زمهرير الاوجاع الفصل الحادي وثلاثون 31 - بقلم قدر ال هاشم

زمهرير الاوجاع..

حفصه الهاشم...
صلوا على نبي الرحمه ...ودوسوا النجمه..

ــــــــــــــــــــــــــــــ

ذكَرْتُك فانهَلَّت عَلَيَّ مَدامِعي
وعادَت إلى قلبي الكَليمِ مَواجِعي ‏بكَيتُ،
وليتَ الدَّمعَ يُرجِعُ ما مضىٰ‏
ولٰكِنَّ يَومًا قد مَضى غيرُ راجِعِ....

ــــــــــــــــــــــــــــــــــــــــ

قدر

باوعتلها بأستغراب وهيه تباوعلي ومنتظره ردة فعلي.. //يا سيف قصدج كرايب سهنند لو غيره..

جاوبتني وهيه تلف شعرها على اصابيعها..اي اي كرايبها اني حجيت ويه اخته وهيه كالتلي انه اكله يجيج خطابه ..

اتقربت عليها وعيوني مفتوحات عليها بصدمه.. ياا ياا ولج علياء يعني تتزوجين الي تريده سهند عززا..

دفعتني بسرعه و وكفت على حيلها وهيه تباوع على الباب بخوف. انجببي انجببي ماايريدهاا ما يريدهاا مجرد نززوه بعدين انتي شللج دخل وللج هااا والله اذا طلعتي هذا الكلام لاحد الا احرك عليج يم اووس وكولي عليااء ماكاالت..

وكفت بعصبيه واني اخزرها.. اذاا خايفه لعد ليش تريدين تزوجي ليش خايفه اذا انتي ما مسويه غلط هاا..

يوووو قدر ترااا زودتيها انتي شللج دخلل بيني وبين بنت عمي شوو ولي من كدامي..

دفعتني وراحت لغرفتها.. مع الاسف عليها هاي سهند عود معتبرتها صديقتها وهيه راسمه على ابن خالتها.. الله اليستر من عقلها.. علياء بليه سوده ما تعوف الشي الا تاخذ نصيبها منه..

صعدت لغرفتي وعلياء شلشت تفكيري.. اكول لسهند لومالي علاقه على كولتها اني شكو هيه وبنت عمها ينجازون..
بس والله خطيه سهند مخدوعه بيها وبكلامها المعسول ..

...........

مرت يومين هدوء بيها..

اوس نفسه ويايه ما تغير بروده.. المخوفني هدوئه ..بس لا يسويها ويتزوجها لنور اجذب على نفسي اذا اكول ما احبه.. اذا صارلي كل هالقتره يمه شلون ما احبه واتعلق بي..!

صعدت العصرحضرتله ملابسه بالحمام اعرفه بهيج وقت يرجع تعبان يسبح وينام شويه...
رحت بغرفتي توضيت وكعدت اقرا قرأن الهي نفسي احسن من التفكير الماكل راسي.. شويه وسمعت صوته يصيح.. قدررر ..قدرر وين الملاابس ..

سديت القرأن ورحت عليهِ واكف بالممر يم الحمام ومتخصر بأنزعاج ..الظاهر يريد يسبح.. قدر// صحتني..؟

باوعلي بعصبيه عاكد حواحبه البرنسيس..
ويين ملاببسي شلوون يعني شلتي ايدج من مسؤليتي لا ملابس لا اكل لا صخاام شبييج تخبلتييي..

باوعتله بأستغراب .. لو هوه متوهم لو اني..؟

جاوبته بأستغراب واني افوت للحمام.. شلون هستوني حطيت ملابسك بالحمام ..

باوعت على تعلاكة الحمام ماكو شي..!لا ملابس ولاهم يحزنون.

. طلعت من الحمام وباوعتله بغضب.. هاي اكيد انتتته شاييلهن موو ..هستوني حطيتهن بالحمام وطلعت انته شلتهن مو..؟

مسح على وجهه بعصبيه وهوه يستغفر.. لاحو ولا قوة الا بالله لج بابا اشيلهن لييش يعننني اني مسمووط ابو ابويه ما اصدك اوصل للبيت دارتاح اكعد العب ختيلان وياااج..!

فات للحمام وسد الباب وهوه يصيح..حضريلللي الصخااام بسرررعه..

صفنت على باب الحمام بأستغراب..شنو بيتهم بي جني..!

هسه خليت الملابس متأكده من نفسي خوما خرفيت يعني.. رحت طلعتله ملابس وانطيتهن اله.. وبعدني مسطوره بس لايطلع البيت مسكون عاد يكمل حضي ..

ـــــــــ

فات للغرفه ينشف بشعره واني اباوعله بخفيه واسوي نفسي داقره بالقران ..
شمر المنشفه على الميز وراح نام على بطنه.. زين هذا مايعرف هاي نومة الشيطان..! عشتوا اني شدخلني بي هوه والشيطان واحد

...خلي يولي هوه ونور سديت القرأن وكمت اخذت المنشفه وشريتها.. رجعت للغرفه وكعدت بعيد عنه شويه.. صفنت على ملامحه..مو حلو ..

هههه شكله يجذب صح بس ملامحه عاديه ملامح اي رجل شرقي مابي هذاك الاختلاف او الشي المميز..
شبيها نور الزماله ما تنكلع على شاب من عمرها عزابي لو عدها المتزوج احسن..!

مديت ايدي العب بشعره.. همزين عاد شعره ثخين مو اصلع..جان طلكته اني هههه

اوس// الظاهر عاجبج شعري.,.؟

باوعت عليهِ بسرعه... سحبت ايدي واني اشتت نظري عنه //لامو حلو.
عدل كعدته وسحبني من ايدي وهوه يضحك بصوت عالي حضني من ظهري وبعده يضحك..

اوس// قدوره صاير لسانج طويل..شبيج متغيره عليه ولج .,,ترا والله اني خطيه..

حركت اكتافي بعشوائيه احاول افلت نفسي من بين ايديهِ // اي اي صحيح خطيه انته الفقير واني المجرمه شنو رأيك..؟
جاوبني وهوه يحرك خشمه على خدي// والله صدكتي تعاي ابوسج من حلكج على هالكلمه..

دفعته بأنزعاج وكمت// اوووس شوو دوخر ..
عدلت شعري وباوعتله بضوجه// ترا اني زعلانه عليك لا تحجي ويايه زين..

ارتاك على ظهر الجربايه وسحب باكيت الجكاير وهوه يجاوبني // يعني هسه ما احجي وياج.؟

وخرت شعري ورا أذاني بغرور وجاوبته اي ممنوع..

جاوبني بعدم اهتمام وهوه يدخن خوش روحي سويلي جاي لعد..

فتحت عيوني عليهِ بغضب..هاي بدال ما يجي يصالحني لعد المسلسلات التركيه ومهند وما مهند وين راحوا..!
شفته يريد ياخذ التيلفون رحت سحبته من الميز قبل ما ياخذه ضميته ورايه واني اباوعله بغيض..

اووس ترا داكولك زعلانه غير تراضيني شبيك متغيير علييه ..؟
حط الجكاره بالنفاضه وهوه يضحك // هههه هسه ما فهمت تريدين ما احجي وياج لو اراضيج حددي داعرف شلون اتصرف..؟ صفن بعيوني واني هم بقيت اباوع بعيونه بهدوء..

والله هذولي العيون السود حرامات يروحون لنور الحقيره..

سألته واني اكتم دموعي صدوك راح تزوج نور..؟
تنهد بتعب ورجع ارتاك على ظهر الجربايه وهوه يباوعلي بصمت ..

بقيت اباوعله وطفرت دمعه من عيني مسحتها بسرعه ورجعت سألته.. الصمت علامة القبول..وافقت يعني موو اوس.؟

تنهد بتعب وجاوبيني //امي تريدها..

ــــــــــــــــــــــــــــــــــــــــــــــ

سهند...

مرت فتره عليه واني صحتي كل مازادها تنزل بالحضيض.. ماعرف يجوز من القهره الخلاها بيه سيف لو هيج حاله نفسيه..

مر اكثر من شهرين وهوه ماكو..يوسف الحقير ما يقبل يسويلي فيس بوك.. والتيلفون مالتي صاير مثل الترفك لايت ساعه يمي واربعه وعشرين ساعه يم ابويه .. يسوي عليهِ حملة تفتيش .. على اساس اني عندي درزن برامج هوه بس السيم كارت وهاي صارلي اسبوع دا الح على يوسف يقنع ابويه يشتريلي من هاي التيلفونات الجديده ام المس .. بس هوه هم متغير صاير حقير ويايه كل ما اكوله يكلي لا تروحين تصيرين مثل علياء ..

ومن اسأله شبيها علياء يكولي ولي ولي تعبان ومابيه حيل.. ماعده كلياتي دمرني..تجي فترات عليه حتى الحمام ما اكدر اروحله وحدي من وره الالم مالتهن.. ابويه نسه كل الصار ويايه وحار بيه من مستشفى لمستشفى .. ماعده عمي ابيو يوسف ابد مامقصر هم .. من تمرضت وشفت الخوف بعيون اهلي وابويه تندمت على معرفتي بسيف ..

شلون انخدعت بي ماعرف..

طول هالفتره ما خابر ولا سأل عني بسؤال واحد..لهالدرجه اني رخيصه عنده..!
مرات احقد عليهِ حيل واغلط عليهِ وساعات ياخذني الحنين اله ..

لايام الجامع والكليه..شلون جان يمشي ورايه الى ان اوصل للشقه معقوله كل هذاك الحرص الي جنت اشوفه بعينه يطلع جذب..! تعوذت من الشيطان ولفيت راسي ونمت.. باجر من الصبح عمو ياخذني للمستفى دنجيب التحاليل ..

ـــــــــــ

كعدت الصبح وعمتي ويايه ام يوسف فوتتني للحمام وطلعت.. ظهري اربعه وعشرين ساعه مقوس من احدب ظهري الالم يخف لو ابقه هيج لكم يوم يجوز تطلعلي حدبه واتشوه ..

لبست حجابي والعبايه شلت السبحه مال سيف بقيت محافظه عليها حتى العطر مالته بعده معلك بيها ..شلتها وحطيتها بجيب العبايه علمود كل ما اشتاقله اطلعها واظل اسب بي..

باوعت على المرايه الي بالممر ..شلون صايره خلقتي.. وجهي اصفر وجوه عيوني اسود.. الي يباوع عليه يخترع..

يوسف// ها سهونه بيج حيل تمشين لو اشيلج..

هزيتله براسي ومشيت بصفه..لزمته من ايده وجاوبته بيه حيل بيه..
عمو سعدون// يلا بابا تعاي يمي وانته يوسف امشي شغل السياره..

................

بغداد والازحام مالتها الي ما ينطاق..

بشلعان الكلب يلا وصلنه.. كعدت على الكرسي واحس الجاكوج يدك براسي .. عمو راح ديحجي ويه الدكتور ويوسف يمي .. ارتاكيت على يدة الكرسي بملل ويوسف كل شويه يسألني بيج شي تريدين شي..

بقيت صافنه على الارض واباوع على اقدام العالم هواي ناس دينتظرون هم الانتظار ممل ويتعب هم.. واني صافنه على الارض فاتوا شخصين من كدامي .. عطر واحد منهم جذبني حيل.. شامته هذا العطر..!

اي مألوف اليه ..
رفعت راسي اباوع عليهم بس ظهرهم يبين واحد شكله مريض وبالكوه يمشي والثاني ويا ..

اجه يوسف شايل بطالة مي وخطيه من الحر مكلوب احمر// هاج سهونه اشربي مي بارد شويه ينعشج..
باوعت عليهِ ورجعت نظري على هذوله الاثنين انتظرهم يلتفتون داشوف شكلهم ..

يوسف // شبيج تباوعين على الزلم نزلي عيننج استحي شوويه
جاوبته بملل// اليسمعك يصدك يمعود بس داشوفهم منو.؟

كعد بصفي شرب نصي المي والباقي مسح بي وجهه ليش يعني تعرفيهم .؟
ظلوا يحجون ويه فد كتور بعدين راحوا ما انداروا.. باوعت على يوسف بعصبيه.. كله منك ما التفتوا وما شفتهم..

باوعلي مصدوم واني شلي دخل عوفي العالم براحتها لاتظلين تببصين على الرايح والجاي..

اجه عمو و ويا التحاليل... كالعاده قلة شرب المي والادرار هم يقل عاد تصعد نسبة التسمم بالجسم وهذا كوله يأثر على الكلى..

عمو سعدون//يوسف هاك المفتاح شغل السياره وكعدوا على التبريد على ما اشوف هذوله الناس اعرفهم شويه و اجيكم زين ابويه.. يوسف..ماشي يابه لاتتاخر سمطنه الحر..

.............

بقينه ننتظر عمو سعدون وهوه تأخر حيل.. وهذا يوسف خبصني خبص عبالك اني كايله لعمو روح تأخر.. شي نص ساعه اكثر يلا اجه .. يابه وين تأخرت والله طكنه الحر..

جاوبه بحده هسسه مو اجييت حررك السيااره وانجب دانشووف تاليتها وياكم..
يوسف حاضر..

...............................

وصلنه للبيت وعمي طول الطريق معصب ماعرف شبي.. صعدت لغرفتي يادوب بس نزعت العبايه ونمت...

.... كعدت المغرب ونومة المغرب ابد ابببد مو مريحه.. من بيبي جانت تكولي ما اصدكها بس من انام واكعد المغرب اشوف حجم الكأبه التصيرلي يلا اصدك بكلامها..

كمت توضيت وصليت.. طلعت سبحته وصفنت عليها... اخذت نفس عمييق منها.. نفس العطر..!
شلون صدفه اني كل ما احاول انسا يجي شي ويذكرني بي.. مشيت اصابيعي على خرزات السبحه ودموعي تنزل بصمت على خدي.. شكد جان يشيل هاي السبحه جانت ابد متفارق ايده...

جنت اتمنى اخذها منه..وهسه اتمنى لو ما ماخذتها ...

لميت السجاده وكمت حطيت السبحه بالمجر واني ادردم على يوسف كله من ورا جان شفت هذا ابو العطر منو بس من ورا النك مالته نزلي عينج ونزلي عينج..ما خلاني اشوف شغلي عدل..

مر اسبوع حالتي اتحسنت على الادويه الاخذهن الحمدلله.. بس بعد عندي مراجعه هيج فحص عام للأطمأنان بس. لبست عبايتي وحطيت السبحه بالجيب وطلعت..

عمو سعدون اليوم مابي حيل ما راح يروح ويانه ... رحنه بس اني ويوسف.. وهذا بالطلعات اببد مو زين.. يبقه ينك فوك راسي يلا ويلا على اساس هوه بيدي التأخير..

كملنه طلعت برا انتظره وهوه فات يحجي ويه الطبيب.. وكفت يم السياره بالكراج والمكان هدوء ماكو احد .. طلعت السبحه وبقيت العب بخرزاتها ..وصافنه عليها ..

شويه ورجع نفس العطر..!

رفعت راسي بسرعه بلكي المحه .. مابين منه شي بس ظهره ...
صعد بالسياره وهوه يحجي ويه صديقه.. // الله يشلع أفادو مثل ما شلع أفادي هالمصكوع مابقه تحليل الا ما جابو على شيب الخلفوني ورني ور الله يور ابيو..

ـــــــــــــــــــــــــــــــــــــــــــ

بالنسبه للأحداث شنورأيكم بيها

.وبالسرد هم.. احبنكم جثير الجثير ..كومه الكوومه

دمتم بخير عسلاياتي

حفصه الهاشم