رواية يا احلى نوبات جنوني الفصل العاشر 10 - بقلم مريم اماسي الليل

نزلنا ؛  باب المطبخ  طلعت امي .....بوست رفل ورحبت بيها ....گتلها يمه منو موجود من الولد ينزل جنطة رفل  ....... گلتلي عيسى هسه اصيحه
كتلها لرفل ليش واگفه متدخلين شنو اول مره تجين لبيتنا مجاوبتني باوعتلي بنظره ضايجه ودخلت  ورا امي .....وراها اجاني عيسى نزل الجنطه گتله وديها بغرفتي
من دخلت لگيتها گاعده ويا امي نسوان اخوتي تسولف بس خجلانه ومماخذه راحتها مثل كل مره من تجي
اتقصدت اصيحها كدام الكل گتلها رفوله تعالي ويايه للغرفه
اجتي ورايه من دخلنا سديت الباب
گتلها ترى ماكو داعي هلكد خجلانه الكل يدري اني جبرتج تجين ويايه ويدرون بمشكلتي ويا ابوج  وسويتها شغلة عناد ويا
اتعلمي هذا البيت بيتج والج بي مثل ما لنسوان اخوتي اتحمليني كم يوم دا ارتب امور العرس رفل ترى والله اني تعبان
ما عايزني تعب
رفل:جنت كلش مغثوثه منه لدرجه ما اكدر اباوع بوجهه هو فوك الموقف الي خلاني بي مكدر يتحملني وتذمر لان شافني خجلانه من اهله ميدري اني دا احس مثل الوحده مسويه شي بالحرام وجايه ديسترون عليها خلاني بموقف كدام اهله  كلش صعب
من بقى يحجي كلي تعبان واتحمليني  جاوبته ان شاء  الله
راح تمدد على الفراش
گتله اريد اغير ملابسي اطلع گلي رفل ميت من التعب لو تبدلين لو تنتظرين بين ما ارتاح شويه والله مدا اكدر اوگف من التعب
من شفته تعبان قلبي منطاني گتله علاوي شبيج  جاوبني مابيه
شي  عدل نفسه وگام من الفراش  گلي بدلي من تخلصين صيحيني  اجي انام وطلع
من شفته طلع ضايج متحملت كمت ابچي حياتي كلها انكلبت بين ليله ويوم  بين اهل وبين رجال ما ادري شبي مكلوب عليه
شكد جنت مرتاحه وسعيده وياه نكلبت كلها مغثه 
بدلت ملابسي وطلعت دا اصيحه لگيته متمدد على القنفه نايم
دخلت خاله بيدها غطى غطته
گلتلي رفوله تعالي عندي حجي وياج  دخلنا للصاله  كعدنا
گلتلي خاله اني ادري الشغله صعبه عليج وعلاء خلاج بموقف
صعب لان خاف لاتتأثرين بكلام ابوج ترى خاله والله هو يحبج
صارله من يوم المشكله منايم قلق ليصير بيناتكم شي يفرقكم
هاي شوفي هسه اجيتي ويا أمن يله كدر ينام  خاله لتصدگين
بهاي ود وبالتهمه الي ذبتها عليه الله لايوفقها ان شاء الله تطلع حوبته بيها
مثل ما غثته  اتحملي هالايام اخاف يصير عصبي لو يغثج  ترى
تعبان مو هينه عليه يذبوله تهمه كدام العالم واهلج وأصدقاءه 
دياكل بروحه يريد طريقه يكشف هالكذابه
بس اني گتله الله موجود يطلع حوبتك بيها الي اريده منج تهونين عنه
رفل :والله خاله اني هم من يوم المشكله مشفت النوم وبس ابچي
ولو ما احبه ورايدته ما اجي وياه واعوف اهلي بس خفت من حلف عليه گلي اذا تختارين اهلج تحرمين عليه وماريدج ....وتبقين يم اهلج وما اطلك  صح ضجت من الموقف الي خلاني بي  بس ما
اكدر اغثه واشوفه تعبان اطمئني خاله ماكو بيناتنا شي كلشي تمام
خاله :والشغله الثانيه لتنطي مجال منا ليوم العرس  لان اني ردت تجين تنامين يمي عصب وبقى يعيط گلي شي يخص حياتي ومرتي لحد يدخل بي اني اشوف الانسب
والصدگ خاله اني ما اكدرله بس هسه الله هداه من طلع گلي
راح انام بالهول ورفل بالغرفه منا للعرس  البيت واسع ماشاء الله بس اخوته ونسوانهم فد ساعه ساعتين يجون يباتون يمنا لان عمج من صارت المشكله طلب منهم ميعوفون اخوهم يبقون  ويا
الى ان تخلص السالفه
ولو هو عنودي ومقبل احد يروح ويا للشغل بس ابوه واخوته سووها غصبا عنه يخافون عليه
رفل :لا خاله ان شاء الله ماكو شي
ان شاء الله اكو شغله هم اريد اگلج عليها تقنعي بيها تطلعون
لبيتكم من الزفه اني اريده يستقر ويرتاح مثل اخوته لكبار من البدايه يرتب حياته وانتو موبعيدين علينا بالشارع الثاني
خاله اني مو ما اريدكم لا والله هو عزيز قلبي واقرب واحد الي من ولدي  وانت احبج على حبه الج بس اني حابه تستقرون
اني وابوهم ما دايميلهم وهو عنده بيت مو مثل اخوته الصغار مجبورين يكعدون ويانا منا لحد ما الله يرزقهم وهم يصير عدهم بيوت ويطلعون  هو داگ رجل الا اني وابوه نجي يمكم واني ما اكدر اعوف بيتي
رفل :خاله اني هذا الموضوع ما اكدر احجي بي ويا لان اعرفه متعلق بيكم ومن البدايه گايلي اني لو اكعد ويا اهلي لو اهلي يجون ويايه  وأتفقنا على هالشي
لخاطري عوفي هالموضوع هسه لنزيدها عليه كافي عليه مغثة هالمشكله تنحل وبعدين الله كريم هو يقرر
خالتي :اي والله خاله هم صحيح خلي لعد براحته يله حبيبتي روحي ارتاحي اريدج من يجون جماعتنا بليل تطلعين عروس
ووجهج مرتاح ما اريد يبين كدام احد عدكم مشكله
رفل :صار خاله بعيني گلتلي تسلم عينج 
طلعت من الصاله دخلت للهول شفته  بعده نايم وماكو احد  تقربت علي
بسته  من خده فزيت من لزم ايدي بسرعه  گتله عبالي نايم
جاوبني  مبتسم شكد الساعه
ما ادري  علاوي انت مرتاح على القنفه  جاوبني حل مؤقت لان اخوتي ديجون يباتون يمنا ينامون بالغرف
وامي لازمه عليه رقابه تخاف على چنتها مني  باس ايدي جرني تعالي اگعدي يمي گلي
باجر اني اوديج للكليه   وتخلين ابو الخط يرجعج حتى يندل البيت ويگوم يمرلج لبيتنا
بيج حيل اخذج هسه  نروح للبيت اتشوفي حتى هالايام نطلع نشتري اثاث
رفل: لا والله تعبانه اريد اروح انام ساعه حتى اكعد ويا اخوتك ونسوانهم من يجون
علاء :روحي حبيبتي اني اكعدج من يجون .
من طلعت للهول تمددت على القنفه حسيت بنفسي غثيتها طلعت
التعب مال يومين عليها وتحسست منها علمود موضوع تنزيل الجنطه وهي مجانت تقصد اني تحججت بداخلي لان ضايج من
المشاكل الي صارت بسبب ود /انبت نفسي لان دا ااذيها بدون ما اقصد وفوك ما عايفه اهلها اليوم  بسببي ما اتحملت زعلها مني حقها اتضوج بعد التهديد الي هددتها بي
المفروض ماطول اختارتني
وقبلت تجي ويايه اخليها بعيوني بقيت انتظرها تطلع واصالحها غفيت ........  من كعدت بقيت مطفي على القنفه مغمض عيني اريد ارجع انام  من التعب
من حسيت بضل فوگايه وبوستني جريت ايدها  وصالحتها بصوره غير مباشره

رفل :دخلت للغرفه اول مخليت راسي على المخده ما دريت بالدنيا

الى ان حسيت بواحد نايم بصفي يبوسني فتحت عيني شفته فهودي وعلاء واگف يضحك عليه
گلي هاي امي دزته جاسوس  ويايه لان گتلها راح اكعد رفل تعرف
ابنها عنده نوايا..... خربتها بفهد
رفل :همزين گتلي حتى اقفل الباب من انام بليل
علاء :لا حبيبتي ما اسويها نامي مرتاحه ميحتاج تقفلين الباب كم يوم واقفلها علينا سوا
يله گومي ترى شويه ويصبون العشا روحي يمهم اخاف يحتاجون شي قلبي
من وصلنا للباب اتقربت على اذنها گتلها اموت عليج 
اول ما كعدنا بالهول فهد راح على امي گلها  بصوت عالي بيبي علاء باس عمه 
كلهم ضحكوا ابو گله لك عيب /گتلهم هذا هم حظي حتى من فهودي ما خلصت
لك عمو اني ما بوستها صدگ من وراك ادري بيك ببغاء
وردت احجيلها حجايه خفت من فتانتك شاورتها وما سلمت من لسانك  هالايام الكل واگعيلي تهايم
هالمره اريد اثبت التهمه  خليت ايدي على چتف رفل وبوستها من خدها كدامهم  هي خجلت
گتله  لفهد بصوت ناصي وامي تسمعني لان كاعده قريبه علينا  .... هاي بعنادك انت ونعومه مو دزتك تخرب عليه
امي ضحكت گلتلي بصوت ناصي  يويل عيب شو طالعه عينك اخوتك كاعدين
گتلها  بضحك ميصير نسوي العرس باجر  جاوبتني  مبتسمه راح انيم البنيه يمي اليوم ما اامن بيك
گتلها والله فكره حتى انام بالوسط احضنج واحضن مرتي  ضحكت گلتلي ولك اليوم شبيك  جاوبتها نعومه عوفيني مرتاح
اطلعي انت من السالفه اوعدج اصير عاقل 
گالت لرفل خاله اني هذا ما اكدرله انت دبري امرج وياه
رفل:لا خاله يتشاقى وياج
علاء:ورا ما گامت امي گتلها لرفل لا والله ما اشاقى حتى المفتاح جريته من الباب حتى متكدرين تقفلي بليل
رفل : هسه اگلها لخاله عليك والله اروح انام يمها
علاء:روحي حبيبتي  هم اجي وراج
بعدها تعشينا وبقينا ملتمين الى ان نعسوا كل واحد راح لغرفته
بقينا اني وامي وابويه ورفل وراها  بشويه ابويه دخل للغرفه
شفت امي بقت گاعده ضحكت گلت خلي اداهرها گتلها نعومه شوكت تروحين تنامين موزين عليج السهر
رفل گالت اني اروح انام ورايه دوام  امي گلتلي مبتسمه لعد اني هم اروح انام
گتلهم شكلكم متفقات عليه رفل ضحكت گلتلي تصبحون على خير وراحت
بقت امي جان تگلي ولك علاء انت دتشاقى لو صدك
گتلها هاي شبيج يوم  طبعا اشاقى ما انام بالغرفه الا ورا العرس بس ردت اداهرج
لتخافين على چنتج مفترسه تربية سالم (ابوها)متنطيني مجال
گلتلي لاماما ميصير تروح يمها هسه
ميصير كدام اخوتك ونسوانهم  ضحكت لان عرفت مخططاتي
گتلها روح نامي وراسج بارد حبيبتي
كلتلي يله تصبح على خير  جاوبتها وانت من اهله
وراساعه صار البيت هدوء كلها نامت
گمت رحت لغرفتي لگيت رفل كاعده دتقرا اندارت عليه ها علاوي شعندك
گتلها اجيت انطيج المفتاح ليش كاعده لهسه مو عندج دوام
جاوبتني مراح اروح  باجر ورا اداوم
گتلها رفل ركزي بدوامج ودروسج حبيبتي وانجحي دور اول مو
توگعيني ويا ابوج بمشاكل واطلع بعدين  ماعندي كلمه اني انطيته وعد اخليج اتكملين  كليه مابقى شي وتتخرجين مو اتضيعيها
رفل :جاوبته لا بس صدك باجر ماعندي شي والورا عندي امتحان يادوب الحگ ادرس باجر وهسه ما اجاني نوم گلت اورق الملزمه التهي بيها
علاء :گعدت على الفراش گتلها تعالي نحجي بشغلات اني هم منعسان بس بالاول افتحي الخانه الاولى
بيها قاصه انطيتها رقمها دخلته انفتحت  گتلها من باجر تاخذين فلوس وتطلعين انت وامي وريا تكملين كل امورج بدون مترجعيلي
تفتحيها وتاخذين الي تردي  حتى غرفة النوم شوفي على ذوقج
سدت الكنتور واجتي گعدت بصفي
گتلها راح نكعد يم اهلي الى ان تخلصين كليه بهالفتره انرتب بيتنا ونطلع لان امي قافله متقبل عندي بيت واكعد وياهم تريدني استقر وحدي مثل اخوتي الكبار
رفل : خلينا نكعد وياهم الى ان اتخرج وبعدها نطلع  لبيتنا اذا  مقبلوا خاله وعمو يجون  ومرتاحيت نرجع يمهم
علاء:رفوله ابقي هيج مريحتني حتى ورا منتزوج
واني لو تطلبين عيوني انطيها بدون ما افكر
بقينا نسولف اني وياها حتى على موضوع اهلها وود

بهالايام كضيناها ملتهين نحضر للعرس وهي وامي واختها يطلعون ورا مترجع من الكليه يكملون امورهم 
بهالايام  جنت كل ما ادخل  للبيت واشوفها تتلگاني احسها هديه من رب العالمين
لان جنت اتحسر على يوم ارجع الگى مره تنتظرني مثل  اخوتي من تتلگاهم نسوانهم ........ويمكن احس مرتي تحبني اكثر من اي وحده تحب رجلها .........لان متعترض على اي قرار تشوفه يريحني واني هم ما اسوي شي اذا ما اشاركها بي  بهذه ١٠ ايام راحت مرتين لبيت اهلها اني اوصلها يم ريا وتروح وياهم
علاقتها بأمي واهلي كلش زينه وتحاول دائما تحسس امي هي الكل بالكل عندي
  اني بالمقابل  محترمها ومقدرها كدام اهلي لان اعرف قيمة المره من قيمة الرجال
والرجال الي يخلي احترام لمرته وخصوصيه لعلاقتهم  اهله يحترموها ويحترمون حياتهم
رفل :بيوم الحنه خاله عزمت امي وخواتي وطلبت منهم يجون الظهر يساعدوني وگلتلهم احنه اهل.......و البيت بيتكم علمود رفل متحس نفسها وحدها
طبعا هالحجي گلتلي عليه رشا
خالتي المره تحب الكلمه الطيبه من احس بيها تتخيل اني راح اخذ علاء منها  احاول اوصللها بالحجي او الافعال هي الكل بالكل وبقيت انبه علاء على هالموضوع  لان  علاقته قويه بيها
؛
واكثر واحد يتشاقى ويتحارش بيها مثل الاصدقاء
الي يخليني اتصرف بهالشكل لان اعرف شكد تعبت وياه وهو بهالحاله وادري هو هم ميكدر يستغني عنها واشوفه مثل الطفل من يتعامل وياها وهي نفس الشي
واعرف طريقي لقلبه حبي لاهله بهالايام هو جان كلش حذر بالتعامل ويايه كدام اهله حتى الغرفه ميدخلها من اكو احد موجود بالهول
من اجوي امي وخواتي بيوم الحنه  الظهر سلم عليهم وطلع
لبيت اخو
بقوا البنات وامي ونسوان اخوته يحضرون للحفله .
اني وريا مر علينا علاء ودانا للصالون اتفقت ويا ساعتين ونص يرجعلنا
وراها اتأخرت يم الصالون طلعت ريا گلتلي واگف برا هسه اطلع ابلغه   بالتأخير
بقيت قلقه ليصير عصبي من دخلت ريا
تتمضحك گلتلي عيني يگول لو تريدني انتظرها العمر كله ...انتظرها
گتلها احجي الصدك گلتلي والله طلعت گتله علاء روح وساعه بعد يله ترجع گلي لا انتظر گتله مو اخاف نتأخر
گلي خلي تتأخر مو يوميه نتزوج ثانيا باجر ورايه عرس لازم اصير حباب ويضحك گلي گليلها لو تريد انتظرها العمر كله انتظرها
والله فوله شكله متحلفلج على طول البال الي عنده تدرين كلش مبين عليه يحبج والله انتبهله من يصفن عليج  ميشوف  اني من صارت شغلة ود شكيت بي بس بعدين من تذكرت شلون استقتل وصفناته عرفت هو ميسويها
رفل : اني هم والله من يطلع لشغله الى ان يرجع  اشتاقله بحيث من يفوت للبيت قلبي ملهوف لشوفته
ريا :الله يسعدكم ان شاء الله  ورا ما خلصت رفل.....  طلعت   افتحلها باب السياره لان بدلتها مكشوفه ولافه شال  رادت تصعد بسرعه
من صعدت اندار عليها علاء  عض شفته گلها ليش رفوله طالعه هلكد حلوه  اذيتيني والله..... بعد ما اشوفج منا لباجر العصر  نعومه طردتني متقبل اجي للبيت  شغلت السياره وطلعنا
رفل :علاوي يعني اليوم متجي للبيت
علاء:روح علاوي اذا تريديني اجي ....ابقي بهالوضعيه ورا متخلص الحنه اجيج لو ب ٥ الفجر خلي احصلي رزاله ماكو مشكله
ريا :ولكم ميصير حتى واحد يشتاق للثاني
علاء:اباوع لرفل بالمرايه وهي هم گتلها لريا اني كل دقيقه اشتاقلها /وصلتهم  دخلت السياره للكراج يله خليت رفل تنزل قبل متنزل گتلها فلفلتي انتظريني اجي اشوفج بليل  من تخلص الحفله  جاوبتني  راح انتظرك قلبي  ونزلت
رجعت لبيت عبد الله كل اخوتي ملتمين هناك  لان الحنه مال الزلم بيته المغرب تبدي
عيسى بالحجي گلي هسه الموده الولد يروح يحني البنيه
على نهاية الحفله مالتها قبل ميطلعون المعازيم
گتله منو يگول گلي والله اغلب جماعتي هيج يسوون  يروحون يحنون نسوانهم  يبقون ساعة نص ساعه ويرجعون
ضربت بدماغي
صار العصر لبست رتبت نفسي ولبست قاطي  واخوتي الله يحفظهم لمتهم حلوه ويايه
بدوا جماعتنا يوصلون من أ كتمل العدد والكل التهت ناس تسولف وبا ناس
رحت اتصلت على البيت
طلعتلي امي ورا ما دگيت يمكن ب ١٠ مرات
الو
امي :الو ها علاوي ماما
علاء:يوم شوكت تحنون مريتي
الام بعد فد ساعه ليش
علاء:انتظريني نعومه طلع لازم العريس يحني مرته
الام :علاوي ماما ماكو هيج حجي ميصير تجي
علاء:يوم بعد ساعه جاي قلبي اريدج اطگيلي هلهوله تثولين المعازيم
الام :ولك علاء انت دتشاقى مو وكتك دا اروح على العالم
علاء: وداعتج جاي عيسى راح يجيبني استقبليني استقبال حار حبيبه مو تفشليني
الام :اوف منك شلون راس گوي هاي منين طلعتلي بيها
علاء:يوم كلها طلعت هيج دسوي هالايام بس انت بعدج على موديل جدي .......بس مو تحجين كدام احد اريد اسويها مفاجئه لرفل
الام :يله براحتك حبيبي

بقيت عيوني على الساعه اتفقت ويا اخوتي اروح ويا عيسى لبيتنا احني مرتي وارجعلهم بقوا ناصبين عليه بيناتهم 
صارت بالتسعه الاعشره گتله عيسى يله
اترخصت من الخطار ورحت لبيتنا بقى هو بالسياره اني نزلت  دگيت الباب  فتحتلي نعومه الباب بهلهوله اشتغلت وراها الهلاهل دخلوني شفت رفل ابتسمت  متفاجئه رحت كعدت يمها
گلتلها  فلفلتي خليتيني كلشي ما افتهم من العالم الي جايين عليه عفتهم واجيت عليج
جاوبتني حبيبي الله يحفظك اللي انت هم طالع حلو بالقاط
صحت على امي گتلها جيبي هدية الزواج اريد البسها هسه  كدام العالم اني مسويتلها حفلة نيشان
گلتلي ماما مو لابسه الذهب مال نيشانها ميصير هاي هديه العرس تلبس ورا الدخله
گتلها يوم باجر اطلع اجيبلها غيرها جيبيها
راحت امي جابتها  لبستها ذهب  كدام الناس وبالاخص كدام اهلها حتى يطمئنون عليها يمي من يشوفوها فرحانه
وراها اجتي امي حنتني وحنتها شاورتها گتلها راح اروح هسه راجعلج ورا متخلص حفلتكم  بوستها من راسها وطلعت
رفل :من خلصت الحفله امي ورشا وريا طلعوا فايت وكت  ورا ما ساعدوا خاله ونسوان حمويني بتنظيف البيت
دخلت للغرفه ورا دقايق اجتني خاله گلتلي راح يدگ عليج علاء شيلي التلفون الي يمج ....ورا شويه دگ الو