رواية ياقدري واحلى قدر الفصل العاشر 10 - بقلم Shody ✨✨

بقيت صافنة معقولة هذا شجابة هنا ،،
جاوبو كلهم
- وعليكم السلام
وگفت بنية من البنات
- ولچ ايلاف شبيج فاكة حلگج هذا خطيبج اجة
- خطيبي !!!
- هو عرف نفسة يم الولد گال اني خطيب ايلاف ،، واني اگول ليش ترفضين كل من يتقدملچ ،، اثاري ضامتلچ خوش ضمة .
گمت وگفت واني ابالي الف حسبة هو ليش ديسوي هيج ،، چان يگدر بكل سهولة يگول
اخوهة الكبير ،، كلهم يعرفون انو اني يتيمة وعايشة عد بيت عمي
اباوع للبنات كلهم صافنات عليّ ،، حسيت بغيرة خلتني اعيش الدور ،، وامثل اني خطيبتة صدگ
- ها حبيبي شنو هالمفاجأة ،، اشو مگتلي حتجي
شفتة تفاجأ هو همين باوعلي وعيونة بيهة ضحكة مضمومة
- شفت نفسي قريب گلت اسويلچ مفاجئة
- احلى مفاجئة
اجتي مروة كالت
- ايلاف شنو القصة ؟؟
- والله يامروة مااعرف ،، بعدين نحجي خلي اشوف هاليوم شلون حيعدي .
طبعاً مخلاني اتنفس كل حركة اتحركهة يخزرني اخر شي طگت روحي ورحت كتلة خلي نروح للبيت
طلعنة وركبت بالسيارة والطريق كلة ساكتين
فجأة حجة هو
- ها خطيبتي شو ساكتة !
- بس اريد اعرف انت ليش گلت اني خطيبتك ،، ليش حجيت هيج !!يعني فهمني شنو السبب
يعني بس ار
- هوب هوب على كيفج ،، جنتي منتظرة اشارة مني حتى تهجمين
- يلله گول
- شگول !!
- لتشلع گلبي گول ليش
- بكيفي
- هاااا،، معتز شنو القصة ،، انت شنو قصتك وياية ياابن عمي ،، يعني گلت انك خطيبي گدام اثير ،، گلت حتى يبعدة عني
بس مال تجي كدام قسمي كلة تكول خطيبهة وتخليني مثل الاطرش بالزفة هاي واگفة ،، يعني مفكرت بصديقاتي المقربات شحيگولون علية مفكرت بكمية الاسئلة الي حتنهال علية
شوكت وليش ضامتة ومتحجين وليش ملابسة حلقة
زين هذا كلة اوكي ويولي ،، مفكرت باچر من حتسافر وتروح شحگوللهم شراح احچي
- مو شرط تحجين شي يخص حياتج ،، انتي ممجبورة توضحين للناس امورج الخاصة
- ومنو شوكت الخطوبة والزواج صارت شغلات خاصة ومينحجي بيهة
- ايلاف هسة شتريدين ؟؟
- شناوي علي ياابن عمي  ؟؟
- يجيچ الصافي انتي بس لتخبصين الدنيا وتأزمين الامور
وصلنة للبيت ورحت لغرفتي ذبيت نفسي بفراشي ونمت محسيت الة على اذان المغرب
كمت غسلت وصليت وبقيت ادعي انو رب العالمين يحقق مرادي
نزلت لغرفة سمر شفتهة مو على بعضهة اني مو من عادتي ادخل بأمورهم الخاصة محجيت شي
- ها سوسو شنسوي عشة
- امي سوتلنة عجينة مال بيتزا
- يلله هسة اروح اسويهة تجين لو مالج خلك
- ايلاف سدي الباب اريد احجي وياج
سديت الباب واجيت يمهة
گولي حبي
- ايلاف اني صار فترة صار بيني وبين معلم وياية بالمدرسة شي يشبه العلاقة
- يعني شلون يشبه العلاقة
- يعني صداقة ،، واحد يسئل على الثاني ويعدين اطور الموضوع الى مسجات اشتياق ومن هالسوالف
بس اليوم فاجئني وحجالي عن نفسة وگال انو هو چان متزوج وانفصل عن زوجتة وماعندة اطفال منهة وهسة هو يريد يتقدملي واني مااعرف شلون افاتح اهلي بالموضوع ،، اخاف يعرفون بي منفصل وميقبلون
- اكلج واذا منفصل وانتي مو تگولين ماعندة اطفال ، بس يبقى انتي متأكدة ميرجع زوجتة
- اي هو يكول صار سنتين من تعاوفنة واصلا بعد لا شفتهة ولاشافتني واي تواصل ماكو ،،
- بعد شكو !!
- يعني اذا انتي بمكاني توافقين
- اذا احبة !! طبعا اوافق
- يعني اذا معتز اجة خطبج تقبلين
وكف گلبي من جابت اسمة ،، مصخنة بردانة محترة مدااعرف شدااحس بالضبط
- هذا شجابة الموضوع هسة
- ها لا بس هيج ردت اسئل ؟؟
- گومي گومي خلي نسوي البيتزا ومابيهة شي احجي وية امي وخليهة تگول للولد
- احجي وياهة انتي ايلاف مااكدر استحي
- ماشي اني احجي وياهة
دنسوي بالعشة ودخل معتز چان لابس شورت جينز وتيشيرت وشايل جنطة سبورت
- ها رجعت تتمرن
- اي حسن صار فترة تارك واحس نفسي سمنان
اجة يمي كال
- شدسوين ؟؟
- بيتزا
- اريد وحدة خاصة الي ،، كثريلي بيهة الجبن ورشيلي عليهة زعتر
گلة حسن
- هسة تكول سمنان
- معليك انت مو دااتمرن احرگ الي اكلة
- والله ياالله ههههه
قرب نفسة مني وحچة على كيف
- هو كل واحد يلبس وردي يطلع هيج
رفعت راسي وباوعتلة كتلة شنو
- ديري بالج لتحرگيهة ،، وعافني وراح
ظليت صافنة معقولة الي سمعتة وارجع اكذب نفسي ،، وارجع اتذكر بزواجة هم سوى بيه هيج
المهم سويتلة مثل مراد وخليتهة بالفرن وصحة على مرة عمي
- ماما اريد احجي وياج
- كولي يوم
- سمر وياهة معلم بالمدرسة ،، ديريد يجيب اهلة ويجي يتقدملهة
- اي يوم وهي شنو رأيهة
- هي تريد تعرف رأيكم انتو ،، بس اكو شي
الولد متزوج ومنفصل قبل سنتين وگايللهة انو هي راحت لحال سبيلهة وبعد ميرجعلهة
- ماشي بنتي ،، احجي وية ابوچ ويصير خير
وراحت ايام وجتي ايام اني عطلت وكعدت بالبيت وسمر همين عطلت نكعد اني وياهة نرتب ونطبخ واستلم ملوكة ،، بحيث هي كلش تعلقت بيه وتعودت علية وبس تشوفني تظل تضحك ،، وبالنسبة لسمر اجوي النسوان وفاتحو اهلي بالموضوع واتفقو على كل شي وبعد يومين المشية مالتهة وعقد السيد
رحنة اختارينة ملابس للخطوبة ،، هي لبست فستان طويل فيروزي ومكياجهة وتسريحتهة جانت روعة
صعدت ابدل ملابسي واندكت الباب
- منو ؟؟
- اني فتحي
فتحت الباب
- ها معتز محتاجين شي ،، ترى كويت القاط مالتك انت وسلام وعلگتهم
هو ظل صافن يباع علية من فوك ليجوة
اني لبست فستان قصير اسود وذهبي وردنة شيفون وحطيت مكياج سموكي اسود وحمرة ترابية ورفعت نص شعري والباقي نزلتة وسرحتة ولبست كعب عالي اسود
- معتز ؟؟
- كل عقلج اخليج تنزلين هيج
- ليش ؟؟ شبية
- طبعاً گلبي علمني راح الگاج لاعبة لعب ،، لچ ايلاف تروحين تغيرين هذا لبسج بسرعة گبل مااسوي الحفلة اليوم عزة
- ماشي روح ماانزل
- ها يعني تلوين ذراعي ؟
- لا الوي ذراعك ولا شي ،، ماانزل والله يعني صار ساعتين ارتب روحي وهسة من اجوي العالم تگلي بدلي والله ماانزل ها اها ورحت دااجيب الكلينس داامسح المكياج
ظل صافن گال
- زين لبسي شي فوگا
- شلبس روب مثلاً
- لج لتجاوبيني لا بالقرأن اموتج هسة
ظليت ساكتة ورحت گعدت على السرير
- روح معتز والله ماانزل ،، حلفت بعد گوللهم تخربطت ونامت
- ايلاف انتي ليش هيج
- شنو
- ماكو شي يلله نزلي بس يكون بعلمج هاي اخر مرة ومن يطلع العريس يلله تفوتين للصالة واذا شفت رجلج تعدت باب الحديقة اكسرهة
ظليت ساكتة مااجاوب
- ويامن احجي ؟؟
- صار ،، تأمر امر ،، بعد اكو اوامر
- نزلي يابلوة عساج باالي بية
- وشنو الي بيك
عافني ونزل ورة شوية نزلت اني هم رتبت الكعدة وكعدت العروس وكامت تجي العالم جوي بنات عمي وبنات خالة سمر وكلهم ملتمين اكو واحد من ولد عمي چان مسافر عايش باستراليا يعني يمكن اخر مرة شايفتة من چنت ثالث متوسط
اني چنت بالمطبخ وهمة اجوي ودخلو
چانو خواتة ثنين وهو وامة بوسوني البنات وامهم واجة وگف گال بس لا انتي ايلاف
لج هاي شصايرة ولكم اني هيج عندي بنت عم صاكة ومحد يگلي
ظليت اضحك كتلة
-شلونك علي شلونهة استراليا
- والله استراليا توگف تك رجل گدام جمالچ
- هاي شنو حصير مغرورة
- ولج شوكت هيج كبرتي واحلويتي
- ليش شنو جنت محلوة قبل ،، بس تعرف بعد الواحد كل مايكبر .....
- علي انت مگابل النسوان والرياجيل كلهة برة والسيد اجة
- وشنو اني العريس وواكف السيد علمودي
- ايلاف تعالي اريدج
اويلي على ايلاف ،، نظراتة متبشر بخير
- ها عيني
- انفگست عينج ،، روحي كعدي يم النسوان يلله
عافني وراح
عقدو واجة العريس ولبسو الحلقات وبدت الهلاهل وگامو البنات يرگصون
رحت للمطبخ دااجيب التقديم واجاني علي
- ها يالصاكة وين رحتي ،، هذا ابن عمج مسوي علينة حضر تجوال ميخلينة نفوت
- اكيد معتز
- اي مكتيلي ،،
بدو البنات والولد يطبون ويطلعون للمطبخ اجتي مرة عمي انطتني ملوكة ووكفت دتحجي وية مرة عمي اللخ
دخل معتز وشاف علي يمي واكف ظل يخزر بية وكفت مرة عمي الثانية گالتلة ها ياابو ملوكة شلونك بالخير عليك يوم الالك ان شاء الله
- تسلمين ام علي مشكورة
- يلله يامعتز شوكت نفرح بيك
- عن قريب ان شاء الله
اني فتحت عيوني وكلهم سكتو وباعو على معتز
- اي ياالله لگيت بنت الحلال
- اي لگيتهة
- منو هي ؟؟؟
- ايلاف ......