رواية ياقدري واحلى قدر الفصل الخامس 5 - بقلم Shody ✨✨

رجعنة للبيت شلت غراضي وصعدت لغرفتي اني دائما احب اكعد بغرفتي مو انطوائية لا بس احس الگة روحي بيهة جوة احس مو مكاني رغم شگد تعبو على تربيتي وابد محسسوني اني مو بتهم بس ابقى احسهم مو اهلي وانو اكو امور بحياتهم ماادخل بيهة ولااحجي ابقى بغرفتي واسمع موسيقى او اقرى وياخذني الحنين لحبيب گلبي وروحي ،،عذابي وعافيتي ،، مجرد ما اباع بعيونة ادوخ وتتعب روحي
رتبت غراضي وفتت سبحت واجيت داانام صعدت يمي سمر
- اكلج الوف هسة باجر صدك حتبقين ماما تكول اخاف مدبرهة ،، اخاف تلعب نفسهة شي
- لا شنو القصة حياتي والله عادي لتشيلون هم هسة راح انزل واحجي وياهة
نزلت سمر ولبست بجامة وتيشرت ونزلت وراهة
- ها الوفة يوم صدك تدبريهة باجر اني اجيج من وكت مااتأخر عليج بس عندي شغلة بالتربية اگضيهة وامر عالمدرسة واجي
- وداعتج ادبرهة قبل لتطلعين گعديني وروحي الله وياج
- ماشي حبيبة تسلمين
فات حسن گال
- انتي من كل عقلج تعوفيهه يم هاي ولج يوم احتمال اذا تبجي ملوكة تكعد تبجي وياهة هههههه
- بسيطة حسوني اني هيج !!
- هههههههه والله عود ايلاف تصير ام وتربي اجيال
شتعلميهم على الوان الصبغ اظافر لو نوعية صبغ الشعر
- اووي حسن شگد مكروه هههههه حموتك والله
صاح بي عمي
- لك حسن عوفهة للبنية شلحيت وياهة
- حجي اتشاقة وياهة ،، لتخاف على عزيزتك
ضحكت ودااطلع من باب الهول وصار گبالي معتز
- ها يوم معتز باجر الوفة تبقى يم ملوكة
- حجية البنية عدهة دوام لتجبروهة تبقى يم بنتي
ممجبورة
- والله يوم كتلهة بس هي مصرة
- معتز سبق وگتلك اني ماعندي شي باجربعد ليش كل سا عايد الموضوع اني باجر ابقى لتخلف على بنتك والله محاكله ...
وعفتة ودااصعد چان يلزم ايدي ،، واني گلبي وگف وية لزمة ايدة ولشتي كلهة گامت ترجف
- لحظة ايلاف ،، تعالي
- تفضل معتز رايد شي؟
-  لتصعدين تعالي نگعد بالحديقة اليوم الجو حلو وهاج هاي العلاكة جبتلكم شغلات للسهرة مدام باجر ماعندج دوام رتبيهة على مااغير ملابسي واخذ دوش
راح واني محاسة على نفسي بعدني واكفة واحس ايدي نملت من لزمتة حطيتهة على خشمي وتنفست عطرة
چان جايب كرزات وچبس ومشروبات غازية ونساتل
طلعت رتبتهم على الميز بالحديقة ولگيت سلام ديعمر النرگيلة وسمر تلعب بتلفونهة اجة
الجو چان كلش حلو مايل للبرودة وريحة الگاردنيا وملكة الليل چانت محليتة اكثر ،، حديقة بيتنا چانت كلش مرتبة ومليانة ورد وبالنص مرجوحة بيضة
اجة حسن اخذ كرفة من الكرزات وظل يكرز سئلة سلام لعد وين عزو
- هسة يجي
اجة معتز لابس برمودا بيجي وتيشيرت ربع ردن اسود والسلسلة الكارتير مبينة من فتحة التيشيرت وشعرة مبلل وريحتة اااخ ريحتة تعط هالنوب اجة گعد بصفي على المرجوحة انسطرت سطر وظل يهز برجلي
- ظلو يحجون على لعبة ريال مدريد وهذا يگلة ضيعهة غاريث بيل وهذا يكلة لو ما كرستيانو رونالدو ميفوزون  تلاثتهم چانو يشعجون الريال
اخذ كرزات وخلي بأيدي وظل يكرز
دك تلفون سمر وراحت جوة تحجي والولد كاعدين عالكراسي مقابيلنة حسن ديراوي سلام مقطع فديو
اخذ النرگيلة وسحب وطلع دخانهة من بين شفايفة واني اباعلة صفح كل حركة منة احفظهة واخزنهة بذاكرتي
- هاج
- شنو !!
- صارلج ساعة عينج عالنرگيلة وتباعيلي صفح اخذيهة يلله چنچ اشتهيتيهة !
- لا يمعود گول غيرهة ششتهيتهة چنت صافنة والله
- دهاج اخذيلج نفس  والله لتستحين
- معتز والله مااريد لتحرجني
- لولو انتي ليش هيج حساسة ؟ كل الامور تاخذيهة جد وتتحسسين من ابسط الامور ترى هيج اتعبين
- مااعرف
- لازم تعرفين ،، يابنت الناس اني من عارضت بقائج يم ملاك مو لأن ماعندي ثقة بيج لا يشهد الله بس انتي تعرفين طفلة صغيرة ويرادلهة مراعاة ومدارة وكل ساعة ترضعيهة وتغيريلهة خفت لا تلعب نفسج او متتحملين الوضع ،، هذا كل ما في الامر
- تلعب نفسي من طفلة ؟؟ باجر هم مصيري اتزوج ويصير عندي اطفال هم حتلعب نفسي منهم
- بس هذولاك حيكونون جهالج من دمج ولحمج ؟
- بس اني مو بتكم مو من دمكم ولحمكم وربيتوني وتعبتو علية وملعبت نفسكم مني
- هذا موضوع اخر ،، انتي بنت عمنة يعني دمج من دمنة ايلاف شلون هيج تكولين ،، يعني انتي تريدين تسوين رد الجميل ابنتي
- لا مو رد الجميل ،، بس هاي الطفلة حالهة من حالي اشوف نفسي بيهة انحرمت من امي وابوية واني بعدني مواعية عليهم ولا اعرفهم زين
- بس اني بعدني عايش !!
- الله ينطيك طولة العمر
- هاهية ايلاف مثل متريدين اهم شي تكونين مرتاحة
ظل يباع بعيني واني صفنت بعيونة حسيت برجفة حس بية گال بردتي
- اي بردت يلله حصعد لغرفتي تصبحون على خير
- وانتي من اهلة