رواية ياقدري واحلى قدر الفصل الرابع 4 - بقلم Shody ✨✨

صعدت لغرفتي واني گلبي يرجف وراسي يريد يطگ اوووف ياگلبي شوكت تبطل رجيف من تشوفة وتريحيني شوكت اشوف حياتي والتفت لروحي ليش صرت اسير عند هالانسان حطيت راسي على المخدة وماغمضتلي عين لحد ماسمعت سمر تصيح علية گمت بدلت لبست بنطرون جينز وقميص زيتوني شوية بي طول ورفعت شعري ليفوك گلت مالي خلگ يغثني بحجاية نزلت لكيتهم ينتظروني صعدت بالسيارة ليورة ومشت بينة السيارة
- سمر شفتي احتياجات ملوكة مو تنسين شي وبعدين تكولين رجعني
- هههههه لا وداعتك كل شي سجلت بورقة
- شو الوفة ساكتة ،، بعدج نعسانة
- اي والله مكدرت انام
باوعلي بالمراية وصارت عيني بعينة
- شعجب منمتي ؟ الشاغل بالج يتهنى
- فتحت عيني وعگدت حواجبي ومجاوبتة بشي
وصلنة للمكان المقصود ودانزل من السيارة گال لسمر
- اني هنا قريب عليكم شوكت متكملون دگولي اجيكم حتى اخذكم نتعشى
- هلا بأبو ملاك الورد،، تدلل حياتي ادگلك ولايهمك
نزلنة واشترينة الشغلات المحتاجيهة ونسيت نفسي وية الملابس يعني هي نقطة ظعفي مخلصة كل فلوسي على الملابس والاحذية والجنط والاكسسوارات گوة شلعتني سمر من المحل
- لچ يلله اجة معتز واگفلنة
- ليش انتي شوكت دكيتيلة
- من چنتي بغرفة القياس دگيتلة
مشينة ولگينة معتز صاف السيارة ومنتجي على الباب وديلعب بتلفونة شافنة اجة اخذ الغراض من عدنة وعيونة بيهم ضحكة مضمومة دخلنة للسيارة واجة كعد اندار علية
- سوسو انتي الي چنتي ترحين للسوك لو ايلاف ؟ اشو غراض الوف اكثر من غراضج !!
انداريت علي اريد احجي چان يضحك ويندار يشغل السيارة
- ايلاف تموت عالملابس مخبلة مال ملابس اني اخذلي اشياء اساسية وارهم عليهم ومرات اسوي سطو على كنتورهة
- هسة مكلتولي يامطعم يعجبكم اوديكم
- اكو واحد شفتة بالفيس كلش عاجبني اروحلة تذكرين الوفة الي كتلج علي
- اي بس هذا بالمنصور ،، اخاف بعيد ومعتز عندة شغل
- لا ماعندي شي اليوم كلي الكم اميراتي ادللو وين متريدون اني حاضر
فتنة للمطعم وطلبنة اكل وكعدنة ناكل معتز جان گبالي گاعد وكل سا يلعب بتلفونة ويعگد حواجبة ويرجع ياكل سمر دگ تلفونهة وكامت تجاوب
- عجبج المطعم
- اي طيب الاكل والكعدة حلوة
وفجأة اشوف واحد من بعيد يباع علية هذا اثير شجابة هنا كلش ارتبكت ومعرفت اتصرف اجة ووگف گبالي !!!
- ايلاف بيج شي
لا معتز مابية بس يمكن لان منمت الظهر شوية دخت ... وقبل لتحجي وتعلق مجان شي ابالي بس راحت نومتي يمكن لان هواية شربت چاي وگهوة بالكلية
- هههههههههههه باع شلون شايلة بگلبهة طلعتي صدك حقودة
نزلت راسي ومجاوبتة بالي يم هذا البلوة الي لطش گبالي بلله هسة هذا شجابة اجتي سمر
- عود اسم الله باجر اخذت اجازة خابرني المدير يكول لازم اداومين باجر عدنة جرد واني اعتمد عليج وصار ساعة ابررلة ميفيد
- وانتي شتسوين بالاجازة
- مو ماما باجر عدهة شغل بالمدرسة وگلتلي ابقى يم ملوكة اني
- عادي اني ابقى يمهة ماعندي محاظرات مهمة باجر
اندار علية ورفع تك حاجب متفاجئ
- ايلاف ماكو داعي تعوفين دوامج اني اريد اسجلهة بالحضانة بس افرغ هاليومين
- ماعندي شي مهم والله ثانيا طفلة بعدهة مصايرة ٣ اشهر تحطهة بالحضانة ليش شمدرينة شينطوهة شيسوولهة لا عفية معتز اني كلهة شهرومعطلة واظل گاعدة بالبيت تبقى يمي واني اعتني بيهة
- كلام ايلاف صحيح ليش ياخوية تخليهة بحضانة شنو شفت تقصير من عدنة وبالنسبة للدوام نتناوب عليهة لحد متعطل ايلاف لتخاف
- بس ايلاف ممجبورة تبقى يمهة
- لا مجبورة حالي حال الي بالبيت وانت سبق وگتلي حالج حال سمر بعد ليش تحجي
ظل ساكت ومحجى واني كتلهم خلي نطلع