زمهرير الاوجاع الفصل الثلاثون 30 - بقلم قدر ال هاشم

زمهرير الاوجاع

حفصه الهاشم صلو على نبي الرحمه ♥

___________________

صفنت ثواني عليها احس جسمي برد من الصدمه والخوف ..
ساافر شنو؟ !! اخاف دتجذب عليه هاي! !

علياء شنو سافر يا سوريا هاي صدوك تحجين لو تشاق

لايابه يا اشاقه وياج هيه كالتلي مسافرين لسوريا بس اني فتحت الفيس وفتت على صفحته كاتب عليها موجود بالاردن
جاوبتها بنفاذ صبر يمعوووده خبلتيييني هسه اردن لو سووريا اثبتيلج على دووله

علياء هاي شبيج يااابه هاي بدال ما اكولج اخذي صفحته على الفيس وروحي وشفي

شلون ماعندي فيس ماعرف شلون اسوي
اي روحي ليوسف هسه اكيد عنده يلاا بااي هاي فوك حكه دكه

سديته منها وهيه تنتظرني اعتذرلها هسه اني حالتي مال اكعد اعتذر هاي هم بطرانه ...

شمرت التيلفون ونزلت على يوسف .. بس لا صدوك مسافر غير اروح عليهِ وين ما جان وهاللمره اني الي اذبحه بمكانه

فتحت الباب مداهمه على يوسف وهوه گلب عيونه بملل غير ادكين المهجوم
سهند //يوووسف طللع الفيس مالتك ماعرف شنووه شووفلي صفحة سيف بسررعه
جاوبني وهوه بعده على نفس نومته //يا سيف وخري من يمي هسه عندي شغ..

هزيته من جتفه بتوتر وجسمي احسه ديرجف من الارتباك //يووسف طللع الصفحه عااد هاي علياء دتكول مساافر ..
باوعلي لثواني عبالك ديستوعب كلامي عدل كعدته وعقد حواجبه بأستغراب //وهاي علياء شمعرفها بي؟ !!
//يمعود مو هيه تحجي ويه اخته يلا حباب بس بسرعه شوفه صدوك مسافر لو ديجذبون عليه ..

طلع تيلفونه وهوه يدردم على علياء اني كم مره كتلج لا تطلبين شي من علياء لا تحجيلها اي شي يخصج سرج خلي بينج وبين نفسج بس مطيه حماره مهجره ..
ديلا يلا بس طلع الحساب ..

ظل يگلب بالحسابات واني اطرش بالزفه هذوله البرامج والانترنت هستوهم جانوا طاشين ومو الكل يعرفلهن ماعرف علياء شجابها عليهن يوسف //هاااذه وينه وينه .. باوعلي وفاتح عيونه بصدمه ورجع باوع على التيلفون
//ولج هذاا صدوك مساافر ..!!

لزمته من ايده ونبتت اظافيري بيها //وييين مسااافر ؟
نتر ايده مني وهوه يصيح عليه ///ااخخ ثول اليثولج جللبه انتي اظافيررج گصيها ..
سهند//يمعوود دكول وين مساافر

//مكتوب الاردن هاج شوفي الصور ..
اخذت التيلفون منه واحس النار كبت بيه من العصبيه اني مشعول ابو ابويه هنانه وهوه مكضيها سفررات! !
باوعت لصوره هوه وصديقه وصوره ثانيه هوه واخو صدوك هذوله بالاردن ..
عصرت التيلفون بأيدي واني حابسه دمووعي بغضب اصبررلي سيييف اصبرررلي ...

هيج تسوووي بيه وتالي متالي تسااافر عاد لو يخاابرني يكولي راح اسافر راح اصخم اللطم. لا ساافر وهاهيه ... شمرت التيلفون على يوسف وعيوني انعمت من العصبيه ردت.
اطلع جان يلزمني يوسف // يخبله وين راايحه. شو باعيلي لا تروحين تعمين على نفسج هسه اني احجي ويا واوشفه ليش سافر. باوعتله بغضب واني اخنزر عليهِ

//مممنوووع تخاابره خلي يولي النذذل لا تخابره ولا تحجي ويا طبه طوب اني كاعده هنانه عباالك بسجن دراستي اكلت خرا بيها وابويه ما راضي عني والامه العربيه كلها مشتعله عليه حسره عليه اطلع للمحل اذا مو العالم تاكلني اكل بنظراتها ولسانها المسموم وهوه كاضيها سفرات سوريااا ارددن خلي يوولي مممنوع تتخاابره ..

يوسف باوعلي بصدمه وجاوبني //يولي يخبله يجوز عنده عذر اشو گلبتي على الرجال خلي نفتهم منه او
جاوبته بحده //لااا نفهمممه ولا يفهمننه. ممنووع تخاابره ولاتحجي وياا والله اذا حجيت وياا ازعل عليك وما احجي ويااك طوول عمري

عفته بصدمته وطلعت من غرفته. حقدت عليهِ النذذل اني كاعده هنانه متشعوطه وهوه كاعدلي ويه الاردنيين طلعت ميقات من المطبخ والجفجير بأيدها //يممه يممه منجن البنات شسووين ولج بغرفة الوولد اشوو سويتيها بلا ملح خري مري عليهِ ماا تستحيين

اني رايدتها من الله اشوف واحد اطلع حركتي بي. باوعتلها بنفاذ صبر واني اريد اكلها بنظراتي //اكولج هييي انتي شتقصددين بكلاامج هذاا اخوويه وافوت واطلع من يمه شوكت ماا يعجبني انتيي شكوو هاا لا تتدخلين ..انوب عليه بس ميقاات
شهكت بصدمه وضربت على صدرها //عززا العززاج ميقات التعرجج اشو ما تستحين اختج بالرضاع
قاطعتها بسرعه واني اعوفها واصعد //لا لا مو اختي بالرضاعه ميشرفني للاسف الشديد.

عفتها ادردم واني اصبر نفسي ما انزل اجاوبها سديت الباب قوي داطلع حركتي بي .. حقيرر طلع مساافر واني الغبيه هنانه ماكله راسي من ورا التفكير بي ...اني الغبيه الحبيته .. انوب لا انطاني خبر لا كالي راح اروح لا يضل بالج لا سافر وهاهيه .. بقيت اكل بنفسي من ورا القهر ..

مرت ايام هوه ماله اي ذكر ..حتى يوسف مكام يحجي بي كدامي واني كبريائي ميسمحلي اروح اسأله حجيت ويا لو لا واني اخير مره صيحت عليهِ من وا الافندي ابو الافلام ..

ايام تجر ايام ومرت شهرين هوه ماكو لاحس ولاخبر
ابويه كدرت اتقرب منه من جديد بس علاقتنه مو مثل قبل. بيها بيها شويه كهرباء بيناتنه بس احسن من قبل جان على الكومه والكعده رزاله لو كفخه .. اما دراستي فهذا الشي صار من الماضي من الاشياء المستحيله

مره وحده عمي سعدون حجه ويه ابويه علمود ارجع للدراسه وابويه كلب البيت بصياحه عاد عمي المسكين عافه وطلع زعلان .. ومن وراها محد فتح هذا الموضوع ويا ابد .. اني هم كعدت وسكتت هيه خلصت السنه اصلا .. كل ما اذكر دراستي اتندم على الساعه الحبيت بيها سيف ..
ومرات الحنين ياخذني لذكرياته ..
لو بالي يبقه يسأل عنه شديسوي هسه؟
مرت فتره جبيره معقوله حب وحده غيري لو اصلا هوه ديتذكرني ..

كل هاي الاسئله بقت معلگه ومالها جواب

_______________________________

قدر

مرت فتره واني واوس عبالك هستونه متزوجين تعلقت بي حيل ..
مرات اتذكر من جنت ارفضه واكوله نطلك نطلك اموت من الضحك على نفسي .. وبنفس الوقت خايفه من فرحتي هايه لان اعرف بنفسي فكر ماتمر عليه فتره هادئه الا تجي وراها مصايب ..

غسلت ايدي من الزاهي
اي اي اووس جاايتك ...

نشفت ايدي وصعدت فوك هذا الرجال ما يتغير اذا يصيح يلعلع صوته بكل البيت .. عبالك حاطله مكبر صوت .. فتحت الباب وفتت //هاا اوس صحتني ..؟!
باوعلي وعيونه مخنزرهن عليه //هااي شنوو؟ !

كاعد على طرف الجربايه ويهز برجله وشايل اوراق بأيده اتقدمت عليهِ وسألته بأستغراب
//شنو؟ ! مفهمت كام وكف مقابيلي وحرك الاوراق كدامي

//هااي شنو الاورااق. منووين جبتيهننن؟ !
ركزت على الاوراق مال الحمل مال ازل!!
باوعت عليه وفاتحه عيوني بصدمه شجابهن يمه؟ ! //اوس واله اقصد والله اني مالي دخل ..

ضربني على راسي بالاوراق وجاوبني بحده ///شنووو ماللج دخلل هااي الاورراق منوين جبتيهن ..
نزلت راسي وجاوبته //من غرفة فراهد .
بقه ساكت لثواني مجاوبني راح كعد وكام يدخن ..اوس // وانتي شلون تشيلين شي مو الج ها ..
قدر //والله اوس جنت انظف وهنه وا..

قاطعني بحده وهوه يخزرني //لوو حته تنظفين ما تمدين ايددج على شي مو الج ..خوماا احد يعرف بيهن
لا بس عمتي وفراهد .. فتح عيونه عليه بصدمه نزل راسه ومسح على شواربه
//لاحول ولا قوة الا باللع شنو هالبشريه هااي الماترررحم

اخذ الاوراق ونزل وهوه يصيح على امه يممممه ...امم فررااهد ويييينج؟ !
طكطكت اصابيعي بخوف وطلعت ورا بس لا يكوللها اني اخذت الاوراق لا يربي علاقتي شويه متحسنه ويه عمتي بس لا يروح اوس يعميها

وكفت فوك على الدرج واسمع صوتهم يجيني
هاا يمه شرايد ليش تصيح هيج؟ !
اوس //الحكيييني. لغرررفتج. .

شويه واختفه الصوت بقيت خايفه انزل جوه اخاف يكوللها اني النطيته الاوراق اني شفوتني بهاي السالفه غبيه غبييه .. لبست حجابي ونزلت علياء //قدررر تعالي همزين نزلتي .. باوعتلها احس وجهي صار اصفر من الخوف
//ها شكو؟ شصار شنو .. باوعتلي بأستغراب وجاوبتني شصاير مصاير اني داسألج شبي اوس معصب

جاوبتها بسرعه والله ماعرف حتى عليه معصب اليوم ماعرف والله
عافتني وراحت وكفت يم باب غرفة امها
والله راح اموت على ما اعرف معقوله جاييني خطابه ههههه

رجعت كعدت بالمطبخ وهيه تلعب بشعرها بنزاكه
اشو هاي الحقيره كالتلي نجي نخطبج بس لا صدوك سوتها ههههه
سحبت كرسي وكعدت بصفها //يابنيه ليش اجوج خطابه ..؟!

لا هاي صديقتي كالتلي راح نجي نخطبج لاخويه يجوز اوس ديحجي ويه امي علمود الموضوع لان همه اخوها يعرف اوس ويعرفنه كولنه بس اوس اقرب ههههه

قدر // والله ماعرف على الخير لعد حياتي انشالله اتم على خير .. بعدني داسألها على الولد جان يطلع اوس معصب من غرفة امه .. اخذ سويج السياره وطلع .. باوعتلي علياء مستغربه واني احس وجهي صار اصفر من طلعت عمتي ..
باوعتلي وهيه مخنزره عليه

ام فراهد // هاي انتي ولج شاايله الاوراااق ام ايدد الطوويله انتيي شااايله الاورراق من غررفة فررراهد. احججي ..
//عمه والله مو ق..

بعدني ما مكمله كلامي اجتي عليه بسرعه وضربتني راشدي والراشدي يسحب ورا ضرب عامي شامي ام فراهد //الله يهللكج يااا خررابة البيوووت شللج دخل وشلتيي الاورراق انتي الله يهللكج ..

سحبتها علياء وهيه تأيدها مو كتلج من البدايه وانتي ما تصدكين شسوت هاللمره شبيها. ام فراهد// مااخذه اوراق التحلليل مال ازل ومشوفتهن لاوس ... اردفت وهيع تباوعلي وعيونها تبث شرار .. شكلتيله بلااا هااا شعبيتي برااسه احنه الموتنه الطفلل هااا شكتيله وللج

مسحت دموعي واني افهمه //خاله والله مكتله شي اني حتى ما اعرف ازل
//الله شااالج كون ونخلص منج يالعرمه ولي من كدداامي اذا ما ازوج اوس عليج واخليج اطكين من الغيرره اصبريلييي هييين انه الج يا بنت العرررب انني اللج ..

عفتها وصعدت فوك. وعلياء تسألها يا حمل. ليش ازل جانت حامل ..!

فتت للغرفه شمرت نفسي على الجربايه وكعدت ابجي .. اني شلي دخل هيه وابنها شكد ثوله لو مشايله الاوراق شدخلني بهالسالفه الجاايفه هاي .. هاي من تدخل بما لا يعنيه لقيَ ما لا يرضيه استاهل ..

لزمت خدي بألم واني ابجي بس والله ايدها ثگيله اليكول ساطور مو ايد مره .. من البجي نمت بدون ما احس على نفسي .. مرت يومين واوس مسوي تقاعد من البيت ما يجي غير دقايق ويطلع وامه وفراهد ما يحجي وياهم .. والبيت متكهرب قبل يوم عمي ابو فراهد سمع بالموضوع واوراق ازل وحملها الظاهر محد جان يعرف هيه حامل وهمه ضامين عليهم .. ومن سمع عمي كلب البيت عليهم وصارت عركه شكبرها بين عمتي وعمي ماعدا فراهد الي اكل طن رزايل من ابو ...

وهم صارله يومين مايحجي وياهم .. واني اخاف انزل جوه لا تروح تاكلني عمتي وعلياء والله يسونها ويسون ابو ابوها

ورا ثلث ايام نزلت باليل واخذت دولكه المي ويايه البيت هدوء فراهد بغرفته وعلياء هم بغرفتها فتت للمر وصوت اوس من المطبخ يوصلني //يمه انتي غاليه عليه بس هاي السوالف حرام تسويها تتعاقبين عليها يا عييني انتي من ضميتي علينه حملها وهيه اربع اشهر ماعرف خمسه اي واحد يسمع يروح باله بعيد عباله انتو الي قتلتوا الطفل زين ..

جاوبته عمتي بخوف // لا يمه لاتكولها شنو هالحجي هذا. يمه هذا قضاء الله وقدره اني شلي دخل ..
اوس //يلا مصار شي حبيبه ..
ام فراهد // دام دنحجي على الحمل يمه مريتك صارلها شكد ماكو لا حمل ولاشي وسمعت من ابو عثمان بيت ابو نور رادين لبيتهم دخلي اروح مشايه عليهم واخطبكياها هاا وليدي شتكول؟ !

تقربت على المطبخ اكثر داشوفه شراح يجاوب نورر! !
شوكت رجعت هاي مو وكتها ابدد! !

وعمتي لهالدرجه يوصل بيها الكره تروح تزوجه وحده ثانيه.
اوس //الله كريم يمه هسه اني ما مفكر بالزواج وقدر الايام كدامها تحبل وتجيب مابيها شي ..
ام فراهد // يمه باايره بااايره مابيها ضنه انه اعرف بالنسوان كولش زين دخلي انروح الاسبوع الجاي نخطبلك نويره اسم على مسمى العيون المكحله الجسم والجمال وانته رايدها ونفسك بيها من زمان شتكول وليدي اروح اخطبلكيها الاسبوع الجاي ...

حسيت صوت حركه مثل الديكوم رجعت للدرج بسرعه ودمعتي بعيني هوه ميكوللها ما اريدها اشو عبالك عاجبه الوضع ..! صعدت فوك ورجعت للغرفه حطيت الدولكه على الميز وايدي ترجف من الخوف والقهر بنفس الوقت معقوله يتزوج عليه لا والله اني ما اتحمل وحده تشاركني بزوجي

لا وهاي ورا ما حبيته هم والله اذا تزوج اعوفلهم البيت وارجع لاهلي وخلي هوه يطلكني ويتزوجها .. نزعت حجابي وشمرته على الميز .. باوعت على نفسي بالمرايه اني حلووه ..اي والله اني حلوه عيوني عسليه ..

سمرا على حنطاويه وين اكو احلا من هيج باوعت بعيوني على انعكاس صورتي بالمرايه بنظرات انكسار ..
بس هيه هم حلوه حلووه حييل هم مو شويه. .
ملامحها نازكه وعيونها هم عسليات بس مو فاتح ..

لزمت وجهي بأيدي وبعدني صافنه على انعكاس صورتي ..
اوس // شبيها مريتي ..؟

وخرت ايدي من وجهي بسرعه وباوعتله بأرتباك //ها ..هاي شوكت اجيت ..

تقدم عليه ولزم ايديناتي ثنيهن وكام يمسح عليهن بأبهامه جاوبني وهوه يباوع بعيوني وابتسامه خفيفه على وجهه //من جنتي صافنه على نفسج. ..شبيج اشو مرتبكه؟
سحبت ايدي من ايده ورحت على الجربايه //لا ماكو شي ..شعجب اجيت جان بقيت برا البيت صارلك شكد لا نايم هنا ولا تحجي ويايه.

اجه شمر نفسه بصفي وارتاك على ايده ويباوعلي //اي جنت زعلان عليج ..وهسه الشوگ ساكني سوك الج بعد شتريدين ..
امم خوش ..

رجع سحب ايدي وباسهن //شبيج اشو مو على بعضج ..سامعه شي صاير شي وياج ..؟
سحبت ايدي وغطيت نفسي عود اريد انام علمود يفك عني ياخه //لا بس اريد انام تعبانه ..

مجاوبني. ظل يباوع عليه وصافن واني هم غطيت راسي. وسويت نفسي نايمه بس القهره بداخلي اكلت كلبي اكل ..
معقوله وافق عليها .. وليش ميوافق هوه جان يحبها من زمان ونفسه بيها ..
وهاي فرصه اجته من الله ..

ااخ يحضج يقددر من كمت اريده رجعت نور ماكدرت ترجع من قبل ماييصير شي بيناتنه

شويه وحسيته يفتح بالكنتور وطلع من الغرفه يجوز راح ديسبح ..
ماصدكت طلع علمود اكعد ابجي .. والله احبه شلون يروح يتزوج عليه ..

عقلي بقه يصورلي اشياء وتخيلات واكعد ابجي عليهن .. ورا شويه فات وعطره سابقه .. اجه نام بصفي وسحبني لحظنه اني هم حظنته عبالك انطاني الكارت الاخضر علمود ازيد بالبجي ..
هوه هم عافني على راحتي ما سالني كام يمسح على شعري واني ابجي ..الى نمت ..

_____________________

علاقني بي توترت.

هوه يدري بيه اني سمعتهم بس ما يتجرء يحجي ويايه بالموضوع وهذا الشي ديدمرني .. ليش مديحجي معقوله وافق ..
والله ارجع لاهلي اذا وافق واخلي يموت قهر ..

ي وم الجمعه. رحنه لبيت عمهم وهاي الثانيه نروح على اساس دنغير جو خطيه نبتلي ويه سهند متاكل شي وكلياتها كابه عليها .. وابوها ويوسف شايليها من مستشفى لمستشفى ..

صعدنه عليها اني وعلياء نايمه بالفراش والكانوله بأيدهاسلمت عليها وكعدت بصفها العب بشعرها شعرها گاصته قصير ويه ركبتها .. وسرح كولش لايكلها مطلعها كوريه .. قدر // لايكلج الشعر القصير سوسه ..

ضحكت بخفه مابيها حيل حتى تحجي //ههه وهاي ميقاتو المندسه تكولي طالعه ولد ..
علياء // هيه تنلام بيج هههه ليش كصيتي يثوله صدوك طالعه ولد ..
قدر //لا والله كولش لايكلها

علياء /// من احجي اني انتي لاتحجيين ززين

سكتت ماجاوبتها حتى اسلوب ماعدها متخبله فرد مره هاي

سهند وانتي شبيج انهديتي عليها قابل رئيس الوزراء حجه ...
علياء //اي اي ما احب احد يقاطعني.
سهند //بعدج تحجين ويه هند ..

اي بعدني. اني اكولج سهند انسي عاد طلعي من بالج هوه مو سافر وعافج الزمي كرامتج وعوفي لاتبقين هيج علموده لا اكل لا شرب تخبلتي ترا

ايدت كلامها قدر //والله سوسه ترا تعبتي كولش انسي مادام هوه عافج وسافر. الله ما كاتب الكم قسمه.
علياء اول مره تكولين شي بي خير ..

دارت راسها على الصفحه الثانيه ودموعها كامت تنرل بصمت ... ماجاوبتنه شكد حجت وياها علياء عوفي وانسي وهيه بس ساكته بالليل خليناها تاكل فد لكمه لكمتين بالكوه خلصنه عشه

ورجعنه للبيت والوضع بيناتنه باارد نفس ماهوه .. صعدت فوك وهوهم صعد قبلي. غير ملابسه ونزل يم فراهد غيرت ملابسي وكعدت امشط شعري .. وافكر بأوس ..اشو صارت سكته على موضوع نور لو ديشتغلون من ورايه ..!

قاطع صوت افكاري صوت تيلفونه ديدك .. كمت اخذته دانزله اله ..
لفت نظري اسم نور! !!

رجعت سديت الباب وباوعت على الرقم مكتوب نور! !
معقوله نور نفسها! ! قبل ما تنتهي المكالمه جاوبتها وخليته على اذني واني ارجف من الخوف. احاني صوتها النااعم الي يسمعه يكول هاي دتتموع ولا عبالك صوتها الطبيعي هيج //الوو اووس وينك. اخابر عليك ماكو ..

بقيت ساكته ومصدومه اخابر عليك ماكو شنو؟ !
يعني ديحجون سويه صارلهم فتره! !
حبست دموعي وجاوبتها //الو اني مرته مو اوس ..

سكتت شويه ورجعت جاوبتني بصوتها النااعم //هاا غدر انتي اي اي حجالي عنج شعجب ماراجعه لاهلج. مو كالي اوس راح يرجعج ..

عضيت شفتي بقهر وغمضت عيوني احاول ما ابجي .. لاتبجين قدر لاتبجين ..

فتحت عيوني صار كدامي وهوه يباوعلي بصدمه وفاتح عيونه على وسعهن ..
باوع على التيلفون ورجع باوعلي بأستغراب //قدر شدسوين ..؟!

نزلت التيلفون من اذني وهايه بعدها تصيح بمياعه الو والو .. انطيته التيلفون بكل هدوء احاول اسيطر على الالم الديعتصر گلبي انطيته التيلفون وهوه بعده صافن عليه ديترقب ردة فعلي عفته وطلعت من الغرفه بكل هدوء فتحت باب الحمام وقفلته عليه ...

باوعت على نفسي بالمرايه ارتجيت على المغسله واني اباوع لانعكاسي بألم وغضب بنفس الوقت ..
اوس وقدر لا لا اوس ونووور اوس نور

انتي مجرد مطبه بيناتهم مططبه قدررر رفعت اصبعي بتهديد واني اهدد بأنعكاس صورتي ديريي باللج تبجيين قدرر ديري باالج تبجيين تستااهلين علمود لاتحلمين زاايد تستاهلين ...
كعدت بالكاع ودموعي خانوني حطيت راسي بين رجلي وكعدت ابجي اكيد يرجع يحجي وياها وكل هذا الوقت هوه مستغفلني ويحجي وياها من ورايه ..

طاح حضي اي والله اني الغبيه الوثقت بي .. مادام يحجون اكيد راح يخطبها قابل تعوفه هيج ما اعتقد
مرت ساعه اذا مو اكثر واني كاعده وصافنه بالحمام ماعرف شسوي اعوفه وارجع لاهلي احسن حل كمت غسلت وجهي عيوني مورمات من البجي نشفت وجهي وطلعت البيت سنننطه يجوز ناموا ...

فتحت باب الغرفه على كيفي نايم ومغطي نفسه !! هه حتى ماكلف نفسه يجي يدك الباب عليه متت عشت لا غطه راسه ونام
الظاهر نور كولش متعبته الله يعينه ..

اخذت بطانيه ومخده ونمت على الكروتيه ماناقص انام يمه بلا احساس ولا مشاعر ...

غطيت راسي والقهر كاتلني ماكلف نفسه يحجي ويايه يبرللي .. معقوله لهالدرجه مو مهمه عنده!!!
وكل هاي سوالفه وحركاته تمثيل .. غمضت عيوني قوي امنع نفسي من التفكير. القاتل ... عسى ولعل انام ..

..........

كعدت الصبح باوعت على نفسي نايمه على الجربايه هه والله ومكلف نفسه عود مسوي خير كمت لميت الفراش وفتت للحمام ... هوه من الصباحيات يطلع معقوله يروحلها يكحل عينه بشوفتها ... طاح حضك وحضها ... اذا هيه سمحت لنفسها تحجي ويه واحد متزوج شنو من بنيه لعد ..

نزلت جوه احسن ما عمتي تكب عليه واني الي بيه مكفيني ما ناقصني طلايب ..
نزلت جوه وسهند جانت جايه يمهم فرحت كولش واخيرا شويه اغير جو وياها جانت تسولف وياهم بالمطبخ ومنطلقه ضحك وشقه الله يريح بالها ...

سلمت عليها وكعدت يمهم .. كضيناها سوالف وضحك واني هم اندمجت وياهم دانسه همي ..

العصر جان ترجع كالت لا تروح المندسه تحرك ابويه عليه قصدها ميقات هههه ..

اجتي علياء وشمرت نفسها على القنفه بتعب وهيه تضحك ويه نفسها ايييه هيه هاي العيشه تحبين واحد وتحطي ابالج ويجي يخطبج ورا فتره عمي ابوس ايدي وجه وكفه .

باوعتلها بأستغراب وسألتها مع العلم ادري بيها راح تكولي لا تسأليني واني. واني تخبلني عبالك رئيس وزراء..
قدر//ليش انخطبتي؟ !

اي يابه راح يجون يخطبوني هالليومين. متفقين اني واخت العريس ههههه بس عاد يجون يحجون ويه اهلي

ها على الخير وانتي تعرفينه للولد شيشتغل ما يشتغل عمره اسمه رسمه ...

اي اي اعرفه شغله خير من الله ماعدا الورث هههه اسمه سيفييي هههه سييف ...

_______________________

بنوتات انطوني رأيكم بالسرد مالتي اذا مثل هذني القصص مال اسمي فلانه وزني هيج شعري هيج اذا مثلهن داعتزل الكتابه

بنوتات الي مشافت قصتي الجديده خلي تروح تشوفها بصفحتي اسمها منعطف واحد قصه حلوه ومختلفه .

.مو[وده بهذا حسابي

ورأيكم الحلو وتفاعلكم ايضا ♥ دمتم سالمين ♥

حفصه الهاشم