعجيبة طلب و لا چن عجيبة جانت اكثر وحدة تغار من تغريد و تكرها و تسويلها مشاكل وي يعقوب رجلها

و تغريد بـ لسانها جانت تسولف النه

كعدت جُمارة تحضر هدومها و تاكل وهي صايرة هيكل عظمي

من الضعف شلت غراضنه ضميتهن بكنتور خالتي رهينة

بقن حياة و لارا و الجهال يمهن و البقية ينضفن البيت

و الزلم ينظفون الساحة

خالة رهينة حاضنه جُمارة و تبوس برأسها و تسولف وياها

عفتهن و طلعت يم عالية اجت ربيعة و وياها شمعة خطيبة شريك

و امها يرحن ويانة للنجف

صاحتني تغريد و رجعت ما لكيت عالية اختفت دورت عليها ماكو سألت ورود كالت بالمخزن رحت فتحت الباب لكيتها واكفة مثل الحارس و بيدها ماسحة حطت اصبعها على حلكها و اشرتلي اشششش

روز : هو شنو اش شعندج هنا

اشرتلي بعينها لكيت شريك و شمعة واكفين يم الزرع يسولفون

عالية : حارستهم لا واحد يعاينهم لا جذب واكفة هنا حجة حتى محد تصخرني و هم اتصنت عليهم

روز : يعني هو يدري بيج واكفة هنا

- لا طبعا عود من احس بيهم يردون يطبون اشرد

- دمشي عيب عليج متستحين

هزت راسها بـ لا و اني بقيت واكفة يمها

شمعة : خاف يگولون اهلك عليه گصتي فگر صارت بوجهي

موتت فضة

شريك : شعليج انتِ هذا قدر و مكتوب خلي نرد من النجف

حتى ادزلكم الفلوس لان البيت بعته بعد بس الگالي بيت

شمعة : تبيع بيتك يبعد بيتي عاين شتسوي ما تكدر تتداين

تجيب الفلوس و أنا اول ما اتزوج أخذهن من أبوي و نردهن لراعيهن

شريك : لا ، أنا أريد ابيعة البيت جبير و ديوان و براني شسوي بيهن أنا شعندي بس انتِ و امي

شمعة : و تشيل من يم اهلك والله زحمة امي كالت الحاضر ابوي يريد يجيبلي بي ذهب لا تخاف هو الذهب أوله و تاليه

الك

شريك : هههه انجبي لج اغرگج ذهب عايز عليج أنا

ضحكت و حضنته باسها برأسها و لزم خدها يمسح بي

شمعة : لا تخاف ما حاطة اعله خلقتي شي يعني

شني اول تالي ما تعرفني

شريك : اي بهذا ديرمج شوكت تبطلين من الديرم أنا مو كايلج

بعد لا تحطي

- والله وداعت عيونك الما احلف بيهن جذب ذبيته

و اجيت ارتب كنتوري لكيت شواي حطيته بحلكي و أنا اسفط الكنتور تالي طلع من هذا الاصلي

و اليوم شگگت حلگي و ما راح كله

لزمها يبوسها و اني جريت عالية من ياخة دشداشتها

روز : والله ما تستحين

عالية : ولج شمدريني حسبالي بس يسولفون

لكيناها كلها مبدلة و متحضرة احنه هم تحضرنه و جُمارة خازرني لان عايفتها و مصادقة عالية اجيت كعدت يمها و عالية اجت يمنه لحد ما كالو يالله طلعنا و ورود اجت ويانة

صارت هوسة و اثنين واكفين برة شريك و واحد ويا يرتبون الكعدة طلعوا اول شي الكبار كعدوهن وي عمامهم و وأحنه بالهول منتظرات

المطبخ يخلص من الهوسة و يجي دورنا

شريك : يالله عالية شمنتظرات

رحنة و هذاك الويا چان داير وجه يخابر النوب صاح علي أخذهن

صعدهن عقدت حواجبي على اثر الصوت ياهو من اخوته هلكد يشبه صوته ردت بس أشوفه ولو هو ملثم شراح اشوف منه

طلع شريك يمشي قبلنه و احنه ورا اول ما عبرته درت وجهي عليه حتى أشوفه انجرت ايدي للمطبخ و ايدة على حلگي ضليت اتلفت و خايفة

لا يجي احد و يشوفني و خايفة اريد اعرف ليش هو سوة هيج

مد ايدة للشماغ و نزلة گبل لا اباوع لعيونه

صارت عيني على شواربه فتحت عيوني بصدمة

من شفته محمد

محمد : شلونك حبيبي

احس واحد كفخني على راسي و مجاي استوعب ضربته قوي

على صدره بأثنين اديه سوه روحة متأذي

- أخ يابة ليش هيج ليش

روز : وخر خل اصعد وخررر

محمد : زعلان مني لو أنا زعلان منك

- وخرررر

دموعي دومها مفشلتني و تنزل بأوقات مو أوقاتها

محمد : لا لا چـا متأدب خوش تأديب

حضني بأثنين اديه و يمسح بدموعي

- اخ منك ملَعب ما أكدرلك

دفعته و ردت اطلع سحب وجهي و عَض خدي اني ضايجة و اريد

اطلع و بنفس الوكت اريد ابقى ويا

هدني و طلعت كل شويه و أدير وجهي على باب المطبخ لحد ما وصلت باب الحوش طلعت لكيت الكراسي كلها متروسة و علي يرتب بالأماكن

ردت أكعد يم عالية

عالية : ولج مكان علي

- لا والله و اني شنو اضل واكفة

احجي وياها و كلبي يدك سريع ما مصدكة دومة يمر بحياتي خطف

درت وجهي وراي جُمارة راسها على چتف ورود تسولف وياها

شريك گاعد يم شمعة و عالية كل شوية تگرصني

روز : إذا ما طلعتي تغارين من شمعة أكص ايدي

عالية : انجبي جا شني اخلي يبقى واكف

- جا ذني الكراسي الاثنين المن لامي

شريك : وين صار هذا

علي : محمدددددد يالله

درت وجهي على جُمارة ادري بيها راح تباوعلي بلعت ريكي و اشرتلها

اي شويه و طلع طبگ الباب النوب صعد عليه قفلة

كلهم لابسين دشاديش و الغتر على چتافهم

جانت اكو غراض بالكراسي الگدامنه شالوهن و گعدوا

محمد : حَرك حبيبي وره الجماعة

طفوا الاضوية بالكوستر و التبريد مشتغل و كلمن شاشة تليفونه

مشتغلة بوجهة بس احنه الأربعة كلمن صافنه بجهة قربت راسها عليه

عالية : ولج علاوي گبالي و شريك بصفي من ذاك السايد

حتى من اعطس اخاف

روز : ما مبين عليج تخافين واحد يحجي الصدگ

- اكلج هم يجي يوم الناس تروح بجنازتنه

- لا تخافين العار ما يموت

- ما تشوفين روحج لسه عايشة

ضحكته بصوت ناصي و وحدة ضربت الثانية

محمد : تـؤ تـؤ تـؤ

علي : كافي صوت يالله

عالية تقلد عليهم من يحچون و اني حاطة الشال بحلگي لا تطلع ضحكتي واتخزه

عالية : هذا ابو عيون الزرگ حماي مهدور دمه لو ما يحب

چا كتلج ناخذج اله

روز : يحبمن

- مادري امه تريد تخطبلة بت خالته و خو ما يرضى إلا

اليحبها يكللهم تجنن بعد ما ندري

احس النار حرگت بلعومي من ابلع ريك نص بية مصدگ المقصودة اني و نص ثاني يگول هسة يتزوج وحدة غيرج و انتِ ضلي انتظري

علي : شريك زِناد بيا سيارة صعد

شريك : بسيارته يروح بعده ما طالع كال اجي وراكم

ظلام و الكوستر يمشي سريع و يخوف من يلوف لو تصير طسه

الكوستر كلها نسوان و بس علي و شريك و محمد موجودين زلم

مد ايدة وره الكرسي و يحرك أصابيعه و عالية مدنيه راسها

تتحجي وي رجلها مديت ايدي على ايده كرصتها قووي

محمد : اخ يا يابة نعسان

كلها نامت و احلى شي شمعة نايمة على چتف شريك و ضاربين الدنيا

كلها عرض الحايط انشمر بحضني ككو فزيت و طاح براس عالية كعدت من النوم قسمته بالنص و انطيتها منه حتى تاكل و ترجع تنام

بنص الطريق تمشي السيارة و وگفنه يم سيطرة باوعوا للجام

ضرب السيارة بيدة و كال حرك اول ما حرك الكوستر واحد

صاح اوگفوا وكفنه و اجه على الجامع الكاعد بيها محمد بطرف اصبعة

سحبوا الجامة وًفتحوها

- محمد آل سرهيد

محمد : نعم سيدي

- ترى ثارنا ما خلص وياك

حجاها و كال يالله حركوا

رادوا يخابرون زِناد علي و شريك بس محمد ما خلاهم

و بقى دمنه بشيشة لحد ما وصلنه النوب من شفت امه و رهينة

شلون انهارن و خاف من عرفن بالسالفة خفت اكثر و ضلت عيني عليه

من شفت الهوسة على الكبور بست گبر امير و قريت الفاتحة

لفضة و صعدت بالكوستر احس عيوني قفلن

انفتح باب الكوستر و صعد وكف گبالي

محمد : خل اشبع منك راح أسافر

- والله والله بس نرجع راح اكول لتغريد عليك

و خلي شتريد تسوي بيه خل تسوي

محمد : من اجي هسة حتى زفة ما اكدر اسويلك متعاين

روز : معليه معليه صارلك قرن يم اهلك و اني عبالي مسافر

و أصلا متقدملي واحد واريد أوافق

حط ايدة على حلگي و ايدة الثانية على ركبتي

محمد : لك انتَ مو على ذمتي شلون تحجي هيج

ردت أضربه انفتح باب الكوستر

....

جُمارة "

من وصلنه للكبر و شفت اسمها شاغت روحي بس زِناد گبلنا موجود

وكاعد يم گبرها گام و راح وكف بعيد قبرها بصب قبر امير

كعدت بنصهم و كل ايد حاطتها على قبر أبوس بهذا و ارجع لهذا

رهينة : ليش هيج مرمرتي أحوالنا يبعد جدتج ليش

شباع صارن أربعين يوم على مصيبتج

حضنت كبرها بأثنين اديه و احجي بصوت ناصي

جُمارة : فضة لو تكومين لو تأخذيني وياج لا تخليني

بهذا العذاب وحدي اني روحي جاي اكل بيها اكل

والله والله ما اريد زِناد و لا راح اخذه والله لو اموت

و لا اكسر وصيتج اني كسرتج و انتِ عايشة

ما راح اكسر وصيتج هم

صرخت بصوت عالي

- معلييهههههه اني والله معليهههههه والله ما اخذته

منج والله الله يخليج سامحيني

ضربت راسي بقبرها قوي و من رفعته لكيت الدم على اسمها طايح من راسي

جرتني امي تصيح عليه بصوت عالي كافي رجعنه للبيت و امي صعدتني وياها لحد ما وصلنه بيت جدة

نمت بساع و ما كعدت غير العصر راسي يريد ينفجر

من كد القهر حتى صوتي مبحوح

امي حضرت غراضنا حتى نطلع و راحت فوك تجيب دشاديشها من نورس رحت اغسل بالمطبخ هوسة كاعد يطبخن و المغسلة الجوه عمي. فاخر واكف تالي طلعت للساحة اغسل بالمغسلة وجهي اول

ما حطيت الصابون و رشيت المي على وجهي انجرت ايدي و بقت عيني تحرگني

فتحت عيني و زِناد گبالي بعبايته و غترته و عگاله

هَد ايدي و يباوعلي بـ حيرة

زِناد : حَتى انتِ ؟

جُمارة: شتريد مني

زِناد : هو شنهو شأريد منج انتِ وين

لا حِس منج و لا خَبر

- ما اريد احجي وياك بعد و لا تتقربلي و أنساني مثل ما

اني قررت انساك غلطت و هسة صحيت على نفسي

باوعلي عاقد حواجبة بـ عصبية

زِناد : و شنهي أنا مضحك عند الخلفوچ

جُمارة : يعني شنو تريد تغصبني عليك هسة ادچ روحي

و أكتلها و أخليك حاير بزمانك

اشرلي بأيدة يهديني

زِناد : عاينيلي شو عينج خليها بعيني

جُمارة شمالج ؟

- ما بية شي كتلك و عوفني اريد ارجع لبيتنا

اني هنا ما مرتاحة و لا راح ارتاح

جر ايدي قوي بعصبية وجعتني ايدي جريتها ما انجرت

زِناد : غير أفهم شبيج و منو وياج

جُمارة : ما اريد أعيش وي وحش مثلك

دمرت حياتي انتَ دمرتها

زِناد : جماررررة

لزمت راسي بأثنين اديه احسة يريد ينفجر و اسمعً

صوت امي تصيحلي ردت اطلع و درت وجهي عليه

جُمارة : أكرررررررررهك .

يا ضباب الغَطة عينك

هيج تيهتة دَربنه

شلون گلبك گدر يكره

و انتَ هَستوك تحبنة ؟

- رُسل فَهد 🤎

التصويت + التعليق بين الفقرات لُطفاً

يا أجمل الوحوش

- رُسل فَهد

....

شَيب راس كلمن سمع سالفتي

البَلابل عافت التغريد

كامت تصرخ بـ وَنه

مايدرون انا مسولف السَهلات

الحچي الما ينحچي ما كشفت عَنه

- رُسل فَهد

....

"روز "

محمد : لك انتَ مو على ذمتي شلون تحجي هيج

ردت أضربه انفتح باب الكوستر مَيلت راسي حتى أشوف منو الصَعد

بخوف لگيت عالية فاتحة حلگها و تباوع علينه نزلت ايدي بأحراج

نكث الغترة الي على چتفة و گَح

محمد : خلصتوا بعدكم

عالية : لا بعدهم

تحجي ويا و تباوعلي بصدمة عافني و نزل و اجتي عليه تركض

ضربتني على ايدي دفعتها

عالية : ولج منين تعرفي و ما تكولين

روز : أعرفة من زمان و أحبة و راح نتزوج

حطت ايدها على حلگها صافنه و مدري شتتذكر

عالية : عزززززززه يعني انتِ حبيبته و ما يگول لامه

لان تكره اختج تغريد ، يبووو شراح يصير بيج بس لا تخافين أنا يمج

روز : خلفلة عليج خاف أني عايزة قهر

كعدت بصفي ساكته و كل شوية تتذكر شي و تضربني على رجلي

عالية : غرفتج بصف غرفتي هي غرفة رجلي وي خطيبته

بس لان احبج راح اخلي ينطيها الكم

- دنجبي شنو عايزة عليكم اني

- شبيج مو من هسة ادور سوالف أعيرج بيهن

غميتها و بدوا يصعدون و أنقهرت أكثر من محمد صعد وي زِناد و ما أجة ويانه عالية راحت يم رجلها و بقيت وحدي كاعدة عيني على الشباج

مادري لشوكت تبقى هيج يا وهمي تجي يوم و تغيب اشهر

وصلنه للبيت و اني ما ادري أحير بروحي لو أحير بحال جُمارة

الي صايرة مثل المخبلة ما تنعرف تصرفاتها طول الوكت صافنة و تبجي

و تاكل بروحها اكل من يوم موت فضة لليوم هي محملة نفسها المسؤولية

فوك ما هي حساسة

چان الكل يلومها بس لان اني اعرفها جُمارة شنو اكول الله يساعدها

لان چانت صغيرة تندل بيت النمل من تشوفهن يشيلن اكل و يمشن مسافة تجيب الاكل يم بيتهن و عدها خل تبقى تحرسهن لحد ما يخلصن حتى ما يجي امير يخرب بيتهن

مو هسة تشوف نفسها سبب بموت و خراب علاقة شخص

اخذت من خالة رهينة لصقة جرح و خليتها على كصتها و ماكو مثل

جدتها تلوب فوگ راسها و خايفة عليها

نامت و بقيت الوب و اكل بروحي اني شلون آمن يعالية و كلت الها

منو يكول ما راح دكول و تفضحني غير تغريد تعزم الكاظمية كلها

على جثتي كلها نامت الظهر و اني كاعدة افتر بلكي الكالي وحدة كاعدة اسولف وياها الهي روحي من هذا التفكير الذبحني

لحد ما نزلت حياة شفت دمعة تمشي وراها من فوك بس من شافتني اباوع الهن رجعت صعدت ما نزلت بعد ، اموت منها هاي دمعة

حياة : يا هلا شنو ماتعبانه من الطريق

روز : لا والله نعسانة بس بالي يم جُمارة خطية

حياة : ان شاء الله ترجع تصير زينة احسن من قبل

والله هاي الما جانت على البال فضة و وصيتها ولج شلون

هي بنفسها جانت تگلي شكد تتمنى تعاين زِناد متزوج و عندة جهال تشيل اسمه

روز : يجوز جانت تكابر محد ترضى تشوف رجلها متزوج

حياة : والله حيرة ، ولج شو هي گبل لا يعقد عليها تدري يحبمن و بعدين هو ياهو المايدري زِناد يحب جُمارة

و بلسانها والله بلسانها گبل لا يموت ابن اختج ايام عرس يونس حماي دكول لجدة

ما ترحين تزوجي شمنتظرة شو زف الديرة كلها وهو لسة

و جدة دكللها من يجي يگلي گومي أكومن شسويلة إذا هو ساكت

روز : جانت جُمارة تدرس سادس يجوز رادها تكمل

حياة : اي و بعد ما ندري الله يرحم فضة ماتت و مات السر وياها

بقيت صافنة حسبة تجيبني و حسبة توديني جبنه العمر كلها بس قهر و حسرة ما ندري شوكت نكول اجتي أيامنه الحلوة

عدنان : حياة هنا جيبي الاكل

مدت راسها للهول و كالتله صار و هي تصب الاكل بالصينية

و اني اتخيل يجي يوم أصب لمحمد الاكل مثلهن

ودت الصينية اله و اني مشيت وراها حتى أطب للغرفة

عدنان : ما سمعتي بعد شصار على سالفة محمد ابن عمي

حياة : والله گبل شوي چان زِناد هنا و گال راح أسفرة اليوم

- خل يروح لا ينچتل بعد حيل للفواتح ما بينه

- اي والله لا اسم الله عليه

بقيت حاطة ايدي على گلبي و واكفة يم باب الغرفة و دموعي تجري

احس برووحي تحترگ حرگ يمة جا تالي هاي مجازاتي و مجازاة

صبري ينكتل و يروح من ايدي اسم الله عليه ، خلي يسافر

اكول خلي يسافر و دموعي على خدي تجري وره هاي السفرة

شكد راح تروح و تخليني ابقى انتظر شكد راح يبقى القهر و الاشتياق

ياكل بيه من وراك و اني مثل بلاع الموس لا بية أعوفك و لا بية اكللهم منو انتَ و شتصير مني

طبيت للغرفة كلهن نايمات غطيت راسي و ابجي بصوت ناصي لا تسمعني وحدة ابجي بهضمة شكد انهضمت بحياتي بس هاي

اول مرة احس روحي من كل الجهات خسرانة

كعدت على صوت تغريد و هي دكول يالله راح نروح

غسلت وجهي و بدلت وصلت للشال البسه و اسمع تغريد تصيح اسم جُمارة بعصبية طلعت بساع لا يسون النه مصيبة و يتعاركن

طلعت للساحة و تغريد عتت جُمارة من. ايدها و طلعتها من المضيف

جُمارة عيونها غرگانه دمع بس ما تخلي دموعها تنزل كل ثانية و ماسحة عيونها

بدلت و بقى الشال بيدها لحد ما كالت تغريد يالله طلعنه و خالة رهينة حاولت بكل طريقة تقنع تغريد تبقى لو تخلي جُمارة بس ما قبلت و حتى جُمارة ما رضت طلعنه من الباب و اني اباوع للبيوت عيني على بيت

عمار بلكي الله و ألچحة واكف بالباب هو و اخوته بس ماكو ولا واحد

جان زِناد واكف يسوي تاير سيارته رافع الردانات و نازع العباية و الغترة و احنه واكفات بالباب تغريد مدري شتنتظر

نكث دشداشته و باوع علينه ، آشر بأيدة على السيارة

زِناد : صعدوا يالله

فتح باب السايق و صارت عينه على الضوه مال سيارة كبال بيت عجيبة و تحركت السيارة اجت علينه وكفت بالباب و آمجد يسوق دگ هورن و اشر لتغريد يالله فتحت باب الصدر تغريد و صعدت يمة

صعدت جُمارة و اني يمها ليوره طبگت الباب و تحركت السيارة

و زِناد على نفس الوگفة ايدة على جامة باب السايق و يباوع علينه مصغر عيونه

اني مو جُمارة و النظرة قهرتني ، راسها على الجامة و تباوع للطريق

و حلگها ما يسكت من سورة الفاتحة كل ما تصفن تبقى تقره بيها

يمكن تحسها الطريقة الي تثبت لفضة بيها هي معليها بكلشي صار

وصلنة للبيت و كلها ساكته حتى تغريد و امجد محد حِجه شي

لحد ما وصلنه اني و جُمارة صعدنه بس تغريد بقت يم امجد بالهول

جُمارة رجعت نامت و اني بالي كله يمه طلعت التليفون اخابرة لكيته طافي شحن قفلت الباب و حطيته على الشحن

و بقيت بالغرفة افتر اريدة يشحن بسرعة ، دكت الباب تغريد و ضميته بسرعة و خربت فراشي عود جنت نايمة فتحت الباب و ممثلة ملامح النوم دفعت الباب قوي و فتحت الضوة

تغريد : شكو قافلات الباب

روز : جُمارة نايمة خطية و ماندري مقفول

احجي وياها وهي خازرتني تباوع لعيوني و اني خايفة لا على حظي

يدك التليفون و تسمعة ، سويت روحي ارجع انام و هي بقت بالغرفة

تفتر كل شويه تروح يم جُمارة تباوع الها و تندار تباوع للحيطان و ترجع لجمارة لحد ما طلعت

بقيت خايفة و حتى ما حطيت التليفون على الشحن لان بس اقفل الباب

تعرف عندي شي ضليت أفكر لحد ما نمت و غفيت كعدت على صياح جُمارة نزلت اركض لكيتها تبچي و تتعارك وي تغريد

روز : شكو شصار

جُمارة : كولي لاختج تأخذني للطبيب

رااااااسي راح ينفجر

روز : اخذيها تغريد صدك تحجين صار جم شهر راسها يوجعها خاف يطلع بيها شي

تغريد : ما بيها هاي من كثر ما تفكر بذاك الـ الله ينتقم منه و بعدين أني ما كاعدتلجن على بنك ينراد كراوي و كشفة و دوة

انهضمت جُمارة و مسحت دموعها لازمه راسها و صعدت ،

مديت ايدي على الگلادة مال امي برگبتي الي حلفت الف حلفة ما أبيعها بس خايفة على جُمارة هواي و احس روحي ما بقى شي ما خسرته ضلت على الگلادة

مرت جُمارة يمي بعصبية و هي تنزل بسرعة شمرت على الكرويته فلوس

جُمارة : هاي فلوس يالله كومي اخذيني

شالتهن تغريد بعصبية و شگتهن ، شمرتهن بالگاع

تغريد : ذني منين من زِناد چنتي تخلي يتصدق عليج

و تأخذين منه فلوس

جُمارة ساكته بس صافنة و تبجي و تغريد ما صدكت تنفتح سالفة بيها زِناد و رهينة جريت جُمارة من ايدها و صعدتها اسكت بيها

قفلت الباب و حطيت التليفون على الشحن ، اول ما شحن شوية

ضميته سوت النه تغريد عشا و اخذت جُمارة تنيمها يمها جوه

شوكت يجي الدوام بلكي تتداوم و شوية تصير زينه و ترجع مثل قبل

قفلت الباب وراهن بساع لگيته داك عليه دكيت بساع و احسب بالدگات

بيا دگة راح يجاوب و يكول الو

رادت تنتهي المكالمة و اجاني صوته

محمد : ها صديقي

روز : شنو صديقي ها شنو صديقي انتَ وين و وين تريد تشرد و تعوفني والله غصبا ما عليك تجي تطلگني و تروح لا افضحك فضيحة

- يايابة يا بوية افضحني ولك خاف أنا ما مفضوح

روز :اني كتلك و انتَ عود لا تسمع كلامي والله اروح

لأبوك و افضحكم و أخليك تتندم ع الساعة العقدت بيها عليه

محمد : كلشي أتندم عليه إلا انتَ

روز : صدك راح تسافر

محمد : بكيفك تريدني أموت ابقى هنا

- اني اريد اكتلك بيدي ما اريد هم يكتلوك

- تـؤ تـؤ تـؤ اموت ع الشرس

روز : لا تستفزني محمد اني جاي احجي وياك و گلبي محترگ

محمد : أنا اعرف شلون أطفي

سكتت أتنفس بحرگة كلب لان صدك راح يموتني هذا البشر

روز : شوف محمد ترى تعرفني كلش زين شكد احبك

و طببتك للسجن ترى هسة هم ما راح يوكف حبك بعيني

محمد : شتريد اجي اخطبك رسمي

يالله حضر روحك باجر جاييك

روز : لا و فضة اليوم أربعينها و تغريد كلش عصبية

محمد : جا شتريد فهمني

بقيت ساكته و مسحت دموعي و سديت التليفون بوجهة

بقيت بالگاع كاعدة و أنشغ اني خليت روحي اسيرة بحبك

نمت بالكاع و جريت الغطه تغطيت بي و يومية بية خوفة لا تغريد تغسلة و اني ما ادري كل ما تريد تاخذة تغسلة اطلع الها حجة و الحجة

هي عطرة من يوم الي نام بي لليوم جنت أتعجب على زِناد

اكول وين واصل بالحب و هم نايم يشم لحاف جُمارة تالي صرت مثله

ضل يدك عليه و اني ما جاوبته بس كوه لازمة روحي

اريدة بس ما ادري شأريد منه لحد ماعيوني احسها

من البجي مورمة ضميت التليفون و غفيت بالگاع ..

بين النايمة و الگاعدة فزيت احس روحي حلمانه من أنرفع الغطة

و تمدد آحد وراي بلعت ريكي و غمضت عيوني اخاف حتى أدير وجهي ، جُمارة ما عدها هيج سولف تحضني هي تعبر عن حبها بغير طريقة

من ألعطر فَز گلبي و درت وجهي بساع بصدمة من لگيته نايم بصفي

ورث الجكارة و سحب نفس و اباوع الضوة بدة يطلع يعني دنيا الفجر

لطمت على وجهي

محمد : تـؤ تـؤ تـؤ شلون هيج تضرب وجهك ادبسز

روز : شلون طبيت منو كلك تجي ولك و تغريد

محمد: لدكول لك لا افلش سنونك بحلگك

- محمد تحجي صدگ

- طبعا جا أعوف ابني يبچي و ينام مهضوم

ضربته على صدرة ضِحك و گعد رحت للباب اركض لكيته قافلة

روز : شلون طبيت للبيت

محمد : هههههه هذاك اليوم من طلعت أخذت نسخة

گلت تفيدني و صدك فادتني

روز : لك شلون ما خفت شلون ما شافتك تغريد

محمد : لو شايفتني يا غبية چا ما هسة أنا يمج

- هسة تكعد و تشوفك وحق الله تموتني

- ليش ما تخلوني أكتلها و آريح الكوكب

لزمت راسي بأثنين ادية من الخوف و التفكير و اباوعلة

سميناك وهمي هو ما تطبق الاسم بالحقيقة

روز : بس فهمني شلون كدرت تطب

محمد : گبل جانت أمي دگول عليه يبوگ الكحلة من العين

يعني أنا خاطفك من ايد تغريد تريدني ما اصعدلك

بقيت الوب افتر بالغرفة و خايفة اكثر من ذيج المرة

وكفت يم باب الغرفة خليت اذاني اسمع إذا تغريد لو جُمارة كعدن

و هو متمدد بالكاع و متغطي

محمد : تعال جوعان بس ما أكلت أريد اكل وياك

باوعتله بعصبية اريدة يحس على الغلط الي غلطة

بس و لا تنكسر عينه ولا يحس

محمد : تعال يمي ترى دقايق و اروح

روز : تسافر

- اي والله بس كلت شلون اروح وما مراضيك

- ترى اني ما أصالحك حتى لو جاي تراضيني

كام من مكانه و اجه عليه جَر ايدي و يبوس بخدي كل شوية من جهة

روز : ترى اني مو عندك مضحك افتهمت لو لا

محمد : لو هيج المضاحك لو ختولي

كعدت بحضنه و هو ياكل أكلته مدري أكلتي المفضلة

المهم إذا جابها ما تضل منها و لا قطعة شال اول قطعة يوكلني درت وجهي خله ايده على بطني يقرقرني ضحكت و حط القطعة بحلگي

ضربته بأيدة و اخذتها منه ، يوكلني فنكر و وي كل قطعة يبوسني

روز : وين لگيت مطعم مفتح بهذا الوكت

محمد : معليك لخاطرك افتحهم كلهم

باوعتلة بطرف عيني اريد اكله استقر

روز : يعني سويتها صدك و تسافر و تعوفني وحدي

ترى تغريد على اي لحظة تسحلني تريد تزوجني

محمد : جا أنا غشيم من عقدت عليك

- و عبالك حلوة سوايتك

- ها لازم تريد تروح تتزوج

روز : اتزوج طبعا لعد اضل انتظرك و اضل مكفخة عندك و عند تغريد لعبت نفسي منكم

قَرب راسة على رگبتي باسني و خَلة شعري وره اذاني

محمد : اموت على ربك

خلصت الاكل و ضميت العلاكة جوه الجرباية

محمد : نضل كاعدين على الوسخ

روز : اي طبعاً لعد شتريد خاف عبالك انزلك تغسل عايش اللحظة شنو البيت بيتك

ضحك و هو يمسح وجهة عدل المخدة و شمر روحه عليها

تمدد يمه و احنه اثنينه أدينه بيها ريحة بيتزا أندگ و شهگت

لزم ايدي مبتسم يأشرلي على كيفج و اني تشاهدت

جُمارة : روز فتحي الباب

تنفست على كيف و اشرتله على وره الباب و هو يسوي روحة مابي حيل

يگوم جريته قوي واني اديه ترجف فتحت الباب و اقرا ايات بكلبي

لكيت بس جُمارة واكفة بالباب و مستغربة ليش اني ما اخليها تفوت

جُمارة : اريد انام بچربايتي

- لا

- شنو لا

رادت تفوت طلعت الها و طلبتها لغرفة امير لان القفل مكسور

جُمارة : شبيج شكو

- محمد هنا حبابة جُمارة لا تكولين لتغريد

- شجابة و شلون طببتي للبيت و شكو لسه تحجين ويا

ما شفتي اني شجاي يصير بيه

روز : مابيج شي و زِناد يحبج و تحبي لا تكولين هيج

هسة ابقي هنا بين ما يروح حبابة

هزت راسها بـ اي طلعت بساع و طبيت للغرفة لكيته متمدد و يدخن

روز : هاي جمارة الحمدلله اشوه من تغريد

- حبيبة زِناد شكد كتله أعقد عليها و خلي تغريد كدام الأمر الواقع ما يرضى يكول أنا مو مستهتر مثلك

روز : ترى تغريد إذا عرفت تموتك

محمد : بيمن تموتني سلاح لو بيدها

- لسانها كافي عليكم

- و علي أكصة بس أنا غير اخاف عليك منها

روز : يالله يالله امشي روح قبل لا تكعد

مد ايدة على ظهري و شالني من الكاع بأيد وحدة تذكرت لمن جنت ويا

بهذاك البيت باس رگبتي واني حضنته بأثنين اديه دموعي

تجري على ياخة قميصة

محمد : تعبتك وياي و انتَ هم تعبتني

روز : خلصت عمري انتظرك و انتَ يمي

ايد شايلني بيها و ايد الثانية على راسي و يجر نفس

طويل من رگبتي و من يزفرة حار يچويني

محمد : جوه مخدتك فلوس اشتري شيعجبك

و أنا كل فترة اخلي زِناد يدزلك بيد جُمارة

- ما اريد منك شي

- ادري بيك تريدني

ضربتي على ظهرة نزلني و لزم حنچي باس خدي قوي و عضني

و وگف يعدل بقميصة و يضم غراضة بجيوبة

راد يضم تليفونه ، فتح الشاشه و الكاميره نَزل روحة لمستواي باس خدي و مخلي ايدة بعيدة طَگ صوره باسها و ضمها

روز : ما اريد عرس أخذني وياك

محمد : كتلك أعوضك و لازم أوفي بهذا الوعد

مسحت دموعي و بقيت ساكته مد ايدة على وجهي

يمسح عيوني بردن قميصة

محمد : لا تبچي و تخليني أروح مهموم والله أجيك

زِناد كال أفضها وياهم و إذا ما فضها أجيك اعقد عليك اطلعلك جواز و آخذك وياي و هناك اسويلك زفة حتى لو بس اني وياك تقبل مو

كرص خدي و باسة واني احاول الزم دموعي بس ما اكدرلهن

مد ايدة على الباب راد يطلع لزمت قميصة دار وجهة عليه مبتسم

يريد يطمني شفايفي من القهر ترجف

محمد : ها حبيبي

روز : خاف تروح و بعد ما تجيني

ضحك و حضني بأثنين اديه و يضمني حيل لصدرة

بس يريدني اصدك هو راح يرجعلي

محمد : وعد و من هذا الشارب

لزم شاربة و بَاس ايدي

...

" حور "

باوعت للمره بخزرة خطية رادت تبجي و و انفتح باب الغرفة

طَب واحد وجهة محفر و شعره كفشة مصبوغة الوان و شكلة يخوف

ريحتة التخرع من بعيد تنشم لفيت روحي بساع بالعباية

- ووووووين الفلوس

- ما طلعت يمة والله اليوم مريضة

اشر عليه و كال الها منو هاي

- مرة مريضة تريد تأجر و كعدت يمي بين ما تطلع تشتغل و تطيني فلوس و انطيهن الك

- يوميةةةةةة باجرررر جيبي الفلوس يالله

بقى يصيح عليها بصوت عالي من آيس منها ما عدها دفرها برجلة

و كعد ركبة و نص يفتشها كلشي ما لگه كام يكفر و يغلط و طلع هي بساعة قفلت الباب ترجف و لازمة خاصرتها

حور : منو هذا ابنج ؟

- اي والله حرامات

حور : وليش هيج يسوي

- يشرب و يا خالة اليشرب ينغسل حضة

بقيت ساكته خايفة ما نمت و عيني على البلوكة الشالها

الطفل و طب من الفتحة مالتها

حور : أنا ما ابقى هنا خالة شوفيلي مكان امن روحي بي

- هسة بس يطلع الضوه اكوم ادبرلج مچان

انتِ تردين تشتغلين

حور : اي لان اول و تالي الفلوس العندي تخلص

اول ما صار الفجر طلعنه ندور و نفتر حصلنه بيت صغير هو هم خرابة

بس اشوه من بيت المره عاد بي سگف و مبني مو مال تنشال بلوكة من الحايط و بابه صغير ما يتجاوز ٢٥ متر هن كلهن البيوت بهذا الفرع هيج بقيت بي بس اجذب لو كلت ما خايفة دفعت ايجار مال شهرين

وبقت عندي عشرين الف مصرف ، يعني لازم اشتغل

الله يخلي فضة هي انطتنياهن