زمهرير الاوجاع الفصل الثالث 3 - بقلم قدر ال هاشم

#زمهرير الاوجاع

بقلمي حفصه الهاشمي

جمعتنا الصدف بأزقةَ الايام
ربطتَ قلوبنا بمعاطف المكابره
إختلطت أرواحُنا بعناد كبير
إنسجمت مع لحن الموت البطئ
جعلتها ترقصُ بهداوةٌ على تعذب فؤادنا
....مبتسمةً على قوة حُبنا ألمنفى...

بقلمي ...#حفصه_الهاشمي

#زمهرير الاوجاع

ــــــــــــــــــــــــــــــــــــــــــــــــ

ملاحظه
البنيه الي جان اسمها سلسبيل بالمشهد غيرته صار اسمها (هبه)

متكوره على نفسها بزاوية الغرفه شعور باليأس والحزن القاتل

الغضب ...الغضب احتل حواسها تفكر بهاللحظه تستأجر سياره وترجع لبغداد وتكلبها على راس عمامها وحته ابوها

شلون يضمون عليها هيج موضوع ...اختها الوحيده قطعه من قلبها ... الاخت الأم الثانيه ..

الحنان الجان محتويها كل همها جانت تحتوي بقلب كبير وابتسامة طمأنينه تبث بروحها القوه والاستمرار بالمواجه

شلون يدفنوها وهيه متعرف ..

اسبوعين واختها جوه التراب وهيه لٱ حزنانه ولا مودعه اختها ...

اتسلل موقف ويه اختها من جانت تريد تدرس بتكريت

جانت واكفه مقابيل ابوها وهيه تبجي على رفضه للجامعه ويريد يبطلها مثل اختها لان ثنينهم جامعاتهم مو بالمحافظه

وكفت اختها ازل بأعتراض على قرار ابوها ومتريد مستقبل اختها يدمر مثل مستقبلها وبعد كم ايام يزوجها لواحد من ولد عمامها مثل ما سوه وياها

/// بابا ليش تحرمها من حلمها انته تعرفها من هيه وصغيره تريد تصير صيدلانيه ليش تكسر بيها مثل ما كسرتني

باوعلها ابوها بحيره ونظرات القسوه مرسومه بعيونه بكل جبروت وكأنو احد اوسمته الي اكتسبها من معركة الحياة

// ما عدنه بنات يدرسون وحدهم بمحافظات ويم ناس غربه خاصة بتكريت..خلي تشيل هالموضوع من راسها ما اريد اي اعتراض

أزل // بابا الله عليك انته تعرف سهند مستحيل تسوي شي خطأ وتنزل راسك ما عندك ثقه بيها يعني.... انته مو تكول سهند سندي و رافعه راسي دومها وانشالله افتخر بيها من تجيبلي الطبيه وين راح كلامك هذا ها ؟.

انتقلت نظرات ابوها بينها وبين اختها هوه يريدها تكمل دراستها ويريدها تحصل الطبيه ويفتخر بيها بس مبادئه غلبت عليهِ مع كلام زوجته الي تملي راسه بيهِ

اتنهد بحيره جاوبها وهوه يطلع من الغرفه // خير انشالله .. افكر وباجر انشوف شيصير ..

جاوبته أزل بفرح /// بابا الله عليك مو ترفض خليها تحقق الما كدرت احققه اني ...

كلمات حفرت الندم بقلب ابوها بس ما بين هذا الندم على ملامحه ..

زادت شهقاتها اكثر من اتذكرت مرة ابوها وهيه تحاول تخرب عليها وعلى اختها من انطاهم ابوهم الموافقه

جانت زوجة ابوهم واكفه ببداية الدرج وتحجي بصوت عالي وبحقد وهيه تكول لابوهم

/// لا يابو جاسم ما توقعتها منك .. من شوكت صاروا بناتنه يدرسن بغير محافظات ها من شوكت صرنه ناخذ برأيهن كعدها يمك وزوجها لابن اخويه الشاريها احسن ما تنزل راسك بالطين وتسود وجهك ..

جاوبتها اخته أزل بحركة قلب وهيه تتذكر شلون بسببها ابوها غير رأيه وكعدها بالبيت ورفض انو تكمل جامعتها ..

// خاله ترا اختي سهند تعرف الصح م̷ـــِْن الخطأ ومستحيل تنزل راس ابويه مهما يصير والكل يعرفها ليش تحرميها من مستقبلها مو حرام عليج باجر عكبه انتي هم يجوج بنات هم راح تخليهم كاعدات وتزوجيهن ..... وبنتج هبه هم راح تخليها كاعده...؟

جاوبتها زوجة ابوهم ميقات بحده وغضب

/// انَـتي اسكتي لجج العاگرر خلي نشوف م̷ـــِْن يجوج بنات انتي شراح تسوين اني احجي هيج علمود لٱ تجيبلنه العار ونتفضح بين الدواوين واحنه بيت شيوخ شيحجون علـّى ابوج م̷ـــِْن يدرون بنته طالعه بغير محافظه وتدرس وحدها هااا ..

التفتت علـّۓ ابوهم واردفت بغضب مكتوم // ابو جاسم اني احجي لمصلحتهم بعدين مو هايه تكريت الي بيها ا.....

قاطعها ابوهم الشيخ عبد الجبار بصوت عالي هز اركان البيت وبث الرعب بقلب ميقات ..

// ميقااااااات .... ماا اريد ولا كلمممه حرف واحد ترحيين لبيت اهلللج لٱ اطلعيني م̷ـــِْن طوري سهند تروح وتدرس بتكرييت والموضوع انتهى ...

طلع ابوهم وعافهم بفرحتهن وبقهر زوجته ميقات ..

باوعت علـّى ازل بحقد وكالتلها بكل قسوه متجاهله مشاعر هذه الشابه الي تبلغ عمر 22

// شووفي لج تحطييين راسج ويايه ترررا اكسرلجياااا وكولي ميقات مكالت يا عاككر الخلل بيج وانتي تذبين اللوم على فراهد ... اي كلمه منج منااا وهيج تعرفين شلون اعاقبج ان ما خليت الديره تحطج علج بحلوكتهم ما اطلع ميقاات ...

تلألأت الدموع اليتيمه بفيروزية ازل .. كتمت دموعها بقلب مكسور وخاطر مجروح سحبت اختها وراحت لغرفتها وهيه تحجي ويه اختها بكلام فاضي وشلون راح تدرس بتكريت وشلون راح تعيش تحاول تتناسى كلام زوجة ابوها الجارح ...

_________

انتشلها م̷ـــِْن شرودها وبكائها صوت أذان الفجر الهادئ ..

صوت تقشعر لهُ الابدان ..
ينتشل المؤمنين م̷ـــِْن نومهم لممارسة عباداتهم المخفيه مع ربهم ..

•اللّـہ̣̥ اكبر •اللّـہ̣̥ اكبر .........
اشهد ان لٱ اله الا •اللّـہ̣̥ .. اشهد ان محمد رسول •اللّـہ̣̥ ....

صوت الأذان ذكرها بأختها شلون جانت تكعدها علـّۓ صلاة الفجر وتروح هيه وياها وابن عمهم يوسف للجامع .. ويصلون ويبقون يقرون قرأن الى بزوخ الفجر .. وظهور الخيط الابيض يلا يرجعون لبيتهم ...

ضاقت بيها الغرفه ..

طلعت للبلكون (الشرفه) اتنفست بضيق ..
مخنوكه والدنيا ضاقت بروحها ..

لبست عبايتها وطلعت م̷ـــِْن الشقه ودموعها ما وقفت ابد

اخذتها اقدامها لمصدر صوت الاذان ..

كل ما تقترب يزيد بكائها ونحيبها

ما اهتميت الدنيا فجر والشوارع فارغه ... هدوء ما ينسمع اي شي فقط صوت الأذان وعواء الكلاب ..
والشوارع اشبه بالظلام ..

وكفت مقابيل الجامع وهيه تباوعله وتبجي .. تريد تلتمس الراحه والهدوء بالجامع ..

راحت علـّۓ بوابة المخصصه للنساء الخارجيه والجامع الكبير يبقوا للزلم ..
وللنساء اشبه بديوان كبير مقابيل المسجد مخصص للنساء يفتحوا فقط بصلاة المغرب والعصر وصلاة العيد اما هيج اوقات يبقى مقفل ..

دكت الباب وهيه تبجي تريد تفتحه تريد تفوت الى سكينة ربها ..

دكت علـّۓ الباب اكثر م̷ـــِْن مَـرّھٌ وهيه تبجي .. ٱڅڑ شي حجت بصوت مبحوح اثر البكاء وهيه تضرب علـّۓ باب الجامع ..

/// افتحو .. افتحوا البااب ..... افتحووا البااببب اريدد افووت ..مخنووكه والله ...اريد اختتتي ...افتحووولي البااااب ...

صارت تضرب على الباب بكل عصبيه وهيه تبجي تشكي حال افؤادها بدموع ما الها فائده ..

عم المكان الهدوء سكنت واوقفت شهقاتها وبكائها ... صوت المؤذن فقط الي ينسمع ...
وصوت الغريب الواكف وراها على بعد كم خطوه

ايها الغريب ...
اهديك اجمل الكلمات في لحن العشق المفاجئ ..
اهجوكَ بفخر العشاق ورمز الوفاء ..
ايها الغريب
أخارج انت من بواطن عقلي ..؟ ام تحاول الغزوا على ما تبقى لي من فؤادي ..
انها صدفةٌ ..
جمعت قلبين في دوامة الصعاب ..
صدفةٌ ..اربكت حال اولائكَ الشباب ..
صدفه .. تحن لمشاعرهم يوماً .. وترتكب ابشع الخطايا في ضل ارواحهم...

بقلمي ...

التفتت لمصدر الصوت الجهوري الغاضب المتفاجئ من الانثى المجروحه الواقفه امامه بحال مزريه ..

//شديصيييير هنننا ؟؟ منوو انتي ؟؟ وليش تاادكين بااب بيتيي ...

______________
ادري البارت قصير

بس تحميسه هذا 😂 عبن احبنكم من اشوف تفاعل عليه يلا انزل ترا ها 🙂خلينه صريحين 🙂🙂🌹😘

دمتم سالمين عسلاياتي
حفصه الهاشمي