زمهرير الاوجاع الفصل الثالث وثلاثون 33 - بقلم قدر ال هاشم

زمهرير الاوجاع

حفصه الهاشم ..

صلوا على نبي الرحمه بنوتات ودوسوا النجمه..

ـــــــــــــــــــــــــــــــــــــ

البدايه والنهايه سيئه ...لا تستحق العناء.

سهند...

ابويه رجع موافقه لعمامي وانطينه موافقتنه لاهل سيف.. وكل هذا اني ابتسم ساعه والخوف يرجع يتلبسني مليون ساعه..

ما اريد افرح و أأمل نفسي وبعدين انضرب بوري مثل ما صار قبل ..

ومثل ما توقعت ابو سيف ما قبل يجي الا ابويه ينطي كلمه كدام الشيوخ يلا حددوا موعد الفاتحه يعني عقد القران...

اليوم خميس الخميس الجاي الخطبه..
واني كاضيتا كلها ماسكات وعنايه بالبشره ..

اني منانه مريضه ومنانه الخطبه اجتي الله يعلم شلون راح اطلع بالخطبه هههه

كاعدين كولنه بالاستقبال وبيت عمي ابو فراهد اليوم يمنه او بالاحرى بس عمتي وعمو والشفيه اوس لهسه ما احجي ويا على عملته السواها ويه سيف كلامي ويا كولش قليل

وبعد عيني هوه مغندب ما موافق على الزواجه يكوللهم شلون تنطوها لواحد راد يذبحها وبوقتها من عرف ابويه موافق اجه على ابويه بالليل بنفس الساعه العرف بيها

وصياح بالطرمه وبالاستقبال اني جنت بغرفتي ..
وبقه يصيح عليه انزلي سهند يزمااله مهجره انزلي

نزلت عليهِ وابويه بالحمام ديسبح وعمي موجود ويوسف والولد واحنه نريد نفتهم سالفته ماكو
عاد اخير شي كال ماتنطوها هذا واحد مخبل وكواد شلون تنطوها

عاد اني بوقتها حيل جنت حاقده عليهِ نزلتله اكس مربع هوه يصيح واني اصيح عليهِ
اانته مالك دخل ومنو كالك تعال انطي رأيك
اني احجي وهوه يفشر

الا طلعله ابويه وصاح عليهِ جان ينغلس.,..

...................

علياء ما اجتي لا هيه ولافراهد
هسه فراهد افتهمنه ضايج كرة عيني علمود مراح اصير اله زين علياء ليش ما اجتي,,؟

كاعدين احنه يم بيبي وسوالف وضحك فات يوسف وسلم علينه بثكل
السلام عليكم

الكل// وعليكم السلام

عبد الجبار// خير اشو مغندب انته هم شصاير بعد..؟

كعد يوسف يم عمتي جليله ويباوعلنه بخزره مابقه واحد ما خزره..
لا سلامتكم ما صااير شي بس خلووها اباالكم سهند وسيف يعقدون وبنفس اليوم نعقد اني وهبه ..

الكل كام يضحك عليهِ الا هبه الصارت طماطه من الخجل ..
هسه هوه شكايل علمود تخجل اشو اني وسيف مكضيها كوله تعال اخطبني وتعالي نعقد هههه

جاوبه ابويه وهوه يكلب بقنوات التيلفزيون// جنك حيل واثق من نفسك ولك..

يوسف بجديه// عمي ترا ماداشاقه كم سنه اني طالبها منك وتكولي من تكبر من تكبر ترا هاهيه كبرت ماشالله راح تطلع ال18 بعد شكو

نطت ميقاتو المندسه من يمها// ترا ابن اخويه طالبها مني ابو جاسم كتلك اني عل..

قاطعها ابويه وهوه يباوعلها بحده// ميقااات ..لاتكثرين بالكلاام اني الاريده اسوي.

جاوبهم عمي سعدون علمود يهدئ الوضع حقه الولد خويه انه هم طلبتها منك وانتطيتني كلمه خلي نعقدلهم ونفض الموضوع.

عبد الجبار// هيه البنيه الكم الكم ..بس ما انطيها بيوم عقد سهند خلي نكمل سالفة هذوله وبعدين عود الله كريم

كام يوسف بعصبيه// ماكو هيج حجي عمي اني عقدي ويه عقدهم واذا ما موافقين حته سهند ما اخليها تعقد زين

فتحت عيوني وحلكي عليهِ من الصدمه
وكفت على حيلي بعصبيه واني متخصرتله نسيت حتى الكاعدين يمنه
لابلا يوووسف هااي شبيك هاي صرت انته هم ضدي الا اكول لسيف عليك اصطبرلي خلي بس عدنه ثنين حقنه ليش تصير انته هم وياهم..

اجاني صوته المكروه العالي
اوس// ولج يسييااان منو الحقنه ام لساان الطوويل
التفت على ابويه وكمل كلامه // عمي اني هم ما رااضي اذا متزوج يوسف وياهم سهند ما تتزوج

انداريت عليهِ واني مستغربه منهم اشو العالم كلها انكلبت عليه
باوعتله واني حاطه ايدي على خصري بعصبيه
مو هوه بكيفكم تقبلون وماا تقبلوون ابوويه انطه كلمه للعاالم انتوا شلكم دخل روحووا تزوجوا اطلكووا بعيد عني.

دفعني يوسف من ايدي بخفه// انتي تسكتين لا الزكج براشدي ينومج دهر كم سنه انتظر بعد
التفت على ابويه وكمل ..اني كلمتي كلتها عقدي ويه عقد سهند غير هاللكلام ماعندي.

سهند//يووسف هااي شبييك.؟

جاوبتني عمه جليله وهيه تعبي حلكها بالكليجه// يولي يمثبوره استجني اخذتينه حاصل فاصل ماتستحين الولد ويريد يعرس وياكم شبلاج انكلتي علينه سعلوه.؟

سهند// عمه همه كلهم عرسووا ويايه بيبي احجيلج شي..

شبكت ايديها وهزت راسها وهيه تباوع على يوسف// والله يبيبي ناطره تاشوف لكلكة هالمضعوف ليوين توصله..

كعد ابويه يم رجل بيبي وهوه يفركلها// انتي شتكولين حجيه نلغي العرس لو لا..؟

باوعت على يوسف واني اضرب رجلي بالارض
ضربته بجتفه واني احجي ويا بحركه
كله من وراك انته وهذاك المكروه.

جاوبته بيبي وهيه تضربه على جتفه// يول يجويبر غسم بالله اذا لغيت العرس الغي عليك عيشتك جم دوب بعد ينتظرون الويلاد خلي نعرس سهند وسويفان وبعدهم يوسف والمصكوعه هبه.

كعدت يمها وبست راسها واني اجاوبها
والله بيبي محد يحجي عدل الا انتي.

اباوع على يوسف مسح وجهه بعصبيه وكعد يم اوس المكروه
يوسف// هاي الخاطر سهند تراا رااح اسكت ومن تكمل الخطبه ورا يوم اني اخطب ومالي دخل بيكم توافقون او لا.

صبتله عمه جليله جاي وانطتهيا// اشرب اشرب يبعد افادي اشرب واحرك بنفسك هاي سيان ملكوفه على الزواج جنها ماشايفه زلم

عمو سعدون// لا انشالله ورا سهند يجي دوركم

جاوبه ابويه وهوه يطيب خاطره// يلا انشالله الاسبوع الورا نتفرغلكم جم يوسف عدنه..

يوسف// الله كريم

كام عمو سعدون طلع للطرمه ابويه هم صعد فوك وميقات سحبت هباوي وصعدت

منزل راسه ورافع عيونه
نظراته تمشي على هبه الى ان صعدت فوك ..باوعلي بضوجه وحجه

// هسه من باجر تلم غراضها وتاخذ هبه وتروح لامها ادري بيها دغمه ماتحبلي الخير

جليله// اي اي هاي ميقات ادري بيها هسع انه اجرجرلك اذنها بس انته لاتضوج يبعد عمتك .

حطت استكان الجاي بقوه على الماعون وباوعت على علياء واوس وهيه عاوجه حلكها
وانتوا انشالله انتي يالبايره ماناويه تحبلين عااد

اوس// جليله شلج بهالكلام ..

جليله// جليله التمهلك كول امين يول هاي مريتك مابيها فريخات خلينه نزوجك وتعرس ويه سيان

انتفضت وجاوبتها بحده
لا لا عمه دخيلج اني يوسف اخويه الح بالح وماقبلت يصير ويايه عاد هذولاك العالم الحقنه بعدين قدر ترا خوش قدر

جليله// انتي انجعمي ماصدكتي لكيتيلج هذك المسربت وتعلكتي بيه يولي اسمعي جلمتي عوفي وازوجج فراهد يسوا ترا

سهند// يبوو عمه زوجي لبناتج لعد عوفينه اني مصدكت ابويه يقبل..

...................

بقت طول الكعده تلزملها واحد وتكعد تكص بيهِ
خطيه وقدر ماخذه القسم الاكبر..

بس متحمله وساكته ..

..........

مر هذا الاسبوع بسرعه بسرعه من سوك لسوك ومن محل لمحل
علياء طول هذا الاسبوع ما اجتني بس مره حجيت وياها بالتيلفون وجان صوتها عبالك مريضه

باركتلي وراحت ماطولت حيل

اليوم خميس وكلبي احسه راح يطلع من مكانه من الخوف ومن الفرحه..
طول هذا الاسبوع سيف ماحجيت ويا

ابويه مسويلنه حضر وتيلفون يمه ..يكولي من تخلص الخطبه انطيجيا
يلا مو مهم اهمشي هسه خطبتي.

لبست فساتي الاسود وبي ورود باللون الاحمر القاني
ما اعرف ليش اختاريت الاسود بس عجبني كولش

أضافة هذا اللون عشق سيف شلون ما البسه
عمتي جليله بقت تحجي عليه بنص المحل وتغلط عليه
يولي ياثوره شبلاج لابستله اسود للرجال شني هذا عزاكم لو عرسكم ...وشكد حجت بس اني ما قبلت اسود يعني اسود

شعري مايحتاجله صالون وماعرف شنو لان هوه اصلاً قصير كصيته مثل كصتة الطوبه وهوه ثخين وسررح حيل عفته هيج مفتوح لان اصلاً مينشال ههههه

بس المكياج اجتي جيرانه خبره بهيج اشياء سوتلي مكياج خفيف
ما اريد اصدمه بوحده ثانيه بسبب المكياج خلي بالعرس ينصدم ههههه

عماتي كلهن موجوداتي وبناتهن وعمامي ايضا..
الهوسه والدك والركص علكان من الصباحيات ابويه بالمضيف كل ساع يجي يصيح عليهن نصن الخرا العالم برا عيب فضحتونه..

..............

كعدوني بالاستقبال واني كل شويه اكوم اردحلي وياهن اي لعد شلون غير هايه خطوبتي ..
ههههه

اجتي علياء لابسه فستان طويل مخصر على الجسم ومن جوه تبدي النفشه مالته
طالعه كولش حلوه هيه طويله وشعرها يخطي ظهرها ومكياجها ثكيل بس لايكلها..

اجتي يمي والبنات كلهن يمي ضحك وسوالف وهاي تعيب وهاي التصلي على النبي..

علياء// سهند ولج طالعه عبالك ولد بهذا شعرج هههههه

باوعتلها بضوجه وهزيت راسي يمنه يسره وشعري يتحرك ويا بأنسيابيه
// لا لا اصلا يخبل وهوه سيف يحب الشعر القصير

جذب اصلاً الرجال ماكالي احب الشعر الطويل او القصير
بس فشلتني النذله كدام البنات شلون اردلها يعني..!

علياء/// هوه كالج يعني
اي هوه كال

قدر// لا والله لايكلها كولش مطلعها اصغلا من عمرها

جاوبتني علياء وهيه تدفعني من جتفي// انتي انجبي شويه ام الزهايمر بيج خير روحي تعالجي بعدين تعاي كعدي يمنه لاتعدينه

باوعتلها مصدومه من جوابها ماجاوبتها
بنات عماتها بقن يسألن ليش شبيها خطيه بعدها صغيره

جاوبتها سهند بأستغراب// هااي شبيج عليااء ..؟يا زهايمر هذا.؟

اي يابه ليش ماتعرفون بيها زهايمر مبكر بس ما تريد تروح للدكتور

قدر// عليااء بلاا هالكلام منو كاالج بيه زهاايمر ليش هييج تحجيين.؟

قبل ماتجاوبني اجتي عمتي وام يوسف والنسوان
وهنه يهلهلن ..

انسد الموضوع بس نظراتنه اني وعلياء وحده على الثانيه
وحده تريد تاكل الثانيه

من اخر موقف صار ويايه وعلياء كالتلي على الزهايمر
بوقتها فات علينه اوس وبقه يرزل بعلياء انتي منو صخم وجهج تحجين ولاتدخلين وماعرف شنو

وعلياء راحت لغرفتها معصبه..
واني بقيت اطرش بالزفه ليش عود هيج عصب..؟

يعني مامعقوله هوه هم مصدك بيه زهايمر
ضل بوقتها بس يهدأ بيه ويحاول ياخذني للدكتور واني متجاهلته لا يعني لا

على شنو اروح واني اعرف بنفسي مابيه شي
بس هم الديصير ويايه مو طبيعي ومخفوني هم.

علياء من عرفت سهند راح تنخطب من سيف
صدمتها جانت كولش واضحه على وجها ..

انكلبت صفرا ..ومن وقتها هيه حابسه نفسها بالغرفه وماتطلع الا على كد احتياجاتها

اوس التهه ويه ولد عمه ونسه سالفتي
او بالاحرى ديأجل بيها وهوه منانه هم معصب علمود خطبة سهند ماراضي عليها

اكوله انته عوفهم هيه مادام فرحانه عوفها براحتها
وهوه عاد يفتحلي الراديو مالته

لاهذا كواد نغل نغل اني لو كاتله بنص السجن ودافنه احسلي
هذا ساقط ضربها مره يرجع يسويها مليون مره

ولسانه ماشالله ابد مو زفر ماعرف منوين يجيب الغلط اهمشي عنده يفشر

قبل الحفله مال سهند..
جان البيت فارغ مابي احد عمتي طالعه ويه سهند للسوك وعمي ابو فراهد وابنه بالشغل

المختصر بس اني وعلياء بالبيت..

كملت الغده عمتي هسه من ترجع تفتح حلكها عليه غداج وينه وغداج وينه اسويه واستر على نفسي احسن

طلعت من المطبخ علياء كاعده بالاستقبال وصافنه على الحايط وساكته..
كعدت بصفها بهدوء..!

باوعتلها بعدها افنه على الحايط وماتحجي شي..
علياء شبيج اشو مهمومه.؟

تجاهلتني ولاعبالك موجوده بقت صافنه على الحايط وساكته
اني هم كلت خلي اكوم استر على نفسي لاتروح تذبلي مصيبه.

بعدني ماطالعه من اللاستقبال جان تصيحني.
رجعت كعدت يمها وانتظرها تحجي

بعد صمت طويل اندارت عليه وحجت
قدر ترا والله هوه مايريدها والله شوف هيه شمسويتله ..؟ اني اخته كولشي تحجيلي صدكي

باوعتلها بهدوء واني بداخلي مصدومه منها..
معقوله هيج تصير بسبب رجال هيه محاجيه ويا اصلاً.؟

حبيت اسحب لسانها بالكلام حالتها تخوف وكل شي يطلع من جواها.

قدر// علياء انتي شلون حبيتي وانتي مشايفته ولاحاجيه ويا.؟

التفتت عليه وهيه مبتسمه
لا لا اني جنت دائماً اشوفه ..اخته جانت متزوجه ابغداد وهوه جان يجي علهيا بين فتره وفتره جنت اشوفه من الشباك اباوع على هيبته على مشيته ..ولج قدر شايفه هايه السبحه اليم سهند شايفتها..؟

اي هايه المن سيف مو.؟

اي اي هيه هاي تدرين هايه دائماً جنت اشوفها بأيده دائماً..
ماتعرفين شكد انقهرت من شفتها يم سهند ..الا اخذها منها اصبريلي.

باوعتلها وبقيت ساكته..؟ شحجي وياها هاي.؟
زين هوه راح يتزوج شلون هسه انتي مو كلتي راح يجي يخطبج.؟

عضت على اصبعها وجاوبتني
اي اي هند كالتلي راح نجي نخطبج هاي الفتره اخخ بس لو اعرف سهند شمسويتله .؟ اني كم مره احجي ويا هند وهيه تكلي من احجي بطاريج كدامه رأساً يذب كلشي بأيده وينتبه عليه لان ذاكره اسمج.

قدر
زين يجوز هند تجذب عليج.؟

باوعتلي بعصبيه ودفعتني
ولي ولي اهمداج ليش تجذب يعني قابل شراح تستفاد ثول .

عافتني وراحت لغرفتها..
الله يهديها هاي حبها حب تملك بخبال

اذا الرجال مارايدها شلون هيجي مصره عليهِ
من اذكر كلامها اقلق كولش واكول لازم اكول لاحد لو اخوها لو سهند

بس بعدين اتذكر سهند وخطبتها واكول سالفة علياء راح تنتهي هنانه وتنسد
اكيد قابل شراح تسويلها وهيه بنت عمها.

بيوم العقد
لبست فستان مستور بدون مايكلي اوس لان اني هم ما احب ابين جسمي لو حتى بس نسوان.

ومع العلم هوه فستان بسيط ومستور واوس هم كرع راسي هذا مكياجج ليش هيج اشو مغيرج حيل

هوه هم حقه اذا هوه من اول ماتزونه ماشافني حاطه حمره عاد مو مكياج ثكيل واني هم عمداً خليت مكياج ثكيل
علمود يعرف العنده جوهره ومايركضلي ورا نور المابطلت وما ملت من اوس شتريد منه ماعرف.؟

عقدوا لسهند وسيف ..
واخيراً وصارت زوجته شرعاً

الفرحه مرسومه على وجها ودموعها واكفات بطرف عينها
معقوله هاللكد تحبه .؟

سيف دك رجل الا يفوت يشوفها وابو سهند هم دك رجل ممنوع تفوت تشفوها
ومناكه اوس قافل علهِ

علكت بيناتهم بالطرمه هههه وهذا سيف مايتحاجه
ابوها لازمه وهوه يدفع بيهِ ويريد يفوت للاستقبال

اوس // تعال انته هنانه فوته ماكو العالم والنسوان كلها ملتمه شعندك كاعد بنصهم

سيف// يوول انته لاتحجي جلمه وحده خالي انه فايت ادحك على عمرتي حرام مو حرام عيب هم مو عيب بعد شكو

اوس// انته ابو الدحك ما دحك تمشي منانه لا ارجعك للسجن قسم بالله

ركضت على البرده وباوعت من طرف البرده
جان سيف خازره و وجه احمر وهاي عظام الفك مالته تنزل وتصعد

سيف// يوول اوووس لاتعيب على جلماااتي عيب عليك هذا الكلاام لاتخلي الحقد يصعد بينااااتنه

سعدون// خويه عبد الجبار خلي الرجال يكحل عينه بمريته لا تسوون مشكله مناك ابو الشيخ عيب علينه

مسح على وجهه بعصبيه وطلع من الطرمه

لبسنه عباياتنه والبنات وكفن على صفحه
وبيبيتهم خبصتنه بهلهولتها ما تهلهل كللووش لا تهلهل بالواو هيج وولولولش هههه

جليله // هاي الرادها وهاي التبناها بنت الشيخ لبن الشيخ جبناها

التافت على البنات وطمت عليهن // ول شبيجن فاينات دهلهلن صخمن عاب هالعين لاتحسدن البنيه

ههههه هيه ترزل بالبنات والبنات يرجعن يهلهلن

فات اوس وفات وياه عمهم سعدون
همه سووها هيه خطبة شيخ هيه مهر

وخطيه سيف ابتله بأبوها واوس
سيف يحط رقم للمهر وابوها يزيد ويرجع سيف يقبل بالرقم ويرجع اوس يزيد من صدوك دمروا
حتى اني انقهرت عليهِ

فات منزل راسه بس ابتسامته شاكه حلكه
مبين عليهِ الفرحه

اول ما فات اتقدمت عليهِ جليله عمتهم وصرعت راسه بالهلاهل وطش جكليت فوك راسه

وهوه بس يبتسم

كعد يمها وهيه عيونها اكلته ما نزلت راسها عنه ابد
هوه هم جان لابس دشداشه سوده طالعين عصافير الحب ..

اول ماكعد لزم ايدها وباسها والبنات ماشالله مايحبن الضحك عبالك شو شمسوي

دفعته جليله من ايده على سهند وهيه تهلهل
/ كللووش ول ابويه اتكحز(اتقرب ) يم البنيه شعندك مستحي

رفع راسه عليها وجاوبها بضحكه/// هههه حجيه عادي اكعدها بحضني اذا تريدين

التفت على سهند وكمل كلامه وهوه يغمزلها// هاا يولوو تكعدين بحضني
قرب راسه يمها وهوه يهز راسه بهيام // والله بويه حضني مريح ودافي هم

سهند..

نزلت راسي النذل عماتي كلهن فاتحات حلكهن علينه وهوه مايحب يفشلني
وكل ساعه شايل ايدي ويبوسها

عاد اني هم ماتحملت رفعت ايده الي لازم بيها ايدي وبستها

اني بستها لو العالم كبت عليه

جليله// يمضعوفة البخت فضحتينه يوولي استجني شويه

جاوبتها الحجيه ام سيف وهيه تبوسني من راسي وتباركلي
// الف مبروك يمه الله يسعدكم ان شاء الله واشوف جهال جهالكم ...

التفتت على عمه جليله وجاوبتها بضحكه// ههه ام رواء عيفيهم عرسان جدد عجل اذا ماتحب ايدينوو ايد منو تحب

عمتي هم انسجمت وياها
توالموا هيه والحجيه

وهذا الشيخ البصفي طلع مستهتر واني ما ادري

مابقه حركه ماسواها ساعه يكرصني من ايدي ساعه من خصري

ماعدا شعري يجيب ويحرك بي بعشوائيه ويرجع يعدله

ههههه على اساس اني بقيت عاقله هم استلمته هوه يكرصني مره واني ارجعلهيا الف مره ههه

وعمتي جليله خبصتني ولج اثكلي استجني فضحتينه هسه يكولون عنج خفيفيه
بس ماهمني اهمشي فرحتي

اجتي علياء جايبه صينية الذهب
احنه انخلي الذهب كوله بصينيه بس مو هاي الصياني العاديه لا صينيه تختلف هيه بس للخطوبات وهاي السوالف

علياء ماجانت لابسه عبايه بس ذبت الشال على راسها ذب
عيونها حمر ..! بس لا علمودي هههه

اول ماصارت كدام سيف نزل عينه بسرعه عنها
وهيه بقت واكفه كدامنه يم عمتي جليله

وهوه احتار ساعه يباوعلي وساعه يرجع ينزل عينه على الارض
فديت اليستحي

لبسني الذهب واني هم لبسته الحلقه
صح الذهب مو اني اختاريته بس حلو ذوقه

غير ابويه سوالي عرس ماتطلعين وما تطلعين عاد كعدت وسكتت

كملت الحفله على خير

واهل سيف مارجعوا لتكريت تأخر الوقت عاد باتوا يم بيت عمي ابو فراهد

مع العلم سيف جان رافض رفض قاطع بس اوس الحقنه حجه ويا وقنعه..

صعدت غيرت ملابسي وفتت سحبت
العراق وما ادراك ما حر العراق..

معت معت همزين ماحاطه هواي مكياج.

طلعت نشفت شعري وصاحوني من جوا

هذوله المخابيل ساهر وجاسم ويوسف

ذبيت الشال على راسي ونزلت واني اهز جتف على الدرج

ساهر يدك على الباب ويركص وجاسم ديشغل الدي جي

الظاهر ماشبعوا ههه عادي اني هم ماشبعت خلي اعيد الجوله ههههه

بقينه نركص اني وياهم وهذوله مخابيل من يركصون يدبجون ادبج
الكاع كولها تنرج رج من يكمزون

مابطلنه الا اجه ابويه ورزلنه

يوسف هديته تيلفون لمس مثل ما اني اريده
صح هدوني هواي بس هاي الهديه الفرحتني ماعرف ليش هههههه

......................

صعدت فوك واني ابحوش بالتيلفون داشوفه شلون صاير
وهوه يوسف مكمله من كل النواحي سيم كارت وماعرف شنو

يكولي هذا سيف خبصني عليهِ واشترا.

اول ما فتحته جان سيف مخابرني عدة مكالمات
رجعت خابرته بس ميجاوب خابرته اكثر من مره ماكو

اخر شي عفته ونمت براحه يجوز اول مره احس بهيج راحه من بعد سنتين

ـــــــــــــــــــــــــــــــ

قدر

أبليتني بالعشقِ ثم تركتني
وأذقتني حلو الهوى فقتلتني
ووهبتني قلبًا يفيضُ تعطّفًا
بضعًا من الأيام ثم قهرتَني
تقسو عليّ ولستُ أعلمُ غلطتي
أو غلطتي أنّي بِذُلّي أنحني؟

ــــــــــــــــــــــــ

بدت الحفله وخلصت الحفله واني عيوني على علياء

ما معقوله هيج بشر رجال بيوم خطوبته واكعد اسويله اغرائات معقوله ..!؟

انطيتها عبايه تلبسها فوك فستانها لان فضيحه فستانها بس ماقبلتت شمرت العبايه وحطت بس الحجاب فوك راسها

ونص شعرها طالع من ورا
غير لو يدري اوس لو فراهد بيها الا يملخوها من شعرها

طول الحفله وهيه واكفه كدامه ساعهتميل بخصرها وساعه تتموع
شنو غايتها ماعرف ..

اني من يمي استحيت وهوه الرجال يدنك راسه لو يشيل عينه بس على سهند
وماكو فايده

رفع راسه وخزرها كم مره بس هيه ماكو جليد مايحس

وهوه من يخزرها عبالها شي حلو تجي يمي وتكوم تكمز
شوفي نظراته عليه وشوفي وشوفي

اني هم تعبت من الكلام وياها انوب لا اروح احجيلي شي ولسانها ينزل عليه رشاشه

من عزمهم عمي ابو فراهد لبيتهم يباتون وثاني يوم يطلعون لتكريت
كلمة تخبلت قليله بحقها

هوه الرجال رفض وماقبل
وهوه بلا شي هوه واوس مو صلح ومناكه فراهد وهاي علياء منانه انلاصت عليهِ

ماقبل الا اجه اوس حجه ويا وقنعه
عاد صدوك رجعنه سيارتين للبيت

جهزنالهم الاستقبال حتى بعدني مانازعه عبايتي
فتت ركض داجهزه عيب العالم تبقه واكفه بالطرمه

وهاي المستهتره ركضت ركض دتعدل بنفسها..!؟

فوتناهم وعمي كعد يم الزلم بالاستقبال هوه واوس
والنسوان بالهول

السهره بقت للوحده بالليليلا كل واحد راح لغرفته
ام سيف واخته ناموا بغرفة علياء

والزلم بالاستقبال وفراهد يمهم

صعدت فوك جان اوس ديدور على دشداشته

همزين اجيتي تعالي شوفيلي دشداشتي البيجي وينها لو هم نسيتي

باوعتله بطرف عيني
هذا شحجي ويا اني بلا شي تعبانه انوب يكعد يبسمر بيه

كعد على الجربايه وهوه بطرك الفانيله والشورت
ها الظاهر الكلام ما عاجبج ست قدر..؟

جاوبته واني اتنهد
اووس لخاطر الله والله تعبانه ورجليه مكسره

جاوبني وهوه يدخن// اي هاللكد ما ركصتي قسم بالله قدر اذا شفت صورج بالتيلفونات الا اعلكج بالبنكه زين

//زين

كام اخذ الدشداشه من ايدي وهوه ضايج
والله لوما هذوله جوه جان هسه مغتصبج على هالجمال هذا بس كواويد عررسهم صار ويه عرسي

لبس الدشداشه وهوه يتحلفلي
ادري هسه اني شمسويه قابل اطلع بالدشداشه واروح للحفله

فتت سبحت وغيرت ملابسي الدوخه اكلت راسي اكل

وبالي يم علياء هسه اكيد مخبله نفسها

ثاني يوم الصبح كعدين كولهم بالاستقبال

والنسوان يم عمتي بالهول

طلع سيف اوس سواله مجال وطلع ديغسل على المغسله الي برا بالطرمه

واني واكفه على السنيك

وعلياء وبنت خالها يم باب الطرمه

اغسل بالمواعين واسمع كلامهن
شجن// ولج والله خوش صيده صادتلها عود هاي الي جنه نكول عليها فطيره

جاوبتها علياء بصوت عالي نسبياً
يا فطيره الله يخلي الفيسبوك والكروبات على الماسنجر لج هاي سهنند اسأليني اني عليها اتورط بيها والولد خلي ياخذ تيلفونها وشوفي المصاايب

ذبيت المواعين من ايدي ورحتلها

قدر// علياااء عززا شلوون تحجين هييج على بننت عممج..!؟

ويه مادارزلها جان يطلع سيف..

باوع عليهاا هوه وخازرها وهيه سوت نفسها ماشايفته

//اي شنو هاي الحقيقيه وتيلفونها يشههد

ــــــــــــــــــــــــــــــــ

شكرا من القلب لكل الي صوتوا للبارتات الاولى من صدوك فرحتوني
احبكم

ان شاء الله البارت عجبكم وعلياء ما توكف لهنا بعد وراها مصايب يولووو

قربنه للنهايه يجوز مو اكيد

احبكم كوووومه جثيير🖤🖤

دمتم سالمين حفصه الهاشم