رواية يا احلى نوبات جنوني الفصل التاسع 9 - بقلم مريم اماسي الليل

يا_احلى_نوبات_جنوني
اماسي_الليل

ج٩
حقوق نشر محفوضة

رفل:علاوي اتذكرت الاحد تكدر تمرلي توصلني للكليه لان عندي امتحان ومحاضراتي تبدي ب١٠ ما اريد اروح بالخط من ٧ ...اريد ابقى ادرس
علاء:لا حبيبتي ماعندي شي الصبح اوديج حتى اشوفج لان العصر راح التهي بمهند وود يجون اتفقوا ويايه ادرسها بيتنا
رفل :كلش انغثيت من هالموضوع هاي ود كلش لحت صار اكثر من مرتين يدرسها مخلصت الدروس باقيه مستمره .....بقيت ما اكدر احجي .......لازم انبهه بطريقه لان ود اني ما ارتاحلها
من قبل جانت يوميه حابه واحد .......المفروض تدري بي خطب وعاقد تبطل ملجه
علاء:وين صفنتي حبيبتي
رفل:لا هيج صفنت بالامتحان .......ورا شويه ترخصوا الولد راحوا ينامون والبنات ناس بقت ويا جهالها يسولفن بيناتهن والي راحت لغرفتها ......بعدها عمي فات لغرفته بقت خالتي
علاءمن بقى الرجال الوحيد بالهول گال لخاله يوم وين ألبوم الصور دلته
گلي گومي ويايه كدامهم خجلت خاله گلتلي روحي حبيبتي اني هم اروح اتمدد
اول ما دخلنا للغرفه گتله لا علاء والله خجلت صحتني كدامهم
جاوبني مبتسم احمدي ربج من ورا رجلي ما اكدر اشيلج كدامهم وادخلج للغرفه
من حجى هيج انقهرت رحت گعدت على فراشه جاوبته حبيبي لان بعدني ما متعلمه عليهم استحي منهم
تعال تمدد لتبقى واگف اجى گعد مدد جسمه رفع رجله بصعوبه خلاها على الفراش
هنا حسيت بمعاناته
گتله علاوي اذا احجي وياك بموضوع متتحسس مني
گلي يا موضوع گتله اريد اعرف الصعوبات الي تواجهك بسبب رجلك
جاوبني لا منج مااتحسس اسألي
سألته من تبدل من تفوت تسبح يعني كل الامور اريد اعرف حتى اتعلم واعرف من نتزوج اساعدك
جاوبني :من اسبح اگعد على كرسي ومن ابدل بس البنطرون شويه اتأخر بي اني حالتي تقريبا اخف شي بهذا المرض الحد المتوسطه مجانت عندي صعوبه لان امي تساعدني بس بعدين بديت استحي منها اعتمدت على نفسي واذا احتاج شي اخوتي موجودين
ومعتمد على العكازات بالمشي ومرات اذا شغله تحتاج وقت طويل واعرف راح اتعب استعين بالكرسي طبعا هاي من چنت اشتغل بالورشه
من تركتها لليوم ما استخدمت كرسي
ومن نتزوج راح تعرفين امور اكثر
رفل:علاوي الله عليك مضوجتك لان سألتك
علاء:لا حبيبتي ما اضوج اني وياج واحد بالعكس ريحتيني لان متفهمه حالتي وسألتيني لان اعرف تريدين تفتهمين كلشي يخصني
تعالي اكعدي يمي .......من اجتي حضنتني گلتلي والله انت عندي تسوى الدنيا ومابيها
جاوبتها يمكن لان اني صبرت وما جنت متذمر من قدر رب العالمين الله عوضني بيج
بهذا اليوم أنشال كل حاجز بيني وبين رفل من كل الجوانب صارت اقرب شخص الي...... اكدر احجيلها معاناتي بأمور بدون خجل ....لأمي ما اكدر احجيها
ومن اجوي عليها ريا ومهند من دتطلع كدام الكل استندت عليها حضنتها وبوستها من راسها ولو بيدي ادخلها بقلبي
مرت الايام واني يوميه اشوفها واروحلها للبيت وعمي بعده من اروح يمهم يبقى مرابط بالهول ميدري بيه كل فتره اخليها تبات يم ريا حتى اروح اخذها لبيتنا
هي اتعلمت على اهلي وعلى بيتنا من تجي تاخذ راحتها وتشاقى هي وامي كلش متراهمات امي حسيتها فضلتها على الكل ومهتمه بيها ازيد وهالشي خلاني انبه امي عليه لان خفت نسوان اخوتي يضوجون ويكرهون مرتي من البدايه
ما اريد اخسر واحد من اهلي من ورا سوالف غيره ونسوان
ونبهت على رفل تصير زينه ويا الكل وتتقرب للبنات وتعاملهم مثل خواتها
طبعا هي مثل النسمه بس اذا صارت عصبيه مخبله
بيوم الي ادرس ود انتبهتلها تكون عصبيه اني هم ماعاجبني الوضع
بس استحي من مهند واحساس رفل جان بمحله من تعصب
لان حسيت بنظرات ود مو عاديه
وكم مره تلزم ايدي من باب الميانه لحد هالايام جان الموضوع بسيط
مره من المرات جنت رايح لبيت مهند وتدري بيه رفل وحسيت صوتها ثكيل زعلت مني گلتلي شنو انت مدرس خصوصي مخلصت هالدروس گتلها اليوم اطلعلي حجه كدام مهند بعد ما اكدر ادرس ود
من رحتلهم دخلت للصاله ورا دقايق اجتي مرت مهند سلمت وطلعت دخلت ود اني ما انتبهت عليها شلابسه بالي مو يم هالسوالف بس من گعدت بصفي شفت جاگتها واصله فوگ رجلها وهي اظاهر انتبهت عليه باوعت ......اتجرأت لزمت خدي
ارتبكت.....گلتلي من عمري ١٣واني احبك وانت لليوم محسيت بيه
وخرت ايدها جاوبتها اني عاقد بحكم المزوج واحب مرتي
وانت مثل اختي انت موصغيره
كلتلي موغلط الشرع محلل ٤
جاوبتها واني ما اريد بس وحده و
من اليوم اني ما اكدر ادرسج صار عندي مشاغل
....گمت من مكاني وطلعت حتى ما انتظرت مهند اسلم عليه
گلت بعدين اطلعله حجه بسببها ما بقيت وطلعت مستعجل
رحت لبيت رفل لگيتها بعدها زعلانه
من گعدت بصفي سألتها شبيج جاوبتني لا مابيه بس تعبانه
گتلها لا مو تعبانه انت كل ميكون عندي موعد ادرس ود تصيرين عصبيه وتضوجين بس اليوم انطيتهم خبر بعد ما اكدر ادرسها صار عندي التزام ........لخاطرج حتى بعد متضوجين
رفل:علاء اني هاي البنيه ما ارتاحلها من جانت ويايه بالمدرسه مو راكزه
علاء:حبيبتي ما النا شغله بأعراض العالم اني لخاطر مهند لان طلب مني وهاهيه اليوم انطيتها خبر بعد ماعندي مجال
وراكم ساعه رجعت للبيت
اول مدخلت للكراج اتلگتني امي وين صرت ضل بالي حبيبي خو ما
شفت مهند وتعرضلك
گتلها شبي مهند شكو
گلتلي مو اجى يهد وابوك طلعله .....گايله مو عيب هاي تالي العشره والصداقه
يتحارش بأختي ويگلها اذا تقبلين بيه اخذج مره فوگ رفل
يمه فهمني شنو الصاير
يمه هي الي تحارشت بيه ومن گتلها هذا غلط گلتلي لا الشرع محلل اربعه ......جاوبتها بس اني اريد وحده
وگتلها بعد ما ادرسج وطلعت كلت بعدين ابلغ مهند بحجه ما اكدر ادرس اخته ما اجى بالي هالحقيره راح تتهمني
هسه رايحله
الام :لزمته ماما وين رايح خلي يولون
علاء:لا ليش دا اسكتلها لهاي الحقيره خلي افضحها كدام اخوها وأهلها
گلتلي دفوت يمه يم ابوك خابر اخوتك اجوي
دخلت للهول لگيت اخوتي خمستهم موجودين گتلهم شنو القصه
يابه مخابرهم كلهم هسه اروح اني افهم الولد
عبدالله شنو الي صاير فهمنا
الي صار هي اتحارشت بيه ولان صديتها اتهمتني
احمد وشهاب امشي دنروح نطيح حظها وحظ الخلفوها
گتلهم اني رايح وحدي محد يجي عبد الله گلي مو بكيفك اني وشهاب
نجي
وصدك طلعنا لبيت مهند من شافني راد يهد عليه لزموه اخوتي
بعياط گلوله افتهم اختك كذابه
رادوا يضربوا گتلهم لخد يضربه خلي افهمه اني مجاي اتعارك ويا
مهند انت كم سنه احنه اصدقاء شفتني بيوم باوعت لوحده لو تحارشت بوحده شلون اتصدگ اتحارش بأختك
من جاوب مهند اخوتي رادوا يضربوا گتلهم عوفونا وگفوا على صفحه جاوبني
مهند :مو سگط مجنت تباوع هسه من شفت وحده قبلت بيك عبالك ياهي الي تتحارش بيها راح تقبل بيك
علاء :رحم الله والديك ماعندي حجي بعد غير اگلك اختك لفقت عليه تهمه وهي الي تحارشت بيه ورادتني اخذها فوك مرتي ومن صديتها ذبتلي هالتهمه
من سمع هالحجي ضربني وگعت بالگاع
شهاب فقد دمى الولد عطت عليه گتله عوفه وگفني عبد الله
وراح يفاككهم
مهند يتهدد يا ساقط الا افضحك
حتى لنمير واهل مرتك هم رحتلهم وگتلهم على سوايتك
جاوبته انت عار ما فضحتني فضحت اختك الي ما عرفتوا تربوها يطبك مرض المن تريد تحجي احجي الناس تعرفني اني شنو واختك شنو

وراها رجعنا للبيت اتصلت على نمير مجاوب
بدلت ملابسي وطلعت لبيت رفل دكيت الباب طلعتلي ريا
شويه وجها ثگيل سلمت ودخلت للهول كلهم ملتمين والوجوه مگلوبه بس نمير طبيعي
ورفل مقهوره
سلمت عمي جان عصبي اول ما كعدت گلي ابني كل واحد يروح لحال سبيله
وطلع من الهول
اني حسيت بالاهانه وجنت متضايق وبعدها مواجهتي ويا مهند مأثره عليه ومعصبتني گتلهم يعني اي واحد يذب تهمه عليه أتصدگوا
انداريت على رفل سألتها انت مصدكه اني اسويها
جاوبتني لا
گتلهم اني اترخص وطلاك ما اطلك ومرتي هاليومين امر اخذها
بعصبيه انداريت على رفل گتلها حضري امورج وانتظري مني تلفون امر اخذج
رفل :ود الحقيره اتصلت على اهلي وحاجيه ويا ابويه گايلتله وهي تتبچبج عمو اريد احذركم لتنخدعون بعلاء اليوم اتحارش بيه وگلي الشرع محلل ٤واذا تقبلين اخذج على رفل وسوا شغله ما اكدر اگلك عليها عيب طردته وطلع بسرعه خاف لا احجي لمهند
وراها بنص ساعه اجى مهند عصبي ويعيط وبقى يگله لابويه طلعة لنسيبك الساقط وبقى يسب على علاء والجوارين سمعوا ابويه ضاج گله امشي ماموجود يمنا سدينا الباب ودخلنا وهذا بقى برا يعيط الى ان اجى نمير وريا شايفي برا مسكتي ورايح
من دخلنا عرفنا مهند متصل بنمير وهم گايله على علاء بس نمير گال علاء ميسويها
ابويه عصب گله اكو واحد يفضح اخته لو بنيه تفضح نفسها اذا مو صدك مسويلها شي ....ومهند جيته مال واحد مقهور مو سالفه هينه
گله لنمير خابر على علاء وگله يطلك رفل ترى ارفع عليه دعوه
تالي العمر يوگفون بابي يهدون عليه من ورا استهتاره
فوگاها يريد يتزوج على بنتي وهي بعدها بيتي من تروح يمه
شيسوي بيها
نمير وريا بقوا يهدون بأبويه اني گمت ابچي لان ممصدگه علاء يسوي هيج شي وگتلهم لاهلي
ابويه بقى يعيط عليه يگلي انت متفتهمين  وهذا الموضوع اني اقرره
مو انتِ .....من البدايه الله كشفه  نخصمها احسن ما تتورطين .....و ورا كم سنه تجيني تريدين تطلگين من تشوفي على حقيقته
اهلي بيهم عيب بالاخص امي شنو ابويه يگول ماكو نقاش
وابويه نحس اليوم لان مهند صيح وعيط والجيران شافوا
ابويه قفل على علاء لان يعتبره سبب الي صار
ومن اجى علاء ابويه گله طلك وطلع بدون ميتناقش وياه صارت شغلت اهانه  .......وعلاء صار عصبي واني بقيت بين اهلي وبين رجلي
الي سألني انت مصدگه جاوبته لا .......وبداخلي ميته خوف
لا يستفزوا ويطلكني
وخايفه من ابويه لا يقفل على الطلاك وهسه خلوني بموقف من علاء گلي حضري امورج يريد ياخذني لبيتهم
ومتأكده ابويه راح يتخبل من يسمع
طلع علاء گتله لنمير فدوه اطلع وراه طلع نمير واني طلعت وراهم
لگيته هو ونمير واگفين بالباب  من شافني
اندار عليه گلي رفل اختاري بيني وبين اهلج وبالحالتين اني ما اطلك بس اذا اختاريتي اهلج تبقين طول العمر عدهم وتحرمين عليه
بقيت ابچي گتله علاء ليش دتصعبها الله يخليك  اهدأ  اني ما الي ذنب
بلي بينك وبين اهلي ليش تحاسبني الي وتخيرني هم اهلي وانت رجلي والله صعبه اختار واحد منكم
گلي گتلج الي عندي عگب باجر العصر اخابرج حتى امرلج اذا
مقبلتي ينتهي الي بيناتنا وما اطلك .......وخلي يرفع دعوه عود 

بعدها راح علاء دخلنا للبيت واني عيوني مورمه من البچي
گتلها لامي راح تخربون حياتي من ورا وحده ساقطه
ريا ورشا انقهروا عليه گلولي انت متأكده من علاء ميسويها
گتلهم متأكده لان اعرفها من ايام المدرسه مو راكزه  واصلا اليوم
اني گتله بعد اعتذر گلها ماعندي مجال ادرسج .......ومن اجاني گلي لخاطرج بعد ما ادرسها ........وهسه خيرني لو اروح ويا عكب باجر لو اذا ما قبلت وبقيت يمكم ميريدني بعد ....... وميطلك بالحالتين حتى ترتاحون لا اني المتزوجه ولا اني المطلقه 
امي :هو شنو بكيفه ابوج يرفع عليه قضيه ويطلگج
رفل :ومن گلكم اني اريد اطلك اني احبه الرجلي واني اتحمل مسؤوليه اذا طلع مو زين ما اشتكي ولا احملكم همي
بهالاثناءسامعني  ابويه دخل گلي خلص  أتحبي روحي وياه بس اتحملي عواقب اختيارج
گتله بابا الله يخليك .........جاوبني ولا كلمه حتى متگولين بعدين هدمتوا حياتي ومخليتوني اختار ....   اختاريتي روحي وياه
ابويه عصب لدرجه خفت افتح حلگي بكلمه
والكل سكت  لان خفنا عليه وبنفس الوقت من شافوا علاء قافل واني ما اريد اطلك
بعدين رشا وريا من شافوني ابچي ما اعرف شسوي  باقيه بين ابويه ورجلي صاحوا امي گلولها احجي ويا ابويه  خلوها تروح ويا رجلها ......ومتخلي يتقرب عليها  الا يسويلها عرس
ماكو غير حل
علاء :من الاعصاب حتى قلبي ما رف لرفل من شفتها تبچي وتتوسل بيه  ومنير حاول يهديني بس جنت فاقد من وصلت للبيت
لگيتهم باقي بالهم عليه
شافوني ضايج  سألوني شبيك سولفتلهم الي صار عبد الله  مقبل عليه گلي شلون تجيب البنيه بدون زفه هي خطيه شنو ذنبها انت وابوها ناس معانده ناس وهي واگعه بيها
امي هم مقبلت كلتلي خطيه ماما  عاد نسويلها عرس وناخذها
مو حلوه بحقك كدام اهلها
گتلهم عكب باجر جايبها لمرتي ولحد يدخل
معترضين باجر اروح أأثث بيتي واطلع منكم
ابويه گلي ابني انت تبقى هذا طبعك من تصير عصبي فاير ومتتفاهم
اسمع حجاية اخوك وامك منو جاب سيره منريد مرتك تجي
احنه علمودها خطيه تتبهذل بينك وبين اهلها
هي بنيه صعبه بحقها تعوف اهلها يعني اكو واحد يسوي سوايتك ويحلف عليها ويگلها اذا متجين ويايه تحرمين عليه
ثاريك مخبل مو عاقل
جاوبته وهذا الي راح يصير اذا ما سوت الي ردته منها
امي اشرتلهم يسكتون لان تعرف طبعي من عصبي ما اضبط اعصابي ويجوز اسوي شي بساعة عصبيه ما احس بنفسي واندم عليه بعدين من تصير شغلة كرامه
دخلت لغرفتي كاره الدنيا لو ينطوني ود اجرم بيها
بقت روحي لايبه يوميه هيج وكت احجي ويا رفل بالتلفون واليوم
طلعتلي هالساقطه خربت عليه الوضع
وقلبي خايف لا ابوها لرفل يزن براسها ويغيروها عليه ولهذا السبب خوفتها اذا ما اجتي ويايه اعوفها
بس اني صدك غبي شلون طلع مني هالحلفان بله مكدرت تجي
يعني شنو تتحرم عليه
رفل : ثاني يوم ورا المشكله مكدرت اداوم بديت احضر غراضي ملابسي وملازمي خليتهم بجنطه
وكل شويه تنزل دموعي انتقهرت راح اعوف اهلي وانقهرت من علاء لان خلاني بهذا الموقف ويا اهلي وحتى من شافني ابچي واتوسل بي ما حن ولا حتى اتصل
للعصر خلصت كل اموري طبعا ابويه زعلان حتى على السفره ميكعد ويانا حاولت اروح احجي وياه امي گلتلي عوفي هسه منريد المشكله تكبر
رشا بقت تفهمني ما انطي مجال لعلاء الا ورا منسوي عرس
وشغله الثانيه ما اخلي المشاكل تأثر على دوامي ودراستي لان حرامات مابقى شي واتخرج
لليل اجتي ريا ونمير
نمير گلي ترى مردت حاليا ادخل لان صاحبي واعرفه من يقفل
بس شويه يهدأ اني اطيحلج حظه
جاوبته نمير اريدك تساعدني بموضوع نسوي عرس حتى نخلص من المشاكل انت تعرف ابويه من يقفل هم مو هين .....اني راح ابقى بدوامه بين ابويه وعلاء
لازم ارضي الطرفين باجر راح اروح ويا علاء بس لازم يسويلي عرس حتى ابويه يرضى ويلين شويه
نمير :لتشيلين هم واذا تريديني اني امر اخذج ما اخلي علاء يجي عليج حتى متصير مشكله
جاوبته والله ما اعرف اني صرت من كلشي اخاف
نمير :اني اخابره لعلاء وارتب وياه وارجعلج خبر لتضوجين
من راحوا ريا ونمير
وبقيت وحدي ويا بنان رشا نامت بقت دموعي تنزل مقهوره راح اعوف اهلي وبيتي وهرهوره (بنان)هاي شلون راح افارگها

ثاني يوم الصبح
رحت للكليه عندي امتحان وكلشي مقاريه من ورا المشكله ورقت الملزمه الصبح بالخط دخلت على گد امتحنت وطلعت حتى ما دخلت محاضرات
رجعت للبيت اتصلت على نمير سألته شنو رتبت ويا علاء گلي العصر امر اخذج لبيتنا وعلاء يجي عليج ياخذج من يمنا
رفل:وليش هالفره انت وديني
نمير :لا ميقبل يگول اريد ادخلها لبيتنا واني وياها مو هي تجي وحدها
رفل:خلص انتظرك ولو راح اتعبك بس تدري ماعندي احد غيرك اكدر اعتمد عليه
نمير :رفوله انت اختي وتدرين شكد عزيزه عليه اذا ضوجج علاء لو داسلج على طرف انطيني خبر اطيح حظه
رفل :ادري والله وانت هم اخويه يله اخذ راحتك سلملي على ريا
نمير الله يسلمج
علاء:ثاني يوم من المشكله كعدت الصبح ردت اروح لرفل للكليه بس اتوقعت مراح اداوم بطلت گلت ماكو داعي رايحلها خليني اتحمل لباجر اروح اجيبها
وراها طلعت لشغلي مجان الي واهس ودماغي مو ويا الشغل
رجعت للبيت من التمينا على الغدا
عيسى گلي ترى ياسر اليوم ما اجى للشغل يمكن من ورا مشكلة البارحه
جاوبته براحته
بعدها دخلت لغرفتي كل شويه اريد ارفع السماعه اتصل على رقل وابطل
والله قلبي مثل النار عليها اريد اعرف شصار ورا ما طلعت منهم البارحه
والموضوع شلون وصللهم ومهند من رايحلهم شمسوي الي مخلي عمي هيج گالب عليه وكارهني
للعصر اتصلت على نمير فهمني الي صار كله وبقى يرزلني علمود رفل
گلي خطيه خليتها بهذا الموقف الصعب جاوبته ماعندي غير حل
گلي على العموم احنه ورا المغرب رايحيلهم. واشوف شنو صاير
وعوداخابرك من ارجع
جاوبته نمير لو ترجع لفجر تلگاني صاحي اتصل طمني
گلي من انت هيج بالك يم مرتك شكو حلفت عليها يا غبي
جاوبته طلعت مني ما ادري شلون بساعة عصبيه .....لك نمير
انت اخويه مو تحجي لاحد ......اني فقدت من حسيت عمي راح يخرب رفل عليه لك والله ما اكدر اعيش بلياها انت تعرف اني استقتلت عليها گلت لو هي تصير مرتي لو ما اتزوج ومن صارت طلعتلي هالساقطه
تريد تخرب حياتي .......نمير انت شكد عاشرتني تتوقع تطلع مني العيبه والله دايخ شلون راح اكدر افضح هالكذابه ....انت عبالك اني هينه عليه اشوف اشخاص قريبين عليه مصدگين بهالتلفيق مثل مهند لو عمي
بس الي صبرني انت ورفل صدگتوني
نمير:خلي تولي لتخلي بالك يمها لتروح تتهمك بالاكبر هيج وحده تخوف الزمن يفضح كلشي لتخاف المهم مرتك تعرفك انت شنو خلص لتهتم يله ارجعلك خبر بالليل
علاء:ماشي انتظرك الله وياك
طبعا اخوتي الكبار راحوا لبيوتهم
امي دخلتلي للغرفه تحجي ويايه گلتلي راح ارتب الامور حتى كم يوم ونسوي العرس انت بس شوفلك قاعه ورتب باقي الامور وكعد ويا مرتك من تجي شوفها تريد تكعد هنا ويانا لو تطلعون لبيتكم حتى تلحگون تأثثوا
جاوبتها يوم خلي تجي بالاول ما الي خلك بكلشي افكر عود بعدين من راسي يصفى اشوف شلون ارتب الامور
جاوبتني براحتك
لليل :خابرني نمير گلي هو يجيبها لرفل حتى متصير مشكله اخاف عمي يطلع يرزلك من يشوفك بالباب وتكبر المشكله
جاوبته لا ميصير انت اتجيبها ما اريدها تنكسر كدام اهلي (اخوتي ونسوانهم )من تدخل للبيت تبين اهلها دازيها
اني اجيبها حتى الكل يعرف اني «جبرتها تجي .....بعناد ابوها
نمير:لعد اجيبها لبيتنا وانت تعال اخذها من يمنا
علاء:ماشي بس شوكت اتفقت وياها
نمير: العصر بس علاء دير بالك عليها لطلع قهرك من عمي بيها ترى خطيه تعبانه وحتى عيونها منفوخه مبينه من البچي والقلق
ترى والله اني اطيح حظك كافي جبرتها تجي وياك بدون عرس وزفه
علاء:لا ان شاء الله ارتب الوضع هالايام لتخاف يله انتظر منك تلفون من تجيبها يمكم

رفل:العصر اجى نمير اخذ جنطتي وغراضي وداهن للسياره
ودخل لابويه حتى يخليني افوت اسلم عليه لان زعلان
نمير باقي يحجي ويا امي وابويه ويشرحلهم موقفي
الى ان صاحني تعالي .......رحت عليه گلي هسه فوتي سلمي على عمي حتى نطلع
فتت سلمت على ابويه بس بقى زعلان ومنطاني وجهه گلي شوكت متريدين تجين تشوفينا هلا بيج بس رجلج ما اله دخله على هذا البيت
ومن تعرفي على حقيقته مراح اكلج لتجين وتحملي مسؤولية اختيارج
لا تجين وانت معززه مكرمه اياج تتحملين منه مذله او اهانه ماطول اني موجود بهالدنيا انت أمني وراج سند
نزلت ادموعي وبوسته من ايده وطلعت
طلعت امي ورشا وياسر ورايه سلمت عليه وراها طلعنا لبيت ريا
بقيت الطريق كله ما اكدر اسكت حتى حقدت على علاء
من وصلت ريا شافتني تعبانه گلتلي شبيج بابا راح يصير بيج شي من البچي فكري بنفسج عوفي اهلي ورجلج خليهم ناس كارهه ناس هم بعدين يتصافون وعنهم متصافوا
المهم هو يداريج وحياتكم تستقر
بقت اتهديني بقيت تقريبا نص ساعه ارتاحيت شويه وغسلت وجهي
الى ان دخل علاء جنت كلش ماخذه منه موقف حتى من دخل سلم رديتله السلام من بعيد
هو انتبه عليه بقى شويه كاعد لان ريا رادت تحجي وياه
گلتله ترى الي صار كله غلط ورفل الي تحملت غلطك انت وابويه
وما المفروض انت تعاقبها على شي هي ما الها ذنب بي
هي مجبوره عليكم اثنينكم هو ابوها وانت رجلها المفروض تقدر وگفتها وياك
ولو مو باقيه عليك وتحبك متطلع من اهلي الا بزفه مو بهالطريقه
هاي انت تحبها وهالشكل سويت لعد لو ماخذها غصب شلون
علاء:ريا ادري بيج ضايجه هسه بس اختج بعيوني والله
وبدون متگولين اصلا امي رتبت گلشي حتى نسوي عرس هالايام
وهاي اختج يمج شوكت متريد تروح لاهلج اوصلها وانت ميحتاج اعزمج من تريدين تشوفيها بيتنا بيتكم
وحتى كعدتنا ويا اهلي شغله مؤقته بين ما اكمل تأثيث ننتقل لبيتنا
ريا :اي زين ريحتني يعني مرتب كل الامور
رفوله خابريني حبيبتي من تحتاجين شي جاوبتني ان شاء الله
علاء:ها رفوله نروح ......جاوبتني براحتك بس كذابه بداخلها كارهتني وماخذه مني موقف حتى متباوع بوجهي بقت تلهي نفسها عني
من ركبنا بالسياره شفتها بصفي نسيت الدنيا كلها .......ارتاحت نفسيتي وأمنت بعد ما كو شي يفرقنا واذا على زعلها اعرف شلون ارضيها

بقت طول الطريق ساكته ووجها على الشباك اني هم عفتها براحتها
من وصلنا للبيت من دتنزل اندارت عليه گلتلي افتحلي الصندوگ دا انزل الجنطه ........اني ضجت لان تدري ما اكدر انزلها وهي أتبرعت أتنزلها ........جاوبتها لا هسه واحد من الولد ينزلها