رواية ياقدري واحلى قدر الفصل الحادي عشر 11 - بقلم Shody ✨✨

لحظتهة مااعرف شحسيت ،، مااعرف اوصف شعوري فرح ،، دهشة ،، استغفال ،، شنو الموضوع ،، يعني وين ميروح يگول خطيبهة واني كاعدة بدون حتى مياخذ رأييّ سكتت ومحچيت وكلهة جتي باركتلي واني صافنة مااعرف شجاوب احس خدودي صارت نار
انتظرت الحفلة تخلص حتى اعرف شديصير وافتهم منة
بدت العالم تروح شوية شوية ،، معتز فجر قنبلتة واختفى بعد مشفتة ،، مرة عمي حسيتهة متفاجئت بالموضوع ،، ياربي شديصير
ظليت الوب لحد مراح الكل تقريبا،، بقيت الملم واعزل ورحت نيمت ملاك لان جانت تبچي بفراشهة
- اوف ياملوكة مااعرف ابوچ شناوي علية ،، مااضم عليج ياملاك هاي چانت امنيتي ،، بس مدااعرف ديحجي صدك لو عندة شي براسة
هسة غير يحجي ويفهمني
طلعت من غرفتة ورحت للمطبخ لگيته نازع سترتة وديغسل ايدة شافني گال
- لولو سويلي اكل كل شي مماكل
بقيت فاتحة حلگي يعني ماكو هيج برود ولاچنة مسوي شي استغفرت ربي وقبل لا اخطو خطوة گال
- صعدي بدلي ملابسج ونزلي مكافي عرض عاد !!
- تدلل ابو ملاك
صعدت واني مو اتنفس لا اني دااحترگ
رحت لبست ثوب طويل زيتوني مثل القفطان
نزلت طلعتلة لفات وحطيتهم بالمايكرو وطلعت عصير
دخلو الولد وكلهم گعدو ياكلون اجة معتز وكف يمي گال
- شبيج تريدين تنفجرين
- يعني انت شتشوف ليش ؟؟ اني النار تاكل بية وانت ابرد ماعليك
ترى مو حالة هاي خالني موضع المغفلة وانت تمشي وتصيح خطيبتي ،، زين وينك خطبتني ،، طلبت رأيي كدام الكلية ومشيناهة بس توصل للگرايب ترى كلش صعبة ،، صعبة يامعتز بس گلي شدسوي
- روحي لبسي شي فوك ملابسج ،، واني انتظرج بالسيارة
طبعا هو من يحجي يأمر واني لازم انفذ بدون نقاش
رحت لبست جاكيت صيفي خفيف وطويل فوگ ملابسي ونزلت
لكيتة بالسيارة وديلعب بفونة ،، صعدت حرك السيارة
- اتفضلي ست غردي
- حجيت العندي ،، انت احجي
- انتي شنو الي مضوجج انو حجيت كدام العالم لو لان حجيت بدون مااخذ رأيج
- الي مضوجني اكثر ليش دتگول هيج ؟؟ شنو اسبابك ،، بديتهة بعصبية حتى تخلصني من اثير وبعدين حولتهة للعبة وية جماعتي بالكلية وجاريتك بالتمثيل ،، بس الگرايب ليش ؟؟
- منو گال لعبة ؟؟ اني مو صغير حتى العب او امثل
- لعد شنو ؟؟ يعني تحجي وتسولف بدون حتى متنطيني علم
- ايلاف انتي خطيبتي منا ورايح ،، صار عندج علم ،، انحلت المشكلة هسة
- لا بلله
- لعد شتريدين ،، اجيب ورد احمر ونفاخات واگعد على ركبي
- اگلك انت دتحسسني انو اني عمري ٥٠ سنة وباقية عد اهلي وانت دتسوي فضل علية
- ايلاف اني رجال مااعرف اجامل ولا اعرف اعبر ،، يابنت الناس اني اريد اسافر شغلي ووضعي كلة مخربط ،، بنتي تحبج وتعلقت بيج وانتي احرص عليهة من الغريبة وانت بنت عمي وعرضي وربيتي ابين اهلي ،، ومن خلال كلامج عرفت ماعندج احد ابالج ولا خالة هذا الشي ابالج
وبالنسبة لدراستج اني اسويلج انتساب واجيبج وقت الامتحانات تمتحنين بعد شنو عندج اشكال حتى نفضهة كلهة اليوم
- انت كل هذا فكرت بي ،، بس اهم فقرة انت نسيتهة ؟؟
- شنية بلله ؟
- رأيي
ظل ساكت تقريبا عشر دقايق بس حسيتهة عشر ساعات ووگف السيارة بمكان وظل يباع ليگدام واصابيعة ادگ على المقود مال السيارة بتوتر
- ليش انتي عندج اعتراض ؟؟؟
- مو شغلة اعتراض بس ،، اتوقع شغلة احترام
احنة راح نكون شريكين بالحياة لازم واحد ياخذ رأي اللاخ ميصير واحد يقرر عن الثاني
- بس اكو قرارات لازم الرجال ياخذ موقف بيهة
- مو القرارات المصيرية
- باعي ايلاف بلا فلسفة ولاحجي زايد اني باقيلي اسبوعين ولازم اسافر بعد يمج الموضوع
رجعنة للبيت واحنة ساكتين وصلنة واني نزلت وگبل لغرفتي محجيت وية احد
بقيت كاعدة على فراشي وصافنة المفروض وحدة غيري هسة اسعد الناس ،، الانسان الي حبيتة وسهرت ليالي وليالي على مودة حيصير من نصيبي ،، بس ليش احس اكو غصة مانعة فرحتي!!
يعني طول الوكت ملاك ولخاطر ملاك
زين واني !!وانت !! ومشاعرنة !!
مشاعرك وين ياابو ملاك دفنتهة وية المرحومة ،، هلگد چنت تحبهة ؟؟
يمكن طلع الفجر واني مغمضتلي عين ،، اتگلب منا ومنا لحد محسيت جسمي كلة يوجعني وبدت حرارتي ترتفع ،، بقيت ارجف ومااعرف شسوي واتذكرت اني مماكلة شي من الصبح ،، مااعرف شگد مر من الوكت واني على هالحالة ،، غفيت مدري غبت عن الوعي ،، حسيت احد يگعدني
- ايلاف ،، الوفة
هذا صوت سمر ،، اريد افتح عيني مااكدر ولابية اجاوبهة ،،
- عزة ايلاف شبيج ،، ولج انتي نار راحت ركض سوتلي كمادات وظلت كل سا تغسلي وحرارتي ابد منزلت
فتحت عيوني حسيت نفسي بغير مكان وبديت استعيد وعيي
- وين اني
- ها حبيبتي الوفة شلون صرتي
- عطشانة
رفعتني ايدين قوية رفعت راسي شفت معتز لازمني وانطوني مي شربت
طلع معتز جاي شايلني وخالني بغرفتة
وظالين يسولي كمادات وسمر ضاربتني ابرة يلله شوية فكت صخونتي ،، بقيت يومين على هالحال وبعدهة شوية تحسنت وكمت رجعت لغرفتي ،، ملاذي الامن الي مااكدر استجمع افكاري الة بيهة
فد يوم احنة كاعدين عالغدة حجة معتز
- حجي من رخصتك ،، اريد تحدد موعد حتى نعقد اني وايلاف ،، انت تدري مبقالي وقت
- معتز شنو هو لعب جهال ،، البنية بعدهة مريضة ،، زين انت اخذت رإيهة ،، شاورت عمامك ،،
بنتي انتي شنو رأيج بالموضوع ،، قابلة لو لا
مو باچر تكولين جبروني ؟؟ انطيني جواب
- بابا الي تشوفة انت الرأي رأيك
- لا بابا هاي قسمتج ولازم تنطين رأيج
ظليت ساكتة ،، حجة حسن
- حجي السكوت علامة الرضا ،، على بركة الله نقرة الفاتحة
- معتز اني بنتي ماانطيهة الة تجيب عمامك وتجي تخطبوهة مني ؟؟ حالهة من حال اختك ونتفق بگعدة الزلم وراهة الي تشوفو مناسب سوو
- ميكون خاطرك الة طيب تدلل حجينة
اتفقو على يوم واجو عمامي وخوالي وسوو كعدة والس افتهمتة من الولد اني عمي طالب مقدم ومؤخر وگايلة متطلع من بيتي الة عروس تسويلهة عرس حالهة من حال اختهة
ومعتز مقابل گايلة اني بحال زفة هسة
ومتلاغين وعمي گايلة انت ماخذ بنية وكل بنية تحلم بيوم عرسهة مو ذنبهة انو انت ارمل
تالي متفقين على كل شي ومعتز جاب السيد وبدة يعقدلنة واني ورة الباب
لبسوني سيت ابيض وشال ابيض
وحطو القرآن بحضني
ورجلية جانت بنجانة مي بيهة ياس وورد
وبدة السيد يردد العبارات ومعتز يردد ورا
وصل الدور الي
گلبي يدگ
ايدي ترجف
لحظات متنسي ،، خوف ،، رهبة ،، بكل شي حسيت الة بالسعادة ،، گانما جنت الة ودااتحرك بس بدون شعور
بدة السيد يحجي واني انصتلة وصل لجملة
وگال رددي وراية بقيت ساكتة وكل الانظار علية ومراقبتني
هدوء والكل مترقب الاجابة
..................

برأيكم شنو حتكون اجابتهة ؟؟
ولو انتو بمكانهة شتسوون ؟؟